#طوبى "جنة طوبى"
#جمان_فريد
#الجزء_الثاني_والثمانين "مارغريت "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء 🌼
سمع النبي صلى الله عليه وسلم رجلا يقول:
اللهم إني أسألك بأني أشهد أنك أنت الله الذي لا إله إلا أنت.
الأحد الصمد الذي لم يلد ولم يولد، ولم يكن له كفوا أحد.
فقال: " قد سأل الله باسم الله الأعظم الذي إذا سئل به أعطى، وإذا دعي به أجاب "
. أَخْرَجَهُ الْأَرْبَعَةُ، وَصَحَّحَهُ ابْنُ حِبَّانَ.
.🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃كان سببًا في ابتسامتي، ولكنه أبدعَ في بُكائي.🍃
محمود درويش..
________________________________________
وهي تسوق في السيارة..
كانت في حاله خلتها توقف ع تركينه..وتنزل منها..
قعدت تمشي بإتجاه حديقه قريبه شويه ع المستشفى..
تحت ظل شجره قعمزت..
وحطت ايديها ع وجهها وانهارت بالبكي..
في من شافها ماشي ع رجليه ولاخاطم بسياره..
استغربوا لحالها..وهلبه منهم دعولها بالفرج بدون مايعرفوا شن صاير فيها..
يكفي انهم شافوها بهالحاله فهالوقت..وفي جو زي جو شهر اغسطس..
لكن..
عمر..ماتحملش يخليها ع هالحال...
مشالها وفي يده شيشة ميه...وين وصل فيها قال..
/اميمه..خودي وبري قعمزي في سيارتك..
هدت بكي ونزلت ايديها وقامت عيونها فيه ونظراتها كلها حده..
عمر بضيق:خودي ونوضي هيا..
ناضت وقفت وتباعدت خطوه وهي تقول..
/شن تبي انت تاني تبي تكمل عليا!؟
عمر نزل يده اللي فيها الشيشه وقال..
/صدقيني مانبيش نضرك..
هي بتهكم؛مالا شن تبي!!؟ تبي تضحك عليا مرة تانيه وتاكل عقلي بكلامك..وتبدا تترجى وتقول مش قادر نعيش من غيرك واني نادم وسامحيني!..
هو تنهد بضيق بعدين قال..
/ايه صح.. جيتك نبيك تسامحيني..لكن مانبي شي تاني غير السماح..اني...غلطت فيك..ظلمتك..وماقدرتكش وربك خدي حقك مني..صدقيني مافي يوم في حياتي مشي كويس من بعد هداكا اليوم..
اميمه تهكما..
/واضح هلبه..هدا علاش نقروا في اخبارك الفيس!
ضحك ضحكة تهكم خفيفه وقال..
/صدقيني ماحسيت بشي ولاعرفت نفرح ولانرتاح
اميمه بألم وع وجهه ابتسامة حسرة..
/لازم ماتعيشش مرتاح ولاتفرح بعد ماكسرتني وكسرت قلبي اللي كان صافي معاك وسامحك ع قد مادرت..لازم تقعد مهموم وايامك كلها سودا ع السواد اللي عشته بسببك..انت باللي درته فيا خليت اللي يسوى واللي مايسواش يطاول عليا..
من خلاني مطلقه بعد شهرين زواج؟!انت..من اللي طلع عليا سمعة مش كويسه وجابلي كلام الناس!؟ انت...من اللي عطي فرصة لماليك يحكوا بيا افترائهم وكذبهم وخلوا الناس تصدقهم؟! انت.. تستاهل اي شي يصير فيك وكل اللي صار فيك شويه..
عمر بألم:شن ماقلتي عندك حق فيه اني مانستاهلش السماح بعتك في كل مرة شرتيني فيها..وياريتني هداكا اليوم لما جتنا امك تبي الصلح طلعت اني وياها لحوشكم ورديتك وسيبنا البلاد كلها...لكن كلام امك وقتها قهرني وخلاني ناخد قرار ضيعت بيه غيرك..
اميمه بعدم فهم..
/امي جتكم!؟
هو قعد يشوفلها بصمت وملامح الحزن باديه ع وجهه..
غمضت اميمه عيونها بنفاد صبر..بعدين فتحتهم ومسحت دموعها وهي تقول..
/ولامرة بعد طلبت الطلاق تراجعت ولاحسيت روحي تسرعت وامي تصرفت من راسها..
عمر:عارف..
اميمه هزت راسها وقالت..
/واعرف اني مش حنسامحك ع اللي درته فيا وان شاء الله معاد ترتاح..
ومشت بسرعه ولت لسيارتها..ركبت..وشغلتها وتحركت طول...
وخلاته في حالة اسوأ من اللي كان عليه...
🍃وصدمة وحزن اميمه تحولوا لغضب..
خلاها تتوجه بسيارتها لمصحة القدس..
🍃🍃🍃🍃
خشت وهي ماتشوف في شي قدامها غير الغضب..
سألت عن قصي ودلوها ع مكانه..
توجهتله..ومع كل خطوة غضبها كان يزيد..
وصلت في المكتب متاعه..خشتله طول..
وهو وقفتها كان يشرب في قهوته..
لما شافها تفاجئ..
اما هي بغضب قالت..
/عمرك ماكنت راجل ولا عندك اخلاق..
هو بغضب قال..
/خيرك انتي..هبلتي!
اميمه بغضب..
/فوتلك ومشيتلك هلبه...وانت تحساب سكوتي قلة حيلة وخوف..
ع خشة هناء ومعاها دكتور تاني سمعوا شن قالت اميمه..
اللي تابعت تقول بوعيد..
/وهاك وصلتها لمرحله معاش ينفع معاها سكوت كان ماخليتك عبره مانبداش اني اميمه..
هو قال بمكر ؛تهدد فيا خليكم شاهدين!
اميمه التفتت شافتلهم بعدين شبحتله وقالت..
/خل يشهدوا ويعرفوا دناءة واحد داير روحة دكتور محترم وهو يمشي يدوي بأعراض الناس ويطعن فيهم كذب وافتراء..امثالك انت مش هدا مكانهم ولايشرفوا المكان اللي يكونوا فيه..
ولفت ومشت طلعت وهي في نفس حالة الغضب وتقول..
/تو نخليك تعرف المكان اللي يستاهلك..
هو بعصبيه وارتباك..
/مش حنخليك هني دقيقه زياده يااني ياانتي في المصحه...
🍃🍃🍃🍃
وطلعت اميمه من المصحه وهي مقرره انها حتسيبها حتى هي..
🍃وطول طريقها للحوش وهي تتفكر في كلام وسام...
وتفكر في الدوة اللي طالعه عليها الصوره اللي انرسمت في عقول محيطها عنها..
تفكرت عمر لما حكالها ع جية امها لحوشهم وطلبها للصلح حست قداش كانت هينه ورخيصه في عيون عيلة شنيبه وفي عيون اهل الشارع اللي اكيد سمعوا حاجه زي هادي والله اعلم شن قالوا عليها...
اميمه وقتها حست بنفور وغضب اتجاه امها...
وفي نفس الوقت حست بالغضب من نفسها لما جي بين عيونها الموقف اللي داراته مع بنت عمها..
نظرات طوبى ليها ماتحولتش من عقلها..ماتوقعتش ان عواقب اللي داراته فيها حتلقاه بسرعه هكي..
وقتها بس عرفت حجم الآذى اللي وصل لطوبى منها مش لما صدقت الافتراءات عليها..بل لما خذلتها وخيبت املها فيها...
🍃🍃🍃🍃🍃
"حبوبي ناض..بنيتي ناضت..ياروحي اني ع العيون الحلوات.."
قعمزت مقابلتها وقالت..
/تتفكري الامتحانات اللي كنت نقرا فيهم وانتي هني..
حطت يدها ع بطنها...في بطني..ريتي السهر والتعب اللي تعبته هداكا الوقت ربي كله رده ليا وصفيت المواد كلهم..تصدقي!..اني لتوا مش مصدقه..صح اني قريت وتعبت وطيرتهالك وانتي ترفسي فيا بش نمشي نرقد..بس ماتوقعتش ننجح هكي وبمعدل قوي..!مفروض مانستغربش حاجه زي هادي ع ربي جنوني ديما معاي تكسرني الدنيا وهو يجبرني...ضحكت وقالت..واحلى جبر جبرهولي في حياتي كلها انتي...يانجيلي هاللسان اللي بدي يطلع...ضحكت وقالت..عيوني ياماما انتي عيوني...
🍃🍃🍃🍃🍃🍃
ولجنة..انذب..حوا زوز كباش..واحد عقيقه والتاني فرحة بجيتها من بوها وجدها..وتوزع اللحم ع الجيران والناس المحتاجه..
ولحوش لطفي الواعر وصل نصيبهم اللي كان الاكبر عن طريق يزن ولد المهدي..
🍃في الكوجينه..
طوبى وفردوس واقفات يتفرجوا علي اللحم ويفكروا..
طوبى:نقولك..غدوة ان شاء الله جايتني ابله زينب تعرف ناس محتاجه وتساعد فيهم بكل شي فلوس ماكله لبس..تو نبعته غدوة معاها..
فردوس:احسن راي..خل ندسه في قعر الفريز بش يقعد مثلج حتى كان الضي هرب..
طوبى:بلعاني يبيني نعرف ان دارلها عقيقه..
سكرت فردوس الفريز وقالت..
/عيلة تاعبه..
طوبى:ربي يخلصنا منهم ومن شرهم..
فردوس:ايه حقه..نسيت نقولك..عمتي نجمه قالت بتجي غدوة مع بناتها..زعما جيتهم مع جية صاحبتك؟
طوبى؛عادي مافيش مشكله..المهم زيدي وقضيني غدوة ان شاء الله بش نوصي البنات ع حاجات ناقصة..
فردوس؛وصيت اريج ع حاجات تجيبهم وهي مروحه..
طوبى:باهي كويس...خلي نمشي نشوف جنة بالك فاقت..
ومشت طلعت من الكوجينه..
وفردوس قعدت بروحها تفكر كان في حاجات ناقصه غير اللي وصت عليهم اريج بش تلحق توصيها عليهم قبل لتروح..
🍃🍃🍃🍃🍃
في هالوقت..
كانت اميمه في دارها تتصل بخوها حسين ودموعها مابطلوش نزول..
وعمتها حداها تشوفلها بأسف ووجع ع حالها..
ورد حسين واخيرا..
اميمه؛فاضي حسين؟
"خيره صوتك"
اميمه بلعت ريقها وحاولت تهدي نفسها بعدين قالت..
/صارت معاي مشكله نبي نحكيهالك..
"قولي طول شن صار"
خدت نفس بعدين تحكي...
🍃🍃🍃🍃🍃
"اسمعي نحاول مانقدرش نعطيك كلمه"
هادي راما تكلم في اسماء صاحبتها..
"Ok تستنى في ردك بش نتفق اني وباقي البنات ع موعد"
راما؛باهي اليوم نرد عليك..
"تمام تشاوات"
راما:باي..وسكرت عليها وهي تقول..يارب تقول باهي..
حطت تليفونها ع السرير ومشت طلعت من دارها وتوجهت للصاله وين مقعمزه امها تاكل في الكيكه المثلجة قعمزت جنبها وقالت..
راما؛مامي..
خديجه؛قولي شن تبي طول..
ضحكت وقالت؛باهي..كلمتني صاحبتي وقالت بتطلع هي وقروبنا لمول بيفتحوه غدوة وقالتلي تعالي معانا واني خاطري هلبه نمشي..
خديجه قعدت ساكته وهي تفكر..
راما:الصيف قريب يتم وشبه ماطلعناش بكل..
خديجه:مانطلقكش بروحك بنمشي معاك..
هي بضحكه؛اصلا خالاتها بيمشوا حتى هما تتعرفي عليهم..
خديجه هزت راسها وقالت؛باهي..
راما بفرحه؛نجيلي مامتي ياربي..لكن بابا ماما زعمه يقول باهي..
خديجه؛يقول باهي يقول باهي..
راما ناضت وهي مبتسمه بحماس وقالت..
/خلاص خل نمشي نقوللها..
ومشت بسرعه لدارها..
وخديجه ولت تاكل في الكيكه وتتفرج ع التلفزيون..
🍃🍃🍃🍃🍃
"شني تبي تموتي!"
مروة بقلق:مش بيدي ماما والله خايفه هلبه..
صفاء:ان شاء الله ناجحه..
مروة:يارب..عطيني من برودك شويه..
صفاء؛مش برود لكن عارفه روحي درت جهدي ومش حيريح ع الفاضي..
فايزة؛خلاص هانت غدوة تطلع وبإذن الله ناجحات الزوز..
تاله؛الحمد لله اني مرتاحه طلعت قبلكم وافتكيت..
ضحكت فايزة..
ومروة بتهكم قالت؛باهي فهمنا..
ويرن تليفون مروة قاماته وشافت المتصل قالت..
/مناسك..
ردت طول وهي تقول..
/سلام عليكم نسوكه..
"وعليكم السلام شن ديري يابقرة تاكلي"
مروة:امم كوكيز..
"هالكوكيز اللي قريب يولي اكسجين عندك"
مروة؛المهم علاش متصله شن تبي..
"خزي زفته..الحق مش فيك الحق فيا اني المتصله بش نفرحك"
وقفت مروة ماكله وقالت..
/تفرحيني بشني!؟
امها وخواتها غيروا نظرهم عن التلفزيون ليها هي..
"انلاا مش قايله لين تتأسفي"
مروة بتشوق:مش وقت برادتك قولي هيا..
"بشرط الزردة عليك"
مروة:بنسكر راهو..
"ترا ديريها!"
مروة بنفاد صبر:تي هيا عاد مناسك قولي ماتحرقليش دمي..
"لا مش قايله..يابارد..باهي تو نقول..فرخة مروة نجحنا"
مروة بدهشه:كذابه..
"كذابه في عينك.."
مروة:كيف مش بتطلع غدوة؟
"صقع عليك عندي مايجيهالي قبل.الكل"
مروة بشك؛حي عليك تطلعي دايره مقلب..
صفاء:شن في؟
"لا والله العظيم..مالك خوي عنده معارف في المدرسه جابوله النتيجه"
مروة؛بالك داير فيك مقلب ياهبله..
ضحكت وقالت..
"تأكدت ماما من ابله في مدرستنا تخدم اداريه غادي قعدت وراها لين قالتلها"
ضحكت مروة بفرح وقالت..
/الحمد لله ياربي..الحمد الله..شافت لأمها وخواتها وقالت..
نجحت نجحت..
بدت ع وجوهم ملامح الفرح وفايزة قالت..
/الحمد لله..
"اسمعي الزرده عليك قال مالك..ااي علاش هكي"
مروة بضحكه؛حداك هو؟
"ايه"
مروة ؛نبي نعرف من يعرف غادي معقوله حتى الابلات ماسلموش منه..
"سمعك راهو"
مروة بصدمه؛نهارك احرف فاتحه المايك!
وهي تضحك قالت..
"ايه"
سكرت عليها مروة وهي محرجه..
فايزة؛خيرك!؟
مروة؛القرده تكلم فيا والمايك مفتوح وخوها حداها..
فايزة بضحكه:مالك؟
مروة؛ايه..قالت هو اللي جاب النتيجه..
فايزة؛ماشاء الله هالوليد قداش يعز عليا خدوم..
صفاء:باهي متأكدين من النتيجه؟
مروة؛قالت امها تعرف ابله في المدرسه وتأكدت منها..
فايزة؛الحمد لله اهو ربي ريحك..
مروة بشي من القلق:مازال خل يجي غدوة ونتأكد..
فايزة بإستياء مصطنع:يانكد.المهم تقعدي منكده..
صفاء بضحكه؛نكديه من يومها.
تاله؛ماتجوش عليها كلكم عاد..
مروة بإبتسامه؛يانجيلي توتي قرعتي هادي..
صفاء؛لابطاطتي..
فايزة بضحكه؛طلقت عليها خالتك سالمين..
صفاء:ايه كل شوية تحدف كلمه شرقاوي..
مروة ناضت وهي تقول..
/هاني ماشيه لداري تسهوكوا براحتكم.
ولفت بتمشي رن تليفونها فصلت المكالمه وقالت..
/ مانيش راده عليك حتى انتي...
وضحكوا عليها امها وخواتها بعدين فايزة قالت..
/هي خلاص مريوتي تعالي بنيتي معاش نبصروا عليك..
ومروة خشت دارها وسكرت الباب...
🍃وفي حوش صاحبتها مناسك..
مناسك وهي تتحسس في.كتفها..
/شن درت بش تضربني.هكي!
مالك؛فكيني من امه جوك هدا معاش ديريه قدامها..
مناسك ضيقت عيونها بشك وقالت..
/اشمعنى!..ماهو قبل كنت دير في نفس الشي مع صاحباتي وتقعد تناشب بالقصد بش نقوللهم انك حداي!
مالك بشي من الارتباك والعصبيه..
/بلا.قطاف سكري فمك وبري شوفي امي شن دير عاوينها تحركي..
ومشي لداره وخلاه وهي تبع فيه بعيونها اللي مضيقتهم وهي تفكر بعدين.ابتسمت وقالت..
/اممم....
🍃🍃🍃🍃🍃🍃
"ياعن جد اصله مرة وحده..وربي لما نخليهم يكرهوا الساعه اللي ولوو فيها دكاترة الفاسدين هادم"
اميمه بقلق؛ردبالك ضر روحك..
"تو نعرف شن دير معاهم الكلاب هادم..اسمعي ماتمشيش اليومين هادم لين نتصرف معاهم"
اميمه؛حاضر...
"خلاص سكري توا سكري"
وسكر هو عليها..
هي نزلت التليفون وقالت بقلق..
/ندمت اللي قتله..
مطيره؛كان ماخبرتيشي هو لمن بتقولي! من لازم ياخد حقك غير خوك!؟
ردت عليها بنفس نبرة القلق..
/تعرفي حسين ياعمتي خايفه يدير حاجه تولي شي..
مطيره؛ماصايرله شي..وحتى كان صار في النهايه ع خاطر عرضه..اخته..وسمعتها..
اميمه بألم ودموعها في عيونها..
/تعرفي عمتي..ماتوقعتش الطلاق يكون صعب لهالدرجه..كنت نقول لروحي شويه مشاعر وذكريات مع الوقت تنسيهم ويمشوا..لكن الحكايه طلعت اكبر من هكي..
وين كنت نشوف في امي كيف متحمله بوي وصابرة عليه رغم انها ماتحباش بكل نستغرب..توا بس عرفت علاش..كان في وقتنا هدا المراة المطلقه تعاني هكي..مالا زمان كيف!
مطيره وهي تشوف في الفراغ وتتفكر قالت..
/زمان كان جدك واقف ضدي في حكاية الطلاق خايف من كلام الناس..بعد 25سنه زواج نطلق..اكيد تتفكري شن انقال عليا وكيف الناس استغربت..لكن اني هدا كله ضربته ع الحيط لما حسيت اني معاش نقدر نكمل حياتي مع راجل استغفلني وخلاني مضحكه..القدر اللي بيني وبينه طاح..من عيني طاح..شن مازال فيها حياة بعد هكي!؟..في الاخير شريت راحة بالي وكلام الناس درته تحت رجليا وعشت باقي حياتي بكرامتي وراسي مرفوع..
تنهدت اميمه بشي من الراحه بعد ماسمعت كلام عمتها اللي كملت تقول..
/هو مافيش مراة تزوجت بش تطلق من يوده خراب البيوت كان الشيطان...لكن يابنتي لما الحياة معاش يبدا فيها قدر واحترام وتفاهم بين الراجل ومرته حتى كان روحهم في بعض الطلاق احسنلهم..
اميمه:صح...وبضيق كملت تقول..مسكينه كان اللي تنربط بالصغار..
مطيره؛زي بنت عمك..
بدت ع وجه اميمه مع ملامح الضيق حزن..
مطيره؛عايشه في رعب..نحس فيها مرات تتمنى لو بنتها قعدت في بطنها..
اميمه:ماقالتش شن بدير؟
مطيره؛ع كلامها الاول المحاكم لا تبيه يطلق منه ليه..
اميمه؛تمشي تمشي وتجي للمحاكم بالذات ع خاطر البنت..
مطيره هزت براسها وقالت بأسف:هدا اللي بيصير..
ويقطع حديثهم الاتصال اللي جي لمطيره..
طول فتحت الخط وردت لما شافت المتصل..
/ها دوسه شن جو توا..
"الحمد لله..كيف حالكم انتم"
مطيره؛ماشيه الحمد لله..
"بنقولك عمتي غدوة بيجوا عمتي نجمه وبناويتها وابلة زينب صاحبة طوبى من غيرك مانقدروا نديروا شي"
مطيره؛باهي باهي تو نجي ان شاء الله..
"وقولي لأميمه تجي"
مطيره؛باهي تو نخبرها..شن حال بناويتك وطوبى وجنونتها..
"الحمد لله الكل في خيار الخير"
مطيره؛باهي الحمد لله..
"هي مانعطلش عليك عمتي..بالسلامه"
مطيره؛بالسلامه بالسلامه..
وسكرت وهي تقول..قالت نجمه وبناوينها ومدرسه مع طوبى بيجوا غدوة..تمشي؟
اميمه حركت راسها بالرفض وهي تقول..
/ماعندي نيه نجامل حد..
مطيره؛بتقعدي بروحك؟
اميمه؛نقعد نقرا نستغل الظرف..
مطيره بإبتسامه؛ايوه خليك هكي صحة ليك..
يدوب ابتسمت اميمه وفي داخلها ضيق ماعالم بيه الا ربي..
🍃🍃🍃🍃
وفي المصحة..
كان حديث الساعه اللي صار بينها وبين قصي..
استاء خالد هلبه ..بس طليقته هناء كانت طول الوقت مستغربه وعندها فضول تعرف بعض الحاجات..
وتلاقت مع خالد في واحد من الممرات وقفاته وسألاته ع اللي صار..
☘خالد؛مش عارف شن السبب بس اللي نعرفه ان اميمه انسانه خلوقه جدا ومحترمه ومن لما عرفتها ماشفتش عليها غلط..
هناء رفعت حاحبها وقالت..
/مطلعين دوة عليكم..
خالد؛كلام السفهاء مايعنينيش..اني لو فعلا في بيني وبينها شي نخليه في العلن بما يرضي الله مافي شي يمنعني..لكن البنت بالنسبه ليا اشبه بمشروع الاكتشاف متأكد حيكون ليها مستقبل هدا علاش نبيها تطلع من تحت ايديا...
هناء:صح هي شاطره ومجتهده لاحظتها...
خالد؛غير يخلوها في حالها...عن اذنك..ومشي من حداها..
وهي تبع فيه بعيونها لين تباعد بعدين لفت ومشت كملت طريقها وعقلها مع اميمه...
🍃🍃🍃🍃🍃
في مطعم احد الفنادق المشهورة في احدى العواصم العربيه..
كانوا مجموعه مقعمزين حوالين طاوله كبيره..
فاتن منهم..طول الوقت مركزه بنظرها ع مختار وصابرين..
هو يكلم في واحد جنبه وصابرين تشارك في الحديث وواضح انه بدعم من مختار..
شويه وجاهم العشي..
وبدوا يتعشوا..وكان مختار يساعد في صابرين اللي مازال مش متعوده ع نمط الحياة الجديده..اهتمامه بيها اثار انتباه الموجودين..
ومنهم وحده كانت مقعمزه جنب فاتن..
:شكله مختار بيديرها قريبا ويتزوج مرة تانيه..
ابتسمت فوق نفسها وقالت..وارد..
:اول مرة نشوف مختار مهتم بوحده لهالدرجة وعلاش لا..صغيره عليه ويبي يدلعها..
هزت فاتن راسها وهي مبتسمه ببرود ومابتش ترد ..
واللي كانت تتكلم جنبها تراقب في نظراتها وهي مستمتعه بالجو اللي قاعد يصير..
☘قعدوا ساعه تانيه بعد العشي..بعدين اللي هدا بدي ينسحب..
ومختار وصابرين مشوا بيركبوا لغرفهم..وفاتن لحقتهم..
جت جنب مختار بالزبط اللي ولى في نصهم هي وصابرين..
فاتن؛توقعت تطلعوا تسهروا..
مختار:غدوة مروحين؟
فاتن؛علاش بسرعه هكي..مددوا يومين تانيات فسحه خلي الحلوة اللي جنبك تشوف البلاد..
شبحتلها صابرين برفعة حاجب..
وفاتن ابتسمتلها بإستفزاز..
هو غير نظره القدام وقال بإبتسامه..
/كان نبي نفسحها نعرف وين نرفعها..
فاتن؛كان تبي! معناها ياقعادك حبيبتي..
صابرين؛سافرنا ودهورنا لين زهقت كبودنا..
فاتن بإزدراء واستغراب؛لين شني!..
مختار بضحكه؛قصدها ملينا..
فاتن؛اها..بالليبي قالتها..
صابرين رفعت شفها الفوقاني فوق وبدت ع وجهها ملامح الازدراء مع السخريه وهي تشوفلها..
فاتن بآبتسامه؛اسفه هلبه مصطلحات جايه من الشارع مانعرفهاش..
وقفت صابربن وقالت..
/كأنك تماديتي هلبه!
رفعت فاتن حاجبها وهي تشوفلها بإبتسامه تهكميه مستفزة..
مختار: أ..فهمتيها غلط..قصدها مصطلحات الشارع الليبي ماتعرفهاش..
فاتن؛Right
صابرين؛خليك في الانجليزي مادام ماتعرفيش تدوي عربي بش ماتنهميش غلط..وابتسمت تهكما..
ضحكت فاتن ضحكة سخريه خفيفه من غير صوت..
مختار:Ok Ok بري لحجرتك توا صابرين..
مررت نظرها من فوق لتحت ع فاتن بعدين هزت راسها..
ومشت وهي معصبه..
التفت مختار ع فاتن وقال..
/خيرك شن جاك طلعتي عرق الليبيات هكي مرة وحده..
فاتن؛اني نحكي عادي هي اللي.متحسسه.
مختار برفعة حاجب:هي؟!
فاتن تهربا؛كلهم ع العشي انتقدوك هلبه ع اختيارك للبنت هادي وقالوا ذوقك انحدر مرة وحده..
مختار:هما يطولوا ظفر وحده بجمالها..اصلا من اول ماجت معاي وهي ملفته للانتباه والكل تمنى مكاني..
فاتن؛انت ناوي تتزوجها؟
وينفجر ضاحك..وهي تشوفله بإستغراب..
فاتن؛شن اللي قلته يضحك لهالدرجه..
هدا ضحك وقال..نكته..قلتي نكته..
رفعت حواجبها تعجبا..
هو قدم خطوه وحط يده في جيب سرواله وقال..
/اللي جرب الزواج معاك انتي يتوب عنه..
فاتن تعجبا:ياسلام!
هو قال؛واني اعتزلت الزواج مش بس تبت عنه..ولو صار..لو هاه ماتشديهاش عليها..لو صار وصارت معجزه وقررت نعاودها..ابتسم وكمل يقول..مش حتكون مع غيرك..
حست بهبه صهد ضربت وجهه اللي احمر فجاه وسخن وعيونها اللي توسعوا من صدمتها بالاجابه..
هو بنفس الابتسامه ختم كلامها معاها وهو يقول..
/تصبحي ع خير..
ومشي وخلاها..وهي تبع فيه بعيونها اللي نظراتها كلها صدمه..
🍃هو وصل لغرفته..
فتحها بالكرت وخش وكان يدندن في اغنيه ما..
قعمز ع السرير..ويجيه اتصال...
تأفف بضجر بعدين طلعه من جيب جاكيته..شاف المتصل رد طول..
/ايوه..
"ازعجتك؟"
مختار:عادي..شن في؟
"بكري قبل المغرب جي ولد عمك"
مختار بملل؛بيبدا..
"مش عارف..بس حسيت في حاجه مهمه.."
مختار:ماحاولتش تعرف منه..
"ماباش يقول"
مختار:تمام..وسكر...بعدين دور ع رقم حسين واتصل بيه..
🍃🍃🍃🍃🍃
"كلمتها وقالت بتجي"
هادي نجمه تكلم في بنتها نجاح هاتفيا..
"خلاص مالا نتلاقوا غدوة بإذن الله..بالسلامه توا"
نجمه؛بالسلامه..
سكرت وحطت التليفون ع الدولاب..وكملت ترتيب الكوجينه..
فجأه..حست بشي اشبه بالتيار الكهربائي ركبت لراسها..وحست بدوخه..
شدت في الطاوله..بعدين قعمزت وحطت يدها ع راسها وهي تقول..
/ياسيدي ربي..ياسيدي ربي..
بعد لحظات حست انها افضل شويه نزلت يدها وقالت..
/استغفر الله العظيم..بعدين ناضت وقفت..
ومشت طلعت من الكوجينه لدارها...
🍃🍃🍃🍃🍃
"وعلاش نبات من توا؟"
الشارف؛تعرفي من البدايه ان عندك ضرة ليها عليا حق..
عواطف بضيق؛مازال ماطقيناش شهر..
الشارف؛ماتنسيش عندي صغار مانقدرش نقعد المده هادي غايب عنهم..
نزلت عيونها وهي مضايقه ع الاخر وقالت..
/براحتك..
الشارف شبحلها شويه بعدين قال..
/تصبحي ع خير..ومشي طول للسرير..خشه ورقد..
وهي تشوفله بحسرة وحزن..بعدين مشت طفت الضي وطلعت من الدار..
🍃🍃🍃🍃🍃
وتمر عليها الليله طويله وهي تذرف في دموع الحسره ع نفسها..
زي ماكانت اميمه متحسره ع نفسها حتى هي ومش قادره ترقد غمضه بسبب كلام وسام اللي قاعد يرن في ودانها..
وعكسهم هالمرة طوبى..
اللي كانت مجاورة بنتها والزوز راقدات بعمق..
نجاح طوبى في الفصل اللي فات من قرايتها حفزها بقوة..وبعث فيها حماس كبيره..
وارتفع مؤشر الثقه بالنفس وزاد علي مؤشر الثقه بالله..
اللي مابطلتش تذكر فيه في هديكا الفتره..مابطلتش دعاء..واستعانت بيه مت كلامه اللي كانت تقرا اوتسمع فيه بخشوع..
هدا كله كان اقوى سبب لتوفيق طوبى في امتحاناتها اللي دارتهم في اصعب في الظروف..
بذلت الاسباب واستعانت بالله وكانت النتيجه نجاح مبهر..
🍃🍃🍃🍃🍃
وتعدي هالليله ويجي اليوم اللي بعده..
🍃بعد العصر..
كانوا الضيوف موجودين في حوش لطفي الواعر..
وزياده عليهم فايزة اللي جت من غير بناتها ونبيله..
طوبى ماطلعتش طول..لبست بنتها ورقتها..وهي يدوب مشطت شعرها ولماته ولبست قفطان بسيط بس حلو..وخدت شنطة بنتها وطلعت بيها..
وين خشت عليهم الصاله..
انصدموا في شكلها نجمه وبناتها اللي ليهم فترة ماشافهوهاش..
بالذات نجاح..شافت وحده لو تنحط جنبها هي تبان اصغر واكثر حيويه ونضاره منها..
حطت شنطة بنتها جنب اختها فردوس..ومشت سلمت ع الضيوف..
وبعد السلام مشت قعمزت جنب بنتها..
نجمه؛كيف حالك طوبى؟.
طوبى بإبتسامه؛الحمد لله..
عواطف بضحكه؛ماتبيش تورينا بنتك؟..
ضحكت بإحراج وقالت..
/لا كيف عاد..وناضت وخدت شنطة بنتها ولفت بيها عليهم وكلهم خطولها بياض ماعدا زينب اللي كانت جايبه هدايا للبنت وأمها..
نجمه:الله يبارك عليها صح مازال ماتبانش لكن حسيتها ليك انتي..
زينب:مزبوط..
ابتسمت طوبى وقالت؛زعمه؟
مطيره؛مازال القدام تبان اكثر..
اما عواطف كانت تقول في.نفسها..
"شقرا زي امها لكن ملامحها ملامح حتى لون عيون زيه"
🍃وتشبيه عواطف كان هو الادق..جنه جميله..لمن جايبه.هلبه ملامح من بوها.. ومع الوقت حتتوضح اكثر...
🍃🍃🍃🍃
وعند شقة فايزة..
كانت صفاء مسترخيه ع السرير بعد ماارتاحت من هم النتيجه اللي طلعت ونجحت بتفوق..
حاطه ع وجهها قناع تجميلي ومغمضه عيونها..
برا دارها..
كانت تاله قدام التلفزيون تتفرج ع الكرتون المفضل ليها..
"دروب ريمي" ومنسجمه معاها..
اما مروة..كانت في دارها تقرا في اول روايه تقراها في حياتها..اكتشفت زوجي في الاتوبيس للكاتبة دعاء عبد الرحمن..كانت منسجمه معاها وغارقه في القصه وبحور الشخصيات اللي جذبوها هلبه...
قطع عليها انسجامها صوت جرس الشقه..بعدين رجعت تقرا في الروايه مرة تانيه..
بعد بضع دقايق..انفتح عليها باب الدار..
مناسك؛سور براايز..
ضحكت وقالت:امتى جيتي..
حطت الاكياس اللي جايبتهم ع الارض ومشت ارتمت جنت مروة ع السرير وقالت؛توا..جيتك بالزرده بابخيله..
مروة بضحكه:سلمك جيابه..
مناسك؛قولي سلمك جياب..كله من مالك..
خفتت ضحكتها ووجهها احمر وهي تقول..
/علاش يكلف في روحه..
مناسك؛من طرف الجيبه ع قولة السوريين وبعدين مش خسارة فيا..خدت منها الروايه وحطتها بعيد وقالت..هي نوضي معاي..
مروة ابتسمت وقالت؛هيا..ونزلوا الزوز من السرير ومروة تقول...
/جاب كوكيز..
مناسك؛ياعيني من غير مانقوله..
يدوب ابتسمت وخدت من الكياس وطلعت بيهم..
ومناسك طلعت بالباقي وراها وهي تشوفلها بإبتسامه شك..
🍃🍃🍃🍃🍃
وبعيد عنهم..
في احد المولات في العاصمه..
كانت خديجه جايه مع راما..عجبهم المول وهما يدوروا فيه لعند ماتلاقوا مع اسماء وخالاتها..
كانت اشكالهم تبين انهم ناس من الطبقه الراقيه وهالشي عجب خديجه..لكن اللي ماعجبهاش مرافقه بنتها لأسماء اللي كانت تبان اكبر منها...
قعمزوا مع بعض ع طاوله وحده وفتحوا مواضيع وانسجموا في الهدرزة.
بعدين قررت مروة تنسحب بالبنات الصغار من القعده بش يدهوروا في المول..
🍃خديجه:مانقدرش نخليها دور في مكان كبير ومزحوم واني مش معاها..
وحده من خالات اسماء:مش صغيره بش تخافي عليها تريح وبعدين مش بروحها معاها الصبايا..
وحده تانيه قال:ماتعقديهاش خليها تدهور وتعيش حياتها ايام كنا في عمراهم ماريناش ربع اللي هما فيه توا..
:صح ساد حني انحرمنا..
خديجه ع مضض واقفت وقالت..
/باهي بري معاهم لكن ماتعطلوش..
اسماء:حاضر خويله..هيا يابنات..
ومشوا مع بعضهم...وتباعدوا عن المكان اللي فيه النساوين الكبار..
وبدوا يتصرفوا في تصرفات بعيده كل البعد عن الحياء والادب..
مايفوتوش الا وسط مجموعه شباب وهما يوزعوا في الابتسامات واللي يتحرش بيهم لفظيا كانوا يردوا عليه بمياعه وضحك..
وفي منهم خدوا ارقام شباب..الوحده فيهم تلم رقمين تلاته..
بس راما اللي كان الوضع مش مريح بالنسبه ليها لاكلمت حد ولاشافت حد ولاخدت رقم حد..
ومكملين في مشوارهم واصوات ضحكاتهم المايعه تصدح في المكان بقصد لفت انتباه الشباب..
لعند مانزلوا تحت بالدروج الكهربائيه..
وكل وحده فيهم مشت في تركينه لموعدها الغرامي ..
راما كانت مصدومه..خدوا فوق ارقام شباب وهدرزوا ع شباب وتوا متواعدين مع غيرهم..
ومنهم اسماء اللي تعرفت ع واحد من جماعه"الكابوات" ومشت قعمزت معاه ع طاوله وراما بروحها ع طاوله تانيه تراجي فيهم..
الشاب اللي كان مع اسماء قعد يسرقلها في النظر بدون ماأسما تحس عليه..
وراما لاحظاته..خافت منه..وقعدت تتجاهل فيه...
🍃🍃🍃🍃🍃🍃
"اني نشجع ع الزواج المبكر صراحة ع اللي نشوفوا فيه توا لاعاد في حياء ولااخلاق ولاحشمه الواحد بدي يكره الطلوع بش مايشوفش مناظر تقشعر لها الابدان الله المستعان"
نجاح؛فعلا..عندي في المدرسه بنات لو نحكيلكم ع اللي يديروا فيه تحطوا ايديكم ع روسكم..
نجمه:الله يجيرنا ويستر ع ولايانا..
عواطف:المصيبه توا..انك تلقي وحده متعرفه ع خمسة سته وعايشه جوها معاهم زي ما يديروا الشباب بالزبط..
فايزة؛موليه موضه توا..
مطيره:اني نحير في ماليهم وينهم عن صغارهم سوا بنات ولا ولاد..
نجاح؛معاش في من يربي كويس توا الا من رحم ربي يجيبوا ويطلقوا..
عواطف:تعرفوا مرة جتنا حاله في المستشفى لبنيه عمرها بالك 16سنه فمها متشوه من عمليه حقن فيلر..
كلهم انصدموا..
ومطيره قالت..
/غبارة!
عواطف:وامها هي اللي رفعتها للمركز بش تنفخ شواربها تبيها تولي ملفته للأنتباه بش تزوجها لواحد معبي..طبعا هي ماقالتش هكي لكن هدا اللي مولي دارج بين الامهات وقتنا هدا..
زينب:الله المستعان والله الواحد ماعارف شن يقول..لكن قاعده ع رأي اللي عندها بنت مجرد ماتبلغ تزوجها طول استر واعف..
نبيله:علاج الغلط بالغلط..عندك علم ان في قضايا طلاق سببها الخيانه من زوجات قاصرات تلقيها متزوجه وقاعده مع صاحبها اللي تعرفه قبل الزواج..
فردوس:اللهم استرنا فوق الارض وتحت الارض ويوم العرض..
طوبى:الخلل في التربيه...لو لقوا من يربيهم كويس راهو ماوصلوش لهالمرحله من الفساد..
نبيله؛مزبوط..الربايه الكويسه ع الدين والعادات المقبوله هي العلاج..للأسف توا اغلب الاباء والامهات مش مؤهلين لتحمل مسؤولية تربيه صغار ...
نجاح؛يعني تخيلوا اب وام مش مؤهلين يزوجوا بناتهم اللي ماعرفوش يربوهم متخيلين الجيل الجاي كيف بيكون شكله!
كلهم باصوات متقطعه..
"صدقتي..الفجي..الله يجيرنا"
طوبى؛ربي يقدرنا ونربوهم كيف ماتربينا..
بعضهم بأصوات متقطعه..
/آمين..
نجمه؛شن حال غرفه ووليداتها؟
فردوس؛هونا حاطين في القربولي..
نجاح؛ع خاطر البحر..
نبيله بإبتسامه:سكر راسه بوهم قال نمشي ونرفعهم معاي..
فردوس:ان شاء الله مايمرضوش..
مطيره؛لالا غرفه خوافه تو ترد بالها عليهم..
نجمه:ربي يحفظهم ان شاء الله..
هما بأصوات متقطعه..
"امين..سلمك.."
🍃🍃🍃🍃🍃🍃
ونسرين في حوشها..قاعده مع ولدها بروحهم وهو بتقلب جنبها من غير ماتركز عليه..كانت في حالة قلق ع ولدها محمد اللي ليه فتره مسكر النت...
🍃🍃🍃🍃🍃
الساعه 8:00مساءا..
خش اشرف للحوش وهو معصب..توجه للصالون وهو ينادي..
/يما...
ع جيتها من دارها بقلق قالت..
/خيرك ؟
اشرف بغضب:شن هالحال يام..كيف تطلع هديكا مع بنتها في السيارة ويروحوا في المغاريب برواحهم..
نجمه:ياسيدي خوك راضيه مالناش علاقه..
اشرف:كيف مالناش علاقه!؟ مش لينا يام هي كنتنا وبنتها بنتنا كيف تقولي مالناش علاقه!
نجمه؛وخيرها بنت كعبار ماتكلمتش عليها اللي طالقه شعرها وتلبس في السراويل وتطلع للشارع ومافيش عين ماتشوفش فيها!؟
اشرف بضيق؛شن دخل بنت كعبار توا!؟
نجمه:زيها زي بنت شنيبه محسوبات عليها والزوز امهات بناويتنا ولالا؟!
سكت ومعاش عرف بشن يرد..
نجمه؛ياسيدي مادام تريسهم راضيين احني مالناش علاقه كل حد عقله في راسه ويعرف خلاصه..
ومشت للكوجينه وخلاته واقف في مكانه دمه يغلي في عروقه من الغضب...
🍃🍃🍃🍃🍃
"هاك اشرب"
الجالي بآستغراب؛هدا شني؟
مغليه:دوا باهي ليك..
الجالي:باهي شن هو؟
مغليه بنفاد صبر؛حلتيته..تعرفها الحلتيته!؟
الجالي وهو مصدوم؛لا مانعرفهاش لكن حاضر تو نشربها.
خدي منها الطاسه وبدي يشرب بعدها وهو مشمئز
وقال:تي شن هدا!؟
مغليه؛اشربها كلها من غير دلع هيا..
هو في نفسه قال.."غير شن جابني بس!'
وقعد يشرب من الطاسه غصب عنه وامه واقفه عليه زي العسكري تراجي امتى يكملها...
~~~~~~~
الساعه 11:00ليلا..
في دار نوم مغليه اللي كانت تكلم في.بنتها خديجه.هاتفيا..
مغليه؛راجيته يرجع لكن بلافايده..
"يام ربي يهديك والله ماهو مسحور"
مغليه؛لالا خوك مش بلاش اللي شاد فيها بعد اللي دارتهوله حتى بوك قالها..
"مالقي مايقول بوي"
مغليه بإمتعاض:قطفي..
🍃🍃🍃🍃🍃🍃🍃
"غدوة بنرفع ابتسام لحوش نجاح"
سميره وهي تكوي في حوايج ولادها..
/نعرف خبرتني نجاح..
عبد الفتاح:لأمتى ياسميرة حالك هدا؟
سميره:اما حال؟
عبد الفتاح؛سميره ماتتعامليش ببرود هكي! اللي يشوفك يقول عرفتي توا!
سميره؛عبد الفتاح..حطت المكواة ع جهة وقالت..اني توا قاعده ع خاطر صغاري وبس ومعاش يهمني حد تاني..وانت هاك خديت المراة اللي تحبها وامك علمت بيها وتقبلت ومعاش في مشاكل..عيش حياتك وخليني نعيش حياتي..
عبد الفتاح بعدم استيعاب..
/معاش فهمت شي!..شن جد عليك علاش توا جايه تقولي في الكلام هدا!؟
تماسكت ع قدر ماتقدر وقالتله بهدوء ظاهر عكس اللي داخلها...
/مانبيش نفقد احترامي نفسي مرة وحده..
قعد يشوفلها بنظرات ضيق بدون مايعلق ع اللي قالاته..
وهي تشوف بنظرات برود مصطنعه..
شويه قاللها؛ع راحتك..تصبحي ع خير..
رجعت تكوي في الحوايج وهي تقول..
/وانت من اهله..
تمدد وحط راسه ع المخده وهو مضايق..
وهي وراه تذرف في الدموع اللي تساقطت ع قميص واحد من ولادها وبسرعه جففتهم بالمكواة بعدين مسحت دموعها وشدت روحها عن البكي....
🍃🍃🍃🍃🍃🍃
وتاني يوم...
مع الظهر...
كانت ابتسام بصغارها في حوش نجاح..
تعرفوا الصغار ع ولد عبد الحفيظ.وقعدوا يلعبوا مع بعض..
ونجاح وابتسام مع بعض يهدرزوا حداهم...
🍃ابتسام بضيق:اني والله ماكنت نعرف انها كنة حوش شنيبه اللي في شارع القهوة..ارتحتلها وحبيتها وحكتيلها قصتي.من باب الفضفضه..وهي دارت نفس شي وقعدت تحكيلي ع اللي داراته فيها خديجه اللي مش سالم حد من شرها..حكتلي كيف كانت ماتحبهاش لما كانت مرت خوها المتوفي وشن دارت فيها بعد ماعرفت انها متزوجه التاني في السر جبراته يتزوج وحده من بنات الشارع بش تخليه يطلقها..
قاطعت نجاح ابتسام وقالت بعدم استيعاب..
/راجي شويه ابتسام..انتي تحكي ع نجاة كنة حوش شنيبه..
ابتسام:ايه؟
نجاح وهي تحاول تستوعب..
/نجاه تزوجت واحد.تاني من ولاد شنيبه وخديجه بعدين خلاته ياخد عليها وحده من بنات الشارع!..
بصدمه غمضت عيونها وحطت.ايديهاع.وجهها..
ابتسام:بنت الواعر قالي عبد الفتاح..
حولت ايديها وقالت..
/حتى عبد الفتاح يعرف!؟
ابتسام:لا ماقدرتش نحكيله اني حكيتلك بش نوريك دناءة خديجه لوين توصل..
نجاح وهي.تشوف للفراغ بحزن وصدمه قالت..
/علاش هكي ياخديجه شن دارتلك المسكينه بش ديري فيها هكي! ياروحي عليك ياطوبى...
#مارغريت
#طوبى
....يتبع...
