#طوبى "جنة طوبى"
#جمان_فريد
#الجزء_117"رحلة حب وحرب"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 تركتها لك يا الله، ووكلت أمري إليك فبشرني بما أريد وبما اخترته لي خيرًا.🍃
__________________________________________
في سيارة عبد القيوم..
كان مقعمز المحجوب جنبه يسمع فيه ..
عبد القيوم بحرقه..
/ريت اللي صار لبنت اختك شفت وين وصلت بيها الحال؟
المحجوب بملامح متجهمه..
/بإذن الله بنطلعوها تتعالج برا..
عبد القيوم:وين برا!!؟ وتتعالج من شني!؟
المحجوب وهو يحاول يحافظ ع هدوئه..
/معليشي عبد القيوم هادي امور عائليه..
ضحك بقهر..غير نظره القدام وهو يمسح ع لحيته بعدين رد نظره للمحجوب..تبدلت ملامح وجهه للجديه وقال..
/بنت اختك مصابه بالسحر.
المحجوب بإستنكار..
/شني!؟
عبد القيوم؛حالتها والاعراض اللي تعاني منهن تبين انها مصابه بالسحر مالا شن اللي يخلي وحدها كيفها تنتحر!؟
المحجوب بصدمه..
/انتحار!؟
عبد القيوم بإستغراب..
/ماتعرفش!؟
غير المحجوب نظره القدام وهو يقول بصدمه..
/حسيت والله حسيت بيهم مدرقين حاجه..
عبد القيوم بشي من الارتباك..
/ماتوقعتش انك ماتعرفش..
بإنفعال رد يقول..
/كيف يخبروك انت ويدرقوا عليا اني!؟
عبد القيوم:لاني قبل نبهتهم ع وضع سدرة وقتلهم انها مسحورة..
شاف المحجوب لعبد القيوم وقال بصدمه وقلق..
/متأكد انها مسحورة!؟
عبد القيوم بضيق..
/توا بنكلم خالي ونخليك تسمع شن بيقول..
قام هاتفه واتصل بخاله وفتح المايك والمحجوب يشوف للهاتف بخوف وترقب..
نادى مرة..اتنين..في الثالثه انفتح الخط..
"السلام عليكم عبد القيوم...شن صار معاك"
عبد القيوم:وعليكم السلام..خالي الكرمة جايه في مكان بعد نص الليل القمر يكون فوقها بالزبط...
"الله المستعان وإنا لله وإنا إليه راجعون"
المحجوب قلبه انقبض..
وعبد القيوم قعد يبلع في ريقه والخوف معبي قلبه..
"الله المستعان..الله المستعان..عبد القيوم ياولدي الاعراض اللي قتلي عليهن..ونقطة انها تعبت قبل هاليوم من شهر يعني حيكون اليوم 14 من الشهر العربي كان قلنا امس 14محرم يعني المرة الاولى تعبت يوم 14ذو الحجة هذى كله يدل على انها مصابه بأخطر واشرس انواع السحر..سحر النجوم والكواكب اللي يكون للقمر دور كبير في تفعيله طبعا انت تعرف كويس السحر هذى شن يدير وكيف يصير اكيد مذكر حالة الدرناوي اللي قعد عندي شهور بش نعالجه"
عبد القيوم بصوت هادي وقلبه موجوع ع الآخر قال..
/ايه..مذكر كويس ياخالي ..
"لاحول ولاقوة الا بالله كان الله في عونها مسكينه كان الله في عونها"
عبد القيوم شاف للمحجوب لقاه شاخص ببصره القدام والدموع ينزلوا من عيونه..زاد وجع قلبه..انهى المكالمه مع خاله وهو يقول..
/تمام ياخالي تو نحكي معاك بعدين..
"ضروري ياعبد القيوم..السلام عليكم"
عبد القيوم وهو يشوف للمحجوب قال..
/وعليكم السلام...
نزل هاتفه وسكر الخط وهو يقول..
/خال محجوب.
المحجوب بألم..
/يااه ياعبد القيوم مش قادر نستوعب حجم المصايب اللي تنزل ع البنت هادي...البنت هادي ربي يبيها تخش الجنه..
كلام المحجوب من كثر ماهو مؤلم خلا قلب عبد القيوم ينتفض ويثور ويطلع اللي داسه ع لسان صاحبه..
/البنت هدي ليها عندي قدر وفي قلبي مكانه ماحد قدر يوصلها...
شافله المحجوب..
عبد القيوم وهو يتكلم من كل قلبه..
/اغلى من روحي عليا..اغلي ماعندي في الدنيا وربي شاهد والله العظيم ماحتندم لحظه لو وافقت تعطيها ليا..
☘المحجوب وهو يشوفله جابتله الذاكرة موقف صار قبل عامين بينه وبين راجل اخته لطفي الواعر...
🔺️🔺️🔺️قبل عامين🔺️🔺️🔺️
المحجوب بإستغراب:عبد القيوم التارقي!؟
لطفي:ايه عبد القيوم..الراجل هدا عندي فيه ثقه كبيرة نقدر نأمنه ع عيلتي واني واثق ومتأكد انه حيكون قدها سادتني شهادة صديق عمري جبريل الشرقاوي فيه..
المحجوب:شهادته ع شي زي هدا مرات تخليه..
قاطعه وقال:فاهم وعارف مختار كويس يامحجوب..
المحجوب:متأكد يالطفي!؟
لطفي؛اكثر مامتأكد من روحي..
🔺️🔺️🔺️الوقت الحاضر🔺️🔺️🔺️
رفع المحجوب حاجبه ونزل عيونه..رمشهم بسرعه ورد نظره لعبد القيوم وهو يقول..
/يوم السبت تعالالي هني بعد العصر..
بدت ع وجه عبد القيوم ملامح الاستبشار وهو يقول..
/خليها الاحد نبي نبلغ هلي في الكفرة بش يجوا معاي..
المحجوب:نبي نقعمز معاك بروحك..
تبدلت ملامح وجهه الإستغراب..
فتح المحجوب الباب ونزل وهو يقول..
/نراجي فيك..تصبح ع خير..
سكر الباب ومشي توجه لحوشه وعيون عبد القيوم معاه وهو يفكر بحيرة في اللي قاله..
🍃🍃🍃🍃
"انتم ديما الحل عندكم فالزواج"
المهدي ويصب في عصير الفرواله في طاسه قال..
/لخديجه هدا الحل الوحيد..
سدرة وهي تمسح في الغاز قالت..
/ان شاء الله خير..
المهدي:ان شاء الله..رفع الطاسه بش يشرب سمع صوت رنين هاتف سدرة..
سدرة:تليفوني ولا!؟
المهدي:امم..وشرب من العصير..
كيف جت بتمشيله خشت عليها سدرة المهدي وهي شاداته..
قدمتلها وقالت..
/خودي..
خداته سدرة المنتهى وهي تقول..
/سلمها ياربي..
شافت سدرة المهدي لبوها لقاته يشرب في العصير ومش مهتم لوجودها..اضايقت
ومرت بوها لما شافت المتصل قالت..
/خالي.
حط المهدي الطاسه ع الطاوله وشافلها وهو عاقد حواجبه..
وسدرة الصغيرة مشت طلعت من حداهم وهي مضايقه..
🍃🍃🍃🍃
الساعه 11:00ليلا..
واقفه قدام المرايه تحط في اخر لمساتها من الزينه ع وجهها..
رتبت شعرها..وحطت عطر وهي تستنى في زوجها بلهفه..
سمعت باب الحوش انفتح وتسكر..ابتسمت بحماس وشافت للطاوله اللي تعبت وهي تزين فيها وحطت عليها مالذ وطاب من اكل وشرب..
لحظات وخش عليها راجلها..
شاف للطاوله بعدين غير عيونه ليها..
نسرين بضحكه:تفاجئت!؟
ربيع وهو يشوفلها مرر نظره عليها وع ملامحها خطر عليه كلام امه اللي ياما قالاته قدامه وولامرة اثر فيه..لكن هالمرة تفكره وتأثر بيه علاش!؟لأن اول ماعينه جت عليها خطرت عليه الهام..صغيره وجميله ودمها خفيف ودلوعه بعض الشي وبدي يقارن بيناتهم تلقائيا
ممكن النفور اللي بدي يحسه اتجاهها ساهم في انجذابه السريع لإلهام..وممكن توا بس فهم ان اللي كان يحسه تجاه نسرين تعاطف معاها وشعور ابوه اتجاه ولدها..
في النهايه اي كانت الاسباب ربيع حاليا معاش يحس اتجاه نسرين بولا شعور غير النفور..وللأسف الراجل لما ينفر من المراة يكسرها🍃
ربيع بضيق:اسف مروح تاعب وفي عيني النوم وماعندي نيه شي
ومشي طول للدولاب بش يطلع حوايجه ونسرين تشوفله بإحراج وصدمه..
مش هدا اللي تخيلاته وهي طيبله في اكثر انواع الاكل اللي يحبها!
مش هدا اللي تخيلاته وهي تزين وتجهز في الطاوله!
مش هدا اللي تخيلاته وهي تهيأ في نفسها ليه!
قعدت تبع فيه بنظراتها المصدومه الغارقه بالدموع لعند ماطلع بحوايجه من الدار متوجه للحمام..
طاحوا دموعها..التفتت ع الزيانه..قدمتلها خدت مناديل مسح المكياج وبدت تمسح فيه وهي تبكي بصمت..
بعدين لمت شعرها فوق وخدت مساكه شداته بيها..التفتت ع الطاوله وقعدت تلف عليها وهي طفي في الشموع والدموع يقطروا ع الطاوله..لمت الماعين اللي عليها وكأنها تلم في اجزاء قلبها المكسور ومشت بيهم للكوجينه..
غلفتهم وهي تبكي ودستهم في الثلاجه..بعدين ولت للدار ولمت باقي الحوسه وخلتها ترجع زي ماكانت..
واخر شي بدلت حوايجها ومشت طول خشت للسرير رقدت وهي عاطيه بالظهر وقعدت تبكي بصمت..
🍃وهو طلع من الحمام مشي طول لدار يحيى..
خشله وقرب من سريره قعد يتأمل فيه وهو مبتسم بألم..نزل عليه باسه بلطف ع جبينه..بعدين طلع من داره لدار النوم..حس بشي من الضيق لما شافها رجعت لسيرتها الاولى غير نظره لنسرين لقاها راقده وهي عاطيه بالظهر..
تنهد..ومشي خش للسرير ورقد وهو عاطيها بالظهر..
🍃مرت الساعات وهي تذرف في الدموع..وهو يفكر بضيق في اللي قاعد يصير معاه لعند ماغلبهم النوم وراحوا فيه..
🍃🍃🍃🍃
تاني يوم فاقت نسرين بكري جهزت الفطور وقعدت تفطر هي وولدها..
هو فاق بروحه طلع من الدار بيمشي للحمام سمع صوت يحيى وهو يكلم في أمه ابتسم وخش للحمام..
بعد ماطلع من الحمام مشي للدار صلى الصبح وبعد الصلاة توجه للكوجينه..
لما خشلها لقي يحيى مقعمز يلعب بهاتف امه غير نظره للطاوله شاف الفطور اللي عليها مغطي..
هي جاته من وراه وقالت..
/بنتغدا في حوش ماليا اليوم..
ربيع؛باهي كويس حتى امي تبيني نتغدا عندها نحطك غادي ونتوكل..وخش للكوجينه..
هي بملامح حزن قالت لولدها..
/يحيى ماما هيا تعالى نبدلك حوايجك بش نمشوا لحوش جدو..
نزل يحيى يجري وهو يقول..
/بنمشوا لسيمو؟
ضحكت بملامح الحزن وقالت..
/ايه..وخدت يده وطلعت هي وياه من الكوجينه..
ربيع اللي كان بعيونه مع يحيى ابتسم بحزن وبدي يفطر...
🍃🍃🍃🍃
"هيا نوضي انشطي تحركي"
خديجه بتذمر:شن ديري نايضه من التسعه ياعمتي!
كامله بحزم:نوضي وتو تعرفي...
☘وتنوض خديجه غصب قهرا..تاخد دوش وتصلي الصبح بعدين تطلع مع عمتها للسانيه وتبدا الأشغال الشاقه..
خديجه بصدمه:في حياتي ماشفت دجاجه حية وانتي تبيني نحولها وناخد الدحي من تحتها!!؟
كامله بنرفزة:تي تحركي من غير تفتفيت زايد خل نفطر ورانا هم مايلتم..
🍃وبالهزايب والعراك خدت خديجه الدحي من تحت الدجاج وهي منقرفه لابعد حد..
بعدين رفعتها لمكان في السانيه دايره فيه جلسة نجع حلوة بالمرة وقريب عليها غاز شاهي وسفرة ماعين..
مدت السفره لخديجه وقالت..
/بري اغسليهم تحت الشيشمه هديكا..
خديجه بتذمر:عليك اخرة اخرتي واني في عمري هدا تعاملي فيا معاملة فرخات!..
كامله بحده..
/خديجه..واشرتلها ع الشيشمه..
مشت خديجه بالسفرة وهي تمتم وكانت كارهه نفسها وحياتها كلها..
🍃ودارت عمتها الفطور دحي شكشوكه"بيض بالطماطم" مع طاسة شاهي حمراء بالنعناع وكعك حلو وحليب..
خدت كامله طاسه صبت فيها شاهي وحليب وكسرت فيها كعك وخدت كاشيك وقعدت تخلط فيهم مع بعض..
خديجه بإبتسامة استنكار..
/شن هدا عمتي!؟
كامله وهي مبتسمه بغرور..
/من يوم يومي نحبها وماقدرت نسيبها..
خديجه:تحبيها ولاماعندكش سنون تاكلي بيهم الكعك..
كامله:قهرتك يامعفنه سنوني خير من سنونك لكن هذا عشقي..
ضحكت خديجه من جدها..
عقدت كامله حواجبها وقالت بضحكه..
/هيا افطري بسرعه وسقديني ورانا حوسة غدي..
خديجه:شن الغدي!؟
كامله:بوك غالي عليه المحشي بالذات اللي نديره اني وبندير جنبه شريبه عربيه..
خديجه قعدت تاكل بصمت وهي تسمع فيها..
كامله:بعد تكملي فطورك تمشي تغيري هالشلاتيت وتلبسي قفطان مستور وكان ماعندكش نعطيك..
خديجه:خيرها لبستي!؟
كامله تهكما:لا ماخيرها شي سروال مقنط وبلوزه لفوق الفخد تحسابي روحك صغيره!
خديجه:وهاك قلتيها مش صغيرة ونعرف شن نلبس..
كامله بحده:تعرفي عينك عندنا حني مايمشيش الجو هدا وبعدين بنرفعك معاي نلقطوا عشب المحشي والسلق تبي تدهوري في السانيه بهاللبس!
خديجه:قصدك الخضرة متاعك تاخدي فيها من السانيه..
كامله:مالا شنو حاجه طبيعيه نظيفه ومضمونه..
خديجه ضيقت عيونها وقالت..
/خاطري نعرف كيف عايشه بروحك هني!؟
كامله:بروحي شني حياش عمامك لاصقات في حوشي ويوميا بناتي يجوني بالدور يقعدوا من الصبح لبعد المغرب بعدين يجي ولد عمك جمعه بشير كان تزبطيه..
خديجه:والله مانزبط منهم واحد..
كامله تهكما:ماهو تواصلوا هلبه..
خديجه مطت شفايفها بملل وشربت من الشاهي..
كامله:خفي روحك يامرخيه خفي..
☘وكملوا فطورهم وخديجه غسلت الماعين بعدين ولت للحوش لبست قفطان حوش من عمتها ولفت ع راسها وشاح وطلعوا يلقطوا في خضرة المحشي..
خديجه نرفزت عمتها بدلعها الزايد وكلت ع راسها هزايب لين شبعت وكانت مرة مرة تحذف كلمة لعمتها..
وعمتها ماقصرتش في تأديبها خلتها هي دير الغدي وقعمزت حداها تسمع في الموشحات الاندلسيه من الراديو وتغني معاهم...
☘تربيه من اول وجديد وان شاء الله تثمر بعد هالعمر☘
🍃🍃🍃🍃
"نسرين خيرك ماتاكليش!؟"
السؤال هدا وجهاته سميرة لنسرين وهما ملتمين ع سفرة الغدي حتى سدرة المنتهى معاهم..
نسرين تنهدت وقالت..
/نخمم في خديجه..
سدرة المهدي:ياريتني اني مشيت غادي ياعميمه العيشه مع عمتو كامله تهبل تهبل..
سميرة بضحكه..
/ترا احكيلنا عليها..
☘وبدت سدرة الصغيرة تحكي عن الفترة اللي قضتها في حوش كامله وسدرة المنتهى وسميرة وجوري يسمعوا فيها بإنتباه..لكن نسرين كانت في عالم تاني مش حاسه بطعم شي ولون الدنيا ولى قاتم في عيونها..
🍃🍃🍃🍃
"جديات اخت عبد المنعم العالم"
اخت ربيع بضحكه:ايه عيلتها متسميه وخوتها وبوها صيتهم عالي بكل خير..
ام ربيع؛مالا امها وخواتها الذوق والرقي وراهو مش زواق من برا الناس اللي معاشرينهم شهدوا عليهم..
ربيع بضحكة دهشه:خوها نعرفه وبوها شايفه كذا مرة قداش الدنيا صغيره..
امه قالت؛وين تعرفهم!؟
ربيع:عبد المنعم كان يقرا في السويد ويجيني هلبه للمطعم اللي كان عندي غادي..
اخته وهي متفاجئة:قالت عندي خوي قاري برا لكن ماقالتش وين.
امه قالت؛سبحانك ياربي سبحانك..
بنتها قالت؛ايه والله سبحان الله ع الصدف..
ربيع بإبتسامه؛باهي هي كيف توفى راجلها!؟
اخته قالت:حادث مسكين..
ربيع:الله يرحمه..صغيره ع مسؤولية زوز صغار..
اخته قالت:بوها وخوتها يعانوا فيهم تقول صغارهم وهي الله يبارك عليها مراة قاده روحها وقاده صغارها..
عقد حواجبه وقال وهو مبتسم..
/تبان دلوعه شويه..
امه ابتسمت لما عرفت انه كان مركز عليها..
واخته ردت عليه تقول بضحكه
/هي هكي تبان لكن اهي تقولك امي وين مشينا للمة خشة حوشهم الجديد..
امه قالت؛زي الطقاشه تحوس وماقعمزت بكل.
خدي طرف بوريك كلاه في فم واحد وهو يهز في راسه بإيجاب وامه واخته يتبادلوا في النظرات والابتسامات..
🍃🍃🍃🍃
"شن هي!!؟"
معين:والله وين قالهالي قريب عطيته بوني ع فمه رقدتله سنونه ع الوطا..
فهيمه؛قتله جده بأحفادها!؟
معين:قال نبيها بالحلال قتله ياولد الناس فوت المراة وخلينا حبايب..
فهيمه:شن قالك!؟
معين:قال مستحيل نضرها وبندير معاها الاصول..
فهيمه:شن هالمطرشق هدا!؟
معين:ماتخمميش يام مانخلي حد يجي جيهتها لاهي لابناتها..
فهيمه برفعة حاجب..
/شن دخلك بيهم بناتها في حكومة رجاله!..
ابتسم وهو عاقد حواجبه بعدين قال..
/كاشفك يافهيمه كاشفك وانفضحتي خلاص شديت هديل من عنفقتها هرت كل شي..
فهيمه برفعة حاجب:لكن راهو حق بدوا يخطبوا فيها..
تنهد ومسح بيده ع ذقنه بعدين قال..
/تكمل امتحاناتها افتحي موضوعها..
فهيمه؛جديات!
غمض عيونه وفتحهم وهو يهز في راسه بإيجاب..
وتطلقها فهيمه زغرودة سمعت المنطقه كلها خشت بنتها هديل تجري وهي تقول..
/خيرك يام!؟
فهيمه؛بري جيبي الكلاشن..
معين:والله العظيم ديريها نفوت امها البنت..
فهيمه:خلاص خلاص ياهيروشيما برا شوف حالك برا..
هديل بضحكه؛قصدك خلاص بنفرحوا بيه!؟
نكش شعرها وطلع وامه قالت بإبتسامه..
/واخيرا..
🍃واخيرا..كلمة تنقال لما يوصل الانسان لمراده بعد مشقه وعناء..لكن التارقي لتوا مش قادر يقولها..عدت عليه الساعات وهو يفكر في حال طوبى من جهة وفي موعده مع المحجوب يوم السبت من جهة..قلبه كان مقبوض طول الوقت والقلق مسيطر عليه..
🍃🍃🍃🍃
الساعه 6:05مساءا..
طلع المحجوب للباب الخارجي..وصل فيه وفتحه وقال..
/تفضلوا..
خشوا المهدي وسدرة وهما يقولوا..
/السلام عليكم..
رد عليهم المحجوب وهو يسكر في الباب..
/وعليكم السلام..
🍃ومشوا مع بعض خشوا للحوش وهما يسألوا عن احوال بعض..وصلهم المحجوب للصالون وخشوا قعمز..
سدرة قعمز جنبها المهدي والمحجوب قعمز مقابلهم..
سدرة بقلق:شغلتني هلبه ياخالي والله حتى النوم طار من عيني..
المحجوب بضيق شديد..
/مالا اني شن نقول يابنتي والله اليوم كله ع بعضه ماخش فمي غير الميه والقهوة رفعت نبيله لحوش عمتها تتغدا عندها وكذبت عليها قلتلها بنتغدا عند بنات اختي..
المهدي قعد يشوفله بقلق..
سدرة:تكلم قول شن في رجليا فشلوا..
شد المهدي يدها بقوة..
المحجوب خدي نفس بعدين قال..
/تعرفوا شن صار في طوبى اولامس..
سدرة بحزن وخوف:ايه هبوط مرة تانيه واني عقلي مش قايلي خير..
المحجوب بأسف..
/معناها حتى انتم درقوا عليكم..
شافوله بإستغراب وسدرة قالت..
/شن درقوا!؟
قاللها:طوبى حاولت تنتحر..
جمد الدم في عروق سدرة قعدت تشوف لخالها بصدمه ومعاش قدرت تتكلم..
المهدي بصدمه:كيف!؟
المحجوب:هدا اللي قالهولي التارقي..
سدرة بصدمه؛شني!!؟ التارقي يعرف وحني لا!؟
المحجوب؛انجبروا يقولوله..
المهدي:علاش!؟
المحجوب؛زي ماتعرفي ياسدرة اصابتك بالسحر ماعرفها حد قبل التارقي لأن عنده خلفيه ع الموضوع هدا..
سدرة بصدمه اكبر..
/لحظة لحظة قصدك طوبى مسحورة!!؟
المحجوب بضيق وألم..
/ومش أي سحر ياسدرة..
🍃وحكالهم عن مكالمة التارقي نقلها بالحرف..
المحجوب:اني لما فكرت في الموضوع بيني وبين نفسي مالقتيش غير هالتفسير المراة في الخمس كان حالها كويس ونفسيتها متحسنه بعدين ولت تتعب من جديد لين صار اللي صار..تتفكري في مرضتها هديكا امتى كانت!؟
المهدي وهو مصدوم:ايه متفكر روحنا سادس يوم العيد سمعنا بيها راقدة في المصحه..
المحجوب:ايوه اليوم اللي قبله كان خامس يوم العيد يوم 14 ذي الحجه..واللي صار مع طوبى قبل يوم كان في 14محرم..
حطت سدرة ايديها حواليها وجهها ودموعها ينزلوا زي وهي تقول بصدمه وفزع..
/علاش ياربي علاش شن دارت بش يصير فيها هدا كله شن دارت!
المهدي شد يدها وهو يشوفلها بألم قال..
/استغفري ربك ياسدرة..
رفعت عيونها في خالها وقالت وهي تخبط ع رجليها و تبكي..
/حرقة قلبي البنت هادي وجع قلبي البنت هادي..
المحجوب ودموعه في عيونه..
/لاحول ولاقوة الا بالله..
سدرة بفزع:الكلبه نجاة..نجاة الحقيره هي اللي دارتها..هي جت بتسحرها المرة الاولى وجت فيا اني عاودتها مرة تانيه..
المهدي بصدمه؛كيف!؟
سدرة وهي تبكي..
/ايه يامهدي ايه اختها صابرين اعترفت بكل شي قالت درناه لطوبى يوم الكسوة وماصارلها شي ولما شافت اعراضه عليا عرفت ان السحر ركبني في مكانها..
المهدي معاش قدر ينطق كان مصدوم ومعصب بشده..
"لا المرة هادي مش نجاة"
وجهوا انظارهم للمحجوب..
المحجوب:اول شي هي مش بالغباء اللي يخليها دير شي حيتهموها بيه اول وحده تاني شي..تنهد وكمل يقول..نجاة جت لنبيله قبل شهر للمكتب..
بدت ع وجوههم ملامح الدهشه..
كمل المحجوب كلامه وهو يقول..
/قالتلها ان الجالي ناوي يرفع قضية حضانه وياخد جنه من طوبى وانه اتفق مع المحاميه متاعه يدير شي لطوبى يخليها فاقده الأهليه..
سدرة شافت للمهدي بصدمه وهي تقول..
/قصدك هو اللي ساحر طوبى!؟
المهدي بعدم اقتناع:لالا مستحيل خوي صح دار هلبه حاجات تحشم لكن ماتوصلش بيه لهني..
المحجوب:خوك مهووس يامهدي يدير كل شي..
ابتسمت سدرة بقهر ودموعها ينزلوا وهي تقول..
/سبحانه ربي سبحانه عدل..مايخلي شي من غير مايحاسب عليه الغلط يقعد غلط مهما كانت نية اللي اندار بيها..
مسح المحجوب بيده ع وجهه وقال.
/من ماكان اللي داره مش مهم..المهم توا نديروا لهالمسكينه حل مانخلوهاش تتعذب وتموت قدام عيونا..
سدرة بحرقه:ياروحي عليك يابنيتي ياروحي..وقعدت تبكي بالعبرة..
المهدي اباح لنفسه المحظور وخدي مرته لحضنه وقعد يهدي فيها..
اما المحجوب اللي قلبه قاعد يتقطع من الألم ع حال طوبى ناض طلع من الصالون جاب لسدرة مية وسقاها المهدي بعد هدت شويه...
المحجوب:سدرة توا اسمعيني للآخر وردي بالك تقاطعيني لين نكمل كلامي..
قعدت تشوفله بصمت ودموعها مازالوا ينزلوا والمهدي جنبها قال للمحجوب..
/قول اللي عندك ياعمي محجوب...
🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀
بعد مرور يومين...
يوم الإثنين..
التاسع عشر من ذي الحجة..
7سبتمبر...سنة2020..
الساعه 9:00صباحا..
كان حسين واقف في جنان حوش طوبى وهو لابس البدله العسكريه وامه واقفه عليه..
صفيه:هلبه 10ايام..
حسين؛مجبور يام مش بيدي..
صفيه بضيق:قبل نبيك تحضر مرواح خوك..
حسين:نروح نلقاه إن شاء الله..ضيق عيونه لما شاف غرفه طالعه تنشر في حوايج ع المنشرة..
شاف لأمه وقال:ترا ناديلي الحراجه هديكا..التفتت صفيه شافت غرفه تنشر في الحوايج ضحكت وقالت..
/دقيقه..ومشت بإتجاه غرفه..
حسين رفع نظاراته ولبسهم وحط ايديه في جيوبه وبنظره مع غرفه..
☘صفيه؛بري لحسين شكله بيستسمح منك..
غرفه:قوليله قلبي اسود مانسامحش...وخدت سلة الحوايج وخشت..
ضحكت صفيه وهي تحرك في راسها يمين ويسار بعدين التفتت لولدها..
هو هز راسه بعدين رفع يده يحيي فيها ولف ومشي طلع من الحوش وهو معصب..
🍃داخل..
حطت غرفه السله في الحمام ومشت لدار المعيشه خشتلها..
وصفيه خشت بعدها وقالت.
/خليتيه يمشي وهو طايرتله..
طوبى اللي كانت مرقده جنه ع رجلها وتمسح ع شعرها قالت بإبتسامه..
/حسين..
غرفه بنرفزة؛فوتله الجو اللي داره في المصحه وقلنا معليشي عنده حق ينوض يقولي ماصدقتي حصلتي سيارة تنسرفي بيها!!؟
طوبى بضحكه:عيب مهما كان ماتنسيش وقفاته معاك..
غرفه:تو شن دخل هدا في هدا!؟
صفيه بإبتسامه..
/هو هكي عصبي وحزار..
غرفه:لاطباعه لاتطاق عرفت توا علاش مايبيش يتزوج عارف روحه مايتعاشرش..
صفيه بضحكه..
/لاحرام عليك..
طوبى بإبتسامه..
/بالعكس طيوب وعسول غير شويه هالعصبيه مفسدة عليه..
صفيه:ايه والله صدقتي ربي يهديه..
غرفه:جنوني رقدت..
طوبى:بالله حطيها غادي غرفه...
قدمت غرفه رفعت جنه في حضنها شافت لتقويم الشهر العربي اللي علقوه من يوم في دار المعيشه بعدين حطت جنه ع الفراش وهي تتسائل في نفسها بقلق..
"ياترى شن صار معاكم ياخالي"
🍃🍃🍃🍃
"من جدك ياعدي!؟"
عدي بقلق وشي من الانفعال..
/ومن جد جدي..نعقد عليها ونرفعها غادي وصدقني حندير المستحيل بش نعالجها..
المحجوب؛اني خبرتك بش دلني ع حد ثقة نكون ضامن شفاء طوبى ع يده بإذن الله..فكرة الزواج من قبل قتلك انساها وحولها من راسك..
عدي بشي من العصبيه..
/عطيني سبب مقنع يخليني نحولها من راسي قتلك ماليا مالهمش دخل بحياتي..حياتي اني اللي نمشيها..
المحجوب بنفاد صبر..
/إنا لله وإنا إليه راجعون..ياولدي ارجوك ماتعبنيش معاك شوف نصيبك في غيرها ارجوك...
*********
سدرة بقلق شديد..
/غير كان خليتيه يدلك ع حد بس..
المحجوب بعصبيه:رقالي الزيت..
سدرة:قريب نهبل ياخالي كل شويه نقيم في هاتفي ونشوف في التقويم..
المحجوب بألم..
/شن وضعها توا..
نزلوا دموع سدرة وهي تقول..
/تشوفها تقول كذب مافيها حاجه تهدرز عادي وتضحك..
المحجوب:ماهو هي بتقعد هكي اول 15يوم تتعب بعدين تتحسن وهكذا لكن لو لاقدر دارت في روحها شي تاني..غمض عيونه بشده وقال..حسبنا الله ونعم الوكيل..
سدرة بنبرة باكيه..
/معاش حصلته!
حرك راسه يمين ويسار وع وجهه باديه ملامح الأسف...
🍃🍃🍃🍃
الساعه 12:00منتصف الليل..
طلعت طوبى من الدار متوجهه للكوجينه بش تشرب..
خشتلها لقتها مظلمه لكن باب الخارجي مفتوح..
استغرب..قدمتله..ولما وصلت فيه وقفت في مكانها لما سمعت غرفه تتكلم وهي تبكي..
"بنموت من خوفي يااريج كل ليله وين نحط راسي ع المخده نقول زعمه وين تبدا تتعب شن يصير فيها تاني"
ردت اريج تقول..
"والله لتوا منظرها وهي معلقه في المظله قاعد بين عيوني قريب نحلم بيه"
قالتلها غرفه..
"ااه ياربي ااه..باهي يعني توا لازم نحكولها ولا لازم تعرف وضعها"
قالت اريج..
"لالا راجي خالي قبل هو قال ماتحكولها شي توا"
🍃واللي يحكوا عنها كانت في حالة صدمه من اللي سمعاته هي كانت حاسه انهم مدرقين عليها شي يخصها لكن ماتوقعتش يكون خطير لهالدرجة..انتحار..لا وهي مش متفكرة شي من اللي صار!
ولت طلعت من الكوجينه وهي مصدومه ومرعوبه..
خشت لدارها ومشت رقدت ع سريرها اللي حاطه عليه بنتها ضمتها لحضنها وقعدت تبكي بصمت وهي ترجف من الخوف...
🍀🍀🍀🍀🍀🍀🍀🍀🍀🍀🍀🍀🍀🍀🍀🍀
بعد مرور ثلاثة أيام...
...الجمعه...
الثالث والعشرين من شهر محرم..
11سبتمبر..سنة 2020..
الساعه 7:15مساءا..
قدام الباب الدخلاني لحوش طوبى..
كانوا غرفه حاضنات بعض بقوة وهما يبكوا..
غرفه ببكي:ربي يشفيك ياقلبي..
طوبى وهي تبكي..
/جنة ياغرفه جنه..
غرفه بنبرة باكيه..
/بنتي هادي ياطوبى ..
سدرة وهي تمسح في دموعها قالت..
/هيا طوبى معاش في وقت..
تباعدوا عن بعض بالسيف..
خشت غرفه تجري وهي تبكي..
وقعدوا اريج واميمه وصفيه وهاديه واقفات يشوفوا لطوبى وهما يبكوا..
طوبى ببكي..
/راكم تنسوني من الدعاء..
خشت اريج بسرعه..
وسدرة جت لطوبى خدتها في حضنها وقعدت تمشي بيها وهي تبكي..
وصلوا في سيارة المهدي اللي كانت مدرسة داخل..
ركبت سدرة طوبى من الخلف وركبت معاها..
المحجوب اللي كان مقعمز جنب المهدي..
/بإذن الله تروحيلهم وانتي في أحسن حال..
طوبى وهي تبكي قالت..
/يارب..
تحرك المهدي بالسيارة وطلع من الحوش بعد ماانفتح الباب..
🍃🍃🍃🍃
في الطريق..
سدرة وهي حاضنه طوبى..
/زي ماوصيتك حبيبتي..
طوبى:حاضر..
المحجوب:كله لمصلحتك ياخالي فترة وتعدي..
المهدي:ربي يشفيك ويعافيك ياطوبى..
طوبى بألم:آمين..
🍃وقطعوا مسافه طويله وهما بالكاد يتبادلوا بعض الكلمات وطوبى في عالم تاني..عيونها ع شباك السيارة ودموعها مابطلوش نزول...
طلعوا من العاصمه ووصلوا في وحده من ضواحيها..
في طريق شبه فاضيه كانت مدرسه لاند كرزور سودا موديل سنة 2019..
وصاحبها واقف جنبها يستنى وهو يشوف للطريق لعند مابانت عليه سيارة المهدي..
درس المهدي بعيد شويه..
نزل المحجوب ومشي فتح الباب لطوبى..
سدرة وهي ضم فيها بقوة..
/راك تكسري قلبك وخليك ديما متفكرة فترة وتعدي..
طوبى بنبرة مخنوقه..
/حاضر..
تباعدت عنها سدرة وهي تقول بنبرة باكيه..
/استودعك الله..
نزلت طوبى...مسحت دموعها بإيديها المغطيات..
خداها خالها من يدها وهو يقول..
/حني ديما وراك بنتي..
طوبى:ربي مايحرمني منكم..
سكر باب السيارة ومشي بإتجاه صاحب السيارة السودا اللي ماقدرتش طوبى ترفع عيونها وتشوفه..
كانت محرجه..وقلبها موجوع..وحاسه بكسرة كبيره..
لما وصلوا فيه قاله المحجوب..
/سلمتك الامانه ياعبدالقيوم امانة عمك لطفي قبل لتكون امانتي وامانة اختها..
عبد القيوم:امانه من ربي قبل كل حد نموت ومانخونها..
المحجوب:بارك الله فيك ياعبد القيوم بارك الله فيك..
طلق المحجوب يد طوبى وقال..
"بري مع راجلك"
قعدت واقفه في مكانها وعيونها في الأرض ودموعها شادتهم بقوة..
هو ابتسم..مد يده وخدي يدها شدها بقوة وقال..
/تعالي..
🍁لما شد يدها وكلمها في لحظه..حست وكأن اللون الرمادي اللي كان مغطي عيونها بدي بتلاشى والدنيا بدت تتلون بأحلى الالوان وابهاها..
خداها ورفعها للكرسي اللي جنب السواق فتحلها الباب وقال..
/اركبي..
طلق يدها حست بضيقه..ركبت السيارة بدون ماتشوفله..
سكر الباب وعيونه عليها..ابتسم ابتسامه خفيفه بعدين مشي لكرسي السواق..
شاف لسيارة المهدي رفع يده وحياهم..
المهدي والمحجوب ردوله التحيه وسدرة تشوفله وهي تبكي وتقول..
/ياربي عوضها بيه يارب..
شافاته ركب السيارة وشويه تحرك بيها...
المحجوب:طوبى سافرت معاي راكم تنسوا..
المهدي:اطمن من ناحيتي ع الآخر..
سدرة تنهدت بخوف وقالت..
/يارب يارب خير يارب..
#رحلة_حب_وحرب
#طوبى
....يتبع....
