عقد البنات

البارت 10

#عقد_البنات
البارت العاشر
للكاتبة لبنى الموسوي

هلي يا طيب حاضرنا هلي يا شوگ ماضينا
هلي يا ذكرياتي بـ ليل
عيد واسمع الأطفال تنادي بشوارعنا
ماجينا ي ماجينا
هلي يا شوك لا مو شوك
رصاصة بعين كلمن نوى يعادينا
هلي يل چنكم النسمة
ي جنة وطيب يا رحمة
هلي لوما محبتكم
لمتكم و گعدتكم
هلي لوما محنتكم چا رحنا بلاية وداع
چا ننسي چا ننباع
چا نصبح خبر ماضي
إذا غبنا بسفر لو موت ما ينجاب طارينا . ✍🏻
________

جفلت من كلامه ، باوعت عليه و رجعت باوعت للبنية مو معقولة سواها صدگ هوَ إنلچم سابقاً شلون اصدگ يعيد التجربة بـ هالسهولة ..
زين واني !!! ليش بذاك اليوم سمعني كلامه الغريب واليوم اجى بـ كل برود يگول لي تزوجت قبل يومين ، اكيد اكو شي غلط ديصير هنا و لازم اعرفه .

- ها يمعودة وين صفنتِ ؟!!

- اكيد دتتشاقى

- اني فتحت الموضوع ؟؟ لو انتِ سامعة الوالد يصيح واجيتِ تسألين ، ليش بعد اتشاقى

- هتان البارحة العصر تواصلنا ما گلت متزوج !!!

- سكت ..

- وين زوجتك هذه الگاعدة بصفك ؟؟

- لا هذه زميلتي بالعمل بس زوجتي موجودة هنا تحبين اصيحها حتى تتعرفون على بعض

- اي يلا صيحها !!

- لحظة

حچاها و راح .. بعدني صافنة على جمال زميلته باوعت لي مبتسمة رجعت لها الإبتسامة و رفعت إيدي لوحت بالسلام ، بس گلت لها هاي ما اعرف شلون لازم ارحب بيها ، هيَّ همْ رجعت لي التحية بـ نفس الطريقة

رجع گعد عيوني تترقب بـ خوف لعد وينها زوجته !! مد إيده يسحبها نفسي ضاق و صدري إنعصر ، اريد اسيطر على رعشة جسمي ما اگدر ، شـ صار لچ ورد مو هوَ هذا نفسه الرفضتي حبه من حاول يلمح لچ بيه ليش هسه تأثرتي بـ خبر زواجه لـ هذه الدرجة !!!

فجأة رفعها من الأرض لحضنه ، باوعت بـ صدمة شنو هذه يربي صدگ يحچي عود .. جايب لي كلبة !!!

- اعرفچ بـ زوجتي الحلوة ، ورد ، وردة ..

- هتاااااان بشرفك هوَ هذا همْ شقى !! ترى أوفر سخافة

- ما متشاقي والله ، گولي هالكلام لخالچ صار له ساعة لازم الموبايل و يرزل اليشوفه يگول متزوج لي روسية مو مربي كلبه ،
دشوفي لطافتها اكو هيچ بعد .. عصر وجهها بـ گزگزة

باوعت عليها مبتسمة لونها عسلي صغيرة بالعمر وكلش كيوت من غير شي اني اعشق الكلاب والقطط المنزلية
فجأة تذكرت كلامه ، وسعت عيوني عليهم بـ غضب ..

- تعال تعال صدگ مسميها وردة ؟!!

- اي نعم ، ورد و ادلعها وردة .. اكيد عجبچ الأسم