#طوبى "جنة طوبى"
#جمان_فريد
#الجزء_125"إمتحان/في السراء"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
حقيقة الابتلاء:
قال الشيخ #ابن_عثيمين ـ رحمه الله ـ :
إذا أُصبت بالمصيبة فلا تظنّ أن هذا الهمَّ الذي يأتيك، لا تظن أَنه يذهب سُدىً، بل ستُعوض عنه خيرًا منه، سَتُحطُّ عنك الذّنوب كما تُحطّ الشجرة ورقها، وهذا من نعمة الله.
[شرح رياض الصالحين]
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃كل شيء معك جميل..جميل للغاية🍃
________________________________________
وأنتشر خبر حمل طوبى في العيله وفرحتهم بيه كانت كبيرة وكأنه أول حمل ليها..وكأنه صار بعد شوق صبر وانتظار..
ع اللي مرت بيه وعاشاته اي شي حلو يصير معاها تكون فرحتهم بيه مضاعفه..
وهي هالمرة عاشت شعورالفرح بالنعمة هادي عاشاته بحذافيره وكأنها تبي تعوض نفسها عن الفرحة اللي انحرمت تعيشها لما حملت بجنة.
ويااه ع فترة حملها بجنة برغم حبها الشديد لبنتها أحيانا تتمنى لو تنمسح هديكا الفترة من ذاكرتها واحيان تانيه تقول في نفسها ماصبرني ع مرار هديكا الايام الا وجودها...
🍁لكن مافي حد كان فرحان قدعبد القيوم..
عبد القيوم ماعرفش معنى السعاده في حياته الا لما ولت طوبى من نصيبه وهالسعاده توا اضاعفت بوجود مايزيد يربطها بيه اكثر واكثر طفل ليه هي امه وهادي احد امنياته اللي ياما حلم بتحقيقها ليل ونهار...
🌾ولأن هالنعمه دخلت عليهم سرور عظيم مانسوش يشكروا اللي عطاها...
طلعوا هما الزوز صدقات..وتبرعوا لأحد مكاتب الزكاة اللي توزع في المعونات للناس المحتاجه في شهر رمضان..
وطوبى كعادتها استغلت هالمشاعر الحلوة اللي عايشتها خير استغلال ونزلت منشور ع صفحتها موضوعه عن شكر النعم بدون ماتحكي اي تفصيل يخصها ومانستش تتكلم عن النعم المنسيه اللي من كثر ماتعودنا عليها ننسوا نحمدوا الله عليها في كل وقت وحين لأن فقدان وحده منهم ممكن يوقف حياة كامله..
☘☘☘☘☘
"تو ندزلك قائمة بالحاجات المفروض تاكليهن وتشربيهن ومانوصيكش حبيبتي كان حسيتي روحك ماتقدريش ع الصيام ماتصميش ربي عاطيك رخصه"
طوبى بإبتسامه:حاضر امي حاضر...
"حبيبة امك ردي بالك ع روحك وامتى تبي احكي معايا فوني ديما معاي"
تعبوا عيونها دموع وهي تقول بإبتسامه..
/اكيد من غير ماتقولي..
"نجك ليا ياقلبي كل عام وانتي بخير"
طوبى:كل سنة وانتم طيبين سلميلي هلبه ع عمي الصابر..
"يوصل بنتي يوصل وحتى انتي سلمي ع عبادي وهلك"
طوبى:يوصل..تصبحي ع خير..
"قدامك كل خير حبيبتي"
وماسكرتش طوبى لعند مانهت كاريمان المكالمه وبعدها على طول اتصلت بسالمين..
🍁ع خشة عبد القيوم للشقه وهو جايب حاجات حطهم في الكوجينه بعدين مشي للصالون..
خشله وقعمز وهو يشوف لطوبى كيف تكلم في سالمين ويسمع في سالمين شن تقول لأنها مكالمه فيديو..
🍃طوبى:اني حامل خالتي.
"حامل!!"
طوبى بضحكه:ايه ايه..
زادت ضحكت طوبى بعدين قالت..
/غير ليش البكا ياوليه يابكايه انتي عطبتي حال عيونك..
ضحك عبد القيوم وهي شافتله بعتتله قبلة في الهواء وهو ردها وابتسامته ع وجهه..
"لمن طيري في البوسات"
انفجعت طوبى وقالت بخجل..
/مش كنتي غامة وجهك وتبكي!
"عندك حق يامينه عندك حق وماعليك ملام حتى هو عبادي'
حطت طوبى يدها ع عيونها وهي تضحك بخجل وعبد القيوم يضحك بكتمان..
"نجك يابيبا نجك ياحبيبتي ربي يتتم حملك ع خير"
نزلت يدها وقالت بإبتسامه خجل..
/آمين..
"لكن هاه افطني لروحك شيل وحط وتعب زايد وجهد لا وكانك حسيتي روحك مش قادره تصيمي افطري..واسمع عبادي فوت جو العزايم الله يربحك.."
طوبى:لالا خالتي عادي صحتي كويسه واموري تمام خليه يعزم خليه ويتجكتر ع صحابه..شافتله وهي ترقص في حواجبها بغرور مصطنع وهو ماغير يضحك وخلاص..
"ياودي لنقانه هالعبادي ربي راضي عليه اللي خلاك من نصيبه"
طوبى قالت بإبتسامه..
/حتى اني ربي يحبني اللي خلاه من نصيبي..
ابتسم وهو يشوفلها بنظرات كلها حب وهي تبادل فيه نفس النظرات..
"باهي ياطيور الحب فهمنا.."
انحرجوا الزوز وهما يضحكوا..
وكملت سالمين كلامها وهي تقول..
"المهم ياعبادي مانوصيكش عليها حتى جنه امسكها معاها "
طوبى:مساعدني فيها هلبه وراد باله عليها زي عيونه..
"مش غريب عليه..تنهدت وقالت..هاه قولي شن استعدادتك لرمضان عاد خلاص بكرا اول يوم"
☘وقعدوا يهدرزوا ع الاستعدادات لرمضان وعبد القيوم خلاهم ومشي لدار النوم وفي هالأثناء كانت جنه راقدة في دارها☘
🍃وفي شارع القهوة..
كانت هالليله رمضانيه بإمتياز...
هالعام اول مرة تندار عاده جديده في الشارع وهي تزيينه لإستقبال الشهر المبارك..
وحتى في عايلات في الشارع زينوا منازلهم ابتهاجا بدخول الشهر الفضيل..
🌙"افتحي الضي مروة"
نفذت مروة طلب امها ويشوفوا بعده منظر حلو بالمرة يدخل ع القلب السرور..
سرب كبير من اهله ونجوم مزينين وسط الشقه..
فايزة من كثر ما ابهجها المنظر بدت تغني..
/اهلا رمضان..رمضان جانا..
وبناتها شاركوها الغني وهما في قمة الفرح..
🌙🌙🌙
"ايوه من غادي محمد من غادي"
محمد المهدي:اهو ركبته..
سدرة المهدي ببهجة وحماس.
/الكوجينه ولت تهبل..
مرت بوها قالت..
/اما احلى الزينه متاعها ولامتاع الصالون..
سدرة:الزوز احلى من بعض خالتي..
محمد المهدي:خلاص معاش تبوا شي!؟
مرت بوه قالت..
/جيب عصير المانجا بس..
محمد المهدي:تم..هي السلام عليكم..
ردوا عليه السلام بعدين اخته قالت..
/غير امتى يجي غدوة بس..
ضحكت سدرة وقرصتها من خدها بلطف..
🌙🌙🌙🌙
"هاه شن رايكم"
جوري بفرح:يهبل عمتو..
سميرة:يعطيك الصحة يانسرين..
نسرين بإبتسامه:سلمك..قعدت الصاله بس..
سميرة:بكري فرشت جلسة النجع في هديكا التركينه اللي فضيناها..
نسرين؛فرشتيها!؟ خلاص نمشوا نعلقوا الزينه متاعها توا..
وطلعوا من دار المعيشه بأتجاه الصاله وجوري لحقتهم وهي متحمسه وفرحانه..
🌙🌙🌙🌙
"محلاه ماما..محلاه..نشوم 'نجوم' "
غرفه بضحكه:ايه نجوم..
مهاب اشر ع حاجه وقال..
/وهادي!؟
غرفه:هلال..
اشرلها ع حاجة تانيه وقال..
/وهادي..
غرفه:هادي كلمة اهلا رمضان..
اشرلها ع حاجه ع الطاوله وقال..
/وهادي!؟
غرفه بملل..
/بخارة..
شد ذقنه وقعد يدور بعيونه ع حاجة جديده يسأل عنها وامه انشغلت بتصوير الزينه..
☘وبرا دار المعيشه لباب الحوش الدخلاني..
استقبلت فردوس هاديه اللي كانت خاشه وهي شاده شناطيها..
سلموا ع بعض بعدين شدت عنها شنطه وخشوا داخل...
شافت هاديه الزينه في الممر ابتسمت وبدت تغني..
/وحوي ياوحوي..
وفردوس تضحك..
☘وفي دار البنات..
كانت اريج مقعمزه تقرا للإمتحانات اللي حيكونوا في اول اسبوع من رمضان..
🌙🌙🌙🌙
"هالعبرج خش علينا جديد ياكبادي!"
صفاء بضحكه:عبرج شني ياعمتي حاجات حلوة هادي .
نجمه؛مش لينا يابنتي.
علقت عواطف الفانوس وقالت..
/هكي باهي ياراما؟
راما اللي كانت تصور في الزينه شافت للفانوس وقالت..
/مية ميه..
وكملوا تزيين الصاله ونجمه تتفرج عليهم بعدم تقبل بعدين غيرت نظرها عنهم لأحفادها تيم واحمد لقتهم شادين فوانيس صغيره بالضي ويدوروا حوالين امهاتهم..
🍃🍃🍃🍃
الساعه 10:30ليلا..
مقعمزات في دار المعيشه حوالين سفرة قهوة وصحن معبي طروف كيكة زمنيه وحداهم التلفزيون مفتوح ع قناة مصريه جايبه مسلسل مافي حد مهتم لأمره..
☘فردوس:الشربه هي والبوريك اساسيات وبنديروا معاهم غدوة ان شاء الله عصبان وطاجين جبن وسويسرول حار وسلايط..
هاديه:خل نزيدوا عليهم فركسي الفركسي عندي زي الشربه والبوريك في رمضان..
فردوس بإبتسامه..
/حتى اني نحبه ديريه ديري..
غرفه:وطاجنين بيتزا ع الماشي..
فردوس:اول يوم مهناك ماكله ياغرفه..
غرفه:اني مستعده نسيب كل شي الا البيتزا في رمضان..
فردوس بملل:ياودي باهي ديري..
ويجي لفردوس اتصال ع هاتفها شافاته بعدين قالت..
/خالتي صفيه جت..
وناضت ومشت طلعت من حداهم..
هاديه بإبتسامه حنين قالت..
/شبح شن بدير اميمه اولها رمضان مع راجلها في الغربه..
غرفه:هدرزنا بكري قالت متعرفه ع عائلات صحاب اسامه ليبين وعرب من جنسيات تانيه قالت منظمين اجواء لرمضان غادي ومش هكي وبس صار بينها وبين آلاء اتصال اتفقوا ع يوم يفطروا فيه مع بعض..
هاديه وهي مبتسمه قالت..
/كويس كويس..لكن اكيد الحمل بيتعبها ع كلام امها تتوحم..
غرفه:مش قوي وحمها نحس فيها تقدر تصيم رمضان كله.
وتخش عليهم صفيه وهي تقول..
/السلام عليكم..
ابتسموا وناضولها بش يسلموا عليها..
☘وفي المربوعه الخارجيه..
عبد المطلب:مفروض تبات في حوشك وتجي ع وقت الفطور بس..
رفع حواجبه تعجبا وقال:علاش!؟
عبد المطلب:ماني عارفك مش مهني روحك وحتتسبب في مشكله تانيه..
بإنزعاج قاله:بوي رمضانيات ماطلعنيش عن طوري..
عبد المطلب مسح ع ذقنه وهو يقول..
/اقعد تعامل مع بوك هكي وكان ربحت حاجه هدا وجهي.
تنهد حسين بملل بعدين قام هاتفه وشغل روحه بيه وبوه يشوفله بإزدراء وهو يحرك في راسه يمين ويسار..
🍃🍃🍃🍃
روح عبد القيوم بعد صلاة التراويح وطول خش لدار النوم ورقد..
وقعدت طوبى بعد ماادت صلاة التراويح مقعمزه في مصلاها تقرأ القرآن..
ولأن القرآن كان ديما رفيقها الدائم في كل مراحل حياتها الصعب منها والجميل كان تلاوتها ليه ساهله وفيها لذة مافيش احلى منها خلتها بدون ماتحس مكملة خمسه اجزاء في وقت قصير..
بعد ماكملت تلاوة خدت هاتفها وخشت ع الفيس بش تنزل منشور جديد في صفحة"الحنة" بعد المنشور اللي نزلاته ع البرنامج الرمضاني اللي كان مثبتاته اعلاها..
منشورها الجديد تكلمت فيه عن صداقه القرآن الكريم كلامها كان طالع من قلبها مش مجرد كلام انشائي لغرض النصح..
هي تبي كل من يقرا كلامها يحسه كل حرف فيه بقلبه ويخلي روحه تتلهف لصحبة كلام مولاها بالذات فهالشهر الكريم اللي سموه ع اسمه..شهر القرآن..
🌼بعد مانزلت المنشور..خشت ع صفحتها الشخصيه وحتى هي نزلت فيها منشور مرفق بصورة رمضانيه وكتبت عليها (رمضان ياحبيب..ليتك دوما قريب..)
وحار المنشور هدا ع تفاعل اغلب اصدقائها..
عيلتها وصحباتها ومعارفها،وفي عز قرايتها لهالتعليقات خطرت عليها فاتن..
طلعت من الفيس بوك وخشت ع الماسنجر تشوف كان حسابها نشط وتلقاه لتاني يوم ع التوالي مسكر..
تنهدت بقلق وقالت ..
/حتى هو معاش بان بكل..يارب قلبي مقبوض..يارب خير يارب...
🍃🍃🍃🍃
واول ليلة سحور في رمضان..
غالبا يكون فيها النوم مسيطر ع الناس بسبب تعودهم ع نظام معين ماشيين به ليهم ما يقارب السنه والعجيب ان نظام شهر واحد فهالسنة يجب ماكان قبله..
🍁🍁🍁
بس في من قعد ساهر هالليله بعد السحور..
زي طوبى وعبد القيوم اللي كانوا مقعمزين في بالكونة شقتهم ياكلوا في المحلبيه"المهلبيه.." وهما يتبادلوا في الاحاديث..
☘طوبى:ايه نعرفه الخشاف لكن ولا مرة كليته..
قاللها:لما كنت في بنغازي تحديدا في الفترة اللي سكنت فيها مع عيلة الحاج جبريل،لازم في كل سحور يحضر الخشاف..
طوبى:اممم..فكرتني بأيام زمان واني صغيره في الابتدائي بابا الله يرحمه قبل الفجر بنص ساعه لازم يشرب فنجان قهوة نتفكر في سدرة كانت تعارك وتقوله مش كويسه وهو مايدروش فيها..ضحكت وقالت..لكن قعدت وراه لين خلاته يبطل هالعاده..
ابتسم وقال:الله يرحمه..انا سمعت منه قبل انه كان متعود يخش للحوش قبل المغرب بسفنز وعسلة وزلابيه..
طوبى وهي مبتسمه قالت..
/ايه بس السنين الاخيره معاش دارها..
سكتوا شويه بعدين هي شافتله وقالت..
/دقيقه دقيقه..في اول رمضان بعد وفاته انت جيت تفطر عندنا وجبت معاك سفنز وعسله وزلابيه..كنت قاصدها؟
ضحك وهو يشوف لصحنه متاع المحلبيه..
ضحكت بعدين قالت..
/تعرف فرحت بيها هلبه الحركه هادي..
شافلها وقال بإبتسامه..
/هذى اللي كنت نبيه..
تنهدت من قلبها بعدين شافت لبطنها وقالت..
/انت ياللي داخل..كان جيت ولد نبيك تولي زي بوك تنسخه نسخ ماتخلي منه حاجه..
هو بضحكه قال:وكان جيتي بنت نبيك تجي احلى من امك عشان نحبك اكثر منها..
رفعت عيونها فوق وقالت..
/يارب خليه ولد يارب...
قعد يضحك بعدين قال..
/بجد من كل قلبي نتمناها تجي بنت..
شافتله بإبتسامه وقالت..
/باهي كان جت بنت في بالك اسم ليها..
قاللها:ايه..نبي نسميها ع جدتي فاطمه..
قالتله:حلو هلبه اسم فاطمه عمره مايقدم وعنده هلبه اسماء دلع..فطومه وطومي وتامي..
وهو يتأمل فيها قال..
/انتي الحلوة وكل دقيقه تحلي في عيني اكثر من اللي قبلها..تو مش يقولوا الراجل يخف شغفه بالمراة اللي يحبها بعد تولي من نصيبه اللي يصير معايا انا العكس تماما..
ضحكت وقالت..
/غير مازال طاهق خل نسكروا سنه وشوف شن يصير معاك..
شافلها بطرف عينه وقال..
/مش راد عليك..غير نظره القدام وهو يقول..مش حنرد..حرك راسه بالنفي وقال..مش حنرد..
قعدت تضحك وهو رجع ياكل ماقعد من المحلبيه بإنفعال مصطنع..
ساد الصمت بينهم شويه بعدين هو حط الصونيه وقال..
/قلبي..
من نبرة صوته حست انه بيقول كلام مهم شافتله بإنتباه وقالت..
/نعم..
تنهد وقال:كيف ماتعرفي في شهر رمضان تتصفد الشياطين يعني يضعف كيدهم ويريحوا في حالة وهن ومفعول اعمال السحر وماشابها حتى هو يضعف واجد لهذا لازم تستغلي الشهر هذى كويس..البقرة والرقيه ردي بالك تفوتي يوم من غيرهن وع الفطور اول حاجه لازم تنزل لجوفك الميه المرقيه وبنبه عليك مرات تشوفي كوابيس كل ليله واحلام تخوف مادوريهنش نهائي الاحلام هذي محاولات بائسه من خادم السحر عشان يخليك خايفه خليك كيف ماعرفتك قويه بإيمانك وقاومي بيه..
برغم خوفها ابتسمت في وجهه وقال..
/بعون الله..
ويرتفع صوت المؤذن بالآذان الكاذب قالتله..
/خل نوض نصلي الوتر..
عبد القيوم:صبي ع مهلك..
ابتسمت وناضت بهدوء وهو خدي الصواني وناض معاها بعدين خشوا داخل...
☘☘☘☘☘
تاني يوم..
الساعه 5:30عصرا..
في الكوجينه..
طلعت غرفه طاجين البيتزا من الكوشه وهي تقول بشهيه..
/يمي يمي..
مئاب اللي كانت مقعمزة جنبها قالت..
"إتيني"..عطيني..
قالتلها؛من عيوني ياعيوني انتي..
"معانا اتصال جديد ونقولوا الو رمضانك مبروك"
وتخش اريج فهاللحظه وهي تسمع في الراديو بإزدراء شافت لغرفه وقالت..
/الدنيا صيام وشهر مبارك واسمعيها كيف تكلم في المذيع!
غرفه:مفضاهم بجديات..ومدت طرف بيتزا لبنتها بعد برداته
والحركه هادي تجي في عيون التوأم اللي خشوا عليهم والزوز مع بعض يقولوا..
"واني!؟"
غرفه:من بكري وانتوا تاكلوا..
مهاب:نبي بيستا..
ضحكت اريج..
غرفه:عطيتك بكري..
اواب:نبي هادي..
غرفه:اطلعوا من حداي احسنلكم..
مهاب:لالا..نبي بيستا..بيستا..بيستا..
رمت شبشبها وطبست بتاخده طلعوا الزوز يجروا..
اريج بضحكه:نجيهم ياربي..
☘ويطلعوا الزوز للجنان من القدام اواب يبكي وينق ويقول "نبي بيستا" ومهاب ياخد ويحدف في الشلايك وين مايجي من الغضب..
ع خشة حسين للحوش وتفوت قدامه فردة شبشب امه..
سكر الباب وشاف حالتهم قاللهم..
/خيركم!
مشوله يجروا..
اواب:نبي بيستا..
حسين بضحكه:قوللهم يعطوك..
مهاب بغضب:ماما تبيش..
قاللهم بإبتسامه:اللهم إني صايم..بروا جيبوا الكورة خل نلعبوا..
انطلقوا الزوز جابوا اكثر من كرة وهو خدي وحده منهم وبدي يلعب معاهم..
وبوه واقف في روشن المربوعه يتفرج عليه بنظرات امتعاض..
☘☘☘☘☘
قبل المغرب بربع ساعة..
خش عبد القيوم للشقه وهو جايب معاه فردتين سفنز وشكارة عسلة وزلابيه..
وهو ماشي للكوجينه شاف جنه مقعمزة تلعب بألعابها قاللها..
/جنونه..
شافتله بإبتسامه وقالت..
/حوبادة..
بعدين سيبت اللي في يدها ولحقاته..
خشت ورا للكوجينه واشرت ع شكارة العسله وهي تسأل..
/شنو؟
بإبتسامه قال:عسلة ياعسله..خدي منه شويه وعطاها..
خدتها وكلت منها بعدين غمضت عيونها ورفعت يدها وهي مسكرة بإصبعها السبابه ع الابهام وفاردة باقي اصابعها وقالت..
/لتيتة"لذيذة"
قعد يضحك عليها وهو يقول..
/الله يبارك الله يبارك..
ع خشة امها اللي كانت تقرا في القرآن قالت بإبتسامه..
/الله..!..خل نحطهم في السفرة ونصورهم..وطلعت تجري بش تجيب هاتفها..
☘وصورت سفرتها ونزلتها ع قروب العيله اللي كان معبي قلبها بصور فطورهم بعد مابعتت هي كلهم مدحوا في سفرتها وتكلموا ع العسله والسفنز..
🌼وتنزل اميمه سفرة فطورها هي واسامه ع الفيس ولاقت اعجاب الجميع وعزوزتها علقت بدعوات جميله..
🌼زي مانزلت خديجه سفرة فطورها حتى هي وحرصت حرص شديد كعادتها ع المبالغة للتباهي وبنتها ماكذبتش خبر وورت المنشور لنساوين عمامهم اللي يجوا يفطروا في حوش العيله وخلت مرت بوها تنقهر..
🌼وشتان بين ابتسام وسدرة وسميره اللي خلوا اجواء اول يوم رمضان من احلى مايكون..
لكن سميرة شدتها في جرة نضال..
☘"العام الجاي بديرلنا اريج سفرة زي هادي"
نضال:ماقلتيها ع خالتها!
سميرة؛لامرت اخر العنقود وضعها غير هي تلم العيله راهو..
نسرين:صدقتي مرت الصغير بروحها مش زي سلفاتها..
محمد شنيبه:خلوا الراجل يفطر وقفتوهاله في رقبته..
نضال؛ع اساس معدل عليهم واللي عطاك مغليه وسميرة ياغالي ماهم رايينها كان من جمعه للجمعه..
خبطه بوه بالسبحه ع قفاه وهو يقول..
/ماتنعطاش وجه..
قعد يتحسس في قفاه وهو يضحك وامه واخته ومرت بوه والصغار يضحكوا عليه..
☘☘☘☘
"هذا كله داراته سميتي"
المهدي:ماشاء الله ع بنت بوها ماشاء الله..
ابتسمت سدرة المهدي بخجل..
يزن:اسمعي كل ليله بنعكسوا في النادي مع الجماعه تكميلنا حافظات زي العاده بش نرفعوهم معانا..
سدرة المهدي:ادلل..
ضحك بوها ومسح ع شعرها..
ويجيهم صوت علي وهو يبكي..
امه قالت:شم الماكله هالخنفورة..وناضت ومشت للدار وهي تقول..هاني جايه يانشفه..
وهما يسمعوا فيها ويضحكوا..
☘☘☘☘
وفي كوجينه حوش طوبى..
تلاقوا اريج وغرفه وهاديه ع الماعين وطولت الهدرزة قعدتهم في الكوجينه..
ع خشة مهاب وهو يقول..
/نبي ميه..
اريج:حاضر تو نعطيك..
ويجيهم صوت حسين اللي كانت تغلب عليه البحه لما يعليه وهو يقول..
"حتى اني نبي ميه"
طلقت غرفه اللي في يدها ومشت بسرعه طلعت من الكوجينه وخلت اريج وهاديه يضحكوا عليها..
لكن مهاب فهم اللي شافه ع قد عقله..
طلع يجري للجنان اللي كان واقف فيه حسين وهو لابس عربي بش بيمشي للصلاة..
وقف قدامه وقال..
/ماما هربت..تخاف منك..
قعد يضحك حسين وهاديه طلعت بالميه وهي تقول..
/اشرب ياافندينا..
مهاب تفكر الميه خش يجري وهو ينادي..
/هاريج..
حسين بعد شرب ميه قال بإبتسامه..
/مانبوا شي!؟
هاديه:بعض الناس من بكري خاطرهم في البيتفور..
مد الطاسه وهو شاد ابتسامته وخدتها هاديه وهي تبع فيه بعيونها بعد مامشي وهي تضحك..
☘☘☘☘
وبعد ماصلوا العشاء كلهم غطوا في نوم عميق ماعدا اريج اللي كانت تصلي في التراويح..
بعد ماكملت صلاة طلعت للكوجينه وبدت تجهز في سفر القهوة والحلو ع مرواحه عبد المطلب وحسين من صلاة التروايح..
☘"في حد في الكوجينة"
اريج لبست شاربتها كويس وقالت..
/خش خالي خش..
ويخش حسين وفي يده سفرة البيتفور وهو يقول..
/اريج شن جو..
بإبتسامه قالت:تمام الحمد لله..
حط السفرة ع الطاوله وقال..
/واتيه القهوة..
قالتله:توا بنديرها..
قال:مرة بالله عليك..
اريج:حاضر..
مرر نظره ع الكوجينه وقال..
/مسكته..
اريج:كلهم راقدين..
هز راسه بعدين قال..
/لما توتي القهوة رني الجرس..
قالت:حاضر..
مشي طلع من الكوجينه وهي قدمت لسفرة البيتفور وقالت بضحكه تعجب..
/من قاله!!؟
☘وفي هالأثناء ناضت غرفه مشت خشت للحمام غسلت وجهها بعدين توجهت للدار..
لما خشتلها سمعت في هاتفها يرن مشت للدولاب فتحاته وطلعاته منه ولما تشوف المتصل تبان ع وجهها ملامح الأسف..
خدت نفس وفتحت الخط وردت..
/السلام عليكم..
"وعليكم السلام غرفه صح فطوركم"
غرفه:سلمك صح فطوركم..
"سلمك..شن اخبار اول رمضان معاكم"
غرفه؛الحمد لله مشي خفيف ماحسيناش بيه..
"صدقتي..ماليك وصغويرتك حالهم باهي"
غرفه:الحمد لله..
"غرفه..بنسألك شن صار معاك؟"
تنهدت بكتمان بعدين قالت..
/مافيش نصيب..
"السبب"
غرفه؛هو كويس وماشاء الله عليه بس اني ماتريحتش..
سكتت اخت عدنان شويه بعدين قالت..
"نصيبات..ع العموم معرفه خير..بالسلامه"
ونهت المكالمه فورا..
نزلت غرفه الهاتف وهي تقول بضيق..
/استغفر الله العظيم..ولفت ومشت طلعت من الدار..
وين وصلت في دار المعيشه وخشت لقت اختها ونساوين عمها فايقات وحداهم سفرة الحلو والقهوة..
قعمزت وقالت..
/بيتفور!
خشت اريج بسفرة ميه وهي تقول..
/جابه خالي حسين..
كلهم قعدوا يشوفوا لغرفه وهي لأنها تحشمت من صفيه مدت يدها وخدت طرف وبدت تاكل فيه وهاديه تشوفلها بإبتسامه..
🍀🍀🍀🍀🍀
ويعدي اول اسبوع من رمضان بنفس الوتيره ونفس الاجواء الحلوة بإستثناء طلبة المدارس وبعض الكليات اللي خربت عليهم الامتحانات هالاجواء..
☘☘
خلال هالأسبوع اتصلت لميس بغرفه وهدرزت عليها هدرزة مطوله انتهت بعزومة غرفه ليهم ع الفطور..
ويوم عزومتهم كان ثامن يوم في رمضان والى جانب نبيله كلمت خواتها وعمتها يجوا يحضروا..
☘ويجي ثامن يوم رمضان..
وقبل المغرب بشويه جو سدرة وطوبى وهما جاييين موالح وحلو..
🌼سدرة وهي تقرص في خد طوبى قالت..
/الله يبارك وجهك منور..
اريج:السي عباده مدلعنا اخر دلع..
ضحكت طوبى بخجل..
سدرة ضمتها وقالت..
/سلمهالي ياربي..
وتخش غرفه عليهم الصاله وهي تقول.
/جو عيت خطيبة حسين..
انفجروا ضاحكات وهي تفنص فيهم وتقول بضحكه..
/اسكتوا يانهاري..
☘☘
ويطلعوا يستقلبوا ريسة وبناتها مع نبيله ويدخلوهم للصاله..
الاجواء في البدايه كانت رسميه بعض الشي بعدين انطلقوا في الهدرزة..
وعاد لميس لابد تستغل الفرصه بش تتقرب لصفيه وصفيه ماكانتش طايقتها نهائي زي ريسه اللي كانت مش طايقه غرفه مهما دير معاهم من خير مستحيل تتقبلها ولولا حكم بناتها اللي غلبها ماجتش..
☘"والحمد لله توا مشت اموره"
نبيله:باهي طيب فيه..
لميس حطت يدها ع كتف صفيه وقالت بإبتسامه..
/كله من حسين ربي يحفظهولك ياخالتي صفيه راجل فزاع ومايردش اللي يطلب منه حاجه..نزلت يدها وقالت..اول ماحكيتله قالي عطيني رقمه وخلي الباقي عليا..
طوبى كان شاده طرف ظولمة بتاكله وقف عند فمها بعد ماسمعت اللي قالاته لميس..
وغرفه شافت لعمتها مطيرة وهي مبتسمه بتهكم ومطيره شافتلها وهي تحاول تخفي غيظها..
اما سدرة شافت لصفيه بنظرة وكأنها تقوللها..
"سمعتي!!؟"
وصفيه وقتها كانت تغلي من الغضب..
الوحيده اللي ردت على لميس وهي مبتسمه بالغصب هاديه..
/من يومه فزاع ويساعد في الناس كلها..
لميس ردت عليها بإبتسامة مجامله..
هدا كله ونبيله وريسه كانوا منزعجين جدا من كلام وتصرفات لميس..
☘وعدت العزومه وهما يجاملوا في بعض لعند ماانتهت صلاة التراويح وجي راجل بنت ريسه وروح بيهم..
ويروحوا بعدهم طوبى وسدرة المحجوب ومايقعد حد كان مطيره اللي كانت مقعمزة مع فردوس في الجنان تراجي في حسين يروح من عزومه واحد صاحبه..
☘ويخش حسين للحوش ويسمع في مطيره تنادي فيه..
شافها وين مقعمزه مشالها طول..
حسين؛اوو عمتي..
مطيره:لاعمتي لاخالتي..قعمز قدامي قعمز..
وهو مستغرب قعمز قدامها وقال..
/خير!.
مطيره بجديه..
/قول الحق شن في بينك وبين بنت عمة عبد الرؤوف!؟
ضحك وقال..
/ورب العزة ماهناك حاجه..
فردوس:قصدك تكذب لما قالت في بينك وبينها اتصالات؟
تنهد بعدين قال..
/ياستي البنت هادي وين نكون في المحل طب عليا وهي نقول يامحاسن الصدف واني متأكد انها تجي بالقصد وفي وحده من البنات اللي تخدم في المحلات تتواصل معاها وتخبر فيها..المهم اني كنت نساير فيها لعيون ولد خالها الله يرحمه لعند مافي مرة اتصلت وعارف كيف جابت رقمي وحكتلي ع موضوع لراجل اختها تبي من يمشيه وخلتني نكلم حتى امها...
انصدموا مطيرة وفردوس..
وهو مكمل يقول..
/تحشمت منهم ولعيون الراجل اللي كان خو دنيا مشيتلهم الموضوع وهي بعدها اتصلت تشكر وبتفتح سيره قصيتلها ومن بعدها معاش عاودتها..
مطيره:كان تسمعها كيف تبقبق بكري والله خلت امك تتحلف فيك..
ضحك وحرك راسه يمين ويسار بعدين قال..
/باهي وهديكا الابله شن قالت!؟.
فردوس:ماقالت شي غير كلمة وحده عاودتهالي اريج بكري..شافت لعمتها وقالت..قالت وين جو خشت علينا وقالت نوضوا اطلعوا عيت خطيبة حسين جو...وضحكت ضحكه خلت مطيره تضحك معاها..
وحتى حسين ضحك معاهم وهو يحرك في راسه يمين يسار..
🍃🍃🍃🍃🍃
الساعه 1:00بعد منتصف الليل..
كانت غرفه في الكوجينه توتي في سفرة قهوة مع الكيكه المصقعة اللي دارتها..
لبست شاربتها كويس وطلعت للجنان بش تاخد فل تنثره ع السفرة..
وهي ماشيتلها انفجعت لما لقت حسين واقف يتفرج عليها..
هو حس بوجود حد شاف جنبه لقاها..
وكالعاده لفت بتهرب منه هو بسرعة البرق سبقها وجي قدامها وهو يقول..
/غرفه ارجوك اعطيني فرصة نحكي معاك كلمتين.
هي بحده؛ حسين حول من طريقي..
قاللها:مش قبل لتسمعيني..
قامت عيونها فيه وقالت..
/سمعت قبل ورديت عليك وياما تكلمنا بعدين وشفت النتيجة في الاخير..
هز راسه وقال..
/تمام تمام عندك حق..لكن اني..مسح بيده ع لحيته ووزع نظره ع المكان وشافلها وقال..كل اللي كنت نبيه ان نتقرب منك ونقدر نشرحلك نفسي ونطمنك من ناحيتي..
غرفه بتهكم؛لاوالله طمنتني هلبه!
قاللها؛علاش عطيتي فرصه للبراني واني ولد عمك اللي جايك بنية صافيه وربي عالم ردتيني!
غرفه:خلاص توا معاش في فرصه لاليه وولاليك ولالغيرك..
وكيف جت بتمشي اعترض طريقها وقال..
/غرفه..والله لو طاوعيني نحطكم انتي وصغارك في قلبي وعيوني ياغرفه..اقسم بالله ماك لاقيه راجل يصلح بيك في الدنيا غيري..
قالتلها:واني معاش نبي حد ياحسين نبي نقعد ع صغاري بس..
ابتسم وقاللها؛وحتى اني بنقعد عليكم عمري كله والله غيرك ماني واخد ياغرفه..
نزلت عيونها ومشت خشت بسرعه وسكرت الباب وخلاته يضحك عليها...
🍁🍁🍁🍁
وعند طوبى اللي كانت تحفظ في حزب جديد من القرآن..
سمعت هاتفها يرن بنغمة مكالمه ماسنجر..
حطت المصحف وناضت خدت هاتفها من ع الطاوله وتشوف المتصل تلقاه امينه..
فتحت عليها وردت..
/السلام عليكم.
ويجيها صوت امينه اللي كان يرجف وهي تقول...
"بصي ع الرساله ع بعتهالك من شويه".
طوبى بخوف..
/باهي باهي..
سكرت عليها وخشت ع المحادثه وتبدا تقرا في الرساله اللي بعتتها امينه وملامح الصدمه بانت ع وجهها...
