#طوبى "جنة طوبى"
#جمان_فريد
#الجزء_الثالث_والثمانين "حرب باردة/ستار حديدي 5"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء 🌼
وانت بتدعي خليك طماع، ايوا طماع، إدعي بـ كُل
حاجه نفسك فيها، انسي المنطق وانت بتدعي
ومتشغلش بالك ازاي الدعوه دي هتحقق، النبي
بيقول"إذا تمنى أحدكم فليستكثر فإنما يسأل ربه"
سيدنا موسى طلب من ربنا 7 حاجات مره واحده
وكان الرد ساعتها "قَالَ قَدْ أُوتِيتَ سُؤْلَكَ يَا مُوسَىٰ"
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 وإنني أبذل جهدًا ذهنيًا هائلاً كل يوم، حتى أمنع نفسي من الانهيار وإفساد كل شيء🍃
________________________________________
بعد العصر...
كانت فردوس تبخر في الحوش ..
بعد مابخرته كله ولت للصاله حطت البخاره فيها وجت بتولي للكوجينه..
سمعت باب الحوش دق قالت تسائلا..
/زعمه هي؟
حطت شاربتها ع راسها ومشت طلعت..
ومن دار المعيشه طلعوا عمتها واختها غرفه وهما يهدرزوا..
غرفه؛والله بعد نقان قال باهي صح تركيا مشيتلها قبل لكن المكان اللي بيرفعني ليه غادي اول مرة نمشوله..
مطيره:المهم تغيروا جو..
غرفه:قالتلك سميره حتى هما ماشيين؟
مطيره:من فترة قالتلي مرات نسافر لتركيا واليوم اكدتلي..
وين وصلوا في الصاله شافوا فردوس خاشه ومعاه مراة تبان من عمر مطيره..انيقه ومظهرها راقي جدا وع وجهها ابتسامه حلوة بالمرة..
الزوز ابتسموا..ومشوا يرحبوا بيها...
~~~~~~~~~
أم عزيز؛سامحوني تعبتكم معاي..
فردوس:اياه شن تقولي مافي شي من قدرك..
ابتسمت وقالت؛بارك الله فيك..تنهدت وقالت..خل نخش في الموضوع اللي جايه ع خاطره..
التلاته كانوا يشوفولها بإبتسامه ويستنوا تكمل كلامها..
أم عزيز؛اني عندي ولد وحيد طلعت بيه من الدنيا زي مايقولوا تعبت عليه وربيته احسن تربيه والحمد لله قري وتخرج وخدم وربك ناعم عليه وعلينا..وزيي زي أي ام نبي نفرح بولدي..وولدي هدا من لما شاف بنتك وهو قال ياهي يايسكري ع موضوع الزواج يام..
ابتسموا لما سمعوا شن قالت..
ام عزيز:نبيك تعرفي ياام آلاء ان بنتك لو ولت من نصيب ولدي حتعيش احسن واحلا عيشه وحتعرف ان ربي يحبها ويبيلها الخير..مش تقولوا تشكر في ولدها لكن هدا الحق وربي يشهد ع كل كلمة نقول فيها ويحاسبني عليها يوم الدين ..وبصراحه اكثر اني شفت بنتك وتكلمنا شويه والبنت عجبتني هلبه وخشت خاطري زي ماخشت خاطر ولدي ونتمنى من ربي يصير بينهم نصيب..
فردوس كانت فرحانه باللي تسمع فيه وارتاحت هلبه لأم عزيز وتفائلت بالموضوع خير..
ام عزيز:شن قولك ياأم آلاء؟
شبحولها عمتها واختها..
وهي قالت؛قبلها نبي نسأل مواليد كم هو؟
ام عزيز:87..
فردوس هزت راسها وقالت..
/امم..هو الرأي الاول والاخير للبنت اني نفتح معاها الموضوع واللي فيه الخيره يجيبه ربي..
ام عزيز؛إن شاء الله..ع فكرة هو معرفة خوك مختار زيدوا اسألوه عنه..
غرفه هني عرفاته طول آلاء حكت عنه قبل..
لكن فردوس بعد ماانجابت سيرة مختار الارتياح انقلب لقلق غصب عنها خافت..
زي ماخافت مطيره حتى هي..
فردوس ابتسمت مجامله وهزت راسها وهي تقول..
/إن شاء الله خير...
🍃وهدا كله وطوبى في الدار راقده هي وبنتها...
🍃🍃🍃🍃🍃🍃
حطت سفرة الشاهي الاخضر وخبزة الطاجين قدام عزوزتها وقعمزت..
نجمة:عطيك الصحه بنتي..
سميرة بإبتسامه؛سلمك...
نجمة؛بيجوا الولاد يتعشوا هني ولا؟
سميرة؛ايه..
ومدت لعزوزتها طاسة الشاهي مع الخبزة..
ع خشة عبد الفتاح..
مشي قعمز جنب مرته وقال..
/ترا هاتي..
سميره ماكانتش حاسباته بس تحشمت قدام امه وعطاته طاستها ومعاها خبزة..
ونجمة مركزة معاهم..
عبد الفتاح بعد ماكلي من الخبزة قال..
/عطيك الصحه..
هي يدوب ابتسمت وقالت؛سلمك..
هو قال:مافي حد يعرف يديرها زيها..سبحان الله الحاجه اللي تحط يدها فيها غير..
هي انحرجت..
ونجمه بإبتسامه؛صدقت..
ابتسمت بإحراج وقالت..
/تسلمي يارب..
عبد الفتاح ابتسم وقال..
/شني يام تحسي في روحك احسن؟
نجمه:باهي خير من قبل..لكن بالي عند اختك عواطف..
الزوز شبحولها بإنتباه..
نجمة بقلق:ديروا طلة ع وخيتكم ماتخلوهاش بروحها..
عبد الفتاح؛في حاجه يام؟
نجمه:لا ياولدي والله مافي حاجه لكن اختك عواطف بعيده مش زي نجاح قريبه وكل اسبوع نشوف فيها..
سميره شبحتله وقالت..
/عندها حق..
هو شاف لسميره شويه بعدين شبح لأمه وقال..
/حاضر نفضي روحي الخميس ونمشوا اني وسميره..
هي فنصت عيونها بفجعه وقالت..
/لالا..القرايه باديه مانقدرش نخلي الولاد..
هو قال:الخميس قلت..خميس وجمعه والسبت نروحوا..
سميره بإرتباك؛لاعلاش نقعدوا هدا كله خميس وجمعه نروحوا..
نجمه؛صح ماثقلش ع الناس..
هو شاف لسميره وقال..
/حاضر..وشرب الشاهي..
وهي هربت بعيونها عنه وكانت بدوب من الخجل..
وامه دايره روحها مش منتبهه وعاجبها هلبه اللي قاعد يصير..
🍃🍃🍃🍃🍃
بعد المغرب..
مروحين من الجامع وهما يحكوا في موضوع مهم..
عبد القيوم:خلي الحكايه عليا نعرف شن ندير..
علي بضيق؛تعرف ياولدي نحس في حكاية المطحن تمت خلاص..
عبد القيوم؛ماتقولش هكي ياحاج تنحل ان شاء الله وكل الامر لله ومن بعده خليها عليا..
علي هز راسه وهو ساكت...
فاتوا الزوز من قدام الحلاق التونسي..
وقف علي وقال؛سمعت بيه قال بيروح..
عبد القيوم هز راسه وقال؛ايه..
ع طلعة فراس لما شافهم ابتسم وقال..
/اهلا وسهلا..
هما ابتسموا وردوا..
"اهلا..اهلا بيك"
علي؛خلاص بتخلينا؟
فراس بإبتسامه اسف..
/خلاص..الظروف حكمت ياعمي..معاش نجم نخلي عيلتي اكثر من هكي..
عبد القيوم؛عندك حق..
علي هز راسه وقال:ان شاء الله تتوفق وين ماتكون..
فراس:امين..بارك الله فيك..
علي مرر نظره عليهم وقال..
/تصبحوا ع خير..
الزوز ردوا بأصوات متقطعه..
"وانت من اهله..قدامك كل خير"
ولف ومشي لحوشه..
بعد ماتباعد قرب فراس من عبد القيوم وقال.
/الامور كلها تجي في صالحو..
عبد القيوم مرر نظره جنبه بعدين قال..
/المهم انت امورك تمام؟
فهم فراس ان عبد القيوم مايبيش يتكلم في الموضوع ابتسم وقال..
/الحمد لله تمام..غدوة السفر..
ابتسم عبد القيوم وحضن فراس..
وفراس ضمه وهو مبتسم..
🍃وبعيد عنهم في المصور..
كان سامي ياخد في صورة شمسية لواحد من سكان الشارع..
سامي:ابتسم ابتسامه خفيفه..
الراجل ابتسم..وسامي خداله الصورة...
شويه وطلع الراجل...وبعد ماطلع جي لسامي اتصال..
مشي لتليفونه خداه من ع الطاوله..
فتح الخط ورد...
سامي:السلام عليكم.......الحمد لله انت شن اخبارك.....والله تعرفت عليه وشفت شغله بصراحه فوق الابداع.....لامازال مافتحتش معاه موضوع المعرض....ان شاء الله حنفتحه اليومين هادم.........تمام نتلاقوا....السلام عليكم...
ونهي المكالمه...حط تليفونه في مكانه ورجع لهي بشغله...
🍃🍃🍃🍃🍃
"غدوة الصبح متسقدين"
آلاء:سعدودكم بتغيروا جو ووجوه..
غرفه؛والله قبل خاطري نرفعك معاي..
آلاء بضيق:امي وقفت فيها ربي يسامحها وخلاص..
غرفه قعدت تشوفلها وتفكر تقوللها ع جية ام عزيز بس تراجعت وخلت هالمهمه لفردوس..
☘اللي كانت تتكلم في نفس الموضوع مع طوبى وأريج في الكوجينه..
اريج:الحق هو قبل كلمها بروحه وهي رفضت..
طوبى وهي تسمع فيها تفكرت كلام مختار عن نفس الموضوع..
فردوس بقلق:اني ارتحت للموضوع في البدايه بس لما قالت انه يعرف مختار خفت..
طوبى:باهي نسألوا عليه قبل بعدين نفتحوا معاه الموضوع..
فردوس:ومن بيسأل عليه؟
طوبى:خالي نقولوا لخالي يسأل عليه..
اريج؛صح..بعدين افتحي الموضوع مع آلاء..
فردوس بتردد؛يعني نكلمه خالي؟
اريج:ايه ماما اتصلي بيه توا واحكيله اكيد المراه حتفوت يومين وتتصل..
طوبى:صح..
هزت فردوس راسها بالموافقه بعدين خدت تليفونها ومشت طلعت من حداهم...
اريج؛اني حاستها بترفض في كل الحالات..
طوبى بحزن:عرس مهند الاسبوع هدا..
سكتت اريج وهي مضايقه...
🍀🍀🍀🍀🍀
وتعدي ايام هالاسبوع...
وعرس مهند كانت ليه تغطيه اعلاميه صور وفيديوهات تنزل عنه وبإعتباره اعلامي مشهور كانت اغلب الصفحات تحكي عليه..
والاء تتفرج وهي مقهورة....نفسيتها تعبت هلبه مابتش تطلع من الحوش بكل..
وكل اللي حواليها عارفين خيرها..
وامها وقتها تمنت لو يطلع عزيز راجل كويس..
وربي حققلها ماتتمنى بعد ماسأل عنه المحجوب وعرف عنه مايشجع هلبه ع الموافقه..
وفردوس فرحت وقررت تفتح معاها الموضوع..
🍃في نفس الوقت..
كان التارقي يدور ورا مطحن الامبراطور ويبي يعرف من صاحبه وعلاش يحارب في مطحنهم حرب تخطت حدود المنافسه الشريفه...
والبحث مازال مستمر على مايوصل في معلومه تفيده..
وخلال هالفترة معاش حصله سامي بش يفتح معاه موضوع المعرض....
🍃اما عواطف..
بعد ماطلعت كوثر من المستشفى روح الشارف..
وكلهم اجتمعوا في حوش بوه وصار بينهم نقاش حاد..
جبره بوه وقتها انه يروح ويقعد في البلاد ويأدي حق عواطف عليه زي مايأدي في حق مرته الاولى..
وهو كان مضايق من عواطف اللي لما عرض عليها انه يطلقها رفضت وخلتهم يفرضوها عليه فرض...
والمتوقع من عواطف انها ترفض الطلاق...وضعها صعب جدا ولو طلع للناس اللي صار معاها حتنحط في موقف الهبله المضحوك عليها ولسانات الناس ماترحم...
وماكانتش عارفه وقتها ان كلام الناس عنها قد مايكون مؤذي مش حيكون اصعب من اللي حتعيشه بعدين...
🍃ويجي يوم الخميس..
ويرفع عبد الفتاح سميره للمدينه اللي قاعده فيها عواطف...
وطول الطريق وهو يحاول يلين قلب سميره عليه وهي تجاهل تام..يدوب ترد عليه بكلمة ولاكلمتين...
لين وصلوا للمدينه..وفاجئوا الشارف واهله وعواطف بجيتهم...
ومع هذا استقبلوهم استقبال كويس ورحبوا بيهم احسن ترحيب..
🍃🍃🍃🍃🍃🍃
"لا"
فردوس:وعلاش طول لا هكي!؟ اعطي نفسك وقت وفكري..
الاء بضيق:مانبيش ياماما مانبيش تزوج توا نبي نكمل قرايتي..
فردوس:مش عذر هدا قتلك هو ماعنداش مشكله مع قرايتك..
الاء بإنزعاج؛قتلك مانبيش الزواج كله ع بعضه مانبيشي..
فردوس: ماكانش هدا رايك قبل شن غيره توا!؟
نزلوا دموع الاء وهي تقول برجاء..
/بالله ياماما ماتضغطيش عليا تربحي..
ومشت وخلتها..وامها معاها بعيونها اللي كانت نظراتها كلها ضيق وحزن..
🍃والاء خشت للدار وسكرتها عليها وقعدت تبكي..
قامت تليفونها وخشت ع الفيس وطلع قدامها منشور فيديو لمهند وهو في الحلاق مع صحابه يتجهز لحفلة زواجه..
كانت تتفرج عليه بقهرة وهي تبكي بألم...
☘وهو كان عايش فرحته ومش مفكر في شي تاني غير حياته الجديده اللي حيعيشها مع آرام..
لكن بوه إياد..كان مجبور يفرح لولده..علاش مجبور!؟
لأنه في شي فداخله كان يحسس فيه ان ولده استعجل هلبه وكل اللي عاشه مع آرام لليوم كله كان تحت تأثير التخدير..
خدر نفسه بعلاقته مع آرام بش ينسى آلاء..ومن قلبه كان متمني يطلع احساسه كله وهم...
🍃🍃🍃🍃🍃
"ماما"
فايزة فتحت باب دار النوم وطلعت وهي تقول..
/نعم؟
مروة؛توا كلمتني مناسك قالت خوها لقي باص السواق متاعه راجل كبير في العمر شويه حتى بوها يعرفه..
فايزة بإبتسامه؛خوها مالك..
وجه مروة احمر وهي تقول..
/ايه..
فايزة؛كان مالك اللي جابه خلاص..
شدت مروة ابتسامتها بقوة..
وامها مشت بإتجاه بالكوجينه..
فجأه دق باب الشقه..
فايزة من الكوجينه قالت..
"اكيد خالتك نسرين"
مروة مشت طول للباب..
وفتحاته من غير ماتسأل..وتشوف قدامها اللي خلا ملامح الدهشة مع الخوف ترتسم ع وجهها...
🍃في الشارع..
تحديدا عند قهوة نضال..
اللي كان مقعمز مع ولد خوه والزوز يشوفوا لحوش سدرة..
ع جية المهدي كان متوجه للمطحن..
وقفه نضال لما ناداه..
المهدي:شني؟..
اشرله نضال يقرب..
هو مشالهم لين وصل فيهم..
نضال؛شفت واحد من ولاد المحجوب خاش للحوش هداكا..
واشر لحوش سدره..
التفت المهدي وشاف لحوش سدرة بعدين رجع نظره لخوه وقاله..
/جاي بروحه؟
نضال:ايه..ان شاء الله خير..
محمد المهدي:نحس فيك تبالغ هلبه عمهم وجاي يشوفهم..
نضال بإمتعاض:عم الهدود...مافيش واحد فيهم راجل بعد موت خوهم..
المهدي رجع يشوف لحوش سدرة..بعدين مشي للمطحن وقعمز قدامه وعيونه قعدوا مع الحوش..
~~~~~~~~
واقفين في سقيفة الشقه وهي تقول بحده..
فايزة:شن عندك جاي!؟ شن تبي؟
سلفها يقول:غير وسعي بالك راك تنسي اني عم بناويتك..
هي تهكما قالت..
/ياريت نقدر ننسى زي ماانتوا نسيتوا..
هو تجاهل كلامها وقال؛نبيك في موضوع يخصهم..
هي بخوف:شن تبي!؟
هو قال؛نخش داخل وندويلك..
فايزة:وين تخش وين!؟
هو تنهد بملل بعدين قال..
/بضيعيلي وقتي واني ماعنديش وقت نضيعه معاك..اسمعي..
🍃صفاء ومروة وتاله كانوا واقفات قراب من السقيفه ويسمعوا في حديثهم بخوف..
وامهم خايفه اكثر منهم وهي تراجي فيه يقول شن يبي..
:بناتك كبروا خلاص ويبوا السترة والمراة في الاول والاخير مالهاش إلا حوشها..
رفعت فايزة حاجبها وهي تشوفلها بحده..
:في واحد طلب مني صفاء..
☘صفاء عقدت حواجبها بغضب وخواتها يشوفولها بقلق..
فايزة ابتسمت تهكم وقالت..
/صفاء مخطوبه..
هو بصدمه قال..
/كيف!؟
قعدت فايزة تشوفله بإبتسامه ساخره وهي ساكته..
؛تطلعي تكذبي بش نفوت الموضوع تعبي في روحك ع الفاضي حتى كان طلعت مخطوبه حق مروة مش صغيره..
مروة رعشت من الخوف..
صفاء شدتلها يدها..وتاله تشوفلها بخوف..
☘فايزة بنظرات غضب وخوف في نفس الوقت..
/مانبيش نعطيها توا بنتي واني حرة فيها..
هو قال؛هادي بنتنا مش بنتك انتي..حني بس اللي نحكموا فيها تتزوج ولالا..
فايزة بغضب:بأي حق!!؟ حضانة بناتي ليا واني بس اللي نقدر نحكم فيهم وفي حياتهم..
هو بتهكم؛لاحضانة لاعينك لو نبوا ناخدوهم ناخدوهم غصب عنك وعن كل حد..
☘هني صفاء وصلت لأقصى مراحل الغضب..
رخت اختها ومشت طلعتله..
خواتها انصدموا وخافوا ولحقوها طول..
صفاء وهي مندفعة لعمها بغضب..
/كيف بتاخدنا قولي!؟ من بيخليك تاخدنا!!؟
فايزة بخوف:صفاء!
صفاء بعصبيه؛شويه ياماما بالله عليك..انت منو اللي جاي تحكم فينا وتحدد مصيرنا لااني ولاخواتي نعرفوك ولامعترفين بيك.
عمها بغضب:ضمي فمك ياقليلة الربايه ياحقيره..
هي قالت؛اني مربيه احسن تربيه والناس كلها تشهد تربيت واني مانعرفكمش ولانبي نعرفكم امشي اطلع اقلب وجهك..
فايزة خافت هلبه ع بنتها جتها وقعدت دف فيها بش دخلها..
وهو يقول بوعيد..
/تو تشوفي ياكلبة تو تشوفي كيف نحاسبك ..
فايزة التفتت شبحتله بخوف..
صفاء:تحاسب مني ومن بيخليك تحاسبني شن تحساب انت ماورانا حد! تي والله غير نمشي نطلع راسي من الروشن ونعيط توا..الشارع كله يجي يطلعوك من هني مقطع ومنتف..
مروة تماسكت وتشجعت بموقف اختها وقالت..
/اني ماشيه ناديهم..ومشت طول..
هو خاف وقتها وقال بتهديد قبل ليطلع..
/تو نوريكم تو نوريكم انتم وامكم يا...واطلق لفظ نابي قبيح...
وفتح الباب وطلع طول..
مشت صفاء وسكرت وراه الباب بقوة وهي تقول بغضب..
/ان شاء الله ماتلحق تروح..
التفتت لما سمعت صوت بكي امها..
كانت فايزة منهارة...هي طول جتها وضمتها وقعدت تمسح ع شعرها وهي تقول..
/خيرك ماما !! والله مايقدر يدير حاجه..
فايزة ببكي:علاش هكي علاش..علاش مايخلوناش في حالنا علاش..
صفاء زادت ضمت امها وهي تقول..
/خليك قويه ماما زي مانعرفك..
ضمت فايزة بنتها بقوة وهي تقول..
/نموت ولاياخدوني منكم..
مروة ودموعها ينزلوا:وحني نموتوا ولانخلوك..
تاله مشت ضمت امها وهي تبكي...
فجأه دق باب الشقه مرة تانيه..
مروة مسحت دموعها ومشت للباب وقالت..
/منو..
"افتحي يامروة"
مروة فتحت الباب..
خشت نسرين وهي رافعه ولدها في حضنها وكانت باديه ع وجهها ملامح الخوف..
سكرت مروة الباب..
ونسرين قدمت لفايزة وقالت..
/شن يبي الكلب هداكا علاش جايي!؟
فايزة تباعدت عن صفاء وهي تقول ببكي..
/بيتسلط علينا يانسرين نحساب روحي افتكيت منهم هالمصايب طلعولي مرة تانيه..
نسرين ودموعها في عيونها قالت..
/شن يبي عطيه مايرفعه!؟
فايزة بنبرة باكيه:ع اساس جايب موضوع زواج للبنات في الاول قال صفاء قتله مخطوبه قال مروة لما قلت لا قالي ناخدهم منك..وقعدت تبكي مرة تانيه..
نسرين بعصبيه:ياخد عينه وعين عينه من بيخليه اصلا..!
وفايزة تبكي وبنتها ضمتها مرة تانيه..
نسرين هزت راسها وقالت:تو نقول للمهدي..وانتي خودي بناتك وبروا لحوش عمي لطفي الله يرحمه..
ومشت طول نسرين فتحت باب الشقه وطلعت..
فايزة تباعدت عن صفاء وهي تقول بخوف..
/ايه صح كلامها..خودوا المهم المهم خل نمشوا نقعدوا غادي لين يندارله حل الحقير هدا..
صفاء؛حاضر..هيا يابنات..
ومشت وخواتها لحقوها..وهي سكرت باب الشقه بعدين خدت نفس ..ومشت خشت داخل..
🍃في جنان حوش لطفي الواعر..
خدت طوبى ملاية صلاة جديده كانت غاسلتها..مشت خشت بيها داخل من جهة الكوجينه للدار..
وبعد خشت للدار...لقت الاء راقدة وعاطيه بالظهر..بدت ع وجهها ملامح الضحك..بعدين مشت حطت ملايتها ع السرير..
وجت لدولابها طلعت منها عطر عود..
مشت بيه للملايه..فتحاته وقعدت تعطر فيها...
بعد ماكلمت...خدت علاقه علقت فيها الملايه وحطت ع الشماعة جنب الملاية العاديه اللي تلبس فيها احيانا لما تطلع لحد..
شويه سمعت صوت جنه فاقت..
ضحكت وقالت؛ناضت فكرونتي..ومشتلها طول..
🌼قعدت تسمع فيها آلاء كيف تهدرز عليها ابتسمت وسط دموعها وانسجمت معاها...لعند ما سمعت صوت دوشه جاي من برا..
التفتت وقالت؛شكله في حد جانا..
طوبى وهي عاقده حواجبها وتسمع هزت راسها بإيجاب..
شويه ناضت ببنتها ومشت بتطلع من الدار..
والاء ناضت مسحت دموعها كويس وطلعت وراها..
🍃في الوقت اللي فيه نسرين مع خوها المهدي في حوشها تحكيله اللي صار مع فايزة..
المهدي بغضب وازدراء..
/تي شن البهايم هادم شن جنسهم شن طينتهم!
نسرين بقلق؛تفكرت اللي صار يام الاحداث خايفه يتعاود يامهدي..
المهدي:لا ان شاء الله مايصير شي تو نتصرف..
ع خشة ربيع عليهم قال بقلق..
/شن صاير!؟..
🍃وفي القهوة..
محمد ونضال بعد ماشافوا فايزة وبناتها خاشين لحوش لطفي الواعر ومعاهم شنطه...
محمد المهدي بقلق..
/شن يبي منهم اللي خوفهم هكي!
نضال بغضب؛كلاب هادم حلاليف..بين عيوني توا اللي داروه ايام الثورة..
محمد قعد ساكت وهو يفكر فيهم بقلق بالغ..
🍃🍃🍃🍃
فردوس بغضب:مالا يحسابها سايبه!
اريج بغل:عمام الهدود والايام السود كلهم زي بعض..
فايزة وهي تبكي..
/كل مانجي نقول ارتحت خلاص يطلعولي زي البلي...
طوبى وهي عاقده حواجبها بغضب..
/والله مايقدروا يديروا حاجه..غير البنات الايام الجايه يقعدوا في الحوش لين يديرولهم حل..
صفاء:كيف! القرايه باديه راهو!..
طوبى؛معليشي حبيبتي كم يوم ماطولوش ان شاء الله..
مروة وتاله قعدوا يبكوا..
وصفاء قعدت شاده دموعها وهي موجوعه..
اريج:الله ياخدهم ويريحكم منهم..
فايزة من وسط قلبها وبرجاء..
/يارب...
الاء بضيق:عليك حظ حتى رؤوف وصاحبه مسافرين..
فايزه وهي ترشف قالت:نسرين قالت بتكلم المهدي..
فردوس:ان شاء الله يدير حل قريب..
وطوبى وهي ساكته كانت تمرر في نظرها ع فايزة وبناتها بحزن..وزادت ضمت بنتها اللي كانت في حضنها..
🍃🍃🍃🍃🍃
فتح باب الفيلا وخش..قال لما لقاها مظلمه..
/شكله عمر مسافر..
مشي طول فتح الاضواء..بعدين ولى سكر الباب...
تنهد ولف ومشي للدروج بالشنطه اللي في يده..
ركب..وين وصل فوق طلع تليفونه من جيب سرواله..
وحط ع رقمها واتصل بيها نادى مرة وحده وانفتح الخط سمعها بنبرة فرح تقول..
"روحت"
الجالي وهو خش دار النوم ابتسم وقال..
/انتي شن رايك؟
قعدت تضحك بفرح ..
هو فتح الضي ومشي حط الشنطه ع السرير وهو يقول..
/وتي روحك جايك بنطلعوا نتعشوا برا..
"جديات!؟"
هو قال:ايه جديات..ساعه ونكون عندك..
"حاضر"
هو قال؛سلام..وسكر..لوح التليفون ع السرير..وحول جاكيته لوحه حتى هو السرير..بعدين مشي للمرايه..
وقف قدامها وقعد يتأمل في نفسه للحظات..بعدين ارتسمت ع وجهه ملامح ابتسامة مكر جانبيه..تنهد تصنعا ولف ومشي للحمام..
🍃🍃🍃🍃🍃
"شنطه قهويه فيها شيتات ووراق"
فردوس:اها ايه تفكرتها في الدار اللي فوق..
طوبى:امم..باهي العشي واتي خلاص؟
فردوس:مازال شويه..
طوبى:مال خل نركب نجيبها ع السريع...
مشت خدت شاربتها من ع الشماعه اللي حدا المدخل لبستها وطلعت من الحوش..
وفردوس ولت للكوجينه...
🍃🍃
وصلت طوبى للدار..خشتلها وفتحت الضي..وبدت دور ع الشنطة..
وحداها الروشن كان مفتوح..
طوبى وهي تشوف للشنطه؛اهيا..
وطلعتها..وقعدت تنفض فيها...شويه وسمعت صوت سيارة تعرفه كويس..
التفتت شافت للروشن لحظات..بعدين قدمتله..
🍃في الشارع..
كان عبد القيوم واقف ع المصور ومعاه سامي يحكوا عن موضوع المعرض..
انتبه عبد القيوم لسيارة الجالي لما خشت ودرست قدام حوش شنيبه..
ربيع وهو مقعمز في القهوه مع محي الدين شافوها وقعدوا معاها بنظرهم...
زي ماكان نضال يتفرج عليها حتى هو..
كان قلق ومترقب..خايف من خوه هلبه..
الجالي معاش همه شي..بدي يدير مافي راسه ومش حاسب حساب حد..
سامي وهو يهدرز ع عبد القيوم لاحظ انه مش منتبه معاه قعد مركز ع اللي مركز عليه التارقي وهو مستغرب..
في هاللحظه...تطلع نجاة من الحوش وهي بكامل اناقتها..
اشرلها الجالي توقف..
هي ابتسمت بإستغراب..
نزل من السيارة ومشي فتحلها الباب..
هي اتفاجئت هلبه..
هو بإبتسامه:هي اركبي..
هي ابتسمت بفرح ومشت ركبت السياره...سكر الباب ومشي ركب هو ومش مداير اي اهتمام للعيون اللي كانت مركزه عليهم..
نجاة:معاش مدور شي!؟
الجالي:علاش ندير في عيب ولا حرام! مرتي شرعا وقانونا وليك حق عليا..
ابتسمت نجاه بحب وهي تشوفله..
هو شغل منظومة السيارة ع الاغنيه الطليانيه اللي تحبها نجاه..
ضحكت...وهو شغل السيارة بعدين علا الصوت وتحرك طول..
والانظار تلحق فيه ماعدا عبد القيوم اللي شاف القدام بنظرات كلها غضب..
وسامي يشوفله بآستغراب..
🍃محي الدين:دار مافي راسه ووصل للي يبيه
ربيع شبحله بإستغراب..
محي الدين؛ليه وقت يبيها من قبل ماياخد بنت واعر غصبوا ع بنت الواعر غصب بش يفوتها..
ربيع؛قداش ليك عارف!؟
محي الدين بإبتسامه تهكم..
/ممكن اني اول من عرف بعيوني ريتهم مع بعض..
عقد ربيع حواجبه بضيق وقعد ساكت..
اما نضال خش للقهوة داخل وهو معصب من تصرفات خوه..
🍃عكس خديجه اللي شافت كل شي من روشن شقتها وعاجبها هلبه اللي صار حتى هي فهديكا اللحظه معاش فرقت معاها نظره الناس خلاص اللي صار صار...كان كل همها ان طوبى تنقهر وبس..
🍃وطوبى فعلا وقتها كانت مقهورة..وكلها غضب..
عيونها يشعوا بنظرات الغضب..تتفكر في كل شي عاشاته وهي مستغفله بيناتهم وقلبها ينحرق حرق ع نفسها وكرامتها الجريحه..
طلعت من الدار...وقعدت تاخد في النفس وطلع فيه..
لعند ماهدي غضب شويه..بعدين رفعت عيونها للسمي بدون ماتتكلم..قلبها هو اللي كان يتكلم..
كان يسأل في خالقه المدد من القوة..يبي يقعد قوي بش هي تكمل في هالحياة قويه مرفوعة الراس..
مافيش وقت لالبكي ولالنواح..ماينفعوا في شي..
لازم تكون قويه وصامده وواثقه من خطواتها ومايهزها شي لعند ماتوصل للي تبيه...
🍃🍃🍃🍃
وهو طول الطريق ونجاة تغني معاه في الاغنيه الايطاليه..
هي كانت شاده يده وفرحانه وطايره بمشاعرها..
لكن هو يغني وبين عيونه طوبى..كل كلمة في الاغنيه كانت توصف في شعورها من بعد ماهجراته...
وصلوا للمطعم اللي كان حاجز فيه..
ونزلوا مع بعض وهي متعنقه ذراعه وخشوا للمطعم ببعض واللي يشوفهم يقول انهم مخلوقين ع بعض ويحسدهم ع انسجامهم المزيف ع الاقل من ناحيته هو...
🍃🍃🍃🍃🍃
الساعه 12:00ليلا..
في فراشها..كانت شاده تليفونها وعيونها ع الشاشه تشوف لرقم خطيبها وهي تفكر بقلق..
تنهدت ونزلت التليفون ومررت نظرها حواليها..
امها وخواتها وخالتها فردوس كانوا راقدين بالنوم..
ناضت قعمزت وهي مازال تشوفلهم..بعدين ناضت ومشت طلعت من الدار..
توجهت للكوجينه بش بتشرب ميه..
سمعت صوت حد يتكلم..كانت طريقة الكلام وكأنه لمذيعة في نشرة اخبار..شافت جهة الصاله اللي كان جاي من ناحيتها الصوت بعدين مشتلها..وقفت في الفم وشافت لداخل..
لقت طوبى مقعمزه جنبها عليه طويله كان لبخاخ الشعر..
وهي كانت منسجمه مع فيديو تتفرج عليه..
قعدت تسمع صفاء في الكلام اللي فالفيديو تكرر ذكر اسم..
"الليدي ديانا"
قدمت وهي تقول:طوبى..
طوبى استاقظت وقفت الفيديو ورفعت عيونها شافت صفاء..
قعمزت جنبها صفاء وربعت ايديها وهي تقول..
/نحسابك راقده؟
طوبى حركت راسها بالنفي وقالت..
/ماجانيش نوم..
صفاء شافت للفيديو وقالت..
/سمعت صوت نحساب التلفزيون مفتوح..
طوبى:لا..كنت نتفرج ع فيديو يحكي عن قصة الاميرة ديانا..تخيلي صفو وحده زيها راجلها مايقدرش يحبها ويخونها ويسيبها ع خاطر وحده ماتسواش..تعبوا عيون طوبى بالدموع..نستغرب في تفكير الرجاله ومش قادرة نفهمه وحده عندها كل شي ودير ع خاطر راجلها كل شي وماتشوفش منه في المقابل لاتقدير ولااحترام لابالعكس يخونها مع وحده اقل منها بوين..
صفاء:ع حسب مانعرف هو كان يبيها قبل ياخدها امه ماكانتش تبيها وزوجاته ديانا غصب..
طوبى ابتسمت تهكم وقالت..
/صح..هي ضحية ضعف شخصيته هو وجبروت امه..
صفاء:في من قالوا هي كانت عارفه..
طوبى:مش مقتنعه...واضح انها ماتعرف شي لأنها من لما خداته وهي مش مرتاحه معاه لو كانت تعرف مايهمهاش ممكن قعدت ليومنا هدا عايشه والله اعلم..
صفاء وهي تفكر في كلام طوبى قالت..
/صح..
طوبى:تخيلي حضرت عرسه...وكانوا يتلاقوا في السر في مناسبات تكون هي حاضرة فيهم..لا الاحرف من هكي هو خلاها تصاحبها بش ماتشكش في شي وياخد راحته..ولما واجهتها هديكا مانكرتش بكل وهو لما عرف انها واجهتها بكل وقاحه اعترفلها بكل شي وقاللها ردي بالك توصلي فيها..
مصعب اللي عاشاته واللي مرت بيه..
صفاء؛في من يقول خاناته حتي هي..
طوبى بإبتسامة متهكمه..
/يبيضوا في صفحته وصفحة هديكا اللي خانها معاها واللي هي توا مرته ومافي حد من الشعب متقبلها لعند يومنا هدا..لما قررت تطلق وتعيش حياتها ولقت الراجل اللي تحبه ويحبها حق طفوا شمعتها..
صفاء كانت تشوف لطوبى وهي تحكي وكأنها تحكي ع روحها...
وطوبى مكمله تقول بنفس الابتسامه..
/وراحت..وهو تزوج هديكا وامه في الاخير استسلمت واهم عايشين حياتهم وكأنها ماكانتش فيها..
نزلت منها دمعه مسحتها وقالت..
/تعرفي قصتها تشبه لقصص هلبه نساوين عانوا نفس المعاناة واسوأ..مافيش فرق بين اميرة ولامراة عاديه..الظلم واحد..
صفاء بحزن:صدقتي والمراة ديما اللي تدفع الثمن..
شافت طوبى لصفاء وابتسمت بود بعدين قالت..
/عجبتيني كيف حاميتي ع امك ووقفتي في وجه هدا اللي ينقاله عمك..خليك ديما هكي قويه صفاء خلي امك وخواتك يتقووا بيك..
ابتسمت صفاء بعدين قالت بقلق..
/زعمه شن يصير شن بيديرلنا!؟
طوبى:مايقدر يدير شي صدقيني..
صفاء بتردد؛باهي نقدر نحكي لأشرف؟
طوبى:لازم يعرف خير مايسمع من برا ياصفاء.
صفاء؛يعني تنصحيني نقوله..
طوبى هزت راسها تشجيعا..
صفاء:خلاص يصبح الصبح ان شاء الله نتصل بيه..
ابتسمت طوبى ورجعت شافت لتليفونها..
صفاء شافت لباكو البخاح وقالت..
/شن هو هدا؟
طوبى شافتله وقالت..
/هدا دوا للشعر يمنع التساقط نبخ منه كل الليله ع الفروة وندلكها بيه..
صفاء؛ماعطوك شي تاني؟
طوبى بشي من الحماس:هو وفيتامينات ومكملات وقاعده ماشيه ع نظام ماكله تقوي الجسم حتى هي..
صفاء بإبتسامه؛حسيت بطنك انضمت..
طوبى:مازال تبي تو بنبدا نحول المشد وندريلها كريمات خديتهم من غرفه..
صفاء:فكرتيني بأيام زمان قداش كنتي تحبي تهتمي بروحك وديري في خلطات وكريمات والجو هدا..
ضحكت طوبى بعدين تنهدت وقالت..
/استاحشت الايام هديكا وبنردها ان شاء الله..
صفاء بإبتسامه..
/تستاهلي كل خير..
شبحتلها طوبى وقالت بضحكه..
/سلمها ياربي..حتى انتم...
🍃وقعدوا يهدرزوا مع بعض هدرزة نستهم هموهم شويه لعند مافاقت جنه..طوبى مشتلها..وصفاء خشت رقدت...
🍃🍃🍃🍃🍃
واقف ع اخته في الكوجينه ويحكوا عن بنات خوهم المتوفي..
:هي امتى انخطبت هادي؟
:وين نندري ع دعوتهم هي حتى لعزي جداهم ماجابتهم هالمسمه..
حك رقبته بعدين قال:يللا مش مشكله حتى الفرخه مروة يمشي موضوعها..
:اللي هي المهم تفتك من الدين اللي خنقت بيه روحك..
:ان شاء الله ومايجبرونيش ندير شي مانبيشي..
:مايوجعوك سريفه ناتله هادم مش لينا..
هو هز راسه بعدين قال..
/ماشي نرقد..ومشي وخلاها..
وهي ولت ضم باقي الكوجينه...
🍃🍃🍃🍃
"تو اني قلت المهدي وانتي تجري في جرة هالتارقي"
محمود؛ع اساس المهدي يبي تي قالهالي اصبر ع اختك مازال صغيره تو يجيها نصيبها..
مرته بدت ع وجهها ملامح الاستياء..
محمود بأسف:خسارة والله خسارة..بعدين تنهد بضيق وتمدد ع السرير..
ومرته حتى هي تمددت وعطاته بالظهر وكانت في قمة الاستياء ع احلامها اللي تبخرت...
🍃🍃🍃🍃
وفي من قاعد يحلم ليل نهار فايق راقد بحلم واحد مافيش غيره مستعد يدير كل شي بش يحققه..
عزيز..اللي خش للحوش وهو متشوق يعرف رد آلاء...
مشي طول لدار امه..وقف ع باب ودق عليه وهو يقول..
/امي..
شويه وانفتح الباب..
وطلعت امه وهي يدوب مبتسمه..
عزيز:سامحيني كان فيقتك..
امه :لا امي مازال مارقدتش..
هو قال:كويس..بعدين شبحلها بنظرات كلها لهفه وترقب وسألها..
/كلموك؟
امه بإبتسامه اسف هزت راسها بإيجاب..
هو قال بشي من القلق..
/شني؟
امه حطت يدها ع ذراعه وقالت..
/معليشي امي كله شي نصيب وشكلها البنت هادي مش نصيبك..
هو قعد يشوف لأمه بنظرات وجعتلها قلبها..بعدين تنهد وهز راسه وقال..تصبحي ع خير..
ومشي طول لداره..
امه قعدت معاه بنظراتها الحزينه لين غاب عنهم..
بعدين خشت لدارها وسكرتها عليها...
🍃🍃🍃🍃🍃
"بدال الفندق كنت رفعتنا للفيلا مش خير"
الجالي بعد ماكلي شريحة اناناس قال..
/نجاه..روحي..قلبي ياحبيبتي..انسي ان عندي فيلا انسيها ..
نجاه وهي تشوفله بتهكم..
/عارفه علاش..ونقولك انت اللي انسى ان هديكا اللعبه مازال توليلك..راهي مطلعاتك من حياتها قداش ليها عايشه وكأنك مش موجود تمشي لقرايتها وتخدم في المطحن وتدهور ودير في اللمات ولاكأنها قاعده ع ذمة راجل لاحاسباتك ولادايرتلك اعتبار ووحده هادي قيمتك عندها مفروض ماتقعدش ع ذمتك اكثر ماقعدت..
هو ابتسم وقال..
/نجوته..انتي تعرفيني لما ينوض عليا البوري ولا..تعرفيني لما نعصب حياتي كيف نولي وشن ندير!..
هي تبدلت ملامح وجهها للخوف وبلعت ريقها..
هو كمل يقول..
/لهذا ياعمري نعاود ننصحك لما نكون معاك معاش تجيبي سيرتها واني معاك لأنك لما تدوي.عليها تخليني نفكر فيها وتقعد بيني وبينك وبدال مانشوفك انتي نشوفها هي..خليني معاك انت حبيبتي تمام..خليني معاك باهي..
هي يدوب ابتسمت وهزت راسها بإيجاب..
هو بضحكه قال..
/ريتي بالله الراجل اللي طايحه فيه قاعد يعطي فيك نصايح بش تحافظي عليه..والله ماتلقي زيي والله..ولا بالك لقيتي!؟
هي قالت؛كان لقيت ماكنتش معاك توا..
ضحك وقال..
/نبصر عليك..تعشي تعشي ياسموحه..وبعتلها قبله طايره..
هي ابتسمت بالغصب وولت تاكل وقلبها قاعد ينحرق بنار الغيره...
🍃🍃🍃🍃🍃
تاني يوم..
الجمعه..
28سبتمبر...سنة 2018..
فجرا...
كانت طوبى في الصاله مقعمزه ع المصليه الجديده وهي لابسة الملاية الجديده وشاده المصحف وتقرا..
وحداها جنه فايقه في قعمزاها تسمع فيها...
فاتت فايزة من قدام الصاله لمحتهم..ولت ووقفت وقعدت تتفرج عليهم..
جي بين عيونها مشهد شبيه بهدا..
سدره وهي بنفس الوضع..
وحداه طوبى اللي كانت اكبر عمرا من جنه راقده حداها وهي تسمع وتتفرج عليها..
غرقوا عيون فايزة بالدموع وتحرك بداخلها شوق كبير لسدرة وحست وكأن طوبى لو التفتت حتبان عليها سدره..
تنهدت تنهيدة ألم مكتومه بعدين مشت في طريقها...
🍃🍃🍃🍃
صبح هداكا اليوم..
حاولوا فيه طوبى وبنات فردوس مع فردوس يطلعوا فايزة وبناتها من جو الخوف والحزن اللي كانوا فيه..
ولما جتهم مطيره طلت عليهم ساعدتهم في المهمه وقدرت زي عادتها ترسم الضحكة ع وجوه..
لكن...يقعد الخوف في القلب..
🍃🍃🍃🍃
ويسمع علي الواعر باللي صار وكان ناوي يمشي لخو احمد بروحه يتفاهم معاه لكن مطيره وقفاته وقالتله المهدي شنيبه حيتصرف..
اساسا الحاج علي بلغ من الكبر عتيا..معاش زي زمان وخوت احمد معروفين لايقدروا حد ولايحترموا حد وتوصل معاهم لمد اليد عادي..لهذا مطيره وقفت بوها وماخلاتاش يدخل..
🍃🍃🍃🍃
ومن جهة تانيه..
الجالي روح بنجاة للشقه اللي في حوش بوه..
وقعد معاهم نهار الجمعه وعيش صغار خوه حاله ليهم مايقارب السنتين محرومين منها..
نجاة كانت تراقب فيهم طول الوقت وهي فرحانه من قلبها حلمها تحقق ومنيتها الوحيده وصلتلها شن تبي اكثر من هكي..
واكيد وحتما حتقاتل بش تحافظ ع اللي وصلتله..
والجالي قاعد مكمل في الدور اللي عايشه..بعد العصر طلعهم هما وايام لوحده من مدن الالعاب المشهور في العاصمة وهدا كله ع عيون ناس الشارع...
وعيون محمد شنيبه..اللي بدت تتغير نظرته للوضع شويه وبدي يتقبل فيه...
بس مغليه مازال رافضه..ومش مقتنعه ولايمكن تهضم فكرة ان نجاة تكون كنة فعليه ليها ومرت الجالي بالذات...
🍃🍃🍃🍃🍃
"والله ياغالي الموضوع شخصي ومايخصكش"
المهدي:لايخصني مادام هما خولوني ندخل فيه معناها يخصني ..
هز راسه وقال:مهدي انت ولد شارعي وكانت بينا عشرة ومانبيش نضرك خليك بعيد عن مواضيعنا العائليه احسنلك مش لمصلحتك تخش فيها صدقني..
المهدي وزع نظره ع المكان بعدين شبحله وقال..
/اني اللي عليا درته وجيتك كلمتك بالعقل...ماتلومني ع شي بعدين لو قعدت مسكر راسك ع اللي فيه..
ولف ومشي من قدام العمارة اللي يسكنوا فيها عيلة احمد..
خو احمد قعد معاه بعيونه بعدين قال جملة بذيئه...
شوية درست قدامه سيارة دفع رباعي..
صاحبها قال:شن الامور..
:ماشيه..
:شن صار معاك عطلت هلبه راهو..
حك رقبته وقال:والله شن بنقولك البنت هديكا طلعت مخطوبه لكن عندها اخت تالته اعدادي يمشي حالها..
هز راسه وقال..
/اممم..اسمع..انت شكله بتلعب معاي ..
:لا والله العظيم ماهكي بالله..
بغضب قاله:مالا خلاص..البنت اللي وريتهالي هي اللي نبيها مخطوبه متزوجه مانعرفش نطربقه ننفيه المهم ناخدها هي هي اللي خشت راسي..
هو بخوف قاله..
/باهي باهي زي ماتبي غير عطيني فرصه نحل الموضوع..
:ماعنديش وقت نضيعه معاك..عطيني اسمه هدا خطيبها..
:والله وراس صغاري مانعرفه..
شبحله بغضب بعدين قال..
/تو نعرفه بروحي..
وطول شغل السيارة وتحرك وهو يحرق في العجل....
:الله يلعنك يافايزة انتي وفرخاتك..
🍃🍃🍃🍃🍃
"وصلت توا درست قدام الحوش"
صفاء وهي واقفه ع روشن دار الخزين قالت..
/حمد لله ع سلامتك..
اشرف:الله يسلمك..وفتح باب السيارة ونزل..خلاص توا سكري بعدين نهدرزوا..
"تمام..سلام"
هو قال:سلام..وسكر..وتوجه طول للمطحن الزعيم....
#الحرب_البارده
#طوبى
...يتبع....
