#طوبى "جنة طوبى"
#جمان_فريد
#الجزء التاسع_والسبعين "مالكش حق "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
🌙رمضان مبارك🌧رمضان الدعاء🌙
قال صَلَّى اللَّهُ عَلَيْهِ وَسَلَّمَ : (الدُّعَاءُ هُوَ الْعِبَادَةُ) رواه الترمذي
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لقد تسببوا لي بأذيّة بالغة ، حتى خرجتُ أتصدق فزِعاً ، ظننتُ أن الله لا يُحبني من فرطِ الألم 🍃
__________________________________________
🍀بعد مرور يومين
يخش شهر اغسطس..
هالشهر معروف بجوه الغير مستحب رطوبه عاليه والحرارة توصل لدرجات عاليه ممكن لأيام متتاليه بنهارهم وليلهم..
هكي كانت اجوائه في اول يومين ليه..
وطوبى لأنها في شهر حملها الاخير تعبها الجو هدا بزياده خصوصا انها تعاني من المسالك وفقدان السوائل يكون بإستمرار ومحتاجه تشرب كل وقت بش تعوض..
وهي قاعده محافظه ع روحها..وملتزمه بتعليمات الدكتورة متاعها اللي تبيها تولد ولاده طبيعيه لأنها الاصح والافضل للمراة..
من الناحيه النفسيه..ولت هي والقلق رفاقه معاش يقدر ع بعدها ولاهي قادره تعيش من غيره..
تفكر بإستمرار في المستقبل...وماكانش هالمستقبل بعيد بل قريب جدا..مابعد ولادة بنتها..
وبعد الخطوة اللي دارتها بأنها دخلت عيلة محمد شنيبه ماريتش اي رد فعل فيه تحرك من جيهتهم..
معاش عرفت...هل اللي داراته ماجابش نتيجه نهائيا؟
ولادار نتيجه حتشوفها بعدين !!؟
🍃(تمنيت لو كنت نستنى في هاليوم واني فرحانه ومتلهفه بس مش فرحانه ومتلهفه وفي نفس الوقت خايفه ومخنوقه..لكن مع هكي ياسدره حندير المستحيل بش بنتي تقعد عندي وماياخدها مني حنعيشلها عمري كله زي ماانتي عشتيلي احلى سنين عمرك وان شاء الله نولي ام كويسه زيك...)
وقفت كتابه وهي تمسح في دموعها بعدين كملت تكتب..
(ياريت لو كنتي معاي..ياريت لو بابا شافها وضمها ورباها معاي زي مارباني معاك...شفتي ياسدرة شفتي مش قادرة نفرح بيها مش قادره)
نزلت البيرو وحطت يدها ع فمها وهي تكتم في بكاها..
بعدين نزلتها وغمضت عيونها وقعت تقول بهمس..
/لاإله إلا أنت سبحانك اني كنت من الظالمين..
رددتها تلاته مرات لعند ما..
فتحت عيونها وقالت..
/اه..نزلت عيونها لبطنها وهي مبتسمه من وسط دموعها وقالت..ياقلبي اني..كل مانبكي ديري هكي! ماتبيش ماما تبكي وتزعل ياروحي..ياعمري ياماما..اني عارفه ربي تو يعوضني بيك عن كل شي..تو يحليلي حياتي كلها بجيتك ياماما..
حطت يدها ع بطنها وقالت..
/يارب ماتحرمني منها ياارحم الراحمين..
شافت للباب لما دق وانفتح..
خشت عليها فردوس وقالت..
/جدي يبيك..
هزت راسها وناضت بصعوبه وهي تقول..
/ياحي ياقيوم لاإله إلا انت..
وفردوس تشوفلها وهي تمسح في دموعها تنهدت بكتمان ومشت طلعت من حداها..
🍃🍃🍃🍃🍃
"باهي هو على شني مستعجل العيد الكبيره معاش عليه هلبه"
عواطف؛يعني يام اني بندير عرس كبير حفله بسيطه وبنتسقد ع حالي..
نجمه كانت مضايقه من حاله عواطف اللي كانت متعجله ع الزواج وكأنها خايفه الخاطب يهرب منها ومع هدا سايرتها وقالت..
/حاضر تو نقول لبوك..
عواطف؛واقنعيه بالله عليك..
نجمه:باهي باهي..خلينا توا من الموضوع هدا وقوليلي ماحصلتيش حد من عيلة كعبار؟
عواطف؛شوفي يام اني فكرت في حاجه تانيه..
نجمه؛في شن فكرتي!؟
عواطف:فكرت نوصل في ابتسام عن طريق وحده من بنات خليفه يعني يدلوني عليها من غير ماحد من عيلتها يعرف لان كان حق اللي في بالنا صاير خواتها بينبهوها..
نجمه بضيق؛ويارب يطلع كذب.
عواطف:يام ماتتأمليش لان العقرب اللي فوق ماتلقحش من فراغ هداكا اليوم..
نجمه؛غير مانبيهاش تعرف انها وصلت لغايتها راني مشيت سألتها طول وريحت راسي..
عواطف بكره؛اعوذ بالله منها وخلاص..اني حتى موضوعي مانبيهاش تعرف بيه لقبل يومين من الفاتحه هكي مكر فيها ع اللي داراته يوم فضانية محي الدين..
نجمة؛ان شاء الله يسكر فمه ومايقولش..
عواطف؛لامن هالناحيه اطمني محي في دس الاسرار مافيش زيه..
🍃🍃🍃🍃🍃🍃
"اقسم بالله العظيم ماطلعت مني كلمه هي صح لمحت قدامي لكن ماقالتش انها تعرف حاجه"
عبد الفتاح بعصبيه..
/لاتعرف يامحي تعرف..اسألها ونبيك تعرفلي من وين عرفت..
محي الدين:حاضر تو نسألها لكن من وين عرفت نعرف من مرت خوها زي ماقلت عيالك صاحبتها اكيد حكتلها..
عبد الفتاح؛مستحيل..سألتها وقالت ماحكيت لحد..
محي الدين ؛مرات حكتلها قبل لتعرفها قريبة خديجه.
عبد الفتاح تأفف بضيق وقالت..
/غير من طلعتلها هادي بس!
محي الدين؛ماتكدرش روحك الموضوع كان حيطلع وينعرف في اي وقت ياعبد الفتاح راهو ليه سنين مدسوس مش حيقعد العمر كله في الدرقه..
رد عليه وهو يقول بضيق..
/مش وقته بكل يامحي والله ماوقته..
محي الدين؛هدا اللي يدير سريب التعدد..
عبد الفتاح شبحله بإمتعاض..
ومحي الدين قال بضحكه..
/اضحك ياراجل اضحك..تمشي تمشي..امك تزعل شويه بعدين ترضى تعرفها حنينه وانت بالذات غالي عليها هلبه..
تنهد بقلق وقال..
/يستر الله وخلاص..
🍃🍃🍃🍃🍃
واقف في الروشن يتكلم بالتليفون وهي تراقب فيه من ورا الستار كمل مكالمته وشاف للروشن متاعها..بعدين ابتسم..
هي بعدت الستار شويه ورسمت ع وجهها ابتسامه..
حرك راسه يحي فيها..
هي ردت التحيه بنفس الحركه..بعدين سكرت الروشن وهي تضحك بفرح..
اما هو..
عمر بضحكه؛غريبه البنت هادي..
وتنهد بعدين خش...
🍃🍃🍃🍃🍃
"جبتلكم حصتكم"
فايزة وهي مبتسمه بمفاجأه..
/غير علاش بس؟
مناسك بإبتسامه..
/تلاته ايام وانتم تمشوا وتجوا معقوله مانحسبوكمش؟
فايزة؛اني خدمت خدمتي بس..
هي قالت..
/لاعيب عاد خالتي فايزة انتم صحابنا راهو وام احلى بنيه عرفتها..
ضحكوا مروة وخواتها..
فايزة بإبتسامه:سلمك حبيبتي..باهي خشي تعشي معانا؟.
مناسك؛لا والله مافيها كيف مالك يراجي فيا لوطا مازال في ناس بنمشولهم ونعطوهم حصتهم حتى هما ماقدروش يحضروا العرس..
فايزة؛ربي يعاونكم..
مناسك؛سلمك يارب..هي تصبحوا ع خير..
ردوا عليها باصوات متقطعه..
/قدامك كل خير..
فايزة؛سلمي ع ماما..
مناسك؛يوصل..
فايزة لمروة؛بري سقدي صاحبتك..
مروة؛باهي..
ومشت مروة مع مناسك خدت اسدال الصلاة لبساته وطلعت معاها..
🍃تحت..
قدام حوش سدرة .
كان مالك في سيارته لاهي بتليفونه وهو يراجي..
ومن بعيد في قهوة الزعيم..
كان محمد المهدي مع صاحبه مؤيد يشبحوا جيهته..
🍃ع طلعة اشرف من حوشهم شافه واستغرب..
شويه طلعت مناسك من الحوش..
شافت جهة القهوة جو عيونها في عيون مؤيد يدوب ابتسمت والتفتت قالت لمروة..
/تصبحي ع خير..
مروة من قدام الباب؛وانتي من اهله..وسرقت النظر لمالك..
اللي كان لابس طاقيه زرقا..ونظارات سود وعاطيها بالجنب وهو يشوف لتليفونه..
لما سمع صوتها..كان يبي يشوفلها لكن ماقدرش..
لين ركبت اخته وهي بعدين سكرت الباب..
تحرك مالك بالسيارة..وعيون اشرف ومحمد ومؤيد مع السيارة..
وماكانش فيهم حد مبتسم غير مؤيد..
اشرف مشي ركب لسيارته وقعمز وطلعت تليفونه وبدي يكتب في رساله لصفاء..
اما محمد..
مشي خش للقهوة وهو معصب ع الاخر..
مؤيد بعد ماكان يشوفله وهو ماشي قال..
/تكبر وتنسى ياعشيري..
🍃🍃🍃🍃🍃
"شن هدا المحل مايربحش بكل يدوب مطلع راس المال!"
علي الواعر بضيق..
/الراجل اللي تشاركنا معاه مش عاجبه الوضع وقال بيفضها..
طوبى بضيق..
/عنده الحق..
علي:من رايك ننهوها؟
طوبى:للأسف..ماناش حمل خساير ماعندناش من وين نعوضوها راس مالنا هالمطحن وان شاء الله يكمل هكي ومايصيرله شي حتى هو..
علي:اليوم مشيت درت دوره ع المطحن جديد اللي فتحوه المدة اللي فاتت...عالم..
طوبى:هدا اللي اسمه الامبراطور؟
علي:ايه هو..
طوبى:وليكن..المهم.حني المعلمين في الصنعه هادي وقهوتنا مايقدر حد ينافسها شفت الدعايه.اللي داروها جماعة المطحن اللي قدامنا اللي خسروه عليها ماكسبوش نصه وحني كل يوم نكسبوا الله يبارك الخبره والصيت الباهي ليهم دور..وحني ماعندناش خبره في حكايه محلات المواد الغذائيه لاحني ولا اللي مشاركنا وارده هلبه الخسارة..
علي بإبتسامه؛ايوه حني ياخبره اللي يسمع يقول ليك 30سنين في الكار..
ضحكت وقالت:من صغري في المطحن نشوف ونسمع..
علي هز راسه وهو مبتسم بعدين قال..
/ع سيرة الدعايات باهي اللي تفكرت..التارقي ناوي يدير دعايه حتى هو..
طوبى:ناوي ولاخلاص بيبدا فيها؟
علي:كيف يبدا فيها من غير مايشاورنا؟
طوبى:وين نندري عليه مرات يقول اني صاحب النصيب الاكبر ندير اللي نبيه ومانشاور حد..
علي:لالا يابنتي لا الراجل هدا مش هكي بكل انت اللي مش عارف خيرك معاه..
طوبى بضيق:مش عارفه مش قادره نطمنله خايفه يديرها فينا ياجدي..
علي؛نبصملك عليها بالعشرة مايديرهاش جدك توا بيخش 80 سنين ونظرتي في الناس نظره كان خابت مرة في الباقي تصيب..
هزت راسها وهي تساير في جدها وقالت..
/خلاص قوله توكل ع الله وان شاء الله خير..
"بوي"
شافوا الزوز لمربوعه الخارجي..
وقف قدامه عبد المطلب وقال..
/هداكا محمد شنيبه جي..
تسارعت دقات قلب طوبى من الخوف..
علي ناض بمساعدة عكازه وقال..
/بري خشي داخل..
ومشي طلع مع ولده محمد..
اما هي خدت نفس وزفرت بخوف..
بعدين ناضت وهي تقول..
/حسبي الله ونعم الوكيل..
وقعدت تردد فيها لين طلعت من المربوعه..
🍃🍃🍃🍃🍃
"قالي بعد مابنروح من صلاة المغرب بنمشيلهم نتفاهم معاهم"
خديجه: الخوف يام تقلبله راسه..
"لالا بوك بعد حلفة خوك ع المصحف معاش يصدق فيه شي خلاص"
خديجه؛ان شاء الله..
سمعت صوت باب شقتها انفتح قالت..
/يام شكله محي جي بنصكر توا..
"باهي باهي بالسلامه توا"
خديجه؛بالسلامه...وسكرت..
ع خشة راجلها..
محي الدين:من كنتي تكلمي؟
خديجه؛امي..
قعمز قريب عليها وقال..
/بنسألك ع حاجه وجاوبيني طول من غير لف ودوران..
خديجه رفعت حاجبها وقالت..
/يالطيف.!
محي الدين:ندوي جديات..شن تعرفي ع ابتسام بنت كعبار؟
هي بإستغراب مصطنع..
/شني شن نعرف عنها مافهمتش!؟
محي الدين؛مش قلتي يومها شفتيها في العرس!؟
خديجه؛ايه شفتها بس مافهمتش شن قصدك بشني تعرفي عنه!
هو قال؛خديجه فوتي الجو متاعك هدا ماديريشي عليا اني تلقيحك حدا العيله الجمعه اللي فاتت يقول انك عارفه حاجه تبي توصليها..
هي رفعت حاجبها وقالت:بالك انت اللي تعرف حاجه وداسها!؟
هو قال بحده..
/خديجه!
خديجه:تعرف ان راجلها اسمها عبد الفتاح..وبس..وابتسمت بإستفزاز وهي ترفع في حواجبها وتنزل..
شبحلها شويه بعدين قال..
/اسمعيني جاي الموضوع هدا تطلعي منه ردي بالك نسمعك داويه فيه لحد قسما بالله ياخديجه تشوفي مني شي عمرك ماشفتيه..
خديجه:تهدد انت!
هو بتحدي قال..
/ايه نهدد بتلبزي مع ماليا نلبز مع ماليك حتى اني وانتي فاهمه قصدي..
عقدت حواجبها بعصبيه وناضت ومشت بتطلع وهي تقول..
/مالي بيكم اصلا ندخلي روحي بيناتكم ان شاء الله تنحرقوا..
هو تبعه بعيونه وقال بصوت مسموع ليه هو بس..
/ان شاء الله في ماليك..
🍃🍃🍃🍃🍃
وفي حوش لطفي الواعر..
كانوا النساوين واقفات قراب ع الباب اللي يفتح ع المربوعه الخارجيه..
كلهم في حالة القلق وهما يسمعوا في الاصوات عاليه..
بالذات طوبى..
🍃علي بغضب:تصرفنا هكي لما لقيناك مادرت شي مخلي الموضوع للنساوين يتصرفوا فيه..
محمد شنيبه:ارجوك ياحاج تكلم كويس ومانغلطش في الدوة..
عبد المطلب:وين الغلط في كلامه! جيتنا وتفاهمت معانا! حاولت في الموضوع حتى بالصلح لا وفوق هكي من عندك من حوشك تطلع دوة مسخه ع بنت خوي وتبينا نسكتوا..
محمد:الدوة مش طالعه من حوشي الدوة منتشره في الشارع كله واني ماني قيم ع عقول الناس بش نقوللهم فسروا هكي وماتفسروش هكي!
علي:راضي فيها انت! راضي في المراة اللي قاعده ع ذمة ولدك وبتولي ام بنتكم راضيلها الناس تدوي في عرضها!
هو قال:اكيد مش راضي ومش حترضى رغم اللي داراته..لكن حتى انتم ساهمتوا فيها..
علي؛كيف كيف!
محمد شنيبه؛لما تخلي ولد ولدك يرفع ويجيب فيها وهي مازال ع ذمة راجل..
خبط علي الواعر عكازة ع الارض وقال بصوت غاضب..
/وينه الراجل!
🍃برا..
طوبى بخوف..
/خايفه جدي يرقى عليه الضغط!
مطيره:الله يعطيهم مايهدهم..
فردوس:قلبا وقالبا مع ولده..
اريج:مالا شنو كلهم هكي..
🍃محمد شنيبه بصوت عالي..
/موجود..وجاها اكثر من مرة ورفعها للمستشفى وولد ولدك شن دارلك طلعه من غادي وضربه ياحاج وراضيك انت الشي هدا!..
عبد المطلب:كان ولدك حاط عقله في راسك مايقربه حد مش يخشوا عليه يلقوه بيضربها وتبيهم يطلعوا ويخلوهاله..
محمد؛شفته بعينك الكلام هدا!
عبد المطلب؛زي ماانت ماكذبتش ولدك اني مانكذبش ولدي..
علي:من الاخير انت جاي توا شن تبي!..
هو قال:نبي نكلمها وجه لوجه نبي نسمع منها..
عبد المطلب:توا خطرلك تسمع منها!؟
علي:مش مشكله ياعبد المطلب مش مشكله..
وطلع تليفونه من جيب سوريته العربيه..
🍃فردوس:تقدري تطلعيله؟
بلعت طوبى ريقها واستجمعت شجاعتها وقالت بتحدي..
/نطلعله عادي..
مطيره؛ماتخافيش منه راهو واحد نبراط..
فجأه رن تليفون مطيره..
انفجعت ومشت بيه تجري..
🍃سكر علي من مطيره بعد ماقاللها تطلب من طوبى تجيهم للمربوعه وقال..
/اهي توا جايه وبتسمع منها..لكن حط بين عيونك ربي..
محمد شنيبه؛ديما حاطينه بين عيونا ياحاج علي..
علي:كان هكي اكيد تعرف ان قال..
/اما امساك بمعروف او تسريح بإحسان!
محمد؛الطلاق حلال مكروه ياحاج علي بالذات لو كان من غير سبب مقنع..
عبد المطلب ابتسم بتهكم..
علي:تو تجيك وتسمع منها وتعرف بعدين كان السبب مقنع ولالا..
دق باب المربوعه..
علي:خشي يابنتي خشي..
فتحت طوبى الباب وخشت..
وعيون جدها عليها..اما عمها كان مركز ع نظرات محمد شنيبه اللي كان باين فيها الحقد..
قعمزت طوبى مقابله محمد شنيبه وهي تقول..
/السلام عليكم..
هما ردوا عليها السلام..
علي:بنتي الحاج محمد قال جاي بيسمع منك..
طوبى شبحتله وقالت بإستغراب..
/كأنك تأخرت شويه ياحاج؟
محمد:جيتيني انتي كلمتيني قلتيلي ياعمي صار وصار بش نتصرف؟
ماعرفتش شن ترد..
كمل كلامه وهو يقول..
/مافي حد في الحوش كان عارف اللي صاير بينك وبينه الا بعدقريب شهر ولدي سكت ع الموضوع وماتكلمش لانه مايبيش يخرب حوشه مايبيش بنته تعيش معيشة القزازين..
طوبى:لاهو خاف ينفضح قدامك..
هو قال:ينفضح قدامي! كيف ينفضح قدامي شن داير!
طوبى:اللي دايره ولدك تتحشم نقول في مجمع رجاله كبار لكن كان تبي تعرف برا أسأل نجاة..
ضيق عيونه ع وسعهم وقال..
/نجاة! شن دخلها نجاه؟
طوبى:اسألها وهي تقولك شن دخلها..
عبد المطلب:من هادي!؟
علي الواعر:هادي مش نفسها اللي كانت عيال طاهر؟
طوبى:ايه..نفسها..
محمد شنيبه؛تكلمي طول من غير الغاز اللي عندك قوليه..
طوبى:واضح انك عارف..
محمد:اني قتلك قولي اللي عندك..
طوبى:اللي عندي انت عارفه كويس وواضح هلبه انك انت اللي عندك شي جاي تبي تقوله..
شبح لعلي الواعر وقال..
/شوف الاسلوب فيه راجل اكبر من بوها..
علي:ماغلطتش فيك انت تسأل وهي تجاوب ياحاج..
طوبى بإنفعال وحرقه:ياحاج اني توقعتك توقف مع الحق مانبيش نقول توقف معاي..وانت عارف كويس اني ع شني صبرت وتحملت عارف..توقعت تشوفهالي كبيره توقعت الحاجه هادي تخليك تنصفني قدامهم كلهم..
محمد شنيبه قعد يشوفله بنظرات غضب فيهم ضيق من غير مايرد
وهي شاده دموعها بقوة كملت تقول..
/اني لو نبي نحاسب حد مش ولدك بروحه كلكم نحاسبكم لأنكم غشيتونا غش وغدرتوا بينا غدر كلكم ومع هذا اني وين جيت بندير ردة فعل طلبت الطلاق وحقوقي بس وانتم شن درتوا!؟ نصرتوا ولدكم ع الغلط ورميتوا بلاه عليا وافتريتوا وكذبتوا..
هو قاطعها وقال..
/ماتغلطيش في الدوة ردي بالك..وبعدين كان انتي تشوفي فينا غشيناك وضحكنا عليك علاش سكتي قولي!؟
طوبى:لأني بنت اصل وعملت بأصلي وياريته نفع..
محمد شنيبه انفعل عليها من باب خودوهم بالصوت تغلبوهم..
/ياسر عاد كترتي ع ماوصوك..الدوة اللي قلتيها كلها مافيش منها وولدي حلف ع كتاب الله انها ماصارت مش حنكذب ولدي ونصدقك انتي وانتي حتى دليل واحد ع كلامك ماعندك..انتي اللي بديتي بالافتراء وانتي اللي شوهت سمعت غيرك انتي اللي مفروض تتحاسبي..
خبط علي بكعازه ع الارض بقوة وقال..
/نوض اطلع برا..اطلع برا..
ناض وقال:حتى اني طالع مايشرفنيش نقعد ولايشرفني نسبكم وولدي حنخليه يطلقها ماتستاهلاش وحق ليها ماعندناش..
ناضت طوبى وهي تقول..
/حقي حناخده منكم دنيا وآخره حناخده وحسبي الله ونعم الوكيل..
هو قال؛الزمان بيناتنا وتو نشوفوا من اللي ياخده حقه من التاني..
ناض عبد المطلب وقال:اطلع امشي اطلع..
شافله بسخريه ومشي طلع بسرعه..
وعبد المطلب وراه..
طوبى شافت لجدها وهي مصدومه قالت..
/شن هالناس هادي معقوله مافيهم حد يعرف ربي!..
هو قال...
/وكان يعرفوا ربي ماداروش هكي من الاول..
ع خشة عمها وهو يقول..
/عيلة معفنه من اولهم لأخرهم..
علي تنهد وقال..
/خلاص بنتي بري خشي بري..
لفت طوبى ومشت وهي مقهورة والخوف معبي قلبها..
طلعت من المربوعه ومشت كم خطوه لين لقتهم قدامها..
مطيره بصدمه..
/علاش ماقلتيش نجاة من الاول!
طوبى قعدت تشوف لعمتها بنظرات قهر والم وهي ساكته..
فردوس بغضب..
/ويقول حلفلي ع المصحف ومانكذبش ولدي..
اريج:هدا حلف بالله كذب مايحلفش كذب ع المصحف!
مطيره خبطت كفوفها ببعض بعدين حكتهم بقهر....
والبنات حواليها يشوفولها وهما مضايقات..
لكن طوبى قاعده تتفكر في الكلام اللي قاله محمد شنيبه..
《 مش حنكذب ولدي ونصدقك انتي وانتي حتى دليل واحد ع كلامك ماعندك..》
تبدلت ملامح وجهها للحده والتحدي وقالت..
/هو قال ماعنديش دليل ع كلامي باهي تو نجيبله الدليل ونلوحه ع وجهه ونخليه يعرف مكانه الحقاني في حوشه..
اريج تعالي..
ومشت طول للدار..واريج لحقتها وهي مستغربه..
مطيره؛اني اخر من يعلم ولا؟
فردوس تنهدت وجتها خدتها من ذراعها وقالت..
/تعالي معاي نفهمك..
ومشوا الزوز لدار المعيشه ومعاهم آلاء وخشوا ع غرفه اللي كانت قاعده مع صغارها ع نار تبي تعرف شن صار...
🍃🍃🍃🍃
الساعه 10:09ليلا..
في كوجينة حوش محمد شنيبه المسكرة
مغليه كانت مقعمزة تتكلم بالتليفون..
مغليه:رقد مريض بوك الليله..
"توقعت يصير هكي من الاول"
مغليه بسخريه..
/قال حتى هداكا الاجرب القفاص دار لسان ويلاطع بعين قويه..
"هدا ماناقص..ناسي العار اللي داره هالشلافطي المعكوك"
مغليه؛عيله مانودها للعدو وربي طيحنا فيها..وزادتهم هالمصيبه اللي قعدت ع قلبي زي جثامه..
"نجاة"
مغليه؛ومن غيرها! وبوك شي شاد في قعدتها هني..
"روحت من حوش اختها"
مغليه؛ايه من بكري روحت بالصغار..
"معليشي يام تحملي لين تعدي هالازمه ع خير وبعدين نلهوا بيها"
مغليه تنهدت بحرقه وهي تقول..
/ماني عارفه شن دايره في عمري بش يصير فيا هكي..
"ماتقوليش هكي الله اذا احب عبدا ابتلاه قولي الحمد لله ع كل حال"
تنهدت وقالت..
/الحمد لله على كل حال..ماكلمكش الجالي؟
"لااليوم لاكلمته ولاكلمني ياروحي"
مغليه معاش قدرت تتمالك نفسها قعدت تبكي..
"يام خلاص بالله عليك ماتقطعيش قلبي"
مغليه بنبرة باكيه..
/مش عارفه علاش ولدي هدا بالذات هكي صاير فيه خوك باهي ياخديجه والله باهي علاش هكي حياته بس...
"لاحول ولاقوة الا بالله"
مغليه بألم:والله مرات يخطر ع بالي نمشي لطوبى ونكب ع راسها ونطلب منها السماح وندير ماتبي بش تسامحه وتوليله والله كان حاله باهي معاها ومرتاح من لما سيباته وهو كل يوم لتالي..
"لو فيها خير يام مادارتش اللي داراته ع خاطر سبب مايسواش هاني يام قدامك قداش لبز محي مافكرتش في الطلاق بكل شعفته وربيته بس وجبته للطريق في الاخير..
وهي والله كانت تقدر تفوت هدا كله زي مافاتت حكاية المرض لكن طلعت مش زي ماكنت متوقعتها خسارة.."
مغليه رشفت وقالت بغل..
/كله منها هالبومه البلوى اللي ينقاللها نجاة لولا بوك وريتها ايامها السود..
"جايينها ايام سود بإذن الله جايينها يام"
🍃🍃🍃🍃🍃
"شن تقولي ياسماهر"
هادي نجاة تكلم في زميله قديمه ليها في الشركه..
"زي مانحكيلك المعلومه وصلتني من مصدر موثوق ويومين تانيات ينادوا عليك"
نجاة بصدمه..
/مش قادره نستوعب ! ياربي! بالله عليك سكري شويه ونعاودلك..سلام..
وسكرت هي ع زميلتها واتصلت طول بالجالي..
ردت عليها البداله "الرقم المطلوب مقفل"
نزلت التليفون وهي تشوفله بقلق...الخبر اللي وصلها مافرحهاش وجع قلبها وخوفها عليه...
🍃🍃🍃🍃
"خلاص خطيت في الموضوع معاش يهمني عندي حاجات اهم منه"
حكيم؛هدا كلام العقل ابدا شق طريقك برا ماعندك مادير فيها البلاد هادي
الجالي وهو يشوف للبحر:مزبوط..بإذن الله بنهاجر خلاص بنطلع اني وعيلتي ومعاش مولي بكل..
حكيم:عيلة مني!؟
رفع الجالي حواجبه تعجبا..
حكيم؛قصدي رديت عيالك..
نزل حواجبه وقال:قريبا ان شاء الله..
حكيم وهو مستغرب..
/ماعندي مانقول غير ان شاء الله ربي يهدي سركم..
الجالي وهو يتأمل في البحر قال..
/ان شاء الله...
🍃🍃🍃🍃🍃
طلعت من الكوجينه وهي سرحانه تفكر..
وبدون ماتتنبه انخبطت في بنتها..
منيه؛سامحيني ماما..
جميله بضيق؛انتي اللي سامحيني بنتي ماشفتكش..
منيه وهي مركزه ع ملامح وجهها..
/كان تقوليلي في شن كانت تبيك طوبى؟
جميله:شي بنتي شي..ماشيه بنرقد..
ومشت من حداها هربا من الحاحها في السؤال..
ومنيه معاها بعيونها وبدي ينتابها شي من القلق..
🍃وطوبى..
اللي كملت باقي يومها وهي مقهورة ومتكدره نست تاخد دواها ولاكلت ولاشربت..
كان عندها امل بسيط ان محمد شنيبه ينصفها عمرها ماجت بينه وبينها حاجه..هو يعزها ويحترمها وهي نفس الشي..
توقعت موقفها مع ولده يأثر فيه شويه ويخليه يستحي من افعاله..بس اللي صار العكس تماما..
مش قادر تنسى كلامه..مش قادرة تتجاوزه..
مش قادره تستوعب انه رضي فيها الكلام الشين اللي طلع عنها..
يعني مادام كبير العيله هكي..
من اللي بيردع الجالي عن اي شي ممكن يديره القدام!!؟
من بيوقف في وجه مغليه وخديجه ونجاه وفعايلهم!؟؟
🍃تحت هداكا الشباك كانت مقعمزة وهي تفكر في همها الكبير..حاسه بالغربه والوحده والانكسار..
رفعت عيونها للسمي وهي تقول..
/ياربي انت عارف اللي نحس فيه..عارف شن دار فيا اللي صار اليوم..مش قادرة نستوعب ان راجل في عمره مافيش في قلبه ذرة خوف منك الكلام اللي قاله قهرني اكثر ماقهرني كلام مرته وصغاره...كيف الناس هكي ياربي يكونوا..
سكتت وهي تبكي بصمت..بعدين قالت..مش عارفه حتى شن نقولك بس انت عارف اللي في قلبي ونحس بيه....بس ياربي نبي نقولك حاجه وانت اعلم باللي في قلبي..نبيك ماتخليش ظني بيك يتغير مانبيش اللي اني فيه يضيع قلبي ياربي..نبيه ديما يقعد مطمن بيك انت بس مهما صار فيا ومهما شفت في حياتي..ياربي هالحاجه الحلوة اللي عطيتهالي ماتخلي شي يضيعها مني ياربي..
🍃 لا أنكر يوماً أني سئمت الحياة
ولا أنكر ضعفي من بعض الظروف
ولكن بداخلي روح تمنحني القوه كلما تذكرت أن الله إذا أحب عبداً إبتلاه ..🍃
🍃🍃🍃🍃🍃🍃
تاني يوم..
في مكان ما في مركز طب الاسنان اللي تخدم فيه اريج..
كان طوبى مقعمزة مع جارتها جميله بعد ماحكتلها سمعت منها..
جميله بضيق وحزن..
/والله يابنتي تمنيت من وسط قلبي نديرلك حاجه..بس راجلي حلفلي بالطلاق لاندخل فيك ولافي حياتك..
طوبى بضيق واستغراب:قلتيله؟
جميله بشي من البغض.
/هداكا الجالي هو اللي قاله..
طوبى:الجالي!.
جميله؛هديكا الليله ماننساها جاني زي الغوله طلع عليا جنونه وقالي انه هدده بطريقه غير مباشرة كان طلع حاجه فيديو ولاغيره بيحاسبه ولأني قبل صايره معاي قصه وصلتني للطلاق ماقدرتش نقول لا يابنتي..اني قبل لنسكن في الشارع هدا كنت مطلقه من راجلي بسبب قصة تشبه لقصتك توا..
جارة ليا كان راجلها موريها الويل كل يوم يضرب فيها ومرات يلز فيها في الليل برا الحوش والمصيبه انه داير روحه ملتزم ولحيته لصدره..تنهدت وقالت..في مرة دقت ع بابي وهي فحاله وترجتني نكلم ماليها يجوا يرفعوها لأنه مانع عليها حتى التليفون..عطتني رقم واتصلت بأمها وحكيتلها كل شي..
وفي نفس اليوم جوها..لكن تعرفي شن صار بعدين..
دارت روحها عايشه مرتاحه معاه وشايفه منه كل خير وقالت انها لاكلمتني ولاطلبت مني حاجه ولافي عمرها واصلتني واني درت فيها هكي بش نخرب حوشها..وصلت بيها اتهمتني بالسحر..بلعت ريقها وقالت..وجو راجلها وخوتها لراجلي وولادي وماخلوا ماقالوا وضاربوا وصار يوم اسود حاشاك من بعده راجلي طلقني..وماردني الا بعد ماترجوه صغاره وخدي عليا عهد معاش ندخل في حد..واني شعفت يابنتي الايام السود اللي ريتهم بعد ماطلقني معاش نبي نعيشهم مرة تانيه يابنتي..سامحيني بالله عليك..
طوبى ودموعها في عيونها حضنت يد جميله بإيديها وقالت..
/ماعليك ملام ياخالتي لو كنت مكانك ندير زي مادرتي..
نزلوا دموع جميله وهي تقول..
/والله ماتستاهلي يابنتي واني مانبيش نكون شيطان اخرس لكن الله غالب الظروف حكمت عليا..
طوبى:حاشاك..وبعدين هدا مقدر ومكتوب واني مفوضه امري الله سيوره يطلع الحق طال الزمان ولاقصر..
جميله بألم:نبي نتغمرك بنتي..
ابتسمت طوبى من بين دموعها وضمتها..
جميله بدموع..
/ردي بالك مهما صار توليله عيلك من حقك ومايقدرش يحرمك منه ماتخافيش..واني معاك بدعاء هدا اللي نقدر عليه..
طوبى:هدا اكثر شي محتاجاته ياخالتي..
جميله تباعدت عنها وشدت ايديها وقالت..
/في كل صلي ووقت اجابه بندعيلك ربي يفرج عليك ويخلصك يارب..
طوبى من قلبها ومن وسط دموعها..
/آمين...
🍃روحت طوبى هداكا اليوم وهي محبطه تماما..
نفسيتها كانت تعبانه ع الآخر..بس مع هدا قعدت تردد بينها وبين نفسها..
"الله ربي لااشرك به شيئا"
🍃🍃🍃🍃🍃
"والله واللي اسمه الله ماني مطلقها لو تطبق السمي ع الوطا"
مغليه؛انت واخدها عناد ولاتبيها حق!؟
الجالي بإنفعال:كله يام كله..قعد يعد ع صوابعه..نبيها وعناد وتكسير راس..هادي مرتي وبتولي ام بنتي وبتقعدلي اني لين تموت وبنتي حتتربى عندي يام عندي اني..وقعد يخبط ع صدره وهو يقول فيها..
مغليه بقلق:راهو بتوصل للمحاكم..
هو قال؛توصل لوين ماتوصل..
مغليه بضيق؛ياولدي والله ماهو في مصلحتك..
ناض وهو يقول..
/ماتعبيش روحك معاي خلاص..
ومشي طلع من حداها وهي تقول..
/ياحليلي ياربي خودني وريحني...
🍃برا...
في الشارع..
جو اليوم مع المسويات كان الطف من الايام اللي فاتوا..
وفي من كان يبرد قدام حوشه ومكان الرزق متاعه وهو يبخ في الميه..
زي التونسي..ونضال..
اما عبد القيوم فكان واقف قدام مطعم ربيع يهدرز هو وخوه..
عبد القيوم:اليومين اللي فاتن مسكر معاش حصلته..
خوه بضيق جاوبه..
/اموره ملخبطه هلبه...بيفض الشراكه هو صاحبه وبيبيع ماعنده غادي وبيروح..
عبد القيوم بأسف..
/لاحول ولاقوة الا بالله..ربي يعوضه خير..
:إن شاء الله..
عبد القيوم:هو هك العمل الحر ربح وخساره زي مايقولوا مافيه شي مضمون..
وهو يتكلم نظره جي ع سيارة اريج وهي جايه..
🍃طوبى:وقفي قدام المطحن شويه..
اريج؛باهي..ودرست قدام المطحن مباشره..
فتحت طوبى الباب ونزلت..ومشت للمطحن..
وعبد القيوم يسرقلها في النظر وهو مضايق من الوضع..
🍃طوبى وهي تمد في ورقه لواحد من العمال..
/الطلبيه هادي وصلوها اليوم ضروري..
خدي منها الورقه وقال؛حاضر..
هي قالت؛ربي يعاونكم..
بعدين لفت ومشت بتولي للسيارة..
خطمت من قدامها سيارة موديل جديد ونوعيتها غاليه..
هي بعد ماشافتها ركبت السياره..
اريج:لمني هادي؟
طوبى ؛وقفت قدام حوش جدي..
قدمت اريج بالسياره..
ع طلعة الجالي من حوشهم...
جو عيونه ع سيارة اريج اللي لمح فيها طوبى وهي تشوف لجهة محدده..
شاف وين تشبح لقي سيارة جديده ع الشارع مدرسه قدام حوش علي الواعر..
نزل منها حسين شاف بنظره عابره لسيارة اريج بعدين غير نظره للتارقي ورفع يده وحياه...
وينفتح باب حوش لطفي الواعر..
ويطلع منه عبد الرؤوف..
لما شاف سيارة اريج..فتح الباب كله..
واريج خشت طول بالسياره...
سكر بعدها الباب وهو طالع..
ويلتفت بسرعه لما يسمع الجالي يقول..
"يعطيك خيرها ويكفيك شرها!"
كل من في الشارع وجهوا نظرهم للجالي..
حسين ضغط ع نفسه وكتم غضبه وحاول يتجاهله ومشي ناحية التارقي..
الجالي:جاي تستعرض بيها..
وحسين مسكر وذانه..
الجالي:كله ع الفاشوش راهو..
🍃نضال؛خيره المتخلف هدا!
عبد الرؤوف بحده..
/صل ع النبي ياجالي..
الجالي:والله مانك طايلها..
عبد القيوم:شن هالوسخ هذى!..
ويشوف حسين لف ع الجالي وماشيله طول..
وعبد الرؤوف لحقه يجري..زي ماطلع نضال يجري وين شافه جايه..
حسين:انت امتى تولي راجل!.
جي بيناتهم عبد الرؤوف وهو يقول..
/فوته مادوراش..
الجالي:لما تولي انت راجل وتصون حرمات غيرك..
حسين؛يلعن اصلك مرة وحده..
وجي بيتلاحقه بش يشده ويدفه عن عبد الرؤوف وهو يقول..
/فوته ياراجل ماتعدلش عليه خليه يقطف..
الجالي؛تعرف ياحسين وربي كان مادرتش عقلك في راسك نفنيك..
نضال:جالي ضم فمك و اسكت ياخش داخل يابرا في حالك..
حسين:كلمة تانيه ياوسخ كلمه تانيه وندفنك في مكانك يافاسد..
ويجي عبد القيوم يشد حسين مع عبد الرؤوف ويقوله..
/يستفز فيك ماتعدلش عليه..
عبد الرؤوف بتهديد؛ماتخلنيش نتصرف معاك تصرف مايعجبكش..
الجالي:ماتقدرش عليه قدرت عليا اني ماهو قبل مشرتع كرامتك قدام باب حوشهم..
جي عبد الرؤوف بيضربه جي قدامه عبد القيوم وقال..
/خود حسين وعدوا للشقه هيا..
نضال؛خلاص ياراجل سادك درتلنا العار..
عبد الرؤوف:اقسم بالله ماتنحسب ع الرجاله ياكلب ياقليل الاصل..
حسين؛من يومه خسيس ومنحط وقلة الاصل فيهم كلهم..
نضال:هييه الزم حدك.
الجالي قدم لين جي ورا عبد القيوم مباشره وقال..
/تعرف ياخسيس يامنحط انت لو اللي سمعته طلع صح نقتلك ونقتلها..
🍃والعركه عليها شهود والناس تسمع والجالي كان ليه هدف من كل اللي داره..
هدف يديروا في هلبه من بني جنسه من قديم وجديد..
يشوه سمعة مرته او طليقته بش مايفكرش فيها حد من بعده لو صار وانجبر جبر ع الانفصال عنها..
الجمله الاخيره اللي قالها طلعت حسين وعبد الرؤوف من عقولهم..
لكن اللي رد عليها رد غير متوقع بضربة راس اوقعت الجالي ارضا....
كان عبد القيوم....
#مالكش_حق
#طوبى
...يتبع....
