طوبى "جنة طوبى"
#جمان_فريد
#الجزء_الثمانون "جنة قلبي "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
🌟عيدكم مبارك🌟
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃قال لها , اعذرينـي لم أقـصد ايـذائك
اعذريني لم أكن أنوي جـراحك
إعذريني لـن أكـون لك بعد اليوم
اعذريني اذا قررت نسيانك🍃
_________________________________________
الساعه السبعه مزبوطه..مسويات او زي مانقولوا اوقات عشيه..
الجو فهاليوم مش ساخن..بس الرطوبه عاليه..
وهي في حوشها اللي يعمها الهدوء الا من صوت المروحه الشغاله ودور يمين ويسار..
كانت مقعمزة قدامها شاده تليفونها تراسل في ولدها ودموعها دايرين مجرى غ خدودها..
(لاوالله ياولدي ماهكي لكن اني خايفه من بوك يديرلي المشاكل)
(قتلك هو اللي قالي روح لأمك)
مسحت دموعها وشدت جهة اليسار من وجهها وهي تشوف لكلمات رسالته بعدين بدت تكتب وهي ترشف وبعتتله..
(باهي كان هكي مافيش مشكله راجيني نحكي لعمك ربيع ونتفاهموا ع مرواحتك كيف تكون وامتى)
(باهي كان قالك مادخليش بيه)
(لالامايقولش هكي نسيت اني نربي في خوك معاه)
عطل شويه في الرد بعدين بعت..
(باهي تفاهمي انتي وياه وردي عليا بسرعه يما)
(حاضر يما حاضر)
فجأة سمعت باب الحوش انفتح..
بسرعه قعدت تكتب بعدين بعتت..
(خلاص توا بنسكر مش فاضيه..سلام امي)
وحطت التليفون ع الارض وناضت بش تطلع..
لقاته خاش عليها..
ابتسم ابتسامه حلوة لما شافها ابتسامة حب وشوق..
لكن..
كان مظهره متغير..
وزنه ناقص..تحت عيونه هالات سودا..لونه وجهه شاحب..
علامات الارهاق والاجهاد النفسي..
قربتله وسلمت عليه..
وهو يقول..استاحشتكم موت..
هي ردت عليه وقالت..حني اكثر..
بعد عنها وشد راسها وطبع قبلة ع جبينها وقال..
/شن الأمور..
هي قالت..
/تمام..الحمد لله..
هو حط ايديه ع ذراعاتها وقال..
/الحمد لله..بعدين قعد يدور بنظره ع يحيى لين لقاها فايق وهو متمدد ع الفراش ويشوفله قال ببهجة..
/يويو باشا..
نسرين بضحكه:شكله سمع صوتك فاق..
طلقها ومشاله..
وهي قعدت معاه بعيونها لين شافاته قعمز جنبه وخداه وقعد يحضن فيه وهو يقول..
/ليك وحشة ياوحش..استاحشتني ولالا!
يدوب ضحكت بعدين غيرت نظرها لباب الدار وين ماكانوا شناطيه..
استغربت لأنه مشي بشنطة وحده مش كبيره وتوا تشوف فيه روح بزوز شناطي كبار!
غيرت نظرها ليه كان قاعد يلاعب في يحيى وهو يضحك..
بس مسحة الحزن قاعده واضحه في ملامحه...
🍃🍃🍃🍃
في هالوقت..
كان ولد خوها مقعمز في جنان حوش جده وفي يده حاجه ويراجي في حد كان متوقع جيته..
دق باب الحوش..
ناض..ومشي بخطوات متأنيه بعض الشي لين وصل في الباب وفتحه...
راما بإبتسامه خجل:السلام عليكم..
هو بجديه؛وعليكم السلام..خشي..
خشت راما..وهو سكر الباب...
راما وهي تشوفله قالت..
/عاش من شافك..
شبحلها وقال..
/نبي منك خدمة..
بإستغراب قالت..
/خدمة!؟
هو قال:امم..مدلها مصحف صغير وهو يقول..
/نبيك ترديه لبنت احمد محجوب..
راما وهي تشوف للمصحف..
/هذا لمروة؟
هو هز راسه بإيجاب بعدين قال..
/تقدري ولا؟
خداته منه طول وقالت..
/ايه عادي نقدر..
محمد وهو يشوفلها بحده..
/ماتقولي لحد..
هزت راسها بإيجاب وقالت..
/باهي..
رمقها بنظرات فيهم شي من الحده بصمت بعدين غير عيونه عنها ومشي طلع من الحوش..
بدت ع وجهها ابتسامة نصر..بعدين رفعت العبايه وحطت المصحف في جيب السروال..ونزلتها ومشت خشت للحوش..
🍃🍃🍃🍃🍃
الساعه 9:15ليلا..
كان حوش عبد الرؤوف معبي رجالة ونساوين..
بين المربوعه والصالون..
وغرفه اللي كانت لابسه فستان مغربي عاطيها طلة مميزة مقعمزه في صدر الصالون وحداها ولادها الزوز وكأنهم امراء وهما لابسين ملابس حفل الطهور اللي زادتهم جمال وخلت العيون عليهم لكنهم متحاوطين بحصن من الله مش طايلهم اذى بسبب رقيتها ليهم...
الكل كانوا موجودين حواليها..
فردوس وبناتها ونبيله وفايزة وبناتها حتى سميرة اخت اسكندر جت..
بس طوبى قاعده راقده في الدار داخل مع بنتها ماتبيش تسيبها ولانبي تطلع بيها للناس..
وفي سبب تاني كان مخلي طوبى قاعده داخل بروحها الحزن اللي كان معشش في قلبها ع بوها..
مش قادره تكون في مناسبة فرح وحزنها ع بوها قاعد ماخفش ولو شويه...
🍃🍃🍃🍃
وفي المربوعه..
الى جانب اقاربه وصحابه ومعارفه..
كان موجود عبد القيوم اللي مكتفي بالاستماع لأحاديثهم وقليل ماكان يشارك..
☘عبد الرؤوف:خيرك ع الصامت اليوم؟
حك خده اليمين بأصابع يده اليسار وقال..
/عادي..
عبد الرؤوف قعد يشوفله شويه بعدين قال..
/في حاجة شاغلاتك..
عبد القيوم حمحم وهو يمسح في شعره للخلف وقال..
/يعني....نفكر في العيد بنعدي نعيد في غدامس..
عبد الرؤوف وهومتفاجئ..
/غادي!..
عبد القيوم؛عندي غادي عمه هالعام عازمه العيله كلها تبينا نعيدوا عندها..
عبد الرؤوف:تعرف خاطري نمشيلها ع قد ماسمعت عنها في الجنوب هي ولا؟
عبد القيوم؛في الجنوب الغربي..
عبد الرؤوف وهو يهز في راسه:اها..تمام..باهي امتى ناوي تتسقد!؟
عبد القيوم؛بكرا ان شاء الله معاش في وقت العيد نهار 20..
عبد الرؤوف:وقداش بتقعد غادي!؟
عبد القيوم؛قول 4ايام..
عبد الرؤوف:تمشي وتروح طيب إن شاء الله..
عبد القيوم:إن شاء الله..وعاد..بلع ريقه وقال..مانوصيكش..
ابتسم عبد الرؤوف وهو عاقد حواجبه وهو يشوفله بنظرات معناها..
"بتوصيني اني عليهم!؟"
ضحك عبد القيوم وقال..
/ليطمئن قلبي..
خبطه ع كتفه وطبطب عليه وهو يقول..
/طمن قلبك وبالك..
"عبروف"
شاف لواحد من صحابه بعد ناداه..
:وين التريس!؟
عبد الرؤوف:شويه تانيه ونجيبهم..
اسكندر:هي عاد ياجماعه واحد فيكم يشجع وياخد خطوة رانا هرمنا خلاص امتى بنلحقوا نربوهم !.
عبد الرؤوف:وهو في واحد غيرك قعد عزابي هني حتى حمو اللي كيف عشرين عام عند زوز صغار..
:نلقناها تقهر يااسكندر..
:تي هادي بروحها ساده تشجعك ياراجل..
ضحك وقال:لاخلاص نوينا بجديات المرة هادي..
تعالت اصواتهم وهما يقولوا..
"واخيرا..طيب فيك ياسي..ع البركه"
وعبد القيوم يتفرج عليهم وهو مبتسم ويشوف فيهم كيف يحرجوا فيه بمزح ..
تنهد بضيق..بعدين غير نظره للجهة اللي فيها الرجاله الكبار..
جو عيونه ع المحجوب وعلي الواعر اللي كانوا قارنين الرووس وهما يهدرزوا وباين من ملامح وجوههم ان الموضوع اللي يحكوا فيه مهم..
🍃🍃🍃🍃
داخل..
كانوا البنات يعولوا ع ضيافة المعازيم..
اريج كانت نشيطه بزياده هالمرة اغلب الضيافه هي اشرفت عليها..
بس اللي لفت انتباه بعد المعازيم من اهل عبد الرؤوف وعائلات اصدقائه..
البنت الحلوة الجذابه اللي كل شويه تنوض تصور وتمشي وتجي قدامهم ع اساس تعول..آلاء..
واكثر من انجذب ليها سميره اخت اسكندر..
🍃والاء مشت قعمزت جنب خالتها وهي تقول..
/شن جو..
غرفه:مكهرب..
آلاء:علاش خيرك!
غرفة بنرفزة؛دراه الكبد اللي اسمها لميس نتعكر من شوفتها..
الاء:قلنا الف مرة فوتيها..
غرفه:مانقدرش واني عارفه نيتها كان نلقى نفتك منها..
الاء بضحكه:شن مالا تبي تق.تليها!؟
غرفه؛نبي نزوجها..
ضحكت الاء..
غرفه؛ندوي جديات..نفكر نخلي رؤوف يدبسها في صاحبه اسكندر..
الاء:لاحرام فيها..
غرفه؛عارفه..لكن نبي نرتاح منها..وعارفتها كان بان عليها اسكندر تحول من بالها القطاف اللي تفكر فيه..
الاء؛باهي كان هكي توكلي ع الله..
☘وبعيد عنهم شويه كانوا بنات عمة عبد الرؤوف مقعمزات مع بعض ونازلين قرمة"غيبة" في غرفه..
:شوفي التاكم اللي لابساته ولاشوفي القفطان حرام اني نكون فمكانها يعني!
:حظوظ ونصيبات..
:ع قولتك واللي ماعنده حظ لايتعب ولايشقى..
🍃🍃🍃🍃🍃🍃
الساعه 11:43ليلا
فوق سطوح شقة المهدي..
كانوا مقعمزين هو وولاده يتفرجوا ع مباراة في اللاب توب..
بعد ماتم الشوط الاول..
قال المهدي..
/العيد في زليطن ان شاء الله.
يزن:حني بس!؟
المهدي:لا..جدك وحناك ماشيين حتى هما..
محمد:وعمامي!
المهدي:نضال اكيد يمشي ماعنده مايدير هني لكن عمر مش عارف..
محمد تنهد بضيق..قعدوا ساكتين للحظات لما سرحوا بتفكيرهم بعدين سأل محمد..
/عمي الجالي مش مروح في العيد!
المهدي حرك راسه بالنفي وقال..
/لابعد العيد..
يزن:مايبيش يشوف بنته!
المهدي شبحله وقال..
/لاشني مايبيش يشوف بنته..بنته هادي..لكن عنده خدمه ملتزم بيها مايقدرش يسيبها..
شاف يزن لمحمد وهو مش مقتنع بالعذر اللي حطه بوه لعمه..
ومحمد بادله النظرات بعدين غير عيونه للاب توب وقال..
/الشوط التاني بدي..
نسي يزن الموضوع اللي كانوا يحكوا فيه ولهوا بالمباراة..
لكن محمد بوه حاولوا يخشوا جو المباراة وينسوا ع شن كانوا يتكلموا...
🍃🍃🍃🍃
بس في اللي كان غارق وسط حزن مايقدرش ينساه ولايتنساه..
عمر اللي كان قاعد في فيلا خوه الجالي..
مابطلش بكي ولو سكت شويه يرجع يتفكر كل شي ويبكي لين قربت دموعه تجف....
منظر عيله وهو ميت ومكفن مش قادر يحوله من عقله يشوف فيه قدام عيونه في كل لحظه..
هده من داخل هد..وخلاه يفقد طعم الحياة ومعاش يحس بيها..
🍃وع روشن دارها منيه كانت واقفه تراجي تشوف وهو يطلع من الروشن متاعه..
وقعد الروشن مسكر والدار مظلمه وهي يأست من الانتظار
وسكرت روشن دارها حتى هي وظلمتها...
🍃🍃🍃🍃🍃
وفي دار تانيه في حوش بعيد عنهم..
كانت اميمه تحت ضي الاباجوره فاتحه كتاب يخص مجال مهنتها وتقرا فيه بإنسجام تام...
مالقتش ونيس ليها بعد ماسكنتها الوحده غير كتب الدراسه ومجلات الابحاث..معاش ولت تفكر حاليا في غير مستقبلها وتحقيق احلامها وطموحاتها....
🍃🍃🍃🍃🍃
"قدر الله وماشاء فعل اني راضي الحمد لله وان شاء الله ربك يعوضنا خير"
نسرين بضيق وعيونها مليانات دموع..
/باهي علاش تكلف في روحك وتجيب في الهدايا!؟
ضربها ع يدها وقال..
/معاش تقولي هكي فداكم كل شي..اللي نملكه كله لمني ماهو ليكم انتم !
مسح دموعها وقال بضيق..
/بالله ماتزيدها عليا ارجوك ..
هي شدت ايديه الزوز وقالت..
/كان نقدر ندير شي قولي شن هو واني نديره..
ابتسم وقال..
/نبيك تضحكي في وجهي وتخلي جوك مليح ديما وماتفكري في شي خليها ع ربك بس..
نسرين بدموع:ياعمري..
واحتواته بحنانها وحبها وقعدت تمسح ع ظهره..
وهو كان حاس بشي من الراحه سكنت صدره خففت عليه شويه من الضيق اللي هو فيه....
راحة عاش محروم منها أيام وأيام....
🍃🍃🍃🍃🍃
يوم الجمعة
17اغسطس...سنة 2018
مع الساعه 11 الصبح..
كانوا نساوين عيلة لطفي الواعر مروحات لحوشهم..
ولأول مرة..
تخش جنة حوش جدها لطفي اللي كانت عندها فيه زاويه حلوة في دار امها وخالاتها..
سرير وخزانه صغيره ورسومات وديكورات اطفال بناتيه حلوة..
حطتها امها في سريرها وهي تقول..
/بسم الله..وهدا سرير بنيتي...
نزلت شاربتها وهي تشوفلها بإبتسامه وتقول..
/خديتلك هلبه العاب تكبري شويه نحطهمولك تلعبي بيهم..وعندك حتى دولاب صغيرون زيك فيه حوايجك وحاجاتك الحلوات..ومازال لين تكبري ياما بناخدلك ونديرلك ياماما...ربي يعيني ومانقصرش معاك ياروحي...
شويه وخشت الاء وهي تقول..
/عرب الشرق جو..
ابتسمت بفرح وقالت؛شويه وجايه..
مشت الاء..وهي غطت سرير بنتها بالناموسيه..بعدين مشت طلعت من الدار بش تستقبل ضيفتها..
🍃🍃🍃
كان استقبالها لسالمين حار وفرحتها بيها كانت واضحه عليها..وسالمين كانت تبان فرحانه اكثر منها..
☘والحاج علي وولده عبد المطلب استقبلوا جبريل وقعمزوا هما وياه في المربوعه وطول خدتهم الهدرزة..
🍃🍃🍃
سالمين:غرفه مش هنا؟
مطيره:في حوشها غرفه بعدين شويه تجي..
سالمين بآبتسامه:هي وكراكيبها ولا؟
مطيره؛ياسلام..مازال تتحرك من غيرهم..
ضحكوا وسالمين قالت..
/نجهم هما وامهم..شافت لطوبى وقالت..وجنه؟
طوبى بإبتسامه:تعالي معاي..
ومشوا طوبى وسالمين مع بعض واريج والاء وراهم اما مطيره وفردوس مشواخشوا للكوجينه بش يوتوا الضيافه...
🍃🍃🍃
وقفت ع سرير جنه..تتأمل بعيونها في ملامح وجهها البريئة الناعمه..
طوبى بضحكه:ديما راقدة..
سالمين وعيونها مليانات وهي تشوف بيهم لجنه..
/تقعد هكي فترة بعدين ينقص نومها شوي شوي..
طوبى بإبتسامه؛تبي ترفعيها!؟
نزلوا دموع سالمين ومازال نظرها ع جنة..
خفت ابتسامة طوبى وهي تشوفلها..
بدت تسيطر ع وجهها ملامح البكاء لعند ماحطت يدها ع عيونها وقعدت تبكي..
وهما يشوفولها بحزن..
طوبى والدموع غرقوا عيونها..
/خالتي خيرك تبكي!
سالمين وهي مازال مغطيه عيونها قالت ببكي..
/سامحيني بنتي..غير..نزلت يدها وهي تمسح في دموعها وتقول..تفكرت نهار جاباتك امك الله يرحمها..
نزلوا دموع طوبى..
سالمين رجعت تشوف لجنة وهي تقول..
/لين نموت ماننساهن هاذكن الايام..امك تعبت شويه بعد ماجابتك وتميتي عندي...الله يرحمها ويغفرلها..
حطت يدها ع فمها بش تكتم عبرتها وهي تبكي..
وطوبى تشوف لبنتها ودموعها زي السيل..
اريج بحزن؛بيبو..
شافت سالمين لحالة طوبى ..بعدين خدتها في حضنها وهي تقول..سامحيني يابنتي مش قاصده نفجعك ونكدرك..سامحيني..
ضمتها طوبى وهي تقول بنبرة متماسكه بعض الشي..
/ولايهمك خالتي اني اصلا قاعده مفجوعه ومتكدرة..
زادت ضمتها بقوة وهي تبكي بصمت..
واريج والاء ماقدروش يشدوا دموعهم من قوة تأثير الموقف عليهم..
🍃 في غياب أبـي أتصنع الحياة رغم الحزن
في عيني أبتسم و فاجعة موتـه مدفونة
في قلبي 🍃
🍃🍃🍃🍃🍃🍃
"استغفر الله حتى اعياد ربي كرهوني فيهم"
خديجه بنرفزة..
/بوي ربي يهديه علاش ماشي! ولده مفجوع ع ضناه وهو ماشي يعيد غادي ولاع باله!
مغليه بحزن؛والله ماني مستطعمة بنة العيد ولااني حاسه بيه ..
خديجه تنهدت بضيق وقعدت ساكته..
ع خشة بوها وهو يقول..
/السلام عليكم..
ردوا عليه..
/وعليكم السلام..
مغليه؛مشيت لعمر!؟
قعمز وهو يقول:ايه كنت عنده وضعه اليوم خير من امس..
مغليه:قتله يمشي معانا للبلاد؟
هو قال؛ايه..قالي تو نشوف..
مغليه؛مفروض يمشي معانا مايقعدش بروحه ولاقال لنضال يقعد معاه..
هز راسه وقال..
/يصير خير يصير خير...بعدين شبحلهم شويه وقال..صغار طاهر وامهم ماشيين معانا..
توسعت عيونهم بدهشه وهما يشوفوله..
وهو كمل يقول..
/مانبي حد يناقشني في شي..ركز ع خديجه بنظره ولاقال..
شن صار بينك وبين راجلك؟
هي بضيق قالت..مافي شي..
هو قال:ماتباتيش هني من غير مناسبه انتي
مغليه:اني نبيها تقعد معاي اليومين هادم..
محمد شنيبه:علاش!
خديجه:شن علاش بوي نسيت اللي صايرلنا !؟
قاللها:انتي جيتي هني قبل..وراهو واضح ان صايرة بينك وبين راجلك مشكله حافظه كويس لما يزربز ويدور وراي من محل لمحل نعرفه شن عنده..
خديجه بإستسلام..
/باهي يابوي صايرة مشكله لكن مش بيني وبينه بس حتى ماليه..
هو بإستغراب قال..
/يالطيف! علاش؟!
هي قالت..
/تو نحكيلك وانت احكم...
🍃🍃🍃🍃🍃🍃
ماشيه في الممر مع ممرضة بطريقهم لحجرة مرضى..
وين وصلوا فيها..خشوا وهي تقول...
امل:وينها ؟
الممرضه:سرير رقم 4..
مشت امل للحاله اللي كانت باين عليها التعب الشديد والوهن..وملامح الوجع اللي تمشي وتجي..
وقفت جنبها وهي تتكلم بأسلوب فوقي غير مريح..
/خيرك ماما شن تحسي!
المريضه بألم..
/بنموت يادكتورة..
المرافقه قالت..
/القولون متعبها هلبه يادكتورة حاشاك مش قادرة تخش الحمام..
امل:ومن قالك عندها قولون!؟
المرافقه:من قبل تشكي منه..
امل:عاينت قبل؟
:لاماعاينتش لكن..قصدي واضح من اعراضه..
المريضه بألم وتعب شديد..
/بنموت يادكتورة..بنموت..
امل:انتي جاك دكتور وسام شافك وقالي عندها مشكله في المعده لاقولون لاسو معاش تفتوا من روسكم واللي عندك ياماما نزله معويه وخلاص..
المرافقه:مش هكي النزله..
قاطعتها بحده:بتعرفي اكثر مني ماما بتعرفي اكثر مني! اني هني الدكتورة حبيبتي..
المريضه زاد توجعت وحست بتعبها زاد..
/بنموت يادكتورة..
هي بشي من الانفعال..
/اشحطي روحك شويه وقاومي شن هكي! عندك نزله معويه وهاك تاخد عليها في دوا وتو يولي حالك باهي معاش تبالغوا ومعاش تشخصوا برواحكم..
المرافقه وباقي المريضات كانوا يوجهولها في نظرات استنكار وهي مشت تشوف في كيس التغديه الموجود فيه الدوا اللي تاخد فيه المريضه..
تفاجئت وارتبكت لما شافت خالد في الباب ومعاه اميمه ووسام...
نظرات خالد الحاده خوفتها..غيرهم عنها لما شافاته وخش يشوف فالحاله اللي جاي ع خاطرها..
ومعاه وسام واميمه اللي كانت حاسه بالشفقه ع المريضه اللي تشوف فيها أمل..
وامل حاولت تتمالك نفسها وترجع طبيعيه التفتت للمريضه وقالت..
/شويه ويخف الوجع ويولي حالك باهي..
ومشت طول للدكتور خالد ووقفت مع زملائها..
وخلت المريضه في حالة اسوأ من اللي لقتها عليه..
زاد الألم..شدت بطنها بقوة وهي تقول بوجع..
/ياربي هدا شني...حاسه بحاجه هني بتتفجر..
التفتولها الدكاترة..واميمه لقت روحها ماشيتلها من غير ماحد يقوللها..
وصلت لسريرها وهي تسأل..
/وين بالزبط؟
المريضه حط يدها يسار بطنها وقعدت تتألم وهي مش قادرة تقول شي..
اميمه للمرافقه؛غطي عليها بالستار لوسمحتي..
المرافقه طول جبدت الستار وغطت ع الحاله..
واميمه بدت تفحص فيها بعد ماكشفت البطن...
حطت ايديها ع مكان الوجع مباشرة وقعدت تحرك فيها وتقول..
/هني!
بوجع قالت المريضه..ايه..ياربي..
اميمه:معليشي معليشي...التفتت للمرافقه وقالت..
/عندكم حد قريب يجي يرفعها دير صورة بنطلبها عليها للأسف مش موجوده في المستشفى..
:ايه خوها يادكتورة..
اميمه:تمام..غطيها..
مشت المرافقه للمريضه..
وهي طلعت من ورا الستار ومشت لخالد طول..
وقفت عليه وشرحتله الحاله..
وعيون وسام بياكلوها بنظراتهم..
اما نظرات امل كادت تقتلها..
خالد:تمام تصرفي بسرعه..
هي هزت راسها بإيجاب ومشت طلعت من حداهم بسرعه.
غير الدكتور عيونه لأمل وهو يشوفلها بطرف عينه وهي كانت منحرجه ومضايقه في نفس الوقت..
خالد:نص علاج المريض الراحة النفسيه..ونص شهادة الطبيب حسن سلوكه ومعاملته للمريض..
نزلت عيونها وهزت راسها ووجهها احمر من الاحراج الشديد ووسام يشوفلها بإبتسامة متهكمه..
ع خشة اميمه وهي تمشي بسرعه توجهت لسرير المريضه..
وعطت المرافقه ورقه وصفه فيها الصورة المطلوبه..
اميمه:كلمتيه؟
:ايه قالي ع وصول..
المريضه بألم؛دكتورة..شني في!؟
قربتلها اميمه وطبست عليها وقعدت تمسح ع شعرها بهدوء وتقول..
/ماتخافيش ان شاء الله حاجه بسيطه...اذكري الله واقري الفاتحه..
هي من التعب والاجهاد قالت..
/مش قادره..
اميمه:معليشي معليشي..وحطت يدها ع مكان الوجع وقعدت تقرا في سورة الفاتحه..
والمرافقه تشوف للمريضه كيف تتوجع لين دموعها نزلوا..
وقعدت اميمه تقرا عليها والمريضه شويه شويه قعدت تهدا..
وبعد لحظات جاها خوها ورفعها مع المرافقه اللي كانت معاهم...
🍃🍃🍃
خالد:بلغيني باللي يصير مع الحاله اول بأول.
اميمه؛حاضر..
مشي خالد في طريقه..وجاها وسام وقف عليها وقال..
/برافو..عجبتيني..
رفعت حواجبها بتعجب وهي تقول..
/نعم!
ضحك وقال..
/نقصد اجتهادك عجبني متنبئلك بمستقبل قوي اميمه..
اميمه بجديه؛ان شاء الله..وجت بتمشي..
هو شد ذراعها ووقفها..
التفتت عليه وهي تشوفله بغضب بعد ماجبدت ذراعها..
هو قال:اسف مش قصدي..غير قبل بنسألك لاأمتى قاعده اليوم؟
اميمه وهي تشوفله بحده قالت.
/علاش؟
هو ابتسم وقال..
/قلت بالك بعدين نتغدوا مع بعض وندردشوا في موضوعنا اللي فتحناه يومها..
اميمه:لامعليشي ماعنديش وقت نضيعه نستأذن..
ومشت وخلاته وهي معصبه..
وهو معاها بعيونه اللي كانت نظراتها كلها خبث وفي نفسه يقول.
"عاصيه شويه لكن سيورك طيبي"
وتفوت من جنبه امل وهي تقول تهكما..
/مسكين..
هو لحق عليها وقال..
/شن قلتي!
وقفت والتفتت وهي تقوله..
/مسكين..كان تحساب روحك بتوصل فيها مسكين لاعمرها حدورك ولاتعبرك..عينها ع اللي اكبر منك..
رفع حاجبه وقال..
/قصدك خالد..
امل ضحكت نص ضحكه مستفزة ومشت وخلاته..
وسام وهو معاه بعيونه بنظرات امتعاض قال..
/عطيك مايرفعك ع ثقل دمك..
🍃🍃🍃🍃🍃🍃
الساعه6:00مساءا..
كان محمد شنيبه مقعمز قدام المطحن متاعه اليوم ولأول مرة من فتره طويله يقعمز قدامه..
وكان معاه ولده المهدي..وحداهم محمد ولده "يبخبخ" في الشارع اللي قدامهم..
شاف راما بنت عمته ماشيه بطريقها لحوش سدره..
قعد معاه بعيونه لين شافها وقفت ع باب وقعدت دق بعدين انفتح الباب..وشويه وخشت..
"محمد"
التفت لبوه وقال..
/نعم..
المهدي وهو يشوفله بنظرات فيها شك..
/سكر الميه ساد..
هو هز راسه وكان محرج من بوه اللي فهم اللي شافه غلط..
ومشي من قدامه ..
شويه جده قال..
/ماشيه امور القهوة بعد الدعايه؟
المهدي؛امورها ديما ماشيه بدعايه ولامن غيرها..
محمد شنيبه:امتى بتفتح محل الذهب مرة تانيه؟
المهدي:بعد العيد ان شاء الله...
ع جية سيارة محي الدين..اللي فاتت من قدامهم..
دارلهم كلاكس"منبه السيارة" وكمل طريقه لحوش بوه..
ناض محمد شنيبه ومشاله والمهدي يتبع فيه بعيونه
🍃🍃🍃🍃🍃
"هاكي"
خدت مروة المصحف من يد راما وعيونها مليانات دموع..
راما برفعة حاجب:اظن الرساله وصلت ولا!
مروة قعدت تشوفلها بكره بعدين خشت وسكرت في وجهها باب الشقه بقوة..
راما:ان شاء الله تتفجري..
ولفت ومشت نزلت من الدروج..
🍃ومروة مشت طول لدارها حطت المصحف ع الرف جنب المصحف متاعها اللي ديما تقرا فيه..
ع خشة تاله قالتلها..
/شن عطاتك؟
مروة التفتت وشبحتلها وقالت..
/شي..
بعدين مشت بتقعمز ع السرير..
تاله وهي تشوفلها..
/قالتلي سدرة قبل خوها يحب راما..
مروة بشي من الانفعال..
/شن تقولي انتي شن يحب ومايحب عيب تقولي التافهه هادي بعدين اني شن دخلي فيهم ينحرقوا..
تاله خافت وانحرجت وقالت..
/باهي خلاص اسفه..ومشت طلعت وخلتها بروحها..
هي خدت نفس وزفرت..بعدين خدت اللاب وحطاته ع رجليها ورجعت تكتب وهي مضايقه...
🍃🍃🍃🍃🍃
خشت راما للحوش وهي تشوف بإستغراب لبوها وجدها واقفين حدا السيارة ويتناقشوا..
☘محي الدين:والله ياعمي سوء تفاهم..
هو قال بغضب:اهانه مش سوء تفاهم اني مانعرفش بنتي تروح لين تجي مرت خوك وتعتذرلها غير هكي انساها بكل..
محي الدين بصدمه..
/غير صل ع النبي ياحاج!
قال:عليه الصلاة والسلام..اخر كلام عندي يامحي الدين..
ولف ومشي وخلاه وهو مضايق ومنزعج ع الآخر..
شويه ومشي ركب سيارته وشغلها وتحرك بسرعه..
🍃فات من قدام حوش المهدي اللي طلع منه عبد القيوم وهو شاد شنطه..
مشي بإتجاه المطحن..
وين وصل فيه وقف قدامه وقال..
/السلام عليكم..
ويسمع باب حوش شنيبه ينخبط بقوة..عرف ان محمد شنيبه معاش ولى طايق شوفة وجهها.
المهدي طلعله وقال تهكما..
/جاتك الهبله!
ضحك وقال:لامش زي مافهمت..ماشي بنعيد مع هلي..
المهدي:صار بتعيد برا طرابلس حتى انت..
عبد القيوم..
/هما شدوا فيا نعيد معاهم بعدين بينك وبينك توحشت لمة هلي وناسي..
المهدي:اكيد مافيش زي لمة عيلتك وناسك بالذات في الاعياد..تمشي وتجي سالم إن شاء الله..
عبد القيوم بإبتسامه:ان شاء الله..
ع طلعة محمود وفي يده حاجه مغطيه بقصدير..
/بتتسقد؟
عبد القيوم:إن شاء الله..
مدله الصونيه وقاله..
/خود حصتك من الحلويات دارتهم اختي بزايد وقالت فرق منهم ع الجيران..
عبد القيوم خدي منه الصونيه وقاله..
/بارك الله فيك..
محمود:زمنيه راهو وحاجه صح ذوق منهم الغدامسيه..
المهدي:غدامس!
محمود:كيف ماقالكش ماشي بيعيد في غدامس!
عبد القيوم؛عندي عمة غادي قالت تعالوا عيدوا عندي..
هز المهدي راسه بصمت..
عبد القيوم:هي مالا اودعناكم.
محمود:توصل طيب ان شاء الله..
عبد القيوم؛بارك الله فيك..
المهدي:في امان الله..وعيدك مبارك..
عبد القيوم:كل سنة وانتم طيبين..السلام عليكم..
ومشي طول بإتجاه سيارته..
محمود؛راجل طيب ومحترم امثال قلوا..
المهدي:عملة نادرة..
محمود:صدقت عملة نادرة..
🍃وقبل ليركب عبد القيوم سيارته جاه ربيع..وسلموا ع بعض بحرارة..بعدين هدرزوا شويه وربيع خلاه يمشي في طريقه وتوجه هو لمطحن نسيبه وصاحبه..
🍃🍃🍃🍃🍃
"ان شاء الله تبيني في نفس الموضوع اللي نبيك فيه"
وحطت قدامه صفرة الشاهي وقعمزت..
هو بضحكه قال:ايه خلاص نوينا ان شاء الله..
سميره بضحكه:والله من لما روحنا من حوش صاحبك واني نبي نفتحه معاك..
هو بإبتسامه لهفه قال..
/علاش؟
سميره:في وحده خشت خاطري ونبي نخطبهالك من عيلة الواعر..بنت بنت خو مطيره.
اسكندر بضحكه؛الله عليك جديات مش عاديه انتي..
هي تفاجئت وقالت..
/قصدك حاط عينك عليها؟
اسكندر بشي من الاحراج..
/من فتره قريبه مش بعيده راهو..
هي ابتسمت وقالت..
/مش مشكله..لكن راهو قبل كانت عندها تجربه..
هو قاطعها وقال..
/عارف عارف..حاجه وراحت ماتهمنيش..
سميره:خلاص مادام هكي تو نفتح الموضوع مع مطيره..
هو قال:اليوم!
ضحكت بعدين قالت..
/خلاص اليوم..اليوم..
🍃🍃🍃🍃🍃🍃
"قالت تبي دبس اسكندر صاحب روفا فيها"
مطيره:لالا ياوخيتي كانهي شنعب مانخلي صاحبتي تنبلي بيها..
الاء بضحكه:حرام عليك خلي بال روفي يرتاح..
طوبى؛خالتك هادي هبله بنت عمته قدامه عمر كان يبيها راهو خداها..
سالمين:لايابنتي ماتقولي هكي شيطانات الانس وكان حطن في رووسهن واحد يجيبنه يجيبنه..
مطيره؛اعوذ بالله منهم..
سالمين:خرابات البيوت مافي اكثر منهن فهالوقت ربي يكفي غرفه شرهن..
طوبى:آمين..
وساد عليهم الصمت وكل وحده كانت تفكر في شي ومنهم اريج اللي لقت روحها غصب عنها تفكر في اسكندر..
قطع عليها تفكيرها سؤال سالمين لما قالت..
/ماكلمك منهم حد ولاجاك حد؟
طوبى وهي تشوفلها قالت..
/اخته وخوه الكبير..اصلا خوه الكبير هو اللي سجلها..
سالمين:علاش!
طوبى؛هداكا مسافر..
سالمين:شن عنده؟
طوبى:ع حسب مانعرف خدمه..
سالمين ؛ولاعليه لافي بنته ولا ولده..
فردوس:ماهامه شي غير روحه..
سالمين بإزدراء:باهي كان هكي يطلقها ويخليها تشوف حياتها!
مطيره؛مايبيش ياحنه لأنه مش قابلها ع روحه هي اللي تطلب منه الطلاق..
وطوبى تسمع فيهم بصمت وهي مضايقه ع الاخر كانت متناسيه اللي صاير فيها لين هما تكلموا عنه قدامها..
سالمين:هذى يبي طريحه سمحه تعرفه ان الله حق..
مطيره:حشاك حلوف مايحسش كلي طريحة من ولد عمها وبعدين التارقي نهارتها مسح بيه االشارع وهو شي.
سالمين:عبد القيوم!
مطيره:ايه..
سالمين؛عليش!؟
مطيره:يومها صارت عركه بين هداكا الحلوف وبين حسين ولد خوي خش بيناتهم ع اساس بيحز اشبح شن سمعه قال ماتحملش وطبس فيه..
سالمين بضحكه:يانهاره الاحرف ايد عبادي ثقيله خبطه وحده ترقده في مكانه..
فردوس بضحكه:عطاه وحده براس جابه لوطا..
سالمين وهي تضحك..
/يانعلي..
الاء؛قالوا كسرله يده..
سالمين؛نعنه مارد..يبيها هالكلب هذى..مسح ع كبدك يابيبا ولا..
طوبى بإيتسامه ضيق..
/لاياخالتي والله زادني ع مابيا..
سالمين بإستغراب:ليش..
طوبى؛نعرفه هداكا حقود ومايفوتش خايفه يردهاله ويديرله حاجه في جرتي ساد ماجاه من تحتي قبل..
سالمين:شن صاير تاني!؟
مطيره:عليك يوم ربي مايرده..
وحكتلها ع اللي صار يوم حادثه المدرسة...
سالمين بفجعه:يانعلي ياكبدي!..
طوبى بضيق؛وكان صارتله حاجه يومها نقعد لين نموت واني نلوم في روحي..
سالمين؛الحمد لله اللي عدت ع خير وربي نجاه وسلمه..لكن هو من نهار عرفناه فزاع ويعطي الناس اللي يعاشرهم عيونه كان جارنا وكيف ولدنا والله ساعات نلقوا فيه اكثر من عويلنا
مطيره؛الله يبارك عليه الحق راجل بمعنى الكلمه
طوبى:هو بارك الله فيه دار الواجب وزياده لكن مانبيش يدخل روحه في مشاكلنا يخلينا برواحنا نحلوها..
سالمين؛مدامه عاشركم وجاوركم لوتعدي تقوليها له في وجهه معاش تدخل فينا نهار تصير معاكم شي ولاتحتاجوا شي حاجه تلقوه اول من يفزع..
فجأه سمعوا باب الحوش يدق..ومعاه رن تليفون آلاء..
بعد ماشافاته قالت..
/خالتي روفي جت..
وناضت وطلعت من حداهم..
سالمين بإبتسامه؛جو السمحين متشوقه نشوفهم..
🍃وتخش عليهم غرفه بتوأمها وكان سلامها ع سالمين حار..
بعدين قعمزت بصغارها حداها وقعدت سالمين تلعب فيهم وتدعيلهم..
وطوبى تتأمل فيها وفي داخل شعور محسسها ان سالمين امهم من حبها ليهم..
غيرت عيونها عنها لبنتها اللي كانت حداها لقتها فايقه.
ضحكت وقالت..فقتي جنوني..ياربي سلم هالعوينات الحلوات..وطبست عليها طبعت قبله خفيفه جدا ع خدها بعدين قالت..مقنينك ومحلاك يافرخه....
غرفه:ناضت كنتي؟
طوبى بضحكه؛ناضت..
سالمين:اشيه..لمني فيهم!؟
طوبى؛تكبر وتوازي..
غرفه:قالولك عليهم قفاطين نوضي محور.
ضحكوا وسالمين قالت بضحكه..
/بعيد السو..
🍃🍃🍃🍃🍃🍃
"زي ماتوقعتي المشكلة في فضلات متراكمه في القولون"
اميمه؛تبي تدخل جراحي ماينفعش معاها العلاج..
خالد؛مزبوط..تو نعطي للدكتور رافع علم..بعدين ابتسم وقال..
/في تحسن..
اميمه ضحكت وقالت:باهي اللي رضيت علينا
خالد:مازال تبي ديري امتحان الزماله؟
هي هزت راسها بآيجاب وفي عيونها نظرات تقرب
خالد بآبتسامه؛خلاص..
ضحكت اميمه بفرح وقالت..
/واخيرا..
خالد:بس نبي نعطيك نصيحه ونتمنى تمشي بيها..
اميمه قعدت تستنى تسمع نصيحته..
خالد؛خليك ديما واثقه في نفسك وفي قدراتك بدون مبالغه..
اميمه خدت نفس وطلعاته وهي تهز في راسها بإبتسامه بعدين قالت..
/إن شاء الله..شكرا هلبه دكتور..
خالد؛الشكر لله..موفقه...ومشي من حداها وفي يده ملف صور الحاله بعد ماخلا اميمه ولأول مرة فرحانه من قلبها بعد فترة صعبه مرت عليها خلتها تشتاق للفرح...
🍀🍀🍀🍀🍀
ويمروا يومين...
وتروح خديجه لشقتها بعد ماجوها عزوزتها وحماتها نجاح ورضوها..واتصلت بيها سميرة واعتذرت منها..
بس قعدت معذبه محي الدين معاها ومابتش ترضى عليه لين يطيب مافي خاطرها وترضي غرورها ع الآخر...
🍃وامها مع بوها والمهدي وولاده ونجاة وصغارها يوم الوقفه الصبح توجهوا لزليطن بش يعيدوا غادي..
وقعد نضال مع خوه عمر في فيلا الجالي..
🍃عمر اللي خدي اجازة اسبوع من شغله وانعزل في دار المكتب متاع خوه..واغلب وقته كان بين الصلاة والدعاء وقراءة القران اللي معاهم قعدت نفسيته تتحسن شويه شويه..
🍃وتفتح سميره موضوع الاء مع مطيره اللي كانت رافضاته بينها وبين نفسها بسبب فرق العمر الكبير ولما فاتحت فردوس في الموضوع رفضت رفض قاطع بدون ماترجع لآلاء..واختارت مطيره ترد ع صاحبتهت بعد العيد وخلتها تستنى بحجة.."البنت قاعده تفكر"..
🍃لكن نسرين مافتحتش مع ربيع موضوع مرواح ولدها مابتش ضايقه ولاتشغله بهموم تانيه ومعاش فتحت النت تهربا من ولدها...
🍃زي ماطوبى كانت تهرب من واقع وضعها لعالم بنتها جنة اللي انشغلت بيها وبسعادتها معاها..
اول مرة يديروا فيها لجنة دوش كان يوم لاينسى بالنسبه ليها..وثقاته بالصور والفيديوهات..وحتى كتابه في مذكراتها...
وكل مالها تزيد تتعلق بيها كل لحظه اكثر واكثر...
🍃ولليوم ماجتش لأميمه الشجاعه الكافيه اللي تخليها تمشي لحوش عمها وتبارك جية جنة لطوبى..كل ماتحاول تحسم امرها وتمشي تتفكر اللي صار تتراجع...
🍃🍃🍃🍃🍃
بس في حاجات التراجع فيها يكون مستحيل..ولو ماكانش مستحيل..يكون صعب..صعب هلبه...
☘☘☘☘
في الطريق..
هي وراجلها متوجهين لحوش اهله بش يحضروا العيد غادي لأول مرة..
كانت متوترة وهي تسمع فيها يعطي فيها توجيهات معينه بش تمر ايام العيد عليها بسلام...
🍃الشارف:طبعا حوش العيله سانيه كبيره فيها حوش بوي وحوشي وحياش خوتي التلاته..في حوش بوي قاعدين معانا عماتي الزوز..وحده تعرفتي عليها جت مع امي يومها..والتانيه هادي اصغر منها..لكن ليها مكانه خاصه في الحوش..زي مايقولوا دلوعتنا كلنا..ضحك وقال..كلمتها عند بوي ماتوليش اتنين..وفي الحقيقه عندنا كلنا كان عرفتي تكسبيها تكسبي العيلة كلها..
تنهدت تنهيده خوف مكتومه وبلعت ريقها وقعدت محتفظه بصمتها..
هو كمل يقول:اكيد تسألي في روحك علاش عندها المكانه هادي يعني وقيمتها كبيره هكي..زي ماقتلك وضعها خاص شويه..مريضة قلب هي..
عواطف:ربي يشفيها ويعافيها..
هز راسه وقال؛آمين..آمين..ايه هي راهو طباخة درجة اولى ومافي حد فالبلاد مش ذايق من طعامها وكلهم يشهدوا ان ليه بنه خاصه..هدا علاش فتحت معمل كبير ليها فترة بسيطه شهور تقريبا وماشاء الله الخدمه فيه ماشيه..
عواطف؛ربي يباركلها..
هز راسه تاني وقال..
/آمين..
اللي اثار استغراب عواطف في سياق كلامه انه ماجابش سيرة مرته الاولى نهائي وكل كلامه كان ع عمته والواضح عليه وهو يتكلم عنها انه كان متوتر ومرتبك بعض الشيء..
الشارف:وصلنا واخيرا..اشرلها ع مكان السانيه وقال..هديكا هي السانيه متاعنا..
دقات قلبها تسارعت من الخوف وهي تشوف في السانيه كل مالها تقرب او بمعنى اصح هما اللي يقربوا منها لين خشولها...
درس السيارة وقال..
/هي انزلي..
نزل هو..وهي نزلت بعدها والتوتر مسيطر عليها..
هوقال:هي تعالي..
عواطف وهي نحاول تخفي توترها؛هاني جايه..
ومشت معاه لباب الحوش اللي كان مردود..
فتحه وخش وهو يقول..
/يااهل الحوش..
تنهدت عواطف بخوف مرة تانيه..
"شروفه"
وشافت امه جايه وهي ترحب وبعدين شافت عمته اللي تعرفها جايه وترحب حتى هي..
سلموا عليهم الزوز وامه كانت تزغرد..
ع جية وحده كانت تقدم بخطوات فيها تكبر وهي تشوف لعواطف من فوق لتحت..
عواطف لما شافتها عرفتها طول..
هي قالت؛شروفه..
هو ابتسم وقال:عمتي..
وصلت فيه وحضناته وهي تقول..
/حمد لله ع السلامه..
هو قال:الله يسلمك..كيف حالك..
بعدت عنه وشافت لعواطف وهي تقول..
/هي هادي!
الشارف وهو مبتسم بإرتباك؛ايه..
يدوب ابتسمت لعواطف وقالت..
/مرحبتين حبيبه..
وسلمت عليها بالخد وقالت..
/اني كوثر ..وطبعا اني مش عمة راجلك بس راهو اني اللي مربياته اكثر من امه كان تبي تقعدي كاسبتيه خليني راضيه عليك..
امه وعمته التانيه شافوا لبعض بضيق..
وعواطف اللي كانت تحاول تبان عاديه قالت بإبتسامه..
/إن شاء الله عمتي..
ضحكت وقالت:عمتك! مافيش فرق هلبه بيني وبينك راهو..ناديني كوثر..
عواطف بلعت ريقها وقالت..
/ع راحتك..
كوثر:اكيد ع راحتي حبيبه..هي خشوا خشوا ..وخدت يد الشارف وقالت..تعالي..
وخشوا داخل..
وعواطف معاهم بنظراتها القلقه..
امه قالت؛خشي بنتي خشي..
عواطف:خاشه..ورمت اللي فرجليها ومشت خشت معاهم داخل....
#جنة_طوبى
#طوبى
.....يتبع......
