#طوبى "جنة طوبى"
#جمان_فريد
#الجزء_الثاني_والثمانين "مارغريت الأخير "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء 🌼
سمع النبي صلى الله عليه وسلم رجلا يقول:
اللهم إني أسألك بأني أشهد أنك أنت الله الذي لا إله إلا أنت.
الأحد الصمد الذي لم يلد ولم يولد، ولم يكن له كفوا أحد.
فقال: " قد سأل الله باسم الله الأعظم الذي إذا سئل به أعطى، وإذا دعي به أجاب "
. أَخْرَجَهُ الْأَرْبَعَةُ، وَصَحَّحَهُ ابْنُ حِبَّانَ.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 منذ أن عرفتكِ و حتى هذا اليوم
لم تمضي ليلة لم أحبكِ فيها 🍃
_________________________________________
متكيه ع الطاوله وهي تكتب ع ورقه ع الواقف..
شويه سمعت باب دار خوها انفتحت..
التفتت شافاته طالع وهي تقول..
/10كياس ليز..
ورجعت شافت للورقه وكملت كتيبه وع السريع طوت الورقه ومشت لخوها تجري..
مناسك؛ملوكي راجي شويه..
وقف والتفتلها وهو يشوفلها بملل..
وقفت قدامه مدتله الورقه وقالت..
/هما هادم جيبهم كلهم..
هو بعدم فهم..
/شن هما؟
مناسك بدهشه..
/كيف شن هما حاجات اللمة متاع صاحباتي..
عقد حواجبه وقال..
/نسيت..
مناسك:باهي هاك خودها..
مالك خدي الورقه بعدين حك شنبه وقال..
/كلهم بيجو ؟
مناسك "يسأل عن مروة"..
/ايه كلهم..
مالك؛حتى هديكا صاحبتك الجديده..
مناسك؛قصدك مروة..لالا مش جايه..
هو قال باندفاع:علاش!؟
مناسك شدت ضحكتها وقالت..
/عارف انت مشكلتها مسافة الطريق..
مالك؛وقداش ليها المشكله هادي محلوله..نطلع وراهم لما يروحوا..
مناسك بخبث..
/والله قلتلها قالت تحشمنا مع خوك هلبه وحني ديما متعبينه..
مالك؛تعب شني! اني طالع بيهم ولابلاهم عادي..
مناسك؛نفس الكلام قلته هي سكرت راسها..
هو قعد يشبح لأخته شويه..بعدين غير نظره عنها وقعد يفكر للحظات..
واخته مركزه معاه وهي شاده ضحكتها..
شويه مشي وقاللها..
/تعالي معاي..
هي لحقاته طول..
مالك؛امي..اوما...
"في الدار في الدار"
توجه لدار المعيشه ومناسك وراه..
وصلوها وخشولها...
لقوا فوزيه تكوي في حوايج..
قدملها وقال..
/فوزيشن..
فوزيه وهي تكوي:نعم..
مالك معاش عرف من وين يبدا قعد ساكت وهو يشوفلها..
هي رفعت عيونها فيه وقعدت تشوفله..
وعيون مناسك عليه وهي مبتسمه بخبث..
فوزيه:ايه خيرك!؟
هو مسح عينه اليسار وقال..
/شن بنقولك..حط ايديه في وسطه وقال..ايه تفكرت..صاحبات بنتك غدوة بيجوها وهديكا صاحبتها الجديده قالت مانقدرش نجي ع خاطر الطريق وقصه وقالت متحشمين مني ومش عارف شني..تنهد في نص الكلام وكمل يقول..فنبيك تكلمي امها تقوليلها ماعنديش مشكله نروحوا بيها حني..
فوزيه شبحت لمناسك..
ومناسك حطت يدها ع فهما وشدت خدودها بش ماتضحكش وهي تشوفلها..
ابتسمت فوزيه وشبحتله وهي تقول..
/حاضر..تونكلمها..
رفع اصابعه الابهام الزوز وقال..
/منورة..
قعدت تشبحله بإبتسامه تعجب..
هو ارتبك..ونزل ايديه وحط الورقه ع الطاوله وقال..
/تمام طالع..ماتحسبونيش في العشي..
ولف ومشي بيطلع وهو يقول..
/تشاو..
مناسك؛هييه الورقه..
وهو طالع قال..
/ابعتيهم في رساله..
مناسك بضجر؛ووواك..بنولي نكتبهم مرة تانيه..
فوزيه بضحكه..
/ركزتي عليه؟
مناسك بضحكه..
/ايه ليا فترة..
فوزيه بإبتسامه:عسوله البنيه وعيلتها تهبل..
مناسك؛ايه..
فوزيه بارتياب..
/لكن زعمه مش ناوي يضيع معاها وقت!
مناسك؛لا..كان هكي راهو قداش ليه واخد رقمها ومصاحبها..نحس فيه المرة هادي مش زي قبل..مرات نحسه يتحشم منها هلبه..
فوزيه بضحكه:زعمه حب بالحق المرة هادي!
مناسك؛هكي نحس..هي غدوة جايه راهو ردي بالك تكلمي امها..
فوزيه بضحكه؛صار هكي ياشفشه..
مناسك بضحكه؛كنت نبي نتأكد بس..
فوزيه:وهاك تأكدتي..لكن تعرفي كان حق..بنقعمز نهدرز عليه نشوفه كان ناوي معاها خير ولالا البنيه يتيمه وكويسه حرام يلعب بيها..
مناسك؛اني مانخليشي كله الا مروة..
ضحكت فوزيه بعدين حولت السوريه اللي كانت تكوي فيها وحطتها ع المندار وقالت..
/بتمشوا لأمكم السبت راهو..
تأففت مناسك بضيق..
فوزيه؛لا بتمشي تحسابي كان فوتي الجمعه بتفوتي باقي الاسبوع لا..
مناسك بضيق..
/ننغم لما نمشيلها..هدرزتها كلها ع بابا وعمايل بابا فيها وديما تتهزا عليكم الزوز..مافي مرة مشيت وكلمتني عليا اني سألتني عن قرايتي ولا أي حاجه تخصني تسأل كان وين مشينا ومن وين جينا وبوك شن داير ومرت بوك وين تطلع وشن تاخد وبلا بلا بلا بلا..متخيله ساعه كامله واني متحمله دراه الكبد هدا..
فوزيه:مهما كان بنتي تقعد امك..ديري ماديري هادي امك قدام ربي..
مناسك؛وياريتها ماكانت ..
قعدت تشوفلها فوزيه بعدم رضا..
هي هربت منها ومشت طلعت..
حركت فوزيه راسها يمين ويسار بأسف بعدين ولت بس تكمل باهي..فجأه..كحت"سعلت" بقوه..بعدين مسحت بيدها ع صدرها وخدت المكواة وبدت تكوي...
🍃🍃🍃🍃🍃
"انتي شن تقولي!"
خديجه وهي تتكلم بالتليفون..
/زي ماسمعتي..
"حي غبارة! معقوله هكي !؟"
خديجه:شن بنديروا هدا بوك وهدا رايه..
"كله منك انتي كله ياخديجه"
خديجه بعصبيه:اني الغالطه اللي كلمتك...وسكرت عليها وهي تقول بكره..سحيقتكم كلكم...
🍃🍃🍃
ونسرين بعد ماسكرت عليها اختها نزلت تليفونها وهي مصدومه وقالت..
/كيف بيصير توا! الله يسامحك يابوي مالقيت الا هالحل!
ع خشة ربيع عليها وهو يقول..
/خيرك!؟
هي شبحتله وقالت بشي من الربكه..
/لاشي..كنت نكلم في خديجه..
شبحلها بإستغراب وهو يلبس في ساعته..
هي غيرت الموضوع وقالت..
/ماشي توا؟
هو قال؛ايه قبل ليذن المغرب..
نسرين:تو انت واثق فيه يقدر ع الحجامه مش اي حد يديرها..
ربيع:لو مايعرفش يديرها كويس مايقوليش تعالى..
قربلها حط يده ورا راسه وباس جبينها بعدين قال..
/سلام..
ومشي بيطلع هي ردت عليه وقالت بضيق..
/في امان الله ..
🍃🍃🍃🍃
حط الدجاجه قدامه وبدي يقطع فيها ويقص بعصبيه وبسرعه...
كمل تقطيعها..وجي للخضرة وبدي يقطع فيها بنفس العصبيه..
بطاطا..كوسا..باذنجان..
بعد كمل طلع الطاجين..وبدي يخلط في البهارات والمكونات مع الخضرة والدجاج..وحطهم في الطاجين..ومن بعدها طول للكوشه...عير ع درجة حرارة معينه تعود يطيب الطاجين بيها..بس هالمرة..زادها ع الأخر..
وقعد واقف قدام الكوشه يشوف للطاجين بنظرات
غضب ممزوجه بالألم...
فجأة...
دق باب الشقه...غمض عيونه بنفاد صبر..بعدين فتحهم..
وقعد واقف في مكانه..
يدق الباب مرة تانيه..تأفف..
بعدين مشي طلع من الكوجينه للباب..
وصل فيه وفتحه...ويشوف ربيع واقف قدامه..
قعد يشوفله بنفس النظرات بدون مايتكلم..
اربكت ربيع نظراته وابتسم وقاله..
/نقدر نخش ولا؟
عقد عبد القيوم حواجبه وهو يشوفله..
حس ان ربيع جاي لحاجه مش قادر يتفكرها..
ربيع لاحظ ان جو عبد القيوم مش مزبوط سأله..
/يصير منها الحجامه اليوم ولانخلوها يوم تاني..
ارتخوا حواجب التارقي لما تفكر..وخر عن الباب وقاله..
/لاليش!؟تفضل خش..
ربيع:مش مشكله عبدو نأجلوها عادي..
عبد القيوم مشي وهو يقول..
/خش وسكر الباب وراك..
ربيع رفع حواجبه وفهم ان في حاجه صارت معاه اساسا من امس وضعه ملخبط..
تنهد..بعدين خش وسكر الباب...
🍃🍃🍃🍃
طلعت من الحمام بعد ماتوضت لصلاة المغرب..
وهي ماشيه للدار اللي بتصلي فيها..
سمعت صوت عمة راجلها جايه..
ولت مرة تانيه للحمام خوف تطلب منها دير حاجه..
قعدت واقفه ورا الباب وهي تسمع فيها جايه ومعاها حد..
كوثر:قداش تبي نطلعلك بالزبط؟
خوها:3000 الاف..
كوثر هزت راسها ومشت لدارها..وخوها قعد واقف يستنى..
وعواطف تسمع وهي مستغربه هلبه..
شويه وتسمعها جايه وهي تتكلم..
/هادوا 3000 لقيتهم واتيات..
خداهم وقال..
/كويس..
كوثر:شن صار في شغل ولدك الشارف؟
؛ماشي حاله..
كوثر:معاش سأل عن هديكا ولاماليها دوروا ولا؟
:لاخلاص هو لهي في حياته ومالي هديكا معاش ريت منهم حد..أيسوا خلاص..
عواطف:مفروض أيسوا من البدايه عرفوا ان الكلمه اللي نقولوها معاش نولوا فيها..
:وأهم عرفوا..
وعواطف تسمع ومش قادره تفهم ولاتعرف هما على مني وعلى شني يحكوا..وزاد خوفها من كوثر اكثر من قبل...
طلعت من الحمام..وهي تمشي بحذر لين وصلت في الدار وخشتلها..خدت تليفونها اللي كان محطوط ع التلفزيون تشوف كان في مكالمه جتها من الشارف..
حست بإحباط لما مالقت شي..ليه يومين ماكلمهاش والايام اللي كلمهم فيها كان بارد جدا وجاف ولاكأنه يكلم في زوجته..
وقعدت عواطف غارقه في دوامه الخوف والحيره..
خايفه ومش فاهمه اللي قاعد يصير معاها ومع ذلك مكمله رحلتها للمجهول...
🍃🍃🍃🍃🍃
الساعه 9:00مساءا..
طلعت الاء للجنان ومشت قعمزت قريبه ع شجرة الفل..
طلعت من جيبها تليفون عزيز اللي كانت مسكراته..وقعدت تفكر بصوت عالي شويه..
/نفتحه ولالا!؟ بالك يتصل ويقول وين نجيبهوله وامتى.!
مررت نظرها قدامها وقالت..
/نفتحه ولالا.!؟ وبعد تفكير دام للحظات..
قررت تفتحه..وفتحاته..
وقعدت تتفرج ع الشاشه وتراجي في رساله ولااتصال..
مروا دقايق بسيطه ماجي فيهم شي...
هي من فضولها قررت تفتش التليفون..
فتحت الرمز اللي حفظاته..
وطول مشت خشت ع الرسائل..
كلها كانت محادثات خدمه..مافي شي شخصي حتى مع عيلته..
طلعت منهم..ومشت للإستديو...
لقت حافظه وحده فيها صور ليه..
قعدت تتفرج عليهم بالصورة..صور واخدها في سفراته في اكثر من مكان مشهور او عادي..
صورة في الصيف وصورة فالشتي..
وصورة عنده فيها لحيه..وصورة لا..
صورة لابس نظارات..وصورة لا..
حطت يدها تحت خدها وهي تتفرج وارتسمت ع وجهها ابتسامه تلقائيا..
قعدت تذكر في المواقف اللي جمعتها بيه..وكلامه ليها..
ويوم ضرب مهند لما سمع منه كلام غلط في حقها...
فجأه..
جت رساله للتليفون..اختفت ابتسامتها من الفجعه..
بعدين قالت..
/زعمه نفتحها ولالا!؟...نزلت الستار متاع الهاتف لقت الرساله جاية من رقم غريب بدايتها..
"مساء الخير"
قعدت تفكر شويه بعدين قالت..
/مرات هو..
وفتحتها طول...
(مساء الخير..خبروني انك جيتي بتسلمي التليفون ياريت لو فيها كيف غدوة نتلاقوا وناخده منك)
الاء:مصح وجهه وين يبينا نتلاقوا وغدوة جمعه؟!
قعدت تفكر شويه بعدين قالت.
/ايه صح!..
وبدت تكتب في رد بعدين بعتاته..
(مساء النور..غدوة بعد العصر طالعين للسوق نشوفك غادي)
وقعدت تستنى في الرد..وجاها..
(تمام..وين بالزبط؟)
الاء:ايه حقه وين ماقالوش!؟
بدت تكتب..وبعتت..
(نقولك لما نقرروا نعطيك اسم المكان وانت تجي)
وقعدت تستنى في الرد وجاها...
(تمام..اتفقنا..باهي توا بنطلب منك طلب..في تلاته ارقام ياريت تنسخيهم وتبعتيهم نبي نكلم اصحابهم ضروري..)
الاء رفعت حواجبها وقالت..
/ايوه!
بعدين بعتتله..
(ارقام مني؟)
رد عليها..
(اسامه الكبير...رواد بادي..نسيم****)
هي طلعت من الرسائل وخشت ع السجلات وقعدت دور لين لقتهم نسختهم بالواحد في رساله وبعتتهم..
بعدين رد عليها..
(شكرا)
نزلت التليفون وهي تشوفله بإبتسامه...
دقائق...وجتها رساله..
بسرعه فتحتها..
(عادي نكلمك مكالمة )
خفتت ابتسامتها وقالت..
/استانس..
عقدت حواجبها..وسكرت التليفون...
بعدين حطاته في.جيبها وناضت خشت داخل...
🍃🍃🍃🍃🍃🍃
واقف من بعيد يتفرج عليها هي وصاحباتها كيف مقعمزات يهدرزوا ويضحكوا واخر انسجام..
رضا بتذمر:شن هادي تبي تبيتهم هني!
🍃وعندهم هما..
:صابرينا..السموح هداكا قوليله يجي شويه..
صابرين بضحكه:شن بديري بيه..
:نتعرفوا..
:ايه ناديه نادي..
صابرين:فوتوه خيرلكم ماتعرفوشي هدا لسانه حار وجامد ومايعرفش يجامل..
؛واااو يهبل..باهي اسمعي عطيه رقمي..
صابرين وهي تضحك:منك جد!؟
:خش خاطري هلبه..
صابرين:امم..ولو اني عارفه النتيجه مسبقا لكن باهي تو نحاول..
والتفتت شبحتله..
لقاته واقف يشوفلها بإمتعاض..
ابتسمت بإستفزاز وغيرت عيونها عنه..
هو خدي نفس بعدين قال..
/اللهم طولك ياروح...
🍃🍃🍃🍃🍃
"هاه شن الامور تمام"
رفع ربيع ابهامه ردا عليه..
عبد القيوم:تتعشى توا ولامازال؟
ربيع؛زيد شويه تانيه..
عبد القيوم هز راسه وقعمز مقابله..
ربيع؛ماشاء الله يدك خفيفه..
عبد القيوم:ليا وقت عليها كنت نحجم لعمي جبريل ايام كنت في بنغازي..
ربيع:معاش خشيت بعدين في مواضيع العلاج والرقيه..
حرك راسه بالنفي بعدين قال..
/كيف ماحكيتلك فتره مع خالي لما كنت صغير شويه بعدين خلاص..
ربيع؛يعني انت توا لو جابولك حد عنده مشكله عين مس سحر تقدر تعالجه..
ضحك وقال؛لالا شن تقول..الحاجه الوحيده اللي تعلمتها الحجامه غير هكي مانفهمش فيه واجد نعرف الرقيه العاديه شويه معلومات اما بش نكذب عليك ونقولك راقي لاوالله..
ربيع:باهي ماتزبطش بعلامات؟
عبدالقيوم؛قصدك علامات العين والسحر..نوعا ما..
ربيع؛باهي ركز معاي و قولي اللي اني فيه من العين ولاسحر!
عبد القيوم ضحك من قلبه بعدين قال..
/يعطيك الخير ياربيع..
ربيع بضحكه؛ندوي جديات..
هدا ضحك ومسح ع لحيته وقال..
/خلي عنك الوسواس..مش كل شي نحطوه ع العين والسحر والحاجات هذي..
ربيع :والله كنت متأمل تطلع حاجة منهم ع الاقل نلقى علاج وتمشي اموري..
ابتسم عبد القيوم بأسف وقعد ساكت..
ضحك ربيع بعدين قاله..
/خليك مني...وقولي..انت خيرك من امس لليوم جوك مش عاجبني..
قعد يشوفله للحظات وهو ساكت بعدين قال..
/بكرا بنعدي للجنوب..
ربيع تفاجىء وهو يقوله..
/كيف قصدك..مشيه بلا رجعه؟
ضحك بعدين قال..
/لا.. تقدر تقول بناخد اجازه ..
قعد يشوفله ربيع اللي كان فاهمه وحاس بيه لكن مش قادر يسأله لان الموضوع حساس هلبه ومايبيش يحرج صاحبه ولايحطه في موقف مخزي قدامه..
هز راسه وقاله..
/حقك..باهي امتى مروح؟
هو قال؛في حدود اسبوع هكي..
ربيع:معناها واخد اجازه؟
عبد القيوم؛بدري كلمت المدير وتفاهمت معاه..
سكتوا الزوز وهما يفكروا...
بعدين قال عبد القيوم..
/نجيبلك العشا؟
ربيع بإبتسامه؛ماشي معاك..
ناض عبد القيوم وهو يقول..
/لاخليك تريح..
ومشي طلع من الدار..وخلا ربيع يفكر في حاله...
🍃🍃🍃🍃
وهي كانت مقعمزة تتفرج ع بنتها اللي كانت فايقه تحرك في ايديها..
ابتسمت وهي تردد في الصلاة الابراهيميه..
بعدين اتكت ع السرير..وقعدت تردد فيها والدموع في عيونها...
غمضتهم..وعلت صوتها شويه وهي تردد فيها..
وكانت تفكر في.فضلها وتتخيل فيه..
الصلاة الوحده بعشره...والصلاة من الله ع العبد رحمات تنزل عليه..
طوبى قعدت تتخيل في صلوات الله تنزل عليها...
وكل ماتعلي صوتها شويه وتتمعن في الصلاة..
كان يقوى خيالها اكثر واكثر..لدرجه انها بدت تشوف في روحها في مكان يشبه الجنه...وحبات مطر لماعه تنزل عليها وكأنها نجوم..
حست بشعور لايمكن وصفه من جماله ورهبته..
هالشعور كان يمسح في كل المشاعر السلبيه السيئة اللي كانت تحس بيها...
لدرجة انها ابتسمت تلقائيا..
فجأه..سمعت حاجه غريبه..
فتحت عيونها ورفعت راسها ووجهت نظرها لبنتها...
لقت جنة تشوف جيهتها..وطلع في الصوت يشبه المناغاة..
زادت كبرت ابتسامتها...لين ضحكت..
بعدين قعدت دور ع تليفونها بحماس لين لقاته..
خداته وحطت ع تصوير الفيديو..
وبدت تصور فيها...وهي تقول..
/هيا ماما..كغااا...
جنة قعدت تشوفلها بس..
طوبى:هيا ماامي..كغا..كغ..
والبنت ع حالها..
طوبى بأستغراب..
/كيف كنت نتخيل!؟
نزلت التليفون من هني..ناغت جنة مرة تانيه..
ضحكت طوبى وقالت..
/يادبه..
ع خشة اريج عليهم شافت طوبى تضحك ابتسمت وقالت..
/شني خيرها جنونه؟
طوبى بضحكه؛قعدت تناغي..
اريج بضحكه؛الله!..
طوبى بضحكه؛ايه توا ناغت مرتين..ياوخيتي بنتي تكبر بسرعه الله يبارك..
واريج تضحك فرحا وهي تشوف لضحكة خالتها للي ليها فترة طويله ماشافتها..ضحكه فرح من القلب..
ع خشة الاء شافتهم وقالت..
/خيركم..
اريج بضحكه:جنة تناغي..
الاء بضحكه؛ياعمري..جتها وطبست عليها وهي.تقول..
/هي قولي للوشه..
ضحكوا عليها الزوز والاء تضحك معاهم...
🍃🍃🍃🍃🍃
سقدت صاحباتها..بعدين مشت جهزت نفسها بش تروح..
ركبت في السيارة من الخلف بعد مافتحلها الباب بعدين مشي ركب..وشغل السيارة وتحرك في صمت..
وهو يسوق رفع عيونه في المرايه لقاها لاهيه بتليفونها..
في هديكا اللحظه في شي خلاه مايغيرش نظره عنها الا لما وقظه المطب..
صابرين بفجعه عيطت وقالت..
/شن هدا!؟
هو شاف القدام وقال..
/مطب ماشفتاش..
صابرين بفجعه؛وين كانوا عيونك.!
شبحلها من المرايه بنظرة تبان بارده..بعدين غير نظره القدام..
صابرين وهي مازال مفجوعه..
/افتح عيونك زين وخليهم ع الطريق وكان ماتقدرش تسوق هات نسوق اني مش مستغنيه عن روحي..
هو قعد محتفظ بصمته..
وهي قعدت تاخد نفس بعدين رجعت تشوف لتليفونها وهي تحاول ترجع هاديه..
فجأة..وقفت السياره..
قامت عيونها فيه..شافاته نزل من السياره..بعدين فتح الباب السحاب ورفع المفتاح وقال..
/انزلي سوقي..
فتحت عيونها ع وسعهم بصدمه وهي تشوفله..
هو قال؛هيا..
صابرين؛منك جد انت!؟
رضا؛اني والله معاد متحرك خطوة تبي تسوقي انتي باهي ماتبيش نقعدوا للصبح ماعنديش مشكله..
رفعت حاجبها بتحدي بعدين مدت يدها وقالت..
/جيب جاي..
حطه في يدها وباعد..
وهي نزلت..ومشت ركبت القدام..
هو سكر الباب السحاب ومشي ركب جنبها..
هي شبحتله بريبه من فوق لتحت..
وهو قعدوا عيونه القدام...
تنفست بعصبيه..بعدين شغلت السيارة وتحركت...
شويه..طلع تليفونه..
وخش ع لعبه وبدي يلعب..
هي شبحتله بربع عين بغيظ بعدين شافت القدام..
وهو منسجم مع اللعبه اللي كانت اصواتها تزعج فيها..
شويه قالت..
/سكر الصوت لوسمحت..
هو قال؛نعم!؟
هي قالت؛قتلك سكر الصوت..
هو قال؛لاماقلتيش هكي بس الجمله كانت اطول..
هي.ابتسمت تهكما وقالت..
/عندك علم انك اكثر مخلوق مستفز عرفته في حياتي..
تجاهل كلامها ورجع لهي باللعبه..
شدت ع الدومان بغيظ وقعدت ساكته..
وهو منسجم مع اللعبه..فجأة جاه اتصال رد طول..
/ايوه...
"مروحين؟"
هو قال:في الطريق لينا نص ساعه..
"زحمه؟"
هو قال..
/لا مافيش زحمه غير هي اللي تسوق وسواقة النساوين معروفه..
فنصت وشبحتله..
اشرلها بيده تشبح القدام..طول شافت للطريق..
"هي اللي تسوق"
قال؛ايه قالت اني نبي نسوق..
فنصت وشبحتله مرة تانيه..
شافلها بحده واشر ع الطريق..
هي بسرعه شافت للطريق..
"باهي..رد بالك.."
هو قال؛حاضر..
بعد ماسكر مختار..هو رجع للعبه مرة تانيه..
هي شبحتله ع جنب وقالت..
/تعرف شن خاطر عليا توا..
هو ولاهي باللعبه:شني!؟
هي قالت؛نخش في حيط ولانقلبها..
هو قال؛ماتقدريش..
هي قالت بإبتسامه ماكره..
/ماتعرفش هبالي انت نديرها عادي راهو..
هو قال؛لاعارفك من غير عقل لكن ماديرهاش..
شبحلها وهو مبتسم بآستفزاز وكمل يقول..
/لأنك مش مستغنيه عن روحك..
غمضت عيونها بغضب..
هو قال؛هييه الطريق!!.
فتحت عيونها بفجعه..وشدت الدومان كويس..
هو ابتسم وحرك راسه يمين ويسار ورجع لهي باللعبه...
🍃وبعد طول طريق..وصلوا للعمارة..
نزلت وهي معصبه..وهو نزل وعيونه عليها بإبتسامة تشفي..
خشت للعمارة..وركبت للشقه..فتحت الباب وخشت..
لاقت مختار قدامها..
مختار:واخيرا..
صابرين بإبتسامه:امتى روحت؟
مختار:ليا ساعه..خداها من يدها وقال..ايه احكيلي شن صار لمتكم...
🍃ورضا لوطا دخل السيارة للقراج..
وين جي بينزل..جو عيونه ع حاجه كانت تلمع عاكس عليه ضي القراج..
طبس وخداها...لقاها خرصه"حلق" ذهب ابيض شافها لابساته مرة..
ابتسم..بعدين حطه في جيبه ونزل من السيارة..
🍃🍃🍃🍃🍃
"نبي نعرف مني اللي وصلهم معلومه هادي من يعرفها غيري اني وياك وهي؟"
حكيم:كملها وقول شاك فيك وخلاص..
الجالي:كان شاك فيك مش مقعمز معاك توا..
حكيم تهكما؛باهي الحمد لله..
الجالي بنزفزة؛ندوي جد ياحكيم ماتتسهوكش..
حكيم بضحكه؛بالعكس فرحتلك ربي ماحرمكش قاعد زوج تنتين..
الجالي قعد يشوفله بآمتعاض..
وهو يضحك بعدين قال:خلاص خلاص اسف..والله شن بنقولك ياصاحبي..اللي صار صار توا معاش في مهرب..
الجالي بضيق:كان عرفت بتشد في الطلاق اكثر من قبل..
حكيم؛مش حترتاح لين طلقها صدقني..
الجالي بشي من الحزن..
/افهم عليا ياحكيم خيرك!..اني مش قادر نعيش زي الناس من بعدها..وتوا من غير بنتي..اقسم بالله معاد حسيت بشي معاش في شي يفرحني ولايريحني..
حكيم:حسيت بالنعمه بعد فقدتها..
الجالي:علاش مصر تزيدني على مابيا..
حكيم؛مانقدرش نواسيك بالكذب ياجالي غلطت غلطة كبيره ولازم تتحمل النتيجه..
خدي الجالي طاسه الميه اللي قدامه بعصبيه وشربها في مرة وحده..
وحكيم يشوفله بأسف...
🍃🍃🍃🍃
وف هديكا الليله نجاة ماقدرتش ترقد غمضه من فرحتها..
حاولت تتصل بصابرين بش تخبرها تبي اي حد يشاركها فرحتها لكن الطبيعي ان صابرين ماردتش..
وقعدت هي طول الليل عايشه فرحة عمرها ماعاشت زيها في حياتها...وكأن اللي صار معاها معجزه ماتخيلتش تصير ع ارض الواقع في يوم من الايام..
🍃لكن في من ماقدرش يرقد من الغم الهم..
زي محمد شنيبه اللي قاعد عايش في حالة صدمه من اللي عرفه..ومش قادر يحول من عقله كلام طوبى وبوها ليه لما قالوله انه غافل ومايندري ع شي من اللي يصير في عيلته...
كان حاس بقهر شديد مش عارف كيف يتخلص منه..
🍃نفس القهر كان حاس بيه المهدي من عيلته اللي قاعد يوم عن يوم ينفر منهم من افعالهم ومش عارف لأمتى بيقعد متحمل افعالهم اللي مايقبلهاش عرف ولادين...
🍃وامه طول الليل وهي تبكي...واجعها ولدها..ولدها اللي كانت تتمناله يشفى من مرضه ويرجع لطبيعته ويعيش مرتاح..ولدها اللي قاعد كل يوم يغرق في اخطائه اللي هي تساعد فيه عليهم ومافكرتش مرة تساعده بش يصلحهم..
🍃وخديجه حتى هي ماجاهاش نوم وهي تفكر في اللي يصير بعد مايعقد خوها الجالي ع نجاة..كيف حتواجه متاعينها والناس..شن حتقوللهم!؟ كيف حتبرر !؟..
وقعدت طول الليل تقلب فيها فراسها لين خداها النوم مع ساعات الفجر الأولى...
🍃🍃🍃
لكن طوبى فهالليله رقدت رقدة هنيه..بعد ماحطت راسها ع المخده وهي تصلي ع النبي الصلاة الابراهيميه..لين نزل عليها النوم المريح....
ومافاقتش الا قبل الفجر ع صوت بنتها...وقعدت هي وياها طوبى تهدرز وجنة تسمع...لين رقدت...
اما طوبى..فكانت اليوم حاسه بنشاط غير عادي خلاها تمشي للكوجينه وتعجن سفنز...
🌼🌼🌼🌼🌼
هداكا الصبح كان غير عليهم..
شافوا طوبى في حاله ماشافوهاش عليها من فترة طويله..
طوبى متاع زمان الحيويه..الهدرازة الحركيه..اللي دارت كل شي بروحها الصبح ..
سفرة قهوة الفل منثور عليها...فطور يوم جمعه فيه الحلو والمالح...وبعتت لحوش جدها مع اريج فردات سفنز فطروا عليهم وهما متفائلين بعد ماعرفوا ان هي اللي دارتهم..
بس وسط هدا كله فردوس كانت قلقه ع اختها وحست ان اللي هي فيه ردة فعل ع اللي صار معاها..وكأنه تابع للصدمه اللي عاشتها مؤخرا....
🍃🍃🍃🍃🍃
اما التارقي اللي كانت ضايقه بيه الدنيا...اختار يطلع لخلاء صحراء كم يوم..بش يختلي بنفسه ويصفي ذهنه ويرتاح شويه من الضغط النفسي اللي قاعد يمارس ع نفسه...
قبل ليمشي نزل بوست ابيات شعر قروها اصدقائه اللي منهم..
ربيع..المهدي..حسين...
" ناخذ الخلا وانتوغل فيه
لانريد دوج قال وقيل
سارح ابروحي
هذى ماكتب ربي أطيب اجروحي
ساكن في الخلاء
وخافيات اجروحي نار كابره للي أطول بيه موحي
كابر نار ..لهيبها في صوتي
شقة جمر أوتار عازف هايمات اعزوفي
ليلي طويل..وقمره اتشق انشد بيها الحيل
هذى دليل...اني نا والنجم من أصحاب عويل"
🍃كلهم تفاعلوا بالاعجاب ع الابيات..
والمهدي علق..
(ياهراب خايف تاخدنا معاك)
خش لتعليقه ربيع ورد..
(قالك بروحي)
رد عليه المهدي..
(تمشي للبحر)
رد ربيع..
(هيا)
واتصل طول ربيع بالمهدي وتفاهموا ع المشيه..
كان المهدي يبي يهرب حتى هو من الواقع اللي عايش فيه...
🍃🍃🍃🍃🍃🍃
الساعه 5:30عصرا..
طلعوا الزوز من الدار وحده ورا الثانيه..
الكبيره لابسع بلوزه طويله لتحت الركبه لونها اسود في الابيض ع سروال اسود..ووشاح ابيض في زخرفه باللون الاسود..وشنطه يد عمليه سودا..
والصغيره لابسه بلوزة ياجوري للركبه ع سروال جينز ازرق ووشاح لونه سماوي خافت..ع شنطة يد سودا شكلها مميز..
طلعوا من الحوش تلاقوا مع امهم اللي كانت تكنس في الجنان وين شافتهم قالت..
فردوس:وحده.وحده عليكم ..
ع طلعة اختها الصغيره اللي كانت لابسه عبايه واسعه لونها اسود وشاربه لونها أزرق مع شنطة يد سودا عمليه..
وفي يدها شاده مفتاح رفعتها وهي تقول..
/اني بنرفعهم..
تفاجئت فردوس لكن حاولت تبان عاديه قدامها وقالت..
/لاكان انتي بترفعيهم ماعندي علاش نخمم..
اريج بتعجب:اشي!!؟..
ضحكوا وطوبى قالت..
/فردوس جنونه راقده بالله خشي وخليك حداها..
فردوس:شويه نكمل هدا ونخش..
طوبى هزت راسها ومشت وهي تقول..
/هي تعالوا..
مشوا وراها البنات...وآلاء تفكر في حكاية تليفون عزيز هل تقوللهم الحق..ودرق عليهم وتبدا تجهز في كذبه من توا بش تقدر تعطيهوله بدون مايعرفوا!..
🍃ركبوا للسيارة...
طوبى ورا الدومان حست بخوف فجأه..وكأنها اول مرة تسوق..
شافت للمسبحه المعلقه فيه..حست بشي من الراحه..
بعدين حطت المفتاح في مكانه وقالت..
/بسم الله..وشغلتها..
شدت الدومان وهي تقول..
/بسم الله توكلت على الله..ولاحول ولاقوة الا بالله..
وتحركت...
🍃🍃🍃
في الشارع..
كان ربيع بسيارته قدام مطحن نسيبه يراجي فيه..
المهدي:والله يامحمود الامور توا ملخبطه وماعنديش بال للمواضيع هادي وهو توا مش هني بعد يروح بإذن الله ووعد مني كلمه..نفتح معاه الموضوع..
ابتسم محمود مجامله وقال:إن شاء الله ان شاء الله..
المهدي:تمام..السلام عليكم..
محمود قعد معاه بعيونه وهو يقول..
/وعليكم السلام..
وقعد يشوف للمهدي وهو ماشي لسيارة ربيع..
شويه ينفتح باب حوش لطفي الواعر..
المهدي لما جي بيركب شاف جهة حوش جارهم...
ويجمد في مكانه..
طلع محمود برا وهويمرر في نظره عليه وع السيارة وكان متفاجئ..
سيارة سدرة..حتى ربيع حفظها وعرفها لما شافها..
التفت للمهدي وقعد يشوفله..
لقاه مسهم في السيارة..ويلحق فيها بعيونه...
نضال في القهوة يشوف للسيارة..شاف طوبى وهي تسوق فيها..بعدين شاف لأريج وهي مقعمزه جنبها وتكلم فيها..
فاتوا من قدام التونسي اللي تلقائيا ابتسم لما شاف طوبى طالعه بالسيارة..
ولاحقت الانظار هالسيارة المميزة..اللي ميزوها صحابها مش هي اللي ميزتهم..
ولما توارت عن الانظار..
ركب المهدي جنب صاحبه وهو قاعد سارح بتفكيره..
ربيع؛نمشوا؟
لا رد من المهدي..
هز ربيع راسه وتحرك طول...
🍃والمهدي جنبه يشوف القدام وشريط ذكرياته مع صاحبة "الكيا اوبتيما" يمر قدامه...
تفكر نظراتها..الحاده..الغاضبه..المحبه..الحنونه..
تفكر وقفتها ومشيتها اللي كلها هيبه..
تفكر طريقه كلامها..صوتها..بحة صوتها..
وضحكتها..ابتسامتها..وحتى بكاها...
وفي شي في داخله تحرك بعنف..وكأنه شي كان مدفون تحت ركام..وقاعد يطلع بكل قوة..
ربيع:مهدي..
المهدي:مافي شي..سوق وانت ساكت معليشي..
ربيع سكت متفهما وخلا صاحبه يحاول يستجمع نفسه ويرجع لطبيعته...
🍃🍃🍃🍃🍃
"نجلاء..هيام..ميار..ليندا..بنات..هادي مروة"
مروة بإبتسامه:اهلا..
والبنات قعدوا يسلموا عليها ويرحبوا بيها..
كلهم كانوا مجتمعات في دار مناسك اللي كانت مجهزتها بديكورات حلوة تخص لمتهم اللي كانوا ناويات يوثقوها بالصور..
صاحبات مناسك..غير قريباتها..
كانوا زيها طبيعيات عاديات..بعيدات عن التصنع والتكلف والتباهي الفارغ..
ارتاحت معاهم مروة هلبه..وانسجمت مع جوهم...
🍃وفي الدور الاول..
في الكوجينه متاعه..
كان مالك واقف في نصها ويمرر في نظره الموالح والحلو متاع لمة اخته وصاحباتها..
مالك ؛شن الفجع هدا شن هدا!!؟ تو حق بياكلوه هدا كله!؟
فوزيه:اني كان نعرف انت علاش قاعد شن عندك!؟
مالك شبحلها بصدمه مصطنعه وهو يقول..
/مانبيش في الحوش!
فوزيه:مالك اطلع خيرلك..
مالك؛ماعنديش نيه..ومشي قعمز ع الكرسي وهو يقول مليت من الطلوع نبي نقعد في الحوش اليوم..
فوزيه:نتصل ببوك!؟
مالك بضحكه:شن بتقوليله؟
فوزيه تنهدت وقالت..
/من امتى تقعد في الحوش لما اختك يجوها صاحباتها!؟
مالك؛شن دخلي بيهم..هما فوق واني هني!..
فوزيه:مالك!
مالك؛فوزيه!.
فوزيه بنفاد صبر:اللهم الصبر..
قعد يضحك...
فوزيه ضيقت عيونها وقالت..
/من الاخير انت عينك ع مروة؟
جاه الكلام زي الصفعه المفاجئة..رمش عيونه بسرعه وقعد ساكت..
فوزيه بهدوء..
/مالك..الا البنيه هادي..راهي يتيمه وهي وخواتها راس مال امهم..تعبت عليهم وعطتهم عمرها حرام ولدي هادم ماتقربهمش..
مالك بضحكه؛يعني غيرها عادي!
فوزيه؛لاهي ولاغيرها..فكر ان عندك اخت حتى انت..
مالك.تنهد بإبتسامه وقال..
/باهي البنت عاجبتني..لكن بنيه صافيه..
