عقد البنات

البارت 6

#عقد_البنات
البارت السادس
للكاتبة لبنى الموسوي

عانَقتُ طَيفَكَ لَهفَةً حَتى أتَت شَمس الصَباح
نَهتَ العِناق
فَـ مَتى الِلقاءُ لِكَي يَطول عِناقي . ✍🏻
__________

دفعني وتحرك بسرعة ضرب على كتف الدكتور يتشكر منه وغادر الغرفة مباشرةً ، من الفرحة بعد ما اعرف شسوي حتى الكلام مـ يطلع مني ، تقدمت بـ اتجاهه مبتسمة نطقت الشُكر بـ صعوبة وطلعت ورى نيار

نسيت اني منو ونسيت اني وين ، ركضت بكل سرعتي بحيث ماكو بشر صادفني ما صفن على حالتي ، ما عولت أوصل لگيت نيار توه ديدخل للعناية من شافوه أهله يركض استقبلوه بـ خوف من إستعجاله ما گدر يرد عليهم ، تجاوزهم و دخل للغرفة بدون كلام

التفت خالو على ولده وزوجته يصيح هذا شبيه ، اريد اتحرك من مكاني حتى أطمئنهم ما اگدر حسيت نفسي بـ فلم سينمائي مو واقع والدنيا بكبرها تفتر بيَّ ، بعدني على هالحالة انتبه حيدرا لوجودي بالممر تركهم وتقدم لي سريع همَ هماتين بس لمحوني تبعوه

حيدرا.. عشق شبيه آريان

ناصر.. بوية احچي مو وگفتوا گلبي انتِ و ذاك الثاني

مسحت دموع المتقبل تتوقف وابتسمت بـ وجوههم ..

عشق.. فاق الحمد لله

نيزك.. فاق يعني فاق .. حچتها والصدمة على ملامحها
عليچ الله بنيتي بردي گلبي بالحقيقة ، ما اريد تحچين كلام ماله وجود

عشق.. والله العظيم فاق توه الدكتور حازم اجى علمود يبشر نيار و اني كنت وياهم بالغرفة

ناصر.. يا ربيييييييييييي

صرخها وگعد بالگاع إيده فوگ راسه شكله ممستوعب الخبر ، نزلوا ولده يردون يگوموه ميقبل ، أخذه له مدة على هالوضعية لما فاق من صدمته و نهض من كيفه ، من دون الكل حضني إلي حضنة من شدتها أضلاعي توجعت ، بچيت بـ صوت عالي و زدت بالنحيب بعد مـ سمعت صوت شهگته إخترقت مسامعي وهزت وجداني

ضغطت على كتفه بـ قوة و بست شعره من الخلف أكثر من مرة وراها أخذت أصبع السبابة مسحت بيه دمعته وهوَ داخل حضني ، رفع نفسه بدون ميباوع عليَّ إندار للجهة المعاكسة إلنا يمسح بـ وجهه ، باوعت على ولده مثله بالضبط منطينا ظهرهم و بس الكتف يهتز من شدة البكاء أما مرت خالو ساجدة بالگاع و صوت أنينها تارس المكان ، تجاوزتهم بـ اتجاهها گعدت يمها وسحبت زندها للأعلى بس رفعتها عليَّ حضنتني مفرفرحة ، حقيقة وگفت عاجزة عن مواساتها بـ هاللحظات الصعبة .

بقينا بـ وضع بس رب العالمين يعلم بيه ، لا لسانهم تعب من الإلحاح بالدعاء ولا عيونهم جفت من غزارة البكاء يعني هيچ بعد ما فقدوا الأمل بـ حياته وجهزوا نفسهم لخسارته ترجع رحمة رب العالمين وعنايته تحيط بيهم وتحييه من جديد ، فعلاً هالشي أشبه بالمعجزة