#طوبى "جنة طوبى"
#جمان_فريد
#الجزء_105"كانون الأول/موسم الثلوج"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩)٦
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃سـأكون دائـماً مـوجـودة لك ولأجـلك🍃
______________________________________
مقعمز ع الكرسي وهما حواليه..
واحد فيهم كان مقعمز قدامه شاد اصابع رجليه وعيونه عليه..
عبد القيوم وهو يقاوم في الوجع الشديد اللي يحس بيه قال..
/ساهله يادكتور ساهله..شوفوها هي شن صارلها..
اياد بإستياء:ساهله شني ياراجل!.
اسامه؛اطمن ماجاها شي..
عبد القيوم وع وجهه ملامح الوجع قال..
/كيف ماجاها شي! حقيتها بعيوني فاقدة الوعي!
اياد قام راسه وشافله شويه بعدين ابتسم..
اسامه؛تمام تمام تو نمشي نشوفها غير انت برا صور رجلك..
ولف ومشي..
اياد ناض وقف وقال..
/شويه وجايك نرفعك ماتناقشش..
ومشي طول لسيارته وخلاه برغم الوجع وحالة هوان الجسم اللي بدي يحس بيها يفكر بقلق شديد عليها..
🍃قدام المستوصف كان المهدي واقف يراجي في خبر عن طوبى وفي نفس الوقت يشوف لعبد القيوم من بعيد وعقله يفكر في تفسير للي صار..
🍃وداخل..
كانوا حاطين طوبى ع السرير ومزال فاقده وعيها..
سدرة ودموعها ينزلوا..
/ خيرها معاش فاقت ياحليلي !..
اميمه قربت لطوبى وفي يدها قطنه فيها كحول..حطتها انفها..شمتها طوبى وبدت تفيق..
اميمه؛اهي بدت تفيق..
قربتلها سدره وهي تقول..
/طوبى..
وطوبى فتحت عيونها..شافت وجوه اميمه وسدرة..غيرت نظرها وهي تمرر فيه حواليها..وعت تماما وجي بين عيونها اللي صار..البلوكه وهي طايحة ع رجله..
نزلوا دموعها وشافت لأميمه وهي تقول..
/شن صارله يااميمه!؟
اميمه فهمت عليها وقالت..
/ماصارله شي حبيبتي..
طوبى بألم؛كيف ماصارله شفتها طاحت ع رجله يااميمه بلوكه هادي طاحت بثقلها ع رجله..وبدت تبكي..
عقدت سدرة حواجبها وهي تفكر في حالة اختها...
واميمه مسحت ع خد طوبى وقالت..
/تو نمشي نشوف شن صار فيه ونجي نطمنك..
ومشت طلعت من حداهم..
سدرة حطت يدها ع جبهة اختها وقالت..
/ياروحي..
وطوبى تشوفلها بتعب وحزن ودموعها مابطلوش نزول..
🍃طلعت اميمه برا تلاقت مع المهدي وولده وبعيد عليهم شويه واقفات ابله شروق ومروة ومناسك..
المهدي سأل اميمه..
/شن حالها؟
اميمه؛فاقت الحمد لله عبد القيوم شن صار فيه؟
المهدي:مش عارف..
ع جية اسامه قال لأميمه..
/شن صار فيها دكتورة!؟
اميمه؛فاقت ضغطها هبط من الخوف بس..عبد القيوم شن صارفيه؟
اسامه؛تقريبا صارله كسر خليت معاه الدكتور اياد..
اميمه بأسف:لاحول ولاقوة الا بالله..
ومشت خشت مرة تانيه..ع جية هناء وهي شاده فيدها عصير وكيكه فات من جنبها اسامه وهو مولي لعبد القيوم وهي خشت للمستوصف..
تنهد المهدي بعدين قال لولده..
/تعالى..
مشي..ومحمد قبل ليلحقه شاف لمروة اللي مش مهتمه لوجوده نهائي بعدين مشي..
مناسك راجت ابله شروق تمشي للمستوصف بعدين قالت لمروة..
/ولد جيرانكم من بكري معاك بعيونه..
مروة بإنزعاج:بالله فكيني من سيرته..سكتت شويه بعدين قالت..لتوا الرعشه في عظامي تخيلي جت عليها!..
مناسك؛الحمد لله ماصارلها شي لكن تعرفي شكله حق يحبها جاركم هداكا..
ابتسمت مروة وقالت..
/حتى اني تأكدت من الحاجه هادي..
🍃وعبد القيوم غصب عنه ماشي مع اياد للسيارة وعقله وقلبه عند طوبى..ماطمناش اللي سمعه من اسامه يبي يشوفها بعيونه بش يطمن قلبه..
☘وهي كانت مقعمزه ع السرير تبكي بصمت..
مش قادرة توقف بكي..
تبكي من الفجعه..ومن خوفها عليه..وضايقها ان ديمه مايجيه من وراها كان المصايب..
سدرة بضيق..
/كان تروحي بينا يااميمه..
اميمه هزت راسها وهي تقول..
/هدا اللي بيصير..
حولت بالطوها ومشت خدت شنطتها وهي تقول..
/هيا..
سدرة شافت لطوبى وقالت..
/طويبه...
هدت شويه ومسحت دموعها..نزلت السرير وسدرة حاوطتها..
مشوا مع بعض واميمه معاهم وهي تقول..
/شويه وجايه هناء..
هزت هناء راسها وهي مبتسمه..
🍃وطلعوا والبنات معاهم..وهما ماشيات شافوهم المهدي وولده اللي كانوا مقعمزين في السيارة..
بعد ماطلعوا برا..شغل المهدي السيارة وتحرك...
طلع بيها برا المدرسه لقاهم كلهم ركبوا سيارة طوبى واميمه هي اللي تحركت بيها وهو لحقهم...
🍃🍃🍃
طول الطريق وهما في حالة صمت..
كل وحده فيهم سرحانه بتفكيرها ماعدا مروة ومناسك اللي كانوا لاهيات بالطريق..
اميمه تفكر في اللي صار وتحاول تلقاله تفسير لعند ماوصلت لنتيجه..
ان عبد القيوم قاعد يكن مشاعر لطوبى لكن مايبيش يرتبط بيها..وهلبه هكي صاير فيهم..يحب وحده لكن لما يجي يتزوج يختار غيرها..يختار اللي يضمن الاستقرار معاها ويكمل عمره وهو محتفظ بمشاعره لنفسه..
بعد ماوصلت لهالتفسير حمدت ربي انها ماقالت شي من اللي تعرفه لطوبى..المراة مش ناقصه كسر ووجع قلب..
وسدرة اللي كانت مقعمزة جنبها قعدت تفكر في حالة اختها وهي تسأل عن عبد القيوم..
ربطت الاحداث ببعض بعدين تأكدت ان اختها فعلا تحب لكن للأسف حبها من طرف واحد..
《 سدرة مش كل وحده تلقى راجل يحبها زي مايحبك المهدي..
...يابختك ياسديرة يابختك بيه..》
لما تفكرت كلامها ونظرة عيونها كيف كانت وهي تقول فيه زادت انقهرت عليها..كانت تبي تبكي لكن شدت روحها بقوة..
🍃وهي وراهم متكيه ع الكرسي..
عيونها في الروشن لكن كانت تشوف اللي صار...هالمرة تخطت كل شي وفكرت في بنتها..تخيلت لوصارت فيها حاجة جنة من بيها؟!..
"لله الأمر من قبل ومن بعد"
هالآية استحضرها عقلها بعد السؤال مباشرة .
حست بشعور اطمئنان رهيب قاوم مشاعر الخوف والفجعه والقلق وخلاهم يتلاشوا..
غمضت عيونها..وبدت همسا تردد..
"الله ربي..لاأشرك به شيئا"
🍃🍃🍃🍃🍃
خشت اميمه بالسيارة الحوش..والمهدي بعد ماوصلهم ولى طلع بولده للجامع وقت صلاة الظهر خش..
☘☘☘
"خيرها طوبى"
طوبى ابتسمت في وجه عمتها وقالت..
/شي عمتي مافي شي..
فاتن بقلق؛وجهك اصفر..
سدرة بضيق..
/قريب راحت فيها..
شهقت مطيره من الفجعه وفاتن حطت يدها ع فمها..
شافت طوبى لسدرة بضيق..
مطيره بفجعه:شن صارلها!!؟
🍃بدت سدرة تحكي في اللي صار ودموعها ينزلوا وطوبى تحاول طمنهم بس وين سمعت كلام عمتها عن عبد القيوم قلبها وجعها..
مطيره بضيق..
/ووك ياكبدي ومن قبل متلقى رصاصه المسكين..
سدرة بحزن:بارك الله فيه كان هو مالحقش عليها راهو..شافت لطوبى شدت يدها بقوة وهي تقول..بعيد السو..
مطيره:ايه ياكبدي بعيد السو عليك ربي يحفظك وينجيك لبنيتك يابنتي..
طوبى بهلفه وقلق..
/وينها جنونه؟
فاتن بإبتسامه:لعبنا لين تعبت ورقدتها..
ابتسمت طوبى وهي تقول..
/سلمها ياربي..
تنهدت سدرة وقالت..
/ماروحتش اريج؟..
مطيره وهي تشوف لطوبى بقلق قالت..
/ع خشة...
🍃واميمه بعد ماحطتهم ولت بالسيارة للمدرسه مرة تانيه..
زادت طمنت الابلات وعضوات من الفرق التطوعيه وحتى ناس من النازحين ع حالة طوبى ورجعت تمارس في عملها..
واسامه اللي معاها في نفس المكان كان يراجي في فرصه تجيه بش يتكلم معاها...
شافها طالعه من المستوصف تتكلم بالتليفون..قعد يراقب فيها لين كملت مكالمة مشالها طول...
هي شافاته جاي ناحيتها شدت ابتسامتها...
ابتسم لما وصل فيها وقال...
/كناري..قصدي دكتورة .
ضحكت وقالت؛نعم..
ضيق عيونه بإبتسامة وقال..
/بنسألك ع حاجه لاحظتها..تعرفيني حشري..
بضحكه قالت؛شن هي ترا؟
ضحك بعدين قال..
/اللي صار بكري مش موقف عادي ولا..قصدي اللي داره حسيته وكأنه..
قاطعاته وقالت..
/ايه صح...
ابتسم وقال؛عندك علم واضح وهلبه..نظراته ليها مش عاديه بكل..
ابتسمت بصمت..
هو شافلها بإبتسامه وقال..
/وهي دايرة روحها عميه صح!؟
شافتله بإبتسامه وقالت..
/لا..هي فعلا عميه..
بإبتسامه مرر نظره ع المكان وقال..
/معناها ماكانتش زي ناس نعرفهم...
نزلت عيونها خجلا بعدين رفعتهم القدام وربعت ايديها..
وهو يشوفلها بطرف عينه بإبتسامه بعدين قال..
/اميمه..
شافتله وقالت..
/نعم!؟ قاللها وهو يحرك في ايديه وع وجهه ابتسامه يخفي بيها توتره..
/في بالي سؤال ضروري هلبه نسمع اجابته منك..
اميمه؛باهي خل نسبقك بسؤال لو اجابة سؤالك ماجتش زي ماتبي شن دير؟!
قال:امم..خل نسألك قبل وبعد تجاوبي تعرفي..
ابتسمت وقالت..
/اسأل..
اسامه؛انتي وافقتي بقناعة تامه ولا اهو اللي نعرفه خير من اللي مانعرفاش!.
ضحكت بعدين قالت..
/لو نبي نتزوج والسلام راهو قداش ليا متزوجه..اني وافقت عليك انت لإني مقتنعه بيك وانت عارف الحاجه هادي كويس.
بضحكه قال:okنغيروا صيغة السؤال..اميمه انتي حاسة بشي ناحيتي!؟
نزلت عيونها وقالت بخجل..
/بصراحه مش عارفه..رفعت عيونها فيه وقالت..مازال لتوا مش عارفه نحدد اني بشني نحس بالزبط غير اني..
"متأمله فيك خير"
بدت ع وجهه ابتسامه حلوة بعدين قال..
/بعدين تو تعرفي اني مش حنخيبلك املك بكل..
ضحكت بعدين قالت..
/خلاص لهني ساد..نستأذن..ومشت خشت للمستوصف..
هو ضحك..بعدين تنهد من قلبه ومشي يشوف شن وراه بعد ماخدي جرعة سعاده...
🍃🍃🍃🍃🍃
بس وين مازال بتعرف راما معنى السعاده بعد اللي صار معاهم واللي قاعد يصير..
من جهة المصيبه اللي طاحت فيها ومن جهة مصيبة طلاق امها..
امها اللي قاعده حابسه روحها في دار النوم من امس ماطلعتش منها..
هي كانت واقفه قدام دارها تبي تخشلها لكن الخوف منعها..
سمعت باب الشقه انفتح تسارعت دقات قلبها من الخوف..
"راما"
زادت توترت لما سمعت بوها ينادي مشتله طول..
🍂وصلت فيه وقالت..
/نعم..
هو بملامح متجهمه..
/امك قاعده هني!؟
هزت راسها ودموعها في عيونها..
سمعوا الزوز باب دار النوم انفتح بقوة وتجيهم بإندفاع وغضب وهي تقول..
/عندي بدال الولد زوز يعني هدا حوشي مش طالعه منه انت دور وين تقعد..
شافتلها بنتها بخوف..وراجلها شافلها بحده من فوق لتحت بعدين هز راسه بوعيد ومشي طلع من الشقه..
خديجه بكره؛حقير..تفي.
ومشت بغضب ولت لدار النوم خشتلها وخبطت الباب بقوة..
وترجع راما تتمنى الموت من الضيقه اللي عايشه فيها..
مشت طول لدارها خشتلها وسكرت الباب...
🍃🍃🍃🍃🍃
الساعه 5:15عصرا..
في حوش طوبى كانوا دايرين فيها عصرية ملتمات فيها نساوين العيله كلهم ومعاهم سميرة..
سبب لمتهم التخطيط ليوم عقد قران مطيره واميمه..
وبما إن الحديث كان عن الزواج فتحت سميرة موضوع صديق نضال..
🍃طوبى بشي من المفاجأة..
/حوا!؟
سميره؛ايه هو مطلق وماعنداش صغار وقال يبيها بصغارها..
طوبى ماحستش براحة اتجاه الموضوع وممكن هالشعور سبب اللي مرت بيه..
🍃غالبا النساوين لما يمروا بتجارب زواج فاشله ومؤلمه يبدوا متخوفات من فكرة الزواج مرة تانيه ليهم ومرات حتى لغيرهم🍃
وطوبى تشوف في حواء وصغارها امانه عندها تتحاسب عليها قدام ربي..
غيرت نظرها لهاديه لما سمعتها قالت..
/اللي في ظروفها تبي راجل معاها..
مطيره:صح وهي وصغارها مقطوعين مافي حد مدورهم..
طوبى:كلامكم صح لكن حاجه زي هادي مش ساهله لازم تتأنى شويه وتفكر ع مهلها..
سميره؛نضال قال اني ضامنه..
اريج نزلت عيونها وقلبها يدق بقوة..
سدرة؛من رايي طوبى تفتح معاها الموضوع وتشوفها كان قالت ماعندهاش مشكله نخلوا مختار يسأل عنه..
طوبى نفسها خطرتلها الفكرة هادي وهي تسمع في كلام سدرة..
سميرة؛مالا في هاليومين افتحوا معاها الموضوع الراجل مستعجل شويه..
طوبى:إن شاء الله خير..
جي لفاتن اتصال..قامت تليفونها شافت المتصل وقالت..
/الاقجم جي..
ناضت ومشت سلمت عليهم بالوحده وقالت..
/نتلاقوا الخميس..سلام..
طوبى ناضت وهي تقول..
/راجيني شويه..
ومشت طلعت من حداها..
سدرة بإبتسامه..
/واخدتلك هديه قبل بتعطيهالك بعد عرس يوسف سافرتوا..
ابتسمت فاتن وهي متشوفه للهديه..
ع جية طوبى طبطبت ع ذراعها وقالت بإبتسامه..
/تعالي..
مشت فاتن معاها وطلعوا مع بعض..
🍃مدت طوبى صندوق هدايا طويل طول متوسط الحجم وقالت..
/ان شاء الله تعجبك..
خدتها فاتن وقالت..
/تسلمي حبيبتي كلك ذوق..
طوبى:بصدق فاتن خشيتي قلبي وحبيتك هلبه..
فاتن بإبتسامه..
/والله واني حبيبتي ربي يحفظك ويفرحك ببنتك..
طوبى:آمين..
فاتن؛بس عندي طلب بسيط..
طوبى:ادللي..
فاتن:اعطي مختار فرصه..
تعكرت ابتسامة طوبى..
فاتن بحزن:مختار شاف هلبه في حياته ياطوبى هلبه ولولا انه مأمني ع اسراره راهو حكيتلك شن عاش وشاف في حياته بس بنقول حاجه وحده..تخيلي شكل حياة بنادم عاش في السجن وفي الغربه 11سنه..مافيش داعي نحكيلك السجون غادي شن يصير فيها..
تنهدت طوبى وقالت..
/خليها للوقت يافاتن احسن..
ابتسمت فاتن بأسف بعدين قالت..
/تمام..سلام..
طوبى:في أمان الله..وتبعتها بعيونها لين طلعت من الحوش بعدين خشت داخل..
🍃برا في السيارة..
الأقجم :شن حالك مدام؟
فاتن:الحمد لله..وين كان مختار امس؟
الاقجم:مشاوير شغل..
فاتن بعدم تصديق..
/اممم..
هو شغل المنظومه ع قناة ليبيه اخباريه وعلا الصوت..
فهمت فاتن انه قاعد يتهرب من اسئلتها حركت راسها يمين ويسار...
🍃🍃🍃🍃🍃🍃
يشوف لرجل صاحبه بألم واستياء وهو يسمع فيه يقول..
عبد القيوم؛بيقعد مقيدني اسبوعين القدام.. ربيع بضيق..
/وقبل لولا لطف الله راك ميت برصاصه وبعدها كليت طريحه كسراتك تكسير..
عقد عبد القيوم حواجبه وهو يشوف لصاحبه بإستياء..
شاف نظرته وقاله..
/ماتشبحليش هكي..حني صحاب وخوت دنيا ومصلحتك تهمني هلبه وحنقعد وراك لين تفتح عيون عقلك وتشوف اللي قاعد يصير وتعرف شن معناه..ماتقولش في بالك ربي يبعتلي في رسايل...ينبه فيا..يبي يصرفني عنها!؟
تنهد وقال:نبي العشا من عندك الليله.. ابتسم وهو يقول..نبيها صفرة مفتلكه ع قولتهم..
ضحك ربيع بقلة حيلة وقال..
/من عيوني..
🍃🍃🍃🍃🍃
وع عيون لبانه حال اختها المتغير ليه يومين..
صايمه عن الكلام لكن كانت تاكل بشكل مبالغ فيه تعرف حالتها هادي كويس ماديرش هكي الا لما يصير شي قوي يزعلها..
خطر ع بالها هلبه حاجات واكثر شي فكرت فيه ان اختها اعترفت بحبها لعبد القيوم...
☘واقفه قدام باب الكوجينه تشوفلها كيف واقفه ع طاجين المعمول اللي داراته وقعدت تاكل فيه..
تنهدت بضيق ومشت بإتجاه دارهم قابلتها امها وقالت..
شاديه:هاه شو صار معاك عرفتي شوبها!؟
لبانه؛ماعرفت شي مو رضيانه تحكي..
امها بتفكير قالت..
/انا حاسه انو عبد القيوم السبب..
لبانه سكتت وهي مضايقه..
شاديه:ماني عميا بنتي عم بشوف كل شي..المهم انتي خليكي وراها لتعرفي شو صاير معا..
ومشت من حداها لدار النوم..
خشت لبانه لدارهم وهي تفكر في كلام امها..
وشويه وتخش سلافه وطول لفراشها تخشله وتغم روحها بالغطا..
قعمزت لبانه ع الكرسي متاع المكتب وهي تشوفلها بضيق بعدين التفتت ع اللاب توب..
شغلت فيه اغنيه تحبها سلافه وليها فترة ماتسمع في غيرها..
"حاجة مستخبيه"
دارتها قصدا بش تتفاعل معاها وطلع اللي في داخلها..
وسلافه تحت الغطا تسمع ودموعها ينزلوا وقلبها موجوع...
بين عيونها هو بين عيونها وين ماتمشي وشن دير تسكرهم تشوفه تفتحهم تشوفه وين تجي ترقد تحلم بيه...
"حبيتك يوم ماتلاقينا لما حكينا اول كلام"
من هداكا اليوم..لقاء المكتبه الاول وسحره صابها وتغلغل فيها...
ومن هداكا اليوم لليوم مرت سنه..سنة عرفت فيها سلافه الحب الحقيقي..حبت انسان مالاش شبيه في زماننا هدا ومش حتلقى زيه مهما قابلت في حياتها...
"طوبى"
هو يحبها..حبه ليها بان في كل شي فيه..اللي دايره هو فيها دايراته هالمراة فيه..
طبيعي جدا تغار..طبيعي جدا تحاول تحارب ع خاطر حب عارفه روحها لو خسراته مش حتلقى زيه..
"الناس في عيني حاجه وانت حاجة تانيه
عندك مشاعري حتى خودها واسألها..
انا صعب اعيش حياتي وانت لحظة بعيد"
اخر بيت خلاها تنهار بالبكي..
سكرت لبانه الاغنيه وقالت بحزن..
/سوفي حبيبتي..
حولت سلافه الغطا وهي تقول ببكي..
/شفتها يالبانه شفت طوبى..
انصدمت لبانه وقالت..
/يعني لهالاسم صاحبة عنجد!!؟
رجعت غمت روحها بالغطا واختها تشوفلها بحزن وعيونها غارقات بالدموع..
🍃🍃🍃🍃🍃
وصاحبة الاسم كانت مقعمزه في الجنان تتفرج ع الاقحوان وسرحانه بفكرها في اللي صار اليوم..
من مشاعر الفجعه والخوف لمشاعر مناقضة تماما مشاعر حلوة بالمرة..
كانت تبي تسمع من حد يحكيلها اللي صار بالزبط هي ماكانتش واعيه..
وسبحان الله..تتحقق رغبتها ع طول لما انحطوا ايدين مروة ع كتافها وسمعتها قال..
/بخ..
ضحكت وهي تقول..
/مروش..
قعمزت جنبها وقالت؛ماما تسأل عليك..
طوبى:داخل؟
مروة:ايه سقدنا مناسك مع خوها وجينا..
طوبى:ربي معاها..
مروة:يارب..
ع جية فايزة اللي كانت نقول..
/بيبو ياقلبي بعيد السو عليك..وجتها ضمتها..
طوبى بضحكه:غير شن صار بس..
تباعدت فايزة وهي تقول..
/كيف شن صار بومشيه هكي كبرها قريب جت ع راسك..
طوبى بضيق:جت ع رجل التارقي وتكسرت في جرتي..
فايزة بضحكه:البطل متاعك هدا..
ضحكت مروة..وطوبى قريب تبخرت من الخجل وقلبها فر فران..
مروة بضحكه:كان تشوفي شن دار..زي البرق جاك حاوطك بذراعه ودفك ومالحقش يتباعد جت ع رجله..
طوبى بخوف..
/تخيلوا جت ع راسه هو!!؟ غمت وجهها بإيديها وقالت..ياربي!
فايزة بإبتسامه:الحمد لله عدت ع خير..
مسحت طوبى بأيديها ع وجهها وقالت..
/الحمد لله..
مروة:قالولك كيف هزب العمال قريب كلاهم..
طوبى بدهشه:بالله!
مروة بضحكه:والله توقعته يلزهم لكن مادارهاش..
فايزة بضحكه؛عليك جو سوسبينس..
ضحكت مروة..
طوبى بضحكه:الحمد لله اللي خلاه يضحكنا..
الزوز قالوا:الحمد لله...
🍃ومن جنان الكوجينه..
لدار البنات اللي كانوا فيها اريج وسدرة..
سدرة بضيق:تحبه ولا؟!
بدت ع وجه اريج ملامح الحزن.
سدرة بوجع..
/تحبه وهو يحب غيرها ياقعادها تعاني وتتعذب..
اريج بحزن..
/نقولك حاجه خالتي..طوبى ع قد ماتبان قدامك قويه من داخل متحطمه وثقتها بنفسها مش قويه زي زمان..اللي مرت بيه اثر فيها هلبه هلبه..
سدرة ودموعها ينزلوا..
/لو مريت باللي مرت بيه راني متت..تخيلي تتزوجي راجل واخد قبلك بالسر لا وتعرفي ان ماليه غصبوه ياخدك بش ينسى بيك وحده تانيه..تخيلي راجلك يعيش معاك جثه وقلبه مع غيرك وانتي غافله ماتندري ع حاجه..تخيلي كيف تكوني قاعده في مكان واحد مع ضرتك وانتي ماتندريش تحسابي روحك الاولى والاخيره وهي في سرها تضحك عليك..تخيلي يقعمز معاكم راجلك في مكان واحد وهما يسرقوا في النظر لبعض وانتي مقعمزه في وسطهم زي الهبله ماتندري ع حاجه..
اريج بألم ودموعها تنزل..
/هو ليله الدخله سيبها في الفندق ومشالها قعد معاها للصبح وطوبى قاعده بروحها..
فتحت سدرة عيونها ع وسعهم من الصدمه..
اريج بنبرة باكيه..
/ويوم المحضر وهي بين المعازيم تضحك وترقص وهو عايش جوه في جناحه مع هديكا الحقيره..
شبكت سدره اصابع ايديها في بعض وهي تشوف في الفراغ بقهر..
اريج بحقد؛واخر شي يجيبها لحوشها ويدخلها دار نومها..
سدرة بدت تبكي..
مسحت اريج دموعها وهي تقول..
/اللي مرت بيه يقهر يقتل من القهرة..مشناه الاستغفال مشناه..
انهارت سدرة وبدت تبكي بالعبره..
اريج استاقظت للي داراته جتها تجري ضمتها وهي تقول..
/حي عليا والله من قهرتي ماحسيت بروحي..
انفتح باب الدار خشت مطيره وهي تقول بفجعه..
/شن في..
سدرة ببكي:سكري الباب سكري مانبيهاش تسمعني..
سكرت مطيره الباب..وطوبى برا في الجنان..
مع فايزة ومروة واميمه وصفيه انضمولهم بعدين وخدتهم الهدرزة الحلوة...
🍃🍃🍃🍃🍃
"غير ليش تعبت روحك وجيت مكالمه ساده"
علي:انت غالي وتعرف مكانتك عندي واللي صار فيك ع خاطرنا..
عبد القيوم؛كان مادرته انا يديره غيري ياحاج..
علي:ياودي اني نبي نجيك انت شن دخلك..
ضحك عبد القيوم..
شويه ودق باب الشقه..
علي؛من اللي عابي عليك بتفتحله هدا؟
ناض عبد القيوم وقال..
/مش مشكله..ناض بالقيلا ومشي بيفتح الباب..
والحاج علي في نفسه يتمنى لو يكون الزائر الشخص اللي في باله..
وفعلا كان هو..المهدي..
خش عليه وقال..
/السلام عليكم..كيف حالك حاج علي..
علي وهو يشوفله..
/الحمد لله..باهي اللي جيت..
استغرب المهدي..وعبد القيوم طلب منه يقعمز وهو مستغرب اكثر منه..
شاف للحاج وقال..
/نستأذن..
علي:لاخليك نبي نشهدك ع الكلام اللي بيصير توا..
قعمز عبد القيوم وهو يشوف لعلي الواعر..
علي للمهدي..
/شوف ياولدي..انت من يومك شاب محترم لكن كانت فيك عيوب غطت ع الباهي اللي فيك..عصاب..متهور..ماتحكمش في عقلك هدا علاش ماكنتش عاجبني واستخصرت فيك بنت ولدي..
عبد القيوم مركز بنظره ع ملامح وجه المهدي كانت بين العصبيه والضيق..
علي:هدا قبل..لكن توا كبرت وحطيت عقلك في راسك ووليت رزين..والحق ينقال انت راجل عنده كلمه وينعبا عليك..هدا علاش اني توا نبي نعباعليك بخصوص خوك الجالي..
عقد عبدالقيوم حواجبه بغضب لما جت سيرته..
المهدي:الجالي!
علي:ايه..راهو لتوا مش باين خيره من شره واني لايمكن مازال نرتاحله ولانأمن فيه..لكن بنأمن فيك انت وبنأمك ع بنت خوك وامها هادوا الزوز في رقبتك انت نبيك تحامي عليهم وتحميهم..راهو قالولي دخل فيها ناس مسلحه اني قلت لا تو نتصرف بروحي وكلمتك طول..هادي اول مرة نعبا فيها عليك وعارفك قدها وان شاء الله ماتخيب ظني..
عبد القيوم قعد يراجي في رد المهدي..
والمهدي قال..
/من غير ماتوصي ياحاج وكلامك ع عيني وع راسي..كون هاني بنت خوي وامها مايقربهم حد بسو واني حي..
هز علي راسه بإيجاب..
وعبد القيوم يشوف للمهدي بإبتسامه....
🍃🍃🍃🍃🍃🍃
"مافيش منها لاحس ولاخبر ع قدمااتصلت بيها مابتش ترد."
نجاة:اشبح شن صاير راهو..
"واضح راجلها مايروحش بكل"
نجاة:بيني وبينك خلاص راهو معاش يطولوا مع بعض..
"تتوقعي يطلقها!؟"
نجاة:والله ع حسب ماحكيتي مادام صوت عراكهم واصلكم معناها واصلين لنهاية المطاف صدقيني..
"ربك يستر الواحد شن بيقول ربك يهدي النفوس"
نجاة :باهي فكيني منهم وقوليلي شن رايك في الحاجات اللي حجزت فيهم!؟
🍃وهي في شقتها مشغوله بالهدرزة مع ابتسام كان الجالي في جناحه في حوش اهله راقد وهو حاط صورة طوبى ع صدره...
🍀🍀🍀🍀🍀🍀
وتمر ايام هالاسبوع ..
🍃وخديجه في شقتها مابتش تطلع زيها زي بنتها مشت للمدرسه وحده بس بعدين معاش مشت ومافي حد مهتم لأمرها وصاحبها يوميا عطاها مهله اسبوع ياتنفد اللي يبيه يايتصرف تصرف يدمر فيه حياتها قبل لتبدا..
هدا كله وخوها محمد هايم في العالم متاعه بين خدمته مع بوه وصحابه السو...
🍃وعبد القيوم قعد حبيس شقته وصحابه يوميا عنده..
ربيع..سامي..المهدي..رؤوف جاه مرتين..وصاحبه عيسى جاه مرة واحد..
اما ماكلته فكانت توصل فيه من حوش حبيبة القلب اللي كانت ديرله في كل شي بإيديها عرفان وشكر منها ع اللي داره معاه ولد جيرانهم اللي حاسبينه من العيله وهو حاسب روحه ولدهم...وهو ماكانش مضايقه الا شي واحد حرمانه شوفتها بسبب وضعه...
🍃وخلاص..
بدي العد التنازلي لطلعة مطيرة من حوش اهلها مرة تانيه طوبى وهي تشوف فيها كيف تجهز في شناطيها حست بخنقه وضيق..سافرت فردوس واهي بتطلع مطيره والحوش بالنسبه ليها فقد اهم اركانه..
🌸من جهة تانيه كانت اميمه عايشه احلى ساعات الانتظار فرحانه وفرحتها باينه في عيونها وامها وجدها فرحانين لفرحتها وقلوبهم اطمنت عليها...
لكن بوها اللي عمره لااهتم لافرحها او حزنها هالمرة طلع من خاطره ودارله شي كان متمني من قلبه انه يفرحها..
🍃"شن هدا!؟"
هاديه بضحكه؛تاكم فضة اميمه بعدم استيعاب..
/عارفه لكن لمني ومن مني!؟
ضحكت هاديه وقالت..
/قتلك من بوك ليك..يبيك تلبسيه غدوة ان شاء الله..
اميمه بصدمه:احلفي انه مش منك انتي!؟
هاديه بضحكه..
/قسما بالله العظيم ماليا بيه علاقه حده جاني وراني صورته قالي شن رايك قتله يهبل وفي عقلي نحسابه ليا اني طلع ليم انتي...وقعدت تضحك..
رجعت اميمه نظرها للطقم..كان حلو بالمرة ومنظره فخم..
مش قادرة تصدق عيونها..نزلوا دموعها وقعدت تبكي بصمت..
وهاديه تشوفلها بإبتسامة حب ودموعها في عيونها...
🍀🍀🍀🍀🍀
ويجي تاني يوم...
السبت...
14ديسمبر...سنة2019...
بعد العصر تعبا جامع المنطقه بأهل اسامه بوه وعمامه وخواله وخوته ونساباته..واهل شكري خوته ورجالة خواته وعمامه الزوز...
مع رجال عيلة الواعر وناس من اهل من الشارع من بينهم عبد القيوم اللي أصر يحضر وهو مجبس...
وسط اجواء الفرح..كان مختار متجنب النظر لعبدالرؤوف وعبد الرؤوف متجاهل وجوده..
والاهتمام من مختار كان بشكل كبير للتارقي..
🍃"لاباس لاباس"
عبد القيوم:لايوريك باس..
مختار:على هكي موعدنا بيتأجل..
عبد القيوم؛لاحيقعد ع حاله ..
مختار:بوضعك هدا؟
عبد القيوم:مش مشكله..
ابتسم مختار وقال..
/تمام..نتلاقوا غدوة ان شاء الله..
عبد القيوم:ان شاء الله..
ومشي مختار من حداه وربيع معاه بعيونه بعدين رد نظره للتارقي لقاه ينادي في سامي...
جاه سامي وهو يقول..
/نعم؟
عبد القيوم:نبي صورة مليحه كيف ماعودتني..
سامي بضحكه..
/حاضر ياسيدي..ناخدلها في الوقت المناسب..ومشي يكمل باقي جولة التصوير...
🍃🍃🍃🍃🍃
وفي حوش طوبى..
كانوا النساوين في الصاله يراجو في الخبر المنتظر..
انشغلوا بالهدرزة لعند ماجي لفاتن اتصال ردت طول..
/ايوه مختار..
"خلاص ولوا مدامات"..
ضحكت وقالت..
/قاللكم خلاص وليتوا مدامات..
ضحكوا اميمه ومطيرة وتتعالى حداهم اصوات الزغاريد..
وتبدا اريج دربك وهما يغنوا..
"طرحت الصلايه وصليت..عطاني اللي ماقال عطيت"
🍃واصوات غناهم وزغاريدهم مسموعه في الشارع كله..
وصلت لمسامع عمر اللي روح اليوم بس من السفر..
خش بسيارته للقراج ونزل منها عادي جدا ومشي لحوش اهله..
خشله..وتوجه للصاله..لقي امه مقعمزة بروحها تتفرج ع التلفزيون..
/السلام عليكم..
مغليه بإبتسامه تخفي بيها ضيقها..
/وليدي حمد لله ع سلامتك..
جاها وطبس باس راسها بعدين قعمز جنبها وقال..
/شن جو؟
مغليه؛باهي الحمد لله..
عمر:قاعده بروحك؟
مغليه:ايه ماهناك حد..
عمر:معناها خالتي سميره في حوش الواعر شن عندهم المرة هادي!؟.
تنهدت وقالت..
/قراية فاتحه..هديكا مطيره وبنت عبدالمطلب..
🍃هو ليه فترة لاباس بيها حاس انها معاش في قلبه ليها مشاعر الحب..لكن وقع اللي سمعه توا ع قلبه بينله انه كان يتوهم..هلبه مش شويه🍃
قعد لحظات يشوف للشاشه بدون مايعلق بحرف..
بعدين ناض ومشي طلع من الصاله بصمت..
مغليه بقهرة..
/حسبي الله ونعم الوكيل هما يفرحوا ويتهنوا وولادي يكملوا عمارهم متحسرين عليهم...
#كانون_الأول
#طوبى
...يتبع....
