#طوبى "جنة طوبى"
#جمان_فريد
#الجزء_120"حلاوة الدنيا"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الحوقله
عن أبى هريرة رضى الله عنه عن رسول الله، صلى الله عليه وسلم، قال: "من قال: لا حول ولا قوة إلا بالله كان دواءً من تسعةٍ وتسعين داءً أيسرها الهم".
حديث رواه الإمام الحاكم وقال: صحيح الإسناد.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃العوض الجميل لايأتي الا في الوقت المناسب🍃
________________________________________
تحت المظلة الكبير..
مقعمزين ع احد مقاعدها جنب بعض..
متعنقه بإيديها ذراعه..تسمعله وهي في حالة اندهاش وتشوفله بعيونها المليانات دموع ودهشه وحب واعجاب..
🍁عبد القيوم وهو يشوف القدام وبين عيونه اللي يحكي عنه..
/مش عارف شن صارلي..كيف ماتقولوا اللي جاني جاني نسهى شوي تجي صورتك بين عيوني نذكر الموقف بتفاصيله حتى صوتك والله لعند توا كيف ماكانت نبرته في وذاني..نقول لروحي ليش مش قادر ننساها ليش اثرت فيا لهالدرجة! عيونها حلوات وعجبني مميزات ماينتسنش لكن مش لدرجة اني نتم نفكر فيهم كل شويه!؟
تنهد وكمل يقول..وعدن ايام من حياتي لعند ماخشت السنه اللي بعدها كان عندي صحاب في الكفرة قالوا يبوا يعدوا لطرابلس سألوني تعدي معانا قلت باهي...وعدينا لطرابلس..عجبتنا وبرمنا فيها لعند ماوصلنا في الملاهي..
تبي الحق ماكنتش متريح واجد فطرابلس برغم انها سمحه بس وقتها جوها ماعجبنيش ماانسجمتش عكس صحابي هما عدوا عاشوا جوهم ونا تميت مقعمز وحدي وخذني الأفكار وسرحت لعند ماسمعت صوت بكا بنت صغيره..بحتت فيها لقيتها مصبيه تبكي ومعاها وحده كانت عاطيتني بظهرها لابسه حجاب لكن تبان صغيرة..ومع هذا عقلي ماقاليش خير شكيت انها تكون خاطفتها
ضحكت طوبى..
ضحك وكمل يقول..والله هذى اللي خطر في بالي ساعتها صبيت دغري ومشيتلهم ووين وصلت فيهم سألت عن البنت يعني ليش تبكي..وتلتفتي عليا وتجاوبيني..لما شفتك قعدت مستك ومصدوم ونقول لنفسي..والله هي..هي نفسها ياعبد القيوم!
شدت طوبى ذراعها بقوة وهي تشوفله بإبتسامه حب ودموعها ينزلوا..
هو بإبتسامه كمل يقول..كنتي متوترة ومرتبكه بس ملامحك زادن حلاوة في عيوني بالذات وين شفتك بالحجاب..
رفع حواجبه وقال..مافهمتش بعد فات الموقف هذى ليش صار !؟ المشكله ان تأثيرك عليا بعده كان اقوى بواجد..رديت للكفرة ونا مخلي عقلي في طرابلس..كان نقولك عدن عليا سنين وانا نتخيل فيك ونكتبلك في شعر ومن كثر تفكيري فيك نحلم بيك حتى الحلم..والله هذى اللي صار معاي حرفيا..مش هك وبس..خلتيني نحلم بحياتي معاك نخطط لحياتي معاك تخيلي!!..
ضحك وقال..اللي سمع بقصتي معاك قال عني مجنون موهوم وانا والله مالمت عليهم انا نفسي مرات نقول ع نفسي مجنون..
يعني كيف هكي قلبي يتعلق بطفله صغيره ماشفتهاش كان مرتين حتى اسمها مانعرفه ولانعرف وين ماتسكن مانعرف عنها شي نهائي ومش عارف كان مازال نلاقيها مرة تانيه ولالا!؟
لكن شن بندير مش بيدي وكأن ربك حطك في قلبي حط وخلاك تسيطر ع تفكيري وخلاني مجنونه..
شافلها بإبتسامه مسح دموعها وقال..
/تعرفي امتى شفتك مرة تالثه!؟
طوبى بإستغراب..
/مرة ثالثه!؟
هز راسه وقال بإبتسامه..
/في 2011 في التلفزيون..
طول طوبى تفكرت هداكا اليوم غمضت عيونها وحطت جبهتها ع ذراعه وقعدت تضحك بإحراج..
هو قال بضحكه..
/كبرتي عامين اخرات ومازدتي في عيوني كان سماحه..عقد حواجبه وقال..ساعتها مافكرت في شي غير في تركيز المصور عليك وان الناس قاعده تبحت فيك فار الدم في عروقي تمنيت لو نقدر نوصل فيه راني دفنته في مكانه..
ضحكت تاني وقالت..
/مانحبش نتفكره الموقف هدا عار بمعنى الكلمه..
تنهد وقال..
/الموقف هدا زاد اثبتلي ان ربي كاتبلي معاك شي
،مستحيل كل اللي صار يكون مجرد صدف عاديه! عندك علم لهذاك الوقت ماحكيتش لحد عارف ان مش حنلقى من يفهمني ويستوعب اللي قاعد نعيشه..لعند مرة في عام 2012 في عطلة نص السنه كنت عند خالي عبد القادر في ليله من الليالي حلمت بيك وكان ليا وقت ماشفتك في الحلم..شفتك مصبيه قدامي لابسه الزي التارقي وتسألي فيا..
"سمحه؟!"
ونا نرد عليك ونقول ماشاء الله تبارك الله مانقولش في غيرها..تنهد وكمل يقول..حكيتله الحلم سكت شويه وقالي تعرفها اللي حلمت بيها؟! ولقيت روحي نحكيله في القصة كلها..تعجب واجد واستغرب بعدين قالي..يبان رؤيه مش حديث نفس وتفسيره ان في شي حيصير بينك وبينها شن هو الله اعلم..
طوبى وهي مندهشه قالت..
/والله نسمع فيك ومش قادرة نستوعب غريب وخيالي اللي سمعته منك!سبحان الله وخلاص..
هو قال بإبتسامه..
/فعلا..سبحان الله حتى خالي قال..قصتك هذي من الغرايب اللي ماتصيرش في الدنيا واجد..
طوبى بإبتسامه حب وعيون تلمع قالت..
/واني نشوف فيها الحاجه الحلوة اللي دسهالي ربي بش يكافئني بيها..
تنهد من قلبه وقال..
/والله انتي اللي عوضني بيك ربي عن كل حد وكل شي انحرمت منه..لما عطاك ليا ماخلا ماعطاني وتوا معاش نبي من الدنيا شي غير اني نكمل معاك عمري وبس..
ضحكت واتكت براسها ع ذراعه وهو نزل ع راسها وباسه بعدين قال..
/ارهيقم..
طوبى بضحكه..
/ايه حقه تو تشوف عليها هادي..تباعدت وشافتله وهي تقول..توا كملي باقي القصة وبعدين نتفاهموا..
كيف جي بيرد عليها ارتفع صوت المؤذن بآذان صلاة المغرب..
الزوز مع بعض قالوا..
"صدق الحق"
قاللها:هي صبي..
ناض ونوضها معاه وهو يقول..
/بعد الصلاة نكملوا كلامنا..
ابتسمت وهي تهز في راسها بالموافقه طلقت ذراعها وهو خدي يدها وشدها ومشوا طلعوا من تحت المظلة متوجهين للحوش...
🍃🍃🍃🍃
"نجيه ياربي"
قالت الجمله هادي آلاء بعد ماسمعت باللي صار من خالتها غرفه..
اريج وهي مبتسمه قال بفضول..
/باهي زعما شن صار بيناتهم توا..تعاركوا ولااعترفوا لبعض وتفاهموا!؟
غرفه:مرات يصير بيناتهم نقاش بسيط وبعدين تتعبا الحوازة بالقلوب..
ضحكوا البنات..
تنهدت غرفه وقالت بإبتسامه..
/ربي يهنيهم ويعوض طوبى بيه كل خير..
أريج؛ويفكهم من شر الأشرار..
آلاء بشي من القلق..
/ايه والله..اني مامخوفني شي قد ماليه.
اريج بضيق..
/حتى اني هما يحبوا عبد القيوم هلبه ومستحيل يخلوه مرات يديروا رواحهم رضوا بالأمر الواقع قدامه ومن وراه يلهوا بطوبى..
غرفه بضيق..
/ماتسبقوش الأحداث بالله عليكم قولوا ربي يهنيهم وخلاص..
الزوز قالوا مع بعض..
"يارب"
🍃ومن دار المعيشه للصاله كانت هاديه مقعمزة مع فردوس بش تاخد رأيها في موضوع مهم..
فردوس:نبي نطمن عليها ياهاديه لأمتى بتقعد هكي!؟
هاديه:عندك حق..افتحي معاها الموضوع وخلاص..
هزت فردوس راسها وقالت..
/إن شاء الله..
هاديه:باهي قوليلي شن قررتي بتمشي غدوة؟
فردوس:ايه بنمشوا اني وآلاء..
هاديه:وصفيه شن صار فيها!؟
فردوس:قالت بتمشي مع يوسف فاتن شدت في جهينه هلبه..
هزت هاديه راسها وقالت..
/خلاص غدوة ان شاء الله بعد العصر نجيكم نوتوا ارواحنا مع بعض..
🍃ومن صاله حوش طوبى الواعر لصالة حوش محمد شنيبه..
اللي لمت فيها نسرين وسدرة وسميرة اللي كانت تجري في مكالمه هاتفيه..
☘سميرة بإبتسامه..
/ان شاء الله خير..ربي يقدم مافيه الخير...خلاص تو نشوف الحاج ونرد عليكم....قدامك كل خير..بالسلامه بالسلامه..
نهت المكالمه وهي تسمع في نسرين تقول..
/شكله صار منه!؟
سميرة بضحكه:اتصلي بعمر بشريه قعد ع اعصابه الأيام اللي فاتوا..
ضحكت نسرين وقالت..
/شويه تانيه..
سدرة وهي مبتسمه..
/تشوقت نشوف سليفتي المستقبليه..
سميرة بإبتسامه..
/تشوفيها ياحنة انتي الاولى عمر قال وين تمشوا تتكلموا فيها ارفعوا معاكم سدرة ..
سدرة وهي مبتسمه هزت راسها بإيجاب..
نسرين:خل نوض نخبر أمي..
وناضت ومشت طلعت من حداهم..
بعد ماطلعت قالت سميرة..
/ربي يكمل ع خير ويلحق نضال بيه..
تنهدت سدرة..
سميرة؛سديره..كان نخلوا الفرح فرحين ونلموا الشمل ياسدرة..
سدرة ناضت من مكانها ومشت قعمزت جنب سميره وهي تقول بصوت مسموع ليهم هما بس..
/الحق نضال ولى يعز عليا لكن حكايته هو وبنت اختي معاش يصير منها ياسميرة..
سميرة بضيق..
/غير علاش بس!؟
سدرة؛مشكلة الاعاقه ياسميره راهي مش حاجه ساهله..
سميرة عقدت حواجبها وقالت..
/الراجل يتعالج وبإذن الله مع الوقت تولي ايديته زي ماكانت..
سدرة؛لا مش زي ماكانت ياسميرة..
انوجع قلب سميرة ع نضال..ردت ع سدرة تقول..
/والله ماحتلقوا راجل يحب اريج زيه..
سدرة بضيق..
/ياسميرة اني جسيت نبض امها طول سكرت الموضوع وقالت ردي بالك تكلميها عليه والصراحه في حد تاني متكلم عليها وامها تبي تعطيهاله..
سميرة بوجع..
/لاحول ولاقوة الا بالله وخلاص..
سدرة:ربي يعوضه بخير منها ان شاء الله..
التزمت سميرة الصمت وهي مضايقه لأبعد حد..
🍃وصاحب الشأن كان مقعمز في الجامع يراجع ف ورد الحفظ من القرآن الكريم..ايه..نضال حفظ جزئين من القرآن زي مابلال قارب ع اتمام حفظه كاملا..الإنجاز العظيم هدا اللي استمر يجاهد عليه لمدة تلاته سنوات اجره كله حيكون لطوبى زيه بالزبط..بل اجر كل من قاعد يعلم فيهم بلال القرآن من ابناء بلده وغيرهم من العماله الأفريقيه..وفي ماهو اعظم بمراحل..بلال توا قاعد يحاول في واحد من اصدقائه متبع احدى الديانات الوثينه بش يخش الإسلام ولو صار وخش الإسلام اجره حتى هو حيصب في حساب طوبى في الآخره..
☘ والآخرة خير وأبقى☘
🍃🍃🍃🍃🍃
"باهي حبيبتي ريم صحيتي وبارك الله فيك..تصبحي ع خير"
نهت فايزة المكالمه مع خطيبة ولد خوها وهي تقول..
/قالوا باهي..
مروة؛خلاص كلمي صفاء خل تقول لراجلها..
تنهدت فايزة وقالت..
/تو نقوللها..
وقامت هاتفها بش تكلم صفاء وعيون مروة تراقب في ملامح الضيق ع وجه امها..
☘مروة اللي بعد ما كملت امتحاناتها حيبعت الهيروشيما معين اهله بش يعطوا فيها كلمه..
🍃فهيمه:حندير جهدي بش تقول باهي..
بنتها الكبيرة:لايام ماتخليهاش تحس خوي طايح عليها ماتبيش هي حرة..
فهيمه بإنزعاج؛اسكتي سلم بنتي حاجه مش يالاك معاش تعطي رايك فيها..
بنتها بتعجب:شن تقولي يام راني اخته!!؟
فهيمه؛ومن نكرك!!؟ عارفينك اخته لكن امور زي هادي مايحكم فيها حد غيري اني واللي نعرفه ان الراجل لازم يتعب بش يوصل في البنيه اللي يبيها بش يحس بقيمتها، بوك الله يرحمه يبستله ريقه شحطه تشحيط مرمدته تمرميد خليته قريب دخل معمر القذافي بش نقول عليه باهي..رفعت حاجبها وقالت..وبعد مارضيت بيه وخداني قعد يشبحلي ويشبح للقمر وديما حاط في باله انه ماحصلني لين طلعت
روحه..
بنتها بضحكه:حتى انتي ميمتي مافيش زيك اتنين..
فهيمه بإبتسامه:حتى مريوة ماريتش زيها في جيلها وماتمشي مع مونا وحده غيرها..
تنهدت بنتها وقالت..
/ان شاء الله يصير منها..
فهيمه؛يصير منها بعون الله يصير منها...
🍃🍃🍃🍃
"تعرفت ع عمي جبريل في فترة الحرب اجرلي الدور التاني في حوشه في البدايه علاقتي بيهم كانت رسميه لكن هما خشوا فيا خشة لاقوة الا بالله خلوني نحسهم هلي..المهم بعد ماتقوت علاقتي بيهم عرفت ان عنده صديق عايش في طرابلس كان اداري في شركة الكهرباء ولاني قلتله عن نيتي في الخدمه فطرابلس اقترح عليا يكلمه عشان يتوسطلي غادي وييسرلي امور النقل..الموضوع ماكانش ساهل لكن صاحبة دار جهده فيه وحتى هو تعب عليه وفي النهايه تيسرت وصار منها في سنة 2017 وقلت خلاص ياعبد القيوم حتعدي لبلاد الحبيبه وبعون الله حتلقاها واللي ياما تمينته وحلمت بيه حيصير"
طوبى هي مقعمزة جنبه ع كنبه تتأمل فيه وتسمع بكل حواسها قاطعاته بعد قال الجمله الاخيره..
/معقوله ماخطرش في بالك اني مرات نكون طلعت من البلاد بكل..او مرات ماكنتش من اهل الدنيا وقتها..او اني..وسكتت..
ابتسم بأسف وخدي ايديها وشدهم الزوز بقوة وقال..
/قتلك كنت كيف المجنون ماكنتش نبي نفكر غير في اللي نتمناه بس..اه..نسيت نقول اني حكيت لصفيه وعمي عبد الله وعمتي سليمه بس عاد الكبار اختصرتها لهم وقلتلهم اني نبي بنت من طرابلس بس..لكن صفيه حكيتلها بالتفصيل..ضحك وقال..ولأنها مجنونه كيفي تمت تشجع فيا وتدعيلي نلقاك صفيه اكثر من خلاني تمسكت بحبي ليك وصدقت حلمي بيك بقوة وكانت موصيتني اول مانلقاك نعرفكم ع بعض...تنهد بحرقه..تنهيده وجعت قلب طوبى..شاف لإيديها بعدين رفعهم وباسهم نزلهم وقعد شاد عليهم بقوة وشافلها وقال..وعديت لطرابلس..والليله اللي حطيت في رجلي
في شارع القهوة..كانت ليل فرحك..
نزلوا دموع طوبى وهي تشوفله بحزن..
ضحك ومن داخل قلبه كان محروق وين تفكر هديكا الليله..مسح دموعها وخداها لقلبه وهو يقول..
/ضيفني المهدي في حوشهم بتت هذيك الليله عندهم..جابولي من عشا الفرح..ونا نتعشى هما روحوا بيك للحوش كانن يشتن عليك الصبايا وانا نسمع فيهن ومنسجم وندعي البركه والهنا..ضحك تاني من حرقة قلبه لكن هي شدت فيه بقوة وانهارت بالبكي..
ضمها بقوة وقال..
/خلاص خلاص بنسكت معاش بنحكي شي..طوبى ياقلبي بكاك يقهر فيا..
هدت شويه وتباعدت عنه شويه وهي تشوفله بعيون مدمعه وقالت..
/وكان نعرفك من زمان راني استنيتك وعمري ماكنت لغيرك..
ضمها بقوة وهو يقول بضحكه..
/ياعمري انتي ياروحي انتي اصلا عمرك ماكنتي لغيري..
طوبى بنبرة ألم وبكاء..
"نحبك"
/وعمري ماحسيت بمعنى الكلمه هادي الا معاك انت وربي شاهد..وربي شاهد اني عمري ماقلتها لغيرك..والله قلبي ماعرف الحب الامعاك انت وبس..
عبد القيوم غمض عيونه وقال..
/من غير ماتحلفي ياعمري صادقه..فتح عيونه وعقد حواجبه بعدين قالت..ايه حقه تعالي هنا قوليلي..امتى حبتيني!!؟
ضحكت من وسط دموعها وقالت..
/مش عارفه امتى وكيف لقيت روحي نحبك من غير مانحس..
تباعدت عنه وهي تشوفله قالت..
/قبل ماكنتش متقبلاتك بكل بعدين حسيت روحي مش طايقتك..نزلت عيونها..لكن بعد ماطلقت بفترة بديت نحس اتجاهك بشي ماكنتش فاهماته..امان ولاامتنان لأنك في المواقف الصعبه اللي مريت بيها كنت ديما واقف معاي وفازعلي..المشاعر زادت كبرت وطورت من كلام الناس عليك القريب والبعيد الفكرة الغلط اللي كنت حاطتها في بالي ان رجاله كلهم زي بعض انت نسفتها نسف..وهكي لقيت قلبي معبي بيك بدون مانحس..
ابتسم وقلبه طاير وسط ضلوعه..حط يده ورا راسها وقربها ليه وباس جبينها بعدين قال..
/راني نموت عليك..
ابتسمت بخجل..
قرص خدها وقال بضحكه..
/هي خل نديروا عشانا وبعدين نكملوا كلامنا..
ناضت وهي تقول..
/لالا انت مادير شي غير انك تاكل وبس..اشرتله ع كراسي البار وقالت..قعمز غادي وهدرز عليا وبس..تمام!؟
تنهد من قلبه وهي يتأمل فيها بإبتسامة حب وقال..
/تمام..
ضحكت بخجل بعدين غيرت نظرها عنه فكت شعرها وهي تقول..
/بنديرلك شاورما عمرك ماذقت زيها..لمت شعرها بعدين مشت تجري للكوجينه..
ضحك عليها وناض ومشي لكراسي البار وصل فيهم وقعمز ع واحد منهم وهو يتأمل فيها وكأنه قلبه قاعد يطير حواليها..
طلعت صدور دجاح من الفريز وبعدين قالت..
/كمل..
عبد القيوم؛خلينا من نكد توا..نبي نتغزل بيك وبس ياسمح..بصوت عالي شويه قال وهو يحرك في ايديها للأمام والخلف قدام صدره..
/خليني نفرج ع اساريري تربحي..
ضحكت ووجهها محمر خجلا..
حط ايديه ع الرخامه وهو يشوفلها بإبتسامه وقال..
🌼موش غير عيونك الوجه صافي و الجبين مرايا
حزنك وفرحك وضحكتك وجفونك
بروحك خذيتي في عقلي غايه
عليهم فرضتي كلهم قانونك
اللي خلق حسنك ودارك أية
خلقني اسيرك ودارني مجنونك
يا بدر ليلي يا نجوم سمايا
كلك جميلة موش غير عيونك
..حطت ايديها ع قلبها وقالت بخجل وضحكه..
/يالهوي..
وهو قعد يضحك علي ردة فعلها من وسط قلبه اللي طاير بصاحبه من الفرح...
🍃🍃🍃🍃
واخداته من يده وهي تركب بيه الدروج هو بضحكه قال..
/غير بالشوي مش هك بنطيح ياوليه!
سالمين:مايصيرلك شي..
وصلوا في الدور التاني كملت بيه الطريق وقعدت توري في المكان وهي تقول..
/بحت بحت وقولي شن رايك..
وقف جبريل وهو يمرر في نظره ع المكان ويقول..
/ماشاء الله..
سالمين بإبتسامة حماس..
/جد ياجبورة عجبك!؟
شافلها بإبتسامه وقال..
/وجد الجد..
تنهدت وقالت..
/غير امتى يجي الاسبوع الجاي ونحقهم قدامي!؟
حط يده ع كتفها وطبطب عليه وهو يقول..
/خلاص هانت بكرا الخميس..
ابتسمت من قلبها وعيونها تعبوا دموع..
🍃🍃🍃🍃
مقعمزة في دارها تقرا في القرآن بعد ماصلت العشاء..
وهو كيف روح من الجامع..روح بلهفته وشوقه الشديد
دور عليها في الكوجينه والصاله مالقهاش..
توجه لدارها وقف قدامها ودق عليها وهو يقول..
/طوبى..
"شويه وطالعه"
ضحك ضحكة خفيفه وتوجه لداره..وصل فيها فتحها وخشلها..
لحظات وطلعت طوبى من الدار..
شافت جهة دار لقت الباب مفتوح شويه وبان عليها ابتسم ومد يده وقال..
/تعالي..
هي حست بشي من التوتر والارتباك لكن حاولت تخفيهم ومشتله..
وصلت فيها وهي حاسه بالخجل هو شد يدها وقال..
/بنوريك حاجه..
دخلها داخل..وهي لما خشت وشافت الدار بدت ع وجهها ملامحها المفاجأة..
كانت دار نوم زوجيه جديده وحلوة بالمرة..وجهت نظرها لشي هو طلب منها تشوفه لما قال..
/بحتي يسارك..
ويجو عيونها ع اللوحه اللي رسمتهاله..
ضحكت بإحراج..
وهو قال بإبتسامه وحاجبه مرفوع..
/وتوا احكيلي شن قصتها بالتفصيل..
تنهدت بإبتسامه وقالت..
/شن بنقولك..بلعت ريقها وقالت..في مرة شفتك بيها لابس تارقي شكلك وقتها كان مميز وغراني نرسمك بس ماقدرتش لعند ماشفت الاعلان متاع المعرض ع صفحة الجمعيه طول جيت بين عيوني وقررت نرسمك..
ضيق عيونه وقال..
/الرسمه هذي واخدتيها من صورتي ع حسابي في الفيس..
بضحكه قالت..
/لاخديتها من صفحة سامي المصور..
عقد حواجبه وقال..
/متابعه سامي!؟
تعكرت ضحكتها وقالت..
/صفتحه متاع المصوراتي بس يعني صفحة عامة بس..اني مانتابعش ولانضيف رجاله غير محارمي..
خداها لقلبه وقال..
/اسف مش قصدي والله..
هي قالت..
/عارفه لكن اني وضحتلك بس..
عبد القيوم:من غير ماتوضحي عارفك كويس ياقلبي بس شن بندير عليك نغار ياسمح انت..
ضحكت..
لما سمع ضحكتها ابتسم وقال..
/ارهيقم هولان..
بعدت عنه وقالت..
/ايه حقه..قداش كلمة علمتهالي بالمقلوب!!؟
ضحك وقال..
/تعالي..ومشي بيها للسرير وقعمزوا عليه..
هي زاد توترها شافتله لما قال..
/تو نعلمك تارقي صح لكن مش الليله..الليله خلينا نردوا لحصص الخط اللي راحن عليك..
ناض ومشي جاب الكراسات والادوات حطت ع السرير وقعمز جنبهم وقال..
/هي نبدوا..
طوبى:قبل لنبدوا نبي نطلب منك طلب..
هو بإبتسام حب قال..
/أمر..
قالت بإبتسامه..
/مايأمر عليك ظالم..زي ماتعرف عندي قروب صاحبات لينا مده ماتلاقيناش وحده منهم كلمتني المدة اللي فاتت وقالت دايرتلنا عزومه حني بنات القروب لحوشها غدوة وشادة فيا هلبه..
رفع حواجبه وقال..
/بكرا..امم..انتي خاطرك تمشي!؟
طوبى:هلبه..
ابتسم وقال..
/مايقعد شي في خاطر روحي..حاضر بكرا الصبح نعدوا لطرابلس..رفع سبابته وقال..لكن هاه مكانك مكاني..
ضحكت وقالت..
/باهي..
رفع حاجبه اليسار وقال..
/ايه قوليلي من هي صاحبتك اللي عزماتك!؟
اختفت ضحكتها ورفعت حاجبها وقالت..
/علاش تسأل !؟
هو بخبث مخفي قال..
/نبي نعرف كان نفسها صاحبتك اللي..
قاطعاته وهي تقول بنرفزة من الغيرة..
/مش لازم تعرف شي..الهى باللي قدامك هيا سقدني..
قعد يضحك..
شافتله بنظره حاده كلها غيره..
عبد القيوم بضحكه..
/فيك جو لما تغاري تسمحي بزياده..
نزلت عيونها خجلا وهي مبتسمه..
تنهد بعدين قال..
/هي ركزي معاي..
☘وبدي يعطي فيها حصة جديده عن خط الثلث وفي وسط الشرح كان مرة يبصر عليها "يمزح" ومرة يغازلها وهي هايمه فيه...
وفي عز الشرح نزل عليها النعاس..
رقدت ع السرير بالعرض ع جنبها وهي تقاوم في النوم بش تركز معاه لعند ماسيطر عليها النوم وراحت فيه..
وهو تمدد زيها وقعد يتأمل فيها بعيون مليانه حب وقلبها طاير بفرحته بيها ومازال لعند توا مش مصدق ان ربي نوله ماتمناه سنين طويله من عمره..وهو توا بس زي ماقاللها معاش يبي من الدنيا شي غير انه يقعد معاها لأخر العمر...
#حلاوة_الدنيا
#طوبى
(نعتذر ع قصر الجزء مالحقتش نكتب اكثر من هكي)
...يتبع...
