عقد البنات

البارت 21

#عقد_البنات
البارت الواحد والعشرون
للكاتبة لبنى الموسوي

فدوة لقلبكم بدون تجاوز كلمن يعبر عن رأيه بـ إحترام لأن أبطالنا يبقون بشر والبشر خطاء فـ من منا بلا خطيئة ليرجم الناس بـ لسانه إذا اخطأوا ، اتمنى وصلت الفكرة للجميع .. متابعة ممتعة 💛

لَقد إِنغَمَسنا في قَعرِ آلامنا مُنذ القِدَم ..
نَحنُ الآن مُرهَقينَ حَد الوَجع ،
ولا يُوجَد مَنْ يَشعُر بِنا سوێ بَعضِنا . ✍🏻
_____________

مسحت دموعي ، رجعت بسته و لمست وجناته بـ رفق إبتسم من بين تعبه ، نهضت ضامته لحضني بـ لهفة نيار وخالو صافنين علينا .. خجلت من الموقف

- اسفة إنشغلت بيه ونسيت اگول لكم تفضلوا

- لا بنيتي جايين من طريق طويل و نريد نروح نرتاح

- شنو خالو رايح بدون مـ تفهمني شلون گدرت تاخذه

- بالليل ان شاء الله نمر عليكم ونحچي بالتفاصيل

- تنورون وشكرًا جد حابة اشكركم على كل شي سويتوه

- رفع إيده گرص خدي : اكو عاقلة تشكر أبوها وزوجها على واجبهم ، بعد لتعيديها حتى لتزعلينا منچ

هزيت راسي مبتسمة ، باوعت لنيار هادئ بشكل يفوق الوصف حتى الإبتسامة مـ تطلع من شفته ، مد إيده مسح على راس مُتيم و قدم لي أغراضه بس أخذتهن راحوا ظلت عيوني تراقبه : متأكدة مـ راح يسامحني

نصيت مجرد ما اجت عيوني بـ عيون مُتيم نسيت كل حُزني ولا اراديًا إبتسمت : اني مو گلت فدوتك كل شي فـ شلون بعد أنقهر وانتَ رجعت لحضني !!!

بسته وأخذته من إيده للحديقة بس لمحنه البنات اجن يركضن كل وحدة تجر بيه من جهة بحيث خطية ظل صافن عليهن من الصدمة وحقه ممتعود على خبالهن

ورد.. ولي ولچ اني وصلت له أول فـ اني الأشوفه قبلچ

نبض.. لعبة سباق الجري عندنا ؟؟ لا حياتي الكِبار أولاً

ورد.. عندي فكرة ترضي جميع الأطراف

نبض.. وهيَّ ؟؟

ورد.. خلينا نخيره بيني ويينچ واليختارها تشوفه أول

نبض.. اوك قبول

ورد.. هلو يا حلو شلونك ؟؟ منو تختار اني لو السعلوة

نبض.. لا حبيبي هذه اللابسة أسود هيَّ السعلوة لتروح يمها ترى هذه تعض الأطفال من تگزگز عليهم

ورد.. طيح الله حظ أبوچ ان شاء الله

عشق.. لتحچن هيچ گدام الطفل ، يلا فضني كل وحدة تشوفه شوية لأن مستغرب مستحيل يختار بيناتكم

نصت نبض سحبت كف إيده تبوس بيه ..

نبض.. ااخخ ولچ عشق شنو هذا ينگرط ينگرط صدقه لله ترى حيل بيه شبه منچ