#طوبى "جنة طوبى"
#جمان_فريد
#الجزء_التسعون"وقد احسن بي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
............
قال شَيخ الإسلام #ابن_تَيمِيَة -رحِمَه اللّٰه- : 🎙️
إِذَا نَاجَى العَبدُ ربَّهُ في السَّحَرِ و استَغَاثَ بِهِ و قَالَ :
"يَا حَيُّ يَا قَيُّومُ لَا إِلهَ إلَّا أنتَ بِرَحمَتِكَ أَستَغِيث " أَعطَاهُ اللهُ مِنَ التَّمكِينِ مَا لَا يَعلَمهُ إلَّا اللهُ.
📜 مجموع الفتاوى (242/28) 🍂 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 كوني قوية فالحياة لا تحترم إلا الفتاة القوية التي لا تكسرها التجارب الفاشلة وإنما تبنيها 🍃
__________________________________________
واقفه جنب المدخل تستنى وهي تهز في رجلها..
لعند ماخشت عليها اختها وهي شاده اللابتوب وقالت..
/اهو خودي..
خداته طوبى ومشت خشت للصاله وغرفه معاها..
قعمزت وفتحاته واختها قعمزت جنبها..
قعدت دور في ملفات الفيديوهات..خشت عليهم..
غرفه؛فيديوات شنو هادم!؟
طوبى:متاع العرس وشهر العسل في الرواني..
ضحكت غرفه غصب عنها..
وطوبى مازال دور..لين حطت ع فيديو انصدموا هي وغرفه لما شافوا بدايته..
طوبى:شن هدا!!؟
غرفه بصدمه؛من اللي مصورك هكي!؟
ع خشة فردوس والباقي بسفرة القهوة..
سمعوا صوت اغنيه يعرفوها كويس..
اريج:ع شنو تتفرجوا!!؟
وجتهم قعمزت جنبهم وين تشوف اللي شافوه تصيبها صدمتهم..
غرفه:ركزي ع الجهه اللي صوروك منها طاولة هدوكا الشكالات..
اريج؛مني يعني!!؟
غرفه؛الكلبه خديجه زعمه!؟
اريج؛ديرها الحقيره تبي تنوض عليه هباله..
مطيره:ع شن تدووا..
اريج:مصورين طوبى وهي ترقص في حفلة صفاء وباعتينها للي مايتسمى..
فردوس:نهار احرش!..
طوبى وهي عاقده حواجبها قالت..
/نسرين..
كلهم وجهوا نظرهم ليها وقعدوا يفكروا..
طوبى:خديجه ماتبنيش نولي ولابأي شكل..واكيد مش حتصورني الوضيعه هديكا وتبعتهاله..
مطيره؛وعلاش دير هكي اذهب شواريها!
طوبى تنهدت بعصبيه وقالت..
/مش فاهمه!.
غرفه؛عموما عبد الرؤوف خدي من مكتبه كل شي حتى سيارته فتشها وخدي تليفونه....
طوبى:صح هو حقير لكن ماتوصلش بيه لهني..اني توا بس نبي نفهم نسرين علاش دير هكي علاش!
غرفه:بليده هي هادي تتصرف في تصرفات متخلفه ديما..
مطيره بكره؛يعطيهم رهمه كلهم عيلة معفنه..
🍃🍃🍃🍃🍃
"الجالي كويس لين تستفزيه وهي وحده قليلة ربايه ومش محترمه حد"
مغليه بغيظ؛يعطيها سحيقه هاللفعه..
نجاه ودموعها في عيونها..
/نقطع ذراعي من منبتها كان مش مخططه لهدا كله من الاول وهو زي الدرويش صدقها..لكن احسن عرفها ع حقيقتها وحده زي هادي ماتستاهلش يديرها عنده خدامه مش يديرها مرته مرة وحده..
مغليه؛خوته وبوه بيخلوه يطلقها يبي ولامايبيش..
نجاه بنبرة مخنوقه..
/ياريت نقدر نشوفه..
مغليه؛معليشي بنتي خليه يهدى ويروق شويه وبعدين ساهل..
تنهدت نجاه وقالت..
/حسبي الله ونعم الوكيل..
🍃🍃🍃🍃🍃
وفي فيلا مختار..
خشت سيارة جايبه امينه وصابرين..
صابرين اللي كانت طول الطريق تقوي في نفسها وتهيأ فيها للمواجهه اللي مش حتكون سهله عليها..
نزلوا من السيارة واستقبلتهم فاتن..بعد السلام دخلتهم..
صابرين تعرف الفيلا هادي جايتها قبل لما دارت عزومه لصاحباتها وهو كان معاها...
امينه؛انا حروح المطبخ ع طول الاكل اللي جايباه عايز سوى..
فاتن:تفضلي..
مشت امينه للكوجينه..
وهما كملوا طريقهم وصلوا لباب الصالون..
وقفت صابرين..خدت نفس وزفرت..
فاتن؛خليك عادي..تعاملي معاه وكأنه شخص عادي مايعنيلك شي لاتحبيه ولاتكرهييه ولاواخده منه موقف فاهمه عليا!؟
شافتلها صابرين وهزت راسها بالموافقه..
فاتن؛هيا..
صابرين؛هيا..
🍃وخشوا مع بعض للصالون وصابرين قالت..
/مساء الخير..
توجهت انظارهم ليها وهما يردوا في التحيه..
وهو من قبل مايجوا عيونه عليها من لما سمع صوتها انهار من داخل عكس مابان منه من برا الثبات والبرود..
بس خال خطيبته لما شافها وكأنه شاف الشمس لأول مرة في حياته..
الاعجاب بان ع وجهه..ومختار مركز عليه..
مشت صابرين قعمزت بعيده شويه لكن مقابله رضا..
صابرين بإبتسامه؛حمد لله ع سلامتكم
ردوا عليها..
"الله يسلمك"
ياسمين بإبتسامه:ماتعرفناش..
ايهم وهو يشوف لصابرين
/صديقه لمختار وزي اخته الصغيره..هو هكي عرفني بيها..
رضا وجه نظراته الحاده لأيهم..
صابرين بضحكه..
/زي ماقال..
رضا رفع حاجبه وقال:زعلان منك عندك علم!؟
كلهم قعدوا يشوفله..
صابرين:علاش!؟
رضا؛حضرتي الحفله وماجيتيش باركتي.
ايهم:صح اختفيتي دورت عليك هلبه..
ام ياسمين؛ايهم!..
ضحكوا..
ايهم تعجبا:خيرني شن قلت !؟
راجل اخته:خلينا عاقلين..
ايهم؛انتم قاعدين تشوهوا في صورتي قدامها واخدين بالكم!؟..قالها بالمصري.
مختار:انت جان ياعزيزي وهادي الحقيقه مافيش حلوة سلمت منك..
رضا وهو حاط رجل ع رجل قعد يهز وحده فيهم من العصبيه..
ايهم بضحكه:ماتبالغش Bro...
ياسمين؛خلونا في سؤال رضا..
مختار:اها طبعا رضا واسئلته وكل شي يخصه الاهم عند ياسمينه توا..
ياسمين بخجل؛عمو..وفنصت وهي تأشر بعيونها ع بوها وامها..
ومختار يضحك..وامها وبوها مبتسمين..
ايهم؛خلاص خلوا صابرين تجاوب كلامها قعد ع باب فمها..
رضا حط يده ع فمه وشد ذقنه وهو يغلي غضبا من الغيره..
وفاتن تراقب بصمت..
صابرين بإبتسامه؛اني اساسا جيت من هني وكيف باديه فيا البرده وفي نص حفله تعبت وروحت بيا فاتن..
فاتن؛كانت حرارتها مرتفعه..
رضا حول يده من ع فمه وحطها ع خده وقال برفعة حواجب..
/اها..لاباس..
صابرين؛لايوريك باس..ع العموم مبروك عليكم وربي يهنيكم ببعض..وبجديات طالعين ع بعض هلبه وحلوين هلبه..
ياسمين بإبتسامه..
/كلك ذوق..
ايهم بإبتسامه واسعه..
/عقبالك..
نزل رضا رجله..وحط يده ع اليسار ع يد الكنبه وقعد يضرب بأصابعه عليها وعيونه ع صابرين..
صابرين مجامله:شكرا..
مختار؛ع فكره صابرين متخصصه مختبرات وتوا تحضر في الماجستير..
كلهم بدت ع وجوهم ملامح الاعجاب..
وايهم قال:حلو..
وعيون رضا قريب تحرقه بنظراتها..
مختار:ومش هكي بس..عندي معمل تحاليل كبير هي اللي ماسكاته وادارتها ناجحه جدا..
ابتسم ايهم..
واب ياسمين قال..
/تبان صغيره في السن..
مختار:بدايه الثلاثينات..
قاله:ماشاء الله...
ابتسمت صابرين مجامله..
وايهم مانزلش عيونه من عليها وهو مبتسم..
ام ياسمين؛نحب البنات الطموحات استمري..
صابرين؛شكرا..
ايهم؛واني دبلوماسي ع فكرة وفي نص التلاتينات وطموح..
فاتن بضحكه؛واعزب لم يسبق له الزواج..اللي بعده..
قعدوا يضحكوا..
مختار:شدي خوك ياامل..
ايهم بتعجب مصطنع..
/واني شن قلت ياربي! قاعد نعرف بنفسي كويس ونبيها تزيد تعرفنا بيها بش تكسر حاجز الحشم شويه.
"مش عزباء"
بدت ع وجه ايهم ملامح الصدمه..
اخته وراجلها شافوا لصابرين بإستغراب..
وياسمين شافت لخطيبها بنفس النظره..
بينما مختار قعد مركز بنظره ع ايهم وقاعده ابتسامته ع وجهه..
اما صابرين قعدت تشوف لرضا بصدمه وعيونها تعبوا دموع..
فاتن؛قصده صابرين سبقلها الزواج قبل..تجربه مرت بيها وفشلت..
مختار شاف لفاتن بإبتسامه ود..
صابرين حمحت وقالت..
/ايه اني مطلقه والسبب اني عاقر..
انصدمت فاتن..
وكلهم بدت ع وجوهم ملامح التأثر..
ماعدا مختار ورضا..
مختار يشوفله بطرف عينه بحده..
ورضا يشوف لصابرين بنظرات تهجم فيهم حزن..
صراحة صابرين خلت الضيوف يرتبكوا وهي لاحظت وقالت بضحكه..
/مافيش باس..حياة الحريه احلى..
ايهم ابتسم وقال:صح ان يكون الواحد مسؤول عن نفسه بس..او نفسه ونفيسه تانيه معاه ساد..
ياسمين حطت يدها ع فمها وهي تشد في ضحكتها..
امل؛باهي يانفيسه سمعنا سكوتك حشمتني راهو..
ضحكوا..
وصابرين قالت..
/بالعكس عفويته حلوة..
هو ابتسملها من قلبه..
رد رضا يده لفمه وعض ع سبابته بطريقه غير ملحوظه..
ايهم؛شكرا واخيرا لقيت من يقدر..
اب ياسمين:شن رايك لو ترفعني لمكان نحكوا فيه براحتنا بعيد عن الصداع..
ناض مختار وقال بضحكه..
/تفضل..
ناض اب ياسمين ومشي طلع مع مختار وخلاهم وراه يضحكوا ع تعليقات ايهم عليه..
ام ياسمين؛خلاص الزم حدك عاد..
ياسمين؛وصلت في الخط الاحمر..
هو دار بيده حركة ع فمه وكأنه يسكر فيه بسوسته..
ام ياسمين؛فاتن خاطري نشوف الفيلا كلها بالك ناخدوا وحده هني نقعدوا فيها لما نروحوا..
ناضت فاتن وقالت؛تمام تعالي..
وكذلك ناضت ام ياسمين وطلعت مع فاتن..
وقعدت صابرين مقعمزة في جهة بروحها..وايهم في جهة بروحه..
ورضا وخطيبته جنب بعض..
صابرين كانت متوتره ومعصبه بس تحاول تبين العكس..
شافت لياسمين لما قالت لرضا..
/خاطري نطلع للحديقه تبان حلوة..
هو كان يشوف لأيهم كيف عيونه ع صابرين..
وصابرين قالت؛ايه صح هلبه..طلعها رضا خليها تشوفها..
هو شافلها بإمتعاض..بعدين شد يد خطيبته ونوضها وقال..
/اطلعوا معانا..
ايهم؛خاطرك تطلعي..
ياسمين بإبتسامه..
/باهي..
وناضت..
طلع رضا مع خطيبته في البدايه..
وايهم جي لصابرين وقال..
/ladys frist
هي وجعها قلبها لما سمعت الجمله ابتسمت مجامله وطلعت وهو معاها...
🍃🍃🍃🍃🍃
"اخر همي شن مايدير ولاشن يصيرله عمك هدا معاش يهمني في شي"
محمد وهو مقعمز مع عمه نضال في القهوة بعد ماروح من المدرسه قاله..
/باهي وين تغيب الايام هادي!..
نضال:في مكان مانعرف فيه حد..
محمد المهدي بضيق..
/نتكدر لما نشوفك هكي..
نضال قعد ساكت وع وجهه باديه ملامح الضيق..
محمد؛الدنيا نصيب عمي لو نصيبك مش في الحاجه اللي انت تبيها مهما دير مش حتنولها..
تنهد نضال من وسط قلبه وقال..
/عارف والله عارف..لكن مش قادر..مش حنتحمل اني غيرانخطبت بس قريب هبلت..
محمد:شن قصدك!؟
نضال سكت وهو يشوف في الفراغ بحزن..
محمد بريبه:نحس فيك بديرها حق المرة هادي..
هز نضال راسه بإيجاب..
غمض محمد عيونه وفتحهم بأسف وحزن..
☘نضال بالنسبه ليه خوه وصاحبه مش بس عمه واغلب وقتهم مع بعض مش عارف كيف بيتحمل غيابه..كيف بيتحمل غياب اقرب الناس ليه واحد ورا التاني وسط هالاجواء اللي كلها كآبه...
🍃🍃🍃🍃🍃
وعدت عزومة الغدي ع رضا بحرق الدم والاعصاب وهو يشوف في التقارب اللي صار بين صابرين وايهم..واكثر شي كان قاهره هو برود مختار...واضح اعجاب ايهم بصابرين ومغازلته ليها صريحه..كيف سكت ومادارش موقف خصوصا ان علاقته بعيلة خطيبته مش مبنيه ع مصالح..علاقه صداقه وود...
خاف من نفسه يتهور ومالقاش قدامه غير حل واحد..
☘خلف باب الكوجينه المسكر..
رضا:ارجوك خليهم يروحوا..
فاتن؛علاش!؟
رضا؛قاعد نترجا فيك!
امينه؛رضا جرى ايه!! هو احنا حنتبدي من اول وجديد!..
رضا بإنفعال..
/انتي الوحيده اللي تعرفي كل شي ماتحرقيش دمي ماهو محروق..
فاتن؛رضا انت اخترت خلاص وقاعد تعيش في حياتك وهي من حقها تعيش حياتها..
رضا بعصبيه:من قالك عايش! اني قاعد ندير في اللي هي تبيه..تقول اني مانصلحش بيك وبرا شوف غيري ومش عارف شنو وتوا نشبح فيها تضحك وتهدرز مع التافه اللي برا!!.
امينه؛وطي صوتك!
فاتن؛ممكن شافت ان هكي احسن ليك وليها وبعدين تعاملها مع ايهم عادي..
رضا:وهو عادي!!
فاتن؛المهم هو مش هي..
رضا هز راسه وقال..
/تمام..حاضر..اني توا بناخد بكلامك وبنسكت لكن في حاله صار اللي في بالي بنحط عقلي ع تركينه ونقلبها..
ومشي فتح الباب وطلع..
امينه:هو ايه اصلو ده..
وفاتن تفكر في كلام رضا بقلق...
🍃وبعيد عن هالعواصف
كان معتز هايم في عالم داره اللي دارهاله خاله..
فيها كل شي يحلم بيه وماحلمش بيه اللي يخشها مايبيش يطلع منها..ومعتز عينه واسعه وتنبهر بالمظاهر البراقه..اللي شافه خداله عقله...
🍃🍃🍃🍃
وجي وقت مرواح الضيوف..
سقدوهم مختار وفاتن وصابرين اللي قعد ايهم واقف معاها لأخر لحظه..
🍃ايهم:نتمنى نرجع نشوفك مرة تانيه او نتواصل معاك..رقمي ايميلاتي عالمي كله عطيتهولك..حط كفوفه ع بعض بطريقه عموديه وقال..ارجوك كلميني..
ضحكت وقالت؛ان شاء الله..
اشر عليها وقال:لو طنشتي كوني واثقه ومتأكده انك حتلقيني في وجهك...
"أيهم"
اشر بيده للخلف يقول لاخته تستنى وهو يشوف لصابرين..
/مشكورة ع الساعات الحلوة اللي عطيتهالي من وقتك..
ابتسمت وهزت راسها وهي تقول..
/العفو..
جاه مختار خداه من ذراعه..
وهما يضحكوا..ماعدا رضا..كان زي البركان اللي ع وشك الإنفجار...
قبل ليطلع ودع صابرين بنظرات حاده هي بادلتهم بإبتسامه بارده مصطنعه...
وطلعوا روحوا..
ولى خش مختار وهو يقول:نوصلك فتون؟
فاتن:ايه خلاص هداكا هو..
صابرين؛حتى حني مروحين..
خش داخل وهو يقول..
/تصبحوا ع خير..
قدمت فاتن لصابرين وقالت..
/نحذرك من ايهم هو صح لطيف..لكن عنده لبز هلبه ردي بالك تعطيه وجه..
صابرين؛اني سايرته مسايره بس..
امينه؛قولي اديت بيه الغرض..
فاتن ضحكت..
وصابرين رفعت حاجبها بمكر..
🍃وبعد لحظات يوصل السواق ويروحوا معاه..
وبعدهم يطلعوا فاتن ومختار ومعاهم معتز...
🍃🍃🍃🍃🍃
"الله يبارك ع بنيتي تزحف الله يبارك"
فردوس؛وتصفق وتقربج وهدرازة..
فايزة؛بيبو حتى هي كانت هدرازه زمان تتفكروا كيف كانت تدوي..
مطيره؛صوتها كان زي الزوايه..
شافولها..لقوها سرحانه في عالم تاني وع وجهها باديه ملامح حزن خفيفه..
فايزة قعدت مركزه بنظرها ع وجهها علامات الصفعات واضحه..قلبها وجعها عليها ع الآخر..
مطيره؛طوبى..طويبه..
استاقظت وشافتلها..
مطيره بإبتسامه..
/تنوضي ديري قهيوه..
طوبى هزت راسها وقالت..
/حاضر..ومشت للكوجينه..
مطيره؛مانبيهاش تقعد تفكر في اللي صار معاها..
فايزة؛صح ومفروض ماتقعدش بروحها خل نمشي نهدرز عليها..
وناضت وطلعت من حداهم..
فردوس قربت اللعبه لجنه اللي كانت تتلاحق فيها..وفي لحظه انهارت بالبكي صمتا..
مطيره والعبره خانقتها..
/الله غالب..
🍃وفي الكوجينه..
فايزة مابتش تسأل طوبى عن أي شي صار معاها..
فتحتلها مواضيع في الشغل وطوبى تفاعلت معاها شغفا بهالهوايه اللي سكنت قلبها من الصغر...
🌾كانت فايزة تبي طلع طوبى من سجن الذكريات السيئه والافكار السودا اللي يكون اشد من السجن المادي..سجن يحبس العقل..وكان انسجن عقل الانسان في الظلام..معاش طيبله حياة🌾
🍃لكن وان انشغلت في النهار..وين يجي الليل..وقت السكون والنوم..حتى لو رقدت عقلها الباطن مش حيخليها ترتاح..
فهالليله بالذات خلاها تحلم بالجريمه البشعه اللي ارتكبها في حقها سجانها..
استاقظوا اريج والاء بعد ماسمعوها تتوسل في نومها..
"لالا بالله عليك لا..لا.."
ناضتلها اريج قربت منها لقتها تتصبب عرق..
قعدت تفيق فيها..
/طوبى..طوبى..
فاقت..وهي تفتح عيونها شافت ملامح الجالي المخيفه وتخش في حالة ذعر وتقعد تعيط وتقول..
"لالا..حرام عليك..حرام عليك..لاا"
فاقت جنه مفجوعه وقعدت تعيط..
واريج والاء وهما مصدومات قعدوا يحاولوا يهدوها وهي قاعده عايشه في هديكا الذكرى البشعه بكل تفاصيلها..
وين يشدوها البنات تعيط وتضرب فيهم..
ع خشة فردوس ومطيره وهما مفجوعات..
مطيره:خيرها!!
فردوس:طلعوا جنه طلعوا..
الاء خدت جنه من سريرها وطلعت بيها..
وطوبى قاعده تعيط..
مطيره جتها شدتها وهي تقول..
/طوبى اهدي..
هي سمعتها بصوته المخيف..حطت ايديها ع وذانها وقعدت تعيط بأعلى حسها..
اريج وهي ترعش:ياربي !
فردوس؛جيبي ميه جيبي..
طلعت اريج تجري من الدار..
ومطيره وفردوس يشوفوا لحالة طوبى وكل وحده فيهم تفكر في شي واحد بس..
ع خشة اريج بالميه قالت..
/الميه..
خدتها فردوس وقعدت تبخ فيها عليها..مرة واتنين وتلاته..
والاخيره كانت الميه زياده فيقتها..
فتحت عيونها المذعورات وقعدت تشوفلهم وهي تتنفس بسرعه..
لما ركزت في اشكالهم..وملامح الدار وراهم..
حطت ايديها ع صدرها وغمضت عيونها وهي تبلع في ريقها..
جتها فردوس قعمزت جنبها وخدتها في حضنها..حضنتها بقوة وهي تبكي وتقول..
/شن دار فيك الكلب..شن دار فيك..
طلعت اريج برا الدار وهي تبكي..
ومطيره قعمزت مقابلتها ع السرير حطت يدها ع رجل طوبى وقعدت تمسح عليها..
وطوبى تمسكت بحضن اختها وغمضت عيونها...
🍃مر الوقت..
وجنه ولت رقدت دخلتها الاء للدار..
شافت امها واختها وعمتها مقعمزات وهم الدنيا كلهم باين في وجوههم..
الاء بألم:زعما اللي في بالي حق!
اريج ودموعها ينزلوا..
/واضحه..
مطيره بقهر؛ااه ياربي والله بنموت..نبي نهد عليهم نبي نضرب خديجه لين نطلع روحها..جنت ع بنات خوي دمرتهم الله يدمرها..حطت يدها ع صدرها ورفعت عيونها للأعلى وبدت تدعي..
/ياالله ياربي ياالله ياربي اللي داراته فيهم تلقاه في اعز ماعندها ياربي ياعالم بالحال..
كلهم أمنوا ورا دعائها..
ع خشة طوبى اللي كانت جايه من الحمام...خدت ملاية الصلاه من ع الشماعه ومشت طلعت للصاله..
وخلتهم يتألموا بشده ع حالها...
🍃اما هي كانت زي الهاربه..
طرحت الصلايه ولبست الملايه ووقفت وكبرت وبدت تصلي..
هربتله من كل شي..حتى منهم هما ومن نظرات حزنهم ووجعهم ع حالها...
سجدت وسبحت..ودعت بنبره مخنوقه..
"اللهم قوة..اللهم صبر.."
وقعدت تكرر في نفس الدعاء في كل سجده..
ومجرد ماكملت صلاه رقدت ع الصلايه..وراحت في نوم عميق...
مابوش يفيقوها منه...غطوها وحطوا دفايه قريبه عليها..
وقعدوا فردوس ومطيره بايتات حداها..والاء اريج بايتات حدا جنه...
🍀🍀🍀🍀🍀🍀
وماكانتش هادي الليله الاخيره اللي تعاني فيها طوبى من هالحاله..تكررت كذا ليله بس كل ليله اخف من اللي قبلها..
وفي كل مرة كانت تزيد تتوجع لما تشوف في حزن احبابها عليها..تشوف فيهم كيف شايلين همها وهي تكره هالشي كره شديد..
قعدت تقوي في روحها بالذكر والقرآن والدعاء...
وبجنة اللي شوفة وجهها تريح في روحها..
🍃🍃🍃🍃
25يناير...سنة 2019..
يوم الجمعه...
الساعه 5:00عصرا..
كانت واقفه ع روشن الدار تتفرج ع المطر وهي تصلي ع النبي...مابطلتش في هاليوم صلاة عليه بالمسبحه..لقت روحها فايته 2500 صلاة من مغرب امس للهالحظه..
دق باب الدار..وقفت وشافت المسبحه لقت روحها متعديه 3000 صلاه..
انفتح الباب وخشت غرفه..
/بيبو..محمد شنيبه في المربوعه يستنى فيك..
عقدت حواجبها عقدة خفيفه..بعدين هزت راسها بإيجاب..
طلعت غرفه وخلتها..
وهي مشت للشماعه خدت العبايه والشاربه بش تلبسهم...
🍃وفي المربوعه..
كان محمد شنيبه يراجي فيها ومعاه عبد الرؤوف وخالها المحجوب الصمت سائد المكان..
دق الباب..وخشت طوبى وهي تقول ..
/السلام عليكم.
شافلها محمد شنيبه بضيق وقال.
/وعليكم السلام..
قعمزت في تركينه بروحها وهي مقابلاته..
قاللها:سامحيني يابنتي..
تنهدت طوبى ونزلت نظرها الارض ..وعبد الرؤوف والمحجوب يشوفولها..
محمدشنيبه؛الغلط غلطي اني..لو من البدايه وقفت فيها وماخليتش هالزواج يصير ماوصلناش لهني
طوبى:ماينفع بشي الكلام هدا توا
هز راسه وقال؛عندك حق، طلع من جيب بالطوه مجموعه وراق مطويات بالطول..
وخدي شي ملفوف بكيسة سودا جنبه وناض..
حط الكيسه ع الطاوله..وقدملها بالوراق وقال..
/هادي ورقة طلاقك وتنازل من الجالي عن الفيلا...
طوبى وهي تسمع فيه كانت مش مصدقه وذانها!!
طلاق..من الجالي!! طلعت من ذمته!! يعني خلاص..تحررت منه!!؟
ومحمد شنيبه مكمل يقول...
/اللي ع الطاوله مؤخرك...وبهكي يابنتي حقك وصلك كامل..وبالنسبه لبنتنا مش حنقصروا في حقها سوا حني ولابوها..
رفعت طوبى عيونها لعبد الرؤوف..
ابتسملها ابتسامه خفيفه وهز راسه تأكيدا للي سمعاته..
غيرت نظراتها المندهشه لخالها..
حتى هو ابتسم وغمض عيونه وفتحهم يأكدلها ان اللي تسمع فيه حقيقي لافيه لعب ولازيف..
عبد الرؤوف؛معاش يقدر يشوف البنت الا لو سمحتي..
محمد شنيبه بضيق..
/لاهو خلاص مش حيقعد في البلاد..هالمرة جد مش ضحكه وتقدروا تتأكدوا برواحكم الاسبوع الجاي مسافر هو وعمر..
رفعت عيونها في محمد شنيبه وابتسمت ابتسامه ظفر مش بس نصر..ظفر وفرحه واضحه مش قادره درقهم..ولأخر لحظه تبي تكون ديما هي الطرف المنتصر مش بس في حرب الحصول ع حريتها..حتى في حرب الاخلاق..
ناضت من مكانها وقالت..
/لحظة شويه..ومشت بسرعه طلعت من المربوعه..
توجهت للدار خشتلها..فتحت دولابها وطلعت منه حاجه ..
بعدين طلعت من الدار موليه للمربوعه وفي مشيها وجيها فاتت من قدام الصاله اللي لامه نساوين العيله شافوها ويراجوا في جيتها ليهم ع نار...
🍃خشت للمربوعه مالقتاش..
استغربت وقالت؛وينه؟
عبد الرؤوف:طلع يستنى برا..
مشت طول طلعت..
🍃لقاته واقف قريب ع الباب يراجي فيها..
مشتله وقفت قدامه ومدتله فلاش وهي تقول..
/فيه شغله اللي كان ع اللابتوب..
محمد شنيبه خداه وقال..
/قصدك الكامبيوتر متاعه عندك!؟
طوبى:ايه...خديت منه معلومات شغله نقلتهم هني واللابتوب تكسر وتلوح..
ابتسم محمد شنيبه بأسف وخدي منها الفلاش..
كان باين جدا اسفه ع ضياع مراة زي طوبى من ولده..
هي ابتسمت وقالت..
/وبالنسبه للموضوع هداكا مازال مكملين فيه..
شافلها بنظرات مفاجاة..بعدين ضحك..
طوبى:اني عطيتك كلمه..
هز راسه وهو يضحك ويقول..
/ان شاء الله خير..
طوبى:ان شاء الله..
ابتسم وقال..
/سامحينا مرة تانيه يابنتي..
هزت راسها بدون ماترد عليه..
وهو هني فهم انها مش مسامحه..
قال:السلام عليكم..ومشي فتح الباب..وطلع..
وهي سكرت وراه الباب..
غمضت عيونها وخدت نفس عميق..بعدين ضحكت..
وبدت تقول في نفسها..
"هالنصر نصرك..جاني من عندك لولا عونك ماقدرت ندير شي..لك الحمد ياربي"..
فتحت عيونها وقامت ورقه الطلاق وهي تقرا فيها..
كملت قرايتها وهي تضحك..بعدين التفتت شافت لمكان كرسي بوها..وتفكرت وصيته..
نزلوا دموعها وهي مبتسمه بفرح..بعدين مشت خشت تجري للمربوعه..
كملت طريقها وهي تجري وخالها وراجل اختها معاها بعيونهم وهما مبتسمين..
🌼خشت الصاله اللي كانوا فيها مع عمتها وخواتها وبنات اختها..
نبيله ..واميمه..وهاديه..وفايزة وبناتها..
طوبى رفعت الورقه وقالت بفرحه كبيره..
/تحررت..ياهوو..تحررت..
كلهم بدون استثناء فرحوا من قلوبهم..
اريج قعدت تصفق تصفيق وهي تضحك..وناضولها يهنوا فيها وهما يحضنوا فيها والسعاده غامرتها..
بعد ماهنوها سألتها عمتها..
مطيره؛حقوقك وصلوك..
طوبى بنصر؛كل شي حتى الفيلا تنازل عليها وجنه معاش يقدر يشوفها الا اذا اني سمحتله..
نبيله بضحكه:من الخوف المحضر اللي درتيه خوفه هلبه..
غرفه بضحكه؛رؤوف هدده يشهدر بيه ويدمر مستقبله..
مطيره؛هالكلب..
فردوس شدت طوبى وهي مبتسمه بفخر قالت..
/صحه ليك جبتي حريتك وحقك بيدك وحافظتي ع وصية بوي الله يرحمه..
طوبى بإمتنان؛الحمد لله الحمد لله..الحمد لله..وعيطت وحضنت فردوس بقوة..
وهاديه من الحماس قعدت تقول..
/زغرطن زغرطن..
ومطيره تطلقها وهي تعاونها بعدين بدت تغني..
/وحررناها ليبيا حررناها..خدينا بتار بلادنا ومانسيناها..
هما ضحكوا عليها بعدين كملوا معاها..
خدينا بتار بلادنا كنا في ميعادنا ومانسيناها..
الله الله ياليبيا..الله الله ياليبيا..ياليبيا ياليبيا.
وقعدوا يضحكوا ع ارواحهم..
🍃في المربوعه..
خش الحاج علي ع عبد الرؤوف والمحجوب لقاهم يضحكوا
الحاج علي:اصبح الصبح فلا السجن ولاالسجان باقي..
وخلا المحجوب وعبد الرؤوف يضحكوا بدموعهم...
🍃🍃🍃🍃🍃
دار اخر طلة ليه ع المرايه..بعدين مشي بيطلع ..
وصل في الباب فتحه تفاجئ لما شاف صاحبه قدامه..
عبد القيوم بإستغراب..
/كنك جاي! مش قتلك امس بنجيكم!
ربيع خش وسكر الباب وهو مبتسم..
/يقولك لما حد يبشروه بخبر..يزفوه ليه زفة..واني جيتك بروحي نزفلك بشارة ليك ايام تراجي فيها..وسع ابتسامته وقال..طلقها..
عبد القيوم قعد واقف يشوفله وهو مش مصدق..
هالشي كان متوقع بعد اللي صار بس هو قبل صدق وخاب امله..والخيبه مافي حد يتمناها ..
ربيع بإستغراب..
/سمعتني!!؟
عبد القيوم؛ يعني كلام اكيد خلاص..طلاق طلاق مش دوة بس..!
ربيع بضحكه؛كلام اكيد وطلاق رسمي والورقه سلمها المهدي لبوه قدام عيوني وحقوقها كلهم وصلوها..
عبد القيوم؛يعني خلاص معاد عنده شي في باله بيديره! معاد يقرب جيهتهم بكل!
ربيع؛بيني وبينك ورد بالك تطلع منك..بيسفروه برا بش يتعالج..
عبد القيوم؛ولو اني نشك ان واحد كيف هذى ليه علاج..ان شاء الله مايرد..ضحك ضحكه خفيفه بعدين قال..يعني خلاص نفرح عادي..مافيش صدمات!!
ربيع ضربه ع كتفه وقال..
/افرح افرح وابسط ياعم..فرجت...
عبد القيوم مسح ع شعره وهو يضحك بعدم استيعاب بعدين قال..
/اطلب اللي في خاطرك..اللي تبيها تجيك..
ربيع بإبتسامه..
/والله مانبي الا نشوفك واصل في اللي تتمناه بس ويرتاح بالك..
عبد القيوم بضحكه فرح...
/تعال هنا ياراجل..وخداه في حضنه..
وربيع ضمه وهو فرحانله لكن في نفس الوقت كان موجوع ع حال المهدي صاحبه ونسرين مرته اللي كانوا متأثرين بحزن شديد من اللي صار...
🍃🍃🍃🍃🍃🍃
بس الخبر نفسه ع قد مافرح نجاه ماقدرش يبدد وجع قلبها ع الجالي اللي بيسافر يتعالج ويخليها فتره طويله من غيره..
روحت لشقتها وهي تبكي..
خشت لدار النوم لقت جوري مقعمزه ع السرير تتكلم بالتليفون..
جوري:خلاص العطله بتم ومعاش نقدروا نطلعوا في الصقع..
وقفت قدامها البنت انفجعت..
خدت منها التليفون وحطاته ع وذنها وقالت ببكي..
/الجالي طلق طوبى..
"كيف!؟"
قعمزت بهده وقعدت تبكي..
"تو انتي تبكي من الفرحه !؟"
نجاه ببكي..
/الحقيره الشيطانه هديكا لعبتها صح..ولتله بش تفضحه وطلع سره للناس الكلبه..وصلاته لمرحله..يسفروه بش يتعالج برا..الله ياخدها الوس.خه
"مش في مثل يقول من شابه اباه ماظلم اني بنقول من شابه اخاه ماظلم"
نجاه ببكي:صح زيه شيطانه رجيم..شكله مايعرفش..
"مش عارفه..تو نشوفه كان يعرف ولالا"
نجاه مسحت دموعها وقالت..
/بنسكر تعبانه..
"نجاه راجي..بالله عليك خلي الصغار يجوا يباتوا عندي ليله"
نجاه:مستحيل مانقدرش..
"باهي نهار كامل بس..وقولي خليتهم عند مروة"
نجاه؛باهي تو نشوف..بنسكر..وفصلت الخط..
تمددت ع السرير وقعدت تبكي..
وبنتها بعد ماشافتلها بحزن مشت طلعت من حداها..
🍃🍃🍃🍃🍃
الساعه 8:00مساءا..
تجبد فيها ناحية باب الكوجينه الخارجي وهي تقول..
غرفه؛بالله عليك بلاتسهويك فكيني من لسانك القاطع..
طوبى بضحكه؛ماتخافيش اني توا محضر خير..
وطلعوا للجنان..لقوا عبد الرؤوف واقف يتفرج ع الفل..
طوبى بإبتسامه..
/عبد الرؤوف..
التفت شاف غرفه رفع حاجبه وهو يشوفلها من فوق لتحت وقال..
/نعم..
طوبى:احمم..شوف اني خاشه محضر خير باهي وبالله ماتحشمني..هي صح اختي هادي ختشه شويه بس انت عندها بالدنيا..قصدي يعني كيف تبيها يكون عندها انت وماتغارش عليك..
وشافت لغرفه ..
غرفه؛والله..من حقي نغير ونخاف من حقي ومايلومني ع شي..مفروض يعذرني..
عبد الرؤوف؛طبعا اني بس اللي لازم ع طول الخط نحطلك اعذار!..
طوبى:اسمعي يابنت..راجلك ولد اصل كانلنا ديما ولدنا مش نسيب واللي داره معاي اني بالذات اللي من دمي ماداراشي..راجلك هو اللي يستاهل ينقال عليه نعمه..حافظي عليه وخليه ديما راضي عنك...
عبد الرؤوف اشر ع طوبى وقال..
/اهو الكلام اللي ينقال..
غرفه:اني عارفه والله عارفه وهو بروحه مايقدرش ينكر قداش نقدره ونحترمه..
عبد الرؤوف:معاش تشككي فيا..حطيها في عقلك وراك تنسيها اني مش خوان ولاعمري نولي خوان..
طوبى:هو في النهايه كله من تحت راسي اني..فياريت تعذرها وانتي مرة تانيه اسأليه وافهمي منه قبل...
سكتوا الزوز وهما يشوفوا لبعض..
طوبى؛بروا خشوا للمربوعه الخارجيه تفاهموا غادي الجو مصقع هلبه..نستأذن..
عبد الرؤوف؛سامحينا..
طوبى بإمتنان:انت اللي سامحني عيشتك ايام صعبه معاي..
عبد الرؤوف؛توا كنتي تقولي ولدنا!
طوبى بإبتسامه؛ربي يحفظك ويخليك لهالختشه وصغاركم..
غرفه وهي تشوفله..
/آمين.
مشت طوبى وهي مبتسمه وخشت داخل..
وقعدت تتفكر في النظرات اللي كانت بين رؤوف وغرفه حتى وهما زعلانين من بعض باينه فيهم لمعه حلوة..
وياقداش تمنت تعيش هالمشاعر وتولي في عيونها هاللمعه الحلوة..
تنهدت وقالت..
"ياذا الجلال والاكرام..اكرمني"
🍃برا..
غرفه؛نحبك..
عبد الرؤوف؛غلا شوارب.
غرفه بزعل؛خزي عليك..كان تجبر خاطري مرة وحده بكلام حلو وانت ديما نازل فيا..
عبد الرؤوف؛ياما قلنا كلام حلو زمان شن حصلنا منه.
غرفه ودموعها في عيونها..
/ياريت لو نقدر نمسح هديكا السنه من عقلك..
ابتسم وقال؛مستحيل..اني وقتها حبيتك بقلب صافي..بس توا..
نزلوا دموعها وقالت..
/توا شنو..
قرب منها ومسح دموعه وقال..
/رغم الجرح اللي لتوا قاعد نحس فيه..نموت فيك..
غرفه؛واني اكثر منك..
قعد يشوف لعيونها ويقول..
/اكثر من مبروك ولاعبد الرؤوف..
غرفه بإبتسامه من بين دموعها..
/اكثر منهم الزوز..
ابتسم ع جنب وقرص خدها..
وهي تشوفله بنظرات كلها حب..
خداها من يدها وقال؛تعالي نهدرزوا في المربوعه صقع عليك هني..
شدت يده بقوة ومشوا الزوز للمربوعه..
🍃🍃🍃🍃🍃
"قداش نكرهها الخدمه اللي تاخد فيك مني"
اشرف بإبتسامه..
/مافي شي يقدر ياخدني منك كل يوم معاك مكالمات ورسايل وصور..
صفاء؛مش زي وجودك معاي..امان الدنيا كلها نحسه معاك..
اشرف:لسانك الحلو وكلامك العسل اللي مانقدرش عليه بيودرني..
ضحكت وقال:والله كله يطلع مني بروحه من كثر مانحبك..
اشرف:قالك تاخدها صغيره تتعب معاها..تي اني ماارتحت كان لما وليتي جنبي..
ابتسمت بخجل بعدين قالت..
/ايه حقه الجالي طلق طوبى..
اشرف؛باهي طيب فيها افتكت منه ومن هالعيله المتخولطه..
ضحكت صفاء..
اشرف:الله يسامحه محي دبسنا معاهم ومش اي تدبيسه..استغفر الله تو الواحد شن بيقول..
صفاء:ماغير تخسر حسناتك وخلاص..
اشرف:تخيلي!نشحت في الحسنات شحاته بش في الاخير نعطيهم لخديجه!!
وصفاء تسمع فيه وهي تضحك..
🍃وبرا جناحهم..
تحديدا دار المعيشه..
خديجه:افتكينا من نسبهم اللي يحشم..
نجمه:نسب مني اللي يحشم يابنتي عيلة الواعر!
خديجه:خلاص ياعمتي زي ماتبي مانبيش ندوي عليهم اكثر من هكي..
نجمه:احسن..
ع خشة عواطف وهي تقول بحمق..
/اليوم كله ع دماغي وست الحسن والجمال هديكا ماغير مضبطه راجلها وخلاص..
نجمه؛خوك غدوة بيولي لعمله..
خديجه؛وشن يعني!!؟
عواطف؛قوليلها اللي ديما دورلها في السبل..تو تشوفي الفرحه هادي شن دير..تتمسكن لين تتمكن..
خديجه؛صفاء مش هوينه حرنيفه..
نجمه بحده:ترا اسكتي انتي وياها..وانتي ياعواطف كان ماتبي ديري شي بري قعمزي في دارك..
عواطف؛هدا اللي قدرتي عليه..هدا اللي قالهولك عقلك! بدال ماتقولي عندك حق وماعليكش فيها!!
نجمه؛ياودي حاضر حاضر تو نكلمها..
عواطف..تاخدي فيا ع قد عقلي دايرتيني مهبوله!
نجمه برجاء:بالله بنتي ماتشيطيلي ريقي وتمرضيني راني مش ناقصه.
عواطف بإنفعال مبالغ فيه..
/ماهو اني الناقصه اني..مافي حد فيكم مقدرني ومقدر اللي نمر بيه..
نجمه؛لاحول ولاقوة الا بالله.
وعواطف مكلمه عياطها وهي تقول.
/همك كله بنتك هديكا اللي تقول ماحمل كان هي واني ع المصيبه طحت فيها مش مدورتيني..
نجمه بنرفزة؛والله اني نصحتك لين عييت اني اللي مابتيش تسمعي الكلام..
🍃وغير شن قلتي يانجمه بس!
صارت زوبعه رهيبه..قعدت عواطف تخبط ع وجهها وتنقز وتعيط وهي تقول..
"ياسر..اسكتي" لين جتها خديجه شدتها وطلعتها برا..
نجمه بألم:لاحول ولاقوة الا بالله..
🍃خديجه وصلت عواطف للدار وهي تقول..
/خلاص خلاص..ياسرك..
دفتها عواطف وقالت:اطلعي بري اقلبي وجهك..
طلعت خديجه وسكرت الباب وهي شاده ضحكتها بعدين قالت..
/بالشفي..
ومشت بطريقها بتروح لشقتها قالت بصوت عالي شويه..
/تصبحي ع خير عمتي..
"تلاقي الخير"
تنهدت بملل ومشت طلعت من الحوش...
🍃🍃🍃🍃🍃
"مامي ماميتي"
هادي طوبى متكيه ع سرير جنه وتحكيلها..
/ماما اليوم ولت حرة..افتكت وارتاحت..كنت حاسه مربوطه ياماما مكتفه تكتيف..وتوا كان نلقى نطير ياعيوني..تنهدت وقالت..اسفه ياماما والله ماتمنيت يصير هكي..شن بنقول..ع خاطرك ندعي ربي يشفي بوك ع خاطرك بس ان شاء الله يفكر يتعالج ع خاطرك انتي..نبيه يقعد في حياتك بصورة حلوة نبيك تشوفي منه حب وحنيه..مانبيكش تكوني ناقصة ياماما..
مد يدها ليها..شدت جنه صبعها..وخلتها تبتسم من قلبها..
🍃🍃🍃🍃
وتعدي باقي ساعات هاليوم اللي كله طاقه ايجابيه ع طوبى..
ورقدت وهي تسمع في صوت احمد العجمي يقرا في سورة الانبياء...نومه عميقه كلها راحه...
🍀🍀🍀🍀
بعد مرور تلاته ايام...
الثلاثاء..
29يناير...سنة 2019..
الساعه 10:15صباحا..
طلع الجالي بشنطة حوايجه لسيارة خوه عمر..
ركب من الخلف لأن المهدي كان راكب القدام..
تحرك عمر..وطول الطريق وهما في حالة صمت..
الجالي كان شاد بين ايديه الفلاشه ودموعه في عيونه..
بعدين اتكا ع الكرسي وقال في نفسه..
"ع خاطرك انتي بس درتها ورضيت نخش مستشفى ع خاطرك انتي"..
وغمض عيونه وهو يتفكر في طوبى كيف داوت يده من الجرح وكيف عاناته لمامرض..
وتفكرها لما قالت..
"مانقدرش نولي زيكم"
اكثر جمله قالتها طوبى للجالي من لما عرفها اثرث فيه بقوة..
🍃🍃🍃
وصلوا للمطار واستنوا وقت الرحله..
ولما جي وقتها ..
ودعوا عمر والجالي خوهم الكبير..وهما بعد مااطمن انهم ركبوا الطياره روح ع حاله...
🍃🍃🍃🍃🍃
الساعه 5:30 عصرا..
في شارع القهوة...
الجو كان صافي وبارد في نفس الوقت..
وولاد الشارع الصغار يلعبوا في الكوره..
وقدام مطعم ربيع..
كانوا واقفين ربيع وعبد القيوم ع سامي اللي فتره غايب عن الشارع..
سامي بضحكه؛باهي الحمد لله ارتاحت وريحت..
عبد القيوم:شن هالتعابير المعاقه!..
ربيع ضحك..
سامي بضحكه؛كلمه طلعت معاي وخلاص..وبعدين انت خيرك خفت هكي!؟؟
عبد القيوم رفع حواجبه..
وربيع شد ضحكته..
فجأه سمعوا واحد من الولاد صاح وقال.
/حي ع امها!..
شافولهم..بعدين شافوا مطيره طالعه بالكورة وهي تقول..
/نفلقها..ولانقطعها بسراق الحاج علي!
ضحكوا الشباب..
:خلاص خالتي والله اخر مرة..
مطيره؛والله مرة تانيه ماضاله الا فالقتها..
وحدفتهالهم..وخشت للمحل..
وهما ولوا بالكورة لمكان لعبهم..
🍃عبد القيوم شاف لسامي وقال..
/ايه وين كنت!؟
سامي:اني جيت مخصوص بش نحكيلك انت..ياسيدي كنت في هون نصور في معرض خيري لرسامين وخطاطين....
🍃🍃🍃
وفي المحل...
خشت طوبى من الباب الدخلاني وهادي كانت اول مرة تجيه بعد ماروحت...
طوبى:السلام عليكم..كيف حالكم يابنات..
ومشت سلمت عليهم وحده وحده..وهما بفضول كانوا يتفحصوا فيها وفي ملامحها..
هي مررت نظرها عليهم وقالت..
/مالا وين حنان؟
وحده فيهم قالت بضحكه..
/انخطبت..
وبدون سابق انذار طوبى حست بشعور مزعج هلبه وسألت طول..
/من خطبها!؟
وحده تانيه قالت:كان نقولولك ماتصدقيش..
حكت عظمة انفها وقالت .
/من الشارع!؟
:لامش من الشارع..ياحنه عريسها جابهولها التارقي خو صاحبه في العمل.
بدت ع وجهها ملامح ابتسامه وهي تقول..
/الله!
:ريتي النصيب بالله..عريس الله يبارك..عرسها في شهر 2اخر اسبوع..
طوبى بإبتسامه..
/ربي يكمللها ع خير..
🍃🍃🍃🍃
"معناها الفلوس اللي يطلعن من بيع اللوحات يتبرعوا بيهن.."
سامي؛ايه..وفي هلبه لوحات انباعت..صدقا الشي اللي شفته غادي يفرح..وشفت من وصلك معاي سلام.
ربيع؛ماتقولهاش!!
سامي بضحكه:سلافه كسابكجي..
ربيع؛مني!؟؟
سامي ؛كسا..بكجي..
عبد القيوم:باهي خلاص انت وياه فكونا من الدوة هذي..
ربيع:ماقلنا شي حجي..قاعدين نسألوا ع الاسم بس..
ساوا عبدالقيوم شاله وقال..
/عارف اخرتها معاكم شنو..
ضحكوا الزوز..
وفي هاللحظه تجي الكورة عند رجل عبد القيوم..
حدفها بحماس من غير مايركز..وتخش لمحل الحلويات..
الولد صاحب الكوره حاط ايديه ع راسه..
عبد القيوم بضحكه؛ماتخافش مايصيرلها شي.
ربيع؛واسطات التارقي راهو..
:هي حلفت..
ربيع:تصيم تلاته ايام..
ضحك سامي..
🌼وينفتح باب المحل زين وتطلع وهي شاده الكوره بيدها المغطيه بالقفاز..
هو تجمد في مكانه..وابتسامته اختفت..
وحس بقلبه طار وسط ضلوعه..
وصحابه حداه يشوفوله..
الولد صاحب الكوره اشر ع عبد القيوم وقال..
/هو حدفها وقسما بربي..
حركت عيونها لعبد القيوم..
رفع حواجبه ورمش عيونه بسرعه..
غيرت نظرها عنه وهي شاده ابتسامتها بعدين قالت للولد..
/ترا تعالى..
ولفت وخشت داخل..والولد مشي خش وراها..
عبد القيوم بإحراج وربكه قال..
/عليك مواقف زفته!..
سامي وربيع ضحكوا عليه..
شافلهم بإمتعاض..
🍃طلع الولد الصغير بكورته وبوكس دونات..
ومشي بيه لصحابه..
وقعد يفرق عليهم..
وعبد القيوم يتفرج عليهم بإبتسامه..
ربيع:مفروض بعتولك واحد انت اللي حادفها..
سامي:معاه في هادي.
عبد القيوم:-غموا فامكم خير ماانا اللي نغمها ..
قعدوا يضحكوا..
هو حرك راسه يمين ويسار بعدين شاف للكورة وابتسم لما تفكر كيف كانت شادتها بيدها المغطيه...
وبدي في نفسه يقول في ابيات شعر...
"عندي روح وين تسمع نبـــــــــاك.... أتقول الروح عاشت من جديد
و عندي قـــلب نبضاته أحــــــذاك .... و عندي عين أتناظر من بعيد
و عندي قلب وين يسمع أسماك.... يرجف كيف سعفـــات الجريد
و عندي قـلب بحبه شــــــــــراك .... يوم بيــوم في حبه إيـــــــزيد
و عندي شعر ما يكفي غــــــلاك .... أنحبك حب يا غــــــالي فريد"
🍃🍃🍃🍃🍃
طلع من مكتبه في الشقه متوجه للباب تصادف هو وصابرين.
صابرين؛اهلا..امتى روحت؟
مختار:الصبح..
صابرين:اممم..
مختار:تبي حاجه؟!
تنهدت وقالت..
/سمعت بأختك طوبى..!
عقد حواجبه وهو ساكت..
صابرين:اطلقت..
رفع حواجبه بصدمه..
صابرين؛شكلك مش سامع..ليها توا تلاته ايام...صحة ليها دبرت وخططت وعرفت كيف تخليه يطلقها وتاخد حقها تالت ومتلت..
هو قال..
/حولي..
تباعدت صابرين عن الباب..
وهو طلع وجبد الباب وراه بقوة قريب قلعه..
ابتسمت صابرين بشماته وخشت داخل..
🍃اما هو ركب سيارته..وفك الشال متاعه..وقعد يتنفس بسرعه من الغضب ..
"عندي علم بكل شي"
جمله سمعها منها قبل قالتهاله وبكل ثقه لما كشفت لعبتها عليه..
وتوا تكرر نفس الشي..دارت شي حتى في الخيال ماجاش ع باله..وعرفت مش بس تاخد حريتها وحقها..وحتى تحافظ ع وصية بوها...الحوش اللي مايبيش مختار حاجه في حياته زي مايبيه هو...
#وقد_أحسن_بي
#طوبى
ملاحظه..
《عدة المطلقه تلاته قروء مايحلش ليها فيهم الزواج بس والباقي تعيش حياتها طبيعيه عادي جدا》
....يتبع....
