عقد البنات

البارت 83

#عقد_البنات
البارت الثالث والثمانون
للكاتبة لبنى الموسوي

وانتَ لنا مِن الله سورٍ حَصين ، نَستعيذُ بالله أن يَزول
فَـ تَزولُ مَعهُ طَمأنينة الدُنيا . ✍🏻
________

نبض.. كل واحد منا صار يجر بيها من صفحة نريد بس تفتح عيونها ماكو ، ماما تخبلت ..
سحبتها لحضنها علمود تطلعها من هالغرفة منعتها عشق

عشق.. ماما ماما مووو هيچ

عطاء.. يمة بنيتي ، بنيتي ماتتتتتت يا عااااااالم

عشق.. بس اهدأي حتى نعرف نتصرف ، والله عايشة حتى هاچ شوفي .. حطت إيدها على نبضها : ما ميتة وداعتچ بس فاقدة الوعي بسبب ضيق التنفس

عطاء.. وخرن خل اطلعها وخررررررن

عشق.. شدتسوين ماما دشوفي النار منتشرة بكل مكان والله بس تتحركين بيها خطوة تاكلكم نفس اللحظة

نبض.. يمعودة اتصلي بـ واحد يساعدنا اني يمها

بس حچيتها سحبت الموبايل من تحت المخدة تتصل بخالو ، انخبصت بعد ما اعرف شسوي وشلون اتصرف
ماما تصرخ ، نظر يبچي خايف خطية ، عشق تدردم ويا روحها لأن ماكو رد .. وكلهم كوم و ورد وحدها كوم ثاني إذا احنه عدنا فرص كبيرة للنجاة هيَّ فرصها بدت تتلاشى بسبب هالتأخير ، حتى لونها بدا يتغير

عطاء.. ولچ هاااااااا

عشق.. ماكو خالو مگاعد يرد يمكن موبايله صامت

عطاء.. يمعودة اتصلي على ولده عشيرته لتظلين صافنة بوجهي أختچ راح تروح من إيدناااااا

عشق.. اي ماما بس فدوة لتخبصيني والله انثولت

اتصلت على نيار ورفعت السبيكر ..
الحمد لله من أول مكالمة رد ، النُعاس واضح بـ صوته

نيار.. خير ان شاء الله

عشق.. الووو عفية ساعدنا صار تماس كهربائي بالغرفة وانحجزنا داخلها بسبب النيران

- شتحچين !! جاييكم

- اي اي الله يخليك استعجل

سدت الخط ودفعتني من مكاني ، گعدت يمها تسويلها تنفس اصطناعي .. المصيبة حتى عشق گوة دتتنفس

اختنگنا والحرارة بدت تلسع أجسادنا ، بعدنا ننازع بين الحياة والموت سمعنا الهوسة يم باب الغرفة الحمد لله ما تأخروا الظاهر خالو ناصر عنده نسخة من مفتاح البيت ، شوية وسمعناه صاح بـ كل صوته

ناصر.. قمر وينچ تسمعيننننني

عطاء.. ناصر هناااا تعال ساعد بنيتي راح تموووووت

فجأة أندفرت الباب بـ قوة هيَّ اصلاً ما ظال بيها شي النار ماكلتها أكل ، صاح بيهم البطانية بسرعةةةة

نيزك.. ناصر لااااا ، ناصر أصبر خل نحاول نطفي الباب ؏ الأقل شلون تطب بنص هالنار مو تحترررررگ