عقد البنات

البارت 72

#عُقد_البنات
البارت الثاني والسبعون
للكاتبة لبنى الموسوي

چفيتكم شري ورحت چفوني شر أواهمكم
نرجع بعد ماي وجرف متصير بس بأحلامكم
ولو فكرت
لو قررت
وبيوم لو مرة ردت
اغفى وتمروني غفل
صدگوني حتى بـ هالحلم گص اني أگص اجدامكم ✍🏻
__________________

عمر.. شنو بلال شنو نورا شـ گاعد تمسلتين انتِ ومنين تعرفين صديقي احچي لچ منو مسلطچ عليَّ

ورد.. مراح احچي شي تعال وشوف كل شي بـ عيونك حتى تتأكد من كلامي

- شنو مصلحتچ من كل هذا ومنو وراچ اعترفي بسرعة

- يعني من اكشفلك خيانة الناس المقربين منك وافتح عينك على حقيقتهم القذرة اصير مو خوش ؟!!

- مريم بغلاة أمچ تحچين صدگ لو عندچ غاية وتردين تضرين مصالحي ويا صديقي

- وداعة أمي ما حچيت إلا الحق ، تعال لبيت صديقك هسه وإذا طلع كلامي كذب شتريد تسوي سوي مراح اختفي حتى الخط ابقيه مفتوح

حچيتها ونهيت المكالمة بدون سلام ..

صادق.. شـ تگولين راح يجي لو يطلع مگرن الأفندي

ورد.. عمو اني ما اجيت لهنا ولا وصلت لـ هالخطوة إلا بعد أيام وليالي من الإختبار ، عمر شگد ما هوَ إنسان قذر شگد ما هوَ متعصب وأناني بالشي اليمتلكه

يعني وباختصار مستحيل يسمع بخيانة صديقه وحبيبته ويسكت رغم هوَ ميقل قذارة عنهم بس هاي بعد اكو نوع من البشر الـ حلال عليه حرام على غيره

- لعد خلينا ننتظرنا اكيد هسه على جية

- اني راح اراقب هنا روح انتَ قرب علينا السيارة علمود نكون مستعدين قبل وصوله

- ميخالف بس جيبي هالموبايل اسويه صامت واضمه عندي كل شي يصير ما اريدهم يكشفون لعبتنا بسببه

- لا راح اغلقه أحسن ، صح ما اتصور يرجع يتصل حالياً بس الإحتياط واجب المصايب كلها بـ هذا الجهاز

غلقته ومديت إيدي .. أخذه مني ضمه بـ جيب بنطرونه

بقيت واگفة وراح عمو يجيب السيارة ، طول ما احنه ننتظر ما توقف لساني عن ذكر الآيات القرآنية

مو هواي عشر دقائق مو أكثر وسمعنا صوت سيارة عمر دخلت الشارع بـ شكل جنوني من شدة السرعة

أشرت الـ عمو وتقدمنا بـ هدوء نمشي و كأنما مـ نعرف بيه جاي ورانا حتى يصير وجودنا مجرد صدفة

نزل من السيارة ورگع الباب بـ قوة ..

من سرعته حتى مـ انتبه الوجودي ، مر من يمي صحت باستغراب عمر !! إلتفت مباشرةً مصدوم بشوفتي

- ورد شـ عندچ هنا ؟!!

- شنو شـ عندي غير هذا بيتي

- مو قصدي بس يعني وين چنتِ شكلچ جاية من مكان