طوبى "جنة طوبى"
#جمان_فريد
#الجزء_113"الحجر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
قال ابن القيم رحمه الله..
"اذا انكشف الغطاء للناس يوم القيامة عن ثواب أعمالهم لم يروا عملا أفضل ثوابا من الذكر فيتحسر عند ذلك أقوام فيقولون ما كان شيء أيسر علينا من الذكر.."🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃لم يكن سجنهُ في سجن سيبيريا وسط الاعمال الشاقة ، كان سجنهُ الحقيقي في ذهنه .ففي الذهن يكون الناس اما احراراً او سجناء ..
فيودور دوستويفسكي🍃
________________________________________
"معاش تنزلي خليهالها تبرطع فيها"
"حتى اني معاش نازله خلاص سادني اهانات وقلة قيمه"
🍃🍃
"خليك في الشقه احسن ياسدرة تعرفي موقفك حساس مانبي حد يحصل فيك فرصه"
"حاضر زي ماتبي"
🍀🍀🍀🍀🍀🍀
ويعدوا اربعه ايام من شهر رمضان والجالي شاد عيلته في الشقه..والمهدي شاد عيلته في شقته..ونسرين من هداكا اليوم معاش مشت لحوش اهلها..
🍃وتطلع نتايج تحاليل محمد الصيد وتتأكد شكوك أسامه،
محي الدين خاف ع نفسه وعيلته من الفضيحه واختار يتكتكم عن هالخبر ويعالج ولده في السر..
وبالنسبه لقصة السرقه بعد ماقبضوا ع الاولاد اللي شاركوا محمد في الجريمه اعترفوا ان هو الراس المدبر وانه هو اللي طلب منهم يسرقوا بوه..وبعد مانفدوا العمليه تلاقوا بش يقسموا الفلوس ولأن محمد كان يبي ياخد نصيب الاسد بإعتبار الفلوس اساسا لبوه وانه هو اللي خطط للسرقه هما اعترضوا وصارت بينهم مشاده كلاميه انتهت لعراك بالأيدي..
🍃هدا كله خلا محي الدين مليان غضب وحقد ع خديجه واعتبرها هي السبب الأول للي وصلوله وبش ينتقم منها خلا راما توصللها اللي داره محمد واكد ع راما تقوللها بالحرف..
"انتي سبب خراب حوشك وصغارك"
وطبعا ردة فعل خديجه معروفه لما تتواجه بالحقيقه الموجعه..عياط وتخبيط ودعي واخر شي خشت دارها وحبست نفسها فيها..
🍃وتقعد امها ماتلقى من يعانيها غير نضال..
كان يساعد فيها تاكل وتشرب ويقعمز حداها بالساعات ويهدرز عليها..لكن لما تحتاج الحمام..
☘"سامحيني والله لو نقدر نتفاهم مع خديجه راني خشيت كلمتها هي لكن اهو تسمعي فيها شن دايرة من الصبح وهي شادتها عياط هججت بوي من الحوش"
سميرة بإبتسامه..
/ولا يهمك ولدي ع خاطرك انت ندير اللي تبيه..
ابتسم بإمتنان وقال..
/جزاك الله خير ورحم والديك..
🍃وقعدت سميرة تعاني في مغليه..مغليه اللي كانت مش طايقة تشوف لوجهها وتلف فيه عنها وين تجيها..
لكن سميرة تغاظت ع خاطر نضال وفي نفس الوقت احتسبت اللي ديرلها فيه اجر عند الله سبحانه وتعالى..
☘والله لايضيع اجر المحسنين☘
🍃🍃🍃🍃🍃🍃
"اشرب مختار اشرب"
وهو مقعمز ع سريره ومش طايق نفسه خدي كوباية ميه مذوب فيها قرص فوار مليان فيتامينات وبدي يشرب فيه..
دق باب الحجرة..
حرك عيونه ليه..
الممرضة:ادخل..
انفتح الباب ومختار وهو يشوفله توسعوا عيونه بصدمه لما شاف طوبى خاشه عليه..
كانت لابسه فستان صيفي انيق وفضفاض وحاطة الشاربه حط ولافتها لفه خفيفه حواليه رقبتها ونص وجهها مغطي بالكمامه..
شافت طوبى للممرضة وقالت..
/عندك شي تاني بديريه؟
ابتسمت وقالت..
/لا..استأذن..
طوبى:تفضلي..
مشت الممرضة طلعت وطوبى لحقتها وسكرت الباب برجلها اللي كانت لابسه فيها حذاء خفيف..
التفتت شافتله لقاته يشوفلها وهو مضيق عيونه ومبتسم ابتسامه استغراب وعدم فهم..
ضحكت ومشت كم خطوة لين وقفت قدام السرير بمسافه..
شافه للكوبايه وقالت..
/كملتها!؟
غمض عيونهم وفتحهم ومازالت ع وجهه نفس الابتسامه وقال..
/هو قالي الاقجم انك انتي ورا هدا كله لكن ماقاليش انك قاعده هني!..
طوبى:انا قتله مايقولش..
هو بإستغراب شديد..
/علاش!؟
طوبى بإبتسامه..
/كنت نبي نديرهالك مفاجأة..
هو قال..
/تتسهوكي..
ضحكت وقالت..
/باهي قولي بعد عرفت في شن فكرت!؟
قاللها..
/انك متخلفه وغبيه وحمقاء اللي مسيبه بنتك وجاية تقعدي معاي واني فهالحاله..
اشرت عليه وقالت..
/ايوه هي هادي..توقعت لو عرفت قبل هكي تنفعل وترفض العلاج..
مختار:غبيه انتي حتنجبري تقعدي هني فترة طويله بش تحجري نفسك..
طوبى:عارفه..
عقد حواجبه وقال..
/علاش درتي هكي!؟
تنهدت وقالت..
/تو نجاوبك لكن قبلها نوض واطلع معاي نتمشوا في الجنان..شم هوا ربي وحرك الدورة الدمويه شويه..
قعد يشوفلها وهو ساكت..
طوبى بنفاد صبر..
/تي هيا عاد كمل اللي في يدك ونوض..
نزل عيونه للكوبايه بعدين شرب اللي فيها كله..
حطها ع الكامدينو وقال..
/جيبيلي حاجه نلبسها في رجليا..
طوبى اشرت بعيونها للأسفل جنب السرير..
/جابتلك سوناتا..
نزل رجليه وقال..
/مالقيتوش كان سوناتا ديروهالي ممرضه! جبتولي لامبرقيني ولابورش بش استجبت للعلاج بسرعه..
طوبى بضحكه..
/الله المستعان وخلاص..
هو رفع حاجبه ونزل عيونه للحذاء لبسه وناض وقف وهو يقول..
/تقول كنت متحنط..
طوبى:سوناتا قالت كنت نمشي فيه..
مختار:مرة ولامرتين بعدين شديت السرير..
طوبى:علاش!؟
مختار حرك راسه بالنفي وهو يقول..
/مش عارف اضايقت ماحبيتش المشي في مكان مغلق..
طوبى:اهو بنطلعوك تمشي في مكان مفتوح..
مشت فتحت الباب وقالت..
/هي تعالى..
نزل عيونه وشاف حوايجه وهو يقول..
/مانحبش حد يشوفني مبهدل هكي..
طوبى؛وين مبهدل التوته اللي لابسها قنينه..
هو قال:مانلبسش في اللبس هدا قدام اي حد بالذات الناس اللي تخدم عندي..
طوبى بملل..
/باهي قولي شن تبي تلبس واني نجيبلك..
مختار وهو يفكر...
/جيبي قميص لونه سماوي وبنطلون رمادي..نزل عيونه لرجليه وقال..وحذاء شاموا اسود..
رفعت حواجبها وسألت تعجبا..
/ماتبيش نظرات!؟
ضيق عيونه وقال..
/ايه فكرتيني..جيبيلي وحده كينج سفن لونها اسود..
طوبى بإبتسامه يأس هزت راسها وقالت..
/باهي..
🍃ومشت سألت امينه عن مكان دار النوم متاع مختار وبعد مادلتها عليها مشتلها..
اول ماخشت حست بشعور غريب..لون داره كله رمادي ماعدا الدولاب"الخزانه" كان ابيض..
ع كبرها وفخامتها حست بشي من الخنقه لما خشتها..
مشت طول للدولاب..فتحاته..وصدفت ان الجهة اللي فتحت بابها تكون لمختار..
شافت كم الملابس اللي عنده ضحكت..وبدت ادورله ع طلبه لين لقاته..
حطت الملابس ع السرير..وقعدت دور بعيونها في الدار لعند ماثبتتهم ع الادراج..
مشتلهم وفتحت واحد فيهم لقاته معبي نظارات من كل الماركات في منهم الملونات...
دورت ع اللي يبيها لعند مالقتها وطلعتها....
ورجعت ادور مرة تانيه وهي تتسائل..
"الاحذيه وين مكانهم"..
شافت خزانه ارضيه صغيره موجوده في ركن معين من الدار..
مشتلها طول وفتحتها..لقتها معبيه احذيه..
وبدت رحلة البحث عن الحذاء اللي يبيه لين طلعاته..
🍃🍃🍃🍃🍃
وبعد مالبس مختار وتأنق..وطوبى لبست عبايتها وشاربتها كويس..
جاته وهي تلبس في القفازات وتقول..
/هيا..
مختار:علاش تغمي في روحك هالغمه بس..
طوبى:البس الكمامه البس..
رفع الكمامه وغطا بيها نص وجهه وقال..
/السيدات اولا..
ابتسمت مشت طلعت وهو وراها...
🍃🍃🍃🍃
في حديقة الفيلا..
مختار:ايه قوليلي..علاش درتي هكي!؟
طوبى؛ادفع بالتي هي احسن...
مختار:تبيني نولي ولي حميم!؟
عقدت حواجبها بإستغراب وقالت..
/لا..ابدا..عاملتك باللي يليق بيا بس..
ابتسم وهو يمرر في نظره ع الحديقه..
احتفظوا بصمتهم وهما يتمشوا وداخلهم كانوا داسين هلبه كلام..هي لما تكلمت بعد صمت ماقالت منه شي..
/ماسألتش عن فاتن؟
مختار:سألت الأقجم..
طوبى:اممم..
هو قال:تكلمي في العيله!؟
طوبى:يوميا مرتين تلاته..
مختار؛شن اخبارهم..
طوبى:لاجديد..
مختار:نحس فيك جيتي هني من غير ماتشاوري حد..
هزت راسها وقالت..
/ايه..
مختار:طارتلهم منك اكيد..
طوبى:خوف عليا وطارتلهم حتى منك انت..
هز راسه مسايرة وهي حاسه انه ماصدقهاش..
وصلوا لمكان فيه طاوله وكراسي..
طوبى:بنفطر هني..تسايرني عادي!؟
مختار؛المده الاخيرة وليت نشم ونذوق تو نسايرك..
طوبى:تمام تعالى..
مشوا ناحية الطاوله وهو يقول..
/معاش نبي نبات في الدار هديكا..
طوبى:مكتبك نظفوه وعقموه كويس انت عندك فيه كنبه زي السرير بات فيه..
قعمزوا حوالين الطاولة مقابلين بعض..
هو قال:شكله الاقجم خبرك ان المكتب مكاني المفضل؟
طوبى:ايه..
ضحك وقال..
/شكلك خديتي عليه وبديتوا تهدرزوا عادي..
بحدة قالت..
/طبعا لا..بيني وبينه حلقة وصل..امينه..
قعد يضحك..
وهي تشوفله بنظرات امتعاض..
ع جية امينه بسفرة الفطور الخفيف كانت تمشي وهي خايفه وتتجنب النظر لمختار..
وصلت في الطاوله وقالت..
/حمد لله ع السلامه يااستاذ..
مختار:باهي ياامينه باهي..
حطت السفرة وقالت بتوتر..
/والله ماكنت عايزة ارجع بس مايصحش الهانم تبقى هنا لوحدها.
طوبى بضحكه..
/اني خليتها تقعد..
مختار:هي تخدم عندك مش عندي..تسمع كلامي اني مش كلامك..
بلعت امينه ريقها بخوف..
طوبى:مختار المراة خافت..
هو قال..
/كان تخاف مادارتش هكي..
هي بنبره خوف وارتباك..
/طيب ايه اللي حيحصل دلوقتي!؟
طوبى شافتله بضيق لقاته يشوف لأمينه بنظرات حاده..
نزلت امينه عيونها خوفا..
مررت طوبى نظرها عليها وعليه..
لقاته يشوفلها..غمزلها بعينه ورجع شاف لأمينه وقال..
/امينه ارفعي راسك..
رفعت عيونها وشافتله بخوف..
مختار:عارفه روحك تهوني عليا ياولية انتي!؟
ضحكت طوبى..
رفع حاجبه وقال..
/درت الحوله ع هلبه حاجات ياامينه قبل هلبه علاش ترا!؟ لأنك ماتهونيش عليا..
ابتسمت بإحراج وربكه..
طوبى بإبتسامه..
/خلاص حطي في بطنك بطيخة صيفي..
ضحكت امينه وقالت..
/ربنا يخليكي ياحبيبتي..
مختار:نعم! ترا قوليلي شن دارت بش تدعيلها الدعوة هادي!؟
امينه بضحكه..
/ربنا يخليك ويشفيك ويحرسك..
في هاللحظه ارتفع صوت آذان صلاة المغرب...
امينه؛عن اذنكم رايحه افطر..
مختار:خودي راحتك..
مشت امينه..وطوبى ناضت حطت قدام مختار طاسة عصير لوز وتلاته حبات تمر وخدت هي طاسه مية وتلاته تمرات..
قعمزت وبدت تقرا ع الميه همسا وهو يتأمل فيها..
كملت وشربت شويه من الميه وخدت تمرة وبدت تاكل فيها..
ابتسم ونزل كمامه وخدي طاسة العصير وبدي يشرب..
🍃🍃🍃🍃🍃
"كول بالشويه ماما"
صفيه:هاك دجاجه اوبا..
خدي اواب قطعة دجاج وبدي ياكل فيها..
جاهم صوت بكاء مئاب ناضت غرفه وهي تقول..
/في وقتها المناسب..
ضحكت صفيه وقالت..
/جيبيها هني رضعيها وكولي..
مشت غرفه وهي تقول..
/باهي..
صفيه:هاك هوبا بطاطا..
خدي بطاطا وقال..
"دجاج"
صفيه:هي شويه حبيبي..
ويرن تليفون صفيه اللي كان محطوط فوق الطاوله..
ع جية غرفه بمئاب خداته ومشت مداته لصفيه وهي تقول..
/حسين..
صفيه بلهفه:بالله بنتي افتحي الخط وحطيه ع وذني ايديا ملبزات..
قعمزت غرفه جنبها وفتحت الخط وحطت التليفون ع وذن صفيه..
"امي"
صفيه بضحكه:وليدي..
حطت غرفه المرضعه في فم بنتها بعدين شافت لاولادها وهما ياكلوا..
"شن الاخبار شن الامور"
صفيه:الحمد لله كلنا كويسين..
"الصغار امورهم تمام"
صفيه:الحمد لله في خيار خيرهم اهم حداي يتعشوا..
ابتسمت غرفه وهي تشوف لولادها..
"عطيني نكلمهم"
صفيه:تو بيتعاركوا ع النقال..
"افتحي المايك افتحي"
ضحكت وقالت..
/باهي..
شافت لغرفه وقالت..
/افتحي المايك يبي يكلمهم..
غرفه فتحت المايك ووجهت التليفون لصغارها..
صفيه:حسين كلمهم..
"اواب مهاب"
الزوز قالوا مع بفرح..
"سونا"
ابتسموا صفيه وغرفه..
"شن جو"
ردوا عليه وهما يمدوا في الكلمه..
"مليح"
ضحكت صفيه..
☘واستمرت هدرزة حسين عليهم دقيقه كامله بعدين قال لأمه..
"يام"
صفيه:نعم!؟
"يام غدوة مروح ان شاء الله"
صفيه؛بتحضر العيد معانا!؟
"ايه...يام..هانت خلاص "
بدت ع وجه غرفه ملامح البكاء وفاضوا عيونها بالدموع..
اما صفيه من الفرحه قالت..
/بالله عليك!..
"والله..معاش قعد شي خلاص قريب ان شاء الله تسمعوا اللي يفرحكم"
🍃وحكي حسين عن بعض التفاصيل البسيطه ونهي المكالمه وهو يخبر في امه عن الساعه اللي حيروح فيها..
صفيه برجاء..
/ياالله ياالله بشرنا واجعلها اخر حرب في البلاد كلها يارب..
شافت لغرفه لقتها ترضع في بنتها وهي تبكي بصمت..
بدت ع وجهها ملامح الحزن..طبطبت ع ركبتها وقالت..
/الله يرحمه ويغفرله..
رشفت غرفه وقالت..
/آمين..
🍃🍃🍃🍃
"احتمال كبير في العيد يديروا حظر 24ساعه"
هاديه:والله مايبوا الا هكي الناس مازال مستهترين راهو.
اميمه؛فعلا لاحظت الشي هدا هلبه اغلبهم مش مدورين..
هاديه:ردوا بالكم انتم دكاترة معرضين هلبه..
اميمه:لاالحمد لله المصحه عندنا مشددين في مسألة التعقيم واتباع الاجراءات الاحترازيه حتى الزيارة منعوها الايام هادي.
اريج وهي تشوف لتليفونها..
/في هلبه اخبار يقولوا ان الحرب خلاص شبه تمت..شافتلهم وقالت..زعمه حق ولا جو حرب اعلاميه!؟
هاديه:خالك حسين بكري كلم عمك عبد المطلب قاله قربت تنتهي..
اميمه:إن شاء الله..ع الاقل نلهوا بهم بواحد..
شافت هاديه للحاج علي..كان مقعمز ع كرسي بعيد عنهم شويه ويبان سرحان قالتله..
/عمي..
شافوله اريج واميمه..
علي شافلها وقال..
/نعم؟
هاديه:خيرك ساكت؟
علي:نسمع فيكم..
اميمه بضحكه..
/ترا قولي ع شن كنا نحكوا..
ابتسم وقال..
/ع الحرب..
هاديه؛اهو خلاص هانت ونفتكوا منها إن شاء الله..
هز راسه وقال..
/إن شاء الله إن شاء الله..
بدت ع وجه اميمه ملامح استغراب ممزوجه بالضيق وهي تشوف لملامح وجهه...
*******
هاديه بضحكه..
/مأثرة فيه هلبه تسكيرة الجوامع هادي..كل مايسمع الاذان دموعه يغلبوه..ولامنين يتفرج ع الكعبه يقعد متحسر والدمعه في عينه..يومها مشيتله بنوضه للسحور سمعته يبكي في داره..نزلوا دموع هاديه وهي تقول..واجعني حاله هلبه ع قد ماحاولنا نغيروا جوه شي يساير فينا مسايرة حتى مع جنة يضحك بالسيف..
مسحت اميمه دموعها وهي تقول..
/الخدمه لهتني عنه هلبه..تو نقعمز نهدرز عليه بعدين.
هاديه؛ايه سلم بنتي جدك يحبك هلبه ويسمع في كلامك..
هزت اميمه راسها وقالت..
/بري تريحي تو ندير القهوة..
هاديه بإبتسامه..
/ع راحتك حبيبتي..
ومشت طلعت من الكوجينه وخلت في حالة من القلق والحزن ع وضع احب انسان لقلبها..جدها..
🍃🍃🍃🍃🍃
"ديريلي قهوة مرة راسي مصدع"
نجاة؛باهي..اتكى شويه لين نجيبهالك..
تمدد ع الفراش..
وهي مشت بإتجاه الكوجينه شافت جهة دار المعيشه لقت جوري تلعب مع خوها غيرت نظرها عنهم..
وصلت في الكوجينه وبدت دير في القهوة وهي تفكر..
اللي كانت تفكر فيه موقف صار قبل شهرين في جنان كوجينة حوش شيابينها..
🔺️🔺️🔺️في وقت سابق🔺️🔺️
كانت نازله من شقتها متوجه لحوش العيله..
وهي ماشيه سمعت اصوات نسرين والجالي يتناقشوا..
خففت من سرعة مشيتها وقفا مكانها وقعدت تتتسمع..
🍃الجالي:يعني الدوة هادي مافيش منها..
نسرين:ايه تأكدت منهم بروحي قالوا خطبناها اكثر من مرة وردتنا...
سرح بتفكيره بعد سمع كلامها
نسرين:فوت القضايا والدوة الفاضيه المراة مش في بالها الزواج بكل..
شاف لاخته شويه وقال..
/بنسألك سؤال ارجوك جاوبيني عليه من غير انفعال..
نسرين:أسأل..
الجالي:تتوقعي لو حاولت معاها توليلي..
نسرين بضحكه ساخرة..
/من سابع المستحيلات..
الجالي بضيق..
/العلاج وتعالجت ومستعد ندير اللي تبيه بش ترضى..تبيني نطلق نجاة نطلقها..
نسرين بأسف..
/معقوله ياجالي يكون هدا جزاء المراة اللي وقفت معاك وصبرت عليك!
الجالي بتهكم..
/شن بينزل فيها الغلا توا!!؟
نسرين:ايه صح اني مانحبهاش لكن مانبيش نظلمها في وضعها معاك..سلم وخيي حول من راسك طوبى وانساها وعيش حياتك مع نجاة تفكر كيف حبيتها وكيف تمردت ع كل شي وخديتها ننصحك اطلع بيها من هني وابدوا حياة جديدة مع بعض وارضى بنصيبك سلم وخيي..
هو بإنزعاج:حب شني يانسرين بس! اني عمري ماحبيت غير طوبى وعلاقتي بنجاة كانت نزوة لحظه طيش وهبال سميها مراهقه متأخرة..
شدت نسرين ذراعه وقالت..
/تعالى خش معاي داخل خش انت شكلك بطيرهالي وتخليني نعلي صوتي ومرات تسمعنا..
مشي معاها وهو يقول..
/شن الغلط في اللي قلته بش طيرلك! ...
وخشوا هو وياها داخل وسكرت الباب..
🔺️🔺️🔺️في الوقت الحاضر🔺️🔺️🔺️
مسحت نجاة دموعها ومشت طلعت من الكوجينه متوجهه للصاله..
لما وصلت فيها لقاته يتكلم بالتليفون وهو عاطي بظهره للباب..
كان صوت منخفض بعض الشي..
/امورها تمام وصحتها كويسه!!؟.....باهي ماقالتش امتى بتروح..تي نسأل عادي يانسرين خيرك!؟
وخرت عن الباب ومشت بسرعه وهي تذرف في الدموع وملامح الغضب باديه ع وجهها..
سمعت باب الصاله تسكر..غمضت عيونها..
حركت رقبتهاا يمين ويسار..فتحت عيونها..ومشت للكوجينه وهي تفتح في يدها اليمين وتسكر فيها...
🍃🍃🍃🍃🍃
"محلاها ريحة مسك الليل"
علي الواعر:عمك لطفي ومرته ورده الله يرحمهم كان يحبوها هلبه..
اميمه بإبتسامه..
/الله يرحمهم..جنانهم ديما ريحته حلوة..مسك الليل..الفل والياسمين والورد البلدي عمري ماشفت جنان احلى من جنانهم..
علي:حناك الهانم ام العز الله يرحمها كانت تحب تزرع الورد جنانا هدا كان معبي ورد..
اميمه بإبتسامه..
/هانم عاد..
ابتسم وقال:الله يرحمها..ربي عطي لطفي الله يرحمه مراة زيها بالزبط..وعطي هالمراة ولد عاق زي ماعطاها هي بالزبط..
تبدلت ملامح وجه اميمه للحزن..
علي:بوك ولدي الكبير يقعد ولدي مهما دار لكن اللي داره في امه مش قادر ننساه..ولاقادر ننسى اللي داره مختار في لطفي وورده الله يرحمهم..
اميمه بألم..
/ماقعمزتش معاك يش نقلب عليك المواجع ياجدي..
ابتسم وقال..
/عارفك تبي تغيري جوي..زبطتك من لما قلتي تعالى نشربوا القهوة في الجنان..
اميمه بضحكه..
/قبل نبي نهدرزلك ع اسامه..
فنص وقال..
/دار حاجه ضايقاتك!؟
ضحكت وقالت..
/لالا..قبل بنحكيلك ع موقف صار معاه اليوم..
ابتسم وقال..
/احكي...
🍃وحكت اميمه عن الموقف الطريف اللي صار لأسامه مع احد المرضى والحاج علي يسمع ويعلق ع اسامه تعليقات مضحكه..خلا دموع اميمه تنزل من الضحك عليه..
وفعلا..نجحت اميمه في التخفيف عن جدها شويه من همومه واحزانه...
🍃🍃🍃🍃🍃
الساعه 3:00بعد منتصف الليل..
كانت ليلة من ليالي العشر الاواخر..
طلعت طوبى من خلوتها اللي قعدت فيها اربعه ساعات متواصله وتوجهت للكوجينه...
لقت امينه تجهز في السحور..
ساعدتها..وقعمزوا تسحروا مع بعض..
بعد السحور خلت امينه تطلع من الكوجينه وهي غسلت الماعين وشطبت الكوجينه..
بعدين دارت كوباية بابونج وحطتها في صغيرة زينتها بزهور الاقحوان اللي كان في منه باقه محطوطه في مزهريه ع طاولة الكوجينه..
ومشت طلعت بإتجاه غرفه المكتب..
وصلت فيها..دقت الباب..
"ادخل"
فتحت الباب وخشت..
لقاته مقعمز ع الكنبه وهو فارد رجليه عليها ورافع راسه فوق وعيونه مغمضات..
طوبى:جاتك سوناتا!؟
هو قال..
/ايه عطتني الدوا..
نزل راسه وشافلها وهو يقول..
/امتى نخلص بس مرار المضاد الحيوي نستطعم فيه..
حطتله كوباية البابونج ووخرت قعمزت ع الكرسي وهي تقول..
/الاعراض خفت هلبه..كم يوم وتفتك خلاص..
شاف للكوبايه وقال..
/مليسا!؟
طوبى:يادي المليسا..لا بابونج..
خداها وقال..
/خير من بلاش..نزل الكمامه وبدي يشرب..
طوبى:فتحت تليفونك..
مختار:فتحته من هني ونزل سيل اتصالات من هني ولت بداله نسكر من هدا يكلمني هداكا..راسي صدع..
طوبى:كلماتك فاتن؟
مختار:اساس الصداع ماسكرت منها لين قريب قسمتلي راسي..
طوبى بضحكه..
/حرام عليك..
مختار:مابعد العيل اللي بتجيبه كيف يدير معاها..
طوبى:حتكون احلا ام تو تشوفها..
قعد يشرب وهو ساكت..
طوبى بإبتسامه..
/جنوني قلبي..فهالوقت قبل لترقد لازم نحكيلها قصه..
ابتسم وقال..
/استاحشتها موت لما تكلميها عطيني نكلمها..
طوبي بإبتسامه..
/حاضر..
شافلها بإستغراب وقال..
/دقيقه شن هما القصص اللي تحكيهم لطفله في عمرها!؟
طوبى بحماس..
/قصص مصورة للصغار اللي في سنها نقرالها فيهم..
مختار:شن تفهم منهم!؟..
طوبى:مش مهم تفهم هلبه في هالعمر..المهم تنميه قدرتها الكلام وفي نفس الوقت نعودها تحب الكتب من هالعمر..
في اليوم نقرالها مرتين..مرة في النهار نقعمزها حداي نقرا ونوريها الصور ونشرحلها وهي تلقط بعض الحاجات..وفي الليل وين تجي ترقد نحطها في فراشها ولا ع السرير وتقعمز مقابلها ونبدا نقرا..
هو بشي من الدهشه..
/حلو..باهي الحاجات هادي ديرها الام بس ولاحتى الاب يقدر عادي!؟
حست بفرحه لما بان اهتمامه بشي يخص الاطفال هدا يعني يفكر في العيل اللي بيجيه..جاوباته بحماس اكبر..
/اكيد ومن الاب تجي احلى بهلبه..شوف الاب معروف ديما مشغول وبرا الحوش ونقولوا نعطوه عذر لكن لما يخصص لصغاره ساعة ولاساعتين في اليوم..يقرالهم يهدرز عليهم يلعب معاهم يضمهم يبوسهم يحتويهم..المهم يصنع معاهم علاقه حلوة تخليهم يحبوه ويحسوا بالامان لما يشوفوه..
هو قال..
/الباين تحبي تخصصك هلبه!..
طوبى:الصغار واي شي يخصهم نحبه ومهتمه بيه..
كمل شراب البابونج وحط الكوبايه في مكانها بعدين قال..
/توا زي مااني سايرتك وكليت معاك انتي سايريني وديريلي زي ماديري لجنه اقريلي حاجه قبل لنرقد..
طوبى:شن نقرالك؟
مختار:روايه قبل لنمرض كنت نقرا فيها..تلقيها في المكتبه..اشرلها بيده..خشي يمين تلقيها..
ناضت وهي تقول..
/شن اسمها!؟
مختار:الأبله..
رفعت حواجبها ونزلتهم ومشت وين ما قاللها..
خشت لحجرة صغيره..
تفاجئت لما شافت كم الكتب اللي فيها..
لكن هالمفاجأة تبدلت للصدمه لما شافت ركن من اركان المكتبه..طلعت بسرعه منها ومشتله..
وقفت قدام الكنبه وقالت بصدمه..
/مش عارفه كان اللي شفته حق ولااني نتخايل..
ضحك وقال..
/شن شفتي!؟
طوبى وهي مصدومه..
/كتب ابن القيم كلها..شفت الموطأ لآمام مالك..البدايه والنهايه لإبن كثير..اللي شفته حق ولااني من كثر مادورت عليهم وخاطري نقراهم بديت نتخيل فيهم!
ابتسم وقال..
/لا ماتتخيليش موجودات فعلا..
طوبى بعدم استيعاب..
/راك تقول قاريهم..
هز راسه وقال..
/نصهم مش كلهم..قاعد نقرا فيهم..
قعدت تشوفله بصمت للحظات..
هو قال بإبتسامه..
/هيا جيبي الروايه..
رفعت حواجبها ونزلتهم تعجبا ومشت وخلاته يضحك...
🍃ولت للمكتبه دورت ع الروايه اللي قال عليها لين لقتها ومشتله بيها..
قعمزت ع الكرسي وقالت..
/عيونك تعبانات؟
مختار:شويه..
هزت راسها وفتحت الروايه ع الصفحه اللي كان حاط فيها فاصل..
وبدت تقرا...
هو كان يسمع بإنسجام لكن هي كانت تقرا وتفكر في الكلام اللي تقرا فيه..لعند ماوصلت في جزئيه وقفت عندها هلبه...
《إن كان يظهر عليك ويمكن وصفك بالبراءة، والإيثار، واللطف، والأخلاق الرفيعة، والصدق، والوضوح، والعطف، ومحبة كل من حولك حيث أنك لا تملك ضغينة تجاه أحد فأنت "أبله" بكل تأكيد!
ليس سبب هذا أن هذه الصفات سلبية، وإنما لأنك تعيش في
وسط المجتمع المُنحط والفاسد والمليء بالقذارة الأخلاقية، مجتمع يرى البراءة سذاجة، واللطف ضعفًا، والأخلاق يراها موضة قديمة، والصدق دليل عدم قدرة على المراوغة... وهكذا، صار من يعيش بقلبٍ سليم هو الأبله، والماكر في مجتمع الذئاب هو الذكي!
ويا لروعة تولستوي إذ يختصر كل حديثنا بقوله:
"كن طيباً على الدوام، واحرص على أن لا يعرف أحد أنك طيب."》
سكتت وعاودت قرت الجزئيه بعيونها..
مختار:متفقه مع الكلام هدا!؟.
طوبى:هلبه..شافت لمختار وقالت..من واقع تجربه..
مختار:مع هدا ماتعلمتيش..
طوبى:بالعكس تعلمت هلبه..
مختار:اللي ديري فيه يبين العكس..
ابتسمت وقالت..
/لا نهائي..اللي درته مش ع خاطرك انت..ع خاطر مرتك والعيل اللي بيجي..وفي نفس الوقت بش نوريك انت شني واني شني..
هز راسه بإبتسامه وقال..
/كملي يابلهاء..
ردت عليه تقول..
/باهي ياذكي..
قعد يضحك..
وهي تشوفله بإبتسامه امتعاض..
هدا ضحك وقال..
/اما انتي...
ويقطع عليه رنين هاتفه..
هو بملل..
/هدا منو اللي خطرت عليه توا!؟
ناضت طوبى ومشت للطاوله خدت التليفون وشافت المتصل..
احمر وجهها خجلا شيئا فشيئا..ومشتله بيه مدتهوله..
هو لاحظها وشاف يدها كيف كانت ترجف لما مدت التليفون..
خداه وشاف المتصل..قام عيونه فيها ورفع حواجبه..
هي ولت قعمزت وغاصت بنظرها في الروايه..
وهو فتح الخط ورد وعيونه عليها..
/تارقي..
قلب طوبى قعد يدق بسرعه..
"سي مختار..لاصوتك يقول ان حالك باهي"
مختار:ايوه عطيهالي عطيهالي..
"انت موسوس كبير الوسواس هو اللي جابلك الكورونا وتويجيبلك العين بعدها"
مختار بضحكه:اعوذ بالله منك توا هدا كلام ينقال لراجل مريض..
"ياراجل انت تمرض بلاد ومايجيك شي"
مختار بضحكه..
/الحق مش فيك الحق في اللي رد عليك..
"المهم حالك باهي امورك تمام"
ابتسم وقال..
/الحمد لله..امتى يكون معاك حد يخاف عليك ويرد باله ع صحتك غصب عنك تبرا..
وطوبى تسمع وكادت تتبخر من الخجل وعيون مختار عليها..
"ربي يخليهملك ويديمهم عليك"
مختار:آمين..
"هي مالا مانطولش عليك لاباس وتصبح ع خير"
مختار:مشكور جدا..وقدامك كل خير.
نهي مختار المكالمه وقال..
/شخص راقي جدا..حط التليفون ع يد الكرسي وقال..لما عرفته عن قرب تمينته لو كان اقرب من كونه جار..من فترة قبل شهرين كلمني عن مشكله ما صايرة لسوريين عايشين في البلاد اجراءات وامور معينه بعد مامشتيلهم امورهم سألته عنهم قال ناس يهمني امرهم..وطبعا لأن طبعي قصقاص سألت من هني ومن هني عرفت ان في علاقة عاطفيه تربطه ببنت من العيله اللي كلمني عنهم..
طوبى وهي شاده دموعها بقوة..
/ايه قالوا خطيبته..
مختار:اها..هز راسه وقال..كملي قرايه كملي..
خدت نفس وولت تقرا..
كانت نبرة صوتها مخنوقه بعض الشي..هو قعد يشوفلها للحظات بعدين غمض عيونه...
#الحجر
#طوبى
...يتبع...
