#طوبى "جنة طوبى"
#جمان_فريد
#الجزء الثامن_والسبعين "حق الرد2"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
🌙رمضان مبارك🌧رمضان الدعاء🌙
#الدعاء
📌قال الشيخ ابن باز رحمه الله-:
"الإلحاح وحسن الظن بالله، وعدم اليأس، من أعظم أسباب الإجابة. فعلى المرء أن يلح في الدعاء، ويحسن الظن بالله -عز وجل-، ويعلم أنه حكيم عليم، قد يعجِّلُ الإجابة لحكمة، وقد يؤخِّرُها لحكمة، وقد يعطي السائل خيرًا مما سأل".
[📚فتاوى ابن باز (١٢٢/٢٦)].
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃العين بالعين والسن بالسن..والبادي..أظلم🍃
________________________________________
في الجنان متكي في فراشه وحداه مرته مقعمزه يهدرز عليها..
محمود بإنزعاج؛خربها المشري بقطافه..
مرته؛قتلك ماتعزماش.
محمود؛مانقدرش يامراة الراجل صاحبي وحوشه مقابل..
:باهي خلينا منه توا وقولي وين جبت سيرة حنان شن قال هو؟
محمود بشي من الضيق:شن بيقول كلام عادي..البنت من جيل ولده مستحيل يفكر فيها تولي مرته..
:يامسكين انت تقول هكي غير تفتح معاه الموضوع تو تشوف شن يقول..هلبه زيه بالزبط ومشوا خودوهم اصغر من اختك..
محمود قعد ساكت وهو مش متقبل..
:ياراجل ماتقلبش وجهك هكي وفكر فيها كويس لو صار والمهدي ولى راجل اختك تشوف كيف يرفعنا كلنا فوق..
محمود؛لو هدا اللي شاغلك اني عندي ليها حد تاني قريب شويه ع عمرها وربك عاطيه..
هي بإستغراب؛من هو هدا!؟
محمود؛عبد القيوم التارقي..
هي قالت بتهكم..
/تتسهوك !
محمود؛علاش بنتسهوك ندوي من جدي..راجل بمعنى الكلمه اخلاقه الله يبارك وربك عاطيه..
:تي يانهارك الاحرف تدوي من جدك انت بتعطي اختك لتارقي! من بيرضالك بيه! لاامك ولاخوتك ولاخواتك هي بروحها مستحيل تفكر فيه..
محمود:وعلاش ان شاء الله! الراجل ماعنده شي يعيبه..
:ياراجل فكر القدام..القدام اختك حتتعب معاه هلبه الناس هادم مش زينا عالم بروحهم..وبعدين مش معروف اصلهم من فصلهم يقولك ليبي في الاخير يطلع متجنس لالا يامحمود طلعه من راسك وخليك ع المهدي هادم اللي لينا ويمشوا معانا اصل ومفصل وعيلة معروفه من جد جدهم والمهدي معروف في الشارع كله من يكون..
تنهد وقال؛باهي والمشاكل اللي صارتلهم مع كناينهم شن دراني مايديروش في اختي زي مادارو لبنات الواعر..
:بنات الواعر شلولحات ماينقدروش..
سكت محمود وهو يفكر بحيره..
يبي وبشده يزوج اخته ويطمن عليها بس في نفس الوقت ماكانش مقتنع بالمهدي لعدة اسباب واولهم فرق السن الشاسع..وكان شايف ان التارقي هو الانسب ليها من جميع النواحي..
🍃والتارقي في هالوقت..
في شقته..طلع من الدار بعد ما بدل حوايجه..
وبضي فلاش التليفون توجه للكوجينه..
وصل فيها وخشلها..حط التليفون فوق الثلاجه..
بعدين فتحها وطلع منها شيشة مية...
فتحها وقعد يشرب منها وكأنه يبي يطفي النار الوالعه في جوفه وحارقه قلبه..
نزل شيشة الميه وهو يشوف للفراغ بغضب وضيق..
ويتفكر في الكلام اللي سمعه من محمود..
زاد غضبه...حط الشيشه في التلاجه وسكرها وهو يفكر...
لعند ماطلع من الكوجينه..
جو عيونه ع الدار اللي يكتب اللي مخصصها للكتابه..
مشالها..وخشلها...
كان خاشلها ضي القمر....
شاف لباب الفيرندا..
ومر قدام عيونه كل شي شافه من هالمكان..
كان شاهد ع كل شي بدون مايعرفها ومضايقه هلبه ان مش قادر يديرلها شي..
وبعد ماانصدم صدمة عمره وعرف من تكون ضاقت بيه الدنيا ومافيها..
وكره نفسه والظروف اللي كبلاته وعجزاته انه يخلصها من اللي هي فيه...
خش للدار وقعمز ع الأرض ورجع شاف لباب الفيرندا بضيق ووجع وهو يتفكر في الكلام اللي سمعه من محمود...
هني تفكر وصية لطفي الواعر ليه وزاد وجعه..
غمض عيونه بعدين مسح بيده اليسار ع وجهه وثبتها عند عيونه وقعد يضغط عليهم للحظات بعد مسح باقي وجهه وقال بحسره..
/ااخ..ااخ..يارب اللي فحالتي هذي شن يقدر يدير!؟ شن بيده كيف يتصرف!؟..تنهد بعدين قال..مش عارف ياربي..مش عارف كان العذاب اللي انا فيه من يدي ولاهو اختبار منك..
انت عالم وشاهد اني قاعد نصارع في نفسي ونحارب فيها محاربه بيش مانفكرش فيها تفكير غلط وهي ذمة ع غيري ووالله ماحاط في بالي ناحيتها اي شي مانيش طامع في شي..همي كله توا نكون قد وصية بوها وبس..
سكت شويه وهو ياخد في نفس بعدين ضم شواربه لداخل بقوة..غمض عيونه بشده وقعدت انفاسه تتسارع...وحط يده ع صدره وقال..
/نعاهدك ياربي عهد..ونشهدك اني من اليوم.. نديرها عندي في مكانة..الاخت..وندفن اللي في قلبي ليها مع قلبي..
فتح عيونه ورفع بصره وهو يقول..لأخر نفس ليا في الدنيا..ولا لعند ماانت....نزل عيونه وقال بضيق وحرج...انت عارف الباقي يارب...
🍃عارف ومطلع وشايف القلوب وشن فيها وكل حد ع قيس نيته يعطيه...
◇إِن يَعْلَمِ اللَّهُ فِي قُلُوبِكُمْ خَيْرًا يُؤْتِكُمْ خَيْرًا مِّمَّا أُخِذَ مِنكُمْ وَيَغْفِرْ لَكُمْ ۗ وَاللَّهُ غَفُورٌ رَّحِيمٌ.◇
🍃🍃🍃🍃🍃🍃
ومن التارقي لصاحب المكان اللي عايش فيه..
اللي كان مختلي بنفسه فوق سطوح حوشه..
موجوع..وحامق..ومستاء...
ضام قبضة يده اليسار بيده اليمين وقاعد يفرك فيها بقوة من الغضب...
ويتفكر في الكلام اللي سمعه من محمود..وعارف ان محمود ماقالش اللي سمعه كله..وقعد يفكر شن باقي اللي انقال وهو مايعرفاش!..
ومعقوله الدوة تكون طالعه من حوشهم!؟
معقوله توصل بأهله يشوهوا سمعه كنتهم اللي حتكون ام بنتهم عن قريب!
علاش هدا كله!؟
السؤال الاخير وقف عنده المهدي هلبه وجاه احساس ان اللي دايره خوه الجالي اكبر من اللي عرفه...
تفكر يوم المشكله اللي صار بين الجالي وبوه..
تمر قدامه التفاصيل..بس اهم تفصيل فيهم هو شهادة ولده محمد ع عمه...
هني تكلم وقال...
/في حاجه ناقصه..حاجه مازال مدرقه ماقالوهاش..ومحمد يعرفها...
🍃🍃🍃🍃🍃
(لقيت روحي في حرب اني طرف تاني فيها ياسدرة عندي فيها خيارين يانختار نكون ضحيه مغلوبه ع امرها يانحارب بش ندافع ع روحي وعلى سمعتي وسمعة عيلتي وعلى امانة بوي وعلى حقوقي..واهم حق فيهم حقي في بنتي..نكذب لو نقول مش خايفه ياسدره..اني خايفه هلبه من اللي بيصير القدام لكن مع خوفي في راحة في قلبي لإني عارفه ان ربي مع صاحب الحق مش حيخليه لين ينصره)
حطت البيرو لما سمعت صوت القرآن جاي من راديو...
صوته مسموع في الشارع...وبوضوح تنسمع ايات السورة اللي قاعده تنقرا...
◇إِنَّ اللَّهَ يُدَافِعُ عَنِ الَّذِينَ آمَنُوا ۗ إِنَّ اللَّهَ لَا يُحِبُّ كُلَّ خَوَّانٍ كَفُورٍ ﴿38﴾ أُذِنَ لِلَّذِينَ يُقَاتَلُونَ بِأَنَّهُمْ ظُلِمُوا ۚ وَإِنَّ اللَّهَ عَلَىٰ نَصْرِهِمْ لَقَدِيرٌ ﴿39﴾◇
بعد ماسمعت هالآيات رفعت عيونها فوق بنظرات امتنان وارتسمت ع وجهها الحزين ابتسامه حب..
☘ صَدِقنِي .. لا أَحَد يَفهَم حٌزنك إِلا الله ، فَلا تَلجأ لِأَحد..☘
🍃🍃🍃🍃🍃🍃
تاني يوم...
الجمعه..26من شهر يوليو..سنة 2018..
الساعه 11:00صباحا..
فتحت باب المخزن اللي كان شبه فاضي الا من شوية خرده وكراكيب قديمه..ووحده ملوحه ع ارضيتها راقده..
واثار الضرب واضحه في وجهها..
مشتلها..ووقفت عليها وهي تتفرج ع حالتها بنظرات خالية من الرحمه..
بعدين برجلها قعدت تنخص فيها ع ركبتها..
ولان في ضربه قويه جايه ع الركبه ومورمتها من الوجع فاقت مفزوعه..
شافت بنظرات خوف وذعر وقعدت توخر وهي تزحف خوف منها..
سكينه بإزدراء:ايبسي في مطراحك مش دايرتلك شي..رفعت حاجبها وقالت بكبر..احمدي ربي اللي اني موجوده كان هدا راهم دفنوك امس...
وصابرين تسمع فيها وتشوفلها بنفس نظرات الخوف مع الحذر..
تنهدت سكينه بسخريه..ومشت خدت كرسي كان محطوط ع تركينه..
جتها بيه وقعمزت عليه قدامها وقالت..
/من يومكم انتي واختك عقارب رافعات صوكياتكم واللي يجي قدامكم تلدغوه مافيش حاجه سو مادرتوها ولابلي وماخشيتوش عليه يازريعة الشر انتي وياها..انتي بالذات ياشومه كنت ناوية تسحريني...ايه ايه تحسابيني راقده ع وذاني ومانعرفش شن دايرات انتي وهديكا الشيطانه..كله عندي علم بيه..لكن لاني قلبي طيب فوتت ومشيت وقلت معليشي ياسكينه لعيون المرحوم سامحي وانسي..
قاطعتها صابرين وقالت..
/معناها انتي اللي درتي فيا هكي!
سكينه بقرف؛ياريت والله ولولا انك اخت ولادي راني قداش ليا مفضحه بيك ومطلعة الوسخ متاعك..ع العموم اني لتوا ماعنديش مشكله معاكم رغم كل اللي درتوه..
عقدت صابرين حواجبها بإستغراب من كلامها..
سكينه؛ومانبيكش تنسي الخدمه اللي بنديرلهالك باهي ؟!
صابرين قعدت تشوفلها بنفس نظرات الاستغراب ومش قادرة تفهم قصد مرت بوها..
سكينه بصوت عالي..
/باهي!
صابرين:شن بديري!؟
سكينه رفعت حاجبها بعدين قالت..
/افتحي وذانك معاي واسمعي كويس اللي بنقولهولك توا...
زادت صابرين خافت منها..لكن قعدت مركزه وهي تسمع فيها شن تقول...
🍃🍃🍃🍃🍃
"كان مش انتم معاي راهو راحت عليا ليل لالا مانيش مروحتها قبل ليسكروا سنه"
فردوس وهي رافعه مهاب في حضنها..
/عينك وعين عينك..بعد مايربعنوا بتروحي لحوشك وكل يوم وحده فينا طل عليك..
غرفه بضيق:تو يمرمدوني ويطفشوا رؤوف من الحوش..
فردوس:وليش ياكبدي مش حتى هو بوهم يعانيهم معاك غصب عنه..تنهدت وقالت بحسره..الله يذكرك بالخير يامصطفى حي ولاميت..كان يعاني معاي فيهم قولي كان يعاني فيهم اكثر مني..ودمعوا عيونها..
غرفه غيرت الموضوع قبل لأختها تبكي وقالت..
/زعمه عادي ندير عزومه ع طهورهم؟!
رشفت فردوس وقالت..
/اكيد من غير كلام..
غرفه بضيق:هو عبد الرؤوف قال يبي يدير عزومه بس اني هكي حاستها ثقيله..
فردوس:وعلاش! مافيها شي عزومه هي مش عرس..
وحطت مهاب في سريره حدا خوه بعد مارقد في حضنها..
غرفه؛خل نشوف الباقي شن يقولوا بعدين نقرر..
فردوس:مش حتسمعي منهم العكس صدقيني..
هزت غرفه راسها وهي تشوف لولادها والدموع في عيونها..
🍃وبرا من الدار تحديدا في الصاله..
كانت طوبى مقعمزه تتفرج ع التلفزيون وتسمع في الخطبه من الحرم المكي..
وهي تردد في الصلاة ع النبي..وكانت ملامح القلق مسيطرة ع وجهها...
🍃وبعيد عنهم بس في نفس الشارع..
تحديدا حوش الصيد اللي وصل قدامه اشرف
وهو قايم شنطة في يده..
رفع عيونه لشباك شقة فايزة اللي كان مفتوح..
شاف خطيبه وهي باينه شويه من ورا الستار وتشوفله بإبتسامه حلوة..
ردلها الابتسامه بعدين اشرلها بعيونه تخش..
وهي خشت وسكرت الروشن طول..
تنهد بعدين نزل عيونه ومررهم ع الشارع...ورجع التفت لباب حوشهم فتحه وخش..
☘وداخل الحوش..
وسط دار المعيشه اللي كان المكيف ملطف جوها..
ملتمات الكناين وحمواتهم وعزوزتهم..ماعدا خديجه اللي قاعده مانزلتش وهي محور حديثهم حاليا..
🍃وحده من سلفاتها قالت..
/وهو لعند توا خوها ماطلقش؟
عواطف:لاياحنه ماطلقش قاعد شاد في مرته..
وحده تانيه قالت..
/والله حاجه تحير تو هي مش ماتنفعش والكي كله فيها علاش ماطلقهاش!؟
عواطف:ياحنه اخته قالت مسحور..
نجاح بتهكم..
/اما خديجه هادي الله المستعان وخلاص..كان طالبه منه االطلاق وماتبيشي علاش تعب في روحها وتسحر فيه!
عواطف؛ياحنه هادي مرت خوك مابتغبي فيها..لكن تعرفوا في حلقة مفقوده في حاجه مش واضحه لامن هادم ولامن هادم..
نجمه؛شن قصدك؟
عواطف:يقولوا هي طالبه الطلاق لانها كشفاته يخون فيها..واني السبب هدا مش مقنع عندي الحق..
:تو الخيانه مش سبب مقنع للطلاق ياعواطف!؟
عواطف؛ايه في وقتنا هدا مش مقنع تي هو وينه الراجل اللي مايخونش في مرته توا تلاته ارباع الرجاله مصاحبين ع نساوينهم ولاواخدين عليهم معاش في مراة تخرب حوشها ع خاطر هالسبب..
والكنه سميره تسمع وهي مضايقه ع الآخر..
ووحده من سلفاتها زادتها على مابيها لما قالت..
/لالا ياعواطف معليشي الموضوع فيه كرامه والله لو نعرف خوك يخون فيا مانقعدله فيها دقيقة زياده كله الا كرامتي نبيع كل شي ع خاطرها..
نجاح؛اهدي وصلي ع النبي خيرك !
:الموضوع استفزني الحق مش كل النساوين يرضوا ع ارواحهم في اللي عندها كرامه وماتقبلش ع روحها الاهانه..
عواطف؛تمام تمام..انتي وشويه تانيات بس الاغلبيه يرضوا ونص..وبعدين كان بشرع ربي مافيشي اهانه..
سميره قعدت تفرك في مخدة الفراش اللي مقعمزه عليه بتوتر وهي تشوفلها بضيق شديد ودموعها شادتهم بالغصب..
:ياوخيتي ماتفرقش عندي..
كنة تانيه قالت؛لكن راهو اني مش وجهة نظري المراة اللي تفكر مليح هي اللي تعرف كيف تتصرف وترد راجلها ليها الراجل مايخونش الا لو حس ان في حاجه ناقصاته ..
:لاحبيبتي والله ماهكي الرجاله بصفه عامه مايملاش عينهم الا التراب...
:نخالفك اني في هادي معليشي تتعبا عين الراجل لو لقي مراة قويه قايماته وقايمه روحها وفي نفس الوقت عندها ثقه في روحها يعني ديما تخليه يشوفها حاجه كبيره الرجاله يموتوا في المراة اللي هكي..
نجاح؛صحه ليك والله عندك حق المراة لما تكون واثقه في روحها ومقدرة نفسها راجلها يقدرها غصب عنه..
طلعت من سميره تنهيده ماقدرتش تكتمها..
خلتهم كلهم يشبحولها..
هي لما انتبهت لروحها وشافت نظراتهم ليها ارتبكت وقالت..
/مافكرتوش في الغدي!؟
كلهم شافولها بإستغراب وعواطف قالت..
/سمسم خيرك بديتي تاخدي وتعطي! ماهو انتي اللي مقترحه الغدي وكلنا واقفنا عليه بالإجماع!
هي ضحكت بآرتباك وقالت..
/نتسهوك ياعواطف نبي نغير الموضوع قبل لينوضوا لبعض..
ع خشة نجمه وهي تقول..
/عطوفه نوضي ديري لخوك اشرف فطوره روح توا..
نجاح؛روح؟!
عواطف:نوضي ديرله انتي نجاح..
نجمه؛نوضي انتي عواطف..
ناضت عواطف بالسيف ومشت طلعت من الدار..
ونجمه مشت قعمزت حدا كنتها سميره وقالت..
/خيره مروان رايح زي التل ووجهه زي البزار!؟
سميره؛من هاللعبه ياعمتي يلعب فيها ليل نهار وقاطع الماكله ع خاطرها..
نجمه:وبوه وينه عنه خير مادارلاش حل..
سميره؛سلامتهم كبروا ياعمتي ومعاش ينقدروا..
نجاح؛لاياسميرة ردي بالك شن كبروا هادي..قاعدين صغيرين مايعرفوش مصلحتهم..
سميره:والله يانجاح ماينقدروا ولوا اطول من بوهم عيب حتى يمد يده عليهم..
سلفتها قالت:اهوا اشرف روح مايقدرهم كان هو..
نجمه:صح..تو نقول لأشرف..
"السلام عليكم"
توجهت انظارهم كلهم للباب وهي خشت عليهم وع وجهها ابتسامه كبر مستفزة زي عادتها..
جت لنجمه وقالت؛كيف حالك اليوم ياعمتي..
نجمه؛في خيار خيري..
خديجه؛دوم ياعمتي..ومشت لسميره وقالت..
/سلفتي الباهيه..
وناضت سميره وهي تقول..
/خدوجه كيف حالك..
وسلموا ع بعض بالخد وباقي سلفاتهم ومعاهم نجاح انزعجوا بعد ماخشت وكأنها توزع في طاقه سلبيه في المكان وتمص الايجابيه كلها...
🍃🍃🍃🍃🍃
"حددوا سواريكم؟!"
يزن:ايه بوي بكري حددتهم..
المهدي:تمام..بعد صلاة الجمعه بنمشوا لعمتكم نسرين نتغدوا عندها..
محمد طلع من الدار وهو يمسح في شعره بالفوطه وقال لبوه..
/هي قالت تعالوا؟
المهدي:اني قلتلها في مشكله!
محمد:لا مش قصدي استغربت علاش ماقلتش من امس..
المهدي:ايه يعني عندك مشكله؟
يزن قعد يشوف لخوه..
ومحمد حرك راسه بالنفي وقال..
/لا ماعنديش مشكله..
تنهد المهدي ومشي وهو يقول..
/هيا وتوا ارواحكم..
بعد مامشي من حداهم يزن قال لخوه.
/بوي طايرتله..
محمد رفع حواجبه ونزلهم وهو يقول..
/إن شاء الله خير..عقد حواجبهم وقال..هي بسرعه وتي روحك خير مايفصل علينا..
وولوا الزوز خشوا للدار...
🍃🍃🍃🍃🍃
نازل من الدور وهي تقول بتذمر..
/نو وغمة وخلوق ضايقه وهما بيجوا..عليك يوم مبارك!
ياربي الصبر من عندك..
شويه سمعت صوت جري ع الدروج..
نضال بإستعجال..
/حولي يام حولي..
وسعت بسرعه وهو نزل يجري..
مغليه:قد مايعطي باللطف..
وكملت نزولها وهي معصبه...
🍃🍃🍃🍃
الساعه 4:30قبل العصر
الضي مقطوع..والمولدات شغاله..
وفي دار المعيشه في حوش الصيد كان المكيف شغال يبرد عليهم وهما يشربوا في شاهي عالة ام العيله...
وفي عز الهدرزة الحلوة...
كانت خديجه تراجي في الفرصه المناسبه بش تبدا ببخ سمها..
وهالفرصه جتها من عواطف...
عواطف:مافيش اخبار عن اخت كنتكم ياخديجه!؟
كلهم وجهوا انظارهم لخديجه اللي حطت طاسة الشاهي وقالت..
/لا ياعطوفه والله معاد نندري عليها...
عواطف؛عليك عمله ياوخيتي الله يجيرنا..
نجاح؛بالله فكونا من الدوة في المواضيع هادي..
سميرة:ياريت..
خديجه شافت لسميرة بنظرة عابرة بعدين ثبتت نظرها ع عزوزتها وهي تقول...
/ايه حقه عمتي قلتي للبنات من رينا ف الحفله؟
نجمه وجهها تغير وشافت لسميره..
عواطف بفضول..
/مني؟
وجهت خديجه نظرها لعواطف وقالت..
/ابتسام كعبار..
نجاح شافت لسميره طول..
وسميرة وجهها انخطف لونه...
عواطف لمحتها بطرف عينها بعدين شبحت لخديجه وقالت..
/بنت شارع الأشهب كانت صاحبة بنات خليفه..
خديجه:ايه..كان تشوفيها ياعواطف قاعده زي ماهي ويخي كان مازايده في الجمال..
نجمه:لاجمال لاعيني كبرت وباين فيها الكبر..
عواطف؛ماقلتيش عليها يام..
نجمه؛مش حاجه مهمه بش نحكي عليها..
خديجه قعدت تشوفلها بإبتسامة استغراب وقالت..
/لتوا ياعمتي مش طايقتيها..
نجمه:لاماليا علاقه بيها بش مانطيقهاش عطيت رايي فيها بس..
نجاح قعدت تشوف لخديجه بإمتعاض..
عواطف:باهي شن اخبارها؟
خديجه؛ماهناك ماهدرزنا شويه وراجلها اتصل بيها...الا بالله ماتتفكروش مني خداها؟
عواطف؛اللي نتفكره زمان انها تزوجت واحد معرفة خوتها وضابط في الجيش هو هدا..
خديجه:اها..لكن ياسبحان الله راجلها اسمه عبد الفتاح..
نجمه شبحتلها بعدم استيعاب..
وعواطف ونجاح شافوا لسميره بعدين شافوا لخديجه وعواطف قالت..
/عبد الفتاح!
خديجه؛ايه..لما اتصل بيها تليفونها كان جنبي شفت الشاشه وقريت اسمه..
زاد توتر سميره اللي قاعدع تمرر في نظرها ع سلفاتها وحمواتها بطريقه غير ملحوظه..
نجاح شافت لأمها..
ونجمه مازال تشوف لخديجه وهي تفكر..
اما باقي الكناين اللي حسوا ان في شي غريب اكتفوا بالصمت والاستماع..
عواطف؛باهي شن جابها غادي!؟
خديجه قالت:بنتها تقرا مع بنت خوي طاهر وهما تعارفوا عن طريق بناتهم وولوا صحاب قصدي نجاة وابتسام..
عواطف:سبحان الله الدنيا صغيره.
خديجه برفعة حاجب وهي تشوف لسميرة:ايه..امس قلتها في خاطري سبحان ربك كيف يسبب الاسباب ويسخر الظروف ويجيب الصدف..
وقعدت نجمه مركزة ع خديجه كيف تشوف لسميره لكن ماشافتش التوتر والضيق اللي كانوا باينات عليها...
🍃وفي حوش نسرين..
بعد ماتغدوا مع بعض..
خش يزن قيل في دار المعيشة..
وفي الصاله..
نسرين والمهدي وولده محمد حاطين قدام سفرة دلاع وياكلوا..
نسرين:ربي يهديه بوي وخلاص..
المهدي:الواحد عليه ينصح ماعنده مايدير غير هكي..
نسرين هزت راسها وهي ساكته..
حط المهدي الشوكه اللي كان ياكل بيها..
بعدين تنهد وشاف لأخته وقال...
/قولي يانسرين..عندك علم بالدوة اللي طالعه ع مرت خوك الجالي..
عقد محمد حواجب بإستغراب..
نسرين بضيق:ايه وصلتني ..
المهدي:شن اللي انقال بالزبط..
نسرين:اللي سمعته وخيي..
المهدي:نبي نسمع اللي سمعتيه..
هي اشرت بعيونها ع محمد..
المهدي:اني نبيه يسمع..
محمد؛دوة شني شن يقولوا؟
نسرين تنهدت بضيق وقالت..
/بعد المشكله اللي صارت بين الجالي وحسين الناس طلعت دوة..ان حسين يبي ياخد طوبى بعد ماتطلق..
المهدي:مش هدا اللي انقال يانسرين..
محمد بغضب؛قصدك مطلعين دوة ان مرت عمي الجالي طالبه الطلاق بش ياخدها ولد عمها!..
المهدي:يعني انت مش مارة عليك الدوة هادي بكل!
محمد وهو مصدوم؛لاوالله يابوي ماسمعت حاجه من حد وبعدين تعرف وضعنا مع حوش جدي محمد..
المهدي:كويس فهمتها طول اللي طلع الدوة هادي حوش جدك يامحمد..
شاف محمد لعمته..
ونسرين بضيق شديد قالت..
/اني ماسمعتش منهم هما الدوة مباشرة لكن..
المهدي:كملي قولي اللي تعرفيه كله..
نسرين زفرت وقالت..
/كلمتني فايزة المده اللي فاتت وحكتلي ان في من مصور طوبى وهي واقفه مع حسين فوق السطوح والصورة هادي وصلت لخطيبه حسين وصارت مشكله كبيره..
المهدي بصدمه؛صورة!
نسرين؛لا يامهدي مش زي مافهمت ماكانوش برواحهم وقتها لكن في من خدالهم الصورة وهما برواحهم..
المهدي:واني هدا اللي فهمته اللي واخد الصورة خداها من حوشنا حوشنا مقابل حوشهم بالزبط..
نسرين قعدت ساكته وهي مضايقه لأبعد حد..
المهدي وهو مصدوم..
/معقوله توصل بيهم لهني! لالا اختك خديجه مش طبيعيه وامك..سكت شويه بعدين قال..استغفر الله العظيم..
ومحمد يسمع وهو يفكر في شخص واحد بس في نظره ورا اللي صار....
المهدي تنفس بعصبيه بعدين قال..
/نسرين متأكد انك عارفه السبب الحقاني للي صار بين خوك ومرته..توا نبي نعرف من هي اللي محمد يومها قال شافها معاه ..
محمد بان ع وجهه الارتباك..
ونسرين بدت تفكر في ردة فعل المهدي لو عرف وخافت..
المهدي مرر نظره بينهم وقال..
/اني عارف انك تعرف من تكون يامحمد لكن خايف تقول..
الموضوع كبر هلبه ووصل لمواصيل خطيره معاش ينفع يدرق شي توا..في سمعة وليه في النص يانسرين..اخت صاحبتك يانسرين تربت ع ايديكم كلكم طوبى وتعرفوها كويس..
دمعوا عيون نسرين..
ومحمد قعد يشوف لبوه بضيق وحزن..
المهدي:انت يامحمد قلت امك وصاتك عليها وباين عليها كانت تعرف حاجه الله يرحمها..ع خاطر امك يامحمد تكلم..
تعبوا عيون محمد بالدموع ..رمي بنظره للأرض وهو يتفكر في اللي قاله عمر عن عمه الجالي..
《عمك مريض يامحمد》
هو هز راسه بغضب وقال..
/مادام قعدتوا ساكتين هكي معناها قريبه هلبه...
"نجاة"
رفع محمد عيونه في عمته..
نسرين؛نجاة يالمهدي..
قعد المهدي يشوفلها للحظات..بعدين نزل نظره للأرض وغمض عيونه ورجله اليمين بدت تهز..
نسرين:اللي بينهم كان قبل ما الجالي ياخد طوبى..
فتح عيونه ورفعهم في اخته وهو مندهش..
ومحمد ولده قعد يشوفله بضيق..
المهدي؛الكلب يومها يقنع فيا نردها..!
انصدم محمد في اللي سمعه من بوه..
المهدي بغضب؛ شوفي لوين وصلت بيه الكلب هدا!..
نسرين بضيق؛المراة بعد عرفت طلبت الطلاق بهدوء قالتله طلقني ومش حنطلع شي من اللي عرفته لحد لكن خوك قعد يكابر ومايبيش يبان غالط ومايبيش يطلقها في نفس الوقت..
المهدي بعصبيه؛وامك عارفه هدا كله!
نسرين هزت راسها بآيجاب..
ابتسم تهكما وقال..
/والله مااستغربت هادي امي من يومها..
ناض وهو يقول..نوض خوك والحقوني..
ومشي طول بيطلع من الحوش..
نسرين بقلق..
/برا الحقه برا..
هز محمد راسه وهو قلق وناض مشي لحق بوه..
نسرين بقلق..
/مالا كان يعرف انه كان واخدها شن يدير! ياربي لطفك يارب..
🍃🍃🍃🍃🍃
بعد صلاة العصر..
طلعت من الصاله وهي تحول في المصليه..
حولتها وتوجهت للدار...وصلت فيها خشت وحطت المصليه ع الشماعه وطلعت ومشت بإتجاه الكوجينه وهي تسمع في هدرزتهم...
وصلت للكوجينه وخشت...
وقفت في مكانها وهي تردد همسا #الصلاة_الابراهيميه
كانت تحاول تتغلب ع خوفها وتوترها بيها..وكانت تبي تشغل نفسها بشي تاني معاها يخفف هالتوتر..
خطرت ع بالها حاجه ليها هلبه عليها...
قالت بصوت منخفض..
"دونات"
ومشت للدولاب بش طلع منه الحاجات اللي تبيهم للعجينه وهي تردد في الصلاة الابراهيميه..
🍃🍃🍃🍃🍃
"مرت خوك تلمح لحاجه"
نجاح بقلق؛واضح هلبه..تي غير من طلعت ابتسام هادي توا..
عواطف؛قالت اسم راجلها عبد الفتاح! زعمه حق ولابلعاني جو دير فيه بش تحرق سلفتها..
نجاح؛لا..مااعتقدش..زي ماقلتي بكري هادي تلمح..
عواطف عضت ع شاربها بعدين قالت..
/حي كان مايطلع خوك دايرها يانجاح!
نجاح بقلق؛حي عليه من امك بعدين ماترضى في سميرة شي وماطيقش ابتسام بكل..
عواطف سكتت شويه وهي تفكر بعدين قالت..
/نقولك حاجه..حتى لو طلع داير هكي مش عيب وسميرة مراة عاقله اكيد مش حتخرب حوشها وتشرد صغارها ع كبر..
نجاح شافتلها شويه بعدين قالت..
/يستر الله وخلاص..هي تعالوا نطلعوا درنا الشبهه..
ومشت طلعت من الدار وعواطف لحقتها...
🍃🍃🍃🍃🍃
خشت عليهم للدار لقتهم قاعدين يهدرزوا في موضوع مهم..
قعمزت وهي تقول..
/عجنت دونات..
اريج؛تقدري ديرهم وانتي بوضعك هدا!
طوبى بضحكه:عادي مافيهاش صعوبه..
مطيره؛شربتي ميه باهي اليوم؟
طوبى:كلمت ستيكه..
غرفه؛طوبى..
شافت طوبى لغرفه..
غرفه؛في حاجه نبي ناخد رايك فيها..
طوبى:شن هي!؟
غرفه:اوبي وهوبي قريب يسكروا الاربعين وان شاء الله بعد الاربعين بنطهروهم..ورؤوف قال يبي يدير عزومه..
طوبى:ايه باهي وين المشكله..
غرفه بضيق..
/مش هاين عليا ندير مناسبه فرح وتراب بوي قاعد اخضر..
بلعت طوبى ريقها وكأنها تبلع في بكاها..شدت دموعها بقوة وقالت..
/الله يرحمه ويغفرله ليه شهرين متوفي والحداد ع الميت مايفوتش تلاته ايام..وبعدين انتي لاك دايره دربوكه لاغني عزومه وخلاص وبعدين هادوا اول ذريتكم من حقكم تفرحوا بيهم..
ابتسمت مطيره وهي تشوف لطوبى..
فردوس:مش قتلك ياغرفه..
ابتسمت غرفه وهزت راسها بإيجاب..
تنهدت طوبى وقالت..
/غير في حاجه وحده بس..العزومه تندار في حوشكم..
خفتت ابتسامه غرفه شويه..
طوبى؛هدا الانسب ياغرفه بعدين حوشكم كبير عندكم وين تحطوا الناس االي بيجوكم..
مطيره:كلام طوبى مزبوط ياغرفه وراهو هدا اللي مفروض يصير..
غرفه شافت لأولادها وهما راقدين وقالت..
/صح..
طوبى بإبتسامه؛تفرحي بيهم دوم ويارب ويجعلهم احسن ناس..
ابتسمت غرفه وقالت..
/سلمك ياربي..
آلاء بتذمر؛اللهم توب علينا من هالعيشه فهالبلاد..
اريج:خير دعوتك..
الاء؛الشحن تم وتبيلك امتى نولعوا المولد وعندي زبونات بنتفق معاهم ع طلبيات..
مدتلها طوبى التليفون وقالت..
/خودي تليفوني شحنه كوبس..
ناضت الاء وجت لطوبى خدت منها التليفون وهي تقول..
/ماتحرمش..
وولت لمكانها.وطوبى تشوفلها بإبتسامه خالطها القلق ومافي حد من اللي حواليها لاحظ هالشي عليها...
🍃🍃🍃🍃
فهالوقت..
كان المهدي مقعمز في المطحن يراجي في جية بوه من الجامع..
لاحظ عليه محمود العصبيه لكن خاف يسأله..
ويفوت محمد شنيبه من قدام المطحن..
ويشوفه المهدي وينوض طول يطلع من المطحن..
☘ومحمد شنيبه فتح باب الحوش وخش..
وهو خش وراه وسكر الباب وقال..
/بوي..
استغرب محمد في حالة ولده وقال..
/خيرك شن في!؟
المهدي؛نبيك في موضوع مهم مايتأجلش..
محمد؛ان شاء الله خير حسك غششتني!..
المهدي:خل نخشوا توا ونحكيلك..
وفجأه..
يدق باب الحوش..
تنفس المهدي بعصبيه..
بعدين فتح الباب...
بدت ع وجهه ملامح الاستغراب وين شاف اللي واقفين ورا الباب..
واستغراب بوه كان اكبر لما شافهم جايين في هالوقت غير اللي قالوا بيجوا فيه قبل..
اخ محمد شنيبه الكبير:شن بنقعدوا مصبيين في الباب واجد!..
المهدي بشي من الارتباك؛سامحوني بالله تفضلوا تفضلوا..
محمد شنيبه؛الحوش حوشكم من غير مانقولوا تخشوا طول..
هز خوه الكبير راسه بإيجاب وخش وهو يقول..
/بسم الله..السلام عليكم..
وخشوا بعده خوته الذكور اللي كانوا جايين منهم تلاته واحد يسكن في طرابلس والزوز التانيين من زليطن..
وخواتهم الزوز..كامله..ووحده تانيه عايشه في طرابلس..
بعد ماخشوا سكر المهدي الباب...
🍃ومقابل باب هالحوش...
قدام باب حوش تاني..حوش لطفي الواعر..
كان الحاج علي يفتح في الباب..
بعد مافتحه خش..وقبل ليسكر الباب شاف جهة حوش شنيبه بنظرات حاده..بعدين سكر الباب..
بعد ماسكره تنهد..والتفت...
جو عيونه ع حفيدته الصغيره اللي كانت واقفه جنب شجرة الفل تشوفله بشي من القلق..
وهو طول مشالها....
🍃🍃🍃🍃🍃
"مش قالوا بيجوا بعد المغرب!"
محمد شنيبه؛وغيروا رايهم وجو توا عندك مشكله!؟
مغليه:واني شن قلت بش حمقت هكي! استغربت بس هما مايحبوا الطلوع في الحمو اول مرة يديروها..
محمد بقلق؛وجايين بروحهم عيالهم وصغارهم مش معاهم..
زادت استغربت مغليه..
هو قال...
/ان شاء الله خير وخلاص..هيا نوضي بسرعه وتي روحك واطلعي لضيوفك..
ومشي طلع من الدار وخلاها تفكر بقلق...
🍃وفي شقة بنتها خديجه..
اللي كانت توتي في روحها بش بتمشي لحوش ماليها تعاون امها في التجهيزات..
كان راجلها حتى هو يوتي في روحه بش بيطلع مشوار يقضي فيه مصلحة شغل..
🍃خديجه:احتمال نبات..
محي وهو يحط في عطر:ماتعبيش روحك ماديريش جهد زايد..
خديجه؛لاالا مش حندير شي امي بتجيب زوز شغالات لليله وغدوة..
محي سكت عن التعليق..
تأففت خديجه وقالت..
/اني بوي هو اللي كاسرلي رقبتي حتى بعد عرف بالفضيحه اللي صارت لأخته هديكا العقرب قاعد دايرلها قيمه ويبيها تحضر..تعرف بديت نشك فيها دايرتله حاجه..
محي:اختها شن صار فيها!؟
رفعت حاجبها وقالت..
/فضول ولاتخميم!؟
محي بملل..
/خلاص خلاص معاش نبي نعرف شي..
ومشي طلع من حداها وهي معاه بنظرات عيونها اللي كلها غضب وغيره...
🍃وهو طلع من الشقه وعقله يفكر في صابرين..
مش تخميم ولافضول...
بل للتشفي وتبريد القلب...
🔺️في وقت سابق 🔺️
قبل عدة ايام...
كان محي الدين سهران عند مختار في حوازته "مزرعته"
يتبادلوا في احاديث اغلبها اثار غضب محي الدين..
مختار:معاش دورت ورا الموضوع بش تعرف من دارلك هالكمين!؟
محي بضيق:حاولت بس ما وصلت لشي اني عندي منافسين واعداء هلبه ماقدرتش نعرف من فيهم اللي دار هكي..
مختار ابتسم بغرور وقال..
/باهي ولو قتلك اني عرفت من دبرلك هالدبارة الشيطانيه!
محي بلهفه مع غضب..
/مني!؟
مختار؛مش منافس ليك لكن عدو..او عدوة بمعنى ادق..
عقد حواجبه بإستغراب وقال..
/شني!؟
مختار:زي ماسمعت اللي كادلك هالمكيده وحده انت تعرفها كويس كويس يامحي..
محي الدين بشي من الانفعال..
/من هي هادي!؟
مختار رفع حواجبه وقال..
/اخت كنة حوش شنيبه مع وقف التنفيذ.. اللي اسمها صابرين....
🔺️في الوقت الحاضر🔺️
طلع محي من الحوش بالسيارة وهو يتفكر في اللي حكاهوله مختار عن المكيده بكل تفاصيلها..وكل مايتفكر تفصيل يزيد غضبه ويتمنى لو يقدر ينتقم منها بأكثر من اللي داره..
🍃🍃🍃🍃🍃
وصابرين توا في حوش مرت بوها...
خشت للحمام وطولت فيه معاش طلعت..
ومرت بوها تخبط عليها وهي تعيط وتقول..
/اطلعي عطك طالعه طلع روحك وانتي سكنتي فيه..
جاها واحد من ولادها وقال..
/خيرك تعيطي يام صوتك يسمع فيه الشارع كله!
سكينه؛الفرحه الفاسده ليها ساعه في الحمام لتوا نزحت الخزان..
:تي كسري ع امها وخشيلها بالك اشبح منين محصله تليفون وتتكلم بيه..
سكينه:نهارها الاسود كان تطلع هكي!..
وقعدت تنعت فيها بأقبح الالفاظ..بعدين وخرت كم خطوه واندفعت القدام بقوة ودفت الباب اللي انفتح طول..
وشافت صابرين مرميه ع الارض وفي جنبها شيشة "وركينه"..
سكينه بصدمه مصطنعه..
/وووه عليا يانهاري الاسود هدا شنو!
خش ولدها ووين شاف المنظر انفجع وقال..
/خير عمها هادي!؟
سكينه؛يانهاري الاسود هادي منتحره ياغبارتي السودا..لالا مانبيش حد يموت في حوشي منتحر اني بعدين تقعد غولته فيه! ووك عليا ووك..انهضها ياولد انهضها..
:شن نهضنها يام وين نمشي بيها تبيني نحدفها من الروشن!..
قعدت تخبط ع صدرها وهي تقول..
/مانبيهاش تموت في حوشي لالا..شدت ذراعها وقالت..
ولانقولك اسمع اسمعني جاي..دير اللي بنقولك عليه لتوا بالحرف الواحد...
🍃🍃🍃🍃🍃🍃
في احد المستشفيات العامه في العاصمه..
كانت فيه زحمه في الباحه متاعه..
:وواك رجليا تسكروا من الركوب والنزول..
:الله غالب ياوخيتي ماعندنا مانديروا..
وبعيد عن هادم الزوز..
في راجل رافع في غمره بنته حطها في الكرسي الخلفي للسيارة وسكر الباب..
ومشي ركب ومرته ركبت جنبه..
هو قال:عليك بلاد حرفه وخلاص..
:الله غالب..
وغيرهم هلبه موجودين في هداكا المكان...
كلهم في لحظه التفتت انظارهم لسيارة خاشه تجري..
ودرست فجأه بعد مادار صاحبها فرين..
نزل منها ومشي فتح الاب الخلفي وخش نزل وحده..
ورماها حدا السيارات وفيسع ركب وطلع يجري..
مشهد خلا الناس تجمد من الصدمه والفزع..
وكلهم يشوفوا للمراة الملوحه وكل واحد عقله يفكر في حاجه..
ومالحقوش يستوعبوا اللي صار في البدايه..
لين يصير بعده حدث اغرب..
تخش سيارة تانيه مظلمه..ينزل منها واحد ملتم..
ياخد نفس المراة ويحطها في السيارة من الخلف ويسكر عليها بعدين يركب ويتحرك طول بش يطلع..
:اللطف ياربي هدا شني!
:والله تقول نتفرج ع فيلم!..
~~~~~
:شن اللي صار توا هدا!؟
:مش قتلك بلاد حرفه معاش ينقعد فيها خلاص...
وشغل سيارته وتحرك طول...
#حق_الرد
#طوبى
....يتبع....
