■■■■■■■■■■■■■■■■■■■■
❎تنويه❎
بعض احداث اقسام جزء #منازل_القمر صعبة ومرهقه نفسيا
#طوبى "جنة طوبى"
#جمان_فريد
#الجزء_116"منازل القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 العلاقاتِ لا يُبقيها الحُب، ما يُبقيها هُو الأماَن وعَدم الخَوف من الغدر وتقلُب الرأي، فحيثُما كان الأمَان، وُجد الاستِقرار والاطمَّئنان.
غسان كنفاني🍃
________________________________________
طلعت بسرعه وهي تمسح في دموعها جت لراجلها وقالت
/هيا..
وهو مازال رافض يسألها عن شي عاود شد يدها مرة تانيه وكأنه يقوللها اني ديما معاك وجنبك في كل حالاتك مهما يصير معاك..
وعيون خوها اللي طلع وراها بلحظات كانت ع ايديهم اللي ماسكه ومتمسكه بقوة في بعض..
تبدلت نظرات عيونه للحقد الممزوج بالبرود نظرته المخيفه اللي كل من يشوفها يتوتر ويخاف..
سرع خطواته لين وصل فيهم فات من جنب المهدي ضربه ضربه خفيفه ع كتفه وكمل طريقه وهو يقول..
/تعالى..
سدرة قعدت تشوف لمختار بنظرة خوف ممزوجه بالغضب غيرت عيونها للمهدي لما سمعاته قال..
/خليك هني..
طلق يدها ومشاله وهي معاه بعيونها لعند ماوصل فيه..
🍃وقف المهدي قدام مختار وحط ايديه ورا ظهره وهو يقول..
/خير!
مختار:سمعت باللي صار لخوك الجالي وبنقولك هذا اقل من اللي يستاهله..
قاطعه المهدي وهو يقول بإبتسامه متهكمه..
/انت اخر من يعطي رأيه في الجالي وافعاله واللي صار معاه..
رفع مختار حواجبه لحظات بعدين نزلهم وابتسم ابتسامه واسعه وهو يقول..
/تمام تمام..مش حنعطي رايي في شي بس بنوضحلك اني ماليش علاقه...
شك المهدي فيه كبر لما ابعد التهمه عن نفسه من قبل مايلقيها عليه قاله..
/ومن قال انت ليك علاقه!؟
مختار بإبتسامه بارده فيها تهكم وبنبرة سخريه قال..
/اختك..
بدت ع وجه المهدي ملامح الغضب..
مختار:اختك هادي اللي كان واخدها ولد الصيد امس اتصلت بيا في الليل تقولي كلمتك ع خاطر خوي الجالي خطفوه تحسابه عندي..وضحك ضحكة مستفزة..
هالضحكه خلت المهدي يفقد اعصابه ويشد مختار من رقبته
سدرة انفجعت ومشتلهم تجري شدت يد المهدي وهي تقول..
/مهدي!
مختار بضحكه مستفزة..
/مش مصدقني نسمعك تسجيل المكالمه وتتأكد ان هي اللي اتصلت..اني..مط شفايفه للأسفل وقال..ماليش علاقه..
طلقه المهدي ودفعه بقوة من الغضب بعدين التفت ع سدره حاوط ظهرها وخداها معاه..
سدرة بصدمه:شن يقول هذا!!؟
المهدي وهو يفتح في يده ويسكر فيها قال..
/مادوريش..
ومختار معاهم بعيونه اللي نظراتهم كلها شر وكره..
🍃🍃🍃🍃
"فيها خيرة ان شاء الله"
عبد القيوم بشي من الضيق..
/إن شاء الله..وانت حاول تغير نظرتهم للموضوع خليهم يشوفوه كيف ماانت شايفه..
عبد الله بإبتسامه..
/نحاول وربك يعين..
ابتسم بعدين قال..
/وكيف ماوصيتك عدي لخالي عبد القادر واحكيله كل شي وقوله عبد القيوم وكلك بنفس المهمه..
ضحك وقال..
/ان شاء الله..وانا نوصيك استخير استخير استخير ماخاب من استخار ياولدي..
هز عبد القيوم راسه مسايره وهو مبتسم..
مش حيستخير في شي حاسم امره فيه كل اللي صار معاه أكدله ان خيرته في طوبى اصلا هو يدعي الله قائلا..
(يارب خلي خيرتي فيها وخليها هي خيرتي)..
غير نظره عن عمه لعماته وبنت عمته اللي كانوا متوجهين للسيارة كانت نظراته ليهم كلها اسف ولاوحده فيهم تبي تسلم عليه ولاتكلمه..اسلوب ضغط تقليدي ومعروف..
وبرغم انه حز في نفسه هالشي لكن حطلهم اعذار واهمهم حبهم ليه..
🍃سلم ع ولد عمته وراجل بنت عمته وودعهم كلهم ع أمل اللقاء في ظروف ووقت احسن..
ومجرد ماطلعت سيارتهم من العمارة هو ركب سيارته وتوجه لشارع القهوة...
🍃🍃🍃🍃
وفي شارع القهوة في من عايش حياة هاديه كلها سكينه وامان داخلي وظاهري بعد ماعاش فترة طويله في خوف وحزن حيرة..
☘"الله يبارك عليك جاتك قنينه"
راما وهي تصب في عسل القطر ع الكنافه قالت..
/ابله عايشه الله يرحمها كنت تحب ديرها كل ماديرها نقعد حداها ونراقب فيها لقطت منها حاجات قعدوا في عقلي..
عواطف وهي واقفه ع بكرج القهوة..
/الله يرحمها ويغفرلها..
كملت راما شغلها ع الكنافه وهي تردد في الصلاة ع النبي سرا
وبعد ماولت جاهزه طلعتها مع عمتها الجو كان لطيف ونسمته بارده ونجمه حبت تستمتع بيه وهي تشرب في قهوتها..
☘نجمه:حميدا تعالى هني وليدي..نوضيله ياصفاء نوضي..
ناضت صفاء تجري وهي تقول..
/سلامتك ياولدي..
خداته ومشت قعمزت بيه وعطاته لعبة يلهى بيها..
لكن هو لما شاف السفر جايات لمعوا عيونه بفرح ومجرد ماحطوهم قال لأمه..
"مما"
نجمه:تي غير شن بتاكل فيها هادي..
راما وهي مبتسمه:عطوه شويه كريمه..
صفاء:ايه قصليه شويه رويمه..
وبدت راما تقص في طرف صغير لولد عمها..
عواطف:نخمم في تيم ياريتني مابعته مع بوه..
نجمه:هني روحكالولد عند بوه شن بيتراله!؟
☘محي الدين رافع ولده مع صغار عمه عبد الفتاح لوحده من الحدائق العامه"جردينه"☘
عواطف:ان شاء الله مايسهاش عنه..
شافت نجمه لصفاء وقالت..
/قالك اشرف باهي ع المشيه للمه غدوة؟
صفاء وهي توكل في ولدها..
/بعد جهد جهيد..
نجمه:اني نزلت فيه قتله ماتخنقش المراة خليها تطلع وتوسع خاطرها..
صفاء بإبتسامه..
/ربي يحفظك ومايحرمني منك..
نجمه بإبتسامه..
/سلمها ياربي..
ابتسمت عواطف وقالت لراما..
/ماكلمتيش امك اليوم راما!؟
حركت راسها بالنفي..
نجمه:عليك عملة سودا دارتها فيهم هديكا الشيطانه..
عواطف:اعوذ بالله منها من لما ريتها ماارتحتلها..
عواطف لصفاء..
/عرفت طوبى ؟
صفاء:كلمت امي اليوم وقالت خبروها..
عواطف:ربي جابلها حقها..
صفاء اشرت لعواطف بعيونها ع راما..
عواطف رشفت من القهوة والتزمت الصمت..
نجمه لاحظتهم وقالت لراما..
/بتبدوا تمشوا المدرسه توا!؟
يدوب ابتسمت راما وقالت..
/ايه بش نحلوا الاسئله اللي عطهولنا..
صفاء:جتكم ساهله السنه هادي حظكم حلو الله يبارك..
راما بضحكه:حسنات الحرب والكورونا..
عواطف:مصائب قوم عند قوم فوائد..
نجمه بإبتسامه..
/ربي يفتح عليك بنتي وينجحك..
راما بإبتسامه:اللهم آمين...
🍃جو كله راحه وهدوء وامان عايشاته راما حاليا بعيد عنها بعيد عن امها الام اللي مفروض تكون مصدر كل شي حلو في حياة صغارها..
🍃"خديجه"
هدا المهدي خش لحوش اهله بروحه بعد ماخلا تسبقه لشقتهم..
ينادي ويعاود بصوت كله غضب يرعد..
"خديجه"
وهي كانت مقعمزه مع اختها نسرين في دار المعيشه لما كيف سمعاته ينادي فيها نزلت الميه لركابها زي مانقولوا..
عارفه روحها شن دايره..
قعدت مقعمزة جامده في مكانها تستنى في قضاها بإستسلام..
واختها جنبها تشوفلها بفجعه وهي تقول..
/خيره ينادي فيك هكي!
ويخش عليهم المهدي زي الغول جاها شدها من ذراعها ونهضها وهو يقول..
/تعالي ياحيوانه تعالي..تعالي..
وطلع بيها ووراه نسرين تسال فيه وهي ترعش..
/خيرك يامهدي شن دارت!!؟
والمهدي مايسمع في شي خششها للدار وهو معاها وسكر الباب..
نسرين بعياط..
/شن في يامهدي قول شن في!؟
وماهي لحظات وتسمع اصوات صفعات قويه وصراخ خديجه والمهدي يشتم فيها..
ع جية سميرة من دار الكوي تجري..
وصلت في نسرين وهي تقول..
/شن في خيره المهدي!؟
وينفتح الباب ويطلع المهدي وبغضب شديد يقول..
/كبرتي وهبلتي يامسخه يا كلبه تفي عليك وعلينا حني تفي..
ومشي من قدامهم بعصبيه..
خشت نسرين تجري وهي تقوللها..
/شن درتي شن درتي من بلي تاني!
وخديجه طايحه ع السرير وهي تبكي وتعيط..
سميرة تباعدت عن باب عن الدار ومشت لدار مغليه..
خشت عليها لقتها وهي مقعمزه ع سريرها تبكي حركت راسها يمين ويسار اسفا وطلعت..
🍃🍃🍃🍃
"وصلت اريج"
غرفه قالت الجمله هادي بعد مااتصلت بيها اريج..
طوبى:والله مالازم قعادكم تو تلقطوا الكورونا وتقعدوا تعانوا حتى انتم..
غرفه: الكورونا جايتنا كلنا مافي حد بيسلم منها..
دق الباب وانفتح وتخش اريج وهي تغني..
/مراحب باللي غاب وجا مرايف كيف اريافي نا
من الابعاد تعبنا جينا علي شان الغاليين علينا
وختمت غناها بزغروده بصوت منخفض وغرفه وطوبى يضحكوا عليها..
قدمت لطوبى وسلمت عليها بالحضن وهي تقول..
/لاباس عليك ياقلبي..
طوبى:لايوريك باس حبيبتي..
تباعدت اريج وشافت لغرفه وهي تقول..
/حسين وخالتي صفيه لوطا يراجو فيك..
ناضت غرفه وهي تقول..
/هي..طبست على طوبى باستها ع راسها بعدين قالت..
/تصبحوا على خير..
ردوا عليها..
/قدامك كل خير..
وطوبى لحقتها بنظراتها اللي كلها حب وامتنان..
☘☘☘
وصلت غرفه لسيارة حسين وركبت وهي نقول..
/شن حالك خالتي..
صفيه:الحمد لله شن حالك انتي وشن حال طويبه..
غرفه:باهيه اليوم خير من قبل الحمد لله...
تحرك حسين بالسيارة وهو ملتزم الصمت ومكتفي بالاستماع لهدرزة امه وغرفه..
الانسجام بين امه وغرفه جديد عليه،في الماضي صفيه كانت تفضل في طوبى الى جانب سدرة بنتها بالرضاعه وماتحبش غرفه هلبه بسبب طباعها السيئة وتعاملها السيء مع اميمه لكن اللي يشوف فيه توا في علاقتهم تغير جذري كبير..علاقتهم مازالت مميزة اكثر من علاقة صفيه بسدرة وطوبى..علاقة صداقه..وكأنهم صاحبات..
☘صفيه:اوبا شد فيا قالي تعالي نينه ولا معاش نكلمك..
غرفه بضحكه:هالولد مش عارفه منين يجيب في الدوة هادي..
حسين بإبتسامه..
/نبيه ويتعلم بسرعه الله يبارك..
غرفه:الله يبارك..نفكر كان تحسن الوضع ندخلهم حضانه هو وخوه..
صفيه:ايه صح هذا وقتهم..
حسين:خل نشوفوا شن بيديروا من نظام توا بعد ماردوا القرايه في المدارس كان سمحولهم حتى هما تو ندورلهم ع مكان كويس نحطهم فيه..
غرفه؛مش لازم تعب روحك اني تو نشوف وندور..
حسين بشي من العصبيه
/ماتقوليليش خير بلاك انتي،من الصبح واني تقولي في دوة تكسر الرقبه..!
غرفه بضيق..
/مش قصدي ياحسين لكن في حاجات نعرفوا نتصرفوا فيها بارواحنا مانبوش نعتمدوا عليك في كل شي مش ديما بتكون فاضي..
حسين:ياستي لما مانكونش فاضي نقوللكم وانتم دبروا رووسكم تريحتي صفيه بضحكه..
/جابهالك من الاخير..
بإبتسامه قالت..
/باهي تحمل مايجيك..بنطلب منك طلب تاني فوق الطلب متاع بكري..
حسين:اللي هو..
غرفه:نبيك تشوفلي سيارة كويسه..
حسين:علاش!؟
غرفه:نبي نشري سيارة..
حسين:وشن بديري بيها!؟
غرفه بإبتسامة تعجب..
/كيف شن بندير بيها!؟ القدام بنحتاجها..
صفيه:عندها حق ولت ضروريه السيارة للمراة فوقتنا هدا..
سكت حسين شويه بعدين قال ع مضض..
/تمام..
غرفه:كان ماتبيش قول عادي تو نكلم خالي المحجوب..
حسين:سكتيها يام سكتيها مانبيش نطلع عن طوري ونلبز معاها في الدوة..
صفيه وهي شاده ضحكتها قالت بعصبيه مصطنعه..
/خلاص اسكتي..
غرفه بضحكه..
/حاضر..
شويه شافت من الشباك مطعم وجبات سريعه قالت..
/شن رايك تاخدلنا عشي!؟
صفيه:ايه بالمرة نوفروا ع بوك حق عشانا..
ضحكت غرفه وهو بإبتسامه قال..
/تمام..
ودرس قدام المطعم ونزل خدي منه عشي ولما جي حطه في السيارة من الخلف جنب غرفه..
قالتله بمزح؛سامحنا في تعبك..
حرك راسه يمين ويسار بدون مايشوفلها بعدين سكر الباب ومشي ركب القدام وامه وغرفه يضحكوا عليه بصمت..
🍃🍃🍃🍃
الساعه 9:30ليلا..
والقمر قاعد واخد مكانه وسط سمي صافيه مزينة بالنجوم..
كانت سدرة مقعمز حدا راجلها شاده يده اليسار دلك فيها وهي تقول بقلق..
/غير كان تقولي شن قالك هداكا بس..
المهدي وهو يشوفلها بنظرة فيها شي من التعب..
/قتلك فوتي ياقلبي مادوريش..
قالتله:كيف ماندورش وانت ماصار فيه هكي الا من اللي قاله..
المهدي؛اني صار فيا هكي من خوفي ع خوي ياسدرة مش عارف توا شن يديروله وشن صاير فيه..
التزمت سدرة الصمت..قربت منه حطت يدها ع مكان قلبه وبدت تقرا عليه..
هو غمض عيونه وقال..
/خليك ديما قريبه منه قلب المهدي مايبرا الا بسلطانته..
ابتسمت وهي تقرا..
وهو حط يده ع يدها وقعد مغمض عيونه...
🍃🍃🍃
"والله مانعرف يافايزة خش علينا زي الوحش جبدها للدار وطاح فيها ضرب"
فايزة وهي تكلم في نسرين هاتفيا وتتفرج ع الأحذيه اللي قدامها بتختار منهم شن تلبس في اللمه..
/شكلها دايرة فالطه كبيرة كان مابتش تحكيلك ولابررت لروحها..
"ماهو ناقصين بلي حني ناقصين..اصلا بلانا كله من تحت راسها هي..تعرفي يافايزة بعد ماطلقت حسيتها اشبح كيف وكأنها عايشة مراهقه متأخره.."
فايزة:الطلاق اثر فيها هلبه وتعب نفسيتها اللي تشوفي فيه منها سببه تعبها النفسي من الطلاق وهي فهالعمر..
"غبارة مغبرة! كان ماتطلع دايرة شي يحشم والمهدي عرفه!"
فايزة:معقوله!
"مافيش غير هالتفسير يافايزة لو شفتيه كيف ضربها ولاهي كيف مابتش تقول السبب واضح شي يحشم.."
فايزة:زي شني يعني!
"وين نندري ع دعوتها يافايزة..ااه ياربي والله خاطر عليا نهج ونخليهم والله بديت نفكر فيها نفكر نقول لربيع يخلينا نهاجروا للسويد معاش نبي نقعد فيها ليبيا كلها ع بعضها.."
تنهدت فايزة بضيق وقالت..
/لاحول ولاقوة الا بالله..
☘وفي الدار اللي جنبها..
كانت مروة حاطه قدامها مجموعه فساتين محتارة شن تختار منهم..
تاله:الفوشي حلو هلبه اعتمديه خلاص..
شافتله مروة شويه بعدين قالت..
/حتى اني اعتمدت خلاص..
خدت فساتينهاومشت بيهم للدولاب بش تعلقهم..
تاله:صارلها مناسك من المشيه!؟
مروة بتهكم:ايه واخيرا سمحلها سبع البرومبه..
تاله:ماتوقعتش مؤيد يكون واعر هكي..
سكرت مروة الدولاب وقالت..
/جو زايد يدير فيه وهي مطاوعاته مالاش حق يحكم فيها هو خطيبها مش اكثر حتى المكالمات بينهم غلط..
تاله:هي تكلم فيه من قبلها..
مروة:وكله غلط في غلط لكن ماعندي مانقول كان ربي يهدي..
تاله:قصدك مروة كان انخطبتي مش حتكلمي خطيبك!؟
مروة:بحدود في حدود التعارف والضروريات بس..
سكتت تالة وهي تفكر..
ومروة تشوفلها بعدين قالت..
/وين سافرتي!؟
حطت تاله شعرها ورا وذنها وقالت..
/تو انتي مروة من حبيتي محمد ولامالك الله يرحمه!؟
مروة:شن السؤال هدا!؟
تاله:غير جاوبيني..
مروة:لاحبيت هدا ولاهدا وين نتفكر الجو اللي عشته مع محمد نضحك ع روحي..اما مالك كرهت روحي اللي حسيت انه عاجبني يوم من الايام الله يرحمه توا عند ربي مانبيش ندوي عليه..ضيقت عيونها وقالت..انتي علاش سألتي السؤال هدا!؟
حاولت تخفي ارتباكها وهي تقول..
/سؤال عادي خطر عليا هكي وخلاص..ناضت وهي تقول..بنمشي نحط ع المسلسل بدي خلاص..
ومشت طلعت بسرعه من الدار
مروة وهي تفكر بصوت عالي..
/ البنت بدت تكبر يامروة ردي بالك..
🍃هي مسؤولية التربيه ماتكونش ع عاتق الاب والام بس في حالة كان عندهم ابناء كبار ناضجين عقليا ..
لازم الاخ او الاخت الكبار يتابعوا خوتهم الصغار ويعلموهم الصح من الغلط ويردعوهم لو ارتكبوا الغلط والاهم يكونوا ليهم قدوة حسنه لأن الخوت يتأثروا ببعض لدرجة كبير احيانا اكثر حتى من تأثرهم واقتدائهم بالوالدين🍃
🍃🍃🍃🍃
ويجي يوم الجمعه..
السابع عشر من ذي الحجه..
7اغسطس..سنة 2020..
ومع الساعه ثمانيه مساءا درست سيارة اشرف قدام حوش عيلة معين.
خشوا مرته وامها وخواتها وهو استقبله واحد من خوت معين ودخله للمربوعه
☘اول ماجوا فايزة وبناتها خاشات لقوا وحده منكناين فهيمه في استقبالهم..
كانت جميله وبكامل اناقتها رحبت بيهم ترحيب حار ودخلتهم للصاله..
اول ماخشوا انذهلوا في مساحتها وديكورها ذهول مخفي غير ظاهر للحاضرات..
رفعتهم الكنه لمكان فيها بش يقعمزوا فيه..
هما حولوا عباياتهم وقعمزوا..
صفاء:الله يبارك يام الحوش تقول قصر..
مروة؛مانحسابش بنشوف صاله اكبر من صاله حوش شنيبه..
ضحكوا..
فايزة بإبتسامه..
/زعمه من هي اللي استقبلتنا؟
صفاء:حسيتها كنه من كناينهم شكلها مختلف عن خالتي فهيمه وولدها..
تاله:ايه مش شقرا وعيونها زرق..
مروة شافت بنت فهيمه الصغيره خاشه للصاله قالت..
/هديكا بنتها الصغيره..
صفاء شافتها وقالت..
/هديل..
مروة:ايه..
تاله:اهي هادي بنتها شقرا زيهم..حي شوفي التانيه اللي خشت توا نسخة خالتي فهيمه..
فايزة؛الله يبارك ع الزين..
☘ومن بعيد كان الحوار يدور بين بنات فهيمه عليهم..
الصغيره قالت..
/اللي لابسه قفطان فوشي..
قالتلها اختها..
/تهبل..
ع جية امهم وهي تقول..
/خيركم واقفات هكي..
بنتها الصغيره قالت..
/ابله فايزة وبناتها جو..
فهيمه:وهدا وين تقولي ياحلوفه!؟ وينهم وين..
الكبيره قالت بضحكه..
/غادي يام..واشرتلها بعيونها عليهم..
بدت ع وجهها ابتسامه عريضه لما شافتهم ومشتلهم طول..
اهلت وسهلت ورحبت بيهم احلى ترحيب وين وصلت في مروة خدتها بالاحضان..
وفايزة وصفاء وتاله يشوفوا بإبتسامه لوجه مروة كيف ولى بلون حبات الرمان وهي تضحك بخجل ع مديح فهيمه ليها..
قعمزت فهيمه جنب مروة وقالت..
/ان شاء الله ماعلقتوش في الزحمه!؟
فايزة:لامش هديكا الزحمه..
فهيمه:باهي باهي..
ناضت وهي تقول..
/شويه وجايه..
مشت من حداهم وصفاء معاها بعيونها وهي تقول..
/الله يبارك عليها كبيره صح لكن جمالها بارز..
تاله:غير شعرها ساد..
فايزة:ايه الله يبارك عليها..
شويه وتجيهم فهيمه ومعاها زوز نساوين يشبهوها كانوا خواتها عرفتهم ع فايزة وبناتها وهما لما شافوا مروة عجبتهم هلبه..
وتجيب بعدهم بناتها وكناينها وتعرفهم عليهم..وبعدهم جابت حمواتها كلهم..
ومافيش وحده ماعجبتهاش مروة وكلهم تمنوها لمعين..
🍃🍃🍃🍃
"جهونه كيف حالك بنيتي"
هادي صفيه تكلم في كنتها اللي اتصلت بيها عن طريق الماسنجر مكالمة فيديو..
"الحمد لله عمتي كيف حالك انتي وكيف حالك اميمه وعمي والعيله كلها"
صفيه:الحمد لله كلنا في خيار خيرنا شن دايرة مع الحمل..
"ماشيه الحمد لله..بنقولك عمتي كان فتحوا الرحلات غادي مرات نروحوا الشهر الجاي "
صفيه بفرح: قولي بتجيبي هني!؟
"ايه ناويه نقعد لين نجيب بإذن الله ادعيلنا يصير منه.."
صفيه:ان شاء الله يصير ان شاء الله..
ع جية اميمه وغرفه بسفرة العشي والمشروب..
اميمه؛جهجهانه..
"ميمو شن جو"
اميمه قعمزت وهي تقول..
/تمام الحمد لله..
وتخش عليهم هاديه وهي تقول..
/رقدوا كلهم..
غرفه:احسن بش يخلونا نتعشوا براحتنا..
"باهي نخليك تتعشي عمتي سلمي عليهم كلهم.."
صفيه:حتى انتي سلمي ع وسيفه..
"يوصل سلام"
صفيه:بالسلامه بنيتي..
سكرت صفيه وقالت..
/مرات يروحوا الشهر الجاي قالت كان صار بنقعد لين نجيب..
غرفه:بيقعدوا ثلاته شهور معناها!؟
اميمه:صعب ع يوسف مرتبط بخدمه غادي اكيد بيروح بيها ويولي..
صفيه:حتى اني قلت هكي..
هاديه بإبتسامه..
/تحل عويناتها ع خير وتفرحي بشوفة اول حفيد ليك ياصفيه..
صفيه بإبتسامه..
/في وجودك ان شاء الله..
غرفه:هي اقربي خالتي اقربي..
قربت صفية وقعمزت جنب غرفه وبدوا يتعشوا وهما يهدرزوا وجوهم كان حلو..الوحيده اللي كانت تمثل الانسجام معاهم اميمه..
قاعده تشم في ريحة جدها في الحوش وتتخيل في اي لحظه يخش عليهم كانت تجاهد بقوة بش ماتخليش دموعها تنزل قدامهم وتنكد عليهم...
🍃🍃🍃🍃
"ياربي نجيه عسل معسل الله يبارك"
اريج:باهي اللي انفشيتي وليتي زي ماكنتي..
"مال شنو ماما دايرة برنامج خاص نتابع عند دكتورة تغذية وعندي مدربه رياضة"
اريج:خفي علينا ياهاي كلاس انتي..
ضحكت طوبى..
"طيري وخليني مع بيبو قوليلي شن رايك نحلقله شعره ولانخليه"
طوبى:لاخليه حرام..
اريج:شعرته حلوة ماتفسديهاش بالحلاقه..
"امم به"
اريج:قوليلي تعاني فيه انتي ولا دايرتيله بيبي ستر..
"لاحبيبتي مانخليش ولدي للبيبي ستر"
اريج ؛تو بتقنعيني انك انتي اللي تعاني فيه!
"لاطبعا ماما وعمتي"
اريج:عارفتك ماتهنيش ع روحك بتهني ع عيل..
"بري اقلبي وجهك بري.."
اريج:باهي..وسكرت عليها..
وطوبى تضحك عليهم من قلبها...
🍃🍃🍃🍃
"امتى بتولي تفتحي المركز متاعك"
فايزة بإبتسامه:يوم 15 ثمانيه بإذن الله..
اخت فهيمه:لقتيه مضرر؟!
فايزة:لالا الحمد لله ماصارله شي..
فهيمه:كذبوا عليها قالولها انضرب، بعد تمت الحرب مشاله معين شافه قال ماوصل فيه شي..
مروة لما سمعت اسم معين حست بشي من التوتر شافت لاخت فهيمه لما قالت..
/باهي الحمد لله..مالاوتي روحك بنجوك ونبوك تراعينا..
فايزة؛انتم غير تعالوا بس وماتلقوا الا اللي يرضيكم..
ردت عليها تقول..
/سلمك ياحبيبه..شافت لصفاء وقالت..درتي صغار؟
صفاء بإبتسامه؛ايه الحمد لله عندي وليد..
قالتلها:الله يبارك..مكمله قرايتك!؟
صفاء:لامازال..
فايزة:هي خدت الشهاده الثانويه من هني وقامت الحرب من هني وراجلها قال مانخليكش تقري والدنيا خايضه وتوا بعد افتكينا منها بيسجلها في معهد عالي بش تكمل..
فهيمه؛كويس كويس..حتى اني كناتي كملوا قرايتهم عند ولادي وحده خريجة مختبرات والتانيه لغات اني اهم شي عندي العلم والمراة لازم تاخد شهادتها تلقاها لعازة الزمان..
اختها قالت:اختي فهيمه تعامل في كناينها تقول بناتها يخي تفضل فيهم ع ولادها..
فايزة:وهدا الصح لما تجيك بنت اصل وكويسه لازم تعامليها هكي واللي ديره فيهم تلقاها في بناتها..
فهيمه بإبتسامه:صدقتي صدقتي وهدا اللي صاير..
اخت فهيمه شافت لمروة وقالت..
/الحلوة هادي مخطوبه!؟
ردت مروة تلقائيا..
/لاوين مخطوبه مازال وقته..
فهيمه وهي تسأل بإستنكار..
/مازال عينك..الله يبارك عليك رحتي صبيه في عمرك كنت متزوجه..
مروة بضحكه احراج..
/لالا اني نبي نقرا..
فايزة:مروة في بالها تتخرج وبعدين تفتح موضوع الزواج..
فهيمه:مالا اقعدي اظفري الشيب..
ضحكوا..
اخت فهيمه قالت بضحكه..
/مافيش مشكله كان انخطبتي توا وبعد تاخدي الشهاده الثانويه تتزوجي وتكملي زي اختك...
مروة برفض:لالا صعب مرات نطيح في واحد مش متفهم يقولي بطلي..
حطت فهيمه يدها ع رجل مروة وحولتها وهي تقول بحمقه.
/مايقولش بطلي..
ضحكوا ومروة تضحك بإحراج وكانت متوترة هلبه...
فايزة بإبتسامه..
/المده اللي فاتت خطبوها ناس من الجبل وقالولها نفس الكلام ردتهم..
فهيمه:احسن ماعندها مادير بيهم..
وهما يضحكوا عليها وهي بإبتسامة عصبيه ع وجهها تشوف لمروة كيف تضحك ..
☘شويه وناضوا هي واختها بش يشوفوا باقي المعازيم..
صفاء قربت من وذن مروة وقالت..
/قبل بتفتح الموضوع انتي سكرتيه..
مروة وجهها محمر خجلا وتوترا..
/وان شاء الله معاش تفتحه..
☘☘
ومروا ساعتين وزعوا فيهم الضيافه ع المعازيم من حلو وعشي وبعد العشي بعشرة دقايق المعازيم بدوا يروحوا..
فهيمه سقدت فايزة وبناتها لفم الباب وهي تسلم عليهم لما وصلت في مروة قرصتها من خدها وقالت..
/حطي في عقلك في راسك..
مروة وهي تضحك بإحراج..
/تصبحي ع خير خالتي..
🍃برا..
كان معين واقف ع اشرف بالقرب من السيارة..
معين؛ماعندكش مشكله..
اشرف شافهم طالعات وهو يقول لمعين بإبتسامه..
/بارك الله فيك..هي تصبح ع خير..
تباعد معين بدون مايشوف جيهتهم وقال..
/قدامك كل خير..
وماخشش لعند ماسيارتهم تحركت..التفت ع سيارة دفع رباعي اشر بيده للي قاعدين فيها بش يلحقوا سيارة اشرف وهما تحركوا طول وهو خش للحوش...
🍃🍃🍃
توجه لباب الحوش الدخلاني شاف بنت خوه الصغيره طالعه دخل في خوها..
قاللها:فكرونه روحوا النساوين كلهم خلاص!؟
قالتله:ايه ماقعد حد..قالت لخوها بعصبيه..خش هيا خير مانضربك..
هو نت في ولد خوه وقاله..
/خش داخل..
الولد طار يجري داخل واخته لحقاته وهي تضحك عليه..
خش وراهم وهو مبتسم بعصبيه مصطنعه وبدي يدندن في اغنيه..
"قولي لأمك يابنت جاية الليلة اطلب ايدك
ولا بعمري عاقل كنت وحياة الاله بريدك
عشتا طول وعرض الدني مابعمرو راسي بينحني
لما دخلتِ بعمري غِني من عمري إن شاءلله يزيدك
انا لما بحب بحن بجن بهدم بحرق"
ع جية امه كانت متوجهه لدار المعيشه سمعاته شن غنى شافتله بهزوة ورفعت يدها اليمين ودارت بيها حركه وكأنه فم يتكلم بمعنى..
"ماعندك كان الدوة"..
ومشت كملت طريقها وهو يشوفلها بتعجب..
اخته الصغيره كانت جايه وراها سمعاته لما غنى وشافت حركة امها ضحكت بكتمان..لكن بعدين بلعت ضحكتها لما قاللها..
/فرخة هديل خلاص معاش في حد خل نمشي لداري ندمدر!؟
وهي شاده ضحكتها قالت..
/مافي حد..
"مونا"
ابتسم لما شاف وحده من عماته جاياته..
وصلت فيه سلمت عليه بالأحضان وهي تسأل عن حاله..
معين:ماشيه الحمد لله..
شداته من يده وقالت..
/تعال سلم ع عماتك وخالاتك..
معين:والله مافيها كيف بنرقد خلاص خليها غدوة..
قالتله متهكمه:بالله عليك!!..تعالى تعالى..تعالى..
وجبداته من يده وقعدت تجر فيه وراها وهو يقول..
/والله ياعمتي تاعب وبنرقد ماعنديش راس لدوشتكم..
وهي تجر فيه ومش مهتمه لكلامه..
واخته وراهم جنابها وجعوها من الضحك اللي تكتم فيه..
☘لما قربوا يوصلوا للدار علت صوتها وهي تقول..
/جبتلكم معين وجيت المتحجبه تلبس..
نساوين خوته وبنات العيله لبسوا حجابهم وهما يضحكوا..
خشت عمته اللي جاباته وبعدها اخته وهو قعد واقف في الباب..
رفع يده وحياهم وهو يقول..
/السلام عليكم..
خالته قالت:خش سلم..
معين:حتى هكي كويس..
ضحكوا وعمة تانيه ليه قالت..
/شن جوك شن اخبارك..
معين:ماشيه الحمد لله..
وحده من خالاته قالت..
/امتى بتلمنا مرة تانيه هاللمه الحلوة؟
عقد حواجبه بعدم فهم وقال..
/كيف مافهمتش!؟
فهيمه:داير روحه غبي..
شاف لأمه بإمتعاض..
خالته بضحكه قالت..
/امتى نفرحوا بيك قصدي..
معين:بعد عشرة سنين ان شاء الله..
فهيمه بحمقه:بري جيبي الكلاشن ياهديل..
وتصدح اصوات ضحكهم في الدار..
ومعين مازال يشوف لأمه بنفس نظرة الامتعاض..
وحده من عماته وهي تضحك قالت../خلينا ندووا جد مونا خوتك وهما في عمرك كانوا بصغارهم..
معين:شن دخلي فيهم كل حد يدير اللي يعجبه..
قالت خالته..
/ياهيروشيما الزواج بكري خيرلك تربي صغارك بصحتك..
هو بإنزعاج قال..
/تي غير شن تقولي ياخالتي!..
قالتله:غير اسمع الكلام سلم ولدي وفكر في مصلحتك..
خالته التانيه قالت..
/لقينالك بنيه في اللمه الله يبارك عليها زي الغزاله..شافت لفهيمه وقالت..بنية المزينه هديكا يافهيمه..
عقد حواجبه ولون وجهه تبدل للأحمر..
خواته لاحظوه وقعدوا يتهامسوا..
فهيمه:لاهديكا ياحنه خلاص انخطبت..
فتح عيونه ع وسعهم بصدمه..
وعماته وخالاته كملوا بافي الفيلم اللي كتبت السيناريو متاعه فهيمه..
خالته قالت بأسف مصطنع..
/خسارتها..
فهيمه بتصنع الحسرة..
/الله غالب..
هو رخي عيونه اللي بانت فيهم نظرة الغضب وقال..
/هي خلاص بنرقد تصبحوا ع خير..
ومشي طول وهما يردوا عليه...
/قدامك كل خير..
اخته الصغيره قالت بضحكه..
/هدا وجهي كان رقدها الليله..
فهيمه بغل:خله يتشوشط.
واللي حواليها يسمعوا فيها ويشوفوا في تعابير وجهها وهمايضحكوا...
🍃🍃🍃🍃🍃
الساعه 1:30بعد منتصف الليل..
في حجرتها في مصحة القدس..
كانت طوبى سهرانه ع الفيس بوك..تتصفح فيه وهي حاسه بشعور مضايقها مش قادرة تفسره..
طلع قدامها منشور يتكلم عن سورة البقرة..كانت عندها رغبة شديده تقراه ومع هذا تخطاته حست بإن في شي اقوى منها منعها تقراه..
طوبى هني بدت تحس ان في شي غريب ومخيف في نفس الوقت..
حالتها الصحيه السيئه مش حدير فيها هكي مش حتخليها تبعد عن عاداتها الدينيه وتستثقل عباداتها..!
قادها تفكيرها لنتيجه خافت منها هلبه لكن مابتش تسلملها وطبيعي مش حتسلملها لانها عارفه روحها ديما محصنه نفسها بالرقيه وماتخليش في اذكارها لهذا فكرت في شي تاني..الوسواس..مرات الوسواس نفسه هو اللي يمنع فيها بش يوصلها لهالنتيجه ويدخلها في دوامه وهالشي صار مع هلبه ناس..
طول دارت بحث عن موضوع الوسواس..
وبدت تقرا عنه وعن انواعه واعراضه..
لقت نوع من انواع الوسواس يسبب في الاعراض اللي تصير معاها وعرفت ان الاستسلام للنوع هدا من الوسواس ممكن يوصلها للإنتحار...
زاد الخوف في قلبها..قعدت تقرا بتركيز في طرق علاجه نفسيا ودينيا..
لما كملت قرايه عن هالموضوع..نزلت تليفونها حطاته ع بطنها وغيرت نظرها لأريج لقتها غارقه في النوم..
من خوفها كانت تبي تفيقها لكن ماقدرتش..غيرت نظرها للشباك..
جو عيونها ع القمر اللي يبان بعيد شويه فهالوقت..
لما شافاته حست بشي طبق ع صدرها غيرت نظرها عنه بسرعة وقامت هاتفها شغلت سورة البقرة وحطت الهاتف جنب راسها..
مجرد ماسمعت اول ايات السورة نزل عليها النوم وراحت فيه...
🍃🍃🍃🍃
الثامن عشر من شهر ذي الحجه..
8اغسطس..سنة 2020..
يوم السبت..
الساعه 10:15صباحا..
في حوش محمد شنيبه..ماكان في حد من الرجاله قاعد لامحمد ولاولاده انشغالهم ع الجالي خلاهم يطلعوا من الصبح يدوروا عليه ويطلبوا المساعده من اي حد ممكن يقدر يوصل فيه..
ولأن قصة خطفه انتشرت في الشارع نساوين العيله توقعوا الجارات يخشوا عليهم في اي وقت..
من الصبح بكري داروا نسرين وسميره حملة ع الصاله بعد مانظفوها ورتبوها بدت نسرين تبخر في الحوش وسميرة طلعت للجنان بش تكنسه وتسقي الغرس..
وخديجه طبعا مادارت معاهم شي هي من بعد ضرب مشكلتها مع المهدي معاش طلعت من دارها الا للحمام..
لكن توا..
طلعت منها وتوجهت لدار امها..
خشت عليها لقتها راقده هي اساسا ماكانتش جايه تشوفها..جايه دور ع شي قلبت عليه الدار مالقتاش..
وقفت وحطت ايديها في نصها وع وجهها باديه ملامح الغضب..
لحظات وطلعت منها ومشت للصاله..
وقفت في بابها شافت نسرين دور فيها وتبخر خشتلها طول وهي تقول بحده..
/وين تليفون امي؟
نسرين بشي من لامبالاة..
/شن تبي فيه؟
خديجه:جبيه جاي..
نسرين:قولي شن تبي فيه؟
رمشت خديجه عيونها بسرعه من العصبيه وقالت
/نبي نكلم بنتي..
حطت نسرين البخارة ع الطاوله ومشت بتطلع من الصاله بدون ماتعبرها لكن قبل ما توصل في الباب ماحستش بنفسها الا وهي مجبوده من ذراعها بقوة...
شافت لأختها بفجعه وهي تسمع فيها تقوللها بغضب شديد..
/جيبي التليفون ياحقيرة..
نسرين برغم خوفها ردت بقوة..
/لا المهدي قالي دسي عليها التليفونات..
خديجه بنفس نبرة الغضب..
/جيبي جاي ياكذابه جيبي..
نسرين بلعت ريقها وقالت بصوت عالي..
/والله هو قالي قالي دسيهم عليها شن اللي درتيه بش خلتيه يديرلك هكي قولي شن دايرة من عار!
🍃اصواتهم كانت واصله لأمهم اللي نوضوها بفجعة..
لكن سميرة اللي كانت في الجنان تسقي فالغرس ماتسمعش فيهم..
دق باب الحوش حطت طوبو "خرطوم"الميه ومشتله..
وقفت وراه وقالت..
/شكون!؟
"رقية رقية"
قلبت عيونها بملل بعدين رسمت ع وجهها إبتسامة مصطنعه وفتحت الباب..
وتلقى رقيه واقفه ومعاها زوز نساوين من الجيران..
وهي مبتسمه مجامله قالت..
/تفضلوا تفضلوا..
هما ردوا عليها بأصوات متقطعه..
"يزيد فضلك"
خشوا وسكرت الباب..سلمت عليهم بالمصافحه وهما يسألوا عن احوال بعض.."تعاليلي ياسميرة"
بدت ع وجوههم ملامح الفزع لما سمعوا عياط نسرين وهي تستنجد بسميره..
طول سميرة خشت تجري وهما لحقوها..
🍃تبعوا مصدر صوت عياط نسرين وهي تقول..
"خلاص..حولي..حولي"
وصلوا للصاله وخشولها..
لقوا خديجه باركه ع اختها وطايحه فيها ضرب بدون وعي..
سميرة بصدمه ع فجعة..
/نهار احرش!..
ومشتلهم تجري بكل قوتها جبدت خديجه عن نسرين..
ورقيه جت لنسرين ساعدتها بش تنوض ونسرين كانت في حالة يرثى لها انفها ينزف خدودها عليهم خدوش بدمهم
وتاخد في بصعوبه..
خديجه لما شدتها سميره قعدت تعيط عليها وتقول..
/حولي حولي..
سميرة بعصبيه..
/ياسرك من العار ياسر حشمتينا..
وتلتفت عليها تصفعها ع وجهها بقوة..
الجارات اللي كانوا يتفرجوا بصدمه قدمولهم يجروا وشدوا خديجه مع بعض وهما يقولوا..
"شن جاك ياخديجه..صلي ع النبي يامراة"
وقعدوا يجبدوا فيها بش يطلعوها برا وهي تسب وتشتم وتعيط..
سميره وهي حاطه يدها ع خدها كانت تشوف للباب اللي طلعوا منه خديجه بصدمه..
ورقيه خدت نسرين قعمزتها وهي تقول..
/تو نجيبلك ميه..
وطلعت تجري من الصاله للكوجينه..
شافت في طريقها خديجه وهي فاكه روحها من الجارات ومشت تجري لدارها خشتلها وسكرت بابها بقوة..
رقيه بصدمه..
/اعوذ بالله شن هذا!!؟
🍃🍃🍃🍃
في شركة المحاماة والتدريب القانوني اللي يملكها المحجوب ومجموعه من الشركاء..
في مكتبه كان مقعمز وهو عدي اللي يخدم في نفس الشركه والحديث اللي يدور بينهم بعيد عن الخدمه..
🍃عدي:فكرت اني نقدر نتفاهم معاه بالعقل..
المحجوب:وينه العقل اللي عند واحد زي هدا!؟ انت تصرفت تصرف غير محسوب يا عدي..
تنهد وهز راسه وهو يقول..
/في الحقيقه ايه تصرف غير عقلاني لكن البنادم هدا بتصرفاته يطلع الواحد عن طوره..
المحجوب بأسف..
/فعلا..حتى بنت اختي ارهقها نفسيا واهي قاعده راقده في المصحه بسببه..
بدت ع وجه عدي ملامح الضيق والمحجوب لاحظها..
بعدين قال..
/اني توا عندي موعد عمل ضروري شن مايصير معاكم جديد ارجوك بلغني بيه..
ابتسم محجوب بجديات وقال..
/مشكور لإهتمامك..
ابتسم عدي مجامله وناض وهو يقول..
/السلام عليكم..وتوجه الباب والمحجوب بعيونه معاه وهو يرد في السلام عليه..
🍃طلع عدي من المكتب وباله مشغول ع طوبى مالاحظش وجود عبد القيوم في مكتب السكرتاريه لكن هو شافه وقعد يتبع بنظرات عيونه اللي كلها امتعاض..
غير نظره للسكرتيره لما قالتله..
/تفضل استاذ محجوب يراجي فيك..
ناض وهو يقول..
/شكرا..
ومشي بإتجاه مكتب المحجوب...
🍃خش عليه والمحجوب رحب بيه بعدين قعمزوا مقابلين بعض قدام المكتب..
عبد القيوم:مافيش جديد!؟
المحجوب:في بس مش مهم هلبه..قبل لتخش عليا كان عدي عندي..
هز راسه وقال..
/شفته وهو طالع..
المحجوب:ياسيدي طلع ماشي للجالي في اليوم اللي بعت فيه الرساله لبنت اختي وصارت بيناتهم عركه وصلت للضرب.
عقد حواجبه وقال..
/شن يبي فيه ماشيله!
المحجوب: ع اساس بيتفاهم معاه بش يخلي طوبى في حالها..
عبد القيوم وهو عاقد حواجبه وبنظرات عيون بين الغضب والغيره قال..
/ليش يتصرف من راسه ويعدي يكلمه ليش يدير في هالمجازفه ان صح التعبير!
تنهد وقال..
/مش عارف شن نقولك..بس عدي راغب في الزواج من طوبى..
عبد القيوم بإندفاع قال..
/وانا جيتك نحكي معاك في نفس الموضوع وحنكرر طلبي اللي طلبته من الحاج علي الله يرحمه وياريت مانسمعش منك نفس الرد..
بملامح ابتسامه اسف قال المحجوب..
/للأسف حيكون نفس الرد هو نفسه اللي رديت بيه ع عدي شوف نصيبك في غيرها انت بالذات فكر في الزواج من وحده تناسبك ياعبد القيوم..
عبد القيوم وهو يحاول يضبط اعصابه قال تهكما..
/تناسبني ع اي اساس!؟ شن هي المواصفات اللي تشوفوا فيها فالمراة اللي تناسبني بش نعرفها ماهو انا عيل صغير مازال مانعرفش شن يناسبني وشن مايناسبنيش..
المحجوب وهو يحاول يمتص غضبه..
/عبد القيوم حبيبي تعرف قداش نعزك ونقدرك ووالله نبيلك الخير هدا علاش نقولك اصرف نظر عن طوبى مش لعيب فيها وانت تعرفها زي ماهلبه ناس يعرفوها مراة محترمه قويه قد المسؤوليه ومتدينه لكن ظروفها ظروفها ياولدي ماتناسبكش...
عبد القيوم:انا الادرى بظروفها مافي شي خافي عليا منهم ونقولك مايهموني في شي ومايجوش عائق بيني وبينها..
المحجوب:وبرضو نقولك انسى الموضوع..
قعد عبد القيوم يشوفله بنظرات انفعال ولولا حكمته اللي كانت غالبا مسيطره عليه راهو انفعل معاه حتى بالكلام..
رن هاتف المحجوب ناض ومشي خداه وهو يشوف في الشاشه قال..
/متاسف جدا عندي اجتماع توا..
ناض عبد القيوم وهو يشوفله بنظرات متجهمه..
بعدين مشي طلع من المكتب بدون مايلقي السلام..
شاف المحجوب للباب بعد ماتسكر..زفر..بعدين خدي ملف من فوق الطاوله ومشي طلع من المكتب..
#منازل_القمر
#طوبى
...يتبع...
