#طوبى "جنة طوبى"
#جمان_فريد
#الجزء_108"كانون الثاني/الجيرانيوم"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#فضل_الصلاة_الإبراهيمية
🌼وإذا لزمت الصلاة الابراهيمية واكتفيت بها عن باقي الأذكار فاعلم أنك لزمت أفضل الأذكار وأفضل الدعاء وأفضل العبادات
يكفي أن الصلاة على النبي هي العبادة الوحيدة التي تجعلك في إتصال مباشر مع الله والنبي والملائكة
فأي فضل يعادلها ؟!!🌼
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃عادَ المَطر، يا حبِيبَةَ المَطر..
- قبّاني.🍃
________________________________________
بعد ماكملت قراية وردها من القرآن..
طلعت من دار المعيشه للصالون وهي تسمع في هدرزتهم وضحكهم وقلبه منعنش بسماع صوت عمتها مطيره وتعليقاتها..
خشت عليهم لقت فايزة وبناتها ومعاهم سميرة مقعمزات..
مشت سلمت عليهم بعدين قعمزت جنب عمتها باستها من خدها وقالت..
/استاحشتك موت..
مطيره بضحكه:حتى اني يارتيله استاحشتك واستاحشت جرينتك هلبه..
ابتسمت طوبى وهي تشوف لجنه كيف تلعب بسيارة اواب..
اريج:وكان تباتي عندنا الليله..
مطيره؛ياوخيتي مانقدر عمك شكري ممنوع عنده..
صاحوا مع بعض وهاديه تضحك..
سميرة بضحكه؛القانون هدا عندهم كلهم..
غرفه؛لكن والله ماتنحسب جيه قوليله يجيبك يوم تقعدي من الصبح لليل..
مطيره:إن شاء الله إن شاء الله..
طوبى:شفتي جدي!؟
مطيره بإحراج؛لاياوخيتي توا مانقدرش خل لين يفوت شهر..
ضحكت طوبى بإستغراب..
صفيه بإبتسامه؛هدا حشم ايام زمان اللي تتزوج ماتخليش بوها يشوفها لبعد الشهر وفي من تقعد عام..
فايزة بإستنكار:ووك عليا شن هدا!؟
مطيره؛عادات تختلف من مكان للتاني..خلوني من الدوة هادي وقولولي من بتمشي معاي لحوش الصيد نعزي..
طوبى شافتلها وقالت..
/اني..
فايزة:تو نسايركم..
سميرة:عقرب الريح نجاة غادي..
طوبى عقدت حواجبها ودارت حركت بملامح وجهها معناها..
"طز"..
مطيره:خلاص هي نوضوا..
فايزة؛خل نمشي نمسح مكياجي قبل..
🍃وناضوا جهزو انفسهم بعدين طلعوا لحوش الصيد..
وفي نفس الوقت سدرة استأذنت منهم بش ترقد وطلعت من حداهم لدار المعيشه..
غرفه بقلق:وجهها ماعجبنيش من لما خشت وهي مهبيه..
اريج؛صارت حاجه في المدرسه خلتها هكي..
سميرة رفعت حواجبها وقالت..
/المهدي اليوم كان مع الولاد غادي..
كلهم شافوا لأريج بنظرات مفاجأة..يستنوا فيها تتكلم..
اريج هزت راسها وقالت..
/صح كانوا غادي..
وبدت تحكيلهم ع اللي صار بالتفصيل...
🍃ونجمه تحكي في تفاصيل قصة موت ولدها لمطيره..
ام مكلومه تحكي عن موت فلذة كبدها بألم شديد فطر قلب مطيره من الحزن..
وطوبى لأول مرة تسمع القصه من لسان نجمه..تألمت الم شديد وهي مركزة ع ملامح الالم في وجه نجمه لما تحكي..
ماكانوش هما بس الحاضرات..
بنات نجمه وكناينها وخواتها..يسمعوا ويبكوا..
ومرة مرة يساعدوا فيها فسرد تفاصيل القصه المفجعه..
نجمه ببكي:الله يغفرله ويسامحه ماعندي مانقول غير هكي الله يسامحه الله يسامحه..وحطت يدها ع وجهها وهي تبكي بألم..
واللي حواليها يبكوا معاها...
نزلت يدها وقالت..
/وزادتها طلعة سميرة..شن فيها كان خلوها تكمل عدتها هني هدا حوشها توا قعدت هني قريب عام حرام اللي داروه والله حرام..
مطيره رشفت وقالت بنبرة باكيه..
/هما هكي عقلياتهم شن بديري الله غالب..وابتسام حتى هي روحوا بيها!؟
نجاح:لاابتسام بتكمل عدتها هني غير قاعده في الدور التاني..
استغربت مطيره لكن ماحبتش تسأل..
طوبى:عادي تركبلها عمتي تعزيها؟
مع بعض جاوبوا..
"ايه..عادي"
🍃🍃🍃🍃🍃
ومشوا مطيرة وطوبى ومعاهم نجاح للشقه..
☘اللي كانت فيها نجاة مقعمزة مع صاحبتها وحاطين خديجه ع القرمه..
نجاة:نعاود نحذرك مرة تانيه سكوتها مايريحش..
ابتسام بتعجب..
/علاش بدير ردة فعل؟ اول شي هي مطلقه توا خلاص..تاني شي من قاللكم اصلا اني حاطه في بالي الفكرة هادي ولاهو يبيها!!.
ابتسمت نجاة بمكر وقالت..
/تمام..وان كان هكي حق حطيها في راسك ودخليها في راسه..
ابتسام بضحكه..
/تبي تاخدي بتارك منها بيا اني..
نجاة بضحكه استغراب..
/ثار شني!؟قعدت مرت خوها غصب عنها والوحيده بعد ماطيرت اللعبه اللي جابتها شن نبي اكثر من هكي!!؟
رن جرس الشقه..
ابتسام بصوت عالي..
/ندى ماما تعالي افتحي..
نجاة؛مني زعمه!؟
ابتسام؛مني يعني اكيد حد جاي يعزي..
وتفوت من قدامهم ندى متوجهه لباب الشقه..
نجاة مررت نظرها ع الصالون وقالت..
/كيف متحمله تقعدي في مكان كل شي فيه ع ذوقها هي..شلافطيه للميلون.
ابتسام بضحكه
/بالعكس ذوق خديجه فخم وماتحطش الا ع حاجه الباهيه..
"تفضلوا تفضلوا"
شافوا لمدخل الصالون مع بعض..
خشت نجاح..وخشوا بعدها مطيره وطوبى..
ابتسام شافت بطرف عينها لنجاة..
ومطيره تجاهلت وجودها ومشت لإبتسام تعزي فيها..
طوبى وهي واقفه جنب نجاح شافت لنجاة ع غفله لقتها تشوفلها.. رفعت حواجبها ونزلتهم ببرود وردت نظرها لعمتها وابتسام..
الحركه المستفزة هادي خلت نجاة تنغاظ وتغلي غضبا وحقدا..
فوق ان الحركه جت من عدوتها اللدودة تفكرت انها شافت مختار قبل يدير فيها..وسمعت من اختها قبل عنها وهي توصف في مختار..
"حركة باردة ومستفزة لكن تخوف فيا وين نشوفها"
قعدت بعيونها مع طوبى وهي ماشيه لإبتسام تسلم عليها..
بعدين قعمزت جنبها وهي تشوف لولدها اللي كان راقد في القعماز..
طوبى بإبتسامه..
/ربي يحفظه العسول..
ابتسام:تسلمي..
مطيره:شن حالك ياابتسام..
تنهدت وقالت..
/حال اللي ترملت للمرة التانيه ياخالتي مطيره عازتي كبيره المرة هادي..عبد الفتاح مافيش منه الله يرحمه..
مطيره بأسف..
/الله يرحمه مقدر ومكتوب يابنتي الله غالب..
ابتسام بحسرة..
/زادوا قهرتي صغاري اللي تقزنوا بكري..
شافت نجاح لصغار خوها بألم..
نجاة:جربناها ياابتسام..حتى اني خلاني بتلاته صغار اخرهم كان عمره يوم لما مات بوه..
قامت طوبى عيونها فيها ونجاة شافتلها من فوق لتحت..
مطيره وهي تجاهد بش تعامل نجاة معامله النكرة قالت..
/طيحك الله في عيله باهيه مستحيل يخلوا صغارهم..
نجاح:بوي كان يلقى يقعدوا عنده كلهم..
طوبى:ربي مايحرمهم منه ولايحرمه منهم ويقعدوا ديما في ظله..
شافت لإبتسام وقالت..
/اطمني ع صغارك ياابتسام مادام هادم ماليهم..
نجاح بإبتسامه..
/بارك الله فيك..
مطيره:ماقالت الاالحق..
نجاح؛مانتخيروش عنكم ياخالتي..
طوبى ومطيره..
"تسلمي ..بارك الله فيك"
شافت طوبى لإبتسام وهي تقول..
/الخيره فيما اختاره الله..
حست ابتسام ان طوبى توصللها في رساله..وبعد ماتفكرت الحديث اللي دار بينهم اخر مرة تأكدت من هالشي
هزت راسها وقالت..
/ونعم بالله..
وهدا كله تحت عيون نجاة اللي كانت تشوف وتحلل في كل تفصيل...
*********
نجاة:المراة ياخديجه مش حاطه في بالها شي بكل لكن هديكا الشيطانه تلمحلها بالدوة..
خديجه بإبتسامة متهكمه..
/طيح سعدها ومزالها الغبيه مش مستوعبه اني معاش وليت ع ذمته يدير مايبي شن علاقتي بيه!؟
نجاة؛نفس الدوة قلتها لإبتسام لما قالت خايفه خديجه تاخد مني موقف..
تنهدت خديجه وقالت بلامبالاة مصطنعه..
/يملحوا كلهم مع بعضهم معاش ليا علاقه بيهم ولايعنولي في حاجه..
ع خشة نسرين شافت لأختها وقالت..
/تعالي للدار توا..
ومشت طول..
استغربت خديجه وناضت وراها لحقتها..
نجاة بمكر وتحدي
/والله ماني مروحتها يانسرين قاعده ع قلبك...
🍃"الالبومات هادم فيهم صور للعيله كلها مش غير لحضراتهم"
نسرين؛طلعتي صورهم وبعتيهالهم..
عقدت خديجه حواجبها وقالت..
/غير دقيقه!الجالي وين طاح فيهم الالبومات!؟
نسرين:قال راما جبتهوله..
خديجه بإزدراء..
/الفرخه هادي هطلة زي بوها..
نسرين بنفاد صبر..
/المهم توا عطيني البوم اميمه..
خديجه بملل..
/تلقيهم في الدولات فوسط شنطة زرقا..ومشت طلعت وخلتها ونسرين طول جت لدولاب وفتحاته وطلعت منه الشنطه الزرقاء..
🍃🍃🍃🍃🍃
"انصدمت..انقهرت قلبي تفتفت يافايزة"
فايزة ودموعها ينزلوا..
/لما كنتي في الغيبوبه قبل ليسفروك مشينالك التلاته هدرزنا عليك هدرزة رجعنا بيها الذكريات..رشفت وقالت..عيشه وقتها انهارت وحطت راسها ع صدرك وقعدت تبكي..
سكتت وقعدوا الزوز يبكوا بالعبرة بعدين قالت فايزة..
/شكلها كانت عارفه بمرضها من وقتها..كانت تبي تفضفض..
سدرة ببكي..
/صح اني نتمنى المهدي وقاعد في قلبي زي قبل لكن ويشهد عليا ربي كان رضيت ناخده بعد كل اللي صار ع خاطرها وخاطر صغارها..
فايزة هدت ومسحت دموعها وهي تقول..
/بغض النظر عن كل شي ربي كاتبكم لبعض ياسدرة ارضي لأنه نصيبك اللي قسمه ربي..
سكتت سدره وهي تفكر في كلام فايزة ومازال بين عيونها ملامح محمد ويزن..
🍃🍃🍃🍃🍃
"لاتوا احسن بوين"
عبد القيوم وهو يحط في حبة فيتامين C"الفوار" فطاسة ميه قال..
/الحمد لله..ايه..شن تخبرنا ع المدرسه والناس غادي..
السؤال يبان عادي لكن محمد ليه رأيي اخر ومع هذا جاوب التارقي..
/عادي زي قبل ..
عقد حواجبه وقال..
/مش اليوم توصل المساعدات لباقي العائلات!؟
هز راسه وقال؛ايه صح لكن لما حني جينا كانوا شبه تامين كل شي..
خدي عبد القيوم الطاسه وشرب اللي فيها في مرة..
ومحمد مركز معاه..
حط الطاسه وهو مضيق عيونه بعدين رخاهم وقال..
/من كان غادي غيركم من جماعة الشارع!؟
محمد:مافي حد غيرنا..
هز عبد القيوم راسه بصمت..
ضحك محمد وقال..
/ايه حقه..جت السوريه..
عبد القيوم بتعجب..
/ليش تقول فيها وانت تضحك!؟
محمد بإبتسامة شقية تصنعا..
/شن تحسابني مش زابط!؟ وغمزله بعينه..
غمض عبدالقيوم عيونه وضحك نص ضحكه بعدين وقال بإستغراب..
/راك تقول حتى انت فاهم ان في بيني وبينها شي!؟
رفع محمد حواجبه وقال..
/هو مش اني بس اللي فاهم الدنيا كلها فاهمه هكي!؟
غير عبد القيوم نظره القدام..خدي نفس بعدين قال بإبتسامة جديه..
/تفكير الناس هنا غريب واجد..شافله وقال..شن اللي شافوه بش يفهموا اللي انت فهمته..انت بحد ذاتك شن شفت!؟
سكت محمد وفي نفسه يقول..
"اني سمعت اللي ماحد يعرفه"
اشر عليه وقال..
/اها..ماعندك ماتقول..عقولكم متبرمجه ع شي تخليكم تفسروا تفسيرات غلط في غلط..
محمد:تمام..حني تفكيرنا غلط..لكن اللي ملاحظه عليك ماتقدرش تنكره..انت تحب ياتارقي..
نزل عبد القيوم يده وقال بضحكه يخفي بيها ارتباكه..
/كنك انت اليوم!؟
تنهد وقال..
/شي نهدرز عادي..اني معتبرك صديق..
عبد القيوم بإبتسامه..
/وانا نفس الشي بس فرق العمر يحط لهالصداقه حدود في اماكن معينه..
محمد؛اولا اني مش صغير..تانيا صداقتك ببوي وعمي ربيع قويه وفرق العمر بينكم كبير هلبه..
عبد القيوم..
/في فرق..انا حاليا في عمر يخليني متقارب معاهم في حاجات واجده..
محمد بإبتسامه..
/بالعقل ياتارقي مش بالرقم..ع العموم واضح انت تحاول طلعنا من الموضوع الاصلي لهدا بنوفر عليك ونسكره بروحي..
ضحك عبد القيوم من قلبه..
ومحمد قاله وهو مبتسم..
/خل نمشي نجيبلك عشاك..
ناض ومشي طلع من حداه وخلاه يقول بضحكه..
/ياوالله عليك محمد وخلاص..
سمع باب الشقه انفتح وتسكر خفت الضحكه بعدين قال..
/كأنه يلمح لشي!؟ فتح عيونه ع وسعهم بخوف وناض طول مشي للدار اللي في لوحاته..
وصل فيها ولما جي بيفتحها مافتحتش..تنفس براحه وقال..
/مش ناسيها مفتوحه..عقد حواجبه وقال بتفكير..لكن هو واضح يلمح ع شي!؟...يالاحظ عليك شي..سكت شويه وقال..اكيد فسر اللي صار يومها هالتفسير..تأفف وقال..وليت مفضوح ياعبد القيوم خلاص..لازم دير شي لازم تتصرف وماتخلي حد يفهمك غلط..بدت ع وجهه ملامح الضيق وهو يقول..ولاقصة سلافه هذي لاحول ولاقوة الا بالله وخلاص..
طلق مقبض بعصبيه ومشي لدار المعيشه...
🍃🍃🍃🍃🍃
والاجواء الحلوة في حوش غرفه طلعت سدرة من الكدر لكن ماقدرتش تخلي طوبى من داخل منسجمه معاهم عكس مايبان عليها..
غدوة موعد لقاء الجالي ببنته وكل مايقرب يوم الخميس من نهايته هي تزيد تتوتر وتخاف...
🍃🍃🍃🍃
ويجي يوم الجمعه...
وتعدي ساعات اول النهار بسرعه ويجي وقت الزيارة..
المرة هادي مشت مغليه مع ولادها الجالي والمهدي..
سبقوا في جيتهم لنسرين طوبى وسدرة..
قعمزت مغليه مع ولادها ونسيبها في المربوعه..ونسرين بعد مااستقبلت طوبى وسدرة ومعاهم جنة قعمزتهم في دار المعيشه وخدت جنه طلعت بيها للمربوعه..
🍃زفرت طوبى بقوة من الخوف وهي تسمع في صوت الجالي يلاعب في جنه وسدرة مركزة ليها..
"يانجي بنية حناها ياكبر بنية حناها"..
بدت ع وجوههم ملامح الازدراء وهما يسمعوا في غني مغليه..
ع خشة نسرين بسفرة الضيافه...
ضيفت سدرة..بعدين طوبى وقعمزت..
سدرة؛الالبوم وين!؟
نسرين؛شويه ونجيبه..
طوبى:شن يدير قاعد عند اختك!؟
نسرين:فيه صور العيله هدا علاش قعد عندها..
سدرة:طلعت صورهم وبعتتهم مش تعطيهم لخوها اللي اكيد ملا عيونه منهم..
نسرين بضيق..
/الجالي خلاص ياسدرة معاش في باله شي بكل..
طوبى:في باله شي ولالا نبهيه هالمرة لو جرب يلعب حندير فيه شي عقله مايستوعباش..
سدرة؛لاعب من قبل هو!؟
نسرين شافت لطوبى بقلق..وطوبى قالت لسدره..
/واللي داره فيا مش لعب ياسدرة!؟
حكت سدرة مقدمة انفها بعصبيه والتزمت الصمت..
وطوبى غيرت نظرها عنها وبدت تشرب في العصير..
🍃وانتهي وقت الزيارة ع خير وارتاحت طوبى من حالة القلق اللي كانت ملازمتها يوم كامل..
🍃🍃🍃🍃
بعد ماروحوا للحوش لقوا اميمه تستنى فيهم عطتها طوبى الالبوم وبعد ماهدرزوا شويه روحت...
ويخش عليهم وقت صلاة المغرب..
بعد الصلاة كانت سدرة ناويه تمشي لحوش جدها بش تحكي معاه في موضوع المهدي..
🍃"خليني نمشي معاك"
سدرة بنفاد صبر..
/مش لازم ياطوبى قتلك خلاص..لفت شاربتها ع رقبتها وطلعت...
سكرت طوبى الباب وهي تقول بقلق..
/يارب يسر ولاتعسر..
جتها اريج وهي تقول بأسف..
/متوقعه يعفس فيها..
طوبى برجاء..
/يارب لا..يارب..
اريج؛إن شاء الله خير..تعالي ..
تنهدت طوبى وكيف جت بتمشي دق الباب..شافت لأريج بإستغراب بعدين لفت للباب وفتحاته..
لقت قدامها صفيه وهاديه واميمه..
طوبى بقلق:خيركم!؟.
صفيه بضحكه..
/جدك لزنا..
اميمه وهي ضامه نفسها
/جمدنا راهو..
وخرت ع الباب وقالت..
/خشوا خشوا..وعقلها يفكر بإستغراب في تصرف جدها..
خشوا التلاته وهما يهدرزوا واريج معاهم..
وطوبى بعد ماسكرت الباب مشت للكوجينه وعقلها مازال يفكر...
🍃🍃🍃🍃🍃
وفي نفس الوقت..
كان المهدي مقعمز مع بنته سدرة في دارها تكلم معاها في الموضوع بروحها بش يعرف موقفها الحقيقي بدون مايكون في ضغط عليها من خوتها..
سدرة بإبتسامه..
/باهي نسألك اني..انت لو خديت خالتي سدرة تفرح؟
غير المهدي نظرها عنها وضحك بإحراج وهو يقول..
/مش مهم اني المهم انتي..
سدرة بضحكه؛بابا وجهك ولى احمر..
فنص فيها وهو يقول..
/تحشمي!
ضحكت وقالت..
/موافقه يابابا موافقه..
المهدي:من قلبك؟
سدرة :من صمصوم قلبي لكن بشرط ترفعني اني نخطبهالك حناي مستحيل تمشي..
رفع حواجبه بتعجب وهو يشوفلها..
وهي تضحك ع ردة فعله...
🍃وفي حوش طوبى..
كلهم كانوا ملتمين في الدار يتفرجوا ع اخبار الوباء الجديد ويعلقوا عليها..ماعدا طوبى اللي كان عقلها مشغول بتوقع ردة فعل جدها.. فاتت ساعة ع سدرة وهي غادي وكل ماتطول المده قلق طوبى يزيد..
بعد عدت ربع ساعه فوق الساعه..سمعوا باب الحوش انفتح وتسكر..
طوبى بقلق..
/يارب..يارب..
واللي حواليها يشوفوا لحالتها كلهم ماعدا اريج مستغربين منها..علاش لهالدرجة تبي سدرة والمهدي يتزوجوا!؟
وتخش عليهم سدرة واثار البكي واضحه ع وجهها..
طوبى بضيق:قال لا!؟
جتها سدرة قعمزت جنبها وضمتها لحضنها وهي تقول..
/قال باهي..
ضحكت طوبى بفرح وهي تقول..
/الحمد لله..معناها هادم دموع الفرح..
ابتسمت سدرة وهي تهز في راسها بإيجاب..
صفيه بضحكه؛باهي ربي يكمل ع خير..
اميمه بإبتسامه:ربي يهنيكم ان شاء الله..
اريج؛مبارك خويله..
سدرة بضحكه؛خل يولد ويسموه..
طوبى؛خلاص تم مادام الواعر الكبير وافق تم..
ضحكت سدرة وزادت ضمتها .
وهاديه تشوف لسدرة بصمت ملامح وجهها ماريحتهاش احساسها قاللها ان الدموع اللي تشوف فيهم فعيونها مش دموع فرح..
رسمت ع وجهها ابتسامه وقالت..
/مش قتلك جايك..
ضحكوا وطوبى قالت..
/واني من وقتها تأكدت خلاص انتي ملهمه ياهويديه..
هاديه؛وهادي حاجه باهيه ولاكيه ياكبدي!؟
ضحكوا عليها وطوبى قالت بإبتسامه..
/باهيه باهيه...
🍃🍃🍃🍃🍃🍃
بعد صلاة العشاء..
طلعوا المصلين من الجامع..
المهدي كان ماشي مع بوه وهما يتكلموا عن امور تخص الخدمه وعيون علي الواعر تراقب فيه
وقف قدام الجامع ومازالوا عيونه عليه ووضعه هدا لفت انتباه بعض الموجودين زي عبد القيوم وربيع ونضال ومحمد ولد المهدي..وهوالوحيد اللي كان شبه عارف السبب..
وصلوا المهدي وبوه للسيارة..بنظرة عابرة شاف المهدي لعلي الواعر انتبه انه يشوفله..
قعد واقف ع الباب يشوفله..اشرله علي الواعر يجيه..
اللي يراقبوا في المشهد استغربوا واكثرهم محمد شنيبه..
مشي المهدي طول لعلي الواعر..
وصل فيه وقال..
/السلام عليكم..
علي:وعليكم السلام..نبي نتمشى معاك للحوش..
هز المهدي راسه وقال..
/حاضر..التفت لنضال واشرله ع السيارة..
فهم عليه نضال ومشي لسيارة خوه..
وصل فيها فتح الباب وقال لبوه..
/هيا بوي..
ركب محمد شنيبه للسيارة ومازال يلحق بعيونه في ولده وعلي الواعر وهما ماشيين مع بعض..
شاف لنضال وقال..
/شن يبي منه زعمة!؟
نضال مط شفايفه للأسفل وقال..
/مش عارف..
وشغل السيارة وتحرك ..فاتت سيارتهم من قدام عبد القيوم وربيع ومحمد وهما ماشين مع بعض لسيارة عبد القيوم..
ربيع؛يعني ماتعرفش في شن يبيه!؟
عبد القيوم؛حتى لو كان يعرف مفروض يقول!؟
ابتسم محمد وركب من الخلف...
ربيع بضحكه:نبي نعرف شن الحب اللي نزل ع المهدي الفترة الاخيره..
عبد القيوم:اركب اركب..
ضحك ربيع وركب القدام وعبد القيوم مشي بيركب وبينه وبين نفسه كان يدور نفس السؤال..
شن في بين المهدي وعلي الواعر هالمرة !؟
وهل اللي بينهم حتى هو يخص طوبى!!؟...
🍃🍃🍃
"منين جاتك الشجاعه اللي خلاتك ترجع تطلب سدرة بعد اللي صار بينا وبينكم"
السؤال كان صعب ع المهدي..صعب من ناحية الطريقه اللي انقال بيها..
لكن اجابته ماكانتش صعبه عليه بكل ثقة جاوب وهو يقول..
/كلامك ياحاج..كلامك يومها..انت أمنتني ع طوبى مش بس ع بنت خوي والحاجه هادي بينتلي الثقه اللي ولت عندك فيا..تاني شي زي مايقولوا ياحاج كل يد تمسح ع وجهها هما اهلي مش ناكرهم ولااني طالع منهم لكن فعلهم ماكنتش راضيه وياما وقفت قدامه..
علي:نقولك ع حاجه تستغربها..
عقد المهدي حواجبه وقال..
/قول..
تنهد وقاله..
/مع اللي صار من مشاكل بيناو بينكم محصتكم قدامي واحد واحد..عرفت انك اكثر واحد في عيلتكم جمليه..تستحق الاحترام تعرف علاش؟
المهدي وهو مبتسم قال..
/علاش!؟
علي:لانك قعدت ساند ماليك في كل وقت ماخليتهمش بكل ماناصرتهمش ع الغلط صح لكن مافي شي خلاك تسيبهم كنت كبيرهم حق..ابتسم بألم وقال..
"ياريت صاحبك جاب منك الربع"
تبدلت ملامح ابتسامة المهدي للأسف وقعد محتفظ بصمته..
حمحم علي وقال..
/ماعنديش مشكله ياولدي نعطيك سدرة واني مرتاح..
بانت فرحة المهدي في عيونه لكن ع قد مايقدر سيطر ع نفسه حتى الابتسامه خلاها خفيفه..
علي:الامر توا بيد صاحبة الشان تبي تاخد وقتها في التفكير..
هز راسه وقال..
/حقها..ولو ماصارش نصيب حتى المرة هادي مش حيتغير شي ياحاج..
هز علي راسه بصمت..
وقعدوا يمشوا مع بعض وكل واحد فيهم كان كابت في داخله مجموعه مشاعر..كل منهم مشاعره مناقضة للتاني..
قبل ليوصلوا للشارع قال الحاج علي للمهدي..
/بنخش ناخد خبيزات شعير..
ضحك وقال..
/حتى اني بناخد معاش ناكل الا فيها..
ابتسم علي الواعر ابتسامه خفيفه وكمل طريقه مع المهدي للكوشه اللي يملكها عم مؤيد وكان يخدم فيها محمد.
مؤيد كان موجود في الكوشه وقتها..
هو وعمه لما شافوهم خاشين مع بعض يهدرزوا ويضحكوا استغربوا..!
الشارع كله عارف من سنين طويله ان الحاج علي مايقبلش المهدي واللي يشوفوا فيه توا يبين ان الحال تغير...
خدوا الخبزة وطلعوا مع بعض ومازال يهدرزوا..
عم مؤيد قال..
/سبحان الله مافي شي يقعد ع حاله..
مؤيد وهو يسمع في عمه شن يقول فكر يمشي لصاحبه ويفهم منه...
.******
محمد بإبتسامه..
/شكله بوي بيصيرله من اللي تمناه سنين طويله..
ابتسم مؤيد فرحا وقال..
/باهي الحمد لله اهو ارتاح بالك ع بوك..
تنهد وقال..
/ع بوي ايه..لكن..غير نظره لروشن شقة فايزة..
مؤيد؛خلاص ياصاحبي انسى..
شافله وقال..
/شن تحكيلك صاحبتها؟
مؤيد؛اللي حكتهولي هو اللي خلاني نقولك انسى..
بلع محمد ريقه وتظاهر بالمكابرة وهو يقول..
/مش مهم..قولي بتقعد تشرب حاجه ولابتروح..
مؤيد؛لامروح..ماتبي شي؟
محمد؛سلامتك ياغالي..
ابتسم مؤيد ومشي وهو يقول..
/اوينا..
قعد محمد بعيونه وهو يشوفله بنظرات غبطه..
☘غبطه اللي قدر يحافظ عن البنت اللي يحبها واثبتلها صدقه لما وقف معاها في أصعب الظروف وحاليا ناوي يعطي فيها كلمه وهو اللي كان مخطط يدير الشي هدا من ايام كان يقرا في المدرسه بسبب لحظه غباء ولت خططه واحلامه في مهب الريح☘
🍃🍃🍃🍃🍃
الساعه 11:00ليلا..
كانت طوبى في دار البنات رقدت بنتها وغطتها كويس..عدلت الدفاية ومشت خدت تليفونها وقعمزت ع السرير..
حطت ع رقم زينب واتصلت بيها بعد مانادى مرتين ردت.
"السلام عليكم طوبى"
طوبى بإبتسامه:وعليكم السلام معلمتي كيف حالك وحال العيله..
"الحمد لله كلنا بخير انتم شن حالكم"
طوبى:الحمد لله في خيار الخير..
"صوتك فيه نبرة فرح الله يبارك"
ردت عليها بضحكه..
/عن قريب ان شاء الله نبشرك بأخبار حلوة..
"الله يبارك الله يبارك..تخصك انتي؟"
طوبى:في العيله..
"اها باهي ربي ييسر ان شاء الله وتبشرينا.."
طوبى:آمين..غدوة بإذن الله جاياتك المدرسه بنسمع عليك الجزء..
"واخيرا..بنقولك طوبى قصرتي شويه في الحفظ"
حكت طوبى رقبتها من الخلف وهي تقول..
/غصب عني انشغلت بهلبه حاجات..
"معذورة لكن بننصحك نصيحه ردي بالك تخلي شي يوقفك عن حفظ القرآن مافي شي فالدنيا يغنيك عن النعمه هادي"
ابتسمت طوبى وقالت..
/مستحيل..إن شاء الله مستمرة ومش حنوقف لاخر نفس..
"قولي لأخر سورة إن شاء الله"
طوبى بضحكه:تحسمت شويه..
ضحكت زينب وقالت..
"خلاص بإذن الله نتلاقوا غدوة"
طوبى:بإذن الله..تصبحي ع خير..السلام عليكم..
"وانتي من اهله..وعليك السلام"..
ومجرد مانهت المكالمه حطت تليفونها ع السرير وناضت للرف المحطوط عليه المصحف الخاص بالحفظ والمذكرة..
وولت قعمزت ع السرير وبدت تراجع في الجزء قراءة وكتابه..
🍃واللي معاها في الحوش..
اريج في دار المعيشه لاهيه بالأخبار عن الوباء الجديد وقلبها واكلها من الخوف ع امها وخوتها..
وجنبها خالتها متكيه ع الفراش لكن كانت في عالم تاني..
☘هالليله مرت ع المهدي وهو في اسعد حالاته..
المهدي ليه سنين طويل ماحسش بالسعاده اللي حسها الليله..
وكأنه كان محبوس في بير مظلم وحيد مستوحش فاقد طعم الحياة وتوا طلعوه منه...
بعد ماعاش ليالي مش قادر يرقد من الهم والحزن..
الليله مش قادر يرقد من السعاده..
🍃عكسه خوه الصغير اللي ليه فترة ضايقه بيه وقلبه مغموم..
امه ماتبيش تشوف في وجهه...حاول يرضيها اكثر من مرة رفضاته..وين يخش هو لمكان تطلع منه...
ع خاطرها ذل نفسه ومشي لأخته بش يرضيها وللأسف خديجه موقفها كان اسوأ من موقف امها..
وامها كل ماتشوفها زعلانه ومقهورة يزيد زعلها عليها وع خاطرها..
وهالوضع كانت تراقب فيه سميرة لكن من سكات واجعها قلبها على نضال وع قد ماتقدر كانت تحاول تغيرله جوه وهو يساير فيها مسايرة...
🍃سميرة:هاه شن رايك فيها؟
نضال؛الله يبارك اطلع طول..
ابتسمت سميرة وغطت سطل الدبله وهي تقول..
/ترا توكل خل نعرف وين ندسها..
ضحك ومشي طلع وقف حدا الباب وبين راسه..
والجالي نازل من الدروج شافه كيف واقف استغرب وصل ومشاله حط يده ع كتفه حولها نضال وهو مركز..
زاد استغرب ووقف معاه وبين راسه حتى هو..
شاف سميرة واقفه دور بعيونها في الكوجينه وقدامها ع الطاوله سطل اصفر..
وخر الجالي وقال همسا...
/شن فيه السطل!؟
نضال بنفس الهمس..
/دبله..
عيون الجالي لمعوا ورجع بين راسه..
فهاللحظه شافتهم سميرة وخروا طول..
سميرة:جيتكم جيتكم حي عليكم حي..
نضال ركب يجري وهو يضحك..والجالي يشوفله وهو يضحك في التعجب..
"ان شاء الله انت!؟"
التفت شافلها وهو رافع حواجبه..
سميرة وهي تشوفله من فوق لتحت
/والله مانحسابهم الا العويله الصغار..
وولت خشت الكوجينه وسكرت الباب..
رفع حاجبه وقال..
/تو نوريك المعيله ع اصولها..ومشي لدار المعيشه..
☘قعمز هدرز مع مرته وامه واخته للساعة واحد..
ناضوا امه واخته لديارهم بش يرقدوا وهو قال لنجاة..
/باتي هني مع الصغار عندي خدمه نبي نكمله..
نجاة:لالا نمشي نبات في الشقه براحتي غير ارفع معاي معاذ..
الجالي:تمام...
☘وروح بنجاة والصغار للشقه ورجع طول لحوش بوه...
ركب للجناح وسكره عليه..شغل الاضويه المخفيه ومشي للاب توب فتحه وشغل اغنيته الايطاليه..
قرب من صورة طوبى..وقف قدامها وبدي يسمع في كلمات الاغنيه ويهيم معاها..
حط يدها ع خدها في الصورة وغمض عيونه وبدي يتخيل فيها معاه وعاش في عالم الوهم اللي يرتاح قلبه فيه...
ومن قوة الانسجام بدي يغني مع الاغنيه..
🍃والصوت واصل لجاره..او غريمه عبد القيوم اللي كان مقعمز في الدار يشتغل ع لوحة طلبها منه زميل في العمل..
رفع عيونه وشاف للباب الفيرندا بإمتعاض..
رد عيونه للوحه وحاول يشغل نفسه بيها..لكن صوت الجالي اصر يطلع من جو الكتابه..تأفف بعدين استغفر وناض باللوحه والادوات وطلع من الدار..
🍃تمت الاغنيه..
فتح الجالي عيونه ورجع للواقع المر بالنسبه..حياة من غير طوبى..
نزلوا دموعه طول مسحهم وخاطب صورتها وهو يقول..
/رادك لحياتي رادك ياطوبى..اصلا مرجوعك ليا اني راجلك بس اني وبو بنتك..عقد حواجبه بغضب وغيرة وهو يقول..مش مخلي حد ياخدك مني..لاهداكا المليشاوي ولاالمحامي ولا غيرهم انتي للجالي وبس..رفع حاجبه وقال..بعدين تعالي جاي قوليلي علاش الزفت التارقي حامى عليك!!؟ قولي!
غمض عيونه بغضب وهو يتنهد بعصبيه بعدين فتحهم وقال..هذا بالذات حسابه زاد عندي هلبه...ياويله مني ياويله...
🍃🍃🍃🍃🍃
ويروح الليل ويجي الصبح..
وطوبى مع الساعه عشرة كانت في المدرسة السلفيه اللي تخدم فيها زينب..
قعمزوا مع بعض في حجرة المدرسات ع الانفراد وبدت تسمع عليها لين كملت..
زينب بإبتسامه؛احسنتي جزاك الله خير..
طوبى بإبتسامه؛وإياك..
زينب:حاول ع قد ماتقدري تكملي حفظ السورة هادي بداية الشهر الجاي ان شاء الله..
طوبى:بإذن الله..
زينب:ايه..شن تخبرينا..استاذة سدرة شن حالها؟!
طوبى:الحمد لله احسن من قبل بوين.
زينب:معاش تبي جلسات عند الدكتورة؟
طوبى؛معاش طلبتها وبصراحه حسيتها معاش محتاجتها..
زينب:وان شاء الله معاش تحتاجها..
طوبى من قلبها..
/آمين..
زينب:طوبى علاش رفضتي خوي!؟
ابتسمت طوبى بأسف وقالت.
/مش لعيب فيه..اني اللي مانصلحش بيه..
زينب:كان ع قصة حضانة بنتك..
قاطعتها وقالت..
/مش بس لهالسبب..ابله زينب اللي صار فيا مش مدرق عليك اني لتوا مش قادرة نتخطا ومراة حالتها زي حالتي مش حتقدر تخلي الراجل اللي تاخده بعدين يعيش متهني صدقيني..
زينب بحزن:علاش تقولي ع روحك هكي يابنتي!؟
طوبى بإبتسامه تحاول تخفي بيها ألمها..
/لأني الادرى بنفسي..خلي خوك يشوف حياته مع غيري اني والله مانصلح بيه..
🍃🍃🍃🍃
طلعت من المدرسه وهي شادة دموعها بقوة..ومااطلقتش سراحهم الا في السيارة بكت بصمت لكن بألم رهيب..
وفي عز حزنها جتها رغبه تمشي للمدرسه وتقعد مع الصغار شويه..
قبل لتوصل غادي خدت بوكسات كيكات من انواع مختلفه بش تخش بيهم عليهم..
🍃لما وصلت بسيارتها غادي شافت مجموعه لابسين صاعقه متوزعين ع طول السور وزوز سيارات مصفحات قدامها..
نزلت من السيارة وهي تشوفلهم بإستغراب وخوف..
"تفضلي ياابله"..
التفتت شافت ايمن واقف يشوفلها وهو يأشر بيده ع البوابه.
نزلت عيونها ومشت خشت طول وهو بعيونه معاها..
********
"بعد شويه بتوصل سيارة مواد غذائيه متبرع بيهم فاعل خير"
طوبى:فاعل خير!؟
شروق:ايه ماباش يعطي اسمه ومش هدا بس خودي هادي..قال بيتبرع بزوز كارفنات..
طوبى بدهشه:كارفنات!؟
شروق:ايه ينحطوا في الساحه الخلفيه ونجيبوا فيهم العيلتين اللي حكيتلك عنهم قبل..
طوبى وهي متعجبه..
/من هو هدا!؟
شروق:قتلك فاعل خير..
سكتت طوبى وهي تشوف للبوابه..ويبدا القلب يقصف ويرعد لما تشوفه خاش وهو بكامل اناقته ومدرق عيونه بنظاراته العسليه..
كالعاده الوان لبسه غامقه..جاكيت وسروال لونهم ازرق كحلي وتحت الجاكيت فانيليه "كنزة" سوداء رقبتها طويله وفوقهم بالطو اسود..وفي رجليه هالمرة كندرة عاديه..
☘هربت بعيونها عنه وقالت وهي تحاول تخفي ارتباكها..
/راكبه فوق..
شروق:غير راجي فاعل الخير اللي قتلك عليه تواصل مع الاستاذ عبد القيوم..
شافتلها بإستغراب وهي تهز فراسها بإيجاب ومشت خشت داخل..
☘هو من اول ماخش جو عيونه عليها قلبه فرفح وكل شي فيه انتعش..شافها وهي خاشه بسرعه عرفها هاربة منه ابتسم..
وصل في شروق وقال..
/السلام عليكم.
شروق بإبتسامه..
/وعليكم السلام استاذ كيف حالك اليوم..
عبد القيوم:الحمد لله احسن..
شروق:لاباس عليك..
عبد القيوم:لايوريك باس..استاذ فتحي جا..
شروق؛ايه..تلقاه في الساحه الخلفيه مع جماعة من المتطوعين وسكان المنطقه..
مشي وهو يقول..
/شكرا..
شروق تبعاته بعيونها بعدين قالت بإبتسامه..
/يطيح عشرة من سلافه الله يبارك..ضحكت ومشت خشت داخل..
🍃🍃🍃🍃🍃
وقضت طوبى احلى ساعه مع الصغار دوشتهم ضحكاتهم وحكاويهم نستها همومها..
بعد الساعه طلعت من حداهم للساحه بش بتشوف شاحنة المواد الغذائيه..
وقفت بعيد وهي تشوف فيهم كيف ينزلوا في البضاعه..
وهي تراقب في الوضع جو عيونه عليه كان واقف يكلم واحد ويأشرله ع الشاحنه..
ع جية ولد صغير وقف جنبه وطبطب ع رجله..هو شافه ضحك بعدين خداه ورفعه في حضنه وكمل كلامه مع الراجل..
ابتسمت لما شاف الولد حاط يده ع نظاراته هو شافله كلمه والضحكه ع وجهه بعدين حولهم ولبسهوله..
قلبها كان يدق بقوة..حاساته بيطلع منها ويمشيله..
خافت ع نفسها من قوة مشاعرها وامعانها بالنظر فيه..
نزلت عيونها واستغفرت سرا..بعدين رجعت لهت بالبضاعه..
**********
طوبى:خل نسجلوا اللي يحتاجوه من توا بش لما يجوا يلقوه قعمزت ورا طاوله وفي يدها ورقه وبيرو"قلم حبر"
وحده من المتطوعات قالت..
/اني عقلي مع الوباء اللي طلع كيف بيصير فيهم لو وصل فينا..
سكتت طوبى وهي تفكر في كلامها بعدين قالت..
/يصير خير ان شاء الله..يصير خير..هي سمي الحاجات..
وبدت المتطوعه تسميلها وهي تكتب لعند ماكملت..
فجأه سمعوا صوت وحده تعيط..
طوبى بفجعه؛يالطيف..
ناضت ومشت هي والبنت اللي معاها بسرعه لمصدر الصوت..
خشوا للممر اللي جايه منه الصوت..
لقوا وحده حامل شادها راجلها وحواليها زوز نساوين يساعدوا فيها ويحاولوا يهدوها..
:شكلها حالة ولاده..
قعدت طوبى معاهم بعيونها لين فاتوا من قدامهم بعدين لحقوهم...
🍃طلعوا للساحه والراجل يقول وهو مرتبك..
/حد يوقفلنا تاكسي ع رحمة والديكم..
طوبى طلعت مفتاح سيارتها من جيب الجلابيه وقالت..
/تفضلي يااختي سيارتي قدام المدرسه كيا سودا..
كيف جت المراة بتاخد المفتاح..
"مش لازم هذى مفتاح سيارتي قريبه"
الراجل خدي المفتاح من عبد القيوم وقاله..
/بارك الله فيك..
اشرله ع مكانها وهو يقوله..
/ السودا العاليه..
شافلها الراجل ومشي بمرته اللي كانت تأن بصوت منحفض ومعاها النساوين للسيارة..
طوبى شافت لعبد القيوم بطرف عينها بعدين مشت خشت داخل...
وهو ماباش يلتفت ويشوفها بش مايلفتش الانتباه..
قعد مع الراجل وعيلته بعيونه لين ركبوا السيارة وطلعوا..
🍃طوبى لما خشت كانت مرتبكه ومعصبه في نفس الوقت
مشت طول للمكتب خشتله وسكراته عليها..
🍃🍃🍃🍃🍃
"نبيك تساعديني"
"كيف!؟"
عبد القيوم بإبتسامه..
/ماتسأليش واجد..دوري معاي دوري..
هبة الله؛على مني!؟
عبد القيوم؛ابله طوبى ياسمحه..
هي قالت:اه..باهي..
وقعدوا يمشوا وهما يدوروا لين وصلوا في الطاوله اللي كانت مقعمزة فيها..
شاف عليها..حول نظاراته حطهم جنبها وقعد يقرا في المكتوب عليها..عجبه الخط..كان جميل..
هبة الله:مهناش هاه..خليني نمشي نلعب ..
ضحك وقال:عدي..
هبة الله؛تعالى معاي وصلني..
ضحك وقال؛تعالي ياخوافه تعالي..
ومشت وهو معاها بش يطلعوا للساحه...
🍃في هالوقت هي طلعت من مكتبها وكانت تتكلم هاتفيا..
طوبى:لاخلاص قعدت حاجة نكملها ونروح..
"ردي بالك ع روحك"
طوبى:حاضر..سلام..
"سلام"
نهت المكالمه وهي تقول..
/اكيد نسيتها في نفس المكان..
ومشت ولت للطاوله اللي كانت مقعمزة وراها بش تجيب الورقة اللي نستها...
وين وصلت فيها خدت الورقه لكن قعدت واقفه في مكانها وهي تشوف لنظاراته المحطوطات ع نفس الطاوله..
بدت ع وجهها ابتسامه خفيفه وهي تتفكر لما شافاته يلبس فيها لواحد من الصغار...
☘هو في هاللحظه كان جاي بياخد النظارة..
وقف في مكانه لما شاف النظاره في يدها..شادتها وتشوفلها..
دقات قلبه كانت متسارعه لدرجه حس انه سمع صوتهم..
☘هي ردت النظارة وحطتها بالزبط زي ماكانت..
بعدين ضمت ليها الورقه والتفتت..
هو ادرق طول..
وهي مشت في طريقها بدون ماتحس بوجوده..
قدم راسه القدام مالقاهاش..
مشي بسرعه للطاوله..
هي وين وصلت اخر الممر التفتت..
شافاته ياخد في نظارته ومشي..قعدت معاه بعيونها لين اختفي..تنهدت تنهيده مكتومه وعيونها مليانات دموع بعدين مشت في طريقها...
🍃🍃🍃🍃
وسلمت الورقه للمتطوعه اللي كانت معاها ومشت بتطلع من المدرسه..
وهي ماشيه شافت للبنات وهما يلعبوا في الساحه ابتسمت..
غيرت نظرها عنهم جو عليه وهو يتكلم بالتليفون..
ارتبكت كالعاده ومعاش ركزت في شي وتعتر في كورة صغيرة كانوا يلعبوا بيها الصغار في الساحه وتجي طايحه ع ركبتها..
توجعت بقوة وطلعت منها آهة وجع..
جتها البنت اللي كانت معاها تجري..
وهو بفجعه نزل التليفون وجاها طول وهو يشوف للبنت كيف تساعد فيها ع الوقوف وهي تتوجع..
عبد القيوم بألم..
/بشويش عليها بشويش..طوبى ع شن طحتي ؟
طوبى بألم:ركبتي..
المتطوعه قالت؛تعالي معاي للمستوصف..
عبد القيوم؛تقولك ركبتي كيف بتمشي من هنا لغادي!؟
طوبى وهي محرجه ومرتبكه..
/لاعادي نقدر نمشي ساعديني شويه نطلع برا..
عبد القيوم بقلق؛كيف بتسوقي سيارة وانتي هكي!؟
ماردتش عليه كانت خجلانه ع الاخر..
البنت اللي معاها قالت..
/احسن شي نروح بيك وانتي بعدين تبعتي حد يروحلك بسيارتك..
طوبى:لالا مش لهالدرجه اني نسوقها ونروح عادي ..
:تمام ع راحتك..
ومشت بيها البنت للباب..وهو وراهم بمسافه وكله خوف عليها..
تمنى لو هو يقدر يروح بيها..هو حتى سيارته مش معاه بش يلحقها..
🍃ركبت طوبى سيارتها شغلتها وتحركت وهو بعيونه معاها اللي كلهم نظرات قلق معاها لين اختفت عن نظره...
🍃🍃🍃🍃🍃🍃
"اهو المسادجو"
خدت طوبى المسادجو من سدرة..
سدرة وهي تشوف لركبتها قالت..
/باهي مش منفوخه هلبه..
اريج بضحكه؛لكن تخيلتك كيف طحتي..
طوبى بإحراج؛قدام امة لاإله الا الله..
سدرة وهي شاده ضحكتها..
/عادي تصير في ارقى العائلات..
قامت طوبى عيونها فيها وقالت .
/اضحكي اضحكي..
ضحكت واريج تضحك معاها..
"بنات"
سدرة بصوت عالي..
/هني في الدار..
شويه وخشت عليهم اميمه شافت حالة طوبى قالت..
/جيت بش نسأل عليك..
طوبى:من قالك؟
اميمه:التارقي قال لجدي .. سدرة بإستغراب..
/كان غادي!؟
طوبى وهي تشوف لركبتها قالت بخجل..
/طحت قدامه..
تبادلوا نظرات الضيق بين بعض بعدين شافتلها سدرة وقالت..
/خليك متكيه ماتتحركيش اني نرد بالي منها جنونه..
طوبى؛باهي جيبولي وايبس..
اريج؛حاضر..وناضت طلعت من حداهم..
اميمه؛خل نمشي نطمن جدي يراجي فيا..
ومشت حتى هي..
سدرة شافت لطوبى بعدين مسحت بيدها ع شعرها..
ابتسمت طوبى وقالت..
/عادي ماصار شي...🍃
🍃🍃🍃🍃🍃
بعد العصر..
في حوش شنيبه..
كانوا خوات سميرة جايات زيارة لأختهم استقبلتهم في الصاله وهدزروا شويه بعدين ناضت بتجيبلهم الضيافه اللي كانت مجهزة ماعينها مسبقا..
وين جت للمكان اللي مدرقه فيه سطل الدبله..
طلعاته منه وفتحت السطل وتشهق بصدمه..
مالقتش فيها غير طرفين من اصل عشرين طرف..
سميرة بصدمه:مايديرهاش نضال حتى كان بياخد مش اكثر من طرف..سكتت شويه وقالت..ومن غيره وجه البرطالامبه لكن باهي..بااهي..
🍃🍃🍃🍃🍃
وسرقه وحده مهما كانت صغيره ولاكبيره..سرقه حلويات ولاسرقه فلوس..يقعد اسمها سرقه..
اما الادمان عليها فهو كارثه كبير علاجها صعب...
وهذا اللي صار مع ولد خديجه اللي انتقل لحوش ارضي مع بوه من يومين..
بالصدفه طاحت عينه ع خزنة بوه في دار النوم ومن لما شافها وهو يقاوم في ادمانه..
خصوصا وان الفترة يبي فلوس بش يصرفهم ع طلعاته هو وصحاب السوء..
"محمد انزل سكر الباب"
نزل من السيارة ومشي بيسكر بوابة الحوش..
وبوه مشغول بمكالمة خدمه..
ع جيته ركب جنبه وهو يسمع فيه يقول..
"تقريبا الاسبوع الجاي بنمشي غادي مرات نقعد تلاته ايام..باهي باهي..ان شاء الله..اجرنا واجرك ياخوي بارك فيك..ونهي المكالمه..
شغل السيارة وقال..
/سكرت الباب كويس..
محمد؛ايه..نسمع فيه فيك تقول بتمشي السبوع الجاي..وين؟
محي الدين:مش أكيد لما نتأكد تو نقولك..
وتحرك بالسيارة...
#كانون_الثاني
#طوبى
....يتبع....
