عقد البنات

البارت 16

#عقد_البنات
البارت السادس عشر
للكاتبة لبنى الموسوي

وكَيفَ لَـها أن تُهزَم تِلكَ الَتي أحبَت رَجُلاً قَلبهُ الصَخري في حَضرةِ حُزنها يَـتَحول نَـاراً ، تُطفئهُ دَمعَة . ✍🏻
____________

ورد.. عاندت قمر متقبل تطلع للمعازيم ومُصرة ما أكمل هالعرس يعني ما أكمله أخر شي ماما گالت وحدة من عندچن تتصل على أكبر يجي يحچي وياها ماكو غيره يگدر يقنعها ، طلعت عشق اتصلت عليه بـ إعتباره زميلها وبيناتهم تواصل ، شوية و اجى أشرت مرت خالو للبنات وطلعت رحنا وراها الوجوه مگلوبة .. مبين عرفوا قمر مـ تريد تكمل هالعرس و همَ هماتين مثلها بس مجبورين يگعدون لخاطر أكبر وإلا واضح عليهم مثل وضوح عين الشمس ما رايدين هالزواجة من أساسها

تقدمت بـ هدوء لزمت كتف هبة و گعدت بصفها ، أمها وعمة ميسم گاعدت يمها من الجهة الثانية فـ صرنا صف واحد ، باوعت أمه علينا بـ نظرة عدم رضا والتفتت على مرت خالو كل حچاية منها تطلع من طرف خشمها

أم أكبر.. اگول عيوني ذني عليش لابسات أسود ، ادري جايات لعرس لو لعزة

نيزك.. عمة العروس أبنها توه مستشهد والبنات لابسات فُستان أسود يعني عادي هاللون ما مخصصيه للحزن

أم أكبر.. هيَّ مو هذه الخطيبها مات قبل كم شهر

نيزك.. استشهد مو مات

أم أكبر.. نفس الشي المهم النتيجة .. حچتها و رجعت باوعت علينا : بس والله مـ يصير إذا هنَّ حزنانات عليش يجن للعرس چان ظلن بالبيت أحسن ما يفگرن العرسان بلبسهن هذا ، يعني مثل مـ تعرفون لون الأسود فاله مو زين على العريس لو عاجبچن تطيحن حظ أبني وبالنتيجة حتى حظ بنتكم يطيح وياه

نرجس.. والله مو الأسود اليفگر العرسان انتِ يمة راح تفگريهم بمشاكلچ گولي على وحطي رجلچ بالگاع شادة حزامچ على الطلايب على يا مال فوگ ما كاسرة فرحة هالمساكين بـ احلى يوم بـ عمرهم اجيتِ الدور تغثين الوادم الحزنانة على أحباب گلبها ادري شـ رايدة منهم خاف طابات لبيتچ وما اعرف ترى هذه يسموها صلافة خليچ محترمة حتى احنه همْ نحترمچ ، استحي عاد

نيزك.. عممممة

نرجس.. وعِمة ما جاي تسمعيها من اجت لسه وهيَّ تنث بـ هالسم ومملحگة ، خلصت من بنتچ الدور إندارت على ميسم وهالمسكينة الما لحگت تفرح بزواجها خل ينكسر خاطرها شوية حتى تعرف كسر الخواطر شگد يوجع

أم أكبر.. هذه تعتبر إهانة و احنه خطاركم !!!

نرجس.. ومستحية منچ مثلاً حتى أنكر فعلتي اي اني متقصدة أهينچ ما عاجبچ أخذي أبنچ والله ومحمد وعلي وياچ ما عايزين عليكم بنيتنا ألف واحد يتمناها

أم أكبر.. هه ألف واحد !!! راح اسكت لخاطر أبني

نرجس.. والله يا ليت ، تسويلنا فضل لأن راسي صدع من طن الذبان و اني مرة صحتي على گدي