عقد البنات

البارت 22

#عقد_البنات
البارت الثاني والعشرون
للكاتبة لبنى الموسوي

وَكَيـفَ لي أنْ أتَـخَلىٰ عَنـكِ مُلهِـمتي ،
أوَيَستَطِيـع المَـرء أن يَـتَخَلىٰ عَـنْ لِـب قَلبـهِ ؟!!. ✍🏻
_______________

عطاء.. عشق أمي شبيچ صدگ تحچين !!!

نيار.. لحظة عمتي ، شنو شـ گلتِ عيدي بلا مـ سمعت

عشق.. اريد أنفصل ..

نيار.. لاااا انتِ كلش زودتيها

حچاها وتقدم بـ إتجاهي سحبني من إيدي بـ عصبية ..

عطاء.. أبو حيدرا شنو السالفة مدتشوفهم احچي كلمة

ناصر.. مرة ورجال شـ عدنا متدخلين بيناتهم

نيزك.. ادري وين ماخذ البنية بـ هالليل ؟!!

نيار.. لحد يتدخل رجاءً ، زوجتي هذه عاقد عليها شيخ ومحكمة وعرس همْ بطلنا بعد مـ نريد أحمد الله يرحمه ما صار له سنة من استشهد ، مع السلامة

عطاء.. ناصرررررر

ناصر.. يا عيني مـ سمعتيه ديگول البنية زوجته وميقبل نتدخل لازم نحترم طلبه ، روح وليدي روح الله وياكم

صارت هوسة شـ كبرها بالصالة ، تجاهل الكل و طلعني لخارج البيت سحل حتى زندي ظل يوجعني ، دفعت إيده أريده يبتعد ماكو .. أخر شي شديت قبضتي على أكمام سترته وسحبتها بـ قوة مجرد ما وجه نظره عليَّ نزلت دموعي بلا وعي ..

- نيار إيدي ، دتوجعني

- لچ أنتِ الگاعد توجعيني أنتتتتتتتتتِ

حچاها و عيونه نطت للخارج من شدة العصبية بحيث حتى عروق الوجه والرقبة برزت عنده بكل وضوح ..

نصيت أنحب بصوت عالي ، مدري شـ صاير لي هالفترة لدرجة اني نفسي متعجبة من نفسي !! صرت أكثر رقة وأشد هشاشة ، قراراتي نهائيًا مـ مدروسة و رأيي دائمًا يصدر عن العاطفة بعيدًا عن العقل وحكمته أما الضعف فـ مسيطر عليَّ سيطرة تامة إلى أن وصلني لمرحلة ممكن من نظرة حادة أنرعب و أخاف !!!

سمعته صار يستغفر بـ صوت واضح ثواني ورفع حنكي بـ أطراف أصابيعه ، بس اجت عيوني بـ عيونه غمض وسحب نفس جدًا عميق يحاول يهدأ أعصابه بيه ..

- شبيچ شنو صاير وياچ ؟!!

- أبني ..

- واصلي الكلام أسمع

- إتصل بيَّ موجوع ويريدني اروح له بس متسمحولي

حك لحيته بـ غضب وسحب الموبايل من جيبه اتصل ..

- السلام عليكم أعتذر عن الإزعاج بـ مثل هالوقت لكن محتاجك ضروري إذا تگدر تجيني ، تمام راح اطلع لك

سد الخط وسحبني لخارج البُستان ، اسأل أريد يمعود وين ماخذني ولا كأنه ديسمع !! وصلنا لراس الشارع بردت مـ مرتدية شي سميك وتوني طالعة من الحمام حتى منظري مو مال طلعة ملابسي مالت بيت والنعال تكرمون بـ رجلي ، وگفنا ننتظر السيارة رفعت كف إيدي فركت زندي بـ وجع أحس البرد گاعد يدگ بـ عظامي