#عقد_البنات
البارت السابع والتسعون
للكاتبة لبنى الموسوي
وهبتُ لكِ كل شيء
وهبتُ لكِ الماضي والحاضر والمستقبل
وهبتُ لكِ ذاتي وقلبي وعقلي وروحي
وهبتُ لكِ نفسي ولم اكتفي
وها أنا اليوم أهبُ لكِ العمرَ يامن بكِ العمر يطيب . ✍🏻
________
عشق.. هيَّ ماما سمعته گال هيچ لو فقدت صوابها بعد متعرف شتسوي ، تبچي ، تلطم ، تصيح ، على صوتها العالم التمت ، شگد حاولت اسحبها لباب البستان ؏ الأقل بس ماكو مو بوعيها ولا تستجيب لكلامي
تركت الرياجيل فوگ راسها وركضت ، ورد بالباب تنتظر رجعتنا بس شفتها صرخت من بعيد : روحي صيحي لخالو نظر مخطوف وماما راح تروح بيها
هذه الثانية همْ خبصت الدنيا بالصياح ، تركتها منهارة ورجعت لماما ، دقيقتين مو أكثر وطلع خالو يركض بس شافته تجاوزت الكل وراحت بـ اتجاها تتوسله يرجع نظر من بابا وكأنما متأكدة هوَ ورى هالسالفة
سحبها للبيت بـ صعوبة ، بعدنا بالباب كلهم اجوي، دخل ماما للبيت وطلب من نيار يتصل بـ آريان يجي لبيتنا
نبض.. تونا رجعنا من الدوام صبيت الغدة گاعدين ناكل رن موبايل آريان ، بالبداية مـ اهتم لأن وحدة من أهم عادته إذا گاعد على السفرة لا يتكلم ولا يشاهد تلفزيون ولا يرد على إتصال لأن يگول النعمة الها إحترامها ولازم نتقيد بيه ، لكن من رجع تكرر الإتصال وأكثر من مرة اضطر يروح للغرفة يشوف منو المتصل
لعب گلبي ما اعرف ليش ، نفضت إيدي وتبعته وصلت لباب الغرفة سمعت اسم نظر انجاب بالطاري مباشرةً دخلت عليه من شافني صار يلف ويدور بالحوار أخر شي گال اي هسه راح اجيكم ونهى المكالمة
- شنو نظر شبيه ؟!!
- ما بيه شي بس مطول لسانه ويا الوالدة ورايح حتى اتكلم وياه وشوية ، تعرفيه يسمع مني
- ويسمع من خالو ويسمع من نيار شـ معنى يعني انتَ من دون الكل رايح تحاچيه ، لا اكيد صاير شي
- گلت ما صاير
- خوش لعد أخذني وياك بين متحچي وياه اني اشوف أهلي لأن مشتاقتلهم كلش
- العصر أخذچ روحي كملي غداچ هسه
- آريان لتلف وتدور احچي شكو
- استغفر الله العلي العظيم ، انتِ شلون بيچ اليوم
- بداعتي
- باوع لي بـ قلة صبر : راح اتكلم بس لتأذين نفسچ كل شي ينحل ، نظر طلع للأسواق قبل نص ساعة تقريباً وللآن ما رجع للبيت لازم اروح اشوف شديصير وياهم
- إنخطفففففففف
- هااا اني على شنو نبهتچ قبل ثواني
- فدوة اروحلك بس فهمني شنو السالفة مو گلبي وگف
أنت تقرأ
عقد البنات
Fiksi Sejarahلبوةٌ وثلاث صغيرات .. هُنَّ لها وطنًا جميل وهيَّ لهنَّ معنى الأمان يعيشنَّ في بئرٍ من الحرمان معَ ذلكَ الذي يُدعى أب ولكنهُ في المكرِ ذئب فَـ متى يُطلق لهنَّ العنان ؟!!....
