#عقد_البنات
البارت الثالث والتسعون
للكاتبة لبنى الموسوي
وأعودُ من حَربِ الدموعِ مُبللاً
لإرى انتصاراتي بِدونكَ خاسرة
مُتكاسلٌ عن كُلِ حُلمٍ فاتني
مُتجردٌ من كُلِ ذِكرى عاقرة
امضي إلى اللاشيء أجهلُ غايتي
وَمُشتتٌ مثلَ الوجوهِ العابرة
في كُلِ مِشنقةٍ تَكونُ قَصائدي
وكَأنها في نُزهةٍ ومُسافرة
كَم كُنتُ احتضنُ الضَياعَ وانحني
مُتوسلاً بالعفوِ عِندَ المقدرة
محمد الطالقاني ..
_______
عشق.. رجعت نظري لماما صافنة على الجدران بذهول خفت عليها كلش ، تقربت منها رفعت إيدها إلي عرفت دتطلب اسندها ، مديت كفي لزمت بيه وغيرت اتجاهها حتى تغادر المكان ، خالو عيونه تتبعها بـ كل خطوة
طلعتها للصالة اكو كرسي مليان غبار أشرت تريد تگعد حاولت أمسحه منعتني ، سحبت إيدها مني و گعدت عليه مباشرةً ، بقيت واگفة يمها ثواني و سمعت صوت خطوات خالو بالصالة دخل يدورها بـ عيونها شافها گاعدة گال بابا عشق جيبي لي الكرسي الثاني تلگيه بالطرمة ، طلعت سريع جبتلهيا ورجعت سحبه من إيدي حطه مقابيلها و گعد شبك كف بـ كف يباوع عليها
ناصر.. توقعت منچ كل شي قمر إلا إنو تنصدمين من طلبي هذا وانتِ أكثر الناس تعرفين لو يبقى بعمر ناصر يوم واحد وتصح له فرصة يرتبط بيچ مـ راح يتردد يخطي هالخطوة حتى لو على حساب حياته
همست بـ صوت هادئ جداً : ناصر شدتسوي ، شدتسوي لخاطر ربك ليش دتأذيني وتأذي نفسك وياية
- احاول ارجع للماضي ، احاول اعوض ولو جزء بسيط من أيامنا النسلبت بسبب ولد الحرام الأيام اللي كان من المفترض أعيشها وياچ وبحضنچ ، تسانديني بخطواتي وتشاركيني بنجاحي ، تفرحيني بالأولاد الما تمنيتهم غير منچ انتِ بالذات ، أرجع للبيت بعد تعب نهار طويل تتلگيني بـ ضحكتچ الحلوة ، تزيلين تعبي وتنسيني مشاغلي ، أكل من إيدچ واستمتع بطعم طبخچ المذاقه يختلف عن أي طبخ ثاني ومن يجي أخر الليل احط راسي وياچ على مخدة وحدة وأنام واگعد على صوتچ ونظرة من عيونچ ، ربيتچ قمر وتعبت ، تعبت كلش بتربيتچ بعدني شاب مراهق وصرتِ بـ رگبتي مسؤولية ميحس بيها إلا المجربها ومع ذلك زرعتچ مثل البذرة داخل گلبي وسقيتچ من ماي عيني وبقيتِ تكبرين گدامي يوم بعد يوم مثل الزهرة الفواحة والزهرة إذا انقطفت من غير صاحبها ميبقى الها قيمة ، وقطفوچ مني بدون تعب ، سرقوا أحلامي وغرسوا خنجر الخيانة بروحي وعشت عمررررررر عمر ولچ تعرفين شنو يعني عمر واني متصور الزهرة مالتي انتزعت أشواكها من الغصن حتى يقطفوها بدون أذية الزهرة باعت تربتي الخصبة بتراب صحراء لا يروي ولا ينطي الحياة ويا ليت اكتفوا بـ هالشي لا أخذوچ من گدام عيني لبعيييييد وخلوني أخلص سنين عمري بالحسرة والمرض ، كل يوم من أيام حياتي وانتِ بعيدة عني يمر عليَّ سنة من العذاب والغيرة والقلق والدموع ، اي ولچ دموع رجال مشورب ومن أختلي بنفسي ما اگدر اسيطر على دموعي واني أفكر وينچ وشصاير بيچ وناصر مو بظهرچ
أنت تقرأ
عقد البنات
Исторические романыلبوةٌ وثلاث صغيرات .. هُنَّ لها وطنًا جميل وهيَّ لهنَّ معنى الأمان يعيشنَّ في بئرٍ من الحرمان معَ ذلكَ الذي يُدعى أب ولكنهُ في المكرِ ذئب فَـ متى يُطلق لهنَّ العنان ؟!!....
