#طوبى "جنة طوبى"
#جمان_فريد
#الجزء_الثاني_والثمانين "مارغريت 2"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء 🌼
سمع النبي صلى الله عليه وسلم رجلا يقول:
اللهم إني أسألك بأني أشهد أنك أنت الله الذي لا إله إلا أنت.
الأحد الصمد الذي لم يلد ولم يولد، ولم يكن له كفوا أحد.
فقال: " قد سأل الله باسم الله الأعظم الذي إذا سئل به أعطى، وإذا دعي به أجاب "
. أَخْرَجَهُ الْأَرْبَعَةُ، وَصَحَّحَهُ ابْنُ حِبَّانَ.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 نحنُ يُندم علينا ولسنا بنادمِين نحنُ الخسائر ولسنا الخاسِّرين 🍃
________________________________________
🍀بعد مرور ايام🍀
☘☘☘☘☘☘
كانت الاحوال كما هي عليه..الحياة صارت بخط مستقيم هدوء في داخله دوشه مالها حد...
والمثقل بالهموم..يايهرب منها..يايراجي في فرجها...
وفي من بايت يخطط وقاعد يستنى في ساعة التنفيد..
وفي من عايش حياته عادي لاعنده هم يفكر فيه ولافي شي خايف منه ولاعنده هدف مخطط يوصل فيه مريح ومرتاح..
☘☘☘
حاليا في الايام الاولى من شهر سبتمبر..ع اعتاب فصل الخريف..
حرارة الجو بدت تخف..بس الرطوبه مازال عاليه..وضع الكهرباء نوعا ما تحسن..
وفي شارع القهوة..في واحد من الحياش صاحبه كان مريض ومسافر برا بش يدير عمليه..دارها وروحه وبدوا الناس يزوروا في اهله بش يتحمدوله بالسلامه..
اول يوم زياره اغلب الجيران مشوا وع راسهم مغليه..
تاني يوم مشوا نساوين عيلة الواعر..مطيره وفردوس وغرفه مع بعض من الجارات اللي ماجوش اول يوم...
ثالث يوم مشت نجمه اللي كانت تعبانه شويه اليومين اللي فاتوا وفي هاليوم بس قدرت تمشي دير الواجب..
ولقت غادي زوز من الجارات والباقي عيلة واقارب المريض..
ودار بينهم حديث..
وزي مايقولوا هدرزة تجيب هدرزة..
🍃نجمه:نحس فيه مولي ع رجليا هلبه مرات لين معاش نقدر نوقف..
:الفقرات ياما يديروا..ديري عمليه خيرك بس ترتاحي..
نجمة بضيق:الحق نخاف من العمليات لاقدر الله ندريها عند حد مايفهمش نكون في شي نصبح في شي تاني..
:ديريها في تونس علاش ديري فيها هني اختي دارتها في تونس وتوا الحمد لله حالها خير من قبل..
نجمه بشي من القلق:يستر الله..
:ماتسكتيش ع روحك يانجمه مرات تزيد تصعب حالتك وتصريلك مضاعفات لاقدر الله..
:عندها حق اشقي بروحك بسرعه..
هزت نجمه راسها مسايرة وقالت..
/إن شاء الله..ان شاء الله..
:والله كلنا نعانوا منهم هالفقرات كبار وصغار..
:صدقتي مافيناش قوة نساوين زمان..
:صح..
سكتوا شويه بعدين صاحبة الحوش قالت..
/نسيبتك جت اولامس وجابت معاها بناتها و كنتها نجاة..
نجمه:قبل بنجوا جميع غير اني تعبت يومتها..
:ايه قالتلي..لكن مستغربه في نجاة ولت وين ماتمشي معاها حتى في لمة بنت مهيبه جابتها معاها..زعمه مش واخدتها للمهدي غير مايبوش يقولوا..
نجمه:لالا علاش بيدسوا كان خدوهاله؟
:مش عارفه قاعده عندهم وين ماتمشي معاهم ومافيش بينها وبينهم رابط مستغربتها الحق..
نجمه؛ياوخيتي شانهم وهما حرين في ارواحهم مالناش علاقه بيهم..
وحده تانيه من الجارات قالت..
/لكن طالعة دوة ان الجالي بيرد طوبى خلاص حق؟
نجمه:ياوخيتي ماسمعتش..
:يومتها بعتولنا من عقيقة البنيه..
نجمه؛ايه صح بوها بعد ماروح من السفر دارلها عقيقه..
:وقالوا بعتوا منها لحوش الواعر معناها الكلام حق..
نجمه؛ياودي مش باين..الايام اللي فاتوا مشينالهم اني وبناويتي ومانذكرتش الدوة هادي قدامنا..انتم كان تشوفوها كيف راحت من الهم مسكينه اقسم بالله تشوفوها ماتعرفوها راحت عزوز..الوجه زي القرش..الشعر شايب الهم باين في وجهها..
:لاحول ولاقوة الا بالله..
نجمه؛مش وجه وحده عاجبها حالها ولاراضيه بيه..كان حق دور في سبل بش تطلق زي ماطلع عليها راهو مش هدا حالها..الفجي فيها مسكينه..
:ياوخيتي في دوة طالعه الفترة اللي فاتت تقول ان سبب المشاكل بين طوبى وراجلها نجاة..
:حتى اني سمعت هكي...
وحده من قريبات المريض:ياوخيتي مدام عايشه معاهم وخاشه فيهم توقعوا كل شي..
نجمه؛اللي نعرفه انهم يفكروا بياخدوها للمهدي غير هكي مانعرفش..
:لاكان يبوها لخوه معناها الدوة مافيش منها..
:الله اعلم الحق وين..لكن هي عطيها دعوة جميلة هلبه وماتنعطاش عمرها..
:صح قنينه ونويزكه واسلوبها راقي وعلاقتها بخديجه ومغليه تحسيها كويسه..
:كان مش كويسه علاش وين مايمشوا يرفعوا فيها معاهم!؟
:ولاعلاش يسكنوا فيها حداهم..
:اشبح الحق وين ومع منو والله معاد تعرفي حاجه..
نجمه؛يقولوا البيوت اسرار مهما تكون قريبه ع حد ماتعرفيش شن يصير عندهم وين يسكروا عليهم باب حوشهم اختك اللي هي اختك مرات اللي ماتعرفيشي عنها اكثر من اللي تعرفيه..
:صدقتي..
نجمه؛مانقولوا غير ربي يهدي النفوس ويصلح الحال وخلاص..
ردوا عليها بأصوات متقطعه..
"صح..ايه والله..ربي يفرج على عباده"
🍃🍃🍃🍃🍃
"ماما امتى بنطلعوا ناخدوا حوايج المدرسه؟"
نجاة وهي تخدم ع اللاب توب:الخميس ان شاء الله ماعنديش خدمه هلبه نروح بكري ونطلعوا..
جوري:باهي..
لهت نجاة بخدمتها وحداها جوري تشوفلها بتردد..
نجاة رجعت شافتلها وقالت:شن تبي؟
جوري:نبي نكلم خالتو..
نجاة تنهدت بعدين خدت تليفونها من ع الطاوله..فتحت الرمز وعطاته لبنتها..
خداته جوري وهي فرحانه ومشت تجري بيه لدار خوها حمزة..
🍀في هالوقت..
كانت صابرين طالعه للسوق تشري في حوايج وحاجات ناقصتها..
واللي رفعها رضا اللي قاعد يستنى فيها بالسيارة...
بعد ساعات دهورت فيهم لين تعبت..
طلعت وهي محمله بالأكياس..ورضا لما شافها نزل بش يأدي وظيفتها ومشالها خداهم عنها وتوجه للسيارة..
وهي لحقاته...رجاته ركب الاكياس في السيارة من الخلف..
بعدين فتحلها الباب ركبت وسكره ومشي ركب هو...
وهي فالسيارة..
طلعت مرايه تشوف فيها شكلها كيف كان..
وهو يدوب سرقلها النظر..بعدين وجه نظره القدام وتحرك بالسيارة...
بعد ماساوت صابرين هيئتها دست المرايه في الشنطه يجيها اتصال..
طلعاته تليفونها وشافت المتصل..ضيقت عيونها..بعدين فتحت الخط وردت..
/نعم..
"خالتو"
بدت ع وجهها ملامح الفرح واللهفه وهي تقول..
/ياعيون خالتو..
"استاحشتك هلبه"
هي قالت بعيون مدمعه..
/واني اكثر ياقلبي..وينكم معاش اتصلتوا بيا؟
"ماقدرناش"
هي قالت بضحكه ودموعها نزلوا..
/مش مهم ياعمري المهم سمعت صوتك..
رضا جذب انتباهه كلامها وقعد يشوفلها من المرايه..
صابرين؛وين حمزه ومعاذ؟
"اهو شويه بس ونعطيهولك خالتو"
صابرين؛حياتي..
"غدوة ماما بترفعنا للسوق نشروا حوايج المدرسه تجي نشوفوك"
بضحكه فرح قالت..
/ياريت ياعيوني..
"خلاص غدوة نكلمك مرة تانيه ونقولك وين نمشوا وتجينا باهي"
مسحت دموعها وشدت بكاها وهي تقول..
/باهي ياقلبي باهي..
"هاكي حمزة"
صابرين بإبتسامه:هاتيه هي..
غيرت نظرها للمرايه لقت رضا يشوفلها..تبدلت نظرات عيونها للحده..وهو غير عيونه عنها للطريق..
ضحكت لما سمعت صوت حمزة وقالت..
/حموزي حبيبي..شن حالك
وقعدت تهدرز ع حمزة وتسأل عن احواله وصحة يده..بعدين كلمت معاذ بلغة طفوله تشبه اللغه اللي هو يتكلم فيها..
ورضا غصب عنه يوجه في انظاره ليها ويسمع ويشوف في حالتها اللي كانت مشاعرها فيها مختلطه..
بين حزن وفرح وشوق والم..
صابرين؛خلاص غدوة نتلاقوا ياعيوني..تمام سلام ياقلباتي..سلام..واني نموت فيكم...
وماسكرتش لين هما سكروا..نزلت التليفون وتنهدت بألم ورجعوا دموعها ينزلوا..
"صغار اختك؟"
رفعت عيونها فيه بحده وقالت..
/مادخلش ركز في الطريق..
ببرود غير نظره للطريق بدون مايرد بكلمه...
وهي غيرت نظره عنه لشنطتها طلعت منها كلينكس ومرايه..
وقعدت تساوي في شكلها..
🍃🍃🍃🍃🍃
"محتارة ومش عارفه نكمل معاهم ولالا"
طوبى وهي شاده طاسة ميه..
/انتي شن تبي؟
آلاء:نبي نكمل الفلوس اللي يجوني منهم خير من خدمتي بروحي ولافي المعمل..
طوبى:خلاص توكلي ع الله وكملي..
ومشت قعمزت وبدت تشرب..
والاء ناضت وهي تقول..
/خلاص نمشي نكلمهم..ومشت طلعت من الكوجينه..
وخلت خالتها تفكر في وضعها...
نزلت الطاسه وحطتها ع الطاوله وهي سرحانه بتفكيرها..
وقت التنزيل قرب ولعند لهالحظه مازال ماقررتش توقف قيدها ولاتكمل..
باهي كان كملت حتقدر تبعد عن بنتها لساعات وهي مازال صغيره ومحتاجتها..!؟
باهي كان وقفت قيدها شن ضمنها انها ماتكسلش وتنعدم عندها الرغبه ومعاش تكمل بعدين..!..
ناضت من مكانها..ومشت طلعت للجنان..
قعدت تتمشى فيه وهي تفكر ..
لين وصلت في الجنان الخلفي..
وقفت لما جو عيونها ع سيارة سدرة المغلفه بغطا ابيض...
قعدت لدقايق واقفه تشوفلها والافكار دور في عقلها..
شويه..خدت نفس..بعدين رفعت عيونها وقالت..
/يارب..نزلت عيونها وهي تشوف القدام بحيره وتدعي..
اخترلي ولاتخيرني فأنت خير من يختار..
🍃🍃🍃🍃🍃🍃
"اهي القهوة ومعاها طريفات الدبله اللي تحبها"
خدي الفنجان ومعاه طرف من حلو"الدبله"..
وكلي منها..
وهي قعمزت جنبه بعد ماخدت فنجانها وبدت تشرب..
عبد الفتاح:انتي ديري فيها قنينه الله يبارك لكن ماتجيكش خفيفه زي اا..اللي دير فيها امي..
هي بإستغراب؛وعلاش ماقتليش قبل؟
حاول يخفي ارتباكه وهو يقول..
/في بالي من قبل بس قلت نقولك المرة هادي..بالك يعني القدام تطلع معاك احلى..
ابتسام بإبتسامه؛حاضر تو نجرب نديرها بطريقه تانيه بش تجيني زي ماتبيها..
هز راسه وغير نظره للتلفزيون وهو يقول في نفسه..
"خيرك شن جاك!؟ اول مرة تاكلها منها!؟"..
عقد حواجبه بضيق ورشف من القهوة..
وابتسام تراقب فيه...
🍃🍃🍃🍃🍃
"شن تشبح فيا اني وياه"
:مستغرب فيك يام كيف متحمله..
سميرة؛علاش شن دار فيا بوك!؟ ضربني ولاحرمني! معيشني معززة مكرمه مش منقص عليا شي..وبعدين الامور هادي تخصنا اني وياه انتم مالكمش حق تتدخلوا فيها..علاقتي ببوكم شي وعلاقتكم انتم بيه شي تاني...
هز ولدها راسه بضيق وهو ساكت..
سميره؛ولدي اشبحلي..
قام عيونها اللي كلهم حزن فيها..
سميره:اني عايشه بيكم وع خاطركم..ومايهمني شي غير اني نشوفكم مرتاحين وناجحين وعايشين حياتكم صح..نفرح ع خاطركم ونزعل ع خاطركم لأنكم اهم عندي من نفسي..ماتزعلونيش منكم وتخيبوا املي فيكم باهي؟
تنهد ولدها وقالت؛حاضر يام..وقرب منها باس راسها..
وهي طبطبت ع ذراعه وقالت..
/خلاص برا اطلع لصحابك وروح قبل 11..
:حاضر..ابتسملها..بعدين ناض من حداها ومشي طلع..
وهي قالت..
/اللهم اني استودعك اياهم...
🍃🍃🍃🍃🍃
ورا رخامة البار مقعمزه..حطت امها قدامها سفرة الشاهي مع الحلويات الزمنيه وقعمزت مقابلها وقالت..
/شن رايك في الحوش؟
اميمه؛الله يبارك..لكن كيف دايره فيه بروحك؟
صفيه:والله مانحكيلك راحة مابعدها راحه نضم اللي نقدر عليه وهو مرة في الاسبوع يجيب مراة ضمه كله..
اميمه بإبتسامه:كويس..
صفيه؛حطي عقلك في راسك وتعالي هني..
اميمه حركت راسها بالرفض وخدت فنجان الشاهي وشربت منه..
صفيه؛فقريه يابنيتي..
ضحكت اميمه بعدين قالت؛وينه هو لتوا؟
وينفتح باب الحوش..
صفيه:اهو خش...
وشويه وخش عليهم حسين وهو يقول..
/يامرحبا بالدكتورة مرحبا..نوريتينا..
ناضت وسلمت عليه بالخد وهي تقول..
/كيف حالك..
حسين؛الحمد لله..
قعمز جنبها وهي ولت لمكانها وقالت..
/عطلت؟
حسين؛قصدك تغديتي هني؟
صفيه:لا مالهاش هلبه جايه..
حسين؛مالا علاش تقول عطلت!؟
اميمه؛قصدي ع الموضوع هداكا..
حسين سكت شويه بعدين قال..
/ياستي الزوز كلوا طريحة ماكنه وواحد منهم لزوه من المستشفى والتاني سحبوا منه الشهاده بكل..
اميمه بدهشه:مني فيهم!؟
هو قال؛الكلب قصي..
هي بذهول؛الله ! هدا اللي كنت بيه من الاول..
صفيه؛يستاهل المريض هدا ياشماتي في امه واخته..
ضحكت اميمه وهي فرحانه..
حسين؛ولي للخدمه خلاص..
اميمه؛واخيرا..اتصلوا بيا هلبه من المصحة يراجوا فيا نولي.
اما المستشفى خلاص معاش نبيها..بنكمل تدريبي في المصحه..
حسين:حتى هادي تمت..
اميمه براحه:الحمد لله...
صفيه:سلم وخيها ياربي..عقبال ماتفرحنا انت..
حسين :راك تملي يام..
صفيه:بنقعد وراك لين تعقل..
وقعدوا يتناقشوا قدامها وهي تسمع فيهم وع وجهها ابتسامه..بس فجأة هالابتسامه خفت لما جي لعقلها سؤال مهم..شن بيصير بعدين؟ هل حيكون هدا حد المشاكل اللي تتعرضلها ولامازال حتشوف القدام زيها وممكن اسوأ؟!...
🍃🍃🍃🍃🍃
"ماقتليش قبل!"
الشارف وهو مقعمز مقابلها..
/كله صار توا مستعجل يعني..
عواطف بضيق..
/باهي قداش بتقعد غادي؟
الشارف؛لتوا مش معروف 15 يوم شهر مش عارفه..
عواطف بصدمه..
/معقوله المده هادي كلها!
الشارف:الله غالب مش بيدي خدمتي هادي ماعندي ماندير..
بضيق شديد قالت..
/باهي وين بنقعد المده هادي كلها!..
الشارف:علاش ماليك مايبوكش تقعدي عندهم؟
هي قالت؛لامش هكي..لكن الحق متحشمه ليا شهر بس متزوجه وبمشي نقعد عندهم شهر!..
الشارف:ع العموم اني مش مخليك في حوش ماليك..
هي بشي من اللهفه:معناها بترفعني معاك؟
الشارف:اني ماشي نخدم مش ندهور مانقدرش نرفعك معاي..بنخليك في حوش ماليا..
انصدمت عواطف..
الشارف:حتى مرتي الاولى هكي كان وضعها نسافر تقعد في حوش العيله..
هي ومازال في حالة صدمه..
/قصدك بنقعدوا مع بعض غادي!
هو بدي عليه الارتباك بس حاول يخفيه وقال..
/قتلك قبل قاعده متحسسه وبش ماديرلكش مشاكل بنخليها في حوش ماليها..
عواطف في نفسها..
"والمصيبه عمتك كيف ندير معاها!:
الشارف؛السفر زي ماقتلك بعد غدوة وغدوة ان شاء الله من الصبح بنرفعك غادي..
عواطف هزت راسها بالموافقه اجبارا مافي فيدها شي ديره..
كمل الشارف يقول..
/ايه وفي حاجه نبي نوقظك عليها من توا..مانبيش عمتي تعرف اني نمشي للمراة الاولى..
هي بإستغراب قالت..
/علاش..
هو اللي كان يتظاهر بالثبات عكس الارتباك في داخله..
/صايرة بيناتهم شوية مشاكل..
عواطف بعدم فهم؛باهي وكان صايره بينهم مشاكل انت شن دخلك!؟ وهي شن دخلها بينك وبينها!؟
هو قال:مش تدخل..لكن عمتي ماتتحملش تسمع اسمها مضايقتها هلبه واني الحق نخاف ع عمتي وزعلها..
عواطف ماخشش راسها الكلام..وزاد الشك كبر في داخلها..مع هدا مابتش تكثر اسئله ولانقاش وقالت..
/باهي..زي ماتبي..نوتيلك الشنطه؟
الشارف؛ساكو مش شنطة مرات مانطولش..
ناضت وهي تقول؛حاضر..
ومشت طول لدار النوم...
بعد مامشت..هو خدي تليفونه من فوق المندار المقعمز عليه..خش ع الرسايل وبدي يكتب في رساله لشخص ما وبعد ماكمل بعتها...
🍃🍃🍃🍃🍃
الساعه 10:00ليلا..
في دار المعيشه..
مقعمزات قدام التلفزيون يتفرجوا ع مسلسل يومي..
فردوس وبناتها..وطوبى وجنة ع حجرها فايقه..
كانوا منسجمين مع احداث المسلسل ماعدا طوبى اللي كانت تفكر بتردد تفتح موضوع ما..
قطعوا المسلسل بالاعلانات..
الاء:مبردهم هما ودعايتهم..
اريج؛اطول من المسلسل نفسه..
فردوس وهي تشوف لجنة..
/تحرك في ايديها..
طوبى وهي تشوف لبنتها بإبتسامه..
/ايه..كل يوم تكبر وشكلها يتغير...
تنهدت بعدين قالت..لكن مش عارفه كيف ندير لما تبدا القرايه..شبحتلهم وقالت..زعمه نوقف قيدي السيمستر هدا!؟
اريج؛علاش! خلاص وصلتي للنهايه راهو..
الاء:كان وقفتي توا مااعتقدش تولي..
طوبى:هادي اللي خايفه منها..
فردوس:ماتوقفي شي كملي قرايتك سلم وخيتي وكانك ع بنتك اني قاعده ماوراي شي..
طوبى بضيق؛غير بنتعبك فيها وخلاص..
فردوس:العفو! راهي هادي بنتي حتى اني!
اريج:خلاص بيبو احسمي امرك وكملي جنونه في ايد امينه..
الاء:غلط في ايد فردوس..
قعدت تشوفلها اريج للحظات بعدين عطتها بالمخده ع وجهها..
الاء بضحكه؛ياكلبه..
فردوس ؛تستاهل..المهم زي ماقتلك اقري وماتخمميش في جنة بكل..
طوبى وهي تشوفلها بإبتسامه..
/تسلميلي دوستي..
فردوس وهي مبتسمه بحب..
/وينجيكم ليا..
اريج؛كلنا ولا بيبو وبنيتها بس!؟
فردوس:لاطوبى وبنتها بس شن رايك!؟
ضحكت طوبى..
الاء:كان قعدتي ساكته..
اريج؛انتي سكري فمك..
الاء؛قادره غير عليا اني.
اريج؛شن تبيني نضرب امي هديكا انتي ديرها مش اني..
شهقت الاء بصدمه..
فردوس بإنزعاج؛خلاص انتي وياها ولاكلمه مانبيش نسمع حس..
سكتوا الزوز وهما يتبادلوا في النظرات الحاده والشتائم بهمس..
طوبى بضحكه؛في حاجه تانيه نفكر فيها..
وجهوا انظارهم ليها..
طوبى؛نبي نستعمل سيارة سدرة..
فردوس:احسن شي خير ماتقعد واقفه هكي..
طوبى هزت راسها بعدين قالت..
/غدوة ان شاء الله نظفها ونغسلها..
اريج؛معاك نتعاونوا عليها..
طوبى؛تمام..
وبدت جنة تبكي..
فردوس:شكلها جاعت..
طوبى رفعتها وباستها من خدها بلطف وقالت..
/لك خسى الجوع ياقنين يادلوع..
وهما حواليها يشوفلهم بإبتسامه..
بعدين الاء شافت للتلفزيون لقت الاعلانات تمت ورجع المسلسل..قالت..
/واخيرا..لين نسيت شن صار قبل الدعايات..
🍃🍃🍃🍃🍃
"المرة الجاية عندي ان شاء الله"
محمود وهو مبتسم بإرتباك بعض الشي..
/ان شاء الله ان شاء الله..
المهدي وهو يتفحص في ملامح قال..
/طلع اللي في بطنك طلعه..
محمود؛نعم؟!!
المهدي؛في حاجه تبي تقولها من بكري.وحسيت وزعت الجماعه بش تحكيلي لكن قعدت متردد.
تنهد محمود وقال..
/الصراحه..انت تعرف من خواتي ماقعد حد الا حنان..وامي ديما مشغوله عليها وتقولي نبي نفرج بوخيتك يا ولدي قبل لتدرق عيني..وزي مايقولوا اخطب لبنتك وماتخطبش لولدك..
..رفع المهدي حاجبه اليسار وهو يحاول يتوقع اللي يبي يقوله محمود..
محمود؛واني بصراحة بصراحه..عاجبني التارقي هلبه..
بدت ملامح الارتياح ع وجه المهدي لما تأكد اللي في باله كان غلط..
محمود وهو محرج..
/الحق مانعرفاش زي ماانت تعرفه لكن الراجل ظاهره كويس هلبه..انت شن رايك؟
المهدي؛ماعندي مانقول فيه ونعم الرجل..
محمود بإستبشار:باهي الحمد لله..لكن قعدت مشكله..كيف بنفتح معاه موضوع زي هدا!!..قال كلامه الاخير باحراج..
المهدي قعد يشوفله شويه وهو يفكر بعدين قال..
/خليه عليا..تو نجس نبضه..
محمود؛يعني نعبا عليك..
هز المهدي راسه وقال:واللي فيه الخير يجيبه ربي..لكن..متأكد ان مافي حد في عيلتك ممكن يعترض عليه بعدين !!؟مانبيش الراجل ينحط في
