#طوبى "جنة طوبى"
#جمان_فريد
#الجزء_124"إمتحان/تمحيص"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
حقيقة الابتلاء:
قال الشيخ #ابن_عثيمين ـ رحمه الله ـ :
إذا أُصبت بالمصيبة فلا تظنّ أن هذا الهمَّ الذي يأتيك، لا تظن أَنه يذهب سُدىً، بل ستُعوض عنه خيرًا منه، سَتُحطُّ عنك الذّنوب كما تُحطّ الشجرة ورقها، وهذا من نعمة الله.
[شرح رياض الصالحين]
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃كل شيء يسير في صالحك.. حتى وإن شعرت بغير ذلك..رب الخير لا يأتي إلا بالخير🍃
________________________________________
يوم الجمعة..
فهاليوم قالت نسرين لمحمد وراما يجوا يتغدوا عندهم..
راما كانت مترددة تمشي لكن محمد اللي كان متحمس للمشيه شجعها..
🍃محمد؛ترا شوفي..هادي تمشي معاي ولاهادي!؟.
كان يوري فيها زوز سواري"اثواب" عربيه واحد لونه ازرق والتاني رمادي..
وهي مع استغرابها فيه قالت..
/الزرقا تمشي معاك اكثر..
رفع حاجه وشاف للسوريه الزرقاء بعدين رشف وقال..
/تمام..
حدفها عليها وقال..
/حدديها...ومشي طلع من حداها وهي اللي كانت شاده السوريه ابتسمت بإستغراب في حاله اللي حاساته جديد عليها..
🍁🍁
وطوبى كانت في دار المعيشه تكوي في سوريه راجلها وبنتها حداها تلعب بلوحه عليها حروف عربيه مجسمة تركب فيهم في اماكنهم ع اللوحه..
جنة:هتا شيم "هدا جيم"
طوبى وهي تشوفلها بإبتسامه قالت...
/صح..برافو ع بنتي برافو..
ابتسمت جنه بفرح وقعدت تشوف في الحروف..
ع خشة عبد القيوم عليهم بعد ماكان يدير في "دوش"
شاف جنة شن دير قعمز قريب عليها وقال..
/الله يبارك حفظتهم كلهم..
ابتسمت طوبى..
جنة:حوباده..شوف..شوف..
وبدت تركب في حرف تاني في مكانه..بعد ماركباته هو قال..
/براوا ع السمحه براوا..
جنة بضحكه لطيفه قعدت تقول...
/براوا..براوا..
طوبى بضحكه:عاجبتها اكثر من برافو..
ابتسم عبد القيوم وهو يمسح ع شعرها بعدين قال لطوبى..
/بعد الغدا بنعدوا للخمس ..
طوبى بفرح..
/الله! والله تقول مقعمز في قلبي قداش استاحشت الحوازة وجوها بالذات في الربيع..
قاللها:اول شي انا مقعمز في قلبك مش تقول..
ضحكت..
وكمل يقول..
/تاني شي كان خاطرك فيها ليش ماقلتي!؟
طوبى:قلت اكيد تعبان،الايام اللي فاتوا كلها خدمه خليه يرتاح اليوم...
قاللها:انتي اسألي وشوفي معاش تحسمي الامر من عندك..
ابتسمت وقالت..
/حاضر..
وخدت سوريته بعد ماكملت كوييها ومشت بتعلقها هو اللي كان يتبع فيها بنظره قال..
/مذكرة اول مرة مشيتي فيها المزرعه مع هلك؟.
علقت السوريه بالعلاقه ع الشماعه بعدين التفتت وقالت بأبتسامه..
/ايه احلا ايام..
بإبتسامه قال..
/انتي عارفه ان المزرعة قبل كانت لصاحبي مرتين شلت هلي غادي عجبتهم واجد ومدحوا فيها واجد كيف ماكانت عاجبتني ونرتاح فيها لكن ولامرة فكرت نشريها ولانشري زيها لعند مامرة قالتلي صفيه وحني فيها انك سهفتي عليها من كلامهم عنها بدون مانفكر قررت طول نشريها..
🌼عيونها تعبوا دموع وهي تسمع فيه وقلبها يدق بقوة..
وهو كمل يقول..
/وبعد شريتها قلت مايخشها حد وهي ملكي قبلها هي وع طول اقترحت ع حسين والحيت عليه الحاح ياخدكم تقعدوا فيها كيف ماتبوا..تعرفي وانتم فيها انا كنت طالع رحلة للبر مع رفاقه ليا من عمر كنت معاهم جثه لكن قلبي وعقلي في المزرعة تميت نتخيل في حياتي معاك فيها وكنت متأمل واجد ان اللي نحلم بيه يصير وربك ماخيبش املي..
نزلوا دموعها وهي تقول بنبرة حلوة..
/علاش انت حلو هكي!؟.
ضحك وناضلها وهو يقول..
/انتي ليش حلوة هك قلبك رهيف وحساسه واجد...ضمها وهو يقول..هالقلب اللي لما سكنت فيه حسيت كأني ملكت الدنيا ومافيها..
طوبى ضماته وقالت..
/ياريت ربي دارلي هلبه قلوب قلب واحد مايسدش الحب اللي نحبلك فيه ياانت...
قالت الكلام بأسلوب فيه شي من الدلال الطفولي خلاته يضحك من قلبه..
وجنة اللي كانت تشوفلهم ناضت وقدمت لأمها وقفت حداهم وقالت..
/ني ماما ني..
تباعد عنها عبد القيوم وهو يضحك...
وطوبى قالت بضحكه من وسط دموعها..
/انتي روحي يامامتي..روحي..ورفعت في حضنها وقعدت توزع ع وجهها في القبل وجنه تضحك..
وهو يتأمل فيهم بإبتسامة حب...
🍃🍃🍃🍃
بعد ماكملت قراية سورة الكهف طلعت من الدار اللي كانت تقرا فيها وتوجهت لدار النوم..
لما خشتلها شافت مختار راقد ع السرير وولدهم راقد ع صدره وفي جنبهم الكتاب اللي عطتهولي ليلة امس ابتسمت من قلبها..ابتسمت بأمل..وبصوت هامس ونبرة تمني قالت..
"يارب"
🍃🍃🍃🍃
وجي وقت خطبة الجمعه طلع عبد القيوم من الحوش بعد مابخراته طوبى بالعود وقرت عليه..
وبعدين مشت تشوف في غداها..طيبت "طبخت" اكله اول مرة ديرها راجلها ليه فترة يحكي عنها ويقول خاطره فيها وهي جدا متحمسه تعرف رأيه فيها..
تممت ع غداها وطلعت من الكوجينه للحمام
