عقد البنات

البارت 11

#عقد_البنات
البارت الحادي عشر
للكاتبة لبنى الموسوي

ملاحظة / بارت مفاجئ لعيونكم حبايبي ..
جماعة السادس إعدادي اجلولي قراءة هذا البارت لبعد الإمتحانات مستقبلكم أهم من الرواية

الوداعاتُ الأبدية تَكسرُ الروح ..
وكسر الروح كسر عظيم لا يجبرهُ إلا الله
فـ أعني على ما أبتليتني فيهِ ربي ،
فـ إنَّ غيابهُ مُرعب جدًا
وأنا كَـ الطفل اخشى حتى من هدير الحمام إن سمعتهُ في ليلي المُظلم . ✍🏻
________

~ «تساقط أوراق الماضي في خريف الحاضر»
< عودة إلى الماضي القريب >

هبة.. بعدما اشترينا بدلة العرس بـ يوم واحد صار موعد ألتحاق أحمد ، كان من المقرر يداوم أسبوعين بس القائد اكتفى بـ 10 أيام والأربعة الباقية انطاهيا كـ هدية يضبط بيها وضعه قبل موعد الزواج

اليوم گعدتني أمي لصلاة الصبح ، صليت ورجعت أنام توها عيني مشكلة فزيت على صوت موبايلي أحمد يتصل رديت بـ إستغراب اليوم يلتحق وودعني قبل لا ننام شعجب رجع اتصل بـ هالوقت !! رفعت الجهاز على إذني إجاني صوته ، فدوة اروح لصوته ولكل نفس يطلع منه

- ها أحمد خير

- اسف روحي ادري گعدتچ من نومتچ بس اني بالباب گومي فتحي لي بلا زحمة عليچ

- يا باب بابنا قصدك ؟!!
- لعد يا باب

- خوفتني عفية شنو صاير شي

- متردين تشوفيني قبل لا ألتحق إذا متردين انتِ حرة المهم اني جاي على بالي أودع روحي

- لا طبعاً اريد انتظرني دقيقة

سديت الخط وگمت اركض غسلت وجهي و مضمضت وراها لميت شعري شلون مچان وطلعت فتحت له دخل عليَّ بالزي العسكري بـ نظرة كل عمري ما انساها

- صباح الخير

- صباح النور حبيبي ، ما توقعتك تجي فاجأتني هواي وفرحتني بـ نفس الوقت

- اشتاقيت لچ موت

- هههههه لحگت مو أمس تشاوفنا

- ما أبالغ لو اگول بـ كل دقيقة اني اشتاق لهبتي

- وهبتك تشتاق لك بالدقيقة الوحدة ألف مرة

مرر أطراف أصابيعه بين كذلتي رجعها ورى إذني ..

- أحبچ

- وآنه همْ أحبك هواي بس شبيك حبيبي ؟!!

- ما بيَّ ، راح اشتاق لچ شو تعالي لحضني خل احاول اشبع منچ ولو اعرف هالشي مستحيل يصير

حچاها و سحبني ضمني لداخل حضنه بـ لهفة ..

- أحمد فدوة لتخوفني

- بومة لتصيرين داگول راح اشتاق لچ اخوفچ شنووو ليش جديد هالشي عليچ لو أول مرة اجي اشوفچ قبل لا ألتحق