#طوبى "جنة طوبى"
#جمان_فريد
#الجزء_118"معركة ضد القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
قالﷺ:
من قال: لا إله إلا الله وحده لاشريك له،له الملك وله الحمد وهو على كل شيء قدير في يوم مائة مرة كانت له عدل عشر رقاب وكتبت له مائة حسنة ومحيت عنه مائة سيئة وكانت له حرزا من الشيطان يومه ذلك حتى يمسي ولم يأت أحد بأفضل مما جاء به إلا رجل عمل أكثر منه. او كماقال .صلى الله عليه وسلم
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃الاتعلم ياعزيز القلب أن معية الله جيش لايهزم!؟🍃
_________________________________________
الساعه 9:30ليلا..
واقفه قدام مظلة الكرمة متاع العنب شادة في يدها هاتفها حاطه ع الفيس بوك كانت تشوف في منشور مكتوب فيه
الاعلان عن بداية الشهر العربي التاني لسنة1442 "صفر" واللي حيكون اول ايامه الجمعه يعني غدوة..
وهي تشوف لمظلة الكرمة كانت تتفكر في هديكا الليله السودا..تتفكر لما طلعت وشافت طوبى وهي معلقه فيها..وتتخيل..تتخيل شن كان صار لو مافاقتش هديكا اللحظه وشافتها.!
غمضت عيونها اللي نزلوا دموعهم وهي تقول..
/اعوذ بالله من الشيطان الرجيم..
☘وبعيد عنها شويه..
داخل الحوش في دار المعيشه..
كانوا بنات اختها مقعمزات مع الصغار يهدرزوا عليها..
آلاء:يجنن يااريج طول بعرض وجميل هلبه وشخصيه وحسيته معجب بخالتي..
اريج بمفاجأه:جديات!
آلاء:والله العظيم شبحاته ليها وطريقة كلامه معاها تقول هكي حتى فايزة لاحظت وحاسه خالتي لاحظاته حتى هي لكن طنشت..
اريج بضحكه:عليك جو..مالا كان نقولك ع المعجب التاني شن تقولي..
الاء بدهشه فضول..
/تي قولي مني!؟
اريج وهي تضحك..
/امسكي اعصابك..استعدي..استقبلي..حسين..
الاء بصدمه..
/حسين!؟ حسين حسين نفسه خالي حسين ولد عم امنا؟
اريج بضحكه:ايه ياهبله..
الاء ضحكت بصدمه وقالت..
/كيف وامتي!؟
اريج:كيف وامتى مانعرفش لكن تصرفاته وكلامه معاها تغيروا معاش زي زمان بكل..تعرفي ولى يجي هلبه هني ويدخل فيها هلبه ويغار عليها..
الاء:غير راجي..طبيعي يجي هني ع خاطر الصغار مش قلتوا رؤوف الله يرحمه وصاه عليهم ومن غير شي هو يحبهم..وحكاية الغيرة هادي عنده من زمان غيور بزياده علينا كلنا نسيتي خطيبته مسكينه شن كان داير فيها وهولايحبها ولايبيها..
اريج حركت راسها بالنفي وهي تقول..
/تؤ..انتي تو بتقعدي معانا شهر وتشوفي بعيونك، مش زي مايحكولك زي ماتشوفي..
غيرت آلاء نظرها لولدها اللي كان يلعب بالشكشاكه وهي تفكر في كلام اختها..
🍃ومن قدام باب الدار اللي هما فيها فاتت امهم وهي متوجهه لباب الحوش..
لفت وشاحها اللي كانت حطاته ع راسها حوالين رقبتها..لبست شبشبها وطلعت لدار الدروج..فتحت الباب بهدوء بعدين خشت وسكراته بهدوء ومشت ركبت مع الدروج..
وصلت فوق..وتوجهت لدار الخزين خشتلها وسكرت الباب بعدين الروشن ومشت قعمزت ع الكرسي قامت هاتفها وحطت ع رقم معين واتصلت بصاحبه..
☘☘☘
"طوبى"
طلعت من الدار وهي تقاوم في التعب اللي حاساته بعد مااغتسلت..
شافاته واقف في الباب وفي يده صونيه رسمت ع وجهها ابتسامه تخفي بيها تعبها..
وهو قال:جعانه ولا؟
وصلت فيه وهي تشوف للصونيه قالت..
/هلبه..خدتها منه وقالت..امتى طيب مكرونتكم.
بضحكه قال:شويه تانيه..قولي شن صار في الغدا اللي خلتيه..
خدت لحمه كلتها وهي تقول..
/رفعته للبطات..
قعد يضحك شويه عيونه جو ع شي فاجئه قال..
/هذى شن يدير هنا!؟
التفتت طوبى شافت الارنب اللي جاباته معاها ياكل في جزر ابتسمت وقالت..
/جبته معاي يونسني لين تخش..
رفع حاجبه وقال..
/ياعيني واخد مكاني يعني!؟
شافتله بضحكه..
اشر عليه وهو يحرك في يده ويقول..
/جيبيه جيي..نقص علينا لحم
فنصت عيونها وشافت للأرنب وهي تقول..
/ووك عليا!
حط يده في نصه وقال..
/ناقص غير تقولي عدي مع سامي للفندق وخليه معاي الليله..
طوبى بضحكه..
/قلتها بروحك..
هو قعد يشوفلها وهي تشوفله وتضحك فجأة تحرك من مكانه وكأنه بيجري للأرنب هي انفزعت ومشت بسرعه وقفت قدام الأرنب وهي تقول..
/لالا حرام عليك..
لقاته واقف مكانه وهو يشوفلها برفعة حاجب هز راسه وقال..
/خل نطلع للراجل توا وبعدين نحكوا في مصيره..
طوبى بضحكه:ايه برا شوف المكرونه متسهفتلها اكثر من الشوا..
هو قال:كيف صار بدينا نحبوا الجاري!؟
هي قالت:لامكرونه ع الحطب اللي يديروها الرجاله لاتقاوم
برفعة حاجب قال..
/هذى ليش ماخليت سامي يدير فيها شي..
تسارعت دقات قلبها ووجهها ولى احمر..حطت قطعة لحمه في فمها وهي تشوفله..
هو ابتسم ولف مشي طلع من الحوش..
تنهدت من قلبها..نزلت عيونها لما حست بشي يخربش في رجلها لقت الارنب لاصق فيها..
ابتسمت ونزلت ع رووس صباعها وقالتله..
/تو هو يغار منك حق ولاجو وخلاص!؟ بدت ع وجهها ملامح التساؤل وهي تقول.. يغار!؟..الطبيعي الراجل يغير ع مرته يحبها ولامايحبهاش..ابتسمت وقالت..تو اني نغار عليه من كل شي ومن كل حد من كل حاجه تاخد اهتمامه غيري لإني نحبه..تنهدت وقالت..يقولوا الغيرة علامة حب...لكن بعدين اكتشفت انها الكلام مش قاعده...
🍃وخطرت عليها كل المواقف اللي كان يبين فيهم الجالي انه يغار عليها..كان يقول انه يغار عليها حتى من الحيوانات الأليفه اللي كانوا عندها..🍃
ابتسمت تهكما وشافت للأرنب لقاته يشوفلها بنظرة اشبه بنظرة عدم الفهم وكأنها تشوف ع راسه في علامات استفهام..
ضحكت وقالت:فوت فوت..
وتسمع رنين هاتفها اللي كان في الدار..وقفت ع حيلها ومشت والصونيه اللحم في يدها..
وصلت في الدار وخشتلها حطت الصونيه ع الزيانه وخدت الهاتف..بدت ع وجهها ملامح الاستغراب وهي تشوف للرقم الغريب اللي يتصل بيها..قالت..
/مني هدا!؟..
خلاته يتصل لين فصل..عاود مرة تانيه..
هي بشي من القلق:ياربي مني!؟ زعمه خالي..لكن لالا مش رقم دولي..خل نفتح ونشوف مني من غير مانرد..
فتحت الخط وحطت الهاتف ع وذنها..
"الو..طوبى"
توسعوا عيونها بمفاجأه لما سمعت صوت فردوس..
"طوبى..ردي ياطوبى.."
طوبى وهي متفاجئة قالت..
/فردوس!!؟
🍃🍃🍃🍃🍃
"لاالا ماتخبر حد مش وقت زحمة ودوشة"
نضال بضيق:كيف يامهدي كان سمعوا من برا يحرجوا..
المهدي بنفاذ صبر:مش توا يانضال مش توا خل نفسيه اختك ترتاح شويه بش تعرف تقابلهم..
نضال وهو يفكر فكلامه قال..
/عندك حق حتى هما عاد يحبونا هلبه !
تنهد المهدي وقال..
/بنركب للشقه..
نضال؛بتولي للمصحه بعدين؟
المهدي:اكيد..
نضال:كان عمر قاعد راهو مشي مكانك..
المهدي مشي بيتوجه لشقته وهو يقول..
/مش مشكله..
تبعه نضال بنظره وهو ماشي لين درق عن عيونه..نزلهم ليده العاجزة بدت ع وجهه ملامح الحسرة..
رفعها شويه وقعد يحرك في صوابعه..فتحهم وسكرهم اكثر من مرة وهو يقول في نفسه..
"اصبر يانضال اصبر سيورها تولي زي ماكانت"
🍃تولي زي ماكانت..
مش كل شي يرجع زي ماكان..واللي صار بين ربيع ونسرين مش سحابة صيف وتعدي ويرجع بعدها كل شي زي ماكان.
هو توا في حوش اهله خبر امه ع قرار الطلاق من نسرين وامه من فرحتها كادت تزغرد لكن مابتش تبين بالعكس ردة فعلها اثارت استغراب ولدها..
🍃ام ربيع؛كيف صار!؟ مش تبيها وراضي بحياتك معاها؟
هو بتعجب قال..
/توقعتك تفرحي!
ام ربيع؛مش قصة نفرح ولالا اني استغربت فيك انت شن اللي غيرك عليها هكي!
ربيع بإنزعاج:اللي هو يام اللي هو معاش عندي ليها وخلاص..
وهي تتصنع في الاستغراب قالت..
/بينك..حياتك وانت حر فيها..
🍃هدفها من تصنع ردة الفعل هادي محاولة معرفة السبب الحقيقي ورا القرار اللي خداه..يعني تبي تعرف لو في باله الهام ودار هكي ع خاطرها!🍃
وطبعا ماوقفش عندها الخبر..بلغت بيه بناتها كلهم ولما وصل الخبر لسهى فرحت اكثر من خواتها لأنها متأكده ان ربيع عينه ع الهام وعجل بطلاقه من نسرين بسبب تحريضها ليلة امس..
🍃🍃🍃🍃
ومع الساعه الحادية عشر تسقد سامي للفندق اللي بات فيه بعد ماطلع ولى عبد القيوم لمكان حوستهم خدي الماعين وغسلهم في الحوض الخارجي وخلا طنجرة المكرونه تتنفع في ميه..
بعدين خش للحوش لقي طوبى مقعمزة ع كنبة الصالون تقرا في القرآن والارنب جنبها..ابتسم من قلبه وكمل طريقه لداره بش ياخد منها حوايج للدوش..
☘☘☘☘☘
بعد الدوش طلع للصالون وهو جاي ناحيته شاف طوبى حاطه الارنب ع رجليها وتمسح عليه..
قعمز جنبها فرد ذراعه ع ظهر الكنبه وحط ع رجل ع رجل وقال..
/مطول هنا الاخ...
طوبى بضحكه:والله يهبل خليه..
هو قال:عاد انتي ماعندك الروح مع الحيوانات الأليفه..
طوبى بإبتسامه:لطافة الدنيا كلها فيهم..
ابتسم وقال:كان كبدتي عليه هكي اكيد درتيله اسم..
طوبى:ايه..لأنه ونسني وانت برا سميته ونوسي..
رفع حواجبه وقال بتمديد الواو اللي قبل السين
/ونوسك!؟
طوبى:حلو ولا؟
بإمتعاض قال:لامعليش مش لايق عليه عندي اسم خير منه..
عقدت حواجبها بإستغراب وقالت..
/قوله ترا!
هو قال؛قوبعه..
طوبى ضيقت عيونها وقالت..
/قو..شني!؟ تارقي هدا!؟
هو قال بتساؤل:كيف مش متبعه شط الحريه رمضان اللي فات؟
طوبى:سامعه بيه لكن ماتبعتاش..
عبد القيوم:ياستي قوبعه هذى واحد من الشخصيات في المسلسل يشبه لهذى..واشر ع الارنب..
طوبى بضحكه قالت..
/استغفر الله كيف تشبه حيوان ببنادم..
هو قال؛مش نشبهوا في البنادم السمح بالغزال مش حيوان حتى هو!؟
ضحكت وقالت..
/انت تشبه بهزوة ..
عبد القيوم:لاوالله ماهزوة بنهزا ع خلق الله استغفر الله العظيم بس والله فيه منه..حط يده في جيبه وطلع هاتفه وقال..غير ارجي شوي..
طوبى قعدت تشوفله وتضحك وهي تمسح ع ظهر الارنب اللي راقد ع رجليها..
مدلها عبد القيوم الهاتف وقال...
/هاه بحتي..بحتي زين وقارني..
شافت طوبى للصورة وقالت بضحكه..
/حرام عليك عبد القيوم استغفر ربك..ودفت يده اللي فيها الهاتف..
هو شاف للارنب وقال..
/مامسميه الا قوبعه..
طوبى:ونوسي يعني ونوسي..
حط الهاتف في جيبه وقال..
/اخرته في طنجرة مكرونه مبكبكه..
طوبى نزلت ع الارنب ضماته وقالت..
/لالا انت حطيته في راسك خلاص تو نخليه معاي ف دار يبات فيها..
رفع حواجبه تعجبا وقعد لحيته وهو يشوفلها..
هي ضحكت وقالت..
/هكي زمان كنت ندير نبيت فيهم جنبي قطاطيس وفكارين..
هز راسه بصمت ومرر نظره ع المكان ومازال يحك في لحيته ..
اما طوبى تباعدت عن الارنب وقعدت تشوفله وتسمح ع ظهره..خطرت عليها بينكا وايامها معاها عيونها دمعوا...
غيرت نظرها لعبد القيوم لما سمعاته قال..
/الدنيا حظوظ..تلقي الواحد بيش يوصل في حاجه متمنيها طول عمره يدير اللي مايندار ولما خلاص بيوصل فيها يجي حد مخطم بالصدفه ياخدها ع بارد ..وشاف للأرنب بطرف عينه وكمل يقول ببيت شعر..
حظي دون الناس خباره .. معمي مفقوصات انظاره..
طوبى بضحكه:خيرك اليوم شن جاك تقول في كلام غلط في غلط..شكلك بديت تطلع ع حقيقتك..
رد عليها يقول..
/حقيقتي!؟ والله مازال ماشفتي منها حاجه حقيقتي هذي..
طوبى بضحكه خوف..
/ماتخوفنيش..
تنهد وقال:نا يخافوا عليا مايخافوا مني..
قالتله:شكلك كليت لحم هلبه..
هو هز راسه وقال..
/اها واجد مرات توعي الصبح تلقيني منجلط..
هي بخوف قالت..
/اعوذ بالله..بعيد السو..معاش تقول الدوة هادي..
هو لما شاف في عيونها لمعة دمعة وخوف قال بضحكه..
/اسف..غير قلت نضحك معاك شويه..
طوبى بضيق:ربي يهديك..الا ع سيرة الجلطه بكري سدرة كلمتني وقالتلي الحاج محمد شنيبه جاته جلطه..
هو قال بصدمه وأسف..
/لاحول ولاقوة الا بالله!
طوبى:والسبب اللي صار لبنته نسرين..
عقد عبد القيوم حواجبه بضيق..
قالتله:عندك علم باللي داره ربيع؟
هز راسه وقال:قالي سامي..
طوبى بضيق:حق حاط عينه ع وحده تانيه؟
هو قال؛بصدق مش عارف لكن سامي قال هكي الباين..
غيرت نظرها للارنب وهي تقول بحزن..
/برغم كل شي جاني منها وجعتني..عاشت حياة كلها اهانه مع راجلها الاول كان يخون فيها ع الملأ الناس كانت تجيبلها في اخبار علاقاته مع النساوين،اطلقت منه بصعوبه حتى هي..تنهدت وكملت تقول..سمعت بعدين بقصتها مع ربيع وكيف خداها وكيف كان يعامل فيها كلنا قلنا ربي عوضها بيه وفي الاخير يطلع ضربتها التانيه ع راسها ومرات هالضربه اقوى بهلبه..بعد مارفعها فوق رخي بيها وخليها طيح وتنكسر رقبتها..كبير عشم المراة في الراجل اللي تحبه واعر خذلانه ليها بعدين واعر هلبه...تنهدت وقالت..صدقت سدرة لما قالت المراة مفروض ماتعطيش امانها كله للراجل..
هو اللي كان يسمع في كلامها اللي وجع قلبه لما حسها وكأنها تتكلم ع نفسها وين سمع اخر جمله قال..
/قصدك هي لعند توا مش عاطيه امانها للمهدي!؟
شافتله وقالت بحزن..
/من اللي داره فيها..مش شويه بكل يا عبد القيوم ممكن ماكنتش واعية وقتها بس ملامح الحزن اللي قعدوا ع وجه اختي عمرها كله هما اللي خبروني..
عبد القيوم؛هذى ماضي وعدى ع حاله قولي لاختك ماتظلمش راجل هي تعرف كويس انه يحبها اكثر من روحه ومستعد ع شانها يدير كل شي..
ابتسمت تهكما وشافت للارنب بصمت..
عبد القيوم؛مش مقتنعه!
طوبى:لأن الدوة هادي معاش ولت مقنعه بالنسبه ليا الحب مش دوة بس ولاحركات ولاتصرفات رومانسيه ولاكلام حلو..الحب يبان وقت الشده..اللي يحبك يوقف معاك مش ضدك..يسندك مهما يصير معاك يقعد وراك مايقولش تعبت ولامليت ولامعاش نقدر..مايجيش يوم يمن ع اللي يحبه بوقفته معاه وباللي داره ع خاطره..مهما يصير بيناتهم من خلافات مايجيش لمكان جرح اللي يحبه ويشد عليه بش يوجعه...عشت سنين من عمري ندور ع معنى الحب وشن هو الحب وبعد اللي ريته واللي مريت بيه واللي مروا بيه الناس القراب عليا عرفت ان الحب عطاء..عطاء مالاش حد..لاظرف ولاوقت ولامكان...
ابتسم وقال؛صح الحب افعال..
شافتله وقالت:خلاص بنرقد..ناضت بالارنب وقدمتله مدتهوله وقالت..حطه في صندوق وخليه في الصاله..
خداه منها وهو يشوفلها وهي كانت تشوف للأرنب بعدين شافتله وقالت..
/تصبح ع خير..ومشت بإتجاه الدار وهو معاها بعيونه لين خشت وسكرت الباب..
غير نظره ع الباب وقعد يفكر في كلامها..ناض من مكانه ومشي يدور ع شي يحط فيه الارنب لين لقي صندوق مناسب ليه حطه فيه وخلاه في الصاله..
بعدين مشي تمدد ع الكنبه..هدا كله وعقله مابطلش تفكير في كلامها..
🍃اما هي بعد مادهنت بزيت الزيتون المرقي..
خشت السرير والمصحف في يدها..دعت بالإستعاذة بعدين فتحت المصحف وكملت قرايه سورة البقرة اللي كانت مقسمتها خمسة اقسام في اليوم..
بعد ماكملتها قرت سورة الملك..
اول ماكملت حطت المصحف ع الكامدينو جنبها وخدت شيشة مية الرقيه شربتها بعدين تمددت ع جنبها الايمن قرت اذكارها وراحت في النوم..
🍃وتعدي ساعه واتنين وفي نص الثالثه تفيق فجأة وكأن حد فيقها..
اول مافتحت عيونها..خيللها انها شافت نجوم وكلمات تشبه الطلاسم جنب هالنجوم..وفجأة يطلع في وجهها شكل مخيف فجعها وخلاها تعيط ع طول حسها..
🍃فز عبد القيوم من عز نومه وفي لمح البصر كان قدام باب الدار كيف جاي بيفتحه انفتح وطلعت طوبى وهي تجري وتعيط وكأن في حد يجري وراها وهو يلحق فيها وينادي..
/طوبى..
هي ابدا ماكانتش بوعيها تعيط عليه.وتقول..
/حول عليا برا عليا..
وخشت للكوجينه شدها عبد القيوم قعدت تضرب فيه بقوة وتعيط زي المجنونه..
وهو يتلقى في الضرب ويزيد يضم فيها وبدي يقرا في آية الكرسي..قري اول جزء منها مرارا وتكرارا وطوبى تبكي بالعبرة وترعش بين ايديه مع بعضها لعند ماخف صوتها واغمى عليها..
🍃🍃🍃
فتحت عيونها بتعب..شافت نفس الملامح المرعبه لثانيه واختفت..
"طوبى"
فزت بخوف شديد وخشت في حضنه وهي تقول برجفه..
/واحد شكله يخوف..شكله يخوف طلع في وجهي وقعد يجري وراي..بالله عليك ماتخلنيش اقعد معاي بالله عليك..
ضمها بقوة وقلبه قاعد يتفتت من ألمه ع حالها..
قعد يمسح ع ظهرها وبدي يقرا في ايات الرقيه وطوبى شاده فيه وهي تردد همسا..لاإلاالله..لاإله الا الله..لاإله إلا الله..لعند ماهدت تماما..
مارقدتش لكن قاعدة شادة فيه..
هو مسح ع شعرها وقال بصوت هادي..
/طوبى..
هي ردت بصوت متعب..
/نعم..
هو قال:شن جو؟
يدوب ضحكت وقالت..
/باهي الحمد لله..
ابتسم وقال..
/الحمد لله..مرر نظره ع المكان لعند ماثبته يساره وقال..
/قوبعه!..شن عندك هنا!؟..
بعدت طوبى عن عبد القيوم وشافت وين يشوف التفتت وشافت الارنب واقف يشبحلهم قالت بإبتسامه حزن..
/ياروحي شكله خاف..
ناضت من مكانها ومشتله قعمزت ع رووس صباعها قدامه وقعدت تمسح ع ظهره..
ابتسم عبد القيوم بحب واتكى بذقنه ع ايديه فوق ظهر الكنبه وقعد يتأمل فيها وبين عيونه تجي اول مرة شافها فيها...حنها وعطفها ورحمتها ع حيوان عطشان وقتها هما نفسهم اللي قاعده تعطي فيهم لحيوان خايف توا..
هي هي مهما يصير فيها تقعد زي ماهي قلبها طيب وحنون ورحيم..هذا حال القلب المعلق بالله..
رفعت الأرنب وهي تشوف للصندوق اللي دارهوله عبد القيوم بعدين مشت حطاته فيه..قعمزت قدامه مرة تانيه.. مسحت عليه شويه بعدين ناضت والتفتت لعبد القيوم لقاته يشوفلها..
تنهدت بضيق وقدمتله وهي تقول..
/آسفه..
وخر عن ظهر الكنبه واشرلها بيده وهو يقول..
/تعالي..
مشتله وهي متكدرة قعمزت جنبه..هو قربلها وقال..
/تعالي..تعالي..وضمها لقلبه مرة تانيه..
طوبى هالمرة حست بخجل شديد اول مرة تصير حاجه زي هادي وتكون واعيتلها تماما..في البدايه كانت شبه جامده من الخجل لكن طبطبته عليها خلتها ترتاح لعند ماجاها النوم وولت رقدت..
هو كلمها يقول..
/طوبى..
ماجاش منها رد..عرف انها راقدة بالنوم..
بهدوء خلاها تتمدد ع الكنبه..بعدين ناض مشي لدارها جابلها غطا ومخده..
بهدوء حط المخده تحت راسها وغطاها بالغطا..وبعدها مشي جاب فراشه ومخدته فرشهم جنبها وتمدد وحط راسه ع المخده وبدي يفكر في حالها..هادي البدايه وهكي مالا بعدين كيف!؟
ويرجع يشجع نفسه لما قاللها انه لازم يكون اقوى من هكي ويتحمل بش تقوا بيه وتقدر تتخطى هالأيام وهي متخطيه معاهم اهم مرحلة من العلاج بنجاح..
🍁🍁🍁🍁
فاقت ع آذان الفجر كانت حاسه بتعب وكأن جسمها متكسر تكسير..وهي تسمع في الآذان غمضت عيونها..تبي تسمع بخشوع لعباراته..حست للحظه برغبة في النوم لكن حاولت تتجاهلها بقوة لعند ماتم الآذان..
فتحت عيونها..مررت نظرها قدامها..تنهدت..ونزلت عيونها لعبد القيوم لقاته غارق في النوم..وجعها قلبها عليه وحست بذنب اتجاهه وهالشعور خلاها تزيد تشجع نفسها ع المقاومه بش تشفى بسرعه وتريحه من همها..
نزلت من الكنبه وقعمزت ع رووس اصابعها..
طبطبت ع ذراعه وهي تقول..
/عبد القيوم..عبد القيوم..
فتح عيونه بفجعه وشافلها وهو يقول..
/شني!؟
زاد ضاق صدرها ومع هذا ابتسمت في وجهه وهي طبطب ع ذراعه وتقول..
/مافي شي مافي شي..نوضتك للفجر بس..
غمض عيونه ومسح بعيونه ع وجهه وهو يتنهد..بعدين حولهم وهو يشوفلهم قال..
/كيف حالك توا؟
وقفت ع حيلها وقالت بإبتسامه..
/الحمد لله...بعدين مشت بإتجاه الحمام وهو تبعها بعيونه لعند ماخشت للحمام..
🍃🍃🍃🍃
ومع طلعة شمس هاليوم..
كان حسين واصل لحوشه..خدي دوش ورقد ساعتين بعدين فاق غسل وجهه ودار فطور لروحه..
وبعد الفطور طلع بدلته العربيه كواها وعطرها وخلاها معلقه ودار اتصال بأمه بلغها فيه بمرواحه وانه شويه وجايهم غادي.
🍃وصفيه تسكر منه وتمشي للكوجينه تبلغ هاديه ويتفقوا الزوز يديروا غدي فيه كل شي يحبه حسين..
بعدين اتصلت صفيه بفردوس وقالتلها يجوا كلهم يتغدوا عندهم ويكملوا اليوم معاهم..
☘وفردوس مابتش تمشي فاضيه دارت نوع حار وحركت آلاء بش ديرلهم حلو اللي بعد ماقالت كل عبارات تذمر دارتلهم نوع حلو منظره مغري لأبعد حد..ومع الساعه12 كانوا كلهم غادي...
🍃🍃🍃
"كلمت يوسف قال قريب يوصلوا"
اميمه وهي تمرر في نظرها ع الكوجينه قالت..
/هدا كله ع خاطر مرواحة حسين!؟
غرفه:اللي يسمع يقول مروح من فلسطين
صفيه بإمتعاض؛ترا ريحي جمالك انتي وياها..
هاديه بضحكه:خيركم يابنات حتى هو افندينا قداش عندنا افندي حني!؟
اميمه بقصد المزح؛الحمد لله ماعندناش كان واحد
شافتلها امها من فوق لتحت..
فردوس بضحكه:خيركم مع حسين!؟
غرفه؛ماخيرنا شي..
صفيه:انتي بالذات حي عليك حي..كان جي وكلمك تردي عليه ولامعاش تكلميني بكل شهقت غرفه وقالت..
/تبيعيني ع خاطر ولدك ياخالتي!
قعدوا يضحكوا عليها..
فجأه سمعوا الصغار يقولوا بصوت واحد..
"سوونا"
غرفه بإمتعاض؛اهو جي صلاح الدين الايوبي..
طلعت صفيه تجري واميمه وهاديه وراها وهما يضحكوا..
فردوس وهي تضحك بإستغراب قالت.
/خيرك انتي وياه؟
غرفه بإمتعاض..
/ماخيرني شي..
"فردوس"
قالتلها؛اطلعيله اطلعي..
فردوس حركت راسها يمين ويسار وهي تضحك وطلعت من الكوجينه..
بعد ماطلعت انطلقت غرفه تشوف شن دايرين وذوق في نفس الوقت...
🍃في الصاله..
فردوس بإبتسامه..
/الحمد لله في خيار الخير..
حسين وهو مقعمز وضام ع يمينه ويساره اواب ومهاب قال..
/الحمد لله..شاف لولد آلاء اللي كانت مقعمزاته في حجرها قال بإبتسامه..
/ربي يصون..
الاء بإبتسامه؛سلمك..
حسين:شن سميتوه؟
الاء:امير..
هو قال؛الله يبارك الله يبارك ..مرر نظره عليهم وهو يقول..بوي وين؟
قالتله هاديه؛يدوش..
هز راسه وهو يمرر في نظره عليهم مرة تانيه..
من البدايه ماكانش يدور ع بوه..
كان يدور عليها اللي ماغابتش عن باله طول العشرة الايام اللي فاتت ومن لما روح كان حاس بلهفه وشوق لشوفتها..لو يقدر راهو سأل عليها هي الاولى..
☘وقعد حسين يراجي في خشة غرفه لعند ماخش خوه يوسف هو ومرته هني ناض طلع مع خوه للمربوعة ولحقهم بوه بعد ماسلم ع كنته وهدرز عليها شويه..
🍁🍁🍁🍁
طلعت من الحمام وهي مضايقه ومخنوقه وهالمرة السبب مختلف..
توجهت للدار خشتلها وسكرت عليها الباب وهي تقول..
/ياربي كيف بندير توا!؟ كيف بنكلمه ع حاجه زي هادي! تأففت وقالت..استغفر الله العظيم..ضروري تقوليله ياطوبى مجبورة تقولي..حطت ايديها ع وجهها وقالت..لكن والله احراج احراج...
دق باب الدار..
نزلت ايديها وشافتله..
"طوبى خش وقت صلاة الظهر"
غمضت عيونها بشده من الاحراج..
"طوبى"
فتحت عيونها وقالت..
/شويه بس..
التفتت وفتحت الباب وهي محرجه ولون وجهها محمر..
عبد القيوم:توضيتي؟
تنهدت بضيق وقالت..
/مانقدرش..
هو ركز ع ملامح الخجل الباينات عليها فهم قصدها حاول يجنبها الاحراج اكثر من هكي وقال..
/الدجاج في الكوشة ديري عليه طلة..
طوبى وهي محرجه؛حاضر..
ابتسم ابتسامه خفيفه ومشي بيصلي..
وهي غمضت عيونها بخجل شديد وردت الباب..
☘☘☘
ويطيب الدجاج المحمر اللي كان مداير جنبه عبد القيوم شوية رز وشربة عدس وقعمزوا مع بعض في الكوجينه يتغدوا..
طوبى اليوم كانت هاديه جدا وكلامها شبه معدوم..تسرح اكثر ماتاكل وملامح الكدر مافارقتش وجهها..
🍁عبد القيوم:طوبى..
شافتله بصمت..
قاللها:كنك ماتاكلي!؟
قالتله بشي من الضيق والاحراج..
/مش قادرة ناكل ماعنديش نيه..
هو ابتسم وقال..
/براحتك عدي تريحي..
ردتله الابتسامه وناضت ومشت طلعت من الكوجينه وهو بنظراته الحزينه معاها..
🍃🍃🍃🍃
في دار النوم كانت مسكرة ع روحها وتتكلم هاتفيا..
سدرة وهي مقعمزة ع السرير..
/قريب في اليوم نكلم فيها اربعه مرات...........تكلمي فيه هو؟....كويس كويس هكي يحس ان في وراها من ياكله من غير ملح لوفكر يضرها................لاوالله بعد اللي عرفته معاش ولت عندي ثقة في حد لولا خالي الله يسامحه مارضيت باللي صار...........هو هدا اللي مريح قلبي شويه اني مسلمتها لله............عادي عادي قوليلها اني خبرتك.....مرات تحكيلك حاجات ماتقدرش تقولهالي.....باهي باهي.........لايوريك باس سلمي ع العويله....بالسلامه...بالسلامه...
نهت المكالمه وناضت ومشت فتحت باب الدار وطلعت منها..
وهي متوجهه لباب الشقه فاتت من قدام دار سدرة وقالت..
/هيا سديرة..
طلعت سدرة المهدي وهي لابسه عبايه ووشاح..
/واتيه خالتي..
ومشوا مع بعض بإتجاه المدخل حطت سدرة الصغيره قدام رجلين سدرة الكبيره الشبشب..
ابتسمت سدرة المنتهى وهي تلبس في الشبشب بعدين لبست سدرة المهدي حذائها وفتحت الباب وهي تقول..
/هيا خالتي..
مشت سدرة طلعت وبنت راجلها لحقتها وسكرت الباب..
🍃🍃🍃🍃
"لاسدرة ماتقدرش تجي ع خاطر ظرف شيبانيها"
جهينه عقدت حواجبها بتساؤل وهي تقول..
/خيره؟
فردوس:جاته جلطه ع القلب لكن قالت مش قوية..
جهينه:لاباس عليه تو نكلمها بعدين شويه...
وخشت عليهم غرفه بالبخارة تبخر في الصاله وتخش وراها اريج جايبه مفرش العاله فراشاته قدام صفيه وولت للكوجينه تجيب باقي حاجاتها..
خشت هي طلعت هاديه من الكوجينه لدار النوم بش طلع منها حوايج للدوش..
وهي خاشه للدار سمعت صوت بكي..شافت جهة دار الحاج علي دموعها عبوا عيونها وفاضوا وبسرعه خشت دارها وسكرت الباب..
🍃وفي دار الحاج علي كانت اميمه راقده ع سريره وحاضنه وحده من سواري جدها العربيه اللي قاعده فيها ريحته تشم فيها وتبكي بألم شديد..
🍁زي ماقاعده تبكي طوبى توا مع اختلاف السبب..
كانت تتوجع بشده وهي حاطه يدها ع اسفل بطنها..
العذر الشرعي من بعد ماولدت جنه بدي يجيها بأعراض وآلام قوية بس هالمرة قوة هالآلام اضاعفت..
عبد القيوم سمع صوت بكاها حول الحشم ع جهة ودق باب دارها دقه وحده وفتحه وخش عليها..
لما شاف حالتها بدت ع وجهه ملامح الألم..
قرب منها وقعمز مقابلها حط يده ع ذراعها وقال..
/بالعاده تجيك قويه هكي!..
هي من الخجل الشديد ماقدرتش ترد عليه..
مسح بيده ع ذراعها وقال..
/ضروري تجاوبيني ياطوبى..
بنبرة الم قالت..
/ايه..لكن هالمرة..اقوى..
عبد القيوم وملامح الالم باديات ع وجهه قال
/طبيعي..
هي بنفس النبرة قالت..
/قصدك..من السحر؟
هز راسه بصمت بعدين مد يده ليدها اللي حاطتها ع بطنها حولها وحط يده في مكانها وبدي يقرا عليها..
في البدايه كانت متحشمه لأبعد حد بس بعدين الألم بدي يتقوا بدت تبكي بصوت عالي..
وهو يعلي صوته في القرايه ويكرر في ايات التوحيد ويزيد يعلي في صوته..
طوبى من قوة الالم حست روحها وكأنها غابت عن الوعي برغم انها مازال فايقه..تسمع في كلام مش مفهوم ينقال عند وذنها يغطي ع صوت عبد القيوم فجأه بدت تردد في الكلام اللي تسمع فيه..
عبد القيوم لما سمعها شن تقول بدي يأذن بصوت عالي..
معاش سمعت طوبى بعدين غير صوته هو سكتت شويه وبعدين بدت تردد..
"لاإله إله إلاالله"
هو قعد يكرر وراها في عبارة التوحيد بعدين بدي يردد في تاج الذكر وهي تردد فيه وراه..
حطت يدها ع يده شدتها بقوة..وهو شد يدها وقال..
/كملي كملي..لاإله إلاالله وحده لاشريك له له الملك وله الحمد وهو على كل شي قدير..
واستمرت طوبى تردد فيها والالم بدي يخف شويه شويه لكن ماأختفاش..
رخت يده..وهو قرب يده من راسها وقعد يمسح ع شعرها وهو يشوفلها بنظرات ألم وحزن...
🍃🍃🍃🍃🍃
"امتى صار؟"
عبد المطلب:اليومين اللي فاتوا وطلع عارض ع عمتك نفس العرض وهي قالت باهي طول..
حسين وهو متفاجئ..
/معقوله؟!
يوسف بأسف..
/عمتك بعد وفاة جدك كرهت المنطقه كلها..
حسين بضيق..
/ماتوقعتش حزنها يطول هكي..
عبد المطلب بشي من الحزن..
/والله ياولدي نار جدك حتى في قلبي اني مازال مابردت وعارفه كويس كيف كاره مختار ومش متحمل يسمع سيرته هذا علاش وين عرض عليا مختار يشري الحوش قتله عطيني وقت نفكر..
حسين؛انت تبي تبيع ولالا؟
حرك عبد المطلب راسه بالنفي..
حسين؛خلاص قوله مش بايع..
يوسف:وعمتك اللي قالت باهي!
عبد المطلب:ماهو هي لما كلمتني في الموضوع هدا قنعتها تولي في كلامها وقالت شن تبي انت يمشي..
حسين:خلاص قوله مش بايع..
هز عبد المطلب راسه وقال..
/خلاص بعدين بيجي ونقولهاله..
يوسف استغرب وحسين قال بتعجب..
/بيجي!؟
عبد المطلب:قبل شويه كلمني وقال جاي هو وعياله..
يوسف بريبه:مش مستريحله بكل..
حسين:وهو مني اللي يقدر يرتاح لمختار!..
🍃🍃🍃🍃
"احسن حاجه في جيبة الولد ان كل شيله وحاجاته باللون الازرق"
فاتن بضحكه:يعني انت متحمس لجيته زيي؟
مختار:صدقا بديت نتحمس شويتين..بس هاه خلينا متفقين من توا في الشهور الاولى مادخليش بيه لما يشد حيله ندوره..
هي بضحكه قالت..
/باهي..تنهدت وقالت..متحشمه شويه من المشيه ليا مدة معاش مشيت..
مختار:اني قتلك من البدايه كان مشوبه خليك في الحوش..
فاتن؛هو اني مش مشوبه لامن طوبى ولاسدرة الزوز علاقتي بيهم قاعده كويسه اللي مشوبه منها غرفه اخر مرة لما كلمتها ردت عليا بأسلوب مش حلو..
مختار:تبي تمشي تحملي مايجيك منها..
هزت راسها وقالت..
/بنمشي بنمشي..
مسح ع شعرها وقال:خليه يطول معاش تقصيه..
هي بضحكه قالت:باهي..
🍃🍃🍃🍃🍃
بعد العصر..
درست سيارة مختار قدام حوش جده..
نزل ومشي ساعد فاتن في النزول..سبقاته للباب وهو سكر باب السيارة وعيونه من ورا النظارات ع مكان مطعم ربيع اللي ولى فاضي تماما ومحطوط قدامه يافطه مكتوب عليها للإيجار وتحتها ارقام المهدي..
ع طلعة المهدي من الحوش عيونه طول جو ع مختار..
ومختار لما سمع صوت الباب شافله وين جو عيونه ع المهدي رسم ع وجهه ابتسامه في ظاهرها تبان هاديه بس للمهدي بانت ع حقيقتها..ابتسامه شماته..
"مختار"
التفت مختار لفاتن لما ناداته بعدين مشالها وقف جنبها ودق ع الباب ولحظات وانفتح الباب واللي فتحه عبد المطلب..
مختار بنبرة منغمه؛السلام عليكم..
عبد المطلب ابتسم مجامله وقال..
/وعليكم السلام..
وخر مختار وخلا مرته تخش الاولى وهو خش بعدها وسكر الباب وعيون المهدي تشوف للباب وع وجهه باديه ابتسامة تهكم..
🍃🍃🍃🍃
"العين قابله ياحنة ع قولت الشراقه"
كلهم انظارهم كانت بين غرفه اللي قالت هالجمله وفاتن اللي تسمع فيها ..ابتسمت وردت..
/مامنعني عنكم كان الظروف..
غرفه؛ظروفنا قصدك!
فردوس:غرفه!
غرفه:معليشي يافردوس خليني ندوي..تو انتي لما مرض راجلك جيتي لطوبى ترجيتها بش تمشيله تعانيه..ومشتله وسيبت بنتها ع خاطره وعاناته لين بري وخدت منه المرض اللي تعبها اكثر ماتعبه استخسرتي فيها تجي نهار توقفي عليها حتى خمسة دقايق!؟
ماحد عقب ع كلام غرفه كلهم كانوا موافقينها فيه..
فاتن بإبتسامه:طوبى نفسها مالامتش عليا نهائي ياغرفه تعرفي علاش!
غرفه بإبتسامه أسف..
/لأنها طيبه لين مفسده..
فاتن بنفس الابتسامه ودموعها عبوا عيونها قالت..
/لأنها عارفه اني ماحملتش بالساهل وان اللي زيي معاش عندها فرصه تعوض حملها لو راح منها..وهدا اغلى ماتمنيت في حياتي غرفه وماصدقت حصلته..
بدت ع وجوههم ملامح الحزن وغرفه برغم انها تأثرت بكلامها كابرت ومابتش تعذرها..
فردوس؛عندك حق عندك حق..
الاء:اني كنت حامل ايام الكورونا عزيز عزلني وماخلاني نمشي لحد ولاحد يجيني لأن الكورونا خطيره ع الحامل..
جهينه:للأسف هلبه حالات وفاة بسبب الكورونا من النساء الحوامل في اللي توفوا والجنين نجي وفي اللي ماتوا هما واجنتهم..
هاديه بأسف..
/لاحول ولاقوة الابالله..
صفيه وهي تشوف لفاتن قالت..
/تحلي عويناتك ع خير بنتي..
فاتن وهي مبتسمه شدت دموعها بقوة وقالت
/تسلمي..
ناضت غرفه وهي معصبه وطلعت من حداهم واريج ناضت وراها..
فردوس وهي تشوف لفاتن قالت..
/مشغوله ع وخيتها وواجعها حالها..
فاتن:واني والله عاذرتها ومش لايمه عليها..
🍃في الكوجينه..
غرفه وهي تبكي..
/توا فاتن وجعتهم اكثر من طوبى اللي قعدت هي في جهة وبنتها في جهة..
اريج:حتى اني زيك مش لاقيتلها عذر نهائي هو كذا مرة لما يجينا يقول خليتها عند بوها يعني تطلع وتخش..ولافي العيد الكبيرة ع كلامه هو ماخلت وين مشت معاه..
غرفه وهي تمسح في دموعها..
/والله مافي واحد غالط كان طوبى الله يسامحها..
اريج:للأسف عيبها الوحيد طيبتها هادي..
ع خشة اميمه قالت..
/خلاص غرفه اغسلي وجهك واطلعي قعمزي..
غرفه؛بنروح..
اميمه:بلاهبال زايد بدلي ساعه بساعه وتجاهلي وجودها..
غرفه:بالله عندي حق في اللي قلته ولالا؟
اميمه:مش عارفه شن نقول مرة نشوف الحق معاك ومرة معاها وفي النهايه طوبى مالامتش عليها..
غرفه؛من دروشتها..
اميمه:خلاص سكري ع الموضوع وديري اللي قتلك عليه واطلعي..
خدت غرفه نفس بعدين هزت راسها بالموافقه..
🍃🍃🍃🍃
"تكلمت مع عمتك في الموضوع وقالت شن ماتقرر انت باهي"
مختار بإبتسامه؛ماعنديش مشكله..
حسين ويوسف ارتابوا من ردة فعله وبوهم كان من داخله متوجس اكثر منهم..
شاف مختار لجنه ومسح ع شعرها وقال..
/اني قبل كان في بالي مشروع لكن الباين مش مكتوبله يصير منه..شافلهم وقال..مش مشكله مش مهم هلبه..تنهد وقال..خلونا في المهم..امتى سافروا المحجوب وطوبى؟
يوسف:ليهم اسبوع لتوا..
رفع حواجبه وهز راسه بصمت..
وهما يشوفوله بنظرات كلها توجس..
🍃ماطولش مختار فالزياره مع المغرب كان مروح بمرته والاجواء بعد مرواحهم رجعت زي ماكانت لطيفه بس غرفه باقي اليوم قعد عقلها مشغول بطوبى..
🍃🍃🍃
طالعه للجنان تتفرج ع الهلال وقلبها ياكل فيه القلق..
"غرفه "
نزلت عيونها والتفتت شافت فردوس جايتها..
وصلت فيها وقالت..
/خيرك واقفه هني؟
رفعت عيونها للهلال وقالت .
/نفكر في طوبى..الصبح كلمتها ع الماسنجر محادثات قالت باديه بجلسات العلاج وامورها ماشيه..
فردوس:طمني بالك ياغرفه بإذن الله تشفى بسرعه وتروحلنا بلاسو ولاسويه..
نزلت غرفه عيونها وقالت..
/تعرفي حاسه في شي مدرقاته سدرة..
عقدت فردوس حواجبها وقالت..
/زي شني!؟
غرفه:مش عارفه قلبي حاسني في شي مدرق..
تنهدت فردوس وقالت..
/ماعندها مادرق وهيا خشي داخل العشي واتي.
شافتلها غرفه بنظرات ضيق ومشت خشت وفردوس لحقتها وقلبها واجعها عليها...
🍁🍁🍁🍁
وطوبى فهالوقت كانت مع عبد القيوم في الارض الخاليه في المزرعه..
اول ماخشولها طوبى سمعت صوت اشبه بصوت الذئب لكن كان مخيف بزياده..
شافت لعبدالقيوم بخوف وقالت..
/سمعت!
هو قعد يشوفلها بصمت..
طوبى بخوف:صوت صيحة زي صيحة الذيب.
هو قال:ابدي اقري طوبى..
طوبى تنهدت بخوف وقالت..
/خايفه..
هو بدي يدعي في دعاء الإستعاذة ولت طوبى سمعت نفس الصوت ماكانش يسمع فيه حد غيرها وهي وقتها عرفت مصدر الصوت..
غمضت عيونها وبدت تردد ورا عبد القيوم..
هو سكت..وهي بدت تقرا مجموعة سور وآيات..
قعد عبد القيوم مركز معاها..تعلي في صوتها اللي كان يرجف ع وجهها تبان ملامح الألم..
لحظات وبدت تبان عليها علامات فقدان الوعي قربلها بسرعه وشدها واستمر في القرايه..
وهي غمضت عيونها وشدت فيه وقعدت تقرا وراه بصوت متعب..تسلل لقلبها شعور راحه مع شعور قوة غريب خلاها تقاوم لعند مابدت ترجع لوعيها شويه شويه...
🍁🍁
"طوبى"
طوبى بإبتسامه..
/نعم..
هو قال:شن جو..
ضحكت وقالت..
/مليح..
ابتسم وهو محاوطها بعدين قالت..
/نعدوا نقعمزوا تحت المظله؟
ردت عليه تقول..
/باهي..
ولف بيها وقعد يمشي بيها وهو محاوطها..
وهي برغم خجلها ماكانتش تبي تبعد عنه ماتبيش تبعد عن مشاعر الراحه والامان اللي تحس بيهم معاه..
*******
تحت المظله بدت طوبى حديثهم بسؤال..
/في حاجه لتوا محيرتني ومش لاقيتلها اجابه..كيف الواحد اللي يبدا محافظ ع اذكاره ومحصن نفسه ديما ويقرا ديما في البقرة التي لايدركها البطلة كيف يصيبه السحر!؟
تنهد وقال..
/تو لما الواحد يطلع في السيارة مش لازم يمشي ع قواعد معينه تحميه من الحوادث!؟..مثلا يلبس حزام الأمان يسوق بسرعه معقوله يركز في الطريق وهكذا..فرضنا في حد طالع توا في سيارة وداير احتياطاته كلها وفجأة بدون سابق انذار يطلع في وجهه بطاح يعني طانطا وتدهسه..شن نسموا اللي صار معاه؟!
طوبى:قضاء وقدر..
عبد القيوم:يعني مكتوب ومقدر عليه يدير مايدير ماقدرش يرده..الشاهد ياطوبى ان رب العالمين ديما يقول خودوا بالأسباب وشن مايصير معاك من نتيجة مقدر ومكتوب منه..
وقل لن يصيبنا إلا ماكتب الله لنا..
وقال عن السحر في آخر الآية 102 من سورة البقرة
وماهم بضارين به من أحد إلا بإذن الله..
والله كتب عليك هالإبتلاء ياطوبى وقبل قتلك اذكارك اللي كنتي متمسكه بيهن القرآن اللي ساكن في صدرك هما اللي يساعدوا فيك توا بيش تتخطي هالإبتلاء..راهو ياطوبى في ناس يعانوا من نفس الحاله وضعهم اسوأ من وضعك..
هي بألم وتساؤل..
/اسوأ من وضعي؟ شن اللي صاير فيهم مساكين..
هو قال..
/الاعراض تختلف من حالة للتانيه ممكن تشتركي مع غيرك في بعض الاعراض بس في اللي يزيد عليك وفي اللي ينقص عنك وفي اللي تصير معاه حاجات تختلف عن غيره اللي يتحكم في هذى كله قوة ايمان المسحور..
طوبى:باهي وبرنامج العلاج واحد؟
قاللها :لا يتشابه ويختلف لأن كيف ماقتلك الحالات تختلف عن بعضها..العالم هذى واسع ياطوبى ايام كنت مع خالي لما كان راقي شرعي ياما مر عليا..
طوبى بإستغراب:كان؟
هز راسه وقال:اها له سنين مسيب بس يساعد في الناس اللي جوه طلبوا منه نصايح..
طوبى:علاش سيب؟
عبد القيوم:عرف حديث شريف عن الرسول مانقدرش نجيبلك صيغته بالزبط المهم يقول لما معناه 70الف اللي بيخشوا الجنه من غير حساب مسثنى منهم الرقاة..
طوبى بإستغراب:علاش؟
رفع حواجبه ونزلهم وهو يقول..
/مش عارف الحق..بس هو من بعدها سيب وبدا يقرا في العلم الشرعي..
هزت طوبى راسها بصمت وهي تفكر..
وهو يشوف لملامح التعب ع وجهها وقلبه موجوع..
شافتله وقالت:باهي انت متأكد ان العلاج يمشي..نزلت عيونها وكملت تقول..واني الحالة هادي؟
عبد القيوم؛متأكد ياطوبى امال شنو!؟ طوبى هذى علاج لو وقفتني عنه حتردي لنقطة الصفر..
هزت راسها بإقتناع وهي ساكته..
ضيقت عيونها لما حست بشي يخربش في رجلها نزلت عيونه شافت الارنب لاصق فيها ويشوفلها..
ضحكت وطبست وخداته وهي تقول..
/ونوسي..
عبد القيوم بإمتعاض..
/لاحقنا حتى هنا!؟
حطاته طوبى ع الطاوله وقعدت تمسح ع ظهرها وهي تقول..
/خدي علينا..
سكت عبد القيوم شوية وهو يشوفله بعدين قال..
/والله لحم الارانب عنده فوائد واجده..
يدوب فنصت فيه وهي تضحك..
رفع حاجبه وقال..
/غير زيدي بحتي كويس في شبه كبير..
ضحكت بشي من التعب وهي تقول..
/استغفر الله..
عبد القيوم برفعة حواجب..
/تي غير شن قلنا بس!..
☘وقعد عبد القيوم حاط راسه براس الارنب "ونوسي" ولا"قوبعه" زي ماهو مصر يسميه وخلا طوبى تضحك من قلبها..ولما بدي ينعس فيها النوم دخلهم للحوش..
حط الأرنب في صندوقه..واستنى طوبى تدهن بزيت الرقيه بعدين طلعت وهي جايبه شرشاف ومخده..
تمددت ع الكنبه وهو شغل هاتفه ع سورة البقرة وتمدد ع الفراش..
طوبى وقتها حست بشي من الألم لكن بعدين غلبها النوم ورقدت..
وهو من خوفها عليها ماقدرش يرقد الا بعد ماتناصف الليل...
🍁🍁🍁🍁
تاني يوم...
السبت...
الثاني من شهر صفر..
19 سبتمبر..سنة 2020..
بداية النهار كانت طوبى قليله الاحتكاك بعبد القيوم..متمسكه بتاج الذكر فيه اللي تردد فيه لين وصلت بالعدد ل500مرة..
مرات تسهى فيهم ومرات تخشع وكانت تقاوم بكل قوتها..
حست بنفسها ارتاحت بعض شي وزادت رغبتها في المعمول تبي ديره بإيديها وتفاجئ بيه عبد القيوم بعد مافهمت انه من الحلو مايحبش الا المعمول..
..بعد العصر..
وزعاته زي مانقولوا او صرفاته لما طلبت منه يديرلها خبزة فرن وهو عاد طلباتها اوامر اللي تبيه ينفذه..
بعد ماطلع..
هي طلعت صونيه خاصه بالعجن والمكونات كلها..
وبدت دير فيه...
بعد ماعجنت..قوام العجينه ماجاش كويس رجع صدرها يضيق وهي تسأل في نفسها..
"شن اللي نسيته بش جت هكي!."
حست لحظتها انها نست تماما شن حطت وشن دارت..
قعدت ضيف بطريقه عشوائيه وتعجن وللأسف قوام العجينه يكون من سيء لأسوأ..
انتابها شعور بالغضب الشديد..ومن داخلها كان حاسه بقهر..
قعدت تعجن بعصبيه وتعجن وتعجن وبعدين قعدت تخبط ع الكوجينه بعصبيه وهي تبكي..
غضبها ماكانش طبيعي وكأن نار وفي حد ينفخ فيها بش تزيد تقوا..
وهدا اللي صار وطوبى فقدت اعصابها تماما..بعد ماكانت تخبط ع العجينه شدت الصونيه بإيديها الزوز وقعدت تخبط فيها بقوة وهي تقول بغل..
"هاه" وتكرر فيها..
كسرت الصونيه لأجزاء والعجينه لطخت الكوجينه كلها وماقعد في يدها ما اجزاء الصونيه حذفاته بقوه ع روشن الكوجينه وتكسر مرشها..
وهي انهدت وقعمزت ع الكرسي وحطت راسها بإيديها وانهارت بالبكي...
#معركة_ضد_القمر
#طوبى
...يتبع...
