#طوبى "جنة طوبى"
#جمان_فريد
#الجزء_الرابع_والثمانين "حرب باردة/حرب النجوم "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر🌼
قال رجلاً لرسول الله ﷺ، إنَّ شرائع الإسلام قد كثرت عليَّ، فأخبرني بشيءٍ أتشبَّث به؟
قال ﷺ: “لا يزال لسانُك رطبًا من ذكر الله”
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃وراء كل شخص عظيم إرادته🍃
_________________________________________
"اسمعوا خليكم عاديين باهي"
كلهم شافوا لفايزة..
فايزة:الجالي هني..ردوا بالكم تلتفتوا عيونه هني..
بعدين شافت لطوبى اللي ماكانتش عاطياته بالظهر شافاته..
ولما جو عيونها في عيونه هو ناض طول..
آلاء:جاي هني شكله!
مطيره اللي عاطية بالظهر قالت بغضب..
/هالجايف هدا..
طوبى ناضت..كلهم قعدوا يشوفلها..
خدت كروسة جنة وقدمتله بيها لما قرب يوصل فيهم وقالت.
/شوفها فيسع وبرا في حالك..
هو قعد يشوفلها بنظرات شوق ويقول..
/شن حالك؟
طوبى رفعت حاجبها ونزلت عيونها لبنتها وقعدت ساكته..
وهما وراها يشبحولهم..ومطيره كان تلقى تنوض تملحه بطريحه باهيه..
هو ابتسم ابتسامه جانبيه بعدين طبس ع بنته ضحك وقال..ياعمري كبرتي..
وطلعها من الكروسه وهو يقول..
/حبيبتي حبيبة قلبي..وضمها وهو يشم في ريحتها غمض عيونه وراح في عالم تاني..
وهي تشوفلهم وغصبا عنها تأثرت ودموعها عبوا عيونها..
فردوس اثر فيها الموقف حتى هي ووجعت قلبها جنة..
وياه ع شعور بناتها وبنات فايزة وقتها..
اريج دموعها نزلوا ماقدرتش تشدهم..
الوحيده اللي كانت تغلي من الغضب مطيره..
تباعد عنها وهو شادها وقعد يشوف لوجهها وهو يقول..
/ياقلب بابا ياعمره..محلاك يابابا محلاك عسل..
طوبى غيرت وجهها عنه وهي شاده دموعها بالسيف...
وحكيم من بعيد يشوفلهم وهو متأسف ع حالهم..
الجالي ودموعه في عيونه..
/بنرفعها لصاحبي يشوفها..
هي شافتله بخوف..
الجالي:قدام عيونك والمكان عام ماعندك من شن تخافي..
طوبى قعدت تشوف لبنتها شويه بعدين قالت..
/حطها في الكروسه وارفعها..
هو ابتسم ونزل بنته وردها للكروسه متاعها وقال..
/فيها شبه مني بس عيونها لونهم زي لون عيونك..حاير..
مابتش ترد عليه..
هو تنهد بعدين قال؛شويه..وقرب منها..هي تباعدت طول وعيونها ع الكروسه وقلبها مقبوض..
خدي الجالي الكروسه ومشي بيها لطاولته..
وطوبى ولت للطاوله وقعمزت وعيونها عليهم وتقول..
/شوفوا معاي ماتخلوشي يغيب عن عيونكم.
مطيره:علاش تخلي فيه ياخدها..
طوبى بخوف؛ياخدها شني! بتقعد معاه شويه وخلاص..
فايزة:مهما كان بوها وحقه يشوفها..
تنهدت طوبى بقلق..وهما حاسين بيها..
☘حكيم بإبتسامه:الله يبارك عليها ويحفظها..شافله وقال..كيف فرطت فيهم مش عارف..بنت ناس محترمه وعندك منها بنت زي الفرح والسعد نعمه غيرك مش لاقي ربعها..
الجالي بضيق؛خلاص ياحكيم بالله عليك مش ناقصك..
قرب كروسة بنته ليه..بان عليه وجهها ابتسم من قلبه وقعد يقول..ياقلبي عسل انتي عسل..
وحكيم يشوفله وهو مبتسم بأسف...
قام الجالي عيونه عن جنه وشاف لأمها لقاها تشوفلهم..
كان مشتاقلها شوق عارم وزاد شوقه ليها لما شافها توا..
اما هي فكانت مخوفتها نظراته قعدت ع اعصابها تراجي امتى يرد البنت..
تنهد..بعدين قال..خل نمشي نردها لأمها...
قربلها وباسها بوسه لطيفه ع خدها وقال في نفسه..
"قريب حنولوا مع بعض اني وانتي وماما"..
وخر وناض وقف وشد يد الكروسه ومشي بيها لطاوله طوبى..
هي طول ناضت وقدمتله..لين وصلت فيهم..
ابتسم ووخر وهي جت شدت الكروسه وكان هو وراها بالزبط..
عيونه توهج فيهم الشوق بشكل ملحوظ لدرجة ان فايزة لاحظت نظراته واضحه هلبه..
هي تباعدت عنه بالكروسه وولت لمكانها..
وهو وخر خطوة بعدين لف ومشي لطاولته...
وطوبى بعيونها عليه وكانت تشوفله بنظرات حاده لما قعمز وشافلها طول غيرت عيونها لبنتها...
مطيره:عطيه ماينكد ياالله..
طوبى:لانكد ولاهم يحزنون ولاكأنه موجود..ضحكت وقالت..
/صار سميره مغيره لوكها حتى هي.
ضحكوا ومطيره قالت..
/كله ع خاطر علي الخمسي..
قعدوا يضحكوا..
وطوبى كانت فاهمه قصدها وفي نفسها كانت متمنيه تصير حاجه زي هادي وذوق مغليه من الكاس اللي شربتها منه..
🍃عدلا وليس شرا🍃
🍃🍃🍃🍃🍃
وروح الجالي هديكا الليله للفيلا..ومازال ماعطاش نجاة علم بمرواحته..
ركب طول للدور التاني وتوجه لدار بنته...
قعمز ع الارض جنب سريرها الفاضي وهو يتأمل فيه..
نزلوا دموعه بألم...بنته اللي مفروض يكون هدا مكانها معاه يشوفها امتى مايبي ويلاعبها ويرقدها في حضنه..هي توا ابعد ماتكون عليه ومايقدرش يشوفها الا بالصدفه وبرضا أمها...
في هديكا اللحظه نقم ع أمها هلبه...وخطر عليه كل شي فيه اهانه دارتهوله...حس انه كارهها لأبعد حد..
وفي لحظه تبدل هالكره لشوق وحب لما تفكر عيونها ونظراتها الحاده وشكلها كيف كان بالحجاب الشرعي اجمل وابهى من زمان بهلبه.
《 كيف فرطت فيهم مش عارف..بنت ناس محترمه وعندك منها بنت زي الفرح والسعد نعمه غيرك مش لاقي ربعها..》
الجالي بانفعال:ماراح شي ومافرطت في شي طوبى قاعده مرتي وحتولي برضاها ولاغصب عنها حتولي...
🍃🍃🍃🍃
وطوبى ليلتها ماقدرتش ترقد من القلق والخوف..
طول هربت بقلقها وخوفها لله...وقفت بين ايديه وحكتله عن اللي تحس بيه...
طوبى بدموع وخوف..
"همي كله جنة مانقدرش نعيش من غيرها ياربي ماتخلي شي يفرقني عنها يارب..وخلصني منه هو خلاص نهائي يارب..يارب..ياربي..عطيني القوة نبي قوة قوة من داخل وبرا قوة تخليني نغلب كل حد يبي يقهرني ويهيني..خليني فوقهم كلهم يارب..خلي الهزيمه ماتعرفليش طريق ياحي ياقيوم.."
وقعدت تردد ياحي ياقيوم لاإله إلا أنت...
ومن كثر مارددتها..حست براحة رهيبه...وماقطعش عليها الا صوت المؤذن لصلاة الفجر...
🍀🍀🍀🍀🍀
بعد مرور يومين...
13اكتوبر..سنة 2018..
الساعه 11:00 صباحا بتوقيت اسكتلندا..
كان مختار مقعمز ع مقعد طويل للعامه مقابل الكافي اللي تملكه فاتن..
في يده برواز ذهبي صغير بحجم ربع اليد فيه صورة للإنسانه اللي ملكت قلبها وقاعده مالكاته الى يومه هدا..
كانت يتفرج عليها والذكريات تمر قدام عيونه...
🔺️قبل اكثر من 20سنة..
مقعمزين في مكان عام بينهم مسافه..
كانت لابسه فستان اخضر فيه فيه ورد صغير لونه ابيض..نص كم ولتحت الركبه وجنبها شنطه صغيره لونها اسود..مرفوع شعرها الذهبي فوق ذيل حصان ووجهها صافي...وعيونها تشوفله وهي تتكلم..
مارييت:زي مايقولوا مقطوعه من شجرة ماعندي حد والناس اللي انا عايشه عندهم بيعاملوني احسن مابيعاملوا بناتهم بحبهم قوي وماتخيلش في يوم ان اسيبهم مهما حصل..
مختار وهو يشوفلها زي المسحور..
/مارييت عادي تتزوجي مسلم؟
احمروا خدودها ونزلت عيونها خجلا وهي تقول..
/المهم يكون في بينا حب وتفاهم..
هو بإبتسامة حب قال..
/امم..كويس..
هي ابتسمت وقعدت تشوف للطريق..
تنهد وقال:مارييت..
شافتله..
مختار وهو يشوف لعيونها..
/عمري ماشفت بحلاوة عيونك..ماشفتش وحده حلوة زيك..انتي تشبهي للأميرات..زي الاميره ديانا بالزبط..
ضحكت خجلا وقالت:حيلك حيلك ديانا مرة وحده!
هو قال بهيام:ومازال احلا والله العظيم..
هي معاش قدرت تتحمل الخجل الشديد خلاها تنوض وتقول..
/خلاص الوقت تأخر لازم اروح..ومشت بسرعه..وهو قعد معاها بعيونه المغرمات اللي وقتها كانوا حيخلوه يبوحلها بمشاعره بس هي هربت في الوقت المناسب..
🔺️في الوقت الحاضر..
"مختار"
استاقظ وشاف جنبه جو عيونه في عيون فاتن الخضر ابتسم وقال..
/عيونك حلوات..
هي ابتسمت خجلا ونزلت عيونها..
ضحك وشاف القدام بعدين دس الصورة في جيب جاكيته الدخلاني وقال..غدوة مروح..
شافتله وقالت:بنروح معاك بابا شد فيا نجي..
مختار:تمام نحجزلك معاي..
هي قالت:ياريت..
شافلها وهو مبتسم بعدين ناض ومد يده..
هي ناضت حطت يدها في يده ومشوا الزوز وهما يهدرزوا...
🍃🍃🍃🍃🍃
"وعلاش كسوة لا"
صفاء وهي تتكلم بالتليفون..
/مش لازمه ياأشرف..
"صفاء فوتيها الدوة هادي ارجوك اني مانبيكش تكوني ناقصه انتي الكبيره في خواتك وهادي فرحة عمرك نبيك ديري كل شي"
هي سكتت وكانت مضايقه هلبه..
"صفاء"
هي بضيق شديد..
/صعب ياأشرف كله يبي راهو..
"والله لما ديريها وفي الصاله وكله عليا مادوري شي"
هي بصدمه:شن تقول اشرف صاله الحفله مشتركه وانت دافع نص حق الايجار !
"انتي شن دخلك خليك في اللبس والحاجات هادي ماليك علاقه بشي اني نتصرف"
هي بإحراج؛ماتحطش ماما في موقف صعب اشرف ارجوك..
"بيني وبين عمتي مادخلكش"
فجأه قعدت تبكي..
"صفاء!"
صفاء ببكي:اسفه..
"مغلى عليك النكد يابنت الناس..خلاص سادك بكي وهم..اضحكي وافرحي اقل شهر وتكوني معاي"
هي ابتسمت خجلا بعدين قالت..
/نراجي في يوم الفاتحه بفارغ الصبر بش نقول اللي في قلبي كله...
"نقولك حاجه سكري لأني مانضمنش روحي...سلام"
وهو اللي سكر عليها..قعدت تشوف للتليفون وهي تضحك..
شويه وجتها رساله..
فتحتها طول..
(ماتفتحيش الموضوع مع امك...ربي يحفظك)
قعدت تضحك بعدين كتبت رد وبعتاته..
(حاضر..ويحفظك)
🍃🍃🍃🍃🍃
مع المسويات...
في كوجينة شقة مختار اللي تقعميزه فيها كانت حلوة ع قد ماكانت كبيره وديكورها ونظامها حلوات..
صوت فيروز كان يصدح فيها..
وهي مقعمزه ورا الطاوله تشرب في عصير البنجر مع الفرواله وتتفرج في اللاب توب ع فيلم اجنبي..
والشغاله امينه حداها دير في العشي ..
خلال اليومين اللي فاتوا رضا ماخشش الشقه نهائي ولاشافاته صابرين وكانت مرتاحه هلبه معاش تبي تشغل بالها بأي شي يوترها...خواتها معاش دوروها نهائي وهي هالمرة حطتلهم اعذار وماشدتش في قلبها منهم نهائي..
صابرين؛الله يامنمن ريحة المصارين تاخد العقل..
اميمه بضحكه:مش حتاكلي منهم ولاقصوصه..
هي قالت؛علاش!.
امينه؛انتي ماشيه ع نظام اكل معين تعوضي بيه الدم اللي خسرتيه لغاية ماتعدي عشرة ايام مش حتاكلي غير اللي في النظام ده..
هي بضيق؛باهي المصارين لمني؟
امينه بضحكه؛للراجل اياه..
عقدت صابرين حواجبها بغضب ورجعت تتفرج ع فيلم
"قهوة امينه"
هي لما سمعت صوته حست بهداكا الشعور اللي يمغص البطن وزاد هالمغص لما قعمز قدامها مباشرة
مابتش تحول عيونها عن الشاشه..
وهو كان مقعمز بالجنب يشوف لأمينه ويحكي معاها..
رضا:جعان وتعبان وجوي ملخبط..كان نلقى نسافر نغير جو ونرتاح شويه
امينه وهي دير في القهوة..
/لما يرجع الاستاذ قوله يديك اجازة..
رضا:نشوف شن وراه قبل مرات في عنده شغل الفترة الجايه..
امينه:تعرف انه بيحب الناس اللي تشتغل عندوا يكونوا مرتاحين لو طلبت اجازة مش حيقول لا..
حك رقبته من الجنب وقال:تو نشوف..هيا القهوة هيا..
امينه؛ثواني..
هو تنهد وعدل تقعميزته طلع تليفونه من جيب جاكيته ولهي بيه..
وهي قدامه كانت زي التمثال..ومش عارفه علاش هكي صار فيها..تجاهلها تجاهل تام ولاكأنها موجوده..استغربت وفي نفس الوقت..اضايقت..
امينه:عايزة حاجه صابرينا..
شافت لأمينه وقالت..
/ديريلي قهوة..
هو قال؛ديرلك الصبر...
قلبت عيونها بملل وقالت..
/الله يجيبك ياطولة البال..شافتله وقالت..شن دخلك..شن دخلك..شن..دخلك..!؟
وامينه شاده ضحكتها..
هو كان يشوف لتليفونه ويقول..
/انتي في امانتي واني مسؤول عنك..عندك نظام لازم تمشي عليه فتره..بعد ماتفوت المدة متاعه اشربي حتى سم..
قعدت تضحك امينه..
صابرين بغيظ:ماقابلنيش مخلوق مستفز زيك في حياتي نكرهك كره لاقبله ولابعده..
هو قال:شكرا..
من غيظها خدت طاسه العصير شربتها في مرة..
هو رفع عيونه للطاسه وقال..
/قداش شربت وحده اليوم؟
امينه؛دي الثالثه..
هو هز راسه ورجع شاف للتليفون وقعد ساكت..
سكرت اللاب توب بغيظ..وفكرت تنوض بس في شي خلاها تتراجع عن الفكره..
جابت امينه فنجان القهوة لرضا وحطاته قدامه..
رضا؛حاف هكي!
امينه؛عامله كيكة جوز..
رضا:اللي هو جيبي جيبي..
صابرين؛جيبيلي حتى اني..
امينه بإبتسامه؛حاضر..
زفرت براحه وقالت؛الحمد لله مانطليش النظام حتى في هادي..
هو ابتسم ابتسامه خفيفه..شافتها وقالت..
/شن يضحك فيك؟
تجاهلها وقعد يشرب في القهوة..
صابرين؛نكلم فيك..شن يضحك فيك..
هو قام عيونه فيها..ارتبكت بس حاولت تخفي ارتباكها..
رضا:تكلمي فيا؟اني ماضحكتش ابتسمت بس..
صابربن دورله في مشكله بش طلعه من الكوجينه لهدا ردت بحده؛وعلاش!؟
هو رجع ابتسم وقال..
/مانقدرش نقول..
هي توترت هلبه وغيرت نظرها لأمينه اللي جت بصواني فيهم طروف الكيكه حطتهم قدامهم وهي مبتسمه وولت تشوف في عشاها..
رضا؛ترا علي الصوت..
وقعد يشوف لصابرين وهي تاكل في الكيكه وتبان متوتره رجع ابتسم..بس فيسع تلاشت ابتسامته لما شاف لرسغي ايديها اللي كانت مغطيتهم لصقة الجرح..
حس بوجع في قلبه..غير عيونه عنه وخدي فنجانه وبدي يشرب..
وكلهم قعدوا يسمعوا لمذيع الراديو وهو يقول..
"رساله من جكتورة سوق الجمعه تقول تحياتي ليكم اما عن موضوع اليوم الاعتذار عادي ماعنديش مشكله لو غلطت في حد نعتذر ونقعد وراه لين يرضى بالذات لو كان يهمني"
صابرين:طز مايباش يرضى من الاول لجعله رضي..
هو قام عيونه وشافلها لقاها تشوف للراديو برفعة حاجب وهي تاكل في الكيكه..
"وهادي رساله تانيه من ولد البلاد قال..مش كل اعتذار يكون بكلمة اسف اني نحب نتأسف بالافعال ونخلي اللي قدامي ينسى الزعل غصب عنه"
رضا:صحة ليك..
امينه ابتسمت وصابرين تجاهلت..
المذيع..
"ساد رسايل لهني نطلعوا فاصل غنائي وراجعين"
اول ماسمعت صابرين موسيقى الاغنيه فنصت عيونها..
ورضا قعد يشوفلها بإبتسامه وقال..
/زيدي علي الصوت..
امينه وهي تضحك مشت للراديو علاته..
بدي اعرف شو مبكيكي..مني زعلانه براضيكي..
تزعل هالدنيا ولاتزعل حياتي انا..
صابرين بكره..:كرهت وائل كفوري ومايجي منه..وهالاغنيه بالذات اللي قريب يطلعلي في الحلم وهو يغني فيها..
امينه بضحكه؛من قدك ده انتي حتشوفي وائل كفوري حتى لو كان في الحلم..
هي قالت:قولي ياطياح سعدي..
هو قال؛معناها مش وائل اللي خايفه يطلعلك في الحلم وهو يغني فيها..
هي وجهها ولى احمر قعدت تشوف لأمينه بس ودايره روحها متجاهلاته وامينه مع هادم الزوز تضحك وخلاص..
هو تنهد وقعد يغني..
الا ماشوف الضحكه مش ممكن ارتاح..
غيرت عيونها ليه وقعدت تتفرج عليه وهو يغني ويشوف لتليفونه ..قعدت تشوفله وخلاص مش قادره تغير نظرها عنه لعند ماهو باغتها وقام عيونه فيها هربت بعيونها طول لأمينه ووجهها مولي لونه من لون الفراوله...
ابتسم..
وفجأه..يجيه اتصال وين يشوف صاحبه تختفي ابتسامته وكل المعالم الحلوة من وجهه..ناض..ومشي طلع من حداهم..
وهي معاه بعيونها وقف بعيد شويه بس كان ينشاف..
وهي تشوفله وكانت حاسه بشي من الضيق لأنها عرفت من اللي اتصل بيه..
لأول مرة صابرين تحس روحها مش طايقه مختار وكان تلقى معاش تشوفه بكل..كانت تتمنى رضا وهو مولي بيخش يقول ماصارلاش من المرواح ومازال بيمدد..
بس اللي صار ان رضا وين خش قال..
/الاستاذ مروح غدوة..
وخدي فنجان القهوة من ع الطاوله وولى طلع من الكوجينه..
وهي معاه بعيونها..
وقتها جاها شعور مش حلو..شعورخلاها تبي تبكي..
ناضت وخدت اللاب ومشت طلعت حتى هي..
وصلت في الدروج ركبت ودموعها نزلوا..وين وصلت في الدار خشتلها وسكرت عليها..
🍃🍃🍃🍃🍃
في الدار..
مقعمزه تقرا وحداها بنتها فايقه ومرة مرة تحرك في ايديها وهي مرات تسرقلها في النظر شوقا..
مقابلتها بنت اختها تحاول تقرا وتركز في مذكرات المحاضرات مش قادره غدوة الفضانيه متاعها وقاعده تفكر فيها..
شويه جاها اتصال..
قامت تليفونها لما شافت المتصل ابتسمت وردت..
آلاء:خالو ياهلا..
رفعت طوبى عيونها فيها..
"اهلين بالعروس شن جو"
الاء بضحكه؛تمام..شن جوك انت..
"تمام التمام..الامور ماشيه مش ناقص شي ماتبوا شي"
الاء:لا حبيبي ماناقص شي..بتجي غدوة ولا؟
"اكيد اميرتي..من الصبح نكون في ليبيا نكمل اشغالي ونوتي روحي وبوجهي لفيلا عمك"
الاء بضحكه:تعرف فرحت اكثر لأنك بتحضر .
"حبيبتي انتي راك بنتي"
ابتسمت الاء ودموعها في عيونها وقالت..
/ربي مايحرمني منك..
"ولامنك ياحلوتي..هي اميرتي لازم نسكر نشوفك"
الاء:ان شاء الله..سلام..
"تشاو"
وماسكرتش لين هو سكر..
طوبى وعيونها في مذكرتها:بيحضر..
الاء بفرحه؛ايه..
طوبى:روح قصدك؟
الاء:لاقال الصبح يروح بيكمل شغل عنده هني لين يجي وقت المشيه لحوش عمي..
طوبى هزت راسها بدون ماتعلق..
الاء؛لكن تعرفي تمنيت الفضانيه تكون في حوش جدي..
شافتلها وقالت..
/علاش!؟
آلاء:مانبيش جميل ثريا..مانبيش تقول دارت الفضانيه عندي بش ماتتحمشش قدام ناسها..
طوبى:لوحي عليك الدوة الفاضيه هدا عمك وملزم بيكم هدا اقل شي يديرهولكم..
تنهدت آلاء وقعدت ساكته..
طوبى:اهم شي انتي مرتاحه وراضيه..
ابتسمت وقالت:ع الآخر..
طوبى بإبتسامه؛وهدا المهم ربي يكملك ع خير يارب..
الاء:تسلميلي ياغلاي..وبعتتلها بوسه في الهوا..
وطوبى ردتها بعدين ضحكت والتفتت لجنه وقالت..
/الفال ليك ياعزوزة انتي نكبرك ونعطيك ونفرح بيك..بس زعمه نلقى اللي يستاهل بنتي! ياودي مظني فيه اقعدي معاي وخلاص بلا راجل بلاهم..
طلعت جنة صوت اشبه بالعيطه..
طوبى وهي مندهشه بتصنع..
/ماعجبهاش المعفنه السفتوله..جيل ياكبدي مايعلم بيه الا ربي..
والاء تسمع وتضحك من قلبها...
🍃🍃🍃🍃🍃
"دكتور اياد"
كان ماشي في الممر ناوي يروح وقفه صوت زميله خالد وهو ينادي فيه..
وقف عليه خالد وقال؛جديات ناوي تاخد اجازة الشهر الجاي؟
اياد بإبتسامه:ايه عندي سفرة مهمه..
خالد:ان شاء الله خير بس..
اياد بضحكه:لاخير..تنهد وقال..بنمشي نشوف خطيبتي..
خالد ابتسم وقال..
/ان شاء الله يرتاح بالك وتوصل اللي تتمناه عاجلا غير آجل..
إياد من قلبه قال؛يارب..ابتسم وقال..هي نستأذن معزوم في حوش ولدي اليوم اول مرة..
خالد:خود راحتك..
اياد:سلام..ولف ومشي..
وخالد معاه بعيونه وهو يقول..
/وعليك السلام..ربي يقربلك البعيد..ومن قلبه تنهد وقال..اجمعين...
🍃🍃🍃🍃🍃
البعيد اللي يتمناه اياد يقرب..
عنده فيه غريم..
حب منذ نعومة اظفاره ولعند ماعدا سن الرشد وهو قاعد عايش فيه..
المهدي...اللي مقعمز في صدر صاله حوش بوه..
وحواليه خوته وخواته وامه وولاده وصغار خوته..
كلهم نادتهم مغليه بش يتعشوا عندها عشي ع شرف جية ولد نسرين اللي حيوصل بعد شويه...
مافي حد كان مركز ع نظرات راما لمحمد اللي كان سرحان وفي عالم تاني..غير نجاة..
خوها كان لاهي بتليفونها وغصب عنه كان قاعد معاهم..
يزن حتى هو مغصوب ع الجية كاره حوش جده ومش متحمل منهم حد اخطا عمته نسرين..
نسرين اللي كانت لاصقه فيها معاش ترتاح الا معاها وماتخشش لحوش جدها الا في وجودها..
نسرين كانت تكلم في المهدي وتقوله..
/جوها المركز وترجوها بش طلعه يا مهدي..
المهدي؛قوليلها تسامحني مش حنطلعهم لأمتى مايقولي عقلي طلعهم..
مغليه؛وخياتهم قعدوا برواحهم ياولدي..
المهدي:خليهم يحسوا باللي حسوا بنات خوهم..
نضال:والله حق يستاهلوا حتى هما وكان عمات حق راهو مارضوش بحال بناتهم..
نسرين بإقتناع:عندكم حق..
المهدي:خدوا فرص يافرص وهما ضيعوها برواحهم..الواحد يعدوله مرة اتنين لكن التالته تابته..
رفعت محمد محي الدين عيونه وشاف لخاله وحس انه يلقح عليه بالكلام..
والمهدي اللي ماكانش يشوفله فعلا كان هدا اللي يدير فيه..
بس ماكانش هو الوحيد المعني بالتلقيح..
الشخص التاني مش مركز وماوصلتاش الرساله كان لاهي بولد اخته نسرين يلعب فيه..
ونجاه تشوفله وهي تخفي في الم كبير داخلها لما تفكرت جنينها اللي اجهضاته منه وانه معاش عندها فرص تعوض بيهم اللي راح..
شويه تكلم عمر وقال..
/معاش بان التارقي..
غير الجالي نظره لعمر وهو رافع حاجبه..
المهدي:قال ماشي للعوينات..
ابتسم الجالي ابتسامه مكر خفيفه جدا..
عمر هز راسه بصمت..شويه جاته رساله..
رفع تليفونه وشافها لما قراه ابتسم..
وعيون امه وخواته معاه..
خديجه ومغليه وصلتهم نفس الدوة اللي وصلت لصفيه و ع بالهم هالرساله من اميمه والزوز قعدوا يسحنوا..
اما نسرين فكانت عارفه الحقيقه ومن داخلها فرحانه لخوها..
اما نضال..فكان سرحان وبين عيونه الفستقه المستحوذه ع قلبه استحواذ..كل ماله يزيد يغرق فيها اكثر ويتأكد انه مايقدرش يعيش من غيرها..
بس مافيش امل من تجديد الوصال وانهاء الفراق الاجباري الامل مش بس مفقود..الامل كان ميت..
استاقظ من سرحانه لما خش عليهم محمد شنيبه وهو مدخل معاه محمد ولد نسرين وهو يقول..
/خش لأمك ياتراس..
نسرين لما شافاته قلبها فر..
وهو الفرحه كانت تتناثر من عيونه ناضتله تجري وهو جاها وضموا بعض بقوة..بشوق كبير..
نسرين قعدت تبكي..وبكت معاها امها واختها وحتى نجاة وراما..
اما صغارخاله فكانت قلوبهم مقسومه من اللي يشوفوا فيه..
فارقها بالحياة ورجع اجتمع بيها.
بس هما غاليتهم فارقتهم فراق مافيش بعد اجتماع بعده...
المهدي كان يوزع في نظره بيناتهم وقلبه موجوع عليهم...
الوحيد اللي ماتحركت فيه شعره هو محمد محي الدين اللي يبي يطلع لصحابه وخلاص...
🍃🍃🍃
وفي حوش جيرانهم اللي جنبهم...
سميرة؛ياوخيتي نجيه يبي يجبر بخاطرها راهو ويقيم قدرها بيناتنا ياعمتي مايبي شي ينقصها..
نجمه:فاهماته لكن مانبيش المراة تتكلف فوق قدرتها مسكينه وحلت في ايجار صاله للكسوة..
سميره؛دليتها ع وحده رخيصه 1800 بس صحابها صحاب خوي تو يراعوها..
نجمه؛سلمك بنيتي وينجيك..سموره ياغاليه انتي السلفه الكبيره ديري صفاء بنيتك علميها وراعيها وخليها ديما تخالطك باهي..
سميره بضحكه؛حاضر عمتي..
ع خشة عبد الفتاح شافها تضحك قال..
/ضحكونا معاكم..
سميره:ايه حقه بنبات حدا عمتي الليله برا لإبتسام الليله..
هو انصدم وقال..وولادك ومدارسهم!
هي قالت؛مش اول مرة نبات برا الحوش..
نجمه؛برا سلم ولدي برا هديكا تسكن في قطع الرقبه والدنيا ليلت هداكا هو كان بتتسقد..
هو قعد يشوف لسميره بحده بعدين قال..
/حاضر..حاضر يام..تصبحوا ع خير..
ومشي طلع وهو معصب..
نجمه؛خيره مش طايقها هو!؟
سميره بضحكه؛يتهيالك ياعمتي..
نجمه هزت راسها وهي تقول..
/ايه صح يتهيالي نوضي نوضي ديري عشي..
ناضت سميره وهي تضحك وتقول..
/حاضر..ومشت طول للكوجينه..
نجمه بمكر:تستاهل هديكا اللفعه هادي اللي تخش ع مراة..بعدين تنهدت بضيق وقالت..الله يسامحك ياعواطف يابنتي ع اللي درتيه في روحك..
🍃🍃🍃🍃
وعواطف كانت في دارها متهيئه لجية راجلها..
كل مايجي دورها كانت تجهز في نفسها ليه ومتأمله يلين معاها ويغير معاملته ليها..
هو اول ماخش عليها دار زي مايدير في كل مرة..يبدل حوايجه ويخش سريره ويرقد وكأنها مش موجوده..
وهي تكمل ليلها كله تبكي ع حظها التعيس...
🍃🍃🍃🍃
"احرجني والله"
مطيره:عليك راجل الله يبارك عليه افرحي بيه فيزة اهو ربك عوضك بالسند..
فردوس:ان شاء الله عزيز يكون زيه ويهنيني بنتي مانبي منه شي غيره..
فايزة ودموعها في عيونها..
/آمين..وربي يتمم ع خير..
فردوس من قلبها:يارب...
🍃واريج اللي كانت مقعمزه معاهم سرحت بتفكيرها في استاذها اللي كل يوم تشوف فيه ويعامل فيها زي مايعامل في غيرها من الطلاب وكأنها ماتعنيله شي في حياته ولاكان ليها اي اثر فيها..
العذاب اللي كانت هاربه منه الفتره اللي فاتت قاعده تعيش اضعافه توا..
والحب اللي تحسابه راح..طلع مدفون في القلب ورجع نبت وطلع من اول وجديد بإندفاع واكبر من قبل...
🍃وفي من قاعد يهرب من مشاعره خوفا..
من مستقبل مجهول..او نهاية معروفه وواضحه من البدايه..
صابرين اللي معاش طلعت من دارها بكل..راقده ع سريرها وعيونها ع باب الفيرندا وفي داخلها هداكا الشعور الغريب قاعد يزيد ومرافقه خوف كبير..
🍃وهو يلي ماكانش هارب من مشاعره خوف..
هو كسر خوفه بعد ماانهدت مقاومته لمشاعره..بس كان موجوع لأنه عارف ان اللي قلب البنت اللي دون بنات الدنيا كلها طاح في حبها مشغول بغيره..
🍃🍃🍃🍃🍃
وبعد ليل طويل طلع الصبح..
وروح مختار من السفر..استقبله كالعاده رضا وشاف فاتن جايه معاه..وهالشي خلاه يفرح لاإراديا..
وصلها لفيلا بوها..وروح بمختار للعمارة..
اول ماخش مختار للشقه استقبلاته امينه كالعاده..
امينه:حمد لله ع السلامه..
مختار:الله يسلمك..شن الامور..
هي قالت:الحمد لله ماشيه..
مختار:صابرينا فايقه؟
امينه:لالسا نايمه..
مختار:تمام لما تفيق قوليلها تنزل للمكتب..وديريلي فطور ..
ومشي طول بيركب لداره..
امينه شافت لرضا وقالت..
/قهوة..
رضا؛ساده ..
ومشي طلع من حداها..
وهي تنهدت بضيق ومشت للكوجينه..
🍃🍃🍃🍃🍃
ودوش مختار..ولبس وتأنق..ونزل فطر في الصالون..
بعدين مشي للمكتب وقعمز مع رضا وبدوا يحكوا في الشغل..
🍃وصابرين فاقت وماكانتش متمنيه تفيق..
بعد ماطلعت من الحمام لبست بلوزه وسروال عاديات..
ورفعت شعرها القصير ذيل حصان ومابتش تحط ع وجهها ولا حاجه..
طلعت من دارها..ومشت نزلت تحت وخشت للكوجينه وقالت..
صابرين؛صباح الخير..
امينه:صباح النور ياحبيبتي..
صابرين بضيق:الاستاذ روح؟
امينه؛ايوه وعايز يشوفك في مكتبه..
هي تنهدت ومشت طلعت من حداها وتوجهت للمكتب..
وصلت فيه..شافت رضا مقعمز قدامه ع المكتب ولاهي باللاب توب..ومختار ورا مكتبه شاد ورقه يشوف فيها..
حست روحها مخنوقه ومش طايقه نفسها..
بالغصب قدمت ودقت الباب..
رضا ماباش يشوفلها..
اما مختار لما شافها ابتسم وقال..
/صابرينا..وناضلها..
بطرف عينه لحقه رضا وشافها وهي خاشه..
مختار وين وصل فيها جاي بيحضنها لكن فاجئته لما مدت يدها وقالت..
/حمد لله ع السلامه..
رضا بنظره كله ولى معاه تفاجئ منها هلبه...
مختار عداها..وصافحها بإيديه الزوز وقال..
/الله يسلمك..
هي طول جبدت يدها وقالت..
/كيف حالك..
مختار حط ايديه في جيوبه وقال..
/تمام التمام..كويس حالي وعال العال..المهم انتي شن حالك؟
صابرين:احسن بهلبه..
مختار:تمام قعمزي..
ومشي ولى قعمز ورا مكتبه..
شافلها وقال..
/صابرينا ياصابرينا...قستي غلاك وحسيت فعلا انتي قداش مهمه عندي وتعزي عليا..
رضا وهو داير روحه لاهي باللاب توب قلبه يدق بقوة من الخوف..
وهي زادت انخنقت..
كمل مختار يقول:واني برا فكرت هلبه وقلبتها في راسي هلبه ..انتي توا ماعندك حد وماعندك على من تولي..يعني انتي توا تعنيلي اكثر من قبل وتخصيني اكثر وفي مسؤوليتي..صابرين اني معاش نبيك تخدمي معاي ولاعاد نبي منك شي انتي مجبورة عليه..لكن حتقعدي عندي ومعاي جزء من عيلتي هني زيك زي رضا حني تلاته ظروفنا وحده ولو فقدنا العيله لازم نكونوا العيله لبعض..اقعدي عندي معززة مكرمه وتقدري ترجعي لخدمتك الأولى..بس حتقعدي لمختار الواعر بس مادمتي عايشه عنده فاهمه عليا ياصابرينه..
وصابرين اكيد مش حيكون عندها خيار تاني غير الشارع وهكي حضيع ضياع تام..عرضك يامختار لايمكن انها ترفضه..
ردت عليه وقالت .
/فاهمه..مشكور من قلبي ع كل شي..
مختار:ولايهمك..وتوا عزيزتي نبيك تغيري جوك وتاخدي فتره نقاهه وتسافري لقبرص تقعدي فيها اسبوع وطبعا حيمشي معاك رضا..
الزوز تفاجئوا..
مختار:عندكم مشكله؟
صابرين تحمحمت وقالت..
/مرات هو مايبيش..
شافله مختار..
رضا:اني ماعنديش مشكله..لكن مرات هي عندها..
شافلها مختار..
قالت:تمشي معانا امينه..
هو قال:اكيد مش بروحكم..
هزت راسها وهي ساكته..
هو مررنظره عليهم بعدين ناض طلع من ورا مكتبه وقال لصابرين..
/ترا تعالي..انت رضا اوقف شويه لوسمحت..
الزوز ناضوا مع بعض وهي قربتله وكانت خايفه..
مختار؛المشاكل اللي بيناتكم لازم تموت هني..نبيكم تعيشوا هني بهدوء...حاولوا تكونوا اصدقاء الزوز تعزوا عليا وتهموني مانبيش نلهي بمشاكلكم عن شغلي..
رضا:مشكلتي معاها وحده بس طول اللسان وقلة الاحترام..
صابرين؛لأنه يدخل فيا في كل صغيره وكبيره ومانحبش حد يدخل في حياتي..
مختار:صابرينا رضا قاعد يدير في شغله..انتي تخصيني لو في مرة غلطتي غلطه كبيره اني حنتحمل جزء منها وهو وحده من وظايفه حمايتي من جميع النواحي..عندك علم جماعة الابرا كادبرا اللي كنتي ماشتيلهم في نفس اليوم والوقت طبوهم الردع! تخيلي لو كنتي معاهم وقتها شن كان صار..
نزلت عيونها وهي مضايقه ورضا ماباش يشوفلها نهائي..
مختار؛قولي..
صابرين بضيق:اسفه وصدقني مش حنعاودها نهائي..
مختار:واني متأكد من الحاجه هادي..المهم توا عطوني وعد انكم تلوحوا الخلافات ورا ظهوركم وتولوا اصدقاء ..
صابرين:مانبيش غير الاحترام..
ورضا؛وهدا اللي نبيه..
مختار:okبراحتكم المهم تريحونا من المشاكل..
مرر نظره بيناتهم وقال..
/خلاص صابرينا بري جهزي نفسك من توا غدوة الصبح السفر..
هي قالت..
/شكرا....ومشت طول طلعت..
رضا:ياريت خبرتني..
مختار:علاش؟
رضا؛كنت نبي نطلب منك اجازة ..
مختار بضحكه:واهي جاتك بروحك..
رضا غير نظره للاب توب ويبان مضايق..
مختار:اني لو نقدر نأمن عليهم غيرك مابعتكش معاهم..وبعدين انت في حالك وهما في حالهم..يعني كان تبي تاخد راحتك مايقدر حد يقيدك.
رضا:عارفني ماعنديش فيه..
ضحك ومشي قعمز ورا مكتبه وقال..
/هدا علاش نبيك تمشي معاهم..هيا قعمز قعمز خل نكملوا اللي ورانا مازال في يوم طويل يستنى فيا..
قعمز رضا ورجع لهي بشغله مع مختار...
🍃🍃🍃🍃🍃
الساعه 3:00بعد الظهر..
خشوا هو وياها لمكان شغله..
مختار:الاحساس بالذنب ابشع شعور يافاتن معاش نبي نعيشه مرة تانيه..
فاتن؛تعرف..انت اكثر بنادم متناقض قابلته في حياتي اخرتي بنهبل في جرتك..
هو بضحكه:انتي قداش ليك مهبوله في جرتي..
ضرباته ع ذراعه وهي تضحك بعدين قالت..
/هدوء..
مختار:استراحة الغدي..
وصلوا في باب المصعد فتحه قاللها..
/خشي..خشت وخش هو بعدها وتسكر الباب..
🍃كانوا متوجهين لمكتبه اللي كان فيه زائر مفاجئ..
واقف قدام لوحه مرسومه ليه ويتفرج عليها...
🍃انفتح باب المصعد وطلعوا..
مختار:حسيت وكأن الفضانيه لبنتي حق..متوتر ومرتبك تصدقي..
فاتن:خايفه نقول كلام مايعجبكش لهدا نسكت افضل..
هو قال بضحكه:يكون احسن..
فاتن:بارد..
هو قعد يضحك..
وصلوا في مكتبه..وقف لما شاف الباب المردود..
فاتن:خيرك؟
هو عقد حواجبه وقال:كيف ماتسكراش بالمفتاح..ياويلها اليوم لزتها ماتكفنيش..
ويفتح الباب ويخش ويوقف جامد في مكانه..
وفاتن اللي خشت معاه حتى هي وقفت في مكانها وهي متفاجئة..
"فاجئتك؟"
هو ومازال تحت تأثير المفاجأه قال..
/هلبه..
طوبى اللي كانت واقفه قدام رقعة الشطرنج زاحت شويه بعد ماالتفتت ووقفت جنب جهة القطع البيضا وهي تشوف لمختار قالت..
/مش متعوده نزور حد من غير موعد وللضرورة القصوى جيتي..
هو قدملها ووقف قدامها وقال بقلق..
/ان شاء الله خير!
فاتن مررت نظرها بيناتهم بعدين نزلت نظرها لطاولة الشطرنج شافت شي شدها هلبه..
طوبى كانت واقفه جنب القطع البيضا ومختار جنب السودا..هو شي عادي طبيعي مافي شي يستدعي الاستغراب..بس هي شافت للمشهد بطريقه تانيه وهي تعرف كويس لعبة الشطرنج شني بالنسبه لمختار..
رفعت نظرها ليهم..ضيقت عيونها بتركيز وهي تشوفلهم بعدين قالت
/اني برا مختار..
طوبى شافتلها وقالت:لاخليك فاتن..ومشتلها وسلمت عليها بالخد
ابتسمت فاتن وقالت:شن حالك؟
طوبى؛الحمد لله.بعدت عنها وقالت وهي تشوفلها بإبتسامه..
/بابا الله يرحمه خدي عنك انطباع حلو وقال مراة كويسه..
مختار زاد توتر وارتبك
فاتن شافتله وقالت:الله يرحمه
التفتت طوبى لمختار وقالت..
/معليشي تسكري الباب..
فاتن:مش مشكله..وسكراته طول
طوبى ولت وقفت قدام مختار وقالت..
/مش معطله عليك..مختار..هادي اول مرة بنطلبك فيها ولولا الظرف القوي اللي حني فيه ماكنتش طلبتك..
مختار بقلق:شن في طوبى؟
طوبى تنهدت وقالت:في من يحارب في المطحن متاعنا..مطحن اسمه الامبراطور صاحبه قاعد ينافس فينا منافسه مش شريفه عداوة يعني بش يوقف حال المطحن وانتي متوقعه انه مازال حيدير اكثر من هكي..نبيك توقفله وتعرف من وراه..
🍃هو كان في داخله مصدوم..ماخطرش في بالي يصير هكي نهائي..
هو كان مخطط لهدف غير هدا يبي يوصله ومازال في خطوات للهالخطه مامشاش فيها..هي بطلبها هدا حتجبره يغير المخطط متاعه...🍃
طوبى:تقدر دير هكي ولالا؟
فاتن:يقدر ونص..
شاف لفاتن اللي كملت تقول..
/تو يدير حل متأكده..
هو رجع شاف لأخته وقال..
/عطيني وقت نشوف الموضوع كويس وبناءا ع اللي بنعرفه حنتصرف..الاهم من هدا كله مايكون في حد معترض ع تدخلي..
طوبى:من هالناحيه اطمن..المهم توا خلاص نعبا عليك؟
ابتسم وقال:كوني هانيه..
ابتسمت وقالت؛شكرا..هي مالا نخليكم..السلام عليكم...ومشت للباب...
الزوز ردوا عليها وقالوا..
/وعليكم السلام..
فتحت الباب وطلعت وسكراته وراها..
فاتن شافتله وقالت..
/مش انت اللي وراه صح؟
ضحك وقال؛كان صار زالزال توا اني وراه..!
فاتن:مختار..
مختار:فاتن..اكيد لا..
فاتن؛مش حتردها ولا؟
مختار ابتسم وقال..
/هادي بالذات مانقدرش نردها هادي اخر العنقود سكر معقود..
فاتن ضحكت غصب عنها وقالت..
/ان شاء الله يلتم شملكم والثلج اللي بيناتكم يذوب..
هو هز راسه ومشي قعمز ورا مكتبه وقال..
/تعالي قعمزي...
مشت فاتن قعمزت..وبدت تحكي هي وياه عن مواضيع تانيه ماتبيشي يحكي عن عيلته وترجع نفسيته تتعب مرة تانيه..
🍃🍃🍃🍃🍃
وبعد المغرب من نفس الوقت..
تعبت مربوعة فيلا بشير بالرجاله اللي جايين يحضروا فضانية عزيز والاء..
عمام عزيز كلهم..وعمام الاء ومختار ووالحاج علي وحسين..
مختار كان اكثر حد حضوره مهم بين الموجودين كلهم عارفينه شن يكون ..وهو دار لآلاء قدر كبير وكان في الجلسه وكأنه بوها مش خالها...
علي ماكانش متحمل وجوده بتاتا ولولا خاطر فردوس ماقعمز في مكان مختار فيه..
اما حسين فكان عادي معاه بحكم علاقتهم اللي نوعا تعتبر كويسه..
وبرغم كل شي تمت الفضانيه ع خير..
ووصلت الاخبار لحوش لطفي الواعر وقعدوا يهنوا في الاء ويباركولها وهي كانت فرحانه ومرتاحه في نفس الوقت..
وامها فرحانه اكثر منها....
🍃🍃🍃🍃
تاني يوم..
الاثنين
16من اكتوبر...سنة 2018..
الساعه 9:00صباحا..
طلعوا امينه وصابرين للسياره اللي راكب فيها رضا بش يتوجهوا للمطار..
كانت سيارة عاديه بس مرشها مظلم..
ركبت امينه جنب رضا..وصابرين وراه..
رضا وهو لابس نظاراته السود..
/مش ناسيين شي؟
امينه:لا ياحبيبي خودنا ع المطار يللا دنا ماصدقت..
ضحكت صابرين وهو ضحك وشاف للمرايه عيونه واخيرا شافوا ضحكتها..حس بشعور حلو بالمرة..
شغل السيارة وتحرك طول..
بعد ماطلعوا من العمارة بمسافه..
هو شغل منظومة السياره وعيونه يسرقولها في النظر..
كانت تشوف للروشن وسرحانه...استاقظت من سرحانها لما سمعت كلمات الاغنيه..كانت لنفس المغني..
اسمها غازلني...
كلماتها كانت توصل لقلب صابرين قبل مسامعها..
هي لما حست بهاالشي رجعت خافت هلبه..ولفت وجهها للروشن وقلبها يدق بقوة..
بس قلبه هو كان يرفرف بمشاعره..مجرد ماتباعد عن العالم الاسود اللي قال عليه وهي معاه..بالذات بعد اللي شافه منها امس ركبه حماس غير عادي وقعد يخطط بش ينفد اقتراح مختار....
🍃🍃🍃
وبعيد عنهم في طريق تانيه..
وهي تسوق في سيارة اختها..
كانت تسمع لحمزة نمرة...داري ياقلبي..
الكلمات كانوا يعبروا ع حالها عن اللي عايشاته واللي قاعده تمر بيه..
قعدت تذرف في الدموع وتمسح فيهم وتحاول تتماسك..
تحاول داري ودس الوجع والضعف والالم..
لازم تكون اقوى لازم تبان اقوى بش تعرف تعيش وتكمل وتواجه وتنتصر في حربها اللي قاعده تخوض فيها..
🍃وداري..داري...ياقلبي مهما داري
قصاد الناس حزننا مكشوف..
وهو عادي ماحدش في الدنيا دي
بيتعلق بشي الا وفراقة يذوق🍃
#الحرب_البارده
#طوبى
....يتبع....
