عقد البنات

البارت 17

#عقد_البنات
البارت السابع عشر
للكاتبة لبنى الموسوي

- أنتِ مَوطني ..
وأنا عِندَ الإغتِراب عَنكِ تائه القَلب لا أعلَم لِمنْ أنتَمي
- أنتَ مَرهمي ..
وأنا عِندَ الإبتِعاد عَنكَ أشعرُ بِـ مرِ هَمي
- أنتِ عَالمي ..
وأنا أتَحسس وِجودكِ داخِلي كَـ إنكِ تَسرينَ في دَمي
- أنتَ غَريب الأطوار حتى إنكَ فَريد الجَسد !!
- كلا .. أنا قَريب الأطوار حتى إنني وَريد الجَسد . ✍🏻
___________

عشق.. لك نظررررر ، عزة بـ عيني ان شاء الله هذا منو مسوي بيك هالشكل .. صفنت بـ وجهه : بس لا !!!.

نظر.. اشششش نصي صوتچ حبابة لتسمعنا أمي

عشق.. ليش متريد ماما تسمع معناها مسوي لك مصيبة

نظر.. تعالي ساعديني يمعودة مو راح اموت من الوجع

تقربت منه منين ما ألزمه يصرخ خفت كلش وضعه ابد مو مال يبقى بالبيت لازم أخذه للمستشفى ، رفعت إيدي على راسي حايرة شلون يا إلهي ماما لو شافته بهالمنظر اكيد تموت .. شكله صاير مثل أفلام الرعب مستحيل اكو بشر عنده گلب يگدر يباوع عليه بس يمكن اني لأن دكتورة و بحكم عملي شايفة الأكثر من هذا فـ تمكنت عيوني من مقاومة هالمنظر رغم بشاعته

التفتت على باب الحمام سديته بسرعة ورجعت باوعت عليه ، دألزم فكه من جهة الجهة القريب ؏ الأذن صرخ بصوت مكتوم بس وخرت إيدي بصق دم !!!

- هسه هسه تحجي لي شنو صار وياك

- تعاركت ويا الولد

- انچب لك شايفني غيبة مثلاً حتى اصدگ اكو جاهل يگدر يگلب وجهك هيچ ، احچي الحقيقة أحسن لك

- هيَّ هذه الحقيقة تفاحة ، لتلحين يلا ساعديني

- متحچي موووو ؟؟ خوش اني اعرف شلون احچيك

داطلع لزم معصم إيدي ، انترس دم من إيده ..

- عفية عشق لتحچين لماما خطية

- لعد گول منو سوه بيك هالشكل ودير بالك تكذب نظر

- اهووو ميخالف راح احچي بس بيناتنا مشكول الذمة

- احچي وفضني

- مروان ..

- مروان شنووووووو ، شلون يعني مروان لتخبلني اكو أب يضرب أبنه بـ هالوحشية لك حتى الحيوان ميسويها

- وهوَ مـ محسوب حتى ؏ الحيوانات ، أبوچ شيطان

- فهمني شنو صار عقلي راح يوگف

- دألعب طوبة ويا بهاء وعلي وبقية الولد ، صاحني هوَ من بعيد بالبداية ما اهتميت بس من شفته ظل يلح گلت اطب للبُستان واتچفى شره ، توني مـ تحرك لزمني

مروان.. تعال ولك اني مو داصيح عليك

نظر.. شـ تريد

- أبوك اني احترم نفسك من تحچي وياية *****