■■■■■■■■■■■■■■■■■■■■
❎تنويه❎
بعض احداث اقسام جزء #منازل_القمر صعبة ومرهقه نفسيا
#طوبى "جنة طوبى"
#جمان_فريد
#الجزء_116"منازل القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃"ﻻ بأس وكأنني لم انطفىء ﻻ بأس وكأنني لم أنخدش ﻻ بأس وكأن شيئاً لم يكن "🍃
__________________________________________
■بالعودة لليلة يوم الثلاثاء
4اغسطس..سنة2020...
الرابع عشر من ذي الحجة...
🍃قدام مطحن الزعيم..
كان واقف نضال وفي يده ورقه ليها علاقه بالفواتير اللي تخص المطحن لكن ماكانش يشوفلها..
عيونه كانوا ع حوش الواعر..مضيقهم بخوف واستغراب..
ع جية ولد خوه المهدي..محمد..
وقف جنبه وشاف لحوش لطوبى وهو يقول..
/كأني سمعت صوت عياط جاي من غادي!؟
شافله نضال وقال..
/حتى انت سمعته!!؟
وفي لحظه يتوجهوا بأنظارهم لباب حوش طوبى لما سمعوه انفتح...
وتطلع منه سيارة اريج وهي منطلقه بسرعه..
نضال بخوف..
/اريج!
وبسرعه لف ومشي لحوشهم وولد خوه لحقه..
🍃وفي حوش طوبى..
تحديدا الصاله..
كانت غرفه مقعمزه وضامة جنه لحضنها اللي كانت تبكي بشده..
قلبها انفطر الم عليها وهي تقوللها بنبرة باكيه..
/خلاص بنتي خلاص..خلاص ياروحي خلاص..
وولادها حداها لاهيين بألعاب الهاتف وبنتها لاهيه بالألعاب مش واعيين بأي شي من اللي قاعد يصير حواليهم..
لحظات وجي اتصال لغرفه..
اواب ناض بالهاتف ومشي بيه لأمه..
وصل فيها هي خداته وشافت المتصل..
خدت نفس..فتحت الخط وردت بنبرة مرتعشه..
/ايوه..
"غرفه بنتي شن حالك"
غرفه قعدت تبكي..
"شن في ياغرفه شن صاير توا نضال قالي سمع صوت عياط جاي من حوشكم وبعدين شاف اريج طالعه تجري بالسيارة"
غرفه ببكي وألم..
/ااه ياخالتي سميرة ااه..
"شن في خيرك..طوبى صارتلها حاجه!؟"
انهارت غرفه بالبكي..
وسميرة ردت عليهل تقول..
"جايياتك بنتي"..
ونهت المكالمه..
نزلت غرفه التليفون وضمت جنه بقوة..
وصغارها يشوفولها بحزن..
🍃🍃🍃🍃
تحت العمارة..
ع كراسي خشبيه مقعمزين..واحد يتكلم والثاني يسمع..
عبد الله "عم التارقي"..
/انا واثق فيك وعارفك كويس..لكن ياولدي في أمور لازم تحكم فيهم عقلك ماتخليش عواطفك تمشيك..انت توا تقول انا مستعد نتحملمعاها وعشانها كل شي لأنك بعيد ومشاعرك مسيطرة عليك..مرات بعدين وين تقرب يتغير الكلام لما تعيش الوضع تولي مدرك اكثر لصعوبته وتكتشف انك ماتقدرش عليه وتقول ماكنتش نحسابه هك..ابتسم وكمل يقول..وبعدين تندم ولأني نعرفك مستحيل ترد في كلمه عطيتها حتجبر روحك تكمل لكن وانت ضاغط ع نفسك واعصابك وحالتك هذي تنعكس عليها هي ويجيها منك شي ماشافته حتى من راجلها الاول..
عبد القيوم بإبتسامه..
/كملت كلامك!؟
هز عبد الله راسه وهو مبتسم..
تنهد عبد القيوم وقال..
/انا عشت معاها كل شي مرت بيه من قبل ماتعرفه ع خاطرها درت حاجات عمري ماتوقعت اني نديرها..حط يده ع صدره وقال..حاربت حتى نفسي وقلبي لما كانت ع ذمة راجل تاني المهم نقعد قريب عليها وقت تحتاجني نساعدها باللي نقدر عليه..مرر نظره قدامه وقال..مش عارف كيف بنقولها..نزل عيونه وعقد حواجبه بشي من الإحراج وهو يقول..سامحني ع جرأتي..بس انا ياعمي نحس في روحي عايش عشانها مستعد نعطيها روحي والله وبدون مبالغه وربي شاهد...
ضحك عمه ضحكة خفيفه..حط يده ع كتفه وشد عليه بعدين قال..
/معاك..
رفع عيونه وشافله بنظرات فيهم لهفه...
عبد الله وهو مبتسم..
/تو نعدي معاك لخالها ونخطبهالك..
ابتسم عبد القيوم من قلبه..خدي يد عمها وباسها..
وعمه يشوفله بإبتسامة حب وبين عيونه يشوف في صورة خوه اللي كان اقرب خوته ليه واحبهم لقلبه...
🍃🍃🍃🍃
وفي مصحة القدس..
اللي خشتلها اريج وهي مذعورة ومرعوبه ع طوبى..
كانت تصرخ وتنادي بأعلى صوتها..
"تعالولي"
ماكانتش بوعيها خوفها ع طوبى اللي كانت اشبه بالجثه الهامده ماخلاش فيها عقل..
الناس يتفرجوا عليها..واحد من امن المصحه جاها يجري وهو يقول..
"صلي ع النبي يااختي اهم جايين"
ع طلعة طبيبة شابه ومعاها ممرضين ذكور واناث يجروا في باريلا..
وصلوا فيها..طلعوا طوبى من السيارة وحطوها ع الباريلا ودخلوها بسرعه واريج معاهم..
نست تسكر السيارة لكن واحد من الممرضين سكرها وخدي مفتاحها ولحقهم..
🍃🍃
الطبيبه:شن صارلها بالزبط؟!
اريج وهي داهشة تقول بتشتت وذعر..
/منهارة..نفسيتها تاعبة..
هزت الطبيبه راسها وخشت ورا الباريلا اللي رافعه طوبى لغرفه الاسعاف والطوارئ..
اريج وقفت في مكانها..ولأنها كانت تعبانه حتى هي..
قعمزت ع رووس اصابعها وحطت راسها بين ايديها..
ع جية الممرض مدلها المفتاح وهو يقول..
/تفضلي اختي..
قامت راسها شافت للمفتاح شويه بعدين خداته وهو خش لغرفه الاسعاف..
ناضت اريج وهي تقول بصوت مرتعش..
/يارب..يارب..
مررت نظرها حواليها شافت الكراسي مشت بتعب وقعمزت عليهم بهدة وهي تتنفس بشي من الصعوبه..
🍃🍃🍃🍃
"من لما بعتلها هداكا الحقير الرساله وهي بتهبل"
سميرة بألم وكره..
/عطيه مايرفعه..
غرفه ودموعها تنزل..
/ايه والله..هي من قبل نفسيتها تاعبه وع عينك وضعها شفتيه لما ماروحت من حوش مختار..وفاة جدي هدتها هد وهالمصيبه اللي انبلت بيه زادها ع مابيها..
نزلوا دموع سميرة مسحتهم وهي تقول..
/عمك محمد قال بيديرله حد معاش يخليه يوصل فيها ولافي جنه..
غرفه بقهر..
/ياروحي عليها هالجنه كانك شفتيها ياخالتي شن صار فيها بنيتي رقدت بعد ماتعبت من البكي..
سميرة بألم..
/الفجي فيها..
دق باب الحوش..
غرفه قعدت تشوف لسميرة بصمت..
وسميرة ناضت وهي تقول..
/تو نشوف مني..
ومشت طلعت من حداها..
غرفه بعد ماكانت تشوفلها تنهدت بألم ونزلت عيونها لهاتفها..
حطت ع رقم اريج واتصلت بيها...
🍃🍃🍃🍃
"هاه مختار شن حالك توا!؟"
مختار وهو متمدد ع كرسيه الجلد قال بصوت متعب..
/كويس..
الاقجم:غير كان خليتنا نرفعوك للمصحه..
مختار:ماعندهم مايديرولي..شاف لفاتن وقال..بري ارتاحي فاتن مافيا شي..
فاتن بقلق:تعال معاي للدار مش متحركه من هني الا وانت معاي..
مختار بضيق:ماعنديش نتحرك..
فاتن:الاقجم يساعدك..شافت للأقجم..
قدمله وهو يقول..
/هيا يامعلم هات يدك..
نزل مختار رجليه بإستسلام ومد يده للأقجم .
خداها ورفعه وساعده يمشي لين طلعه من الحجرة وفاتن طالعه وراهم..
🍃🍃🍃🍃
"قاعدين يجروا عليها ياخالتي مافي حد قالي خيرها الحاجه الوحيده اللي قالتها الدكتورة ماتخافيش عليها"
غرفه بنبرة باكيه:مالقتيش اميمه غادي!؟
"لاماشفتهاش"
غرفه:تو نتصل بيها نشوفها وانتي اي شي يصير معاك كلميني..
"باهي..جنة شن صاير فيها"
غرفه؛بكت لين رقدت ياروحي..
"ياروحي عليها حسبي الله ونعم الوكيل"
ونهت المكالمه من غير ماتسلم..
نزلت غرفه الهاتف وهي تقول بألم..
/لتوا ماعرفتش شن صارلها..
فايزة بنبرة باكيه..
/لاحول ولاقوة الا بالله...
سميرة:قاعده بروحها غادي!؟
غرفه:تو بنكلم اميمه تشوفها كانهي غادي..
ورفعت هاتفها واتصلت اميمه وحواليها سميرة وفايزة وبناتها يشوفولها بحزن الم..
🍃فايزة وبناتها سمعوا من سدرة بنت المهدي اللي اتصلت بتالة وخبرتها..
محمد المهدي:بوي وخالتي لازم يعرفوا..
محمد الجد بضيق...
/خل نراجو لين يصبح الصبح ياولدي..
يزن؛جدي عنده حق تو ينفجعوا في الليل ومرات لاقدر يصيرلهم شي وهما جايين في الطريق..
سكت محمد وهو مضايق.."محمد"
سمع صوت عمه نضال ينادي فيه طلعله يجري..
🍃قدام باب الحوش الدخلاني..
وصل محمد في نضال وقال..
/نعم!؟
نضال:ارفعني للمصحه..مدله المفتاح وقاله..مفتاح سيارة عمر..
خداها محمد وهو يهز في راسه مواققه وقال..
/تفضل عمي..
مشي نضال للقراج ومحمد لحقه..
🍃وخديجه في دار امها تكلم في نسرين هاتفيا..
"خوك مش حيرتاح لين يقتلوه"
خديجه:اني مش عارفه علاش مازال شاد فيها بس..
"تو انتي هدا اللي هامك!!؟"
خديجه بإنزعاج..
/كانك عليا ماهامني فيهم حد ينحرقوا مع بعضهم..
شافت مغليه لبنتها بنظرات ضيق..
"اني نسكر خيرلي"
ونهت نسرين المكالمه..خديجه نزلت التليفون وهي تقول بإزدراء..
/وانتي معاهم..
ومشت طلعت من جنب امها وسكرت الباب وخلتها تنزل في دموعها خوف ع ولدها الجالي من نتيجة افعاله..
🍃ونتيجه افعاله الطايشه واقفه في دار فاضيه في شقتها وهي تتفرج ع شناطيها اللي كانت حاطه فيها شويه ملابس وحاجات مهمه مجهزتهم للهروب..
جاها اتصال ردت عليه وهي تقول..
/السلام عليكم..
"وعليكم السلام اختي نجاة كيف الحال"
نجاة:الحمد لله..اطمن قاعدين ع موعدنا غدوة الساعه 11تعالى استلم مني مفتاح الشقه..
"ان شاء الله..تصبحي ع خير"
نجاة:قدامك كل خير..
نهت المكالمه وهي تشوف لهاتفها بنظرات مكر تبدلت لنظرات مغرورة مع ابتسامه لما جاها اتصال تاني خلاته يرن للحظات بعدين ردت عليه..
/ايوه..
"حبي"
ضحكت وكملت مكالمتها...
🍃🍃🍃🍃
وخبرت غرفه اميمه اللي كانت في الحوش..واميمه وهي مفجوعه خبرت خوها وامها اللي خدوا نصيبهم من الفجعه ع طوبى..
ع طول جهزوا انفسهم وطلع بيهم حسين لشارع القهوة حط امه في حوش طوبى ومشي بأخته للمصحة..
🍃في المصحه..
نقلوا طوبى من حجرة الاسعاف لحجرة تانيه بش يكملوا فحوصاتهم عليها وكان خالد هو الطبيب المشرف ع حالتها..
طلع من الحجره ومعاه طبيبة من مجموعته..
جتهم اريج ملهوفه وخايفه وهي تقول..
/شني يادكتور!؟
خالد بأسف..
/انهيار عصبي..
حطت اريج يدها ع صدرها من الفجعه ودموعها نزلوا..
خالد:وضعها الصحي تعبان جدا تحاليلها كلها تبين انها شبه مضربة عن الطعام..
نزلت اريج عيونها وحطت يدها عليهم وقعدت تبكي..
الطبيبه:اهدي حبيبتي بإذن الله مع العلاج تتحسن..
خالد شاف لأخر الممر وهو يقول..
/جايه بروحك!؟
نزلت اريج يدها وهي تقول بنبرة باكيه..
/ايه..باهي يادكتور نقدر نخشلها!؟
شافلها وقال..
/حاليا لا..
مسحت بإيديها ع وجهها وهي تقول..
/حسبنا الله ونعم الوكيل..
خالد:هي كانت مصابه بالكورونا قبل!؟
هزت اريج راسها بإيجاب..
شاف للطبيبه جنبه بنظره اسف وهي شافتله بنفس النظره وهزت راسها...
اريج لاحظتهم وقالت بخوف..
/شن في دكتور!؟
شاف القدام وهز راسه وهو يقول..
/ان شاء الله خير..
ومشي وهو ينادي ع الطبيبه اللي معاه..
لحقتهم اريج بنظرات كلها خوف..تبدلت هالنظرات لنظرات مفاجئة لما شافت نضال واقف اخر الممر..
كان يشوفلها بحزن وضيق..
بادلاته بنظرات ألم بعدين غيرت عيونها عنه ومشت قعمزت ع الكرسي وبدت تبكي بصمت..
🍃نضال لحظتها كان متمني لو يقدر يكون جنبها ويخفف عليها..قلبه كان واجعه هلبه وهو يشوف فيها من بعيد تبكي ومش قادر يمشيلها..
في عز ألمه اتصل بيه محمد المهدي رد عليه وهو يقول..
/نعم
"حسين واخته خشوا للمصحه توا"
هو بضيق شديد قال..
/تمام..نهي المكالمه وشاف لأريج بوجع وهو مجبور مشي وخلاها..
بعد مامشي بلحظات جو اميمه وحسين وهما يمشوا بسرعه..
نادت اميمه..
"اريج"
ناضت اريج لما سمعت صوتها مشتلها بسرعه ضمتها وهي تبكي..
واميمه حضنتها ودموعها نزلوا..
حسين بضيق..
/خيرها يااريج!؟
اريج تباعدت عن اميمه وقالت ببكي وألم..
/انهيار عصبي..
عقدت اميمه حواجبها بألم..
وحسين بضيق شديد قال..
/تؤ..لاحول ولاقوة الا بالله..
🍃🍃🍃🍃
ووصل الخبر للمحجوب اللي كاد عقله يطير من راسه مااستناش طلع بمرته لحوش طوبى حطها غادي وبسرعه توجه للمصحه..
🍃🍃🍃
"علاش ماقلتوش علاش!؟"
المحجوب بغضب والم..
/هي مابتش خافت عليك تعلق انت وياه..
خبط حسين كفوفه ببعض وهو في قمة الغضب..
بعدين تباعد عن المحجوب وطلع تليفونه من جيب بنطلونه وايديه يرجفوا من العصبيه..
حط ع رقم المهدي واتصل بيه والمحجوب يشوفله...
🍃فهالوقت المهدي كان يغطي في سدره بعد مارقدها في دار النوم..
سمع صوت رنين هاتفه عقد حواجبه وبدت ع وجهه ملامح القلق بعدين مشي طلع للصاله..
وصل في الكنبه اللي كان عليها هاتفه خداه ولما شاف المتصل قال..
/يستر الله..فتح الخط ورد..ايوه حسين..
جاه صوت حسين الغاضب وهو يقوله..
"وينك انت وين!؟"
المهدي وهو عاقد حواجبه قال..
/شن في!؟
"في ان خوك المريض قاعد مريض وانتم تتستروا عليه"
توقع المهدي ان حسين عرف بحكاية الصور جاوبه وهو يحاول يحافظ ع هدوئه..
/غير اهدا وصل ع النبي..
قاطعه وهو يقول بعصبيه شديده..
"اسكت واسمع..حني عبينا عليك وخلينا الموضوع عندك وجدي بروحه قالي المهدي وراها اني وصيته كون هاني لكن كان عباك ع بن ضو..خلاص من بعد اللحظه هادي اني نتفاهم معاه المريض هدا.."ونهي المكالمه بدون مايعطي فرصة للمهدي يرد..
لكن المهدي حس من ردة فعل حسين ان في شي تاني صاير طول اتصل بعمر..
🍃وعمر كان في دارهم هو ونضال راقد..
ازعجه صوت رنين هاتفه حاول يتجاهله ماقدرش ناض وهو منزعج خداه من ع الكامدينو لما شاف المهدي يتصل بيه توقع انه عرف باللي داره الجالي..
قعمز ع السرير وفتح الخط ورد..
/ايوه مهدي..
"شن ملبز التافه هداكا تاني!؟"
تأفف عمر بضيق وبدي يحكيله...
🍃والمهدي بعد سمع من عمر انتابه شعور غضب شديد نهي المكالمه معاه واتصل بالجالي ويلقى الجالي حاطه في الحظر..
🍃🍃🍃🍃
"هي جت هني قبل العيد ودارت تحاليل وطلع عندها فقر دم ونقص فيتامينات"
خالد:هادي كلها مضاعفات كورونا حتى تدهور حالتها النفسيه سببه هالمضاعفات..مانبيش نخفيك سر يااميمه اني شاك ان قلبها فيه مشكله..
بدت ع وجه اميمه ملامح الصدمه..
خالد:كلمت الدكتور بشر "طبيب قلب"عن وضعها وهو قال حيشوف وضعها بروحه ويعطينا التشخيص الصحيح..
اميمه بصدمه ودموعها في عيونها..
/انت شن متوقع دكتور شن شكل الضرر اللي خلفاته الكورونا ع القلب!؟
خالد:مانقدرش نتوقع يااميمه..
اميمه بألم:إنا لله وإنا إليه راجعون..
🍃مش بس الكورونا اللي خلفت ضرر ع قلب طوبى..الكورونا غالبا كانت عامل مساعد..الضغط النفسي اللي عاشت فيه طوبى ومحاولتها دائما تحمل مالايحتمل احيانا كانت اقوى الاسباب لوصولها لهالحاله..
وللأسف كأن اللي مرت بيه ماكفاش شيطانة الانس اللي ياما تربصت بيها "نجاة" بش يشفي غليلها اختارت الانتقام منها ومن غيرها فيها..فش غلها منها ومن غيرها فيها..
🍃🍃🍃🍃
■يوم الاربعاء..
الخامس عشر من شهر ذي الحجة..
5اغسطس..سنة 2020..
في احدي الاحياء الراقيه في العاصمة طرابلس..
فيلا من طابق واحد كان موجوده فيها نجاة تفطر ع رواق وفي نفس الوقت تراجي في اتصال.
وجاها..فتحت الخط وردت..
/صباح الخير..
"صباح العسل ع العسل كله شن ديري"
هي بإبتسامة غرور..
/نفطر..
"صحتين ياحبي..حبي اللي تبيه صار"
نجاه:خدوه!؟
"ايه ومن قدام الراجل اللي بعتيله الشقه"
بمكر وحقد قالت..
/نبيك تخليه يخش في عقله ويطلع من الخوف ترده مريض احرف من قبل بعدين خليه يطلقني وبعد نطلق اللي تبيه انت يصير..
"حاضر..حاضر اللي تبيه نديره..وتوا خلينا منه وتعالي لهادي طليقته انتي طلبتي مني معلومات عنها ولا"
نجاة بشي من اللهفه..
/شن عرفت!؟
"حاليا راقده في مصحة في منطقه ****** المعلومه اللي وصلتني ان صايرلها انهيار عصبي"
ابتسمت بنصر وقالت..
/اممم..
"ماقلتليش شن عندك معاها!؟"
تنهدت وقالت..
/نبيها تاخد بتارها من هالكلب حتى هي..
🍃🍃🍃🍃
في هالأثناء كان عمر ماشي لخوه الجالي بش يتفاهم معاه ويوصله تهديدات بوهم..لكن وين وصل غادي عرف ماصدمه بقوة..
🍃"مانعرفش ياخوي خدوه ملتمين من قدامي وقالوا سكان العمارة انهم رفعوه في سيارة سودا مظلمه من غير طارقات"
عمر قعد يشوفله وهو مصدوم مش قادر ينطق..
صاحب الشقه اللي كانت لنجاة..
/اني والله اللي نعرفه من ابلة نجاة ان الشقه هادي ماكان فيها حد غيرها هي وصغارها وقبل لتبيعها طلبت مني نعطيها مهلة اسبوعين لين يبدا الحوش اللي بتحوله واتي واتفقنا ع موعد اليوم الساعه 11نجيها نستلم منها الشقه...
عمر بعدم استيعاب..
/ماجيتش شفت الشقه قبل لتشريها!؟
هو قال بضحكه..
/لاكيف عاد اكيد شفتها وقتها الشقه ماكان فيها حد غيرها..
🍃اللي يسمع فيه عمر خلا عقله ينشل عن التفكير ماقدرش يستوعب شي..
ولأن المهدي بعد اللي عرفه قرر يروح بسدرة تاني يوم معللها هالشي بأمور طارئة صارت في الخدمه..
اتصل بيه عمر وخبره بعقاب الخير وهو طول توجه للعمارة اللي كانت فيها شقة نجاة..
🍃🍃🍃
من جهة تانيه سدرة لما روحت ركبت لشقتها طول..
تلقتها سدرة الصغيرة وبعد سلمت عليها قالت..
/لاباس علي ابله طوبى..
عقدت حواجبها وقالت..
/علاش خيرها!؟
سدرة بإرتباك واستغراب..
/قصدك ماتعرفيش!؟
قالتلها بخوف ونفاذ صبر..
/لامانعرفش قولي خيرها!؟
🍃🍃🍃🍃
"توا بتجي اريج واني بنمشي في مكانها"
هاديه ودموعها في عيونها..
/قوليلها تجيني للحوش خل يقعدوا عندي اليوم خير..
سكرت غرفة سوستة الشنطه وهي تقول..
/هكي احسن..
سمعوا صوت جرس الانترفون يرن..
غرفه:مني زعمه!؟
ومشت طول بش ترد وخلت هاديه حدا الصغار..
🍃خدت غرفه السماعه وحطتها ع وذنها وهي تقول..
/مني..
"افتحي"
ابتسمت تهكما وسكرت السماعه بعدين ضغطت ع زر بش تفتح الباب..
مشت وقفت في فتحة الصاله وهي تشوف للباب الدخلاني اللي كان مردود..
شافت ظل كان يقرب لعند ماوصل في الباب وفتحه..
"شن صار لطوبى!؟"
غرفه بتهكم..
/كان تبي تعرفي راك مشتيلها وين ماهي قاعده..
سدرة بشي من الغضب..
/فوتي الكلام الفارغ وجاوبي ع قد السؤال..
🍃صوتها وصل لهاديه اللي حست ان مشكله حتصير ناضت وهي تقول للصغار..
/هي تعالوا معاي..خدت مئاب رفعتها في حضنها ومشت طلعت من الدار..
وصلت فيهم وقالت..
/كيف حالك سدرة؟
مررت سدرة نظرها عليهم هي والصغار وقالت..
/الحمد لله..
هاديه لغرفه:حني ماشيين..بالسلامه..
غرفه:اواب مهاب جنونه ماديروش شطانه..
كلهم بصوت واحد قالوا...
"باه"
ابتسمت هاديه وقالت..
/تعالوا..
وتوجهت للباب الأمامي طلعت وهما طلعوا وراها..
مشت غرفه سكرت الباب والتفتت لسدرة وهي تقول..
/مالكش حق تسألي عن حالها ولاتعرفي شن صار معاها..
سدرة بتهكم..
/ومن انتي بش تقولي الكلام هدا!؟
غرفه ابتسمت ساخرة بدون ماترد..
قدمتلها سدرة وقالت..
/عارفاتك استغليتي الوضع وقعدتي تفتني زي عادتك لكن نقولهالك مهما ديري ومهما تقولي مش حتقدري تخشي بيني وبينها لأنها تعرفك كويس وحده انانيه من يومك وماتحبيلها شبح وجه..
غرفه قعدت تشوفلها بإبتسامه اسف وعيونها معبيات دموع بعدين قالت..
/قولي لراجلك يرفعك للمصحة اللي هني وغادي تعرفي شن صارلها..
وكيف جت بتمشي من حداها للدار شدتها من ذراعها بقوة وجبدتها ووقفتها قدامها وقالت..
/مانكش متحركه من هني قبل لتجاوبيني..
غرفه بدهشه:معناها مش ناويه تمشيلها!؟
في هاللحظه انفتح باب الحوش الخارجي..
جبدت غرفه ذراعها وقالت..
/اهي جاتك اريج تو تجاوبك ع سؤالك..
وكملت طريقها لدار المعيشه وسدرة معاها بعيونها وهي تشوفلها من فوق لتحت..
غيرت نظرها طول للباب لما سمعت صوت ابغض خلق الله لقلبها..
" معقوله يصير فيها هدا كله واني اخر من يعلم!؟"
كل ذرة من جسدها اشتعلت بنار الغضب..
لما شافاته خاش هو وبنت اختها انفجرت فيه وهي تقول..
/ياوقاحتك ياحقارتك يااخي..
انصدمت اريج..وهو وقف في مكانه وقعد يشوفلها برفعة حاجب من فوق لتحت..
طلعت غرفه من دار المعيشه وهي تشوفلهم بخوف وترقب..
قدمتله سدرة بغضبها الشديد وهي تقول..
/امشي اقلب وجهك امشي اطلع برا ياعمل السو لعيلة الواعر يالعنة عيلة الواعر..
اريج مشت لغرفه وهي تشوف لسدره بخوف..
وصلت في غرفه وقفت جنبها شافت سدرة وهي تقول لمختار بصوت عالي..
/اطلع..
هو بعصبيه وصوت عالي..
/سكري فمك..اخفي حسك مرة وحده ياقليلة التربيه..
بغضب شديد..
/اني متربيه احسن تربيه ثمرت فيا رباية لطفي وورده اللي عمرها ماثمرت في واحد زيك وصلت بيك تضحك عليا وتستغلني بش توصل للي تبيه يامريض ياحقير..خلتيني ندخلك للحوش اللي حرمه عليك بوي..بوي اللي حرم عليك تحضر جنازته وتوقف ع قبره من فعايلك السود..
رد عليها بنفس الغضب وهو يقول..
/كله منك انتي في جراريك انتي في جرة حقدك وسواد قلبك حرمتي عليا ناخد فرصتي معاه ومعاكم كلكم اللي درتيه فيا انتي مايديراش فيا عدو..
سدرة بسخرية وازدراء..
/بالله فوتها الدسكه هادي طاحت موضتها..انت لو كنت تستاهل تاخد فرصة راك مادرتش اللي درته لغرفه وراجلها وبعدين طوبى..انت وصلت بيك تخطف طفله وتسلمها لواحد مريض نفسي وصلت بيه تسلمله طوبى تسلمهم هي وبنتها للموت من غير ماترمشلك عين..تقدر تقولي شن دارتلك جنه!!؟ مانبيش نقولك طوبى ولاغرفه جنه جنه البيبي!!؟ عمرك ماكنت تستاهل فرصة يامختار من حد فينا عمرك..
كلامها كان وقعه قوي جدا ع مختار لكن خلا غضبه عليها يشتد وحقده عليها يزيد..
رد عليها يقول..
/باهي اني شيطان رجيم ابليس لكن انتي شني قولي شني؟ وحده زيك شن مفروض يقولوا عليها اللي تخلت عن اختها اللي دايرتها بنتها وقاطعتها مرة وحده بس لأنها ماسمعتش كلامها ودارت ماتبي..تي انتي توا مفروض تكوني فوق راسها! لكن نعرفك مش حديرها قلبك الاسود حقد عليها لأنها فضلتني عليك..
🍃غرفة واريج كانوا يتفرجوا ويسمعوا وهما مصدومات بالذات غرفه مش قادرة تصدق ان هادم الزوز كان في بينهم رابط دم من اصله مش علاقة اخوه قويه وفريده من نوعها!..
وجهت سدرة سبابتها للباب وهي تشوفله بنظرات حاده ودموعها في عيونها..
هز راسه هو مبتسم بسخريه وقال..
/بنطلع توا ونمشيلها وماهي وحنولي نخش مرة تانيه معاها غصب عنك وعن غيرك..
ولف ومشي طلع وهو يمشي بعصبيه وهي معاه بنظراتها الحاده اللي غرقتهم الدموع..فجأة بدون سابق انذار انهارت سدرة بالبكي..قعدت تبكي بالعبره..
وغرفه واريج يشوفولها بنظرات حزن وعدم فهم تبدلت هالنظرات للخوف لما شافوها شدت حزامها وهي تتوجع طول جوها يجروا...
🍃🍃🍃🍃
"تخطيط القلب مايقدرش يعطينا التشخيص الدقيق بس هو عطانا مؤشر ان القلب فيه مشكله ما"
اميمه بخوف:زي شني دكتور!؟
الطبيب بشر قال..
/مضطر نسأل سؤال خاص شويه..هي صايرة معاها مشاكل في حياتها متعرضه لضغوط نفسيه..صدمات !؟
هزت اميمه راسها وع وجهها باديه ملامح الحزن..
ضم شفايفه للداخل بعدين رخاهم وقال..
/تو لما تفيق ويكون حالها احسن نديرلها باقي الفحوصات اللازمه ونشوفوا شن يطلع معانا وان شاء الله تكون مشكله بسيطه مقدور عليها..
🍃طلعت اميمه من مكتب اخصائي القلب وهي متألمه وحاسه بضيق شديد..
وصلت في حجرة طوبى خشتلها وقعمزت قريبه عليها وهي تشوفلها بحزن..دموعها نزلوا وهي تتأمل في ملامحها الباهته المتعبه وتقول في نفسها..
"ياربي الطف بهالمسكينه يارب"
🍃🍃🍃🍃
"شن جوهن!؟"
صفيه بضحكه:ناقمات عليكم انت وخالي عبد الله..
عبد القيوم..
/ربي يهديهن..
تنهدت وقالت بإبتسامه..
/نتمنى من ربي ينولك اللي تتمناه لكن نبي نقولك ع شي مهم طوبى اللي شفتها اخر مرة ماهيش نفسها طوبى اللي نعرفها المراة تعبانه واجد ياعبدالقيوم يعني لوصارلك منها نصيب لازم تعرف انك حتتعب معاها ياريت قبل لتعدي تخطبها من خالها تتأكد من روحك لو كنت فعلا تقدر ع الشي هذى ولالا..مش عشانك راهو انت راجل مايضرك شي كل شي بيدك انت تاخدها ولاتخليها وكان خليتها ساهل عليك تاخد غيرها وتعيش حياتك لكن هي مراة مكسورة بتزيد تكسرها لو تخليت عنها والله اعلم شن يصير فيها بعدين رد بالك ياعبد القيوم..
هو بقلق:لهالدرجة وضعها صعب!؟
صفيه بحزن:والله ليلتها لما روحنا منهم تميت نبكي لين قلبي وجعني بجد..
عبد القيوم مرر نظره قدامه وهو في قمة القلق بعدين مشي طلع من الشقه..
تنهدت صفيه وقالت..
/يارب قدمله اللي فيها الخير...
