عقد البنات

البارت 12

#عقد_البنات
البارت الثاني عشر
للكاتبة لبنى الموسوي

ذكريات وياك صارت ..
الگعدة والعشرة الطويلة وحتى همساتك بـ إذاني
ذكريات وياك صارت
ذيچ ضحكاتي الأحبها والسعادة والأماني
ذكرياتي وياك صارت .. بس رسائل .. بس حروف
بس صور بيها انتَ تضحك معلگيها اعلة الرفوف
ذكرياتي وياك صارت كعبة سودة
وبيها ليلية آنه اطوف . ✍🏻
_______

هبة.. فتحت عيوني بـ تعب كلهم فوگ راسي يحاولون يگعدوني ، إلتفتت على يميني ورد يمي صاحية بس حتى رمشة مـ ترمش ، سحبت روحي عدلت گعدتي ما جاي أذكر شنو صار و كأنما فقدت الذاكرة ويا ليت لو باقية فاقدتها كل العمر ، رفعت إيدي افرك وجهي ثواني وانعاد شريط الجريمة داخل ذاكرتي صرخت بـ رعب لا الله عليكم لتذبحوووووووووووووووووه

ويا ما صرخت ورد همْ طلعت من صدمتها و صرخت بـ وجع يشبه وجعي ، گمت فاقدة عقلي أدور موبايله وين ماكو مختفي صحت بكل صوتي الموبايل اريد الموبايل

ميسم.. عمچ أخذه لأن مصطفى همْ وگع مثلچن

هبة.. ليش أخذه موبايلي هذا موبايليييي

أم هبة.. يمة هبة ما يصح اللي جاي تسوينه گولي يا..

بعدها ممكملة كلامها طلعت اركض وگفت بـ نص البيت صحت عموووووو ، طلع من غرفة مصطفى تقدمت عليه مثل المخبلة لزمت إيده بـ إيدي الترجف وبالگوة حچيتها

- موبايل أحمد ، اريد موبايل أحمد ، الفيديو وين

مد إيده لجيبه طلعه سحبته منه بـ لهفة ..
دروت على الفيديو مختفي !!
رفعت عيوني و قبل لا اسأل سؤالي خفت من جوابه

- الفيديو وين عمو شو مموجود ؟!!

- مسحته
- مسحته !!!
- اي

- شنو يعني مسحته هااا شنو مسحتتتتتته ، ليش عمو ليش هذا الفيديو بيه أحمد مفتح .. بيه أحمد يتنفس شلون هيچ حرمتني من شوفة عيونه مرة ثانية

- إذا على عيونه ألف فيديو اله عندي وعند أخوانه بيه أحمد عايش يضحك ويحچي ويتنفس ويباوع لنا بس مو هذا الفيديو بنيتي ولچ بـ هذا الفيديو تموتووووون

- ان شاء الله اموت ، گول ان شاء الله تموتين هبة گول عمو گولها اترجاك گولها حياة وما بيها أحمد ما اريدهاااا

حضني يبچي ما اعرف صوته الأكثر وجع لو صوتي ..

شوية وبعدني عنه .. دخل لغرفة مصطفى دخلت وراه بعز انهياري انتبهت على حالته نايم الوجه اصفر كركم والمغذي بـ إيده ، فتح الجرار طلع منه شي بس اندار وشفت أغراض أحمد گدامي انهاريت لدرجة الموت

محفظته ، حلقته ، محبسه ، ساعته ، آية الكرسي اللي دائماً مرافقته حتى ملابس العسكرية الچان مرتديهن ساعة إستشهاده هياهن گدامي وبين إيدين أبوه