#طوبى "جنة طوبى"
#جمان_فريد
#الجزء_109"عرجون فل"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#التسبيح
التسبيح من الأذكار العظيمة
قال ابن مسعود رضي الله عنه :
ما كُرِب نبي من الأنبياء إلا استغاث بالتسبيح
فأكثروا من التسبيح في الرخاء والشدة
"الذين يحملون العرش ومن حوله يُسبّحون بحمد ربهم"
ويقال أن الملائكة لم يعينوا على حمل العرش إلا بالتسبيح
فالتسبيح يفرج به الهموم وتفك به الأزمات وهو سر من أسرار الإستجابة كما شرط من شروط اداب الدعاء لأن لكي يكون دعاءك صحيحا لابد من الثناء على الله والتسبيح فيه ثناء على الله وتنزيه له....🌿🌿🌿🌿🌿🌿🌿🌿🌿🌿🌿🌿🌿🌿🌿
🍃الشعور بالذنب..عقاب ذاتي🍃
_____________________________________
طلع من المصور وهو يرفع في سوستة كبوطه"معطف"
التفت ع الباب سكره كويس ومشي بإتجاه حوش المهدي شنيبه..
قطع الطريق..وصل فيه..خشله بسرعه..
🍃🍃🍃
والتارقي في الشقه مقعمز في دار المعيشه يقرا في القرآن..
لما سمع دقة الباب وقف..سكر المصحف..حطه ع جهة وناض طلع من الدار وتوجه للباب..
وصل فيه وفتحه طول..
سامي:وينك ياراجل خيرك مسكر تليفونك!؟
لاحظ عبد القيوم ملامح فجعة ع وجه سامي قاله..
/نبي نقعد بروحي حرام يعني!
سامي بأسف:واضح جوك مش مزبوط هدا علاش سكرت تليفونك..تنهد وقال..توا كلمني ربيع وقال نبيه السوري توفى..
ملامح وجه عبد القيوم تبين انه مااستوعبش اللي سمعه من سامي وكأنه ماسمعاش اساسا..
سامي بضيق؛ارتفع عليه الضغط وتأخروا في إسعافه..متوفي ليه ساعه تقريبا حسب ماقالي ربيع..
قعد عبد القيوم جامد في مكانه ماابداش اي ردة فعل..
بس من داخل كان يحس بشعور مؤلم بشده وفي نفس الوقت بشع للغايه..
سامي بإستغراب قال..
/تارقي سمعتني شن قلت!
رمش عيونه ببطء بعدين بلع ريقه وقال..
/وينهم!؟
سامي؛في مصحة *****رفعهم ربيع..
لف ومشي بإتجاه داره بدون ماينطق حرف ووضعه اللي كان مريب خلا سامي يستغربه ويحس ان في شي تاني صاير كان سبب لردة فعله الغريبه...
🍃وهو في داره يبدل في حوايجه ويتفكر في اخر اتصال اجاه من سلافه..
قعد يتخيل في حالتها وقتها كيف كانت..حالة امها..اختها..
حالة نبيه نفسه..الراجل الطيب الاصيل اللي كان يتعامل مع عبد القيوم وكأنه ولده..كان ع قد مايقدر يحاول يردله جمايله عليه برغم ان عبد القيوم ولامرة استنى مقابل..ولااستنى من اي حد وقف معاه يردله شي..
لكن عزة نفس نبيه خلاته يكافيه ويردله ديونه..
وهالراجل لما ولى بأمس الحاجه للمساعده هو رخي بيه بدون مايقصد..كان ممكن ينجى لو رد ع اتصال بنته وسارع لمساعدتهم..لكن للأسف خذلهم وخذلانه ليهم كلفهم غالي هلبه..
🍂هدا اللي كان يفكر فيه عبد القيوم..خش حتى هو ف دائرة الشعور بالذنب اللي ديما تحاصر صاحبها وتخليه يأنب نفسه ويعاقبها ويبدا يحاول يدير كل شي بش يكفر عن هالذنب..
وهالمرة الذنب مش هين ابدا🍂
طلع بسرعه من الدار بعد مارفع معاه مبلغ كويس وجي لسامي وهو يقول..
/كلم ربيع واسأله قاعدين غادي!؟
طلع سامي من الشقه وهو يقول: تو نشوفه..
لبس عبد القيوم البوت متاعه وطلع من الشقه وسكرها كويس..
🍃🍃🍃🍃🍃
في الطريق..
وهو يسوق كان بادي عاصفة اللوم والتأنيب لنفسه وسامي يسمع فيه وهو مضايق..
عبد القيوم بعصبيه..
/فكرة حطوها في راسي حط خلوني نسلم بيها ونمشي وراها وانا عمري ماعطيت عقلي لبنادم..البنت تكلم فيا تستنجد بيا وانا نفكر فيها بطريقه تافهه وسخيفه..
قتلكم قبل قلت..هما هكي ماهمش كيفنا يختلفوا علينا تصرفاتهم الطبيعيه عندنا نحنا لازم يكون ليها الف تفسير غبي ومتخلف..اااه..مانبيش نتخيل مانبيش نتخيل كيف كان وضعهم ساعتها ولاشن حسوا لما رديتهم بهالطريقه الحقيره..
الراجل مات مات ياسامي وانا سبب في موته..انا اللي قتلهم يوم من الايام كان احتجتوا كلموني طول..انا اللي نعرف وضعهم وظروفهم..كيف سلمت عقلي لهالتفكير التافه كيف!
🍃وسامي يسمع بصمت..يعرف عبد القيوم كويس وحفظ شخصيته حفظ تأثير موقف زي هدا مش حيطلع منه بسهوله..🍃
🍃🍃🍃🍃🍃
وقدام المصحه..
كانت مقعمزه سلافه بروحها بعد ماروحوا جيرانهم بأمها لأنها خلاص توا خشت العده..
سلافه قعدت بش تكمل الاجراءات وفي نفس الوقت ماكانتش تبي تخلي بوها بروحه..
هي توا في حالة هدوء ظاهري..الدموع تنزل..والصدمه باينه ع وجهها..ومن داخل قلبها كان يبكي دم..
مش قادره تنسى حالة بوها كيف كانت.
ولاقادرة تنسى اخر كلام قاله..
🍃اللي صار معاهم وارد جدا يصير معاهم لو كانوا في بلادهم..
وفي من اهل البلاد اللي هما قاعدين فيها حاليا صار معاهم ماهو أسوأ..
بس الفرق بين الحالتين..الغربه ومرار الغربه اللي تزيد ع القهر قهر...
يقولوا اللي يطلع من داره يقل مقداره وغالبا هالمثل صحيح وعاشوه معناه هلبه ناس وسلافه وعيلتها منهم..🍃
وفي وسط صخب الاحزان اللي عايشة فيه سلافه حاليا..
درست" اللاند كروزور" وعيون صاحبها عليها..
فتح الباب ونزل..سكره ومشالها طول..
وصديقه نزل بعده وهو يشوفله بأسف..
🍃وصل عبد القيوم في الكرسي المقعمزة عليه سلافه وقال بألم...
"سلافه.."
غمضت عيونها ودموعها نزلوا..
كمل يقول بنبرة كلها اسف..
/عظم الله اجرك..تنهد بألم وقال وهو مرتبك ومتألم..اسف..اسف جدا عارف ان الاسف في حالة زي هادي مايدير شي حتى لو سامحتوني ع قلة اصلي معاكم مش حنقدرنسامح نفسي..انا اللي قتلكم الف مرة لو تبوا اي شي كلموني في اي وقت..سكت وهو مخزي من نفسه ومتألم ونادم ندم شديد..مسح بيده ع وجهه وهو يمرر في نظره حواليه بعدين شافلها وقال..والله ماعارف شن نقول..متحشم منكم واجد..
وتباعد عنها كم خطوه بدون مايشوفلها..الحاله اللي هي فيها تقطع القلب..لما شافها قلبه الطيب ماتحملش ورجع يأنب في نفسه ويلوم فيها..
سامي بعد ماشافله شويه مشي لسلافه وقف عليها وقال..
/عظم الله اجرك..قاعده بروحك هني!؟
مسحت دموعها وقالت بصوت مبحوح..
/بعد شوي رايحه..
سامي حمحم وقال بضيق..
/عبد القيوم ليه يومين مش ع بعضه وماطلعش من حوشه بكل ياريت تعذريه لو يعرف اللي صار معاكم وقتها مايخليكمش..
هزت راسها بصمت وعيونها في الارض والدموع ينزلوا منهم..
شويه ودرست سيارة جارهم كان جاي ومعاه وحده من بناته نادت سلافه.
وجهوا انظارهم ليهم..وسلافه بتعب ناضت ومشت بخطوات ثقيله اتجاه السيارة وعيون عبد القيوم معاها..
ركبت وسكرت الباب وتحركت السيارة وعيونه مازالوا معاها بنظرات كلها ندم وألم...
🍃🍃🍃🍃🍃
هديكا الليله..
مارقدتش فاتن من فرحتها وحماسها..سهرت وهي تبحث في النت عن كل المعلومات المهمه اللي تخص الحمل..
وكل ماتشوف صورة لمراة حامل في الشهور الاخيرة تزيد حماس وشوق بش توصل فهالمرحله..
🍃وراجلها في حجرته الخاصه..
متكي ع الكنبه وهو يسمع في مقطوعه موسيقيه هالمرة ل"باخ"...
يسمع فيها وهو يفكر في كلام طوبى اللي مش قادر ينساه..
كلام من هالنوع سمعه مرارا وتكرارا وماحركش فيه شعره كان يخش من وذن يطلع من التانيه..بس هالمرة مش قادر يتخطى..علاش!!؟هو نفسه يجهل الاسباب..
🍃وهي مقعمزه في مكانها المفضل تحت الروشن وضي القمر هالمرة غايب..
حاطه في وذانها السماعات وتسمع في سورة مريم اللي باديه تحفظ فيها...
كانت عايشه فيها في القصص اللي تحكيها السورة...
بالذات قصة سيدنا ابراهيم مع بوه..واكثر شي اثر فيها طريقه مخاطبة سيدنا ابراهيم لبوه الكافر..
وقفت عند هالنقطه وهي تفكر في العيل اللي حيجي لمختار وبدت تتسائل..
ياترى كيف حيتربى!؟..ولمن بيطلع!؟
هل حيصلحه الله رغم فساد بوه..او يخليه عقوبه لبوه ع عقوقه لوالديه وطغيانه وظلمه لخلق الله!!؟
سمعت السورة لنهايتها..بعدين خدت تليفونها شغلت الفلاش وحطاته ع جهة..
قربت مذكرتها..فتحتها وخدت قلم الحبر اللي كان في وسطها وبدت تكتب..
(ممكن مختار يكون عنده حق لما يرفض الابوه..اكيد خايف صغاره يطلعوا زيه ويتعاقب بيهم..واحد زيه عايش في بيئه مليانه فساد وانحلال اكيد مش حيعرف يريبهم تربيه سليمه..
لكن توا خلاص قدر الله وماشاء فعل..مانقول غير ربي يهدي فاتن ويصلحها بالك يصلح عيلها لصلاحها رغم فساد بوه..)
🍃🍃🍃🍃🍃
تاني يوم..
الساعه 11:37صباحا..
لبس ربيع البالطو متاعه وهو يقول..
/نحطك في حوش ماليك تتغدي غادي بعدين نوليلك نرفعك تعزي ونروحوا..
نسرين وهي تلبس في ولدها طاقيه صوف قالت..
/باهي..رفعت ولدها في حضنها وهي تقول..قداش وجعوني ياروحي عليهم مانفكر غير شن بيصير فيهم بعدين..
ربيع:نتوقع بعد ماتطلع مرته من العده تتزوج بنتها المخطوبه..
نسرين:ممكن..لكن مرات خوه اللي قاعد في مصر يجيبهم عنده..
ربيع بضحكه متهكمه..
/ضحكي حتى انتي..صدقيني كان جي للعزي حيفتح موضوع زواج بنت خوه بش يخلوا مسؤوليتهم ع راجلها..
نسرين؛معقوله!؟
ربيع:شني نسيتي قصة فايزة صاحبتك وخوتها!؟
ابتسمت تهكما وقالت..
/عاد هدوكا اختهم رموها عيني عينك ع احمد الله يرحمه بش يفتكوا من مسؤوليتها ووقتها لافي حروب ولانزوح ولاغيره...
ربيع؛ايييه يانسرينتي ايييه هادي الدنيا الدنيئة..شاف ليحيى وخداه منها وهو يقول...قدامي ياست الحسن..
ابتسمت ومشت للباب وهو مع يحيى اللي كان يلاعب فيه وراها...
🍃🍃🍃🍃🍃
ويوصل نسيب عيلة الكسابكجي ومعاه اخته للعمارة اللي يسكنوا فيها..سيبوا يوم دخول خالهم بعد ماسمعوا بالخير وروحوا طول..
معز شاف الخيمه ولقي مجموعة رجال واقفين حداها عرف منهم صاحب العمارة وعبد القيوم مشالهم طول..
واخته طول مشت خشت للعمارة...
🍃🍃🍃🍃
لما خشت للشقه لقتها معبيه بالجيران اللي ساكنين معاهم في نفس العمارة..
مررت نظرها عليهم شافت شاديه مقعمزه وهي لابسه الاسود ووشاح ابيض ع راسها وفي يدها مسبحه.
كانت تذكر في الله ودموعها مابطلوش نزول..
مشتلها طول..لما وصلت فيها نزلت عليها وباست راسها وقالت بنبرة باكيه..
/عظم الله اجرك خالتي شاديه..
شاديه بصوت مبحوح..
/اجرنا واجرك يابنتي..
"ميار"..
رفعت راسها وشافت لبانه جايه ناحيتها وهي تبكي قدمتلها وضموا بعض وقعدوا يبكوا بشده..
سلافه كانت الحمام تتوضا..بعد ماطلعت منه خشت لوسط الحوش شافت ميار ضامه لبانه قدملتهم وهي تبكي..
تباعدت ميار عن لبانه وشافت سلافه..
سلافه بنبرة مخنوقه..
/راح بابا ياميار راح..وضموا بعض وانهاروا وخلوا شاديه تبكي بالعبره..
والجارات يحاولوا يهدوهم بكلمات المواساة...
🍃🍃🍃🍃
وفي حوش محمد شنيبه..
كان نسرين مقعمزة في دار المعيشه مع امها واختها خديجه وخوها الجالي ومرته نجاة تحكيلهم عن قصة وفاة نبيه..
🍃الجالي:هدا في حد قداش ليه حاط عليه ويتكتله حد قريب هلبه..
نسرين:حتى ربيع قال هكي..يامن اللي يخدموا معاه في المطعم ولافي السوق..
مغليه؛لاحول ولاقوة الا بالله الله يرحمه ويغفرله مسكين..
نجاه:غير ردي بالك يانسرين هادم معاش عندهم حد توا خلاص..
شافتلها نسرين من فوق لتحت..
خديجه:عندها الحق حلي عيونك زين..
نسرين بملل:هما كلهم بنتين وحده مخطوبه والتانيه في بينها وبين التارقي علاقه وناوي يخطبها..
الجالي بدهشه:جديات!
شافتله نجاة بطرف عينها..
نسرين:ايه ربيع هكي قالي..
مغليه:صح سامعه قبل بدوة زي هادي..
هز الجالي راسه وهو يفكر..
نجاة وهي تشوفله برفعة حاجب قالت..
/كويس راسك توا معاش تحس بالصداع!؟
شافلها وقال..
/الحمد لله خير من بكري..
نسرين؛خيره راسه!؟
نجاة:من لما روحنا وهو يقولي راسي مصدع..
نسرين بخوف:راهو تطلع كورونا يانهاري!
ضحك وقال؛عينك..صداع عادي ومشي ع حاله..
مغليه:البلاد لتوا ماخشتهاش كورونا ريحي روحك وخلي خوك في حاله..
نسرين؛خلاص يام خلاص ياكلمتي وليلي..
ضحك عليها الجالي..
وخديجه قالت؛تجيبي في الدوة لروحك..
نسرين:لاياحنه المحبه بخوت هناك اللي ديما مقعمز ع الحجر وغيره تحت الرجلين..
مغليه؛شن دوة الصغار اللي تقولي فيها هادي!؟
الجالي:الغيره واكلتها يام ماتعدليش عليها..
شافتله نسرين من فوق لتحت..
وامها قالت بتهكم..
/الطول طوله بالحيل والعقل ماعطاه طسيشه..
🍃وهما مجتمعين في الدار..كانت سميره عند سدرة في شقتها يهدرزوا..
سميرة؛يعني بعد غدوة بيشوف جنه هني!؟
سدرة:ايه..
سميرة؛احسن شي واهو بالمرة جدها يشوفها حتى هو مستاحشها هلبة وديما ينشد فيا عليها..
هزت سدرة راسها بصمت..
🍃🍃🍃🍃🍃
الساعه 12:45قبل الظهر..
كانت مروة طالعه بروحها وقت الإنصراف مناسك اليوم غايبه..
اول ماوصلت في الباب شافت جهة السيارة العاليه بعدين غيرت نظرها عنها...
☘معين وهو يراقب فيها شاف واحد خاطم من قدام المدرسة وكان باين عليه يتحرش بالبنات لفظيا..
لما شاف مروة كيف وخرت وتباعدت فتح الباب ونزل طول للولد..
مروة ماكانتش مركزه على شي لعند ماسمعت وحده من البنات تقول..
"حي عركه"
شافت جهة الباب لقت معين شاد الولد ويضرب فيه وفي شباب تجمعوا عليهم بش يباعدوهم عن بعض خافت وزادت وخرت وتباعدت...
وبرا العركه انحزت لكن معين مازال يهدد..
/وربي مازال نلقاك خاطم قدامها ندفنك في مكانك..
ومشي ولى للسيارة وركب وسكر بابها بقوة..
شاف جهة الباب مالقاش مروة قال مستغرب..
/روحت!؟
ع جية باص مروة وحده من البنات عطتها علم وهي طلعتله طول بدون ماتشوف لسيارة معين..
وهو معاها بعيونه لين ركبت..
ارتسمت ع وجهه ابتسامه وسط ملامح العصبيه اللي قاعده مسيطرة عليه..بعدين شغل سيارته ولحقها...
🍃🍃🍃🍃🍃
وطوبى في كوجينة حوشها...
حداها الصغار مقعمزين ياكلوا في "الكورن فليكس" اللي خطر عليهم هالوقت واصروا ياكلوه توا..
وهي بادية طيب في الغدي ناويه دير مكرونه بالبيشاميل..
فجأه دق باب الكوجينه الخارجي استغربت ومشتله وهي تقول..
/مني..
"هاديه"
فتحت الباب طول..
خشت هاديه وهي تقول..
/السلام عليكم..شن جوك اليوم..
شافت الصغار قالت بضحكه..
/ياقلبي اني تاكلوا في الفليكسه!
جنه..
"ليكس ليكس"
اواب..
"كورن فليكسه"
ضحكوا طوبى وهاديه..بعدين هاديه قالت..
/نجيهم ياربي..صحتين واربعه عوافي..
طوبى بإبتسامه؛سلمك..
شافت هاديه لطوبى وقالت..
/توا كلمني عمي قال بنعطل لما سألته ليش قالي بنمشي نحضر جنازة الراجل السوري..
طوبى بصدمه:راك تقولي راجل ابله شاديه!
هاديه بأسف:ايه هو ياناري..
طوبى بأسف شديد..
/إنا لله وإنا إليه راجعون..الله يغفرله ويرحمه ويثبته عند السؤاب..
هاديه:آمين..اني قلت في بالي كان بعدين نمشوا نعزوهم..
طوبى:مانعرفش وين يسكنوا..
هاديه؛اني نعرف عاطيتني النعته قبل قراب مش بعاد..
طوبى:نراجو جدي يروح من الجنازة وناخدوا منه النعته..تنهدت بضيق وقالت..لاحول ولاقوة إلا بالله وجعوني هلبه قعدوا برواحهم توا..
هاديه:لامش برواحهم وحده من بناتهم مخطوبه والتانيه يبيها التارقي اكيد بعد تفوت مده ع الوفاة يدير معاها خطوة رسمية بش يمشي عليهم ويجي عادي..
🍃وكعادتها طوبى تعرف كيف تتحكم في نفسها وتخفي مشاعرها فهالمواقف ردت عادي على هاديه وهي تقول..
/صح شكله هدا اللي بيصير..
هاديه:ربي يكون في عون عباده..خلاص بعد العصر ان شاء الله نمشوا..
طوبى:إن شاء الله..
شافت هاديه للصغار وقالت..
/باي ياعسلين..
هما ردوا عليها..
"باي"
ضحكت وهي تقول..
/الله يبارك..بالسلامه توا..ومشت طلعت.
وطوبى ردت عليها..
/بالسلامه..وسكرت الباب..تبدلت ملامح وجهها للحزن..
كلام هاديه قاعد يتردد في عقلها..
"والتانيه يبيها التارقي اكيد بعد تفوت مده ع الوفاة يدير معاها خطوة رسمية"
خدت نفس وقالت بهمس..
/نصيب كله نصيب الحمد لله ع كل حال...
🍃🍃🍃🍃🍃
ومع قرب العصر..
مشي ربيع لحوش نساباته بش ياخد مرته وولدها..
وهو مقعمز فيالسيارة يستنى فيها طلعله الجالي..
اتكى ع روشن سيارته سلم عليه وسأل عن احواله وربيع يرد عليه بالغصب..
الجالي:قالت نسرين الراجل كان يخدم عندك؟
ربيع:ايه شاد الحسابات..
الجالي:الله يرحمه..ضيق عيونه وقال..قالت وحده من بناته متكلم فيها التارقي..
ربيع شافله..هز راسه وقال..
/ايه ليه وقت..
ابتسم الجالي وقال..
/مش هوين التارقي..
ربيع غير نظره عنه وشاف القدام وهو مش طايق نفسه..
ع طلعة نسرين شافها الجالي وخر عن باب السيارة ومشي جيهتها فتحلها الباب..
ركبت وهي تقول:بالسلامه..
الجالي:في امان الله..
ويتحرك ربيع طول بالسيارة..لاحظ الجالي انه متغير معاه قعد يفكر في السبب..شاف جهة حوش طوبى ومازال يفكر وتجي ع باله مكالمه هاتفيه جاته من يومين...
🔺️🔺️في وقت سابق🔺️🔺️
الجالي بتهكم؛توا بدير روحك خايف خواتك!
"سكر فمك واسمع بس..لولا جنة ماكنتش طلعتك منها يازفت لكن لو تكرر تصرفاتك هادي مرة تانيه حتشوف مني شي عمرك في حياتك ماريته..اللي داروه فيك جماعه****** مايجيش في ربع اللي بنديره فيك كان تماديت اكثر من هكي..واهو حذرتك واخر مرة نحذر"
🔺️🔺️في الوقت الحاضر🔺️🔺️
غير نظره عن حوش طوبى ومشي خش لحوشهم وفي داخله غضب شديد مجبور يقعد كاتمه..
🍃🍃🍃🍃🍃
قدام العمارة اللي كانوا ساكنين فيها اهل سلافه..
كانوا ربيع وعبد القيوم واقفين قراب ع خيمة العزي هما يحكوا عن..
ربيع بحيرة ؛مش عارف مانبي نظلم حد لكن هما زوز من مده قالوا بيسيبوا الخدمه عندي ويروحوا لبلادهم..
عبد القيوم وع وجهه باديه ملامح الغضب..
/كيف كانت علاقته بيهم!؟
ربيع:عاديه علاقه زملاء في مكان خدمه يهدرزوا مرة مرة..
هز عبد القيوم راسه بصمت..
🍃في هالوقت درست سيارة طوبى قدام العمارة..
نزلوا منها هي وهاديه..
هاديه وهي تشوف القدام:اهي الخيمه..واهو التارقي..
شافتله طوبى طول لقاته عاطي بالظهر وهو واقف ع ربيع غيرت نظرها عنه وقالت..
/هي تعالي..
ومشوا مع بعض بيخشوا للعمارة..
🍃عبد القيوم:هي تعال نردوا للخيمه..
ولف بيمشي وربيع معاه وهو يقول...
/اشبح خوه اللي قاعد في مصر يجي ولايشد مكانه..
كيف جاي بيرد التارقي عيونه جو ع طوبى وهي ماشيه مع هاديه لمدخل العمارة..قعد بنظره معاها لين اختفت من قدام عيونه..وقلبه يرعد ويقصف..
ربيع:بيناتهم خدمه اكيد بتجي تعزي..
تنهد عبد القيوم من قلبه بعدين خش للخيمه وربيع لحقه وهو مستاء...
🍃🍃🍃🍃🍃
وصلوا هاديه وطوبى لباب الشقه..
دقت طوبى الباب فتحت وحده من الجارات..
خشوا هاديه وطوبى وهما يسلموا..
حولوا اللي في رجليهم والجارة خدتهم وخشت بيهم لوسط الشقه..
عيون سلافه لما جو ع طوبى حست اتجاهها بشعور كره..
وصاحبتها ميار اللي كانت مقعمزة جنبها قعدت تمرر في نظرها بيناتهم..
قدموا طوبى وهاديه لشاديه وعزوها..
تباعدت طوبى وهي دور بعيونها ع سلافه لين شافتها..
مشتلها طول بش تعزيها..
🍃طوبى:عظم الله اجركم..الله يغفرله ويرحمه ويجعل مثواه الجنه..
سلافه ساكته ماردتش بحرف وميار مركزه عليها..
تباعدت طوبى وهي تقول..
/ربي يصبر قلوبكم ويربط عليها...
بعدين جت لميار صافحتها ومن ميار سلمت ع باقي الموجودات وهاديه معاها لين وصلوا في نسرين سلموا عليها وقعمزوا جنبها..
نسرين:شن حالكم؟!
ردوا عليها الزوز وهما يقولوا..
/الحمد لله..
ناضت سلافه ومشت بإتجاه دارها وميار معاها...
اغلب الحاضرات ركزوا عليها من بينهم طوبى ونسرين وهاديه..
طوبى بحزن؛ربي يكون معاهم ويصبر قلوبهم..
نسرين؛آمين..
ع خشة لبانه ومعاها وحده من بنات جيرانهم يوزعوا في القهوة..
نسرين؛هادي بنته التانيه..
شافولها بحزن وقعدوا يراجوا فيها تكمل توزيع بش يعزوها..
ولبانه وهي توزع لما وصلت في طوبى ماخدتش منها وقعدت معاها بعيونها وهي توزع ع الباقي لين كملت ناضت طول ومشتلها..
وصلت فيها وقالت..
/عظم الله اجركم..
لبانه بصوت مبحوح..
/اجرنا واجرك على الله..
ع جية هاديه عزتها حتى هي بعدين قالت طوبى..
/معليشي نبيك شويه..
لبانه بإستغراب:تفضلي..
طوبى؛لابروحك كان فيها كيف..
لبانه إستغراب شديد..
/طيب تعالي معي..
هاديه مشت ولت قعمزت..وطوبى مشت مع لبانه بإتجاه الكوجينه...
**********
طلعت طوبى من شنطتها ظرف وقالت..
/هادوا فلوس ابله شاديه!؟
لبانه بإستغراب..
/فلوس شو!؟
طوبى:امك تبيع في طلبيات الحلو في المحل متاعنا..
تفاجئت لبانه...
طوبى:تفضلي..
خدتهم لبانه وهي متفاجئة وتمرر في نظراتها ع شكل طوبى وهيئتها..
طوبى:قولي لأمك حنشتغلوا عنها اي طلبيه تجيها من الزباين وحقها حيوصلها بإذن الله..
تعبوا عيون لبانه بالدموع وهي تشوف لطوبى بدون ماتتكلم..
طوبى:لاهو جميل ولاهديه شغل امك عليه الطلب هلبه مانبوش نخسروا زباينها..
لبانه؛انتي طوبى!؟
ابتسمت وقالت..
/ايه..
لبانه بإبتسامه من بين دموعها..
/شكرا كتير..
طبطت طوبى ع كتفها وقالت..
/ربي يحفظك..نستأذن..ومشت طلعت من حداها ولبانه معاها بعيونها...
🍃🍃🍃
وطلعوا طوبى وهاديه من حوش اهل العزي مابتش طوبى طول عندهم..
☘في الطريق..
طوبى:تعرفي خطر في بالي ندير طلة ع المدرسه تمشي معاي عادي!؟
هاديه بإبتسامه؛عادي جدا..
🍃وغيرت طوبى طريقها للمدرسه..
بعد ماقطعت مسافه طولتها الزحمه وصلت للمدرسه درست قدامها ونزلوا هي وهاديه..
وقدام المدرسه كان ايمن الفاندي موجود مع جماعته شاف طوبى وهي نازله من السيارة لحقها بعيونه لين خشت للمدرسة..
🌼🌼🌼🌼🌼
واستقبلوا الابلات وعضوات الفرق التطوعيه طوبى استقبال شوق وفرح وهي عرفتهم ع هاديه اللي لاحظت حبهم واحترامهم الواضح لطوبى..
ومش هدا بس اللي لاحظاته هاديه...
فرحة الناس النازحه بزيارتها ليهم...فرحة الصغار بشوفتها..
زادت كبرت طوبى في عيونها وفي قلبها بس في نفس الوقت زاد وجع قلبها ع حالها..
🍃بعد ماقضوا نص ساعة وهما يدوروا في المدرسه ويشوفوا في اخر التطورات اللي طرأت عليها قرروا يروحوا...
وهما طالعين...
🍃هاديه:كبار الكرافنات ماشاء الله وكل شي فيهم..
طوبى:ايه..هادم تبرع بيهم فاعل خير قالوا يعرفه التارقي..
هاديه؛ماشاء الله...
فجأة وقفت طوبى في مكانها..
شافتلها هاديه بإستغراب لقت ملامح الصدمه باديه ع وجهها..
هاديه بإستغراب:خيرك وقفتي!
شافتلها طوبى شويه..ارتخوا ملامح وجهها وهي تحرك في راسها يمين ويسار وقالت..
/شي..خطرت ع بالي حاجه بس..
ومشت وهاديه مشت معاها وهي مستغربه..
ويرجعوا يوقفوا مرة تانيه لما جاهم واحد وقف عليهم وهو يقول..
/السلام عليكم..
نزلت طوبى عيونها بخجل وضيق في نفس الوقت وهي تقول..
/وعليكم السلام..
وهاديه ردت عليه وهي تشوفله من فوق لتحت..
ايمن وهو حاط ايديه ورا ظهره وعيونه ع طوبى قال..
/معليشي نبي ندوي معاك شويه..
هاديه؛نراجي فيك في السيارة..
شدت طوبى يدها وقالت..
/لاخليك..تفضل قول اللي عندك بسرعه معليشي..
مرر نظره حواليه بعدين شافلها وقال..
/باهي نخش في الموضوع طول..نبي نعرف علاش ردتيني!؟
طوبى؛قلت السبب لخواتك..
ايمن؛ قالولي ومااقتنعتش نحس فيك خايفه من طليقك بس خوديها مني كلمه والله مايقدر واحد ياخد بنتك منك لابقانون ولاغيره...
طوبى: لالا مش هكي بكل..معليشي لازم تقتنع اني رافضه الفكرة من اصلها..
ايمن بشي من الانفعال..
/علاش باهي!!؟ راهو حتى عند ربك حرام..اسمعي كانك خايفه مني نقولك ارتاحي من ناحيتي ع الآخر والله نحطك ع راسي من فوق ونراعيك زي مانراعي في عيوني..
شدت هاديه ابتسامتها بقوة..
وطوبى قالت بضيق..
/ياخوي بالله عليك برا شوف نصيبك مع وحده احسن مني اني مانصلحش بيك..وخدت هاديه ومشت هي وياها..
وايمن قعد واقف في مكانه وهو يشوف لطوبى بضيق واسف..
🍃🍃🍃🍃🍃
في الطريق..
هاديه وهي تضحك..
/والله يهبل ياطوبى مش عادي وهو يتكلم قالك مايقدر حد ياخد منك بنتك لابقانون ولاغيره هدا كان ياخدك تولي مرت كابو تحكمي وتطلقي..
طوبى بضحكه:تخايلي!
شدت هاديه يدها وقالت..
/غير زيدي فكري..كان تشوفي عيونه وهو يشبحلك كيف كانوا قلوب قلوب هدا تعيشي معاه ملكة زمانك..
طوبى:نبي نقعد ملكة نفسي بس الزواج كله ع بعضه معاش نبيه خلاص..
طلقت هاديه وقالت وهي تقلد في أيمن..
/علاش باهي!!؟ راهو حتى عند ربك حرام..
ضحكت طوبى وهي تقول..
/مبردك..
وهاديه ضحكت معاها وهي تقول..
/والله يهبل باهي...
🍃🍃🍃🍃🍃
وتقعد هاديه باقي اليوم وهي تحكي عن موقف ايمن وتعاود في كلامه وهي تقلد فيه خلتهم يضحكوا من قلوبهم ماعدا طوبى اللي كانت تطلع ضحكتها من ورا قلبها..
قلبها اللي مش قادره تحكم فيه وتخليه عن حب حد يحب غيره..
🍃وهالحد هدا كان يحاول يدير كل شي بش يكفر عن ذنبه مع عيلة نبيه السوري...
☘معز:توا لما كلمته ع الايجار قالي انت دفعته 4شهور القدام..
عبد القيوم:انا معتبرهم هلي يامعز..
معز؛فاهم عليك لكن هما توا مسؤولين من اني بالدرجة الاولى..
ابتسم عبد القيوم وقال..
/خلاص هالاربعه شهور مشي حالهن بعدين كله يقعد عليك انت..
معز هز راسه وقال..
/ع كل حال بارك الله فيك..
عبد القيوم:فيك بارك الله..بس في حاجه نبيك تعرفها انا مش متخلي ولاناسيهم حنتفقدهم في كل وقت.
معز وهو يسمع فيه حط في باله ان ممكن يكون عبد القيوم حاط عينه ع سلافه ولأنه يعرفه كويس الشي هدا خلاه يفرح..
رد عليه بإبتسامه وهو يقول.
/تمام وهكي نقعدوا كاسبينك..
🍃وشويه ويوصلوا اهل معز ويخشوا عليهم الخيمه بوه وخوته ورجالة خواته ..وامه وخواته ركبوا طول للشقه..
🍀🍀🍀🍀🍀
ويعدي يوم ويجي اللي بعده..
كان يوم الجمعه..
طوبى عزمت المهدي وسدرة ع الغدي..
حط المهدي سدرة في حوش اهلها ومشي للجامع..
وسدرة من اول ماخشت عليهم استقبلوها بفرحة وشوق وكأنها ليها سنين غايبه..
داروا قهوة وقعمزوا في دار المعيشة يهدرزوا..
طوبى واريج وغرفه وسدرة وصفيه وهاديه واميمه وحداهم الصغار يلعبوا..
وهاديه عاودت جبدت سيرة موقف ايمن لسدرة..
هاديه بضحكه:لما قاللها لابقانون لابغيره خطر عليا احمد السقا في فيلم الجزيرة لما قال من النهارده مافيش حكومه انا الحكومه..
ضحكت طوبى من قلبها لين مالت ع كتف هاديه وهاديه تضحك معاها..
سدرة بإبتسامه..
/عيلة الفاندي كلهم هكي عفويين وطريقتهم في الدوة زي بعض..
هاديه بإبتسامه..
/محلاه كيف قاللها نحطك ع راسي ونراعيك زي مانراعي في عيوني..
سدرة بإبتسامه وهي ترمش في عيونها..
/خطر عليا المهدي لما قالي نحطك تاج ع راسي..
اريج وطوبى شافوا لبعض بعدين مع بعض..
/حتى راجلي..
ضحكوا كلهم وسدرة قالت بضحكه..
/خزي معفنات..
صفيه بإبتسامه..
/ناقصتنا مطيره بس..
سدرة:شكشك معاش يبي يطلقها..
هاديه بضحكه؛ديما وانتي ظالمتيه..
طوبى بلهفه:قصدك بتجي!
هزت هاديه راسه وقالت..
/ايه..
صاحوا البنات من الفرحه..
فجاه دق باب الحوش الدخلاني..
هاديه؛هي..
ناضوا سدرة واميمه واريج وطوبى طلعوا جري بش يستقبلوها والصغار قلدوهم وطلعوا وراهم وخلوا الباقي يضحكوا عليهم..
"عمتي"
"بالشويه بالشويه..ووك عليا زودولي"
☘وعدت عليهم اجمل اللحظات وهما بين هدرزة وضحك ومناقرات ومقالب..
ومش كل من عاش هالاجواء الحلوة كان باله رايق ومرتاح..
في اللي تعود يكتم همومه واحزانه..
وفي اللي يبي ينساهم ولو لساعات زي غرفه..
غرفه اللي ماغفلتش سدرة عن حالها وهالمرة ناويه تتكلم معاها بعد ماتروح بجنة من حوش شنيبه..
🍃🍃🍃🍃
ومن لمة عيلة الواعر للمة عيلة احمد محجوب..
لمة صغيره لكن دافيه وكلها ود واللي زاد حلاها حبة السكر احمد الصغير..
🌸احمد اللي من لما جي حناه وخالته الصغيره يلعبوا معاه..
وامه وخالته الكبيره مع بعض في الكوجينه يجهزوا في الغدي ويهدرزوا..
حطت صفاء قعد فخار ع الطاوله وحطت يدها في نصها وهي تقول بإبتسامه ماكره..
/قصدك لما كنتي بروحك جي وروح وراك!؟
مروة؛ايه..
صفاء ضحكت..
مروة بإستفهام..
/شن يضحك فيك!؟
صفاء مشت ردت الباب وولت لأختها وقالت..
/بنقولك ع حاجه ردي بالك تطلع منك لأمي بالذات..
مروة بفضول..
/لالا مايطلع مني شي قوليلي قولي..
صفاء بإبتسامه..
/خالتي فهيمه قبل خطباتك من امي لولدها هدا..
حطت مروة يدها ع فمها بصدمه..
صفاء:شكلها خطباتك منها ليها وولدها ماعنداش علم..
نزلت مروة يدها وقالت..
/اكيده هادي لأن عارف بقصة مالك الله يرحمه معاي..
صفاء:لكن ماكانش في بينك وبين مالك شي اصلا اللي كان بينكم بعيد كل البعد عن الحب..
مروة بشي من الارتباك..
/اسمعي سكري ع الموضوع هدا بكل ومعاش تفتحيه خلاص..
ومشت للدولاب فتحاته و طلعت صواني السلاطه..
وصفاء ضحكت عليها بدون صوت ومشت فتحت باب الكوجينه وولت خدت الطنجره والكساس حطتهم ع الطاوله وبدت تسقي...
🍃🍃🍃🍃🍃
ع طاولة الاكل..
كانوا مقعمزين يتغدوا بصمت..
هو كان يسرقلها في النظر احيانا..اما هي فكانت تاكل بشهيه نفسها مفتوحه ع كل شي حلو في الدنيا..
بعد كملوا غداهم..
ناضت وهي تحمد في الله همسا ولما جت بتمشي هو وقفها بعد ماسمعاته قال..
/راجي شويه..
شافتله وهي تستنى فيه يكمل كلامه..
مختار بشي من التوتر..
/امتى بتمشي للموعد متاعك؟!
فاتن؛بعد ساعة..
خدي نفس وقال..
/بنمشي معاك..
بدت ع وجهها ملامح المفاجأة وهي تقول..
/بتمشي!؟
مختار رفع حواجبه وهز راسه بإيجاب..
ابتسمت من قلبها وقالت..
/ok..قربت منه وطبعت قبله ع راسه بعدين شافت لعيونه وقالت..I adore you "أعشقك"
ومشت وهي طايرة من الفرح..
اما هو مرر نظره حواليه وحط يده ع ذقنه وقعد يمسح عليها ومازال في حالة توتر...
🍃🍃🍃🍃🍃
بعد العصر..
طلعت سدرة بجنة لسيارة عمها..
ركبت بيها وهي تقول..
/جيتك عمو..
جنه شافت للمهدي وقالت بإبتسامه لطيفه تنقط براءة..
"أمو مادي"..
ضحك وقال:ياعسل انتي..
سدرة بإبتسامه؛هيا يامادي..
حرك المهدي سيارته وهو يضحك وتوجه لحوش بوه..
🍃🍃🍃🍃
وفي صالة حوش محمد شنيبه..
كانوا مقعمزين الجالي ونجاه وخديجه ومغليه وعمر..
الجالي كان يراجي ع نار وعيونه امه عليه وهي تشوفله بنظرات كلها شفقه..
ويجي للجالي الاتصال اللي كان يراجي فيه بفارغ الصبر..
قام تليفونه شاف المتصل فتح الخط ورد طول..
/ايوه....ناض وهو يقول..جاي جاي..
ومشي بسرعه طلع من الصاله..
هو طلع من هني وامه بدت تبكي من هني..
خديجه بضيق:يام!
مغليه بنبرة باكيه..
/واجعني حاله قاهرني ماتهنى في شي في حياته حتى بنته يشوف فيها بعد شوق وبالحسرة ساعه يحسبوله فيها..الله لايسامحهم الله لايربحهم..
عمر بضيق:لاهو ولااخر واحد يام..
مغليه بإنفعال وصوت باكي..
/اني عليا في ولدي بس..ولدي انظلم خوك انظلم ياعمر..
نجاة تسمع فيها وهي تغلي من الغضب لكن حاولت ع قد ماتقدر ماديرش اي ردة فعل حتى بملامح وجهها..
خديجه ودموعها في عيونها..
/الله غالب الله غالب هدا بخته ونصيبه..
مغليه ببكي..
/ااه ياقهرتي عليه وع بخته ياقهرتي عليه وع بخته..
🍃وهو في شقة خوه ومع بوه..
مقعمزين في الصالون في حضور سدرة والمهدي..
الجالي كان مشتاق لبنته شوق كبير..ضمه وشمها وباسها وكان يتمعن فيها بنظرة بش يملي عيونه منها..
وبوه جنبه يلاعب فيها..ولأنها متعوده ع جدها وتعرفه اكثر من بوها سيبت بوها وطاحت ع جدها ومحمد شنيبه خداها وضمها وخلاها مقابله بوها بش يلاعبها...
المشهد اللي قاعد يصير قدام سدرة اثر فيها هلبه..لكن تأثيرة مش حيكون اقوى من تأثير الحالة اللي شافت طوبى عليها لما شافت الجالي...
🍃🍃🍃🍃
ومختار وهو راكب مع فاتن سيارته VIP والاقجم متوجه بيهم للعياده..كان في حالة خوف..خوف من شني بالضبط مش قادر يحدد..
هل خايف يتأثر..ولو يتأثر يضعف وهو اللي يمقت الضعف مستحيل يسمح لنفسه يرجع يعيشه مرة تانيه..
حس بالندم..ندم اللي طلب يرافق فاتن..بس ماقدرش يتراجع لازم يكمل للآخر...
🍃🍃🍃🍃
وصلوا للعيادة وخشوا مع بعض..
ومجرد ماوصلوا لحجرة الطبيبه خشوا طول..
********
مختار وهو يمرر في نظره ع المكان..
/كل شي هني معقم ؟
فاتن فنصت فيه..
والطبيبه قالت بإبتسامه..
/اكيد استاذ متبعين كل الاجراءات الاحترازيه..
هز راسه ومازال يدور بعيونه في الحجره..
فاتن بإبتسامه ارتباك..
/هو حريص بزيادة..
الطبيبه وهي مبتسمه..
/واضح وعنده حق..
هو شاف للطبيبه نزل الكمامه وخلاها تشوف ابتسامته..
فاتن حمحمت وقالت..
/خل نتكلموا في المفيد دكتورة..اني هدا اول حمل ليا..
☘وقعدت فاتن تشرح للطبيبه عن وضعها بالتفصيل ومختار مركز معاها..مركز ع نبرة الحماس في صوتها ونظرات الشغف في عيونها ولمعة الدموع واضحه فيهم...
شويه وناضت الطبيبه ونوضتها معاها ومشوا لجهة الكشف..
تمددت فاتن ع السرير والممرضه اللي كانت موجوده غادي ساعدتها..
ومختار واقف يشوف لفاتن بس..
الطبيبه؛هي خل نشوفوه مع بعض..
خدي مختار نفس وبلع ريقه وهو في قمة التوتر وحس معاه بشي من الخوف..
امافاتن كانت لهفة الدنيا كلها فيها..
الطبيبه بإبتسامه:هو هدا شفتوه الحاجه الصغيره هادي..
ضحكت فاتن ودموعها نزلوا وهي تقول..
/ياعمري نقطه..
شافت لمختار لقاته سرحان في الشاشه ابتسمت..
الطبيبه قالت...
/انتي توا ليك 7اسابيع حمل يعني خاشه الشهر التاني..تقدري تسمعي نبض الجنين..
فاتن بلهفه:ايه نبي نسمعه هيا..
ضحكت الطبيبه..
ومختار وراها وصل لدرجة من الخوف خلاته يقرر الانسحاب بس في لحظه تراجع لما بدي يسمع في نبض الجنين..
مشاعر فاتن في هديكا اللحظه كانت جياشه تأثرت حد البكاء..
اما مختار حس بخليط من المشاعر..
توتر..خوف..قلق..ندم..
ماقدرش يفرح ماقدرش يحس بولا شعور ايجابي..
غير نظره لفاتن شافها حاطه ايديها ع وجهها وهي تبكي..
قدملها ونزل ع راسها وطبع عليه قبله طويله..
تباعد وحط ايديه ع ايديها وحولهم وهو يقول..
/خلاص..اشش..سادك نكد يانكديه..مسح دموعها وهي تقوله..تأثرت ولا!؟
هز راسه وهو مبتسم مجامله..
الطبيبه بإبتسامه..
/عقبال ماتشوفوه بين ايديكم إن شاء الله..
فاتن برجاء وشوق قالت
/يارب..
🍃🍃🍃
ورجعوا قعمزوا قدام المكتب والطبيبه مقابلتهم تعطي لفاتن في نصائح ومختار يسمع..
قطع عليهم حديثهم لما قال..
/عندي سؤال دكتورة..
هي بإبتسامه قالت..
/تفضل..
عقد حواجبه وقال..
/يقولوا المراة لما تحب راجلها هلبه صغارهم يجوا شبهه..في منها الدوة هادي!
هي بضحكه قالت..
/كلام ينقال واحيانا يصيب..
مختار:تمام..باهي شن تتوقعي العيل يورث مني!؟
فاتن حركت راسها يمين ويسار..
الطبيبه بإبتسامه خجل..
/الله اعلم ممكن شكلك بس وممكن طباعك بس ومرات الزوز ومرات مايجيش شبهك نهائي..
فاتن بإبتسامه؛اني نبيه يورث لون عيونه..
شاف لفاتن ودارلها حركة بأنفه..
الطبيبه بضحكه:ممكن انتي عيونك خضر وهو زرق بنسبه 50 في الميه يجوا زرق والخمسين التانيه يجوا خضر...
مختار:حني عندنا في العيله العيون الزرق هلبه..لون عيوني احلاهم طبعا..وعندي احساس قوي انهم مش حيتكرروا..
ضحكوا فاتن والطبيبه بعدين قالت..
/ممكن يورث حد تاني في العيله نفس اللون صغار خوك او اختك او احفادك بعدين..
عقد حواجبه وقال..
/اوو..احفادي ماخاطريش نعيش لهداكا الوقت بصراحه..
فاتن بضحكه؛مختار..
مختار هز راسه وقال..
/ok..ok..شاف للطبيبه وقال..ان شاء الله مايجيني في شي بش نقعد فريد من نوعي..وابتسم ابتسامه ساحره خلتها ترتبك ووجهها يحمر..
**********
فاتن بغيره:بطله الكلام بالاسلوب هدا مع النساوين..
مختار؛طلقوا عليك الليبيات يافتونه بديتي تتحولي لكائن نكدي..
فاتن:مختار رجاءا لوسمحت دير حدود في الجديد..
الاقجم بضحكه..
/خلاص يامعلم اسمع الكلام..وغمزله من المرايه..
هز مختار راسه وقال..
/حاضر حنحاول بس صدقيني حتى لو درت حدود حيكون ع الفاضي لأن جاذبيه راجلك قويه لدرجه طالعه عن السيطرة..
ضحك الاقجم..
وفاتن تشوف لمختار بطرف عينها من فوق لتحت..
وهو يشوفلها بنظرات استفزاز ويرقص في حواجبه...
🍃🍃🍃🍃🍃
"نبي نزلها لامي تشوفها"
شافوا المهدي وبوه لسدرة وهما يراجوا في ردها..
سدرة:مش مشكله لكن واني معاك..
غير المهدي نظره لبوه وخوه..
محمد شنيبه قال..
/باهي ننزلوا اني وياكم وانت يامهدي خليك هني..
🍃مايبيش يصير تصادم تاني بينه وبين امه🍃
سدرة؛رأيي من راي عمي..
المهدي هز راسه بالموافقه ع مضض..
ناضت سدرة هي تقول..
/راجوني شويه..ومشت طلعت من حداهم..
شاف المهدي لبوه وقاله..
/ماتخلي حد يوصل فيها..
محمد شنيبه؛ماتخافش مايقدر يوصل فيها حد واني موجوده..
والجالي يلبس في بنته برنوس كبوطها وهو يسمع فيهم بصمت...🍃🍃🍃🍃
"مانظني تخليه ينزلها هالابليسه"
خديجه بغطرسه..
/تنزل غصب عنها ونشوفها البنت بنتنا حني..
ونجاة طول ماهما يتكلموا عنهم كانت ملتزمه الصمت..
سمعوا باب الحوش انفتح..
مغليه بلهفه..
/زعمه هو!؟
ويخش عليهم الجالي بجنه لما شافوا حناها وعمتها فرحوا من قلوبهم لكن فيسع مالفرحه طارت لما شافوا سدرة خاشة ورا محمد شنيبه..
شافتلها خديجه بنظرات حاده من فوق لتحت..
ومغليه فيسع غيرت عيونها عنها لولدها وهي تقول..
/جيب بنيتنا جيبها..
قدم الجالي لامه وعطهالها..
جنه..
"نينه هبيي" ..حنينه حبيبي..
ضحك الجالي..
ومغليه ضم فيها وتبوس وهي تقول..
/ياسلم حبيبة حنينه..
قعمزت بيها وخديجه جنبها تلاعب في جنه وهي تقول..
/بنت شنيبه ألماسه وذهيبه..
ابتسم نجاة تهكما وشافت لسدرة لقتها تشوفلها بنظرات حاده خلتها تغير عيونها عنها...
محمد شنيبه شاف لسدرة وقال..
/قعمزي بنتي..قعمزي..
مشت سدرة قعمزت وعيونها عليهم...
الجالي:عمر وين؟!..
نجاه:طلع قبل شويه...
ع خشة نضال وهو يقول بفرح..
/قالوا جنة عندنا..
شاف لسدرة بعدين نزل عيونه وقال..
/شن حالك مرت خوي..
سدرة بإبتسامه..
/الحمد لله شن حالك انت..
هو قال:الحمد لله..
وعيون مغليه وبنتها وكنتها عليهم...
قدم نضال لأمه وقعمز جنبها وهو يقول..
/ترا عطيهالي يام..
هي رفعت جنه للجالي وقالت..
/خودها ولدي..
الجالي طبس خداها وهو يشوف لنضال..
ناضت مغليه ومشت طلعت من الصاله ..
والجالي قعمز جنب خوه ومدله جنه وجنه قعدت تنادي بإسمه..
بلع نضال ألمه وابتسم في وجهها وخداها من خوه وقعد يلاعب فيها..
وبوه يشوفله بأسف وهو يحرك في راسه يمين ويسار..
سدرة اللي شافت هدا كله حست ان في شي صاير بين نضال وامه لكن ماوقفتش عند الشي هدا هلبه سرعان مارجعت تركز ع نجاة وخديجه...
🍃🍃🍃
وياقلب طوبى اللي والع نار من الشوق لبنتها والخوف عليها..
صفيه؛ياودي ياسرك من الخوف عند سدرة راهي..
طوبى بقلق:عطلت هلبه..
مطيره؛اكيد ع جيه..
رن جرس الانترفون ناضت اريج وطلعت من حداهم بش ترد عليه..
خدت طوبى نفس وزفرت براحة..
صفيه:ساده حشو المصران هداكا ياهاديه..
هاديه:باهي..مسحاته من برا وحطاته ع جهة..
دق باب الكوجينه..
استغربوا..وناضت طوبى فتحاته..
وتشوف قدامها مختار وفاتن..
ابتسمت مجامله لفاتن وسلمت عليها بالخد ودخلتها..
وسلمت ع مختار بالكلام وولت قعمزت في مكانها..
وكان اخر من خش اريج وسكرت الباب..
سلمت فاتن ع الموجودات بالوحده..
ومختار قال:السلام ع الجميع..شافهم شن يديروا قال..يع..
ضحكوا غصب عنهم حتى طوبى وهي تحرك في راسها يمين ويسار ماعدا مطيره اللي قالت..
/بتزيد كلمه تانيه نبزك بهاليبرة..
مشي بإتجاه التلاجه وهو يقول..
/ شن هو اللي ديروا فيه هدا!!؟
مطيره شافت لصفيه وقالت..
/يتسهوك ولا!!؟
مختار:لاندوي مني جد..شنو الحاجات الغريبه اللي مخلطينها ف بعضها هادي وشن هو اللي تحشوا فيه هدا!! انتم الليبين مش معقولين تاكلوا اللي يجي...
مطيره:مالا قسما..
قاطعها وهو يقول بضحكه..
/لالالا خلاص بصارة بصارة..
صفيه بضحكه:زبطتها بتحلفلك ماواكل منه حاجه..
مختار بضحكه:اني اللي نعرف المطرايه..
ابتسمت مطيره وهي تخيط في الكرشه..
طوبى:الجيات قرييه ع بعضها..
شاف لطوبى واشر ع فاتن وهو يقول..
/هي جابتني..
فاتن بإبتسامه..
/كنا في العياده كشفت واموري كلها تمام..
مطيره بإستغراب..
/على شني!؟
صفيه:فاتن حامل..
مطيره بفرح..
/الله يبارك الله يبارك..مبروك بنتي تحلي عويناتك ع خير..
فاتن بإبتسامة فرح..
/الله يبارك فيك..
مختار:اني بوه ع فكره..
مطيره:ياوكسته وكسه..
ضحكوا اريج وطوبى بكتمان..
وصفيه وهاديه شدوا ضحكتهم..
فاتن بإبتسامه..
/بالعكس حظه حلو حنية مختار مافيش منها..
خفت ضحكته طوبى وهي تشوفله..
وهو قال بإبتسامه..
/يكفيه من حظوظ الدنيا الحلوة انك امه..
ابتسمت بحب وهي تشوفله...
مطيره:باهي انت وياها فهمنا..ربي يفرحكم بشوفته ان شاء الله..
فاتن بإبتسامه:آمين..ايه حقه سمعت نبضه وسجلته..
ابتسمت طوبى وقالت..
/درت نفس الشي مع جنه زمان..
مختار:قداش تحبوا الكلام بالعواطف..
فاتن وهي تشوفله بطرف عينها..
/مالا تبينا نحكوا عن الشبه ولون العيون!
مطيره؛قالك نبيه يشبهني!
فاتن:قالها للدكتورة ..
صفيه:ترا طوبى الكسكاس من عندك..
ناضت طوبى وهي تقول..
/قصدك خش معاك!؟ وخدت الكسكاس ومداته لصفيه..
فاتن بإبتسامه..
/ايه..
شافتله طوبى لقاته لاهي بتليفونه بإستفزاز قالت..
/ياربي في ساعة الاستجابه هادي ماتخليه يشبهه في شي يارب..
فجأه شد يدها ورفعها وقعد يلف في طوبى وهو يقول..
/هني روحك..هني روحك..هني روحك..
ولف ذراعها حوالين رقبتها ولف ذراعاته الزوز عليها هو حاضنها من الخلف ويقول..
/هيا غيري دعوتك بسرعه..
اللي حواليهم كانوا يضحكوا وفاتن قالت..
/خليها خلاص
مختار:لين تغير دعوتها..
طوبى:لامش مغيرتها نبيك تقعد عمله نادرة..
ضحكوا وهو طلق طوبى قال..
/لا كان هكي خلاص خليك عليها..
مشت قعمزت في مكانها وهي تتحسس في ذراعها..
تنهد وقال..
/جنه راقدهطوبى بضيق..
/في حوش جدها رافعينها لبوها..
شافت فاتن لطوبى بصيق..
اما مختار هز راسه بعدين قال..
/اني في المربوعه..ومشي طلع من حداهم وطوبى معاها بعيونها اللي نظراتهم كلها حسرة واسف..
🍃🍃🍃🍃
وفي دار المعيشه..
كانوا اميمه وغرفه مقعمزات مع بعض..
غرفه تفضفض بالدموع واميمه تسمعلها بحزن.
غرفه بنبرة باكيه..
/نفس الشعور اللي حستيه مع عمر اني كنت نحس بيه الفترة اللي فاتت شهور ونتغاضى ونكمد..نقول لروحي انتي توا عندك تلاته صغار ياغرفه ماعندك ماديري تحملي والله غالب..وللأسف كان مازاد تمادى يااميمه..رشفت وقالت..ايه اني غلطت فيه واللي درته فيه مش ساهل لكن لعند امتى بيقعد يحاسبني عليه قوليلي!؟..
اميمه بضيق..
/مش عارفه شن نقولك..مش قادرة نشور عليك بشي مش عارفه شن هو الصح اللي لازم ديريه..
غرفه:الاريح ليا ولصغاري هو اللي بنديره يااميمه..
اميمه بحزن..
/لكن نحس فيك يحبك هلبه..
غرفه بإبتسامة ألم..
/وحتى عمر حبك هلبه لكن شن جنيتي من هالحب قوليلي!؟
سكتت اميمه وهي مضايقه..
غرفه تنهدت بألم وقالت..
/خلاص قراري وخديته ومعاش موليه فيه..
🍃🍃🍃🍃🍃
"دارتلي حظر من كل تركينه هادي واخده قرارها خلاص يانبيله"
نبيله بإبتسامه متهكمه..
/انتم الرجاله ديما شايفين جد المراة هزل..كان تحملت منكم مرة واتنين تقعد طول عمرها مجبورة تتحمل..ولو في مرة قالت خلاص معاش نقدر تفكروا انها قالت هكي بلعاني..لفت نظر..دلع..تتغلى..ماتبوش تستوعبوا انها استغنت وتخلت خلاص..
عبد الرؤوف بضيق..
/اللي بيني و بينها اكبر من هكي يانبيله..بينا صغار..
نبيله؛وهي مجبورة تتحملك وتقعد معاك ع خاطرهم!..
قاللها بحزم؛اني مش مطلقها لو شن يصير..
نبيله؛قالوها قبلك هلبه وفي الاخير نساوينهم انفصلوا عنهم..مشكلتك ياعبدالرؤوف لتوا مش عارف ان مرتك طالعه من عيلة بناتهم وكرامة بناتهم عندهم فوق كل شي..عيله رجالتها عاطيين لنساوينهم قدر كبير..بناتهم بنات اصول يتحملوا ويجوا ع ارواحهم مرات بش يكملوا لكن وين يوصلوا لنهاية المطاف يستغنوا ويسيبوا ومعاش يولوا...
اني شفت غرفه شن دارت معاك بش تكفر عن ذنبها دورت ع رضاك بكل الوسائل تحملت ع خاطرك اللي مايتحمله حد..لما انحبست ياما صار فيها كرهت خوها كره لايوصف بعد اللي داره فيك حتى سيرته ماتبيش تسمعها وانت للاسف ماشفت لشي من هدا كله..قاعد تشوف للماضي وبس..في حالة زي هادي الحياة بينكم ولت مستحيلة حيقعد الماضي واقف بينكم ديما وزيد عليها اللي درته انت بعدين..
ناض وهويقول..
/مش مطلقها..نموت ولانطلقها يانبيله سمعتيني ..
"نموت ولانطلقها"..
ومشي بعصبيه طلع من الصاله ومنها طلع من حوش اخته وخلاها موجوعه ومتأسفه ع حاله..
🍃🍃🍃🍃
وتروح سدرة بجنة لأمها وتلقى فاتن بروحها مختار طلع يقضي بعض اشغاله...
سلمت ع فاتن بعدين نادت غرفه ومشوا مع بعض للدار..
خشت غرفه ولحقتها سدرة وسكرت وراها الباب
#عرجون_الفل
#طوبى
....يتبع....
