عقد البنات

البارت 68

#عُقد_البنات
البارت الثامن والستون
للكاتبة لبنى الموسوي

المفاجأت لم تعد موجوداً حقاً فـ قد بتنا نتوقع أي شيء من أي شخص وكأن للبشر جلد الثُعبان حيثما يريد يستطيع تغيير لونه لـ يتكيف مع المكان والزمان .
__________

ورد.. اندار يمشي بـ اتجاه الحمامات ظلت عيوني تدور حوله بـ ابتسامة ، أدفع نص عمري واشوف منظر هالسافل من يدخل عليه بلال وهوَ منتظر جيتي .

التفتت على صوت حمحمة زوجته ، باوعت لي مبتسمة

- هذا ثاني لقاء يجمعنا وان شاء الله مـ يكون الأخير

- هزيت راسي بدون كلام

- تداومين هالسنة
- اي اكيد اداوم ليش يعني هالسؤال ؟!!

- لا بس گلت عروس جديدة وبلال فرحان بيچ بحيث خلال شهرين سافرتوا مرتين يعني ما اتصور راح يكون عندچ وقت كافي للدراسة

- الدراسة أهم من كل شي والدليل گعدتچ گدامي لوما دراستچ مستحيل توصلين لهذا المكان

- صح والله عجبتيني

- باوعت لها والتفتت بـ اتجاه الحمامات ، بعدني أراقب قدومهم قاطعت صفنتي بـ سؤالها .

- شعجب لابسة الحجاب بعدچ صغيرة !!!

- ليش الحجاب همْ اله عمر محدد أول مرة أعرف حسب ما سمعت أكو سن معين للبلوغ مو ؏ المزاجيات

- لا يعني الوحدة تتونس بـ شبابها وعود بعدين تلبسه لاحگين ؏ الخنگة مو كافي شمس العراق وحرها

- رفعت حاجبي أراقب منظرها الشعر أشقر فاتح تاركته مفتوح على طوله واللبس مال ممثلين خو المكياج حتى بـ عرس خواتي ما شفت مثله

- ها شو سكتي

- كلمن و قناعنه لا اني اگدر اجبرچ على لبسه ولا انتِ بكلامچ هذا تغيرين من قناعتي بالحجاب

- همْ صح

- سكتت شوية .. شنو انتِ ما عندچ أطفال ؟!!
- لا
- شعجب

- ممفكرة حالياً بـ الموضوع لأن شغلي ماخذ كل وقتي والطفل يحتاج له تفرغ وصبر واني اثنينهن افتقدهن

- وعادي عمر مقتنع بـ قرارچ

- اي لأن هوَ همْ بحكم عمله وسفره المستمر ماله رغبة قوية بالأطفال تگدرين تگولين ميريد ينربط بيهم

- هااا

- انطيني رقمچ حتى نصير صديقات صح اني أكبر منچ بـ 20 سنة بس ما شاء الله طريقة كلامچ تدل على نضوجچ المبكر عكس المظهر والعمر

- ليش شبيه مظهري !!!

- يعني وبدون زعل يحتاجلچ شوية ترتيب باللبس على كم لمسة بالوجه وتصيرين بيرفكت مثل عقلچ

- يعني لازم احط مكياج صارخ وأبرز مفاتني بالملابس للعالم يلا تعتبريني بيرفكت مثل متگولين