عقد البنات

البارت 26

#عقد_البنات
البارت السادس والعشرون
للكاتبة لبنى الموسوي

أينَ ذَهبَ وَعدكَ لـي
أهَكذا تُـداوي أوجاعـي ،
أتَرشُ المِلحَ بِـ يَديكَ على جِراحـي ،
أتُريدُ قَتـلـي بَعدَما إستَطاعَ حُبـكَ إحيائـي !!
لَقد كُنتُ قَمرًا لِـ سَمائِك وعندَ أول خسوفٍ كَسرتني .✍🏻
__________

~ « تساقط أوراق الماضي في خريف الحاضر » ..
< العودة إلى الماضي القريب >

قمر.. بعد عشرة أيام من زواج نيار نايمة بالليل بـ حضن أكبر وأمان الدنيا كله مزروع بـ داخلي تحرك أبني بـ قوة ملحوظة ولأن كنت ملتصقة بيه حس على حركته ..

- شلون يعني اني أخلص من حرشة الأم يجيني ابنها

- ههههههههه هسه مو زين ليش وين تلگى حرشة حلوة مثل حرشتنا منا قمرك ومنا ابنك اثنينهم ميتين بيك

- واني مصگوع بـ حب قمري وليثي ، اگول صدگ يولي مو چنچ طولتِ هواي شوكت يشرف الأسد وينور حياتنا

- ما ظل شي حبيبي أقل الشهر ان شاء الله

- الله يسهل عليچ ويفرحني بـ سلامتچ وسلامة ابننا

- آمين رب العالمين .. سكتت شوية : تدري عمري مجرد ما تجي الولادة على بالي أخاف كلش بس أرجع وأتذكر انتَ وياية ساعتها يختفى شكو خوف بـ داخلي

- لو اكو شي يخليچ تجيبين وتشيلين وليدچ بـ حضنچ بدون أي ألم چان جبته لچ ولو چان تحت سابع گاع بس هيَّ هذه الأمومة الله ما شرفكم بيها إلا لمشقتها

- واني ابد ما تذمرت من تعب الحمل وعندي إستعداد أواجه ألم الولادة بدل المرة عشرة إذا انتَ أب أطفالي

بس حچيتها إبتسم بـ حب ونصى يبوس بـ شفتي ..

- ول يابة شگد احبچ ، اموت على ربچ

- واني اموت عليك وعلى حبك الماكو منه بالدنيا كلها

- بيچ حياتي لو تعبانة
- هههههه بيَّ

تقرب مني بـ لهفة ترجمتها أفعاله و رغم راح يمر سنة على زواجنا بس ظل حب أكبر لقمره هوَ هوَ ما حسيت ملني أو نفر مني بـ يوم من الأيام بل على العكس تمامًا بكل مرة يتقرب مني ويتغزل بـ تفاصيل جسمي ينتابني شعور الكمال رغم النقص الموجود بيَّ وهالشي زرع بداخلي ثقة مُفرطة بالنفس بحيث صرت ما أخجل من منظر رجلي ولا أحاول مثل السابق أخفي حقيقة الحادث عن الناس وإذا رحت وياه لأهله وجلست بين الأقارب اتكلم بـ كبرياء وعزة بدون خجل بدون خوف بدون إحساس النقص الكان مسيطر عليَّ قبل لا يدخل أكبر لحياتي بس لأن اعرف اكو بـ ظهري رجُل مستعد يهد الكون إذا تجرأ شخص وحاول يستنقص مني

لمني بـ حضنه يمنعني أغادر فراشنا ، مسح على شعري وبكل رقة ضمني داخل صدره ، ثواني بسيطة فصلت بين الهدوء المصحوب بالحب الصخب وبين التوتر الحل على أكبر بعدما تلقى إتصال سريع من أهله تحديدًا من الوالد