عقد البنات

البارت 9

#عقد_البنات
البارت التاسع
للكاتبة لبنى الموسوي

أحلامِي بِكَ لا تَنتَهي ، إنَها كَـ رَحمَة اللّٰه الـ واسِعة كُلما إزدَدنا بِها يَقينًا كُلما أغدَقَت عَلينا خَيرًا وَفِيرا . ✍🏻
_________

على صوت صراخي التموا اللي بالبيت ، همَ يتساءلون شنو صار جاوبينا واني اصرخ على صاحب الإتصال اريده يفهمني شديصير ويا عمو صادق

شوية وسمعت صوته قريب من الموبايل صحت بـ لهفة

- جاوب فدوة جاوووووووب ، شبيه شنو تگول ماااات

- ثقي بالله ما اعرف التفاصيل بس أبوچ تعرض لإعتداء مقابل معهد ××××× طاعنيه بالسكين ومفلشين سيارته لا باقي جام لا تايرات لا صبغ واحنه حاولنا نبلغ أهله عن طريق موبايله فـ لگينا أخر إتصال اله الظهر وياچ ومكتوب ؏ الرقم بنتي الثالثة رادوا يتصلون عليچ ما عنده رصيد عاد نقلت الرقم بـ جهازي واتصلت حتى أبلغچ هسه أخذوه لمستشفى ××× ×××× يگولون ما بيه نفس لأن تأخروا بـ نقله للمستشفى مثل متعرفين بـ هذا زمننا اليمد إيده للمساعدة يبتلي على عمره فـ محد قبل يتحمل مسؤوليته إلى أن فقد الوعي عاد خطية اثنين من شباب المنطقة تبرعوا ينقلوه على مسؤوليتهم ، ان شاء الله يعديها على خير ويگوم لكم بالسلامة

- فدوة عمو گول الحقيقة أبوية مات ومدتگدر تحچي

- عمي و الله ما گلت إلا الحقيقة الشباب قبل ليشيلوه گالوا ما بيه نفس بس تفائلوا بالخير و ربكم موجود

تشكرت منه وسديت الخط ارجف ، صاحت ماما شبيه مروان تجاوزتها سحبت لي حجاب من الزاوية وجاوبتها اني و اركض مو مروان عمو صادق

عطاء.. لچ شبيه صادق وانتِ وين مولية غير تفهميناااا

ورد.. بعدين ماما رايحة اشوف خالو بلكي ألحگ عليه قبل ليطلع لازم نروح للمستشفى

عشق.. طلع خالو و الولد همْ طالعين ماكو أحد بالبيت

هبة.. روحي لأحمد توه خابرني موجود يصلي يلا يطلع

بس حچتها فتحت الباب وركضت حافية منا لما وصلت لبيت عمتي ميسم رجلي انتهت ، دگيت الباب حيل طلع هوَ بـ إيده گلاص الچاي باوع لي مستغرب المنظر الكنت عليه سأل شنو هذا حالچ صليت له الموضوع صلي

- لا يا الله تحچين صدگ !!!

- استعجل أحمد فدوة استعجل ترى لو صار له شي أموت

رمى الگلاص ؏ الرف الـ بالباب ودخل مستعجل ، اجت عمة تستفسر ؏ الحادث بعدني احچي لها بـ إرتباك طلع يركض تقدمت ؏ السريع وگفت بـ طريقه

- وين ؟!! اجي وياك

- وين تجين ارجعي للبيت بسرعة اني شـ يصير اتصل

- والله إذا ما أخذتني اركب سيارتي و اجي وراك

ميسم.. أخذها يمة ترى تسويها