#طوبى "جنة طوبى"
#جمان_فريد
#الجزء_105"كانون الأول/موسم الثلوج"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩)٦
.......... 🌿🌿🌿🌿🌿🌿🌿🌿🌿🌿🌿🌿🌿🌿
🍃 لا تثق بأحدٍ لمجرَّدِ أن أعجبك حديثه _
فالحياة أصبحت مظاهر، فبعض الأشخاص ظلُّه أكبر من حجمه الحقيقيّ!
فيودور دوستويفسكي🍃
______________________________________
وصلت سيارة تويوتا"تاندرا" لحوش سدرة..
شافها المهدي اللي كان واقف قدام المطحن مع واحد جايه في شغل استغرب..
هالسيارة نزلت منها مراة ملامح البكاء باديه ع وجهها..
وقفت ع الباب ودقت عليه
شويه وفتحلها واحد من صغار حواء..كلماته وخشت..
والراجل اللي جابها قعد يراجي فيها..
🍃في شقة فايزة..
كانوا مروة وتاله ومناسك ع سفرة الفطور مع فايزة..
احاديثهم اللي فتحوها لطيفه القصد منها تغيير جو مناسك..
وهي مرة مرة تضحك ومرات تكتفي بالإبتسامه..
وفي عز انسجامهم مع الهدرزة يدق باب الشقه فايزة بتساؤل:مني زعمه!؟
ناضت ومشت للباب والبنات لحقوهم بعيونهم..
☘وصلت في الباب وقالت..
/شكون؟
"اني فوزيه"
اتفاجئت ع الآخر..فتحت الباب طول..
وتخش فوزيه وهي تبكي وفايزة حضنتها وبدت تبكي معاها..
ع جية مناسك ووراها مروة وتاله..
كانت تشوف لفوزيه بشوق شديد وألم...
وفوزيه شافتها قالت بصوت مبحوح..
"مناسك"
تباعدت عنها فايزة وهي تبكي وتشوف لمناسك..
مناسك اللي جت لفوزيه نجري وضمتها بقوة وفوزيه حضنتها بكل مافيها..بقلبها وروحها..بكوا بكاء شديد..بكا معاهم فايزة والبنات..بكا حتى حواء اللي كانت واقفه في أخر الدروج تسمع فيهم...
🍃🍃🍃🍃
في نفس الوقت...
وصلت طوبى بسدرة للمدرسة..
طول الطريق وهما ملتزمات الصمت وع وجه سدرة ملامح تهجم ماانفكتش عنها ليها ايام وحالها هدا مخلي طوبى في غاية القلق..
نزلوا من السيارة..ومشوا خشوا للمدرسه مع بعض..
سدرة كانت تمرر في نظرها عليها..تشوف في حال الناس كبار صغار...تأسفت ع حالهم أسف شديد..
غيرت نظرها لمدخل المبنى وهي تقول..
/ارفعيني لمكتبك..
طوبى:حاضر..
ومشوا مع بعض بإتجاه المبنى وخشوله...
☘ووراء المبنى صايرة حاجة حلوة راسمه الضحكه ع وجوه الاطفال ومخليتهم عايشين احلى اللحظات..
لعب وضحك وحماس...
ابله شروق نظمت فعاليه بمساعده فريق تطوعي وعبد القيوم ومعاهم...سلافه...
سلافه في هالفترة قدرت تجمع متبرعين من اولياء امور الطلبه اللي كانت درس فيهم فمدرسة خاصه..
خبرتها في مجال الدعايه والاعلان خلتها بأسلوبها الحلو واللسان السوري الجذاب تشجع هلبه اولياء امور نساء ورجال ع التبرع...
ولبانه اختها اللي كانت عندها نفس الموهبه قدرت تخلي صاحبة البوتيك و زباين للبوتيك اللي تخدم فيه يساهموا
وقدروا يغطوا احتياجات عدد لابأس بيه من النازحين من ملابس شتويه وحاجات اساسية..
ومازال يبوا يساعدوا باللي يقدروا عليه..اللي يديروا فيه توا داروه زمان في مخيمات النازحين من ابناء بلادهم قبل لينجبروا يطلعوا منها..
هما اكثر من حاس بالنازحين حاليا لأنهم عايشوه بالخصوص مع الأطفال...☘
سلافه:يللا هبة الله دورك..قومي يللا..
شروق:من الشباب عبد الودود هيا نوض..
شافت سلافه لعبد القيوم لقاته يكتب في اسم الولد ع السبورة.
ابتسمت ومشت كتبت اسم البنت وهي تقول..
/أكلتوا هوا يااستاذ..
هو وخر وقال بإبتسامه وحاجبه مرفوع..
/من يضحك اخيرا..
ضحكت بعدين الزوز ركزوا ع المسابقه اللي كانت بين البنت والولد..
ع جية اميمه ومعاها هناء شافوهم بعد ماطلعوا من المستوصف الفضول خلا اميمه تجيبها بش يتفرجوا..
وفي الحقيقه اميمه كانت تبي تعرف وضع عبد القيوم مع سلافه...
تبي تعرف..هل بعد اللي صار مع طوبى وهو كان شاهد عليه خلاه يصرف النظر عنها!!؟..
وارد جدا جدا مادام حتى اهله ملمحين بالموضوع اكيد الراجل قلبها في عقله واختار يبعد عن وجع الراس والمشاكل...
هناء بإبتسامه:جميله البنت اللي واقفه غادي شكلها مش ليبيه..
اميمه:ايه سوريه..
رفعت هناء حواجبها ونزلتهم ورجعت تتفرج ع العاب المسابقه..
واميمه مركزة مع سلافه وعبد القيوم اللي ماانتبهش لوجودها...
🍃🍃🍃
فتحت باب المكتب ع وسعه..
خشت اختها وهي تقول..
/خليني بروحي وبري شوفي كان في عندك حاجه ديريها..
قعدت طوبى تبع فيها بعيونها وهي تمشي لين قعمزت ع الكرسي..
تنهدت وكيف جت بتسكر الباب سمعتها قالت..
"ماتقعديش واقفه حدا الباب"..
بدت ع وجه طوبى ملامح الضيق وهي تقول..
/حاضر..وسكرت الباب...
خدت نفس وقالت بضيق..
"لاحول ولاقوة بالله"..
وبالغصب جبرت رجليها يرفعوها بعيد عن المكتب..
🍃واختها داخل...
رفعت شنطتها وفتحتها...طلعت منها ظرف الرساله وهي تشوفله بتوتر..
حطت الشنطه ع طاوله المكتب جنبها..وهي تبلع في ريقها بدت تفتح في الظرف...
فتحاته وطلعت منه رساله عمرها عام وثمانيه شهور...
حطت الظرف حتى هو ع الطاوله..وفتحت الرساله وبدت تقرا فيها..
بدايتها كانت..
(السلام عليكم ورحمة الله وبركاته..
سدرة...
هيَ اٌختي قبل ان تصّبح صديقتي هي تلك الفتاه التي انجبتها لي الدنيا ولَم تنجبها امٌي.انت قطعة من قلبي و رفيقة روحي و الجُزء الجميل من عمري و إن قلّ الكلام أنت أختي و صديقتي التي لا تعوّض ولا تستبدل...)
غمضت عيونها والدموع طاحوا منهم حست بقلبها انعصر عصر من الألم..
فتحت عيونها وهي ترشف وكملت قرايه..
(عندي يقين كبير انك حتفيقي وترجعي تكملي حياتك اني شفت رؤيه في المنام كان هدا تفسيرها وأسأل الله ان يجعلها حقا..
لو صار ووليتي للدنيا ياسدرة ووصلاتك رسالتي نبيك تحسي بكل كلمه فيها لما تقريها..
سدرة اني توا حاسه ان ايامي في الدنيا ولت معدوده حاسه ان قريب هلبه حنسيبها..ومانبيش نسيبها الا واني مخلصه ضميري..اسال الله توصل فيك هالرساله بش نرتاح بعد موتي..
اول شي ياسدرة ردي بالك تفكري في يوم ان في قلبي عليك شي لاوالله اني اللي خايفه يكون قاعد في قلبك عليا شي اني ظلمتك وياما آذيتك انتي قلتي سامحتي لكن اني قلبي مازال مش مطمن نبيك تسامحيني من قلبك وتدعي ربي يغفرلي اللي درته معاك سدرة اني في الرساله هادي نبي منك حاجه وبنوصيك بحاجه..
نبيك تعرفي ان اختك طوبى انظلمت اكثر مني ومن بنت عمك اميمه مع عيلة شنيبه انظلمت هلبه ياسدرة تمنيت لو قدرت نوقف معاها بس كنت اعجز من اني ننصرها..لو وصلاتك هالرساله وطوبى مازال ع ذمة الجالي ماتخليهاش تكمل معاه ياسدرة لو قعدت معاه حتكون عيشتها ونهايتها اسوأ من اللي اني ريته بألف مرة...)
غيرت سدرة نظرها للباب وهي مصدومه بقوة وترجف بكل مافيها غضبا وخوفا...
رجعت نظرها للرساله وكملت قرايه..
(ربي ينجيها مسكينه ويخلصها منهم في القريب العاجل..
وتوا ياسدرة بنوصيك وصية تشبه وصيه انتي وصيتهالي مرتين..مرة كانت قبل 18سنه والتانيه من حوالي تلاته شهور..
سدرة..
المهدي ياسدرة..المهدي اللي عمره ماحب في حياته مراة غيرك المهدي من بعدي حيكون بأمس الحاجة ليك زي ماحني تعذبنا هو تعذب راهو واني شاهده ع عذابه..ايه ياسدرة اني نبي ننصفه قدام ربي بعدين قدامك المهدي كان معاي راجل قدرني واحترمني وعاملني بإحسان وحتى لما كان يغلط معاي مايكابرش ع غلطه..يشهد الله عليا عمره ماوجعني بكلمه وقامني في مرضتي هادي ودار معاي شي بوي وخوتي مش حيديرولي ربعه..اني لو بنسيب الدنيا بنرتاح ياسدرة لكن هو شني!؟ بيكمل حياته يعاني فوق مرضه الصغار ومشاكل عيلته اللي ماتخلصش..راهو هو بريء منهم ومن افعالهم هو بالذات بروحه مش زيهم..عنده ضمير مايخليشي يستمر في الغلط ويكابر عليه...
سدرة..بنتي تبي ام كويسه ياسدرة ومش حنلقى وحده تراعيها من بعدي غيرك وولادي حتى هما حيحبوك لان بوهم وامهم يحبوك..وانتي تعوضيهم وهما يعوضوك..
اكيد لو تقري في كلامي توا تسألي نفسك علاش واثقه لهالدرجة اني حيجي يوم ونفيق وتوصلني رسالتها قتلك قبل عنده يقين كبير ان هاليوم حيجي بإذن الله..
اخر كلامي..نتمنى تاخدي بخاطري وديري اللي طلبته منك بش تريحيني في قبري وتدعيلي دوم ياسديرة...
والسلام عليكم ورحمة الله وبركاته)
🍃🍃🍃🍃🍃🍃
وفي هالأثناء...
طلعت طوبى للساحة والقلق والتوتر مسيطرين عليها..
كانت تردد همسا"لاحول ولاقوة الا بالله" وهي تمشي وتمرر في نظرها ع الموجودين في الساحه..
"ابله طوبى"
التفتت لما سمعت وحدة تنادي فيها كانت من ضمن الفريق التطوعي الموجود في المدرسه..
جتها وقفت عليها وهي تقول بإبتسامه..
/وينك وينك عاش من شافك؟
طوبى بإبتسامه؛تسلمي..انشغلت الفترة اللي فاتت..
؛المهم انك بخير وبنوتك حالها باهي؟!
هزت راسها وقالت..
/الحمد لله..
؛اكيد وصلاتك الاخبار عن التبرعات اللي وصلت للناس..
طوبى:ابله نائله تبلغ فيا أول بأول الحمد لله..
:الحمد لله...ع العموم انتي شكلك اليوم جيتي ع خاطر النشاط اللي دايرينه للصغار ورا المدرسه..
طوبى بإستغراب:نشاط!؟
:شكلك ماعندكش علم.. ابله شروق نظمت مسابقات للاطفال وفيها جوائز رمزيه...
طوبى بفضول:الحق ماقالتليش..خل نمشي نشوف..
مشت بإتجاه الساحه الخلفيه والمتطوعه معاها..
كل ماتقرب تسمع في اصوات هتاف الصغار وضحكاتهم ابتسمت من قلبها..
بس لما وصلت ف الساحه الخلفيه وجو عيونها ع عبد القيوم وسلافه وهما واقفين ع السبورة يكتبوا..
تلاشت ابتسامتها والشعور الحلو اللي حساته للحظات اختفي تماما..
وجع القلب اللي حساته وقتها..زي من يحط ع الجرح النازف ملح ويكبس عليه...
معاش شافت غيرهم..غيرها هي اللي كانت تكلم فيه وضحكتها زايده جمال ملامحها..وهواللي كان يكلم فيها صح بدون مايشوفلها لكن ابتسامته باديه ع وجهه..
استاقظت ع اصوات صيحات البنات لما فازت زميلتهم في المسابقه..بعدين سمعت سلافه تقوله..
"ننقاكم عديتوا فيها"..
وهو يضحك كذلك بدون مايشوفلها...
طوبى توا بدت تشوف في الدنيا بلون باهت زي الوان الفصل المحبب ع قلبها..ايه اساسا الفصل توا فصل خريف والجو جو خريف..ولاول مرة طوبى تحس بشي من الكره لهالفصل اللي تعشقه بكل تفاصيله..
ماتحملتش تقعد واقفه تشوفلهم اكثر من هكي..كعادتها جت بتنسحب بهدوء وترجع لوين ماقاعده سدرة..
🍃سلافه وهي تكتب في رقم النقاط ع السبورة قالت..
/على شو تراهنا ذكرني!؟
هو كتب الرقم وقال بإبتسامه
/قاعد عند كلامي..
قعدت تسرقله في نظرات كلها حب واعجاب..
وهوبعد كمل الكتابه جي بيغطي قلم الخطاط..
لكن في لحظه فز قلبه فزة..بانت ع كل شي فيه..
اما هي للحظه حست وكأن سيف خش لوذانها لما سمعت ابله شروق تنادي..
"أستاذة طوبى"
طوبى...قالت طوبى..وهو لما سمع الاسم لهفته بانت كبيره لدرجة لاتوصف..فزته وكأنه في صعق كهربائي صابه التفت بسرعه بلهفته وكأنه يسابق في الوقت..
نظرات عيونه لما جو عليها..كانوا يحكوا بروحهم..نظرات تتكلم كلام..وتغزل غزل في الحب والشوق باين فيها..
بدقات قلب سريعه موجعه..التفتت سلافه تشوف طوبى..
الاسم اللي ياما ارق تفكيرها..واخيرا شافت صاحبته..
لكن لما شافتها انصدمت وين عرفت انها مش المرة الاولى اللي تشوفها فيها..
🌼وهو اللي كان غارق في غرامها وبيموت من شوقه ليها..
ماكانش متمني يرمش ولو لثانيه..
يشوف فيها كيف ضحكت ضحكتها اللي في نظره مافيش بحلاوتها ولطافتها...هي في عيونه زي الشمس اللي تشرق وين تضحك...
ضحكتها كان سببها الصغار اللي جوها يجروا واكثرهم البنات..
قعدوا يسلموا عليها وهي تصافح فيهم وتسأل عن احوالهم بأسلوب طفولي حلو..
وحده من البنات طلبت منها تنزل بش تحضنها..وهي خجلا طبست وضمتها..
وعيون الموجودين عليها..ومنهم اميمه وهناء..
:علاش معاش جيتي..
طوبى:ماكنتش فاضيه حبيبتي..
وحده تانيه قالتلها..
/رسمت هلبه رسمات نبيك تشوفيهم..
طوبى بإبتسامه:حاضر حاضر..
وحده تانيه قالت..
/ماما جابت بيبي ياابله..
ضحكوا..وهي قالت بضحكه..
/الله! خلاص بعدين ارفعيني لماما بش نشوفه..
ابله شروق بإبتسامه..
/مفاجأه!
طوبى بإبتسامه..
/المفاجأت عندك انتي..مررت نظرها ع المكان وهي تتجنب تشوف لسلافه وعبد القيوم وقالت..ماخبرتنيش..
شروق:كله صار امس ع السريع،مخطط ليه من قبل بس التنفيد صار فجاه..
طوبى بإبتسامه:ع العموم فكرة حلوة هلبه ربي يجعلها في ميزان حسناتك..
واحد من جماعه الفريق التطوعي كان حاضر عيونه مانزلهمش من عليها نفسه اللي عبد القيوم ركز عليه قبل..
قدملها وقال..
/عاش من شافك استاذه..
تبدلت ملامح وجهها للجديه وقالت..
/شكرا..نستأذن ابله شروق بنمشي نشوف اختي سدرة..
هي بدهشه:استاذة سدرة هني!؟
ابتسمت وقالت:كملوا شغلكم بعدين تعالي لمكتب الاداره..
شافت للصغار وقالت..بروا كملوا هي..بعدين نتلاقوا..سلام..
ومشت طول...والعيون معاها..
واميمه استاذنت من هناء ولحقتها طول...
🍃"بيبو"
شافت جنبها وهي متفاجئة قالت..
/ميمو هني اليوم!؟
اميمه بضحكه:ايه..ماقلتيش بتجي..
تنهدت وقالت..
/والله ماجي في بالي نخبر حد عقلي مش معاي..
اميمه؛علاش شن صار تاني!؟
طوبى بضيق:سدرة جت معاي وخشت لحجرة المكتب وطلعتني مش عارفه شن ناويه دير..
اميمه بشي من القلق..
/هي من هداكا اليوم موليه غريبه..
طوبى بقلق:هلبه يااميمه هلبه..ان شاء الله خير..ان شاء الله..
ماشيتلها نشوفها..
اميمه شافت القدام ضيقت عيونها وقالت..
/اهيا جايه..
وقفوا الزوز وهما يشوفوا فيها جايتهم..
وصلت فيهم وقالت..
/الزوز تعالوا وراي..
مشت قدامهم..وهما بعد ماشافوا لبعض بقلق واستغراب لحقوها...
🍃وعبد القيوم اللي ماتعودش يخلي شي بدي فيه فنصه قعد يكمل في المسابقه وعقله مش معاه..
وسلافه جنبه انطفت مرة وحده..كانت تبي تروح لكن ماقدرتش..
🍃🍃🍃🍃
وصلوا في مكان مستخطي وقفت والتفتت..
وهما وقفوا قدامها..
سدرة بحزم:اني اليوم مش طالعه من هني قبل لنعرف اللي صار بينك وبين الجالي بالتفاصيل..التفاصيل اللي مابتيش تحكيها..
نظرات طوبى ليها كانت نظرات ضيق وحزن..من داخل كانت تتوجع وتوا وجعها زاد لما فكرت بأسوأ مرحلة في حياتها حتى الآن..
تنفست سدرة بعصبيه ومررت نظرها بيناتهم وهي تقول..
/وحده فيكم تتكلم..
غيرت طوبى نظرها عنها..ماكانتش قادره تحكي في الموضوع هدا..ماتحبش تتكلم فيه اصلا بش ماتتفكرش اللي صار فيها..
وفي نفس الوقت ندمت اشد الندم اللي ماقدرتش تتحكم في نفسها في اخر نقاش صار بينهم وقالت كلام خلا اختها تتأكد انها مدرقه عليها هلبه حاجات تخص زواجها وطلاقها..
اميمه فهمت عليها وحست بيها لهذا قالت لسدرة..
/تو نحكيلك اني..
انتبهت معاها سدرة..واميمه بدت تحكي...
تكلمت في البدايه عن اللي شافاته وعرفاته وحكت بإختصار عن مواجهتها معاهم..بعدين حكت ع اللي صار مع طوبى كذلك بإختصار..يعني عطت سدرة الزبده..
وسدرة تسمع بصدمة وغضب شديدين..غيرت نظرها لطوبى لقتها لافه وجهها يمينها باديه ع وجهها ملامح المكابرة ودمعتها حابستها في محجر عينها..
اميمه:الطلاق ماكانش بالساهل هداكا ماطل هلبه وياما دار..
سدرة وهي تشوف لطوبى بألم وصدمه..
/شن دار!!؟ تكلمي انتي نبي نسمع منك!؟
شافتلها طوبى وقالت بحده ونبرة باكيه..
/مانبيش نتكلم مانبيش..ماعنديش جهد ياسدرة..
الجمله الاخيره ونبرة الوجع اللي انقالت بيها كانت كفيله تخلي سدرة تعرف شن شافت اختها مع الجالي وشن داروا فيها عيلته..
غمضت عيونها بألم..مسحت بإيديها ع وجهها بعدين قالت..
/كله مني اني..اني..مفروض ماخليتكش تتزوجي الا بعد ماتتخرجي..اصلا..مفروض ماخليتكش تتزوجي بكل..مافيش راجل يستاهلك انتي مافيش..
نزلوا دموعها وحطت ايديها ع وجهها وقعدت تبكي..
اميمه كانت تشوفلها بحزن..
وطوبى نزلت ايديها عن وجهها وقالت..
/سدرة اللي صار معاي مقدر ومكتوب بيك وبلاك كان حيصير معاي ونعيشه..ارجوك افهمي الحاجه هادي وخليها ديما في بالك..انت مش مسؤوله عن اي شي صار لحد حواليك فاهمه..
شدت سدرة ايديها الزوز وهي تشوفلها بحزن وألم ودموعها تنزل..
طوبى برجاء:بالله عليك معاش تبكي..
سدرة خدت نفس ومسحت دموعها بيد وحده..فجأة ضحكت بتهكم وقالت..كانت واضحه من الاول غير اني كنت مغفله لما جاك موضوع خطوبه من طرف فايزة خبرت بيه نسرين ع طول جو امها واختها يخطبوا..ويقولوا هو يبيها..اني عمري مالاحظت حاجه زي هادي عليه بكل..
اميمه وطوبى وهما يسمعوا فيها بدت ع وجوههم ملامح الدهشة..
شافتها...مسحت دمعه حاصله في عينها وهي تقول /تفكرت حاجات صارت الفترة هديكا..
طوبى بصدمه..
/علاش ماقلتيش!؟
سدرة:هاني قلت..لكن تعرفوا طلع اللي رايح من ذاكرتي الفترة هديكا مايجي شي قدام اللي صار واني مش معاكم..
غيرت طوبى نظرها عنها وتنهدت بضيق..
اميمه:المهم توا افتكت منه وبنتها عندها هي ومايقدرش يشوفها الا برغبتها هي..
طوبى؛هو هدا..ولاني اول ولااخر وحده يصير فيها هكي ياما صار فيهم احرف من هكي مليون مرة..
نظره عيون سدرة تبدلت للحب والدموع مغرقتهم..مسحت بيدها ع خد طوبى وقالت..
/والله هالوجيه العسل مافي راجل يستاهله..
ضحكت طوبى من بين دموعها..واميمه ابتسمت لضحكتها بعدين قالت..اني توا لازم نولي للمصحة ماتبوا شي!؟
سدرة؛زينه..
طوبى:في أمان الله..
مسحت اميمه بيدها ع ذراع طوبى ومشت..
سدرة؛مازال عندك شي هني!؟
طوبى:ايه..لكن قوليلي شن كنتي ديري في المكتب..كلمتي حد!؟
حركت راسها بالنفي وقالت..
/قريت رسالة عيشه..
طوبى وهي متفاجئه..
/كتبت عليا حاجه!؟
هزت راسها بإيجاب..
طوبى؛كنتي متوقعه انها كاتبه عني شي!؟
سدرة:نهائي..اني حسيت روحي نبي نقراها مابيتش نقراها في الحوش..
طوبى:علاش!؟
سدرة بضيق:مش عارفه..حسيت روحي نبي نقراها برا الحوش..
طوبى:باهي..شن كاتبه تاني..
بضيق قالت:شي كلام وداع وخلاص..بلعت ريقها وقالت..الله يرحمها ويغفرلها..
طوبى:اللهم آمين..
غيرت سدرة نظرها عنها ثبتاته في جهة معينه وقالت..
/علاش سكرتي المدرسه قولي الحق هو خلاك تسكريها!
طوبى؛لا والله..تنهدت بضيق وقالت..صارت مشكله كبيره بالسلاح لولا الله ثم عبد الرؤوف راجل غرفه الله اعلم شن صار فينا..قريب راحت فيها ارواح منهم جارنا التارقي..ودمعوا عيونها..
سدرة بفجعه؛غبارة!! علاش باهي!؟
خدت نفس وقالت..
/راجل وحده من الابلات بيناتهم مشاكل وين طلبت الطلاق تهجم عليها هني..
حطت سدرة يدها ع فمها وهي تشوف لنفس الجهه..بعدين نزلتها وقالت..
/لاحول ولاقوة الا بالله..شويه عقدت حواجبها وقالت..التارقي هدا شكله وقف معاكم وقفات صح جدي يحبه هلبه ويقدره
طوبى وهي تحاول تخفي حزنها..
/ايه بارك الله فيه..
سدرة:تفكرت لما مرة رفع معاه بوي بش يخطبله وردوه..اهو ربي عوضه ومش أي عوض..الله يبارك..
التفتت طوبى شافت وين ماتشبح..
لقاته ماشي مع سلافه بإتجاة بوابه المدرسه وهما يهدرزوا..
طوبى وقتها كانت حاسه بمزيج من المشاعر المؤلمه..
غيرة..احباط..يأس..حزن..حسرة..
سدرة بضحكه:تنسيه اسمه هادي مش غير البنت اللي رداته..سوريه ياحنة سوريه..شافت لطوبى وقالت..دهوري بيا في المدرسه..
غيرت طوبى نظرها عن البوابه ودموعها معبيات عيونها وقالت.
/هي تعالي..
شدت يد اختها ومشوا مع بعض...
🍃وعبد القيوم بعد ماطلعت سلافه ولى خش داخل مرة تانيه..شافهم ماشيات مع بعض ابتسم من قلبه اللي كان يرجف وسط ضلوعه..
قعد معاهم بعيونه لين درقوا عنه..تنهد تنهيده طلعت من الأعماق بعدين رجع للمكان اللي فيه الصغار..
لكن وهو ماشي اعترض طريقه شخص وقال..
/معليشي نبيك في حاجه..
عقد حواجبه وقال..
/نسمع فيك..
🍃ومناسك تسمع من فوزيه اللي صار فيها لما عرفت بوفاة مالك..
بنبرة ألم وصوت مبحوح..
/قلبت عليهم الدنيا قلتلهم ترفعوني نعزي ولا والله نقتل روحي..ببكاء قالت..مش ساد حرموني منه حي..حطت يدها ع صدرها وقالت..ناره نار يابنتي مش قادرة نصدق..ملوكه وليدي حبيبي..ضمت مناسك بقوة لحضنها وقعدت تبكي بألم ومناسك تبكي معاها..
فجأه جي اتصال لتليفون فوزيه بنبرة مخنوقه قالت كلام تقصد بيه المتصل اللي كان خوها...
/حسبي الله ونعم الوكيل فيكم حتى انتم..
تباعدت مناسك وهي تقول..
/بتروحي!؟
فوزيه بألم:غصب عني الله غالب..ناضت وهي تقول..امك شن صار فيها!؟
ابتسمت تهكما وقالت..
/ماريتهاش كان اول يوم جت نزلت دمعتين وروحت..
حركت فوزيه راسها يمين ويسار اسفا..بعدين ضمت مناسك..طبعت قبل ع راسها وخدودها وقالت..
/كلميني ولما نتصل بيك ردي باهي حبيبتي!؟
مناسك بنبرة باكيه..
/باهي..
مشت طول فوزيه طلعت من دار مروة وخلت مناسك منهارة بالبكي ومروة خشتلها..
اما هي ماطلعتش من شقه قبل لتوصي فايزة عليها..
طلعت ودموعها ع خدها ورافعه في قلبها حسره حتقعد فيه لأخر العمر...
☘☘☘☘☘
دارت طوبى جوله بأختها في المدرسه..
اللي شافاته سدرة وجع قلبها اكثر ماهو موجوع بس حاولت طول الوقت تخفي نظرة الشفقة والالم بإبتسامه حلوة ع وجهها..وكانت فرحانه بطوبى اللي دارت عمل هالخير اللي حيلحقها منه اجر عظيم..
بعد ماكملوا جولتهم كانوا خلاص بيروحوا..
لكن وهما متواجهات للبوابه وقفوا لما نادى التارقي..
"اختي سدرة"
طوبى التفتت غصب عنها..اما سدرة لما التفتت وشافاته ابتسمت..
هو وقف عليهم بمسافه مناسبه وحط ايديه ورا ظهره وقال.
/السلام عليكم..
ردوا عليه السلام..وطوبى ماتبيش تغلط وتشوف منه حتى لمحه..
هو قال؛اول شي حمد لله ع سلامتك..
هي قالت:الله يسلمك..خليني نسبقك ونقولك بارك الله فيك وربي يسخرلك الناس اللي زيك ع اللي درته معانا كلهم شهدوا في حقك شهادات خلتني نحترمك ونقدرك هلبه..بارك الله فيك.. كلامها فرحه لدرجة حس وكأنهم عطوه طوبى..
ابتسم بإحراج وقال..
/بارك الله فيك..الحق مش عارف شن نقولك ..لكن عيلة الواعر عندي في مكانة عيلتي والحاج لطفي الله يرحمه جمايله سابقه..
سدرة هزت راسها وقالت..
/الله يرحمه ويغفرله ويجعل مكانه الجنه..
طوبى همسا قالت؛امين..
وهو آمن معاها ويدوب سرقلها نظره بعدين شاف لسدرة بدون مايديم النظر وقال..
/بكري وقفني واحد صاحب عيله من اللي قاعدين هنا طلب نديروا خزان تاني فوق سطوح المدرسه...قال الميه تكمل فيسع وتقعد فترة ع ماترجع تملا الخزان..
سدرة شافت لطوبى..
طوبى وهي عاقده حواجبها بدون ماتشوفله قالت..
/الموضوع هدا تكلم فيه مع استاذ فتحي هو المسؤول عن الحاجات هادي واني عاطياته صلاحيات..
استغربت سدرة اسلوب طوبى حستها مش قابلاته..
هو هز راسه وقال..
/عارف..قلت نعطيكم علم..
طوبى..
"خوي عبد القيوم"
/ اي شي تشوفه مناسب للناس هني ديره بدون ماترجعلي..وتوا عطينا الاذن معليشي..
سدرة انحرجت شويه من اسلوب اختها وقالت..
/ربي يفتح عليك..ومشت وطوبى معاها وفاتوا من حداه..
هو قعد معاهم بعيونه لين طلعوا..ابتسم بعدين مشي يدور ع الاستاذ فتحي..
🍃برا..
ركبوا السيارة وسدرة قالت..
/علاش كلمتيه هكي!؟
طوبى بمكابرة مغلفه بالجديه..
/نحط في حدود بيني وبينه مش كل شويه يوقفني ع الفاضيه والمليانه..
سدرة ابتسمت بدون ماتعلق..فهمت ان وضع اختها حاليا يمنعها من التعامل مع الرجاله لغير الضرورة..
وهو هكي فعلا عند طوبى لكن اللي زاد حدة نبرتها هو الغيره اللي كانت تاكل في قلبها...
🍃🍃🍃🍃🍃
الساعه 5:00عصرا..
وفي مكان تجمع شباب الشارع بعد العصر..
قوة نضال المعروفه بإسم الزعيم..
كان ربيع مقعمز يراجي في عبد القيوم...
ونضال واقف قدام باب القهوة يتفرج ع اخبار الرياضه..
شويه وسمع حد ينادي..
"شيخ نضال"..
التفت وشاف امام وخطيب الجامع متاعهم جاي للقهوة..
ابتسم وقال..
/شيخنا..
فهاللحظه طلعت اريج من حوش طوبى ومشت للمحل..
شافها نضال وفيسع غير نظره عنها للشيخ اللي جاه..
في نفس اللحظه تطلع حواء من حوش سدرة وتوجهت للمحل حتى هي..يدوب لمحها الشيخ ابتسم ابتسامه خفيفه ووقف ع نضال صافحه وقال..
/السلام عليكم..
نضال:وعليكم السلام..آنست..
:بوجودك حبيبي..
نضال؛تفضل قعمز..
:لالاهكي مرتاح..ممكن نطلعوا من هني..
نضال:ع راحتك..تفضل..واشرله بيده القدام..
طلعوا من القهوة ووقفوا بالقرب منها..
نضال؛خير ان شاء الله..
؛بإذن الله خير..الموضوع اللي نبيك فيه خير..ونشوف فيه باب عظيم لأجر عظيم..
نضال؛هات اللي عندك ياشيخنا..
حط ايديه في جيوبه وقال..
/زي ماتعرف اني تزوجت قبل وكانت تجربه غير موفقه..وتوا ناوي نتزوج مرة تانيه واظن اني احسنت الاختيار..
نضال بإبتسامه؛باهي ربي يبارك ويهني ويتمم ع خير..
:والله ياخوي يانضال مش حيصير هدا كله قبل مساعدتك..اللي ناوي نخطبها من شارعكم تسكن في الحوش المقابل لقهوتك لمحتها قبل شويه طالعه لمحل الحلويات اظن انها تخدم فيه كدا مرة جيتك هني ولمحتها تمشي عليه وتجي..
ولعت في نضال نار من اسفل رجليه لأعلى راسه قاله بشي من الانفعال والتوتر..
/من هي!!؟..قصدي بنت مني!؟
رد عليه يقول..
/هي تقريبا مش من اهل الشارع القدم لما سألت قالوا نازحه بصغارها ..
ابتسم نضال براحه وقال..
/قول هكي من الاول..عرفت ع من تحكي خلاص موضوعك عندي..لكن قبلها بنسألك انت عندك خلفيه عن وضعها تعرف قصتها!؟.
:ايه نعرف كل شي عنها..وقتلك اني نبي نفتح لنفسي باب اجر عظيم...
نضال:تمام..راجي مني الرد في القريب العاجل بإذن الله..
:إن شاء الله..
"السلام عليكم"
ردوا الزوز السلام ع التارقي وهو فايت من حداهم متوجه للقهوه..
خشلها وسلم ع الموجودين..وصل في ربيع صافحه وقعمز قدامه...
ربيع:واخيرا شفنا زولك ياباشا!
عبد القيوم بضحكه:شن جو؟!
ربيع:شكلك رايق..
ابتسم وقال؛شربت حاجه؟!
ربيع:نراجي فيك..
☘طلب عبد القيوم زوز قهوة عربيه وبدي يحكي لربيع اللي صار اليوم..
عبد القيوم؛انا والله ماكنت نبي نعدي غير فات فيا وعطيت كلمة..
ربيع:يعني عادي عندك تشوفك مرة تانيه معاها!؟
عبد القيوم؛لازم يكون عادي نبيها تفهم ان الوضع طبيعي جدا مش زي ماهي فاهمه..
ربيع:شن تقول انت!!؟ قصدك انت عادي عندك هي دير نفس الشي!..
عقد حواجبه وقال..
/هكي فهمتها انت!؟
ربيع:عزيزي..كان هي حق فيها شي ناحيتك حاجه زي هادي مستحيل تتحملها مهما كانت نيتك..مافي مراة تتحمل حاجة زي هادي اساسا..
عبد القيوم؛كنك انت!؟ اللي يسمعك يقول دايرها صاحبتي علاقتي بيها فيها حدود معينه..لافي بينا اتصالات ولا رسايل ولا مواعيد..طبيعة لقائتنا مربوطه بالجمعيه ولا بالمدرسه وبعدين القدام ان شاء الله ناوي نفتح معهد يعطي دورات لخط العربي وسلافه حتكون معاي فيه..
ربيع:لاانت مش فارقه معاك الحكايه بكل..من الاخير عبدو انت شن تبي..!؟
عبد القيوم بصدمه..
/ربيع كنك اليوم مش طبيعي بكل!؟.
ربيع بضيق:اسمع خودها مني نصيحه زيد فكر في الموضوع ودور ع مصلحتك حكايتك مع بنتك الواعر نهايتها واضحه فوق وضعها خوها الميكافيلي صدقني ماجايك من وراها خير..
عبد القيوم حاليا وصل لأقصى مراحل الغضب وبش مايزعلش صاحبه قرر ينوض ويخليه..لكن ربيع سبقه وشده وهو يقول..والله مانك نايض..
تنفس بعصبيه بعدين قعمز وقال بجديه وتحذير..
/تعاود اللي قلته مرة تانية نزعلك واجد ياربيع..
رفع ربيع ايديه قدام صدره وهو يقول..
/تمام تمام..نزلهم وقال..المهم توا في موضوع مهم نبي ندوي معاك فيه..الجالي..
زاد غضبه وشد ع قبضه يده بقوة..
ربيع؛طلب يكون المكان اللي يشوف فيه بنته الحوش اللي قاعده فيه اخته زوجتي..يعني في شقتك..
رمش بسرعه مرتين ورا بعض وقعد يشوف لربيع بدون مايتكلم..
ربيع:هي معاش تبي تبعت البنت لحوش جدها بعد ماروحت مرت بوها..قالت نخليه يشوفها لكن في مكان محايد وهو اختاره..
مرر نظره القدام وهو يفكر..غير نظره لحوشها..بعدين قام عيونه..وتبان عليه وهي تنشر في بطانيه..
عقد حواجبه بغضب وغيره..وقعدوا عيونه معاها لين مشت شافت لربيع وقال..
/ماعنديش مشكله دام هذى اللي يريحها..
ربيع هز راسه وقعد ساكت...
☘خوفه عليه من مختار وزياده الجالي اللي ماقدرش يرتاحله خلاه يفكر ان بعده عنها افضله..وحاليا بدي مقتنع بهالشي قناعة تامه وغالبا حيساعد عليه☘
#كانون_الاول
#طوبى
...يتبع....
