#عقد_البنات
البارت الرابع والتسعون
للكاتبة لبنى الموسوي
أبسطُ يَداي لكِ للمُساعدةِ عَلناً ، ، و في السِرِ أنا هوَ مَن يَحتاجُ إلى مُساعدَتكِ ، هيا أمسكيني . ✍🏻
________
غسلت إيدي ؏ السريع و ركضت لغرفتنا ، نبض مغمي عليها بالگاع وأهلي يم راسها يحاولون يفيقوها دفعت نظر من گدامي وگعدت أضرب بـ قوة على وجهها ، ماكو استجابة .. سحبت العطر من الميز رشيت على إيدي شممتها ما انطت رد فعل ، فتحت عينها بـ أطراف أصابيعي وجسيت نبض إيدها يربي صاير عدها إنهيار واضح هالشي بس شنو السبب وشصار وياها
عاطت بيَّ ماما : فوتي إتصلي على خالچ بسرعة خل يجي يساعدنا
گمت مفزوعة اريد اطلع رقمه إنثولت .. صار رقم نيار گدامي بـ سجل المكالمات للسهولة إتصلت عليه الحمد لله مـ تأخر بالرد ، شرحت له الموقف بـ ثواني وسديته
شوية ورن الجرس راح نظر يفتحلهم ، دخل خالو قبل ولده فقد أعصابه من شاف منظر أختي گدامه ، صرخ بينا يسأل عن سبب وگعتها ما عرفنا شلون نجاوبه أخذها لحضنه شالها وطلع حتى ما سمح لنيار يشوفوها
صاحت ماما وراه تريده ينتظرها ولا كأنه يسمع ، لبست الحجاب عدل وأخذت موبايلها گالت رايحة لصادق ياخذني للمستشفى سدوا الباب و روحوا لبيت خالكم
بس طلعت إجت مرت خالو يمنا ويا بيبي و قمر ..
نيزك.. شصار شبيها مو وگعتوا گلبي
عشق.. والله ما ادري ، بالغرفة گاعد تدرس وحدها شو فجأة صرخت بـ صوت عالي وفقدت الوعي
- دشوفوا المكان خاف سمعت شافت شي يجوز اجتها مكالمة زعجتها روحي دوري بـ موبايلها يا بنيتي
- اي صح عمة من الخوف ما ظل عقل بـ راسي
حچيتها ورجعت للغرفة أركض ، دورت جهازها شو ماكو يربي ، افتريت على نفسي ، شوية ولمحته يم الباب رحت شلته مغلق والشاشة مكسورة معناها السر هنا
انتظرته يفتح الشاشة سودة ما اشوف شي ، بالگوة يلا دخلت للسجل وفوگاها الإشعارات سطرتتي مدتخليني أركز بالمكالمات ، بعدني احاول أعرف أخر إتصال الها ويامن كان .. دگ الجهاز فتحته بدون ما اعرف منو
- الووو منو وياية
- اني ولاء صديقة نبض انتِ منو ؟!!
- أختها عشق
- شبيها ظل بالي دنحچي فجأة صرخت وانگطع الخط
- انتِ گولي لي شبيها اكو شي بـ كلامچ غثها
- اي ولچ عشق مصيبة مصيبة
- يا ستار يا رب دخيلچ مـ عايزين مصايب البينا كافينا
- والله ما ادري شـ گولچ بس اني داقرا للإمتحان واكو شي حيرني إذا ترك أو لا فـ دخلت لگروب مرحلتنا على اساس أنشر اسألهم لگيت الدنيا محترگة هناك صور نبض الشخصية منشورة بما فيهم صور عرسها وهنا الصدمة محد يعرف بيها متزوجة حتى اني ، وهمَ الأنذال ممقصرين فاضحين حياتها فضيحة وأخر شي ناشرين الها صور مخزية ويا ولد شاب ممبين شكله زين كاتبين هذا الشخص يصير صديق رجلها خانته وياه على فراشه ولهذا السبب انفصلت عنه
أنت تقرأ
عقد البنات
Historical Fictionلبوةٌ وثلاث صغيرات .. هُنَّ لها وطنًا جميل وهيَّ لهنَّ معنى الأمان يعيشنَّ في بئرٍ من الحرمان معَ ذلكَ الذي يُدعى أب ولكنهُ في المكرِ ذئب فَـ متى يُطلق لهنَّ العنان ؟!!....
