#طوبى "جنة طوبى"
#جمان_فريد
#الجزء_121"انا لحبيبي وحبيبي إلي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الدعاء
251 - باب فضل الدُّعاء بظهر الغيب
قَالَ الله تَعَالَى: وَالَّذِينَ جَاءُوا مِنْ بَعْدِهِمْ يَقُولُونَ رَبَّنَا اغْفِرْ لَنَا وَلإِخْوَانِنَا الَّذِينَ سَبَقُونَا بِالْأِيمَانِ [الحشر:10]،
وقال تَعَالَى: وَاسْتَغْفِرْ لِذَنْبِكَ وَلِلْمُؤْمِنِينَ وَالْمُؤْمِنَاتِ [محمد:19]،
وقال تَعَالَى: إخْبَارًا عَن إبْرَاهِيمَ ﷺ: رَبَّنَا اغْفِرْ لِي وَلِوَالِدَيَّ وَلِلْمُؤْمِنِينَ يَوْمَ يَقُومُ الْحِسَابُ [إبراهيم:41].
1/1494- وَعَن أَبي الدَّردَاءِ أَنَّهُ سمِعَ رَسُولَ اللَّهِ ﷺ يَقُولُ: مَا مِن عبْدٍ مُسْلِمٍ يَدعُو لأَخِيهِ بِظَهرِ الغَيْبِ إِلاَّ قَالَ المَلكُ ولَكَ بمِثْلٍ رواه مسلم
.
2/1495- وعَنْهُ أَنَّ رسُول اللَّه ﷺ كانَ يقُولُ: دَعْوةُ المرءِ المُسْلِمِ لأَخيهِ بِظَهْرِ الغَيْبِ مُسْتَجَابةٌ، عِنْد رأْسِهِ ملَكٌ مُوكَّلٌ كلَّمَا دَعَا لأَخِيهِ بخيرٍ قَال المَلَكُ المُوكَّلُ بِهِ: آمِينَ، ولَكَ بمِثْلٍ رواه مسلم. 🍃يقوّل رسول الله صلى الله عليه وسلم : "إِنَّ اللَّهَ تَعَالَى إِذَا أَحَبَّ عَبْدًا ابْتَلَاهُ فإذا صبر اجتباه"🍃
_________________________________________
في دار مسكرة في حوش عياده اخت سالمين..
كانت طوبى متمدده ع فراش وهي تتألم وتبكي وفي نفس الوقت تردد في تاج الذكر..
وجنبها سلوى محاوطتها وتقرا عليها وقدامهم واقفات سالمين وكاريمان اللي كانوا يشوفوا لطوبى وهما يبكوا بصمت..
سلوى بعد كملت قرايه مسحت ع شعر طوبى وقالت..
/طوبى شن تحسي توا؟
طوبى بشي من التعب ونبرة باكيه..
/خف الوجع شويه..شافت لسالمين وقالت..نبي نروح..
هزت سالمين راسها وقالت..
/تو نكلم عبد القيوم..ورفعت هاتفها وحطت ع رقمه واتصلت بيه..
كاريمان قدمت لطوبى وقعمزت ع رووس صباعها وقالت..
/ديما تجيك قويه هك!؟
طوبى هزت راسها بإيجاب بصمت وعيونها ع سالمين اللي كانت تكلم في عبد القيوم..
/لاخلاص ساد بنروحوا.....باهي باهي...نهت المكالمه وشافت لطوبى وهي تقول..خل نعدي نجيب العبايات..
طوبى:كان تقعدي ياخالتي خير..
سالمين قعدت تشوفلها بصمت..
طوبى:عرس بنت اختك هذا مفروض بايته عندهم ليك ايام غير جيتي قيداتك..
سالمين:اختي مش وحدها عندها غيري خمسه وزياده عليهم بنات خالاتي وصبياتها وجاراتها ماشاء الله معاها عالم..
طوبى:مهما كان ياخالتي لازم تقعدي..
سالمين؛وانتي في هالحاله مستحيل نخليك ماتزيديش تناقشيني سلم بنتي..
ومشت فتحت الباب وطلعت..
بدت ع وجه طوبى ملامح الحزن وعيون سلوى وكاريمان عليها حاولوا يغيروا جوها شويه وهي تجاوبت معاهم ظاهريا مسايرة لااكثر لعند ماجتها سالمين بعبايتها وخمارها وقفازاتها ساعدتها كاريمان تلبس بعدين خدتها سالمين وطلعت بيها وكاريمان وسلوى يسقدوا فيهم..
بعد ماطلعوا قعدت كاريمان واقفه تشوفلهم لين تحركت السيارة تنهدت بألم بعدين خشت وسكرت الباب..
سلوى؛باهي اللي كانت حاسبه حسابها..
كاريمان بضيق وقلق..
/لكن اللي صار معاها يخوف تقول ماتت بعيد السو..
سلوى بألم..
/صح...ممكن تكون عندها مشاكل صحية..
مطت كاريمان شفايفها للأسفل بعدم معرفه وهي في قمة القلق..
🍃🍃🍃
وطوبى طول الطريق كانت تحاول تبين انها عاديه لكن عبد القيوم اللي ولى يعرفها اكثر من نفسه حس ان فيها شي ولأن عارف تاريخ اليوم توقع تصيرلها حاجه ولولا رغبتها الشديده في المشيه للعرس كان منعها عنه..
🍁🍁
لما وصل للحوش نزلت سالمين ومشت فتحتلها الباب وهي تقول..
/باتي حداي الليله..
جاهم عبد القيوم بعد مانزل من السياره سمع كلام سالمين وقال..
/صار معاك شي طوبى!؟
طوبى نزلت وهي تقول..
/مش حاجه كبيره شوية تعب..
سالمين شافتله وقالت..
/خليها تبات حداي الليله..
شدت طوبى يده وقالت..
/معليشي خالتي خليني معاه..
فهمت سالمين قصدها هزت راسها وقالت..
/ع راحتك حبيبتي..
هو اللي كانوا عيونه ع طوبى ونظراته كلها خوف وقلق قربلها حاوطها وسكر الباب وقال..
/خشي خالتي خشي كان احتجنا شويه تو نرن عليك..
سالمين ودموعها في عيونها قالت..
/انا بنقعد واعيه كلمني في اي وقت..
هز راسه ومشي بطوبى للدروج..
شافت طوبى لسالمين وقالت..
/تصبحي ع خير خالتي.
سالمين بحزن وقلق..
/قدامك كل خير..
وعبد القيوم اللي كان مشغول ع مرته ماقال شي..
ركب بيها للدور وعيون سالمين عليهم لين ادرقوا عنها وقعدت واقفه لعند ماسمعت باب الشقه تسكر نزلوا دموعها ومشت خشت لحوشها..
🍁🍁🍁🍁
حولت طوبى عبايتها وخمارها وعبد القيوم واقف قدامها يراقب في كل حركه منها..
بان عليه وجهها...الزينه اللي شبه اختفت وتشوهت..اثار الدموع شحوب لونها هالعلامات خلاته يزيد يخاف ويسألها بنبرة لهفه من خوفه..
/قولي ياطوبى شن صارلك!؟
خدت نفس ونزلت عيونها لإيديها وهي تحول في قفازاتها وقالت..
/حاجه طبيعيه..العذر جي قوي بس..
سكت شويه وهو يفكر بعدين قال..
/غير لحظه كأنه تأخر عليك واجد صح!؟
طوبى بضيق واحراج..
/وجي ع وقت الحجامه..
قربلها وضمها وهو يقول..
/مش مشكله نلقولها حل ياقلبي..
بعداته عنها بالشويه وهي تقول..
/بنخش الحمام..
ومشت للشنطه بش طلع منها حوايج..قدملها وهو يقول..تو نطلعهم عدي خشي..
طوبى بدون ماتشوفله قالت..
/خليني نطلعهم انت كلم خالتي سالمين وقوللها حالي باهي خليها ترقد وترتاح..
قعد واقف يشوفلها بإستغراب وهي طلع في حوايجها بعد ماطلعتهم مشت طول بإتجاه الحمام وماغلطتش بنظرها وشافتله نهائي..
حاول يفسر تصرفاتها اللي ضايقاته ووجعاته في نفس الوقت واللي قدر يفهمه انها محرجه منه..
🍃🍃🍃🍃
"سلمها ياربي"
قالت هالجملة فردوس وهي تغطي في جنة بعد مارقدتها وعيون غرفه وهي راقده جنب صغارها معاها..
تنهدت فردوس وقالت..
/ماخاطريش نقابل وجه ثريا..
غرفه بضحكه..
/اطرحي وامشي اسحنيلها كبدها آلاء من بكري وهي متحلفتلها..
ضحكت فردوس بعدين قالت..
/تمنيته خلاها قعدت لين تحضر جياب جهينه..
غرفه؛نسيتي ولدك وقرايته!؟
فردوس بضيق..
/نسيتها بكل..
غرفه؛حتى آلاء تحسيها قاعده بالسيف..
فردوس:خدت ع نظام حياة تانيه..
غرفه؛هي عاد من قبل مش طايقه العيشه في ليبيا..
هزت راسها مواقفه ع كلام اختها وهي مبتسمه تهكما..
🍃ونفس الحديث كان يدور بين آلاء واريج في دار خالاتهم..
آلاء:مش قصة قالقه ولامضايقه لكن نمط الحياة اللي تعودت عليه مخليني مش متحمله القعده اكثر من هكي..
اريج بضحكه:حياة البرنيسسات اللي عشتي عمرك كله تحلمي بيها..
ضحكت الاء وهي تشوفلها من فوق لتحت...
اريج؛ولا معتز باشا قعد هني اسبوع بس وكمل باقي الشهر في تاجورا مالحقتش نشبع من خليقته..
الاء بضحكه؛يكون في علمك لولا زنين امي ماكان روح معانا بكل..
اريج:بكل خوي هدا مش عارفه لمني طالع حتى انتي فيك شويه خير لكن هو شي معدوم..
خدت الاء المخده وحدفتها ع اختها واريج تلقتها وردتها
شدت آلاء المخده وحضنتها وهي تشوف لأختها بإبتسامه وعيونها تعبوا دموع وسرعان ماانهارت بالبكي..
ناضت اريج ومشتلها قعمزت جنبها ضمتها وهي تقول..
/للوشه خيرنا عاد!
آلاء ببكي؛بالله عليكم ماتنسوني ماتراجوش لين نكلمكم كلموني حتى انتم حسسوني اني ديما ع بالكم ومش ناسييني..
كلام آلاء وجع قلب اختها هلبه ضمتها بقوة وقالت..
/من اللي بينساك ياهبله ياعبيطه من لما سافرتي واني ديما معششتلك في الخاص..
حاوطت الاء خصر اريج وضمتها بقوة واستمرت في البكي
واختها طبطب عليها وهي تبكي بصمت..
🍃عاشوا عمر وهما فاقدين ومشتاقين لأغلى انسان راح لمصير مجهول وخلا قلوبهم محروقه عليه لهاللحظه،ومازال مكتوب عليهم فقدرهم يعيشوا الفقد والفراق بإختلاف اشكاله..🍃
وماأصعب من الفراق والفقد الا الخوف منهم ...
التعلق..هو اكبر عامل يقوي حالة الخوف من الفراق والفقد..
واللي قاعد يصير مع طوبى قاعد وكأنه ينبه فيها من التعلق بعبد القيوم..
كل ماتحاول تقرب اكثر منه يصير شي يخليها تبعد واللي صار معاها فهالليله خلاها تتأكد من صدق احساسها الداخلي اللي ديما يقوللها..
"مش حتعمر بينك وبينه مش حتكملوا مع بعض مش حيصير منكم"
🍁من بعد ماطلعت من الحمام تعاملت معاه معامله عاديه مافيهاش حب ولاحميميه معامله تشبه اللي كانت بينها وبينه بداية زواجهم..
واكيد المعامله هادي حتأذي قلب عبد القيوم اللي قاعد يتعذب في حبه ليها..
🍃"ليش!؟"
طوبى وهي تحاول تخفي ضيقها بإبتسامه..
/في وضعي هذا نحب نرقد بروحي مانبي حد معاي..
وفعلا لاحظ هالشي عليها المرة اللي فاتت برغم ضيقه الشديد قال..
/ع راحتك..لكن انتي ترقدي هنا وانا نرقد في الصاله..
طوبى:لا بالله عليك خليك هني اني اصلا مش راقده نبي نراجع الورد متاعي..
ناض خدي المخده وهو يقول بإبتسامه..
/الحقيني بغطا..
ومشي طلع من حداها وهي تشوفله بنظرات ألم مغرقتهم الدموع..
🍃🍃
طلعت وراه بالغطا للصالون..
حطاته ع طاوله ومشت وهي تقوله..
"تصبح ع خير"
رد عليها وهو يشوفلها بضيق لعند ماخشت الدار وسكرتها عليها..
🍃وكملت طوبى ليلها وهي تقرا في القرآن عن ظهر قلب وفي الهاتف ودموعها مابطلوش نزول..
والآلام مرافقتها...الام جسديه وروحانيه ونفسيه..
كلها اجتمعت عليها هديكا الليله وهي قاعده تقاوم فيهم بكلام الله سبحانه وتعالى...
ماكانتش تبي تخسر معية الله وقربه زي ماخسرت هلبه حاجات حلوة في دنيتها وقاعده لعند هاللحظه تخسر فيها وماتكسب منها في شي..
كل ماتاخدها وساوس الشيطان لفكرة السخط والاعتراض ع اقدار الله ترجعها قوة ايمانها وثقتها ان الله مايقدرش الا الخير مهما بان في ظاهره شر وحرمان..
رقدت بعد ماخف عليها الألم..رقدت ودمعتها ع خدها وذكر الله ع لسانها لعند ماراحت في النوم..
🍁لكن هو..
قعد طول الليل يفكر في العرض الجديد اللي طلع عليها فهالليله..العرض اللي كان ليه مقدمات خلاته يفكر لو طور معاها بعدين لوين يوصل!؟
وتفكيره هدا خلا شكه اللي داسه من فترة ناحية امر ما يزيد يكبر في داخله وهو لازم يقطع هالشك باليقين..
🍃🍃🍃🍃
طلع من دار النوم وهو مضايق ومخنوق..
قعد يمشي وخطواته رفعوه لدار طالع منها صوت بكي زوجته..
يسمع فيها تبكي بحرقه وألم وقلبه يتقطع عليها..
خدي نفس ودق الباب بعدين قال..
/سالمين..
ماردتش عليه ومازال مستمرة في البكي..
عاود ناداها..
/سالمين الله يربحك حلي الباب..
هدت شويه عن البكي ولحظات وفتحتله الباب..
جبريل بألم..
/تعالي
خشت لحضنه ورجعت تبكي وهو طلعها وسكر الباب بالمفتاح بعدين حوله وخدي مرته ومشي بيها لدار النوم...
🍃🍃🍃🍃
تاني يوم..
قبل الظهر بساعة..
طلعت اريج بسيارتها من الحوش وهي رافعه امها واختها لحوش جدها في تاجوراء..جدها دار عزومه كبيره للعيله كلها لعيون فردوس واحفاده منها..
والعيله كلها كانت حاضرة العزومه وع راسهم ثريا اللي مهما يصير ومهما تعدي من سنين شعور الحسد اللي في داخلها اتجاه فردوس ماتحولش..تشوف في وضعها المتغير هيئتها، لبسها، ذهبها،والحسد ياكل فيها وعاد آلاء ماغيبتش جهد وهي تحكي عن نظام حياتها في الخارج خلت كل من تعالى عليها وحسسها بالنقص يوما ما يتمنى ربع الحياة اللي عايشتها..
لكن اريج كانت بالنسبه ليهم محط شفقه وتعاطف نظراتهم ليها واسلوبهم في الكلام معاها خلاها تندم ع جيتها..وامها زادت انقهرت ع حالها...
🍃ولأن غرفه قعدت بروحها جتها هاديه قعدت معاها للغدي وبعد الغدي رفعها راجلها لغريان ماشيه تزور اهلها وتقعد عندهم كم يوم..
وبعد العصر خشوا سدرة وفايزة ع غرفه دارتلهم سفرة قهوة وشاهي وحلو وفطيره وقعمزوا كلهم في دار المعيشه والصغار يلعبوا حواليهم..
🍃"جديات عطيتيها!؟"
فايزة:والحمد لله..
سدرة؛لكن مازال صغيره يافايزة!
فايزة بضيق..
/عارفتها صغيره ياسدرة لكن الله غالب الظروف تحكم، كانك عليا ماكنت نتمنى نعطيهم الا بعد مايكملوا قرايتهم..
غرفه قعدت ساكته وهي تشوف لفايزة بحزن وفايزة مكمله تقول..
/مش ضامنه الوقت ياسدرة مانعرفش شن بيصير القدام نبي نعطيهم للرجاله كويسين ونطمن عليهم والعيله اللي عطيتهم مروة ناس واصله وليهم اسمهم في البلاد وغير هكي متواضعين واصلهم طيب فرصة ياسدرة جابها ربي لعندي ومانبيش نضيعها.. نزلت عيونها وهي تقول بشي من الألم..من الاخير اني نبي عزوة وسند ليا ولبناتي يحمينا من هالوقت يخوف اللي معاش فيه امان..
سدرة بضيق..
/مروة راضيه!؟
رفعت فايزة عيونها فيها وقالت..
/والله لو ماكانت راضيه مانعطيها...
رسمت سدرة ع وجهها ملامح الابتسامه تخفي بيها ضيقها وهي تقول..
/مدام هكي ربي يجعل خيرتها فيهم ويتمم ع خير..
ابتسمت فايزة من بين دموعها وقالت..
/آمين..
سدرة بنفس الابتسامه..
/باهي هما توا بيعطوا فيها كلمه بس!؟
فايزة:لا الخميس الجاي ان شاء الله بنديروا فضانيه في حوش عمي الصيد..
🍃تعبوا عيون غرفه بالدموع لما تفكرت فضانية صفاء حلوا فيها لطفي وعلي محل الاب والعزوة وجي الوقت اللي راحت فيه هالعزوة اللي عوزت الكل فيهم...🍃
سدرة وهي مبتسمه بمفاجاة قالت..
/بارك الله فيه..
☘وقعدوا سدرة وفايزة يحكوا عن باقي التفاصيل وغرفه معاهم ومش معاهم..كلام فايزة قعد يدور في بالها هلبه وخلاها تحس بخوف وقلق من المستقبل..
🍃🍃🍃🍃
"مبارك حبيبتي وربي يتمم ع خير"
هادي طوبى وهي واقفه في جنان حوش جبريل قدام شجرة الياسمين تكلم في مروة مكالمة ماسنجر..
وعبد القيوم واقف بعيد عليها شويه وهو حاط ايديه في جيوبه وعيونه عليها..
طوبى بضحكه..
/لاان شاء الله بنروح اليومين الجايات..
"بالله حق!! فرحتيني هلبه هلبه"
ضحكت طوبى وقالت..
/سلمها ياربي..
🍁وعبد القيوم يتأمل فيها وهي تضحك بهيام..
وهالتأمل مادامش بعد ماقطعه صوت الدق ع باب الحوش..
التفتت طوبى شافتله وهو التفت شاف للباب بإستغراب..
سالمين وجبريل في حوش عياده اليوم حفله دخول بنتها والعيله كلها غادي..
قعد يتسائل في نفسه وهو ماشي بإتجاه الباب...
من بيكون جاي توا!!؟ ولامعقول يكون صار شي خلاهم يروحوا!؟...
وصل في الباب وفتحه وتبان ع وجهه ملامح الصدمه..
معمر وصفيه قالوا بضحكه مع بعض
"سوربرايز...مفاجأة"
ضحك غصب عنه وهو يحرك في راسه يمين ويسار بعدين قال..
/خشوا خشوا...
********
صفيه وهي حاضنه طوبى قالت بضحكه..
/نجك ليا واخيرا قعدتي كنتنا..
ضحكت طوبى..
بعدت عنها صفيه وهي شادتها وقالت..
/تعرفي عندي كلام ياكلام دسيته لهاليوم..
طوبى بضحكه..
/باهي تعالي نديروا قهوة..
تباعدت صفيه عنها وشدتها من يدها وهي تقول..
/هيا..شافت يد طوبى رفعتها وهي تقول..محنيه!؟ الله يبارك تهبل عليك..نزل يدها وقالتلها وهي ترقص في حواجبها..يابخت ولد خالي..
حاولت طوبى تحافظ ع ابتسامتها وخدتها من يدها ومشوا للكوجينه وهي تقول..
/راجلك كيف يحب يشرب القهوة!؟
🍃ويدوب شربوا فنجان القهوة بعدين طلعوا كلهم في سيارة عبد القيوم اللي عزمهم ع العشي في احد المطاعم..
طول الطريق والهدرزة شغاله وطوبى ماكانتش تتكلم الا مع صفيه وبصوت مسموع ليهم هما بس..
ومرات كانت تشوف للمرايه الأماميه صدفه تلقى عبد القيوم يشوفلها وهو عاقد حواجبه ومبتسم وهي بعد تبادله الابتسامه تغير في عيونها عنه وصفيه من تحت خمارها كانت تراقب فيهم وهي فرحانه..
🍁🍁🍁🍁
وصلوا لأحد المطاعم وخشوله..
قعمزوا معمر وعبد القيوم ع طاوله..ووراهم بالزبط صفيه وطوبى..
معمر وصفيه كانوا عاطيين بالظهر لبعض لكن عبد القيوم وطوبى قعدوا مقابلين بعض..
🌼صفيه:ماتعرفيش شن عاش وشن كان يحس هذيك الفترة حطيتي نفسك مكانه وتخيلتي اللي مر بيه!..
تعبوا عيون طوبى بالدموع وهي تشوفله كيف يهدرز ع معمر..
صفيه؛تعرفي مافي حد يعرف بقصته معاك الا وقال عليه مجنون وعايش في الوهم ويجري ورا سراب ورا حاجه مستحيل يصير منها..ياما قالوله انسى وتخطى وعيش حياتك وشوف نصيبك مع غيرها وهو يقول ياهي يالا حتى لو تميتي من نصيب حد تاني غيره كان يقول مانقدرش نكون مع غيرها وقلبي عندها مانبي نظلم حد معاي..
نزلت دمعه من طوبى فيسع مسحتها وشافت لصفيه وهي تسمع فيها تقول..
/بنقولك حاجه مانعرفش كان خبرك عنها ولالا..المشاركات اللي كنت ندير فيهن لمنشورات اشعاره هو اللي طلبهن مني عارفك صديقة ليا ع الفيس كان يبي يوصله مشاعره ويبيك تحسي بيه..
حطت طوبى يدها ع فمها وهي متفاجئه ع الآخر..
صفيه بضحكه:والله كيف مانحكيلك..ضحكت بعدين قالت..متفكرة كيف كنتي تبيني نقنعه بصاحبتك عبير لاوفوقها خلتيها تاخد رقمه..
بدت ملامح الغيرة ع وجه طوبى نزلت يدها وابتسمت بعصبيه..
صفيه:لا والله لما كنتي تبينا نخطبوله جارتكم هديك نسيت اسمها..
طوبى تأففت بإنزعاج..
ضحكت صفيه بعدين قالت بإبتسامه..
/واحد كيف عبد القيوم ماتسلمي فيه لو شن يصير حاربي عشانه كيف ماهو حارب عشانك وماتخلي حد من كان يكون يفرق بينكم..
بدت ع وجه طوبى ملامح القلق وهي تقول..
/ماقلتلاش الكلام هدا قبل لكن اني خايفه من ردة فعلك هلبه لما يعرفوا..
صفيه:طز..
رفعت طوبى حواجبها بإندهاش..
صفيه بحزم وتأكيد..
/ايه اللي سمعتيه طز..ماحد ليه دخل بيكم هذي حياتكم مش حياتهم وكانك ع عبد القيوم من يوم يومه مستقل بنفسه وصاحب القرار الوحيد في حياته وحبي هله من باته وامه ليه حيخلوه يرضوا يحبوا ولايكرهوا لأنهم مايتحملوش خسارته..
تنهدت طوبى وردت نظرها ليه لقاته يشوفلها..
فهاللحظه اشتغلت في المطعم اغنيه طوبى غصب عنها انتبهت لكلماتها...
وهو زيها ركز مع الكلمات وعيونه قاعدين يشوفوا لعيونها..
"ياما حكيت عليك للنـاس وللأيـام
قالولي خيـال! وقُـلت حقيقة مش أوهـام
قـالوا ملاك بِـتحلم بيه ومُش إنسـان
راهـنت عليك وأديني بقيت أنا الكسـبان
🌼ركزت عليها صفيه كيف ثبت نظرها ع جهة محدده التفتت شافت وين تشبح جو عيونها ع القيوم وهو يشوف لطوبى بنظرات حلوة بالمرة..ضحكت بعدين ردت نظرها لطوبى وركزت حتى هي ع كلمات الاغنيه..
"أنا راسمك في خيـالي مِن قـبل ما أكون ويـاك
وسـنين وأنا بـستناك عايـش على نـااار الشوق
قـالوا عليا ليالي عايش في أمـل كذاب
مسكين مـاشي ورا سـراب
ومصـيره في يـوووم هَـيفوق..
🌼ابتسمت صفيه وهي تسمع وكأن كلمات الأغنيه تحكي في قصتهم فجأة جتها رساله ع الماسنجر..
رفعت هاتفها وفتحت الرساله لقتها جايه من راجلها..
(ولد خالك عايش حياته وخلاني للجفاف)
ضحكت وردت عليه..
(اريقي هولان ترا)..."نحبك هلبه حبيبي"
وقعدوا معمر وصفيه يتبادلوا في الحب بالرسايل وطوبى وعبد القيوم بالنظرات ومازالت كلمات الأغنيه تحكي في قصتهم...
" وآدي المـسكين بقى دلوقتي لِيه حاسـدين
ومُـش فاهمييين! وسـألوني عرِفت منـين
إني في يوم هَـقابلك بين بقية النـاس
وأنا رديت بِـإني مـشيت ورا الإحسـاس"
ضحك عبد القيوم بعد سمع اخر مقطع بعدين نزل عيونه لهاتفه خداه من ع الطاوله وخش ع الرسايل وبدي يكتبلها وهي تشوفله..
رن هاتفها بنغمة الرساله ضحكت ورفعاته وفتحتها..
(من قالك نزها بغير زهاك
يابدر كيفك في السماء ماظني
ومن قالك ننسى حروف اسماك
منقوش وسط القلب غصب عني
ومن قالك نفسي اتسيب هواك
انت النفس عندي وقطعه مني
ومن قالك روح الروح ما تفداك
تفداك روحي راه ماتلزمني)
ضحكت من وسط قلبها اللي كان يرفرف بمشاعره..قامت عيونه شافتله لقاته يشوف لهاتفه وهو مبتسم..
غيرت نظرها عنه لصفيه لما سمعتها تقول..
/ربي يهنيكم ومايحرمكم من بعض يارب..
طوبى بإبتسامه ود..
/ويخليك راجلك وولدك ويسعدكم دنيا وآخره..
☘حست طوبى وقتها بسعاده هائله خلتها تدعي لصفيه بهالدعاء وهالاحساس خلاها تفكر ان الله سبحانه وتعالى يبيها تعرف انه بعتلها نعمه لازم تتنعم بيها وماتفرطش فيها ولاتستخسرها في نفسها مادامه قسمها ليها وماتخليش وساس الشيطان والهواجس والمخاوف تحرمها بالفرح بيها مهما شافت وواجهت من مصاعب☘
وهي الحياة شني غير ابتلاء المحظوظ فيها بس صاحب القلب العامر بالإيمان واللي يعطيه الله رفيق طيب يساعده ع تجاوز مافيها من شدائد ومحن..
🍃🍃🍃🍃
وبعد ماقضوا احلا الساعات مع بعض بين المطعم وتقعميزة حلوة في احد الحدائق العامه روحوا للحوش ولقوا جبريل وسالمين في استقبالهم عبد القيوم عطاهم علم بجيتهم...
🌼هديكا الليله باتت طوبى لوطا مع سالمين وصفيه وداروا سحور وسهريه اغلب الهدرزة فيها كانت ع حفلة بنت اخت سالمين وضمن هالهدرزة خبرتهم عن عزومة عياده ليهم ع الغدي تاني يوم..طوبى اخفت ضيقها لما سمعت بحكاية العزومة كانت محرجه منهم..بسببها هي فسدت ليله من احلى ليالي الفرح وغير هكي فكرت في تفسيرهم للحالة اللي جتها هديكا الليله لأنها ماكانتش طبيعيه نهائيا...
🍃🍃🍃🍃
والتموا في حوش عياده تاني يوم..
صفيه كانت تعرف منهم عيلة سالمين بس والمعرفه ماكانتش عميقه لكن حبت هلبه جو سلوى اللي قعمزت جنبهم هي وطوبى...
🍃🍃
بعد الغدي..
جابولهم الشاهي والحلويات..
وهما يهدرزوا وحده من خوات سالمين قالت لبنات حماة اختهم عياده...
/هالعيل حيرني مره يقول لهذي ماما ومرة يقولي لهذي ماما..من فيكن امه؟!
ضحكوا وقالوا مع بعض..
"الزوز"
ضحكوا الحاضرات واخت سالمين قالت..
/والله نحكي جد من فيكن امه..
ردة وحده فيهم تقول..
/انا امه اللي جاباته واختي هي اللي رضعاته..
سالمين طول شافت لكاريمان اللي كانت مركزه مع الحديث..
حماة عياده قالت..
/بنتي هذي بعد جابت جتها كآبة الولاده كرهت ولدها خداته اخته وتم عندها ورضعاته مع بنتها..
اخت سالمين..
/قصدك لتوا قاعد عندها!؟
ردت ام الولد..
/لاقاعد بيني وبينها..
اخت سالمين؛وباته راضي!؟
بدت ع وجه ام الولد ابتسامه اسف..
امها ردت عنها تقول..
/طولت معاها الكآبة وباته ماتحملش طلقها..
بدت ع وجوه اللي مايعرفوش القصه من الحاضرات ملامح الأسف والألم..
قالت اخت المراة اللي هي الأم المرضعه للولد..
/لكن ربك عوضها بالراجل الحقاني الحمد لله..
كلهم قالوا بأصوات متقطعه..
"باهي الحمد لله"
كملت الاخت تقول بعد ماضمت ولد اختها لحضنها..
/لكن هالسمح ماخليته بكل..
وحده من الحاضرات قالت..
/وراجلك عادي عنه ؟!
ضحكت وقالت..
/ع قلبه كيف العسل حتى هو باته راهو..
سلوى بإبتسامه..
/مدام تم ولدها من الرضاعه يولي راجلها في حكم بوه حتى هو وبنتها اللي رضعاته معاها اخته واللي يجوا بعدها كلهم خوته..
طوبى:اختي سدرة رضعتها مرت عمي مع ولدها الكبير حتى هي نفس القصه اللي جو بعده كلهم خوتها..
سلوى:عندك علم ان خوت مرت عمك في حكم خوالها وكل محارمها محارم اختك...
اتفاجئت طوبى والحاضرات معاها..
وكاريمان تشوف لطوبى والدموع في عيونها وسالمين مركزه معاها..
اخت سالمين علقت تقول..
/سبحان الله الواحد يولي عنده بدل العيله عيلتين..
غيرت كاريمان نظرها عن طوبى لسالمين لقتها تشوفلها بإبتسامة ألم..لفت كاريمان وجهها وقعدت تمسح في دموعها بدون ماتلفت نظر باقي الحاضرات..
#انا_لحبيبي_وحبيبي_إلي
#طوبى
....يتبع....
