عقد البنات

البارت 20

#عُقد_البنات
البارت العشرون
للكاتبة لبنى الموسوي

يمكن الموقف بدايته كان عادي بالنسبة الي
بس من نطق كلمة الكاوليات إستوعبت حجم المصيبة السقطنا بيها لحظتها

- بـ تردد گلت له أخي ترى انتَ غلطان
احنه بنات عالم وناس مو مثل ممتصورنا ميصير تتفوه بـ هالكلمة البذيئة بس لأن گتلك مشايلين جناسي

- اشششش كلچن تبيعن شرفيات براسنا تعودنا عليچن

التفتت على آمنة أستغفر بـ صوت واضح
رجع صاح شيلوهن شـ منتظرين
تقدم الشرطي بس لمسني سحبت إيدي حيل وخر اني أصعد وحدي

حچيتها ولزمت كف آمنة مشينا بـ إتجاه السيارة
عالية صعب نصعدها
سندتها صعدت قبلي وإنطيتها رحيل
بعدني أحاول أرفع رجلي إجت دفعة من ظهري إنرميت الداخل السيارة التفتت بـ عصبية هذا الضابط

هيچ حقارة مشايفة بـ حياتي حتى لو شك بينا مو من حقه يتعامل ويانا بـ هالأسلوب الوضيع

تقدم الشرطي فرغ الـ جنط يم رجلنا
صار يرمي بالملابس علينا
حتى الملابس الداخلية فتشوها بعدت وجهي من الخجل شگول يعني إذا لم تستحِ فـ أصنع ما شئت

فجأة سمعته يقرا بـ كلام ناصر
فتحت عيني مصدومة... التفتت عليه السجل بـ إيده

- إنطينيا لو هذا همْ يحتاج له تفتيش !!
- كيولية تكتب كلام فلسفي هذا الشي أول مرة يمر عليَّ الصراحة بس عجبني

- أرجع واگول احنه مو هيچ ليش مگاعد تصدگنا
- همست آمنة اش ولچ انتِ تعرفين ويامن دتحچين ما عنده مانع هذا هسه يلزمنا يسوي بينا الما صاير

خفت من كلامها
باوعت عليهم بعدهم يفتشون
فرغت الجنط كلها بقت بس الجيوب الداخلية
فتحوها طلعوا علاج رحيل رماه عليَّ ورجع يفتش بس وگع الذهب بـ إيده باوعلي بـ نظرات حقيرة هااا

- ها شنو ها
- مو كاوليات وعدچن هالگد ذهب لو كاوليات لعد شگد تحصلن محل صياغة كامل مثلاً !!!

- ترى مبين ذهب شخصي متشوفه بـ عيونك
- والذهب الشخصي شيسوي وياچ؟! معناها منهزمة من أهلچ وصدگ هاي الطفلة منينلچ

- بنتي شنو منينلي
- وشنو الأثبات هيَّ بنتچ وين جنسيتها
- گتلك مشايلين مستمسكات بس وحق الله هاي بنتي

أشر للشرطة رجعوا الغراض بالجنطة وسدوا الباب
تحركت السيارة
لزمت آمنة كف إيدي و وجهت نظرها عليَّ خايفة شلون

- ما ادري خليها على ربچ
- ونعم بالله بس مستحيل يتركونا بلا مستسمك يثبت شخصيتنا إلا إذا إجى مروان وأكد الهم قرابتنا منه

- ومروان شـ يجيبه عليهم بلا
- احنه نبلغهم بـ مكان البيت ويرحون يستدعوه
- لا هاي هيَّ شردنا حتى نخلص تالي نتوسل بي يجينا