توضيح مهم وان كان طويل بعض الشيء لكن الموضوع بدا يزيد عن حده شوية وصار يستوجب مني التوضيح ..
تقريباً من بداية الجزء الثاني بديت اتعرض لهجمات شرسة بمختلف المواقع سواء الواتباد أو بيجات الفيس بوك أو الگروبات وكالعادة بس قصة معينة تنجح وتصعد مشاهداتها تظهر النفوس الضعيفة تسقط بيها من كل حدب وصوب تسقيط واضح وصريح بعيد كل البعد عن الإنتقاد البناء ..
لمن سين من المتابعات تتجاوز بالكلام داخل التعليقات وتنحظر مباشرةً ومن ثاني يوم تنزل للگروبات بالفيس وتنزل منشور طويل عريض تسقط بالرواية بكلام عاري من الصحة لأن مدتلگى شي بالرواية يستوجب التسقيط فـ تبدي تعترض يا عن اسماء الشخصيات يا عن الأدعية اللي بالرواية يا عن الشعر يا عن أولاد ناصر وأسلوبهم الغريب رغم اني وضحت من البداية هالأبطال يختلفون كل الإختلاف عن باقي أبطال الروايات بشكل عام لأن همَ مو عراقيين اصلاً حتى جنسيتهم أوربية مجرد مولودين من أم وأب عراقيين فقط أما تربيتهم وبيئتهم وعاداتهم وثقافاتهم فـ غربية بحت
المهم اعرف صاحبة منشور التسقيط هيَّ شخصياً لنحظرت من الواتباد قبل يوم لأن حسابات المحظورين أغلب الأحيان تحمل نفس الأسم ونفس الصورة بالفيس والواتباد ، طبعاً اني تاركة الفيس من مدة طويلة بسبب القال والقيل اللي اني في غنى عنه ومتابعيني يعرفون هالشي حتى بـ گروبي ما اتواجد لكن بعض البنات المقربات مني يدزولي سكرين بالمنشورات والتعليقات المسيئة للرواية وإلي لذلك اعرف شنو ديصير من وراية ، يا عزيزتي من تنحظرين نتيجة لتعليقاتچ السمانية لدرجة البعض صار يعير عطاء وبناتها لأن مطلقات واكو بنية حظرتها رجعت قبل كم يوم سوت حساب تفشر فشار عليهم وهاكم التعليق حتى تحكمون بيني وبين هالنماذج ما اعرف شنو تعرف من الدين هيَّ وتحچي بيه 🤔
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
المهم من تنحظرين خلي عندچ كرامة واتركي الرواية ترى كرامة الإنسان فوق كل شيء شنو هالرواية التخلي كرامتي تحت الرجلين !!! انحظر أدور وجهي واروح وما أعتبر اكو كاتبة بالساحة اسمها لبنى الموسوي أو سين من الكاتبات ، أما تظلون بكل منشور نفسكم حسابين أربعة تعلقون وتسقطون ترى هالشي يسويكم مضحكة ويبين للمقابل شگد انتم مقهورين ودتحاولون تثأرون لنفسكم بـ هالطريقة مني ، وللعلم تسقيطكم في مهب الريح لأن القاعدة الجماهيرية الحصلت عليها رواية عقد البنات كافية جداً لحتى تسحق كلامكم وتسقيطكم وتبقى الرواية في العلالي 👏🏻
اليعترض على طول الرواية اني مو هسه قررت اطولها لا والله من أول بارت أعلنت ببث في گروب الفيس بوك الرواية رواية أجيال وراح تكون جداً طويلة تقريباً هيَّ اطول قصصي السابقة واللاحقة ، بعدين رجعتوا سألتوني شگد وتنتهي گلت لكم تتجاوز المئة بارت لهنا اني عايلة وياكم بشي ؟!!
فـ اللي متعجبه الروايات الطويلة خل يغادرني واللي يشوفها تسفيط وفلم هندي خل يغادرني واللي بدا يمل ويتذمر من الأحداث خل يغادرني واللي يعلق و يگول تفاهه ، ترى بس التافه يتابع تفاهه حشى متابعيني الراقيين فـ يا ليت تترفعون عن تفاهتي وتغادروني لتناقضون نفسكم بـ نفسكم 🌚👌🏻
احلى واقوى وأكثر الروايات إبداع وتميز ورقي وثقافة مجرد متطول يبدي الهجوم عليها فـ عادي تعودنا احنه الكاتبات على هالشي يعني ابد لتتصورون كلامكم يأثر بيَّ لو يخليني اغير من سردي وإختصر ، كذب تعرضت لهجوم وتسقيط مثل الهجوم والتسقيط اللي تعرضت له بـ رواية وضاقت الأرض بي واللي لازلت اتعرض له مجرد مينذكر اسمها على الساحة رغم نجاحها المميز ، لكن رغم كل هذا واصلت ونهيتها على أتم وجه وعقد البنات كذلك راح انهيها على أتم وجه واللي مو عاجبه الباب مفتوح يفوت جمل وارجع واگول تفضلي غادرينا عزيزتي ولتنسين تسدين الباب وراچ ترى الجو برة شوب كلش كافي علينا الخنگة الكنا بيها قبل شوية بسبب وجود بعض الناس الغير مرغوب بيهم بيناتنا 🙂
شغلة أخيرة لكل كاتبة تكتب وتبدع ويقابلون تعبها بالكلمة المشهورة فلم هندي ، احب اگولها استمري عزيزتي أشهر الكُتاب العالميين همْ كُتاب الروايات الخيالية وهذا إذا دل على شيء فـ يدل على رقي كتابتك وسعة تفكيرك وخيالك لأن القصص الحقيقية إذا ما انضافت لها بصمة الكاتب وإبداعه تصبح قصص ركيكة خالية من التمييز والدقة 👌🏻 اكتبوا شعر اكتبوا أدعية تميزوا بإختيار الأسماء النادرة اطرحوا للعالم العربي قصص هادفة انقلوا صورة إيجابية عن مجتمعنا العراقي بعيد عن السحل والكتل وإنعدام الرجولة وان شاء الله بيكم يتغير فكر القارئ العراقي ويرتقي بـ إنتقاده لأن بس عندنا يدورون قصص حقيقية 100٪ ومن أقل موقف يبدون يسقطون بالكاتب العراقي واللي هوَ منهم وبيهم واللي المفروض يفرحون لنجاحه مثلهم مثل مثقفين الدول العربية اللي يرفعون من كُتابهم مينزلون ، ألف تحية حب وإحترام الهم وللمتابعين العراقيين الفخورين بكُتابهم ومشاهيرهم أصحاب المحتوى الإيجابي
اتصور كافي أصحاب التسقيط انسحلتوا بما فيه الكفاية 😁 قبل ما كنت احظر هسه صايرة إيدي والحظر عود روحوا سقطوا براحتكم بالگروبات والبيجات وظلوا تابعوني أول بأول وكملوا قصصي للأخير بدون كرامة المهم يمي ميبقى غير المتابع الراقي واللي حتى لو حب ينتقد ينتقد بكل إحترام وأدب حتى اني بـ دوري أرد عليه بكل إحترام وأدب ايضاً
طبعاً الجزء الثالث مثل ما بلغتكم مو طويل بس بنفس الوقت أحاول اسرده بسرد الجزء الأول والثاني بدون زيادة ولا نقصان حتى لا أبخس حق الرواية ، السرد الينذكر كله مهم هيَّ مو سالوفة حتى تردون البارت بس أحداث التفاصيل جداً مهمة حتى تعيشون ويا الأبطال وتتأثرون بكل حدث يمر عليهم سواء كان سلبي أم إيجابي مثل مديصير حالياً بالضبط ، قلت قبل قليل اللي مل يتركها عود يجي بالبارت الأخير يقرا ملخص الأحداث النهائية لأن هوَ هذا اليريده البعض النهاية فقط ..
المتفاعلين بين الفقرات متعرفون شگد أحبكم 😍❤ تعليقاتكم تنطيني طاقة إيجابية لحتى أبدع بـ كتابة البارت وانطيه حقه مثل ما هوَ مطلوب ..
كل الحب لكم ولتفاعلكم و تصويتكم فـ بكم يكتمل نجاح الرواية وعلى عناد ذولاك العالم عود اشربوا عصير ليمون بعد متقرون هالنوت ادري بيكم متابعيني مثل ظلي 😁👌🏻
