#عقد_البنات
البارت السابع
للكاتبة لبنى الموسوي
سـ اكونُ عِلاجًا لأوجاعكِ
مَرهمًا لـ جروحكِ
نَجمًا ساطعًا لـ سَماءِ عَينَيكِ الصافية
لَم اتخلى عَنكِ ولَن اتخلى ، هذا هوَ وَعد الرجال . ✍🏻
________
نورس.. هذا شنو گال ؟!!
بالي ما كان وياها بعدني صافنة وراه من رجعت كررت سؤالها وعيت على نفسي و رديت بـ تلعثم ..
ورد.. هاا ، ااا العفو شنو حچيتِ خالة
نورس.. هتان حچى قبل ليروح مـ سمعتيه شنو گال ؟؟
ورد.. لا وين ما سمعت
نورس.. زين يلا تعالي ساعديني ندخل الغراض للمطبخ
ورد.. اي تتدللين
حچيتها و شلت الأغراض وياها ، وجبة وحدة و طلبت من عشق تكمل عني الباقي بـ حجة تعبت ..
تركتهم يشتغلون ورحت لغرفة قمر محد بيها بس بنت خالهم دتنوم ابنها دقيقتين وغفى وصتني عليه وغادرت المكان ، گمت سديت الباب وراها وظليت أفتر رايحة راجعة ، من التوتر أصابعي وجعني على گد ما طگيت بيهن اكو شي غريب ديصير وياية شي ما مار عليَّ من قبل ولا لامس مشاعري شي مخيف كلش بالنسبة إلي وحاربت هواي حتى لا يلمس روحي ويسيطر على عقلي ولازم ابقى احاربه حتى لا اسقط بـ دائرة المُغفلين .
اكيد مو قصده هوَ اصلاً متعود يشاقيني و كل تصرف يتصرفه وياية اشوف أحمد بيه ، علاقتنا علاقة صداقة وما راح تتعداها بـ يوم وإذا على كلامه هذا عادي أكثر من مرة حاچي لي كلام مُشابه اله بس شوية هالمرة زودها وان شاء الله مـ تنعاد حتى لا أخسره ويخسرني
أف تعبت ما اريد أفكر بـ شي ، سحبت موبايلي باوعت للساعة راح تصير الأربعة طلعت من الغرفة صارت بنت خالهم گدامي أشرت لها علمود أبنها و فتت للصالة ..
ماما دتسولف ويا النسوان و مرت خالو و بيبي گاعدات بصفها ، اكو مكان جداً ضيق بـ جهتهم ، دحست نفسي بيه حتى اگعد يمها ومباشرةً رفعت إيدها ميلت راسي على صدرها ، ارتفعت ضحكة النسوان لمنظري الطفولي
نيزك.. هههههههه شكل بنيتچ حنت لأيام طفولتها
نرجس.. خليها تتدلل بـ جال أمها ليش وين اكو حضن يزيل هموم ابن آدم ويريح گلبه غير حضن الأم
نصت ماما عليَّ تمسح وجهي بـ كفها وهمست بـ هدوء
- شبيچ أمي ؟؟
- تعبانة كلش
- من الشغل يعني ؟!!
- اي هواي اشتغلت اليوم و تعرفين بنتچ ما بيها حظ
- اگعدي ارتاحي البنات هواي ما يوگف الشغل عليچ
- گعدت ماما
لزمت إيدي بـ إيدها شديت قبضتي عليها بـ قوة ، واني على هالحالة غفيت شوكت وشلون ما ادري .. فزيت بعدني بـ حضن ماما باوعت للمكان الصالة تقريباً فارغة ، الكل رايح ما بقى بس المقربين وأهل شمم من ضمنهم مبين ناويين يبقون للعشا
أنت تقرأ
عقد البنات
أدب تاريخيلبوةٌ وثلاث صغيرات .. هُنَّ لها وطنًا جميل وهيَّ لهنَّ معنى الأمان يعيشنَّ في بئرٍ من الحرمان معَ ذلكَ الذي يُدعى أب ولكنهُ في المكرِ ذئب فَـ متى يُطلق لهنَّ العنان ؟!!....
