عقد البنات

البارت 27

#عقد_البنات
البارت السابع والعشرون
للكاتبة لبنى الموسوي

يَخونُكَ مَن أَدّى إِلَيكَ أَمانَةً
فَلَم تَرعَهُ يَوماً بِقَولٍ وَلا فِعلِ
فَأَحسِن إِلى مَن شِئتَ في الأَرضِ أَو أَسِئ
فَإِنَّكَ تُجزى حَذوَكَ النَعلَ بِالنَعلِ .
____________

عشق.. ردت اطلع وراهم وگفني صوت خالو يمنعني من الحركة ، إلتفتت عليه بـ خوف : بس خالو راح...

ناصر.. گلت خليچ بـ مكانچ

صادق.. بس أبو حيدرا ثلاثة على واحد يا دوب أربعة على واحد حرام

بـ عز قهره إبتسم للكلام ،
رفع إيده عمو صادق طبطب على ظهر خالو بـ هدوء ..

صادق.. اضحك يخوي اضحك الدنيا أخرها خلصانة

ناصر.. يلا گوم ارجع للبيت تعبت من العصر وانتَ على هالگعدة ، ما قصرت رحم الله والديك

صادق.. واعوف بنت أخوية وهيَّ بـ هالحالة !! مستحيل

ناصر.. بيك الخير خوية خل يجي ذاك العار يشوف ما ادري شـ گال لنفسه من عافها تنازع وراح يكمل عرسه

عشق.. خالو لحد الآن مداستوعب تصرفات أكبر أحس أكو غلط بالموضوع أو ؏ الأقل أكو شي غريب

نصى راسه و رفع كفوفه على جوانب شعره بـ جزع ..

ناصر.. واني همْ بوية اني همْ ، اني همْ

صادق.. گول يا الله حبيبي المهم سلامة بنيتك الباقي يهون

ناصر.. صادق أكبر من عمر 12 سنة ببيتي على سفرتي وبنص نسواني ، ما اريد احچيها ولا طبيعتي اعرف الناس بالخير الأسويه بس من اجى لروسيا ويا عمه الصغير ملابس ما كان يملك تصور بعده طفل بالمدرسة يشتغل عامل نظافة بالمطاعم علمود يصرف على نفسه ويأمن مستقبله ورغم ظروفي بذاك الزمن مو تمام بس جبرته يبطل وتكفلت بمصاريف دراسته وحتى إيجار الغرفة الگاعد بيها شلته عنه منا لما تخرج من الكلية ، الله يشهد على كلامي عاملته حاله من حال ولدي هوَ ونيار وآريان عندي واحد ما بيوم فرقت بيناتهم خصوصًا من گعدت وياه وعرفت الدوافع الخلته يفضل الغربة على بلده

صادق.. يعني تعرفوه من كان طفل ؟!!

ناصر.. داگول لك متربي ويا ولدي يعني شنو !! يعني طفولته عاشها بيناتنا وبعض الأحيان كان يبات بـ بيتي لـ هالدرجة اني مأمن بيه ، وهذا نيار ماكو يعتبره توأمه حاله حال آريان بل هوَ أقرب لأن حتى بالجامعة ما افترقوا إختاروا نفس الكلية وتخصصوا بنفس الإختصاص محبة ببعضهم أكثر من محبتهم للمهنة

زفر الهوى بـ قلة صبر : اني صوچي انييي صوچيييييي من أول اعرف أهله شنو أشيل له وحيدتي وانطيهيا ليييييييييش ، والله شنو أكبر غير ويختلف عنهم كافي تربى بين ولدي واني واثق منه دهاك يلا تفضل .. استلم شنو صار خل تفيدني هالثقة عود