#عُقد_البنات
البارت الثالث والثلاثون
للكاتبة لبنى الموسوي
من الضعف إيدي ترجف أريد أبصم ما اسيطر عليها
سحبها بـ هدوء بصمني وثبت التوقيع
إنهارت أعصابي دفعت الأوراق من إيده تطشرن بالأرض بدون أي كلمة إبتسم بـ وجهي ونهض يجمع بيهن
- يلا مو أخذت كل شي فوت جيبلي البنات ع السريع
- مو هسه الصبح
- مرووووان شنو دتضحك عليَّ حضرتك بناتي أريدهن وحالاً گوم جيبهن لا أحرگك وأحرگ نفسي وراك
- تأخر الوقت مدتشوفين الساعة عود الصبح أجيبهن
- واني گلت هسه
ولا كأنه يسمعني نزع من رجله وتمدد ع الدوشگ
تقدمت بـ إتجاها خايفة
ثنيت رجلي گعدت ولزمت بـ قميصه مروان شنو يعني ضحكت عليَّ معقولة مراح تجيب لي البنات بعد
احچي وهوَ مغمض هزيته بـ قوة أصيح رد أترجاك رررد
فتح بـ ضجر شبيچ بابا شـ خبصتيني !!!
- تجيب البنات مووو
- گلت أجيبهن وتعرفين مو مروان اليحچي كلمة ويرجع بيها فـ لتلحين نامي ومن تگعدين تلگيهن يمچ
- أحلف أخذني على گد عقلي واحلف أترجاك
- وداعتچ عندي
- وداعتي شنو ليش اني همْ إلي خاطر يمك وتحلف بيَّ
- ولا يهمچ وداعتهن هنَّ زين هيچ
صفنت بـ وجهه حايرة
أحاول اصدگ بس للأسف الثقة معدومة
نهضت بـ قلة حيلة راسي يفتر أريد اتحرك ما أكدر بس مشيت خطوة تكومت من طولي طفر مروان سندني
فتحت عيني إذني تطن بـ قوة بحيث كل شي ما أسمع
وعيت لگيت نفسي بـ حضنه
ضرب على خدي حيل عطاء دتسمعيني عطاء باوعي شو
- وين اني ؟!! شصار ؟!! ليش انتَ هنا شدتسوي يمي
- شنو هاي حرارتچ ليش مرتفعة هالشكل
حچاها وحملني للفراش نومني وراح
غمضت.. من التعب جفني ثگيل كلما أفتحه ينغلق من كيفه
فزيت على برودة بـ وجهي مروان ديسويلي كمادات !!
وضعي نهائياً ميسمح لي اتفاجأ
بردت غطاني وظل فوگ راسي.. ما ادري شلون غفيت
لمسات تتنقل بين خدي وشفايفي
شوية وإنطبعت قبلات دافية على گصتي وجفوني
فتحت بـ تعب إبتسمت عشق بس شفتها نهضت بسرعة
- سحبتها الـ حضني أبوس بيها يروح أمچ هاي انتِ
- شلون صرتي ماما
- زينة بس شفتچ صرت زينة شوكت إجيتوا وين أختچ
- هستونا ونبض يم بابا بالمطبخ ديسوي الچاي نتريگ
رجعت حضنتها ممصدگة بناتي رجعن لي
ثواني وإجى مروان حامل نبض بـ إيد وبـ الإيد الثانية صينية الـ ريوگ
ردت اگوم أخذها صاح خليچ اني إجيت
حط الصينية ع الميز ونصى إنطاني نبض گبل حضنت وجهي وبچت
أنت تقرأ
عقد البنات
Historical Fictionلبوةٌ وثلاث صغيرات .. هُنَّ لها وطنًا جميل وهيَّ لهنَّ معنى الأمان يعيشنَّ في بئرٍ من الحرمان معَ ذلكَ الذي يُدعى أب ولكنهُ في المكرِ ذئب فَـ متى يُطلق لهنَّ العنان ؟!!....
