عقد البنات

البارت 60

#عُقد_البنات
البارت الستون
للكاتبة لبنى الموسوي

دَعِ الأَيَّامَ تَفْعَلُ مَا تَشَاءُ ،
وَطِبْ نَفْساً إِذَا حَكَمَ القَضَاءُ
وَلا تَجْزَعْ لِـ حَادِثَةِ اللَّيَالِي
فَـ مَا لِـ حَوَادِثِ الدُّنْيَا بَقَاءُ .
_________

نبض.. عمو فدوة اگعد عمووو دتسمعني ، يااااا ربيييي
وررررررد نظررررر وينكم يمعودين
ضربته على وجهه حيل عمو فتح عيونك دخيلك فتتتح

نزلت راسه بالگاع ودخلت اركض ،
بعدني بـ باب الصالة طلعت ماما من الحمام ألبسي شي على راسچ وتعالي عمو صادق بالطرمة متصوب وواگع

عطاء.. دخيلك ربي شبيه الرجال

نبض.. ماما يلاااااا الرجال راح يموت مو وكتها هسه

عطاء.. تعالي ناوشيني عباتي رجلي تربطت من الخوف

سحبت العباية انطيتهيا وطلعنا نركض
هالثواني الـ بسيطة الـ تركته بيها سبح المسكين بـ دمه

تقدمت ماما رفعته عليها تتفحص مكان النزف
صاحت ولچ امشي جيبي حجاب أي شي ألف راسه بيه هذا مضروب ضربة قوية

دخلت ؏ السريع عشق نايمة حتى ما حست على صوت الباب ، داسحب الربطة وگعت الزاوية فزت خطية

- اسفة اسفة
- شبيچ
- هااا لا ما بيَّ ارجعي كملي نومتچ حبيبتي

حچيتها وطلعت اركض ، بعدني بـ نهاية الصالة واسمع ماما ترزل بيَّ لأن تأخرت عليها

انطيتها الربطة دتلف راسه طلعت عشق
بس شافت منظر عمو متمدد والدم تارس الگاع صرخت الدور حرت ما بينها وبينه

- رجعت احاول اسحبها للداخل روحي عشق ماكو شي مجرد حادث بسيط هسه يگوم على حيله

- تركتني وتقدمت عليهم ماما شبيه منو ضاربه ؟!!

نبض.. مو گتلچ حادث

عشق.. لا لا مضروب وإلا ما گدر يوصل لـ هنا لو حادث

عطاء.. مو وكتكم الرجال راح يموت وحدة تفوت تتصل على أبو محمد يجي يساعدني ما اگدر اتصرف وحدي

نبض.. اي اني رايحة

حچيتها ورحت اتصلت بـ عمتي ميسم
الحمد لله ما طول زوجها ، دقايق بسيطة و صار عدنا

ظلت عمة يمنا وماما راحت وياهم للمستشفى
خطية عشق قابلت الشباك وگعدت كلما تلمح ضوة من تحت الباب تصيح اجوي وتركض عبالها همَ

وين للفجر يلا دخلوا للبيت ،
تلگيناهم من الباب عمو إبراهيم سانده ويمشيه بصعوبة

رفع راسه شافنا اني وعشق و ورد وحدة واگفة بصف الثانية ونظرات الخوف مرسومة بـ عيوننا ، ابتسم بشكل هادئ جداً رغم تعبه بس حتى يزرع الطمأنينة داخلنا