#عُقد البنات
البارت الثاني والأربعون
للكاتبة لبنى الموسوي
ركضت جابت لي العباية حطيتها على راسي وطلعت
الشارع مخبوص الناس رايحة راجعة مدري شبيها
دامشي اجى أحمد لازم ورد من إيدها ويدردم بـ عصبية
عطاء.. هاي وينكمممم
أحمد.. خالة چنت واگف بالطرمة وسمعت صوت العالم تصيح فـ طلعت اشوف شكو وهاي الجنية لحگتني
- نصيت عليها الدموع عشرة عشرة شبيچ ليش تبچين
أحمد.. مو شافت المرة ميتة وانهبطت
عطاء.. منو مات ؟!!
- هاي المرة جيرانكم بيتها يصير براس الفرع
- يا مرة
- والله حتى مـ لحگت اعرف شي بسبب ورد بس سمعت صوتها وراية تبچي جبتها واجيت لتاكل هبطة
سحبتها من إيدها للبيت انطيتها الأختها وناوشت الخبز الأحمد .. طلعت اتمشى وياه داشوف شصاير
- فجأة أشر هذا البيت الـ رصاصي
- شبيه !!!
- هيَّ صاحبته ماتت
- باوعت بـ صدمة هذا بيت حجية حفصة معقولة ماتت
تركته وسرعت بـ خطواتي
وصلت لـ باب البيت الزلم والنسوان ملتمين بالممر
دخلت بـ تردد بعدها رجلي معتبت العتبة گلبت معدتي
رفعت إيدي سديت خشمي بيها شنو هالريحة المقرفة
كلما أتقدم أكثر كلما تزيد أكثر وأكثر
رغم كتمت حتى النفس بس ميفيد كأنما ريحة فطيسة واتعس ماكو هيچ لعبان نفس بعد
فتحت عيوني من الموقف الصار گدامي حجية حفصة واگعة بنص حوشها العيون مفتوحة على وسعها والشكل صاير اشبه بالرعب بحيث ملامحها متغيرة لو ما اني واگفة بـ بيتها مكنت عرفت هيَّ هاي نفسها حفصة
ظليت بـ حالة ذهول وصدمة معقولة صدگ ماتت !!!
من بعد مسقط النظام ونفذت بريشها يأست بيني وبين نفسي گلت مستحيل يبرد گلبي بيها وحق الناس الـ ظلمتهم وعلى راسهم عمو أبو وسام ضاع وانتهى
وهسه رب العالمين رد عليَّ .. ماكو حق يضيع عنده ولو بعد حين وهاي حفصة ماتت وهيَّ بـ حضن بيتها
- نفضت الأفكار من راسي وتقربت من جيرانا أبو رضا شصار شلون ماتت حفصة
- والله ما ادري بس مبين صار الها فترة ميتة ومعرفنا إلا اليوم بعد مطلعت الريحة من بيتها
- يااا واني اگول شنو هالريحة الكريهة
- دشوفي شكلها شلون مگلوب الله يعلم شگد صار الها وشلون موتة بالبرد و ع الگاع لو بـ فراشها أرحم
مـ تحملت الريحة أكثر
رجعت نظري عليها بـ حقد وغادرت البيت
طلعت للشارع اتنفس بـ صعوبة شلون موتة يربي ماتت مثل الكلاب وهمْ قليل والله بعد كل شي سوته
رجعت للبيت حاملة تعب الدنيا كله على إمتوني
بدون وعي اتصلت على خالة أم وسام عاد همزين هيَّ ردت الووو السلام عليكم
أنت تقرأ
عقد البنات
Historical Fictionلبوةٌ وثلاث صغيرات .. هُنَّ لها وطنًا جميل وهيَّ لهنَّ معنى الأمان يعيشنَّ في بئرٍ من الحرمان معَ ذلكَ الذي يُدعى أب ولكنهُ في المكرِ ذئب فَـ متى يُطلق لهنَّ العنان ؟!!....
