#طوبى "جنة طوبى"
#جمان_فريد
#الجزء_113"الحجر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
قال ابن القيم رحمه الله..
"اذا انكشف الغطاء للناس يوم القيامة عن ثواب أعمالهم لم يروا عملا أفضل ثوابا من الذكر فيتحسر عند ذلك أقوام فيقولون ما كان شيء أيسر علينا من الذكر.."🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 يا لروعة تولستوي إذ يختصر كل حديثنا بقوله:
"كن طيباً على الدوام، واحرص على أن لا يعرف أحد أنك طيب."
دوستويفسكي🍃
______________________________________
في شقة المهدي..
تحديدا الكوجينه..
كان مقعمز ورا الطاوله وهو يراقب في مرته كيف تجهز السحور وهي ملتزمه الصمت وهدوء..
لايسمع غير اصوات الماعين والاجهزة وهي تحرك وتستخدم فيهم..
وتخش بنته الصغيره تكسر الهدوء اللي كانوا فيه لما قالت..
/علاش ماناديتنيش بش نعاونك!؟
ابتسم المهدي..
ردت عليها سدره بإبتسامه وهي تقول..
/نحسابك راقده..
ردت عليه تقول..
/لامارقدتش كنت نهدرز مع سدرة بنت خالتي ع الماسنجر قالت بيجوا غدوة يفطروا في حوش جدو..
اتفاجئ المهدي..
وسدرة قالت..
/وامهم عندها علم!؟
قالتلها؛اكيد..قربت منها وهي تقول..شن ندير معاك قوليلي..
سدرة:طلعي العصير وحطيه مع الطواسي في السفره..
ردت تقول...
/حاضر..
☘وتعاونوا الزوز في تجهيز السحور والمهدي حداهم انشغل بهاتفه يتصفح في الفيسبوك..
وبعد ماكملوا تجهيز السحور..تسحروا في الصاله كالعاده..
المهدي وولاده كانوا يحكوا في مواضيع مختلفه ..
واختهم مرة معاهم ومرة مع سدرة اللي كانت ملتزمه الصمت واحيانا تسرح..
☘☘☘☘☘
بعد السحور..
تشاركوا السدرتين في غسل الماعين ومازال الكبيرة ملتزمه الصمت..
والصغيرة زادت انشغلت عليها وسألتها..
/خيرك ساكته خالتي قاعده تعبانه؟!
تنهدت وقالت..
/لاحبيبتي عادي..
بتساؤل تاني قالت..
/باهي خيرك مش ع عادتك قبل ديما تهدرزي..
ابتسمت سدرة وقالت..
/في خبر بنقولك عليه..
قالت بفضول..
/شن هو!؟
شافتلها بإبتسامه وقالت..
/بيجيك بيبي تلعبي عليه..
هي بدهشه قالت..
/قصدك انتي حامل!؟
سدرة بضحكه:ايه..
طلقت اللي في يدها وطلعت تجري وهي تقول..
/اني نخبرهم..
ضحكت سدرة بعدين تنهدت وولت تغسل في الماعين..
🌸ولدار محمد خشت سدرة لقت يزن فيها قالت..
/باهي لقيتكم مع بعض..بنقوللكم..خالتي سدرة بتجيب بيبي..
بدت ع وجوههم ملامح الدهشه والمفاجأة..
ضحك يزن وقال..
/قصدك بيولي عندنا بطشه حتى حني!؟
ضحك محمد..
سدرة رفعت ايديها وهي تدعي بتوسل..
/يارب يارب..يارب يارب..خليه وليد يارب..
هما استغربوا ويزن قال..
/علاش!؟
نزلت ايديها وابتسمت بغرور تقول..
/بش نقعد وحيدتكم ودلوعة بابا..
ولفت ومشت وهي تتمخطر وخوتها يضحكوا عليها ضحكة استنكار...
بعد ماطلعت ولت مرة تانيه وقالت..
/ايه نسيت نقوللكم. غدوة فرح وسدرة بيجوا يفطروا في حوش جدوا وبيكملوا السهريه هني وايه بنادي ع تاله تجي حتى هي..
محمد :المعنى!؟
سدرة:المعنى في بطن الشاعر..
خدي مخدة حذفها بيها هربت قبل لتوصل فيها..
يزن بضحكه..
/قصدها دوروا وين تقعدوا..
محمد:هكي ولاهكي بنمشي لمؤيد وانت كان ماعندك وين تمشي تعال معاي..
يزن:غدوة جايين ولاد عمي عبد الفتاح الله يرحمه للشارع بنتلاقوا عند مروان..
محمد هز راسه بصمت..
يزن؛خيرك حسيت جوك اليوم مش تمام..
محمد بضيق..
/وضع محمد محي الدين مولي خطير..
يزن عقد حواجبه وقال..
/شن دار تاني!؟
محمد:جتني معلومات تقول انه بادي يحشش..
يزن بأسف..
/ ريته يومها
محمد:شن شفت!؟
يزن: الاسبوع اللي فات ركبت فوق السطح بش نعدل الصحن لقيته مقعمز حدا الخزان متاع يدير في سبسي حشيش..
محمد بأسف شديد..
/خسارة والله خسارة..
يزن:اسمع ماتدخلش خليك بعيد بالله عليك..
محمد بضيق..
/نحاول..
يزن بإصرار..
/لا ماتدخلش يعني ماتدخلش بتجي ع دماغك انت بس..
هز محمد راسه بصمت..
ويزن يشوفله بنظرات ضيق عارفه مش حياخد بكلامه..
🍃🍃🍃🍃
واللي كانوا يحكوا عنه مقعمز في مكانه المفضل فوق السطوح يتكلم هاتفيا مع احد رفاق الضياع..
محمد:كون هاني بنقعدوا اليومين هادم هني..
"متأكد ان بوك مخلي كل شي غادي!؟"
محمد بنفاذ صبر؛تيي ايه ياودي..كله شي في الخزنه ورقمها السري عندكم..معاكم اليومين هادم بس بعدين بنولوا لشقتنا في شارع القهوة معاش فيها كيف...
"اوكين اوكين"
🍃ايه بيولوا للشقه لأن ابتسام رمت العده خلاص وحتروح لحوش اهلها تاني يوم...
هي توا قاعده تكنس وتسيق..ترتب وتلمع وتعطر..كانت تبي تطلع من الشقه وهي مخليه اثرها فيها ولمستها في كل مكان..وحتى..ريحتها...
🍃وزي ماهي قاعده تخدم ع راسها زي مانقولوا خديجه كذلك كانت تسعى بش تأمن مستقبلها وفي نفس الوقت تجهز في ضربتها القاضيه لطليقها اللي كانت متأكده تماما انه حيسبقها بضربته...
هي توا راقده ع سريرها بعد ماحطت ماسك ع وجهها..
كانت عايشه في عالم احلام اليقظه لكن الواقع أبى يهنيها بيهم..
تأففت بضجر لما سمعت دق باب دارها وقالت..
/مني!؟
"اطلعي دخلي امك الحمام ياخديجه"
بصوت منخفض وهي في قمة التذمر..
/عليك ايام سود مغبرات..علت صوتها وقالت..حاضر يابوي حاضر..
وناضت قعمزت بعصبيه وخدت منديل ورقي مسحت بيه وجهها وناضت طلعت من الدار وهي مش طايقه نفسها...
🍃🍃🍃🍃🍃
تاني يوم..
الساعه 9:00صباحا..
في الحجرة اللي كان معزول فيها مختار..
فتح عيونه ببطء..الرؤيه قدامه كانت ضبابيه..وشويه شويه بدت تتوضح..
شاف سقف..وسمع صوت غريب..كان صوت الجهاز..ولاحظ الضي اللي كان منتشر حواليه..
لاهدا مش قبر..القبر مش هكي..القبر ضيق ومظلم...
كيف يعني!؟ اني مازال قاعد حي!؟ قاعد في الدنيا مامشيتش للعالم الآخر!؟..
سمع صوت تاني..صوت ميزه هالمرة..صوت باب انفتح..
شويه قربت منه الممرضه اللي كانت متبعه الاجراءات الاحترازيه وقالت..
/صباح الخير..مختار..
عقد حواجبه وهو يشوفلها بإستغراب..
كان منهك ومتعب وقناع الاكسجين اللي غطا انفه وفمه زاده على مابيه.. يبي يحوله بش يتكلم لكن ماكانش قادر يطلب الحاجه هادي حتى بالإشارات...
غمض عيونه يأسا وتعبا...
والممرضه تعطي فيه جرعة المضاد الحيوي وهي تقول..
/يسلم عليك توبا..
فتح عيونه بصدمه..حركهم جهة الممرضه لقاها تكمل في شغلها..رخاهم لما فكر ان اللي سمعه منها كان مجرد وهم..
غير عيونه عنها ورجع غمضهم مرة تانيه..
🍃🍃🍃🍃🍃
"من لما عرفته وهو بيكره العلاج والمستشفيات، لما تعب السنه اللي فاتت بقى مهتم قوي بصحته من كل النواحي عشان مايدخلش مستشفى تاني ولاياخد ادويه"
طوبى بتساؤل؛من شني تعب بالزبط؟
امينه؛انا مافهمتش ايه اللي حصلوا بالزبط بس يعني هما قالوا انه بسبب الضغط النفسي عضلة القلب بدت تتعب شويه نصحه دكتوروه النمساوي ياخد باله من صحته عشان مايبقاش مريض قلب وهو من بعدها خد باله من صحته كويس قوي واي شي يضره سابوا نهائي..
هزت طوبى راسها بعدين قالت..
/معناها اللي هو فيه توا بسبب العامل النفسي خوفه من الكورونا ضعف مناعته..
امينه بتفكير..
/يمكن كده..لأنه بسم الله ماشاء الله لاعنده سكر ولاضغط ولابيشتكي من حاجه خالص..
طوبى:هلبه حالات ماتوا من الكورونا وماكانوش يشكوا من شي قبلها بسبب الخوف..وفي اللي عندهم مشاكل صحيه ونجوا منها..
امينه؛ايوه صح سمعت الكلام ده في الراديو من يومين قالوا ان اللي خلا الناس تموت من الكورونا بأعداد كبيره الخوف والقلق..
طوبى:العامل النفسي مهم هلبه في مواجهة اي مرض مش غير الكورونا بس.. امينه:ربنا يحمينا من كل مرض..
طوبى:اللهم آمين..ديما خلي ع لسانك دعاء اللهم اني اعوذ بك من المرض والجنون والجذام وسيء الأسقام...
ابتسمت وقالت..
/ابعتهولي واتس عشان احفظه..
ضحكت طوبى وقالت..
/حاضر..هاتي رقمك..
امينه ابتسمت وبدت تسمي في رقمها لطوبى وهي تسجل..
بعد ماسجلت الرقم حفظاته بإسمها وقالت..
/شن نديروا فطور اليوم؟!
امينه:اللي نفسك فيه ياحبيبتي..
طوبى:باهي شن رايك تخليني اني نطيب اليوم وانتي تقعمز حداي في الكوجينه تونسيني؟!
امينه؛واخليكي تشتغلي لوحدك والدنيا صيام!؟
طوبى:عادي لقداش بنطيب يعني..اني وانتي والممرضه..ضيقت عيونها وقالت..الاقجم يفطر هني!؟
امينه بإبتسامه..
/لابيفطر في بيته..
طوبى:خلاص معناها مافيش تعب..
امينه وهي مبتسمه..
/عندك كم سنة ياطوبى!؟
طوبى بإبتسامه..
/22..ماشيه ف 23توا..
امينه بإبتسامه..
/ربنا يحميكي ويحفظك..
طوبى؛تسلمي يارب..امينه قداش ليك عايشه في ليبيا؟
امينه؛4سنين تقريبا بس انا مع الاستاذ مختار من 8سنين..
طوبى:تمشي لمصر؟!
امينه؛ايوه عندي قرايب هناك اخويا ومراته وولاده..انا ماتجوزتش وحدانيه..
طوبى بإبتسامه:نصيبات..
ابتسمت وقالت..
/ونحنا بنقول كل شي قسمه ونصيب..
☘وقعدوا امينه وطوبى يتبادلوا للأحاديث لعند ماغلبهم النعاس..عدلت امينه المنبه ع الساعه 12وكل وحده رقدت ع سرير في نفس الدار...
🍃🍃🍃🍃🍃
ومع الظهر حط ربيع نسرين في حوش اهلها ومشي قعد في حوشه اللي قاعدين فيه اهله بش يفطر عندهم...
☘وابتسام لأول مرة تنزل لحوش العيله بش تعاونهم في تجهيز الفطور لاخر يوم ليها معاهم..
راما كانت ملاحظه عليها تملقها الزايد لجدتها وعمتها..
مش بس راما اللي لاحظت حتى صفاء..
🍃لكن لا راجلها ولاخوه لاحظوا وضع محمد الغريب كانوا غافلين عنه لدرجة ماانتبهوش فيها ع حالة الادمان اللي خشلها...
بوه لاهي في العالم متاعه وخططه للمستقبل..وعمه اشرف لاهي بمشاكل شغله...
🍃🍃🍃🍃🍃
"هالصيصان شو حلوين
عم بيدوروا حولا امن مبسوطين"
هادي طوبى تغني مع جنه عن طريق مكالمه فيديو وهي طيب" تطبخ"
وامينه مقعمزه جنبها تتفرج عليها بأستمتاع والإبتسامه مافارقتش وجهها..
"نونو ماما نونو"
طوبى؛حاضر مامتي حاضر..شويه بس..
غطت الطنجرة..بعدين وقفت قدام كاميرا الهاتف وبدت تغني..
🍃وصوتها الحلو رفع كل من يسمع فيه لعالم تاني..
نبرته مع الأغنيه هادي كانت حزينه خلت العيون ادمع...
عيون امينه اللي تأثرت هلبه بالصوت والكلمات والنبرة..
وعيون هاديه واريج اللي كانوا يسمعوا فيها مع جنه وهما يتعاونوا في الكوجينه..
هاديه دموعها كانت زي السيل..تمسح فيهم ويرجعوا ينزلوا..
التفتت وشافت لجنة..
لقتها حاطه صبعها في فمها وهي تحرك في جسمها يمين ويسار..ابتسمت من بين دموعها...
🍃وطوبى مازال مستمرة في الغناء لعند مانهت الاغنيه..
جنه صفقت وهي تصيح..
"تمت"
ضحكت طوبى وبدت تصفق معاها وتصيح..
"هيييه"
وامينه تمسح في دموعها وتضحك..
🍃🍃🍃🍃🍃
وقبل العصر بربع ساعه..
درست سيارة بسواق قدام حوش محمد شنيبه..
نزل محمد ولد حامد ونزلوا معاه خواته فرح وسدرة..
فرح وهي تمرر في نظرها ع حوش جدها قالت..
/ماغيروا فيه شي..
محمد:شن تحسابي روحك غايبه السنين!؟
سدرة:ايه لينا سنتين برا البلاد..
شافلهم بنظرة امتعاض وهو يقول..
/تحركي انتي وياها تحركي..
ضحكوا ومشوا معاه للباب..
🍃داخل الحوش..
تحديدا في الصاله..
كانت خديجه مقعمزه تتفرج ع التلفزيون وامها جنبها ع الكرسي المتحرك تتفرج حتى هي..
وتخش نسرين بعد ماكملت تجهيز الفطور مع سميرة..
قعمزت ع الكنبه وقالت..
/جيتي بينتي وجهك شويه..
خديجه؛عارفتيني نخش الكوجينه وهديكا فيها!
نسرين رفعت حاجبها وقالت..
/لكن قالوا امس خشيتي!
شافت مغليه لنسرين بطرف عينها..
خديجه بإبتسامه مستفزة..
/ايه بمزاجي نخش امتى مانبي واليوم ماخاطري ندير شي قعمزت عجبك!؟
وجهت نسرين نظرها للتلفزيون وهي تحرك في راسها يمين ويسار..
ويدق باب الحوش..
ناضت نسرين بلهفه وهي تقول..
/اكيد هما..ومشت بسرعه طلعت من الصاله..
☘وصلت في الباب وفتحاته..
فرح بضحكه؛نانسي..
نسرين جبدتها من يدها وحضنتها بقوة وهي تقول..
/ياكلبه..
ضمتها فرح وهي تقول..
/Thanks..
سدرة؛واني شني غزاله ولا بطه..
تباعدت نسرين وهي تضحك من بين دموعها..
/تعالي ياقرده تعالي..
وضمتها مع اختها..
محمد قال بمزح :واني اسد ولانمر!؟ ..شافتله امه وقالت..جحش..
قعدوا يضحكوا...
🍃🍃🍃🍃
"شن رايك مروة الوشاح هدا يمشي مع اللبسه هادي ولا هدا!؟"
مروة:الزوز يمشوا معاها..
تاله:احلى واحد فيهم!؟
مروة؛شن قصتك انتي بتمشي لعرس!؟
تاله بشي من الربكه..
/شن تبيني نمشي مبهدله!
مروة؛عمرك ماكنتي مبهدله ولبسك كله حلو وديما مهتمه بروحك لكن المده الاخيره حساتك مبالغه شويه..
توترت تاله وجاوبتا بنرفزة..
/هدا كله ع خاطر سألت اما وشاح يمشي مع اللبسه! خلاص معاش نبي منك شي..
وخدت حوايجها ومشت بيهم لدارها وخلت مروة متعجبه من حالها..
🍃🍃🍃🍃🍃
وتغيب الشمس ويأذن المغرب..
ويجتمعوا ع الفطور ومعاهم خالتهم خديجه وحناهم قريبه عليهم تتفرج وهي متحسره..
اما سميره فكانت تفطر ع رواق مع راجلها في الكوجينه..
وعمر ونضال في المربوعه...
🍃والفطور في حوش الصيد برغم اللمه راما ماتبننت منه شي..
من اول رمضان وهي ماتتبنن في شي..وسط عيلتها صح..لكن شعورها بالتشتت مسيطر عليها..تشوف لحالة خوها الصغير وقلبها موجوع...خوها اللي امه نساته وبوه بعده عنه وقرب غيره...
الحزن اللي عايشه فيه راما كان كبير لدرجة لاتوصف.. شعور مكتوم ماتبي تبينه لحد..
هي توا حاسه روحها يتيمة بكل معنى الكلمه..يتيمه والديها ع قيد الحياة...
🍃🍃🍃
"تسلم ايديكي ياطوبى الاكل تحفه"
طوبى بإبتسامه؛صحتين..
امينه؛خلاص دلوقتي روحي ارتاحي..مش حتعملي حاجه تاني خلاص..
طوبى بضحكه:باهي هاني نضت..ناضت وهي تقول..خل نمشي نكلم فاتن..
امينه:سلميلي عليها..
طوبى وهي ماشيه للباب..
/يوصل...
🍃وتوجهت للدار..
خشتلها سمعت هاتفها يرن..سرعت خطواتها لين وصلت في الكامدينو خداته..شافت سدرة تتصل..
طوبى:ياحي عليك ياطوبى حي..خدت نفس وقالت..يارب..فتحت الخط وردت..السلام عليكم سديرتي..
"وعليكم السلام.."
طوبى:والله حالي باهي واموري تمام وهو في جهة واني في جهة..
"مش متصله بش نعاركك..نبي نخبرك بحاجه ليك وقت تستني فيها"
طوبى بلهفه:حامل!؟
"ايه"
ضحكت بفرح..نبرة الفرح في ضحكتها زادت حلتها قالت بكل حب وبنفس النبره..
/احلى خبر نسمعه في حياتي والله احلى خبر سديرتي..اقسم بالله فرحانه فرحه مش عارفه كيف نوصفها..ياقلبي مبارك مبارك..
جاها صوت سدرة الباكي وهي تقول..
"خلاص قطعتي قلبي"
ضحكت وقالت..
/فرحانتلك ياقلبي فرحانه...
"عارفه ياعيوني..الله يسامحك ياطوبى بتحرمينا شوفتك حتى في العيد"
ابتسمت ودموعها عبوا عيونها..
/سيرونا نتلاقوا ان شاء الله ونفرحوا بصغاركم..انتي ومختار بيجوكم صغار ورا بعض سبحان الله..
"طوبى حبيبتي عمك المهدي اشبح شن يبي بعدين نكلمك"
ونهت المكالمه من غير ماتسمع رد طوبى..
مادققتش طوبى في تصرفها فرحتها بخبر الحمل طيرت عقلها...
اتصلت بعدها ع طول بفاتن بش تطمن عليها وتخبرها...
🍃🍃🍃🍃🍃
"سبحان الله هادم الزوز تقول توامه تزوجت هو هي لحقاته حملت مرته هي حملت بعدها..بعد سنين وسنين بيجوهم الصغار مع بعض "
غرفه:لهالدرجه كانت علاقه مختار بسدرة قويه!؟
صفيه بإبتسامه حسرة..
/كانوا روح وحده..قعدت سدرة فتره هي الصغيره في العيله وعلاقة الخوت الكبير والصغير ديما بروحها..يتناقروا هلبه لكن مستحيل يفوتوا يوم وهما منافسين بعض..تشوفيهم كيف كانوا مع بعض يخلوك مرات تقولي هو بوها ومرات تقولي هي امه..سدرة كانت ديما ترقع ورا مختار اكثر من امك الله يرحمها..
غرفه وهي تفكر..
/اكثر حاجه نتفكرها من هداكا الوقت وقفتهم في الجنان هما وفردوس نتفكرها كانت في الليل كانوا يتعاركوا لكن مالقطتش من كلامهم شي..
صفيه بحزن..
/هادي الليله اللي سبقت هداكا اليوم الاسود..عليك يوم كل مانتفكره كأنه صار قدامي..
بدت ع وجه غرفه ملامح الألم والكره..
صفيه:هداكا اليوم خلانا كلنا نكرهوا مختار وسدرة مسحاته مسح من حياتها..مانحساب يجي يوم وتولي هي وياه زي قبل..
غرفه التزمت الصمت ماتبيش تتكلم عن مختار لابخير ولابشر..
تنهدت صفيه وقالت..
/زي مايقولوا الدم عمره مايولي مية..
🍃🍃🍃🍃🍃
الساعه 11:00ليلا..
طلعت تاله من الحوش وهي لابسه لبس محتشم وحاطه كمامه وتوجهت لحوش شنيبه..
وامها واقفه في روشن الشقه تراقب فيها لعند ماوصلت في الحوش ودخلوها...
☘سدرة بإبتسامه ماكره..
/اشيه اشيه ع الطرحات اشيه اشيه..
احمر وجه تاله وهي تقول بخجل..
/مبردك سدرة فكيني من الدوة هادي وقوليلي جو بنات عمتك..
سدرة؛خليتهم فوق ومعاهم راما راهو..
تأففت تاله بتذمر وقالت..
/شن جابها هادي!
سدرة بنرفزة:نندري ع دعوتها لقيتها لاصقه معاهم..
🍃وفي الشقه...
سدرة:الله يبارك جيلكم يكبر بسرعه يادعاوي..
فرح بضحكه:انتم تبونا ديما نقعدوا صغار..
سدرة بإبتسامه..
/صدقتي فيها..باهي قوليلي ليش هدا وين تجوا تشوفوا امكم وانتم مروحين من شهر 3..
تنهدت فرح وقالت..
/بعد ماروحنا خشينا الحجر..وبعدين حصلنا في حنينه ومرضتها والحمد لله ماكانتش كورونا بعدين مات واحد من ولاد عم بابا..معاش حصلنا فرصه الا اليوم..
سدرة:وشن بوك ناوي يقعد هني ولامازال بتولوا..
فرح؛مازال مش معروف..حني روحنا اكثر شي ع خاطر حنينه كانت مرعوبه من الكورونا وخايفه علينا منها..
سدرة:روحت لقتها تراجي فيها..
فرح بضحكه:هي هادي..لكن قالت عادي المهم نموت في بلادي..
سدرة:ربي يحفظ الجميع..
فرح:امين..
شافت سدرة لراما وقالت..
/شن حالك راما؟
راما:الحمد لله..
سدرة:خوتك شن دايرين؟!
راما؛عادي زي قبل..
هزت سدرة راسها وهي ساكته..
سدرة حامد:قبل خاطري نشوف خالو..
سدرة المنتهى:راجي نص ساعه بش يفيق..
وينفتح باب الشقه..
سدرة المنتهى:اهي جتكم تاله..
سدرة حامد:متشوقه نشوفها..
وتخش عليهم تاله ومعاها سدرة المهدي..
سدرة المنتهى:ياهلا بالزين كله..
ضحكت تاله بخجل.. وقالت..
/السلام عليكم...
🍃وسلمت ع فرح وسدرة سلام كويس وتجاهلت راما..
لاحظت سدرة المنتهى الحركه وشافت ملامح الضيق والاحراج كيف بانوا ع وجه راما..وجعتها..
☘☘☘☘
وخشوا البنات لدار سدرة اللي كانت مدايرة اجواء حلوة ...
ومشت الجمعه كلها هدرزة وضحك وكل شويه سدرة خاشة عليهم بسفرة...
🍃في الوقت نفسه..
كانت ابتسام تودع في عزوزتها وحماتها بالدموع..
نجمه بكت بالعبرة لما طلعت بالصغار..حست وكأن روحها بتطلع معاهم...
🍃ولما جت ابتسام طالعه من الحوش تقابلت هي واشرف ومحي الدين..
☘ابتسام بنبرة باكيه..
/بارك الله فيك يامحي الدين وسامحنا في تعبك معانا..
محي الدين وعيونه في الارض..
/غير شن تقولي بس..هادوا صغارنا وانتي ام صغارنا..
اشرف:ماتخمميش فيهم بكل بإذن الله مش حنقصروا لامعاك ولامعاهم..
ابتسام بنفس النبره..
/بارك الله فيكم..السلام عليكم..
ومشت وهي تبكي وصغارها وراها ومحي بعيونه معاهم ونظراتهم كلها ألم..
🍃🍃🍃
وتتعب نجمه بعد طلعتهم وقعدوا راجلها وصغارها حواليها يهدوا ويواسوا فيها لين رقدت..
🍃عواطف بحزن..
/هدا اللي خفت منه تو بيخلوا مكانهم و امي حتزيد تتعب الايام جايه..
تنهد محي الدين بضيق وقعد ساكت..
عواطف:ايه حقه قالت ضمت الشقه ونظفتها كلها كان تبي تبات فيها..
هز راسه وقال..
/راكبلها توا..لما يجي وقت السحور اتصلوا بيا..
عواطف:حاضر..
🍃🍃🍃🍃
ويركب محي الدين لشقته...
ومع اول خطوة يخطيها فيها يشم ريحة معطر حلوة..
سكر الباب..وفتح الاضويه...
ماتغير في اثاثها شي طول الشهور اللي فاتوا لكن ابتسام غيرت في نظامها وعاودت رتبتها وفرشتها بطريقتها..
بانت لمستها في كل شي..بان الاختلاف كبير بين قبل وتوا..
قعد يمشي في الشقه ومازال يشم في الريحه الحلوة لعند ماوصل في الكوجينه وخشلها...
حتى هي نظامها تغير..ولت احلى من قبل..
التفت ع التلاجه شافلها شويه بعدين مشي فتحها..
بدت ع وجهه ابتسامه لما شاف حافظات الاكل حار وحلو...
ضحك وسكر الثلاجه بعدين مشي طلع من الكوجينه...
ماخلاش مكان في الشقه ماشافاش..
كل ركن فيها كان متغير..لمسة ابتسام موجوده حتى في ريحتها...
☘لكن لما وصل دار النوم وخشلها..
شم ريحة عطر مش معطر..ريحة سلبت عقله لما شمها..
فتح الضي..ومرر نظره ع الدار..هي الوحيده اللي قاعده زي ماهي..
الريحة بس اللي تغيرت...
توتر..بلع ريقه..مسح بيده شعره للخلف..بعدين سكر الضي وطلع من الدار...
🍃🍃🍃🍃🍃
الساعه 1:00ليلا
خشوا محمد المهدي ومحمد حامد ويزن للحوش وهما يحكوا عن دوريات كرة القدم..
يزن؛الكورونا وقفت كل شي..
محمد المهدي:الكورونا وقفت الدنيا بحالها..
محمد حامد؛قريبا بنزل اغنيه عن الكورونا..
يزن:والله لليوم فكرت فيها قلت غريبه لتوا مادارهاش!
محمد المهدي بضحكه..
/قول لبوي يعاونك فيها اكثر واحد عانى منها..
ضحكوا...
شويه سمعوا اصوات بنات يهدرزوا قاعدة تقرب..
محمد؛القرمه ع المفاصل حشيشتها فرخه فرح قرمه..
ويبانوا عليهم البنات..
راما لما شافت محمد المهدي هربت بعيونها عنه احراجا..
وهو لما شاف بنات عمته قال سخرية..
/طيب فينا اللي ريناكم..
وقفت فرح حطت ايديها ع فمها بدهشه وهي تمرر في نظرها عليه..
اختها سدرة بدهشه قالت..
/حي كيف كبرت يامحمد وليت راجل!
كلهم فنصوا في سدرة وهما شادين ضحكتهم..
ومحمد المهدي يشوفلها بإمتعاض..
هي ضحكت بربكه وقالت..
/اسفه مش قصدي خاني التعبير..
يزن بضحكه..
/خانك التعبير صار!..
فرح بضحكه:انت بالذات متغير اكثر منه مولي تشبه خالو هلبه..قربتله ومدت يدها..
وتاله تشوفلهم..
صافحها وقال..
/شن جو ..
فرح:تمام..طلقت يده ومدتها لمحمد وقالت..شن الاخبار..
صافحها وقال..
/خليك من اخبارنا وقوليلي قداش ليك في حوشنا!؟
فرح بملل:فهمتك..قعمزت مع ماما وهدرزت عليها لين نفخت راسها وبعد مارقدت خديت سدرة وركبنا..
محمد خوها قال..
/صارلكم من البيتان؟
فرح؛Yes..
يزن:خلاص تو نتلاقوا ونزيدوا نهدزروا توكلوا..
خدت فرح يد اختها وقالوا مع بعض..
/تصبحوا ع خير..
مشوا وراما لحقتهم طول ومحمد بطرف عيونه شافها..
تاله وهي تحاول تخفي ضيقها..
/تصبحي ع خير سيدا..
يزن:وين وين عابيه بتروحي بروحك !؟
تاله:عادي بينا خطوة..
يزن بنظرة امتعاض.
/تعالوا وراي..
ومشي..وسدرة شدت يد صاحبتها بقوة ومشوا لحقوه..
محمد المهدي تبعهم بعيونه لين طلعوا..
ابتسم وشاف لمحمد وقال..
/سمعنا صوتك..
ضحك وقال..
/قصدك الاغنيه..
محمد المهدي بضحكه..
/سمعنا الاغنيه...
🍃وبعيد بمسافه قصيرة..
في الشقه اللي قاعد فيها الجالي..
كان مقعمز ياكل في الكوجينه ع خشة نجاة عليه..
نجاة؛توقعت قاعد راقد..
الجالي؛خيرك ماخلتيش حمزة يطلع مع صغار عمه وجوري تمشي لحوش عمها!؟
رفعت حاجبها وقالت..
/خايفه ع ولدي من الكورونا مانبيشي يطلع..وجوري مستحيل نخليها تخش حوش مراة تكره امها..
رمقها بنظرة امتعاض وهو ياكل..
ابتسمت تهكما وقالت..
/خليك من صغاري توا والهى ببنتك اللي امها خلتها ومشت تجري لخوها بعد جاته الكورونا..
الجالي بصدمه..
/شني!!!؟
نجاة:ريت الإهمال والإستهتار!..
سيب اللي في يده وناض وهو يقول بخوف وعصبية..
/ديما هكي ياطوبى انتي ديما هكي..
مشي طلع من الكوجينه بسرعه متوجه لباب الشقه وهي معاه بنظراتها..نظرات كلها حقد غرقتها الدموع..
🍃🍃🍃🍃🍃
"ديري حساب زوز في السحور في واحد بيجيني توا"
امينه:حاضر..
الاقجم:يحضرلك الخير..
مشي الاقجم وامينه سكرت باب الكوجينه الخارجي والتفتت لطوبى وقالت.
/قال اعملي حساب اتنين في السحور..
طوبى:باهي تو نوتيه اني وانتي ديريلنا العصير اللي قلتيلي عليه..
امينه بإبتسامه..
/طيب..
🍃وفي حديقة الفيلا..
واحد من الحراسات فتحت الباب من برا ودخل ضيف الاقجم..
ويجي الاقجم بضيفه يرحب بيه وهو يقول..
/مرحب بالتارقي مرحب..
التارقي بإبتسامه..
/رحب بيك...
#الحجر
#طوبى
...يتبع....
