#طوبى "جنة طوبى"
#جمان_فريد
#الجزء_124"إمتحان/تمحيص"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
حقيقة الابتلاء:
قال الشيخ #ابن_عثيمين ـ رحمه الله ـ :
إذا أُصبت بالمصيبة فلا تظنّ أن هذا الهمَّ الذي يأتيك، لا تظن أَنه يذهب سُدىً، بل ستُعوض عنه خيرًا منه، سَتُحطُّ عنك الذّنوب كما تُحطّ الشجرة ورقها، وهذا من نعمة الله.
[شرح رياض الصالحين] 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃قال رسول الله صلى الله عليه وسلم
"إذا رأيت الله يعطي العبد من الدنيا مايحب وهو مقيم على معاصيه فإنما ذلك إستدراج منه"
__________________________________________
الساعه 12:00 قبل الظهر
في المدرسه..كانت مقعمزة في حجرة الإدارة قدام مكتب المديره وبنتها مقعمزة مقابلها لاهيه بلعبة في يدها..
وهي تتأمل فيها كيف تلعب جوها رسائل ع الهاتف..
طلعاته من الشنطه وفتحت الرسايل لقتهم صور جوها من..
مختار..
فتحت الصور..ابتسمت لما شافت الأولى اللي كانت ليه هو وفاتن وهما يتغدوا ويبانوا مبتسمين وجوهم حلو
اما التانيه لما شافتها حركت راسها يمين ويسار بعدم رضا
الصورة هادي حتى هي كانت ليهم مع بعض لكن مختار فيها واخد فاتن في حضنه والزوز يشوفوا للكاميرا وهما يضحكوا..
🍃الصور خداهم من غدي اليوم اللي قبله ليه هو وفاتن في المزرعه وبعتهم اليوم لطوبى لغرض في نفسه..وهالغرض بسرعة وضحه لما اتصل بيها..
فتحت الخط وردت..
/السلام عليكم..
"لاليش تبدي بيها قبل نبي نقولهالك كيف ماتحبيها"
ابتسمت بإمتعاض وقالت..
/كيف حالكم؟.
"نايس ونايس النايس..كلمتك بش بنسلم عليك توا توا بنركبوا الطيارة"
بدت ع وجهها ملامح الاستغراب وهي تقول..
/بتركبوا! مسافرين كلكم قصدك؟
"ايه ياستي والد فاتن تعبان شويه وبيسافر للعلاج برا وبنمشوا معاه"
قالتله؛عطيهالي نكلمها..
"لالا فوتي نفسيتها مش حلوة حتى علاوي خلاته معاي"
طوبى بأسف:ربي يشفيه ويعافيه..تو نكلمها بعدين ع الماسنجر..
"تمام تمام"
عقدت حواجبها بإستغراب وقالت..
/لحظه الصور اللي بعتهم امتى خديتهم!؟
"امس في الليل تعشينا في المزرعه وهي قالتلي صور وابعت لطوبى مافهمتش علاش طلبت مني اني نبعتهم بس درت اللي هي تبيه"
ابتسمت بشي من التفاؤل لما فهمت ان فاتن تبي توصللها رساله تقول فيها ان الامور ماشيه زي ماتبي..بنبرة بان فيها الفرح قالت..
/باهي ردوا بالكم ع رواحكم وع علاوي..
"في عيوني ولدي مانتوصاش عليه..جنوني شن جوها"
طوبى شافت لبنتها وقالت بإبتسامه..
/مافيش احلى منه والحمد لله..
"دوم دوم عليها عسليتي..اه..طوبى خلاص لما نسكر..سلام"
طوبى:توصلوا بالسلامه وعليك السلام..
ونهت المكالمه وهي تقول بنفس ابتسامة التفاؤل..
/ياهادي يارب..
وتخش عليها نسرين وهي تقول..
/عطلت عليكم!؟
طوبى:لانهائي..ناضت وهي تقول..جنوني مامي..
شافت جنه لأمها وهي تقول..
/نعم!
ابتسمت نسرين وطوبى وقالت..
/بتروحي مع عمتو نسرين ياقلبي باهي..
جنه:به..
قدمتلها طوبى طبست عليها باست خدودها وراسها بعدين وقفت ع حيلها وهي تقول..
/السلام عليكم..
ومشت بتطلع وعيون نسرين معاها شافت الدمعه في عينها قلبها وجعها وشدت دموعها بالغصب..غيرت نظرها لجنة وقالت بنبرة بهجة..
/مارشميللو..
🍃🍃🍃
وتطلع طوبى من المدرسه ع جية سيارة غرفه ركبت جنبها وتوجهوا لشارع القهوة وفي الطريق تكلمت طوبى ع مكالمة مختار..
🍃غرفه:الانسان هدا معدوم منه الامل عندي حتى لو شفته بعيوني يصلي نقول صلاة بن ابي سلول..
ضحكت طوبى غصب عنها وقالت..
/قولي ياهادي ياربي وخلاص..
غرفه تنهدت وقالت..
/ياهادي ياربي..
☘وكملوا طريقهم وهما يهدرزوا في الوقت اللي خش فيه مختار للفيلا متاعه وهو رافع ولده في حضنه والاقجم معاه
الأقجم:توا طلعت رحلتهم..
مختار والدموع في عيونه..
/هكي خير للجميع.. غمض عيونه وقال..المهم المهم..فتحهم وهو يقول..جت المراة اللي قتلي عليها؟
الاقجم هز راسه وقال..
/تراجي فيك في المكتب..
🍃🍃🍃🍃
ومن فيلا مختار اللي ولت الحياة فيه باردة بعد مافقدت الروح لحوش شنيبه اللي ولت الحياة فيه حلوة ودافيه تخلي اللي يجيه يتمنى مايطلع منه..
وغالبا حوش العيله لما يلم الاحفاد من صغرهم لعند مايكبروا تتحول مشاعر الصداقه بين بعضهم لمشاعر تانيه حلوة وممكن هالمشاعر تتحول من عدواة لصداقه..اوتقبل وهادي لمة العيلة لازم تربط احبال الود بين افرادها..
🌸روحوا في هاليوم بنات نسرين ع حوش جدهم ومرواحهم كان مع سدرة المهدي وجوري وقعدوا مقعمزات في الجنان بلبس المدرسة وهما يهدرزوا..
ع خشة الشباب يزن محمد حامد والصيد ومعاهم حمزة..
يزن؛خشي داخل انتي وياها..
سدرة حامد بإنزعاج:جي العقدة..
قاللها؛عاوديها عاودي..
مشت خشت وهي تمتم والبنات خشوا وراها اختها وجوري كانوا يضحكوا عليها لكن سدرة المهدي وهي خاشه التفتت وشافت لمحمد الصيد فجعاته وخلاته طول يغير عيونه عنها
تنهدت بضيق وكملت طريقها وخشت داخل..
يزن اللي مالاحظ شي قال..
/هي تعالوا..
ومشوا مع بعض ومازال محمد يفكر في نظرة سدرة اللي زادت لخبطاته واربكت كل شي فيه. ☘مشاعر حلوة ورديه اول مرة يحسها في حياته لكن هي القمرة الصغيره ماكانتش تحس بشي من اللي يحس بيه..اللي تحس بيه سدرة حاليا شعور مضايقها للغايه وكأنه هم وراكبها..
كانت سرحانه تفكر وماانقطعش سرحانها الا لما سمعت فرح تقول..
"بعد العصر بتجي راما بش نقروا مع بعض"
قعدت تشوف لفرح وهي تفكر والشعور الضيق زاد في نفسها
☘واستمرت ع هالحال حتى بعد ماروحت نسرين بجنة برغم البهجة اللي دخلتها جنه ع المكان ماقدرتش تبدد شعور الضيق اللي تحس بيه سدرة..
ويجي موعد صلاة العصر..صلت بعدين خدت اذن خوها محمد بش تمشي لحوش طوبى وهو سمحلها..
🌼🌼🌼🌼
"واخيرا تواضعت ابله سدرة وخلتنا نشوفوها ونهدرزوا عليها"
ضحكت بإحراج وقالت..
/القرايه لهتني..
حطت طوبى قدامها طاسة عصير فرواله ع طاوله الجنان وقعمزت مقابلها وهي تقول..
/شن جوها القرايه.
سدرة:اهو بنخشوا ع امتحانات في رمضان وياربي يصبرنا.
طوبى بضحكه:موفقين بإذن الله..
سدرة:يارب..
ابتسمت طوبى وقالت..
/اشربي العصير..
شربت منه سدرة شويه بعدين حطت الطاسه وقالت..
/نبي تكلم معاك في حاجه..
حطت طوبى يدها تحت خدها وهي متكيه بمرفقها ع الطاوله وقالت..
/نسمع فيك..
سدرة بضيق واحراج..
/اكيده تعرفي باللي صار بيني وبين راما..
طوبى:امم سمعت..
سدرة خدت نفس وقالت..
/اني مش قصدي نوجع حد لكن اني كنت خايفه..خفت ع خوي هلبه هو طيب لين مفسد والطيبه متاعه تجيبله في المشاكل وراما دارتله هلبه مشاكل وخلاته يسيب الحوش وقعد بعيد علينا..اني وقتها كرهتها هلبه وحتى توا مش قادره نحبها لكن..سكتت..
طوبى:كملي..
والدموع عبوا عيونها قالت..
/قصة اسما مش عارفه كيف خلتني معاش نكرهها زي قبل قلت مرات تكون زيها حتى هي واني نظلم فيها...
طوبى بإبتسامه:توقعت..
سدرة بتساؤل:شن توقعتي!؟
قالتلها:توقعت تغيري رايك فيها لأني نعرفك كويس صح واعره شويه لكن قلبك مازال اطيب من قلب خوك..اشرت ع الحوش وقالت..عندنا نسخة منك داخل..
ضحكت سدرة بعدين قالت..
/كلهم يقولوا فيها..تنهدت وكملت تقول..باهي اني صح ظلمتها!؟
طوبى:انتي ماكنتيش تشوفي في الصورة واضحة يعني ماقدرتيش تلاحظي كيف راما تغيرت ومعاش ولت زي قبل او بالأصح راما ولت زي قبل..لما كانت في عمرك بنية مؤدبه وطيبه وديما مرافقه امك الله يرحمها وعيشه الله يرحمها كانت تحبها هلبه..
نزلوا دموع سدرة ومسحتهم..
طوبى كملت تقول..
/راما ضاعت بعد توفت امك وقعدت لأمها اللي ضيعتها بقلة اهتمامها وخلتها لفترة تطبع بأطباعها بس هي في حقيقتها مش هكي بكل بعلامة التغيير اللي صار معاها..انتي مفروض تكملي اللي داراته امك وتتقبليها وتصاحبيها وخلي معاملتك الحسنه ليها اجر احتسبيه عند الله ليك ولأمك الله يرحمها..
ابتسمت سدرة بحب والدموع في عيونها..
طوبى بإبتسامه..
/ع فكرة محلوة هلبه..
ضحكت وهي تمسح في دموعها...
🌸وروحت سدرة من عند طوبى وهي مرتاحه وراضيه تمام الرضا..
وين خشت للحوش...لقت خوها الكبير مع فرح وراما يقري فيهم..
لما شافتها راما خافت وهي شافت نظرة الخوف هادي وضايقتها هلبه غيرت نظرها لخوها وقالت..
/نديرلكم قهوة..
ابتسم وقال..
/كابتشينو هادم مازال صغيرات ع القهوة..
فرح:من هو الصغير ياسيدي! شافت لسدرة وقالت..نشرب فيها مرة..
ضحك محمد وحرك راسه يمين ويسار..
ضحكت سدرة بعدين قالت..
/وانتي راما؟.
تفاجئت راما وفرح ومحمد يشوفولها..
بشي من التوتر ردت..
/كابتشينو..
بإبتسامه قالت:باهي..ومشت خشت للحوش وعيون خوها معاها وهو مبتسم بحب..
🌸🌸🌸🌸
"امها خلتلها رساله لتوا ماقرتهاش"
طوبى:لازم تقراها البنت الله يبارك عليها واعيه وعقلها اكبر من عمرها...
سدرة بإبتسامه:صح..ديما تفكر فيا بيك لما كنتي في عمرها تقول من عمري..
غرفه بضحكه:ياما عطتني نصايح ع الاهتمام بالصحة والجمال وين تدوي نقعد فاتحه فمي..
فردوس بضحكه:حتى ع قرايتك ياما عاركاتك..
اريج:مش غير هي بس حتى حني الاء مرات تتسهوك عليها وتقول..باهي ماما طوبى..
وطوبى تسمع فيهم وتضحك وهي تتفكر في كل شي يحكوا عنه..
وسدرة وهي تشوفلها بنظرات كلها حزن وسط ابتسامتها قالت في نفسها...
"ياريتك ماكبرتي"
🍃🍃🍃🍃
الساعة 10:00ليلا..
متكيه في الدار وهي تشوف في هاتفها شويه قالت..
/شكله بو فاتن تعبان هلبه لتوا قاعده مسكرة النت..
اريج اللي كانت مقعمزة قريبه عليها وهي لاهية باللابتوب متاعها قالت..
/ربي يشفيه..ايه بيبو ماقلتليش راجلك امتى يوصل؟
طوبى بإبتسامه: الخميس..
اريج:يوصل بالسلامه ان شاء الله..
طوبى وهي مبتسمه قالت..
/آمين...ربعت ايديها وكملت تقول..تعرفي استاحشته هلبه هلبه نحس في روحي بعد مايروح معاش بنخليه يتحرك لولامكان من غيري..
اريج:حسيت بعد الزواج الحب يزيد هلبه..
طوبى بحب:كل لحظه وكل تانيه..
رفعت اريج عيونها فوق وقالت..
/عجل يارب عجل..
خدت طوبى مخده جنبها وحدفتها بيها وهي تضحك..
تلقتها اريج وقالت بضحكة انزعاج..
/خلاص طابت كبودنا من البعد..
طوبى قالت بإبتسامه..
/شن دايرين مع بعض في الكليه؟
اريج:لانعرفه ولايعرفني..ضحكت وقالت.. مايكلمش فيا كان لما يلقاني مشمرة العبايه يفوت من جنبي وهو يقول.. ياآمة الله..نزلي العبايه..
ضحكت طوبى واريج قالت بضحكه..
/حركة ماشيه فيا مش قادره نخليها خايفه بعدين لما نلبس الخمار نديرها..
طوبى بضحكه:تخيلتك..
اريج حطت يدها ع خدها وقالت..
/بعدين يحرم عليا الطلوع من الحوش!
طوبى بإبتسامه..
/حطي في بالك الحاجه هادي ديما خوفك يخليك تسيبيها..
اريج وهي تفكر ضيقت عيونها وقالت..
/زعمه!
هزت طوبى راسها بإيجاب وهي تضحك..
☘ومن الدار للكوجينه اللي كانوا فيها فردوس وسدرة وغرفه..
اللي ضم فيها واللي دير في النسكافيه..
🍃غرفه:باهي اللي رقدوا وريحونا من نشفتهم..
سدرة؛سلامتهم..
فردوس:امتى نبدوا نطلعوا ناخدوا حاجات لرمضان؟
غرفه:الخميس نطلعوا العشيه ان شاء الله..
فردوس:تطلعي معانا سدرة؟
سدرة:لالا الخميس المهدي يروح العشيه..
غرفه؛قوليله يخليك تطلعي معانا نهار من النهارات..
سدرة؛ تونشوف..هي تطلعي فردوس..
فردوس:خلاص كملت..ماتبي ندير معاك شي غريفه
غرفه:لالا بروا للدار شويه ولاحقتكم..
☘وطلعوا من حداها وخلوها تنسق في سفرة النسكافيه مع الحلو..وطبعا لازم تصورها وتنزلها ستوري ارفقاته بأغنيه..
"يامحلى لمتنا"
وهالستوري شافه حسين وهو مقعمز في مربوعة واحد من اصدقائه..
شافولها صحابه اللي كانوا معاه لقوه يشوف لهاتفه بإبتسامه واحد منهم قاله..
/امتى ديرلنا عرس حتى انت وتعزمنا ع غدوات وعشاوات..
قام عيونه فيه وقاله..
/قريبا ان شاء الله..
صاحوا وصفروا تعبيرا عن فرحتهم وهو يشوفلهم بإبتسامه بعدين واحد قاله..
/بعد العيد؟
قال:مش قريب لهالدرجه لكن نقولوا ان شاء الله بعده..
كلهم باصوات متقطعه قالوا..
"ان شاء الله..ربي يسخرلك"
🍃وعدت عليه ربع ساعه معاهم بعدين روح للحوش لقي امه سهرانه تراجي فيه وهي مقعمزه ع الصالون..
بعد اطمنت عليه مشت لدارها بش ترقد وهو قعمز في مكانها وقام هاتفه وطول الماسنجر لقاها مازال نشطه ابتسم وبعتلها رساله..
☘"طيح سعدهم ومزالهم والله مايفهموا في الاناقه"
سدرة؛عقلياتهم قديمه شويه..
غرفه:ومتزمتين هلبه..سمعت نغمة الرساله متاع الماسنجر قامت الهاتف وقالت..هي حاجات سمعتها عنهم صدمتني..
وفتحت الرساله وقرتها..
(مش باهي النسكافيه والحلو في الليل ياهايشات)
ضحكت ضحكة خفيفه وبدت تكتب في الرد بعدين بعتتاته ورجعت لهت بالهدرزة مع اللي حواليها..
☘وصلاته الرساله قراها بلهفه..
(حتى السهر مش باهي للي في عمرك برا ارقد)
ضحك وقال..
/شفشه..وكتبلها رد بعدين بعته..
(شكلك ناسيه ان ولد عمك ذيب مايرقدش)
تفاعلت مع رسالته ب"أضحكني" ومابعتت شي..
ابتسم وهو يكتب وبعدين بعتلها..
☘وصلتها الرساله وطول فتحتها تقرا فيها..
(بنسألك ع بنت عمة عبد الرؤوف)
عقدت حواجبها بإستغراب وبعتت..
(خيرها)
طول في الكتابه قبل ليبعت بعدين وصلتها رساله طويله شويه..
(جت للمحل اكثر من مرة وهكي صار بينا هدرزة والصراحة البنت عجبتني وخشت خاطري)
شهقت بصدمه وقالت..
/شن هياا!؟
شافولها اللي حواليها وطوبى بقلق قالت..
/خيرك!
غرفه شافتلهم وقالت..
/ولدعمكم هدا غريب اطوار بجديات..مش هديكا لميس ديما تكلم فيا وتقولي بنمشي للمحلات مرة مع اختي مرة مع صحباتي ومرة مع مش عارفه منو تبيني نراعيهم وشكلها ياحنه كل ماتمشي غادي تلقى حسين وهو توا قالي عجبتني وخشت خاطري
انصدموا وسدرة قالت..
/هديكا المزيته الركيكه اللي حواجبها تاتو وطلع في شعرها من الوشاح وتلبس في االمشحط!.
غرفه هزت راسها بإيجاب وهي مصدومه..
اريج:ماتستغربوش النوعيه هادي هي اللي طيح رجاله مصنعين ممنعين..
فردوس:لكن حسين واعر وطبعه صعب معقوله تعجبه وحده زي هادي!
اريج:تعجبه يام تعجبه ياما منهم رجاله بعقلهم وبصغارهم سيبوا نساوين مقومات ع خاطر النماذج هادي..
غرفه:صدقتي سمعت بكذا قصة من هالنوع..
جتها رساله تانيه طول شافتها..
(وين رحتي يابنت!)
بعتتله..
(باهي شن تبي قصدي ع شن ناوي)
(بنسألك عنها قبل شن رايك فيها كويسه وماعندهاش لبز!؟)
قالتلهم:قالي شن رايك فيها كويسه وماعندهاش لبز!
اريج:شكله يبي يخطبها..
سدرة:شن بتقوليله!؟
غرفه:صح مزيته ودراه كبد لكن ماعندهاش في العلاقات والجو هدا زمان ماكانتش تشوف كان في عبد الرؤوف..
سدرة؛وتوا حطت عينها ع حسين وقدرت تجيبه للطريق..
غرفه بتفكير:اها! معناها كانت تمشي للمحلات ع خاطره!؟
اريج:اكيد..
تنهدت وقالت..
/بنقوله اللي نعرفه وخلاص
وكتبت وبعتتله..
(كويسه وماعندهاش لبز..تبي نكلمهالك)
بعتلها وقال..
(نكلمها بروحي..تصبحي ع خير)
بعتتله..
(وانت من اهله)
نزلت هاتفها وشافت لطوبى لقتها تشوفلها وهي ملتزمه الصمت قالتلها..
/عطينا رايك!؟
شافوا لطوبى اللي قالت..
/مش عارفه شن نقول بس حسين ديما عنده مشكله في فهم مشاعره وصل لهالعمر ومش قادر يفهمها..
سدرة:صدقتي..تحسيه من الناحيه هادي ديما ملخبط ومش عارف شن يبي..
غرفه؛جيتوا لكلامي قلتلكم من الاول هو كان متعاطف معاي لااكثر...
سدرة وهي تشوفلها كانت حاسة بخيبة أمل ماتمنتش لغرفه غير حسين ولد عمهم ومنهم وفيهم ويحب صغارها وصغارها يحبوه كانت حترتاح عليها لو خداها..
اما طوبى زادت تشجعت تكلمها في موضوع عدنان الاشتر وتقنعها بيه..
🍃🍃🍃🍃
وانفردت بيها تاني يوم بعد ماروحت بيها من المدرسه طلبت منها يمشوا لوحده من الحدايق العامه يغيروا جو وغرفه لبت طلبها خدوا خفايف ع طريقهم واول ماوصلوا غادي وقعمزوا ع وحده من المقاعد فتحوا مواضيع عامه وهما ياكلوا لعند ماقالت طوبى..
/الوقت هدا صعب هلبه هلبه..
غرفه:ربي يعينا عليه..
طوبى:ايه ربك يعنيك لما يسخرك حد يساندك ويعاونك عليه..
ضحكت غرفه وقالت..
/والله زبطتك ماجبتيني هني الا بش تحكي معاي فهالموضوع..
طوبى:تمام حاولي تسمعيني بهدوء وتفكري في كلامي بعقلك..غرفه كل وحده فينا شافت حياتها واهي اريج قريب تطلع من الحوش ومتأكده ان فردوس بعد ماتطمن عليها بتولي لمعتز وهكي انتي بتقعدي بروحك..
كيف جت بترد سكتتها طوبى وهي تقول..
/بالله عليك ماتقاطعنيش..ياغرفه ياحبيبتي الزمان هدا المراة اللي بوضعك بروحها ماتقدرش تعيش فيه مرتاحه وتربي صغارها كويس،لازم من وجود راجل معاك لازم يكونلك سند وعزوة تتحامي بيه بعد ربي من اللي داساته الدنيا،لازم يكون معاك راجل بش يحمي رزقك ورزق صغارك.
..غرفه كانت تسمع فيها بضيق وحزن وفي نفس الوقت حست ان كلامها جي ع الجرح فعلا غرفه خايفه من الوقت خايفه يصير معاها شي يضيع منها اللي قاعده تحاول تحافظ عليه ع قد ماتقدر..
كملت طوبى كلامها وهي تقول..
/سألنا خالي عن عدنان الاشتر شكر فيه هلبه وقال ربي عاطيه من واسع فضله يعني مش حيطمع في رزق صغارك وعيلته يومهابان عليهم انك عجبتيهم هلبه وحبوا حتى صغارك..شوفي اني نبيك تعطي الموضوع فرصه قعمزي مع عدنان وهدرزي عليه وشوفيه تريحتيله وتقبلتيه كان بها صار غير هكي سكري الموضوع..
نزلوا دموع غرفه مسحتهم..شدت طوبى يدها وقالت..فكري بالشويه عليك فكري كويس واستخيري..
خدت غرفه نفس بعدين هزت راسها بالموافقه..
ابتسمت طوبى وقالت..
/ربي يقدملك اللي فيه الخير..
🍃🍃🍃🍃
"عطيك الهني فرخة سدرة امتى تعلمتيه هدا كله!؟"
سدرة وهي تفرد في عجينة السينابون قالت..
/خالتي سدرة مخليتلي الكوجينه تقولي كل اسبوع تعلمي ديري حاجه جديده بين حار وحلو..
نسرين بإبتسامه:زي ماكانت دير مع طوبى بالزبط ماوصلت 18سنه الا وهي تعرف دير كل شي..
ابتسمت سدرة..
نسرين وهي تشوف للعجينه قالت..
/كميه كبيره!
سدرة وهي تدهن في العجينه بخلطة القرفه قالت..
/نبي نذوق منه الكل..
ضحكت نسرين وقالت..
/نجيها ياربي..
🌸وكملت سدرة تجهيز "السينابون" اللي كان منظره ياخد العقل..
وتخش بعد العصر نفيسه مرت عمها دارت سفرة قهوة وكاكاو وحطت طروف سينابون وطلعاته لنفيسه ونسرين ومغليه ..
شكروا فيها هلبه وحناها مغليه قالت فيها اشعار ..
بعدين ولت للكوجينه وقسمت الباقي حطت بعض منه في حوافظ والباقي خلاته في الطاجين لخوتها وولد عمها..
واخر شي دارت سفرة ليها ولجوري مع الكاكاو واستمتعوا بيه وهما مقعمزات في الجنان وقطاطيسهم يحوموا حواليهم..
🍃🍃🍃
بعد المغرب..
في جنان الكوجينه..
واقفه ع خوها يزن تقوله..
/حافظه لحوش خالتي طوبى وحافظه لحوش خالتي فايزة وحافظه اعطيها لمحمد ولد عمتي خديجه..
يزن:شن قعدلنا حني!
سدرة:طاجين هكي كبره..ومثلت بإيديها لما قالت هالجمله..
ضحك وقال..
/باهي نروح نلقى القهوة واتيه..
سدرة؛باهي..راك تنسى حافظه ولد عمتي خديجه فيها حصته هو واخته..
يزن برفعة حاجب..
/شو عدا مابدا!!؟
ردت وهي مبتسمه بملل:ربي هداني..
لفت وخشت للكوجينه وخلاته يضحك بعدين مشي طلع من الحوش لقى محمد الصيد واقف ع واحد من ولاد الشارع ناداه ويجيه محمد وهو يقول..
/خير!
يزن:خود وحده فيهم..
بإستغراب قاله..
/شن هدا!؟
يزن:حاجه دارتها اختي حسباتك فيها انت واختك ..
حاول يخفي ارتباكه ع قد مايقدر خدي الحافظه ولف ومشي للحوش بدون ماينطق كلمه تنهد يزن بعدين مشي لحوش طوبى..
استقبلاته مرت بوه خدت منه الحافظه بعدين قالت..
/التانيه لمني!؟
قاللها:لحوش خالتي فايزة.
قالتله؛جيبها جيب خل نتصل بيها تجي تاخدها..
عقد حواجبه وقال..
/لالاعادي تو نرفعلها مش مشكله..
بضحكه قالت..
/ياودي نبيها تجينا..
بضيق مخفي مد الحافظه لمرت بوه هي ضحكت وقالت.
/افرد فنزوزتك يامهدي نمنبر2 وبرا ارفعها بروحك..
هو هرب بعيونه عنها وكان شاد ضحكته بعدين قال..
/باهي سكري الباب..
سدرة بضحكه:سلمه ياربي..وسكرت الباب وهو مشي بطريقه لحوشها..
وقف ع الباب خدي نفس ورن جرس الانترفون شويه جاه الرد..
"مني"
ابتسم وقال..
/يزن..
معاش سمع صوتها ضحك ضحكه خفيفه ولحظات وينفتح باب الحوش..
تاله بدون ماتشوفله:ترا هات..
قاللها:شن جو؟.
تاله:مش حلوة وقفتي ع الباب جيب الحافظة لوسمحت..
مدهالها وهو يضحك وهي خدتها وسكرت في وجهه الباب..
ضحك بدون صوت بعدين لبس ملامح الجديه ولف ومشي بإتجاه القهوة..
🌸وهي كانت راكبه بالحافظه في الدروج وضحكتها مزينه وجهها الحلو..
☘☘☘
اما عند محمد الصيد..خش بالحافظه ومشي طول لجهة الكوجينه وهو يشوفلها..وصل في الباب وقعد واقف قدامه وعيونه يتأملوا في الحافظه..
حول الغطا بش يشوف اللي فيها ويبانوا عليه اربعة قطع "سينابون" غارقات في الحليب المحلى وعليهم شكولاته سايحة وعليها مكسرات مرحية..
بدون مايحس ع نفسه ابتسم..وقلبه بدي يدق بقوة وهو يتفكر في نظرتها ليه اخر مرة..
وفي عز طيرانه بمشاعره الجامحه انفتح باب الكوجينه الخارجي..انتفض من الفجعه وشاف للباب..
عواطف بإستغراب:شن دير هني!؟ وشن هدا اللي في يدك؟
عقد حواجبه وقال..
/ناديلي راما..
شافتله شويه بعدين قالت..
/شويه بس..
ولفت ومشت وهي مبتسمه ع بالها واخد لأخته حاجه يفرحها بيها..
طلعت من الكوجينه متوجهه للصالون..
وصلت فيه وخشت..شافت راما تهدرز مع نساوين عمامها ومرت بوها ضمنهم..عواطف وهي تسمع في راما شن تقول شافت لإبتسام لقت ملامح العصبيه باديه ع وجهها..
🍃راما:لالا محل كبير للعطور بكل انواعها حتى من العود بتبيعه وكله حاجه اصليه النوع الواحد تلقي منه تنين تلاثه..
وحده من نساوين عمامها قالت..
/مكلف هلبه..
راما؛هلبه لكن راجلها مادورش شن ماتبي دار وخلاص..
وحده تانيه قالت..
/تبعتلك في صور من غادي!؟
راما بإبتسامه؛ياعيني..وناضت وهي تفتح في هاتفها ع الاستديو بعدين مشت عطاته لمرت عمها وقالت..مشي يمين..
خداته مرت عمها والباقي قربوا يتفرجوا حتى هما ماعدا صفاء وابتسام اللي كانت تغلي غلي..
هني عواطف تكلمت وقالت..
/راما تعالي..
مشتلها وطلعت هي وياها..
عواطف؛ماقلتيش تراضيتي انتي وامك!
راما بضحكه؛قعدت وراها لين رضتيها..
عواطف بإبتسامه مكر..
/لكن عجبني الجو اللي ديري فيه..
ضحكت راما..
عواطف بإبتسامه؛محمد يراجي فيك في جنان الكوجينه اشبح شن جايبلك..
ابتسمت بإستغراب بعدين قالت..
/باهي عمتو بري لتليفوني..
ضحكت عواطف ومشت وراما كملت طريقها للكوجينه..
بعد ماخشتلها طلعت للجنان لقت خوها واقف تحت الشجره وهو يشوف لحاجه شادها في يده..
مشتله وهي تقول..
/محمد..
شافلها بعدين قال..
/تعالي..
وقفت عليه وشافت للحافظه قالت بإنبهار..
/يجنن!
قاللها :قولي الله يبارك..
بضحكه قالت..
/اللي يسمعك يقول دايره انت!
قاللها بإنزعاج..
/فكيني من التسهويك الزايد وخودي..
خدت الحافظه وقالت..
/شكرا..
هرب بعيونه عنها وهو يقول..
/مش اني جايبه هدا من حوش جدي..داراته هديكا شن سماها ربي..سدرة..
ابتسمت وهي تقول..
/اممم..
احمر وجهه وهويقول..
/خليلي منه..ومشي وخلاها وهي تبع فيه بعيونها وتضحك بدون صوت بعدين ردت نظرها للحافظه وهي تقول...زعمه شن قصدك من اللي ديري فيه ياسدرة! ان شاء الله خير يارب..
🍃🍃🍃🍃
واقفه تشوف في شعرها المحني بعد فرداته حبت اللون اللي داراته جدا هالمرة وحست انه زاد ضوا وجهها..
ضمت ايديها لبعض قرت عليهم الفاتحه سبعه مرات ونفثث فيهم بعدين مسحت ع شعرها مع اعلى راسها لاطرافه..
ولماته كله فوق بعدين خدت هاتفها وقعمزت ع السرير
خشت ع الماسنجر بش تشوف فاتن كان فتحت نت..وتلقى حسابهانشط وع طول بعتتلها رساله..
☘وفي الكوجينه..
كانت سدرة واقفه ع غرفة تشوف فيها كيف تعجن في الحنة..
سدرة:علاش مادرتيش فيها زيوت؟
غرفه؛احتياط مرات تطلع حاطه حاجه..
ضحكت وقالت..
/عزوز..
سكتت غرفه وهي مبتسمه ومازال تعجن..
سدرة:نحنوها اني وياك..
غرفه:لاانتي مش حتفضي بيها..
سدرة:علي تو تشده فردوس..
غرفه؛فردوس عندها مادير..
رفعت حاجبها وقالت..
/شن بدير؟
فتحت غرفه الدولاب السفلي وطلعت منه صونيه مغطيه وقالت..بتحنيك انتي..
سدرة بمفاجاة:حي!
غرفه بضحكه:عندك راجل تحنيله حتى انتي..
ضحكت وقالت..
/يعطيك الهني لكن عاد اني عادي ديريلي فيها زيوت..
غرفه:درت درت عارفاتك مش حامل ومافيش احتمالات مالكش هلبه باديه تصلي..
سدرة بإبتسامه..
/غير امتى درتوه هدا كله!
غرفه؛لما كنتي راقده مع خنفورك بكري..
🍃ومن الكوجينه للدار اللي فيها طوبى..
كانت مازال لاهية بهاتفها تكلم في فاتن ماسنجر..
(باهي حبيبتي حمد لله ع سلامته)
ردت عليها..
(الله يسلمك..ايه بنقولك ممكن نقضوا رمضان برا البلاد ع خاطر بابا)
بعتتلها..
(فيها خيره المهم تقعدي مع بوك وتطمني عليه)
ردت عليها..
(مشكورة يابيبو ع السؤال نستأذن توا..سلام)
بعتت طوبى..
(وعليك السلام)
🍃وتوصل الرساله لحساب فاتن اللي كان شاده مختار..تنهد وهو رافع حواجبه بعدين نزلهم وشاف لولده اللي كان مقعمز في القعماز وهو شاد لعبة الجوكر القطنيه..
قاله:ارتحنا من دوشة عمتك هادي..
ناغى علي وهو يشوفله..
هز راسه وقال:امم..عارف عارف اخرتها حيعرفوا كل شي المهم عندي توا نكسب وقت بس..
حرك علي اللعبه وهو يشوفله..
ضحك وقال:تم تم يامعلم شن مايصير وقبل يصير نعطيك بيه علم..
حط علي اللعبه في فمه مرة تانيه وبوه يشوفله بحب وهو يضحك..
🍃بوه يضحك وامه تبكي بهيستيريا في احدى المصحات في بلاد بعيده..
لما سافر بيها بوها خلاها تاخد ابره مهدئة غصب عنها مفعولها استمر طول ساعات السفر وبعد ماوصلوا رجعت لفاتن نوبه البكاء والصراخ وبوها رفعها طول لأحدى المصحات النفسيه..
بالنسبة ليه كان هدا الحل الوحيد بش يخلي بنته تنسى ولدها..
بوها اللي من يومه طبعه اناني ومصالحه فوق كل شي قربها من مختار بش يقعد تحت يده لكن مختار كان عكس توقعاته تماما وبرغم انه طلق بنته لكن قعد محافظ ع علاقته بيه
وحتى توا مش مستعد يخسرها ولايقدر يخش في مواجهه مع معاه لهذا نفد ماعطاه من اوامر حرفيا..
《عطيت بنتك الف فرصه وتغاضيت عن كل غلطه دارتها في حقي لعند ماقرب رصيدها يتم وانت عارفني كويس اللي يخلص عندي رصيده من الفرص يحكم ع نفسه بنهايه ماتسرش..
اني حنحاول ندير اعتبار للعشرة ونقولك خودها واطلع بيها برا البلاد وخليها تنسى انها تزوجتني ودارت مني صغار》
🍃هو توا واقف قدام الحجرة متاعها يسمع في صوت بكاها اللي بدي يهدا ودموعها تنزل بعدين قال بألم..
/سامحيني بابنتي سامحيني..
🍃🍃🍃🍃
الساعه 10:30ليلا..
رافعه بنتها اللي كان راقده في حضنها طلعت بيها من الصاله لدار المعيشه..
لما وصلت لدار المعيشه وخشتلها تفاجئت بصواني الحنه وانواع لصقة الحنه ضحكت وقالت..
/هدا شنو؟
غرفه:حطي جنونه وتعالي هيا..
ضحكت طوبى وهي تحط في جنه ع فراشها غطتها بعدين مشت لغرفه وهي تشوف لسدره كيف قعمزت ومدت رجليها..
وصلت في فراشها وقعمزت وهي تقول بضحكه..
/امتى درتوه هدا كله؟
غرفه؛وانتي تقري في طالباتك القرآن..
اريج بإبتسامه:وصتني ع الحنة واني طالعة الصبح..
غرفه:انتي مازلتي عروسه..وسدرة ماحنتش حنة عرايس بكل وعاد رجالتكم ليهم ايام بعاد عليكم خل وين يروحوا يلقوا مايسر قلوبهم وخواطرهم..
طوبى بضحكه:مافيش منك..
غرفه بإبتسامه غرور..
/عارفه..
سدرة:صار هكي يارتيله انتي مافيش منها!
طوبى بضحكه:زي ماانتي مافيش منك..
فردوس:اللي يغلبها هالرتيله يجي يحاسبني..
ضحكوا وغرفه تقول..
/تي هيا اختاروا معاش في وقت..
طوبى شافت للصقه وقالت..
/في شن خاطرك سدرة!؟
سدرة؛وينها اللي عجباتك انتي!؟
تأففت غرفه وخدتهم وحده حطتها قدام فردوس ووحده خدتها هي وقالت..
/هيا ابدي لصقي فردوس..
طوبى:ع فكرة هي هادي اللي عجبتني..
سدرة بضحكه:والله حتى اني حطيت عي.ني ع اللي قدامي..
ضحكوا كلهم..
🌼وبدت غرفه تلصق لطوبى وتحني فيها وفردوس واريج تلاقوا ع سدرة لصقة وحنه..
فردوس وهي تحني غنت بصوت هادي..
/الليلة ليلة حنايات وغدوة عند الغالي تبات..
طوبى ابتسمت بخجل شديد وغرفه تشوفلها وهي تضحك..
اما سدرة فكانت تشوف لفردوس وهي ماطة شفايفها للأسفل وتضحك..
☘وقعدت فردوس كل مرة تحدف شتاوة وغرفه تساعد فيها..
طوبى تسمع وتضحك وقلبها طاير طيران اما سدرة مرة تضحك ومرة تتسهوك..
واريج تمرر في نظرها عليهم وهي تتخيل في يوم حنتها كيف بيكون..
☘وفي عز هالاجواء الحلوة كانت سدرة تتأمل في غرفه وتفكر في التغيير الجذري اللي طرأ ع شخصيتها وكانت فرحانه بيها ع الآخر وفرحانه بالعلاقة الحلوة اللي ولت تربطها بطوبى علاقه اقوى من علاقة الاخوه..غصبا عنها قارنت اليوم بالأمس البعيد وزادت حبت اختها غرفه اللي قدرت تتغلب ع عيوبها وتبدلها بمزايا خلوها جميله جدا من برا ومن داخل وهني فهمت علاش طوبى وقفت معاها ودعمتها في مشكلتها مع زوجها السابق وكانت ديما مؤمنة بيها وشايفتها بنظرة مختلفه عن الجميع..☘
🍃🍃🍃🍃
بعد ماصلت الفجر وقرت وردها اليومي..
طلعت قعمزت تحت شجرة الياسمين وهي تسبح..
بعد كملت ورد التسبيح مباشرة جتها رساله قصيرة ع هاتفها فتحتها طول..
(مع العشرة بإذن الله نكون عندك وتي روحك بنعدوا شور الخمس ع طول)
ضحكت بفرح وناضت ومشت خشت داخل..
🌼🌼
في الدار..
فتحت الدولاب"الخزانه" وطلعت منها اكياس فيهم ملابس جديده..
كانت فساتين جديده ربيعيه وصيفيه ناعمه وبسيطه وراقيه في نفس الوقت..
واغلب الفساتين خدت لجنة زيهم مايناسب عمرها وحجمها..
وفي كيس كان فيه ملابس ليه هو زوز قمصان وبنطلونات بالألوان اللي يحبهم وخدتله بوت وسبيدرو"بوت رياضة"..
طلعتهم كلهم من الاكياس وحطتهم في مكان بعض الملابس اللي جابتهم معاها في الشنطه..
بعد ماكملت..اتصلت بنسرين خدت اذن ليها ولجنه بعدين دارت الفطور..
وماإن جت الساعة تسعه صباحا الا وكانوا غرفه وصغارها واريج طالعين من الحوش وماقعدش الا فردوس اللي خشت بدوش وهي توصي فيهم ع مئاب وجنه..
🌼سدرة؛خليهم يلعبوا هني مايصيرلهم شي وخلينا حني نطلعوا للجنان بش نشمس هالخنفورة..
طوبى بضحكه:تشربي قهوة؟
هزت راسها بالموافقه...
مشت طوبى طول للكوجينه وسدرة طلعت قعمزت في الجنان بولدها..
🍃🍃🍃
وغرفه في الكليه مقعمزة مع صديقاتها تحت المظله..
هي تحكي وهما يسمعولها..
بحيرة قالت..
/شن تشوروا عليا..
=كلام اختك صح وهدا الواقع ياغرفه وقتنا هدا صعب هلبه..
=ومدام حصلتي راجل يبيك بصغارك ماضيعيشي عليك..
=الحق ياصبايا عدنان هدا شخصيه ويهبل وطالع ع روفي من غادي..
=شوقتوني نشوفه..
غرفه:مش هدا المهم...المهم توا تقولوا نعطي الموضوع فرصه!
=ايه زي ماقالتلك اختك قعمزي مرة واتنين وتلاته ولو تقبلتيه عرفي صغارك عليه وشوفي كان تقبلوه ماغير توكلي ع الله وخلاص..
هزت غرفه راسها بصمت وهي تفكر...
🍃🍃🍃🍃🍃 مقعمزات في الجنان وقدامهم سفرة القهوة المنثور حواليها الفل وكل وحده شاده فنجان..
سدرة تشرب وتتأمل في الجنان بعدين شافت لطوبى لقتها تشوف للتليفون قالتلها..
/خلاص معاش متحمله تقعمزي معاي خمسه دقايق!
قامت عيونها فيها وقالت بصدمه..
/اني!! حرام عليك!
سدرة بزعل:واضح يابنتي واضح تراجي امتى يتصل ويقولك وتي روحك..
هي بصدمه مصطنعه قالت..
/اني!!؟
قالتلها بتهكم:لااني..ع العموم ياحنه سلامتك ماعندي ماندير كان عطيتي لغيري مكاني..
شهقت وقالت..
/شني!! تي من يقدر ياخد مكانك انت ياحبي الاول والاخير.
شافتلها بطرف عينها ونظراتها نظرات زعل وغيرة..
فجأه جاها اتصال..
قامت تليفونها وارتسمت ع وجهها ابتسامه حلوة بالمرة..
فتحت الخط وردت بإبتسامه خجوله..
/صباح الخيرات..
"ياصباح العسل والحلويات..وتوا رواحكم قريب نوصل"
ناضت وهي تقول بإستعجال..
/هيا هي..
ومشت تجري وخشت داخل وهي معاها بعيونها بعدين ضحكت وقالت..
/هبلها ماخلا فيها عقل..رجعت ضحكت مرة تانيه وقالت..هدا الحب...
شافت لولدها لقاته يشوفلها وهو عاقد حواجبه عقدت حواجبها حتى هي وقالت..
/بوك بيجي العشيه..نتغدوا هني وبعدين نروحوا ونراجوه في حوشنا باهي!؟
ابتسملها ضحكت من قلبها بعدين قرصاته من خدها قرصه خفيفه وقالت..
/سلملي هالخنيفيرة..
🍁🍁🍁🍁
ويخش عبد القيوم لشارع القهوة وهدا وين ردت فيه الروح قلبه كان يدق بقوة من الشوق يراجي امتى يشوفوها عيونه وتجيه..
درس قدام الباب مباشرة واتصل بيها ماردتش عليه لكن بعد ثواني طلعت بجنة وهي رافعه في يدها شنطة..
لما شافها ابتسم ابتسامه حلوة باين فيها الفرح والشوق..
فتح الباب ونزل وهي غير بان عليها حتى من عيونها ضحكوا..
"حوباادة!"
وتجيه جنة تجري بعد نادت بإسمه المميز وتلقاها ورفعها لحضنه..
قالتله..
/شاحشتك..
ضحك من قلبه وضمها وهو يقول..
/حتى نا توحشتك موت..
مشي بيها لأمها فتحلها الباب بعدين خدي منها الشنطه..
قلب طوبى بيفر فران ركبت وهي تكتم في تنهيداتها..
وهو ركب جنة من الخلف وحط الشنطه بعدين سكر الباب ومشي ركب وتحرك طول بالسيارة..
وهالمشهد اللي صار شافوه عيون عمر وهو واقف في روشن دارهم القديمه..كان متأسف جدا وخاطره موجوع..
********
عمر بضيق:عارف حقها تعيش حياتها وربي يهنيها بس اللي قهرني في اللي صاير كله حال بنت خوي..
نفيسه بأسف: فعلا هي اكبر ضحيه لهالزواج..
تنهد بعدين قال..
/تصدقي توا بس عرفت ان ربي رادلي خير لما ماكتبليش يكون عندي صغار في المرتين اللي تزوجت فيهم..معترف انه عاقبني لكن في نفس الوقت رحمني..
نفيسه بإبتسامه:الحمد لله ع كل حال..
شاف لبطنها بعدين قال..
/الحمد لله اللي كتبلي تكوني انتي ام صغاري..
ابتسمت بخجل وهو خداها لقلبه بعدين مسح بيده ع راسها ومازال يفكر بألم في حال خوه وبنت خوه..
🍃🍃🍃🍃
في طريقهم لجنة حبهم الكبير..
هو ضرب ع يدها بأطراف اصابعه ضحكت لما فهمت انه يبيها تحول القفاز..حولاته وهو من ورا النظارات شاف ليدها وبدت ع وجهه ملامح ابتسامة الدهشه..شدها بقوة وقال..
/ااه ياقلبي..حط يدها ع مكان قلبه وقال..حسيتي!!
قلبه كان يدق بقوة وقلبها تفاعل معاه بقوة..
تنهد بعمق بعدين نزل يدها وشبك اصابعه بأصابعها وهو يقول بشي من الانفعال
/نحبك..نحبك..نحبك..نموت عليك موت..
وهي تسمع فيه وتضحك..
وتخترق جنة لحظات الحب هادي لما قالت..
/حبك مامي..حبيبي..lLove you
ضحك عبد القيوم من قلبه وطوبى تقول لبنتها وهي تضحك..
/ILove you too mush ياقلبي انتي..
عبد القيوم:ونحنا من هلنا!!!
جنه ضيقت عيونها وقالت..
/شنو!؟
ضحكوا عليها عبد القيوم وطوبى من قلوبهم...
☘واستمرت حكاويهم طول الطريق..
هو كان يحكي عن رحلة المرواح شن صارله فيها وشن دار ويحكي ع الاجواء والاوضاع في المناطق اللي مر بيها
وهي اللي كانت منصتة تمام الانصات تتفاعل معاه وتبادل فيه الحديث مرة بسؤال ومرة بتعليق وفي عز هدرزتهم جنة خداها النوم وراحت فيه..
🍁طوبى:وتفاهموا كلهم يرمضنوا مع بعض في حوش العيله..
قاللها:حلو..ونحنا كل يومين ثلاثه نعدوا نسهروا غادي رمضان في شارع القهوة غير..
طوبى بإبتسامه:صح..
شد يدها بقوة وقال..
/طبعا ياقلبي في رمضان بنعزموا ويعزمونا .
وهي مبتسمه قالت..
/عارفه حبيبي..
ضحك وقال..
/انا اللي مش عارف..هذى اول رمضان ليا وانا متزوج مش عارف كيف النظام بيكون! انتي اكيد في بالك نظام معين.
قالتله:ماتفكر في شي حبيبي خلي كل شي شوري..
ضحك بعدين رفع يدها وباسها وقال..
/سمحة الحنة هذي..
طوبى بضحكه:عاد انت تحبها هكي مزخرفه ع قولتك..
ابتسم بعدين نزل مرش"زجاج" الروشن من جيهتها وقال..
/ملي عيونك بالجمال ملي وتنفسي الهوا اللي يرد الروح..
شافت للروشن بعدين طلقت يده وقربت منه طلعت راسها شويه وقعدت تتفرج ع مناظر الخضرة اللي تفتح النفس ع الحياة..
الطريق كانت خاليه وهي مستمتعه جدا بالاجواء وهو كان يشوفلها مرة مرة بنظرات كلها حب وغرام وقلبه مليان شوق ماله حد..
🍁🍁
واخيرا وصلوا للخمس اللي من اول ماخشوها ومشاعر الراحة والسعاده غامرة طوبى..
خدوا ع طريقهم غدي وكملوا طريقهم للمزرعة..
وياجمالها في الربيع كانت زاهيه بكل الألوان وطوبى من اول ماخشولها وهي تمرر في نظرها عليها وتقول وتعاود..
"الله يبارك..الله يبارك..الله يبارك"
🍁🍁
بعد ماخشوا للحوش..
طوبى حطت جنه ع سريرها في الدار اللي كانت فيها قبل..
بعدين طلعت للحمام توضت لصلاة الظهر..
وعبد القيوم قاعد برا يدور ع المزرعة ويشوف في اوضاعها لعند ماقرب يأذن الظهر طلع طول للجامع..
🌼🌼
بعد الصلاة لبست طوبى فستان ربيعي لونه سماوي موديله حلو بالمرة..وضفرت "جدلت" شعرها سبوله وحطت زينه ع وجهها وتعطرت وطلعت بش تجهز الغدي..
وهي فالكوجينه تسخن فالغدي حست بدوخه خلتها تقعمز ع الكرسي..قعدت تردد في سورة الفلق مرارا وتكرارا لعند ماتبدد الشعور بالدوخه ورجعت نشطت مرة تانيه خدت نفس عميق وناضت ورجعت تكمل في تجهيز الغدي وهي تردد في الحوقله..
🍁ويروح عبد القيوم من الجامع وهو حاس بالنوم بادي يسيطر عليه وهالشي طبيعي بسبب طول مدة السفر وقلة النوم..
وين خش الحوش وفات من قدام الكوجينه وقف في مكانه متسمر وهو يشوفلها وقلبه قريب يطلع من صدره..
وهي ابتسمت خجلا من نظراته بعدين قالت..
/هي تعالى تغدا..
🍁وشوفة جمالها اللي ديما يسلب فعقله نساه النوم والتعب ومايجي منهم..
🌼ولا يحرمني الله قربك إنه
مرادي من الدنيا وحظي وسؤددي🌼
🍃🍃🍃🍃
الساعه 6:30بعد العصر..
ركبوا فردوس وغرفه للسيارة بعد ماحطوا البضاعة اللي شروها من ماعين"اواني" ومواد غذائيه..
وتحركت غرفه طول وهي تقول..
/مش متحمله نخش الحوش وطوبى مش فيه..
فردوس:والله بكري هكي صارلي طلعت من الحمام مالقيتهاش هي وبنتها حسيت الحوش فضي..
تنهدت غرفه وقالت..
/تعرفي بعد فكرت هلبه في كلامها عن موضوع الزواج بشكل عام حسيت روحي اقتنعت بيه ونبي نعطي عدنان فرصه..
ابتسمت فردوس وقالت..
/عين العقل وخيتي وربي يقدملك اللي فيه الخير..
خدت نفس وقالت..
/يارب...
🍃🍃🍃🍃
"شن رايك"
هدا حسين يكلم في اخته اميمه سكايب ويوري فيها انسيال الماس ناوي يهديه لغرفه في يوم ذكري ميلادها اللي حيكون في منتصف شهر ابريل..
"فضيع فضيع فضيع..قداش حطيت فيه هدا!!"
عقد حواجبه وقال..
/من امتى تهتمي للحاجات هادي انتي!؟
ضحكت وقالت..
"مش قصدي لكن اول مرة نشوف حاجة ثقيله زي هادي.."
قاللها؛باهي خليني من الدوة الفاضيه هادي وقوليلي تعجبها؟.
"من ناحية تعجبها حتعجبها هلبه لكن مانقولكش انها ممكن تقبلها منك"
حسين بإنزعاج؛فكيني من النكد يااميمه تربحي..
بضحكه قالت..
"باهي اسفه..المهم انت اعرف كيف تهديهالها تمام وزي ماوصيتك قبل ماتتهورش وماتستعجل ع شي"
زفر بعدين هز راسه بصمت وفي داخله حاس بشعور سيء مخليه مش مرتاح...
