#طوبى "جنة طوبى"
#جمان_فريد
#الجزء_108"كانون الثاني/2020"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#فضل_الصلاة_الإبراهيمية
🌼وإذا لزمت الصلاة الابراهيمية واكتفيت بها عن باقي الأذكار فاعلم أنك لزمت أفضل الأذكار وأفضل الدعاء وأفضل العبادات
يكفي أن الصلاة على النبي هي العبادة الوحيدة التي تجعلك في إتصال مباشر مع الله والنبي والملائكة
فأي فضل يعادلها ؟!!🌼
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 في عصرنا هذا الذي بلغت فيه الخطيئة هذا المبلغ من القوة، فإن الملاذ الوحيد للجنس البشري في وسط آلام الوجود ومحن الحياة، إنما هو الإيمان بالله، والأمل في السعادة الأبدية التي وعد بها الصالحون.
لدوستويفسكي🍃
______________________________________
حوش طوبى...
في الصاله...
كانوا سدرة واريج يكلموا في فردوس وآلاء مكالمة فيديو يسألوا عن احوال البلاد اللي هما فيها مع الوباء الجديد..
المكالمه كلها كانت تعبر عن الخوف والقلق والترقب..
🍃وبعيد عنهم في دار المعيشه..
كانت جنة مقعمزة تلعب بألعابها..وامها حداها شاده تليفونها
خاشه ع صفحتها ع الفيس=حنة= "بفتح الحاء" ترد ع الاسئله اللي تجيها ع الخاص..
كانت اغلبها اسئله عن احكام الطهارة ..
لاحظت ان هلبه بنات يجهلوا هلبه امور عن احكام الطهارة من جميع النواحي وهالشي خلاها تفكر تكتب منشورات عن احكام الطهارة وتشرحها بطريقه مبسطه..بس موضوع زي هدا مش ساهل يبي دراسة وتدقيق يعني حياخد منها وقت..
"ماما"
رفعت عيونها في جنه لقتها جايتها بالسيارة وهي تقول.
"كسل" تكسرت..
ضحكت وقالت..
/لاياروحي ماتكسرتش هاتيها نركبها..
خدت منها السيارة وهي تقول..
/تو انتي جنونتي بنوته مفروض تلعبي بألعاب بنوتات يامامي ولا؟!
جنه بدون ماتفهم كلمه من اللي قالاته امها ردت تقول..
"لا"
طوبى بضحكه..
/شن هو اللي لا يابطشتي شن هو..مدت السيارة بعد ماركبتها وقالت..خودي ياناجي خودي..
خدت جنه السيارة وقعمزت تلعب بيها وامها تضحك عليها..
فجأة جاها اتصال..
خدت التليفون وقاماته لما شافت المتصل استغربت..
فتحت الخط وردت..
/السلام عليكم سمرمر..
"وعليكم السلام طويبه..بالله حبيبتي ع السريع وتيلي 20طرف دبله نبيهم توا توا ضروري"
طوبى؛حاضر حبيبتي تو نكلم البنات في المحل يوتولك اللي تبيه وابعتي حد من عندك ياخدهم...
"باهي باهي غير بسرعه بالله عليك..ايه ونبيك ع تركينه ديري طاجين مبروشه هدا ابعتيه بعدين باهي"
طوبى بإزدراء:علاش!؟
"بعدين نحكيلك كل شي عابيه عليك طويبه"
طوبى:حاضر حاضر سكري خل نكلم البنات..
"باهي بالسلامه"
نهت طوبى المكالمه معاها واتصلت بوحده من العاملات في المحل ووصتهم توصية ع طلبية سميرة..
بعدين ناضت بالشويه عليها وهي تقول..
/جنونه ماما بري لروجه..
نفدت طلب امها وطلعت تجري بالسيارة..
وطوبى وراها وهي تشوف فيها كيف متوجهه للصاله لين خشتلها..
وهي وصلت فيفي الكوجينه وخشتلها بش تجهز المبروشه..
🍃🍃🍃🍃🍃
وفي حوش الصيد..
كانت ابتسام في كوجينه الشقه تقصص في خبزة الخضرة وتحط فيها فحافظه..بعد كملت حطتها جنب الحافظه اللي دارت فيها الفطيرة...
سمعت باب الشقه يدق طلعت بسرعه وهي تقول..
/منو..
"اني ماما"..
فتحت الباب وخش ولدها وهو يقول..
/عمي محي الدين جي..
سكرت الباب وهي تقول..
/وينه توا؟!
رد عليها يقول..
/مقعمز مع حناي..
ابتسام؛باهي تعالى..مشت للكوجينه وهي تنادي..ندى..
وخشت للكوجينه ووراها ولدها واخته لحقاته..
عطت كل حد فيهم حافظه وقالت..
/ارفعوهم لحنينه..
هما الزوز قالوا..
/حاضر..
ابتسام؛قدامي هي..ومشوا مع بعض طلعوا من الكوجينه وهي وراهم..
فتحتلهم الباب وخلتهم يطلعوا قدامها بعدين سكرت الباب وهي مبتسمه بمكر..
🍃وصغارها طبقوا اللي قالت عليه..وخشوا بالحوافظ ع حناهم..
ندى:ماما دارتهم حنينه..
محي شاف للحوافظ بعدين غير نظره لأمه لما سمعها تقول.
/غير ليش متعبه روحها بس..ياعواطف..عواطف..
شويه وخشت عواطف وهي تقول..
/نعم؟
نجمه:خودي من الصغار بعتتاته امهم..
قدمت عواطف وهي تقول..
/والله مالايم عليها واحد..
نجمه؛اكيد متحشمه مسكينه تقول يعولوا برواحهم واني مقعمزة ماندير في شي..
عواطف تنهدت وخدت الحوافظ ومشت طلعت بيهم..
نجمه وهي تشوف للصغار..
/بروا العبوا..
مشوا الصغار طلعوا وخلوا حناهم تبكي ع حالهم..
محي الدين بألم..
/قولي لاإله إلا الله يام..
نجمه ببكي:وين نشوفهم قلبي يتقطع ياخوفي ينحرموا من امهم حتى هي..
محي الدين:علاش!؟
نجمه:شن علاش ياولدي..كان خدت مرة تانيه مابنخلوا صغارنا للبراني..
محي الدين:في بالها ماخده يام!؟
نجمه:شن ماتعرفش خوتها يامحي!؟
سكت محي وهو يفكر..
مسحت دموعها وهي تقول..
/حال صغارك مش خير من حالهم اهي امهم لوحتهم وانت حي..
محي الدين بإزدراء..
/زي بيها زي بلاها..
نجمه بالم:لكن ولدك الصغير يدور فيها هلبه ياروحي..
محي الدين بضيق..
/وينه؟
نجمه؛مع وخيته..
محي الدين:ناديهم يام نادي..
☘نادت نجمه راما وقالتلها تجيب خوها وتجي..
والجارات اللي كانوا مقعمزات في دار المعيشه سمعوها واللي هادي بدت تتسائل..
"زعمه في شني تبيهم"
🍃هدا حال الناس في مجتمعنا همهم ديما مالايعنيهم🍃
🍃🍃🍃🍃🍃
"شن رايك في القصة هادي"
نجاة شافت لتليفون خديجه وقالت..
/حلوة..ناويه تقصي؟
وخرت شعرها للخلف بيدها وهي تقول..
/ايه وبنصبغ..وفي بالي ندير فيلر..
نجاه؛مش لازمك..
خديجه؛عارفه لكن بنديره هكي من باب التغيير ديري حتى انتي نجاة شواربك معاش يبانوا
نجاه كتمت غضبها وهي تقول في نفسها..
"مريضه..تافهه"
خديجه:خلينا ناخدوا مع بعض موعد عند دكتورة نعرفها..
نجاة؛اني مش دايرة شي لكن كان تبيني نسايرك ماعنديش مشكله..
خديجه بلامبالاة..
/ok..تأففت بضجر وقالت..امتى بيروحوا خوات الشلولح هديكا..
نجاة:اني بس نبي نعرف شن اللي مسكتك عليها!؟
خديجه؛تجرب توصل وشوفي بعدين شن ندير فيها..
🍃وطبعا كلامها هدا مجرد استعراض كاذب 🍃
🍃🍃🍃🍃🍃🍃
الساعه 8:00مساءا..
كانت سميره في الكوجينه كيف باديه طيب العشي وحداها سدرة وجوري يحكولها عن يومهم في المدرسه واغلب حديثهم عن..
سدرة:قالوا اي حاجه تشروها نقعوها في الوركينه..
سميرة:ايه صح الله اعلم منين جايبينه وقداش يد مساته..لكن مش كل شي يتنقع في الوركينه..
"خالتي سميرة"
سميره؛خش يزونه خش..
خش يزن وفي يده حافظه لونها وردي حطها ع الطاوله وقال..
/ماتبي شي تاني!؟
سميرة؛صحيت وليدي..ايه قولي عمامك روحوا؟
يزن؛ واني جاي شفت عمي الجالي خاش بسيارته للقراج..
رفعت حاجبها وقالت..
/باهي باهي توكل ولدي...
مشي يزن طلع وهي جت للحافظه فتحتها..
سدرة بضحكه...
/مبروشه!
جوري بشغف..
/تسهف..
سميرة بإبتسامه..
/هي توا نديروا كاكاو ونعطيكم منها..
🍃ومن باب الحوش يخش الجالي اللي كان ناوي يشمت في سميرة ويحرق اعصابها..
وصل في باب الكوجينه اتكى بذراعه عليه وقال..
/السلام..
سميره وهي دير في الكاكاو التزمت الصمت وردوا عليه بنات خوه..
الجالي بإبتسامه تهكم..
/روحوا ماليك!؟
سميره؛ايه..
قال بنبرةساخره:خيرك ماشديتهم ع العشي ولا خفتي حتى هو مايلحقوش عليه..
سميرة:سدرة قشري البطاطا بنتي..
سدرة وهي تراقب في الوضع بيناتهم قالت..
/حاضر..
الجالي:نكلموا فيك ياهوو!..
التفتت سميره وقالت..
/مش جعانين في بطونهم بش يجوني ع خاطر غدي ولاعشي..
التفتت للكاكاو لقاته يغلي..
طفت عليه وخدت البكرج ومشت بيه للطاوله حطاته عليها والجالي يشوفلها بشماته وسخريه..لين جو عيونه ع المبروشه...ملامح وجهه تبدلت في لحظه للهفه كبيره..
قدملها وقال..
/مش انتي دايريتها..
سميرة وهي تقص فيها قالت..
/ايه طلبتها من حوش الواعر..
ابتسم من قلبه وقال..
/قصيلي طرف قصي..
ابتسمت تهكما وقالت..
/لاسامحني مانقدرش والله مافيها كيف..وخدت الحافظه حطتهاقدامها..
وبنات خوه يمرروا في النظر بيناتهم..
هو شافلها شويه بعدين قالت..
/تمام اسف..لكن ماتنسيش انتي استفزتيني..
سميرة وهي تقص في المبروشه../مش فاهمه ع شن تدوي لكن سامحني مانقدرش نعطيك منها..
هو كاد يفقد اعصابه لولا وجود بنات خوته هز راسه بعدين مشي طلع وهو معصب..
سميرة في نفسها..
"ان شاء الله تنحرق"..
رسمت ع وجهها ابتسامه وهي تقول..
/نوضي جويريه جيبي فناجين وصواني صغار..
ناضت جوري وهي تقول؛حاضر..
وسدرة واقفه ع الرخامه تقرض في البطاطا وتفكر في حال عمها الجالي بشفقه...
🍃🍃🍃🍃
وخوها محمد اللي بدي يركز هلبه حال التارقي لاحظه اليوم مش ع بعضه واغلب الوقت سارح وملامح الهم ع وجهه..
محمد:تارقينا..اووي..
شافله بدون مايتكلم..
محمد:خيرك اليوم جوك مش عاجبني..
عقد حواجبه وقال..
/عادي زي قبل..
محمد؛لا لا من لما روحك جوك ملخبط..
عبد القيوم تنهد وقال..
/مافي شي مهم مشاكل عاديه في الخدمه..
محمد:باهي خل نغيرولك جوك..تعرف حد يفسر احلام..
ابتسم وقال:ايه خالي..
محمد بلهفه..
/مليح بكل نبيك تحكيله حلم حلمته من فترة..
☘وحكاله الحلم بالتفصيل وعبد القيوم يسمع بإنتباه..
محمد؛اللي مافهمتاش اخر شي في الحلم..
عبد القيوم:ترا جيبلي هاتفي من جنبك..
شاف يمينه لقي التيلفون محطوط ع الفراش رفعه ومدهوله..
خداه التارقي وبدي يدور ع الرقم وهو يقول..
/خالي راقي شرعي ومفسر احلام ورؤى عن دراسه..
لقي رقمه واتصل بيه وهو يقول..
/بإذن الله خير..
🍃🍃🍃🍃
"ردوا بالكم سلم ولدي..انتي دكتورة ياجهينه ماتبيش من يوصيك"
"ماتخميميش ياعمتي ربك الحافظ..يام قل لن يصيبنا الا ماكتب الله لنا خليها ع الله"
صفيه بقلق..
/استودعكم الله كلكم انتم وخوك...
هاديه بقلق..
/حتى انتي ميمو ردي بالك انتم اكثر المعرضين لهالمرض..
اميمه بضيق:ربي يستر..برغم اني مش متأمله منهم شي وحني فهالحرب لكن نقول ان شاء الله الحكومه دير برنامج من توا بش نواجهوا بيه انتشار الوباءحال الصحه عندنا يرثى له لو وصلتنا لاقدر مش قادرة نتخيل الوضع كيف بيكون..
هاديه حطت يدها ع صدرها لما حست بشعور سيء غم ع قلبها..
شافت لصفيه وهي تقول..
/بالسلامه بالسلامه ربي يحفظكم..بالسلامه..
نزلت التليفون وهي تقول بإستياء..
/مش عارفه الايام هادي خلوقي مطبقات هلبه.
زادت خافت هاديه وهي تشوفلها..
اميمه؛طبيعي يام الاخبار اللي تسمعوا فيها ع الوباء مدايرة حالة خوف وقلق واثرث ع النفسيه بشكل سلبي تأثير كبير..معاش تفكروا هلبه وخلوها ع الله زي ماقال يوسف..
تنهدت هاديه وصفيه قالت بقلق..
/ونعم بالله..
🍃🍃🍃🍃
"اها..تمام...لاوالله كيف ماقتلك الاوضاع تمام الحمد لله..ابتسم وقال..وانت طيب..وانت طيب..سلم ع الجميع...السلام عليكم..."
نهي عبد القيوم المكالمه وشاف لمحمد وهو يقول..
/صل ع النبي..
محمد بتوتر:اللهم صل وسلم وبارك على نبينا محمد.
تنهد وقال..
/قالك امك وصاتك ع شي وهي حيه تبيك ديره..
دمعوا عيون محمد وهو يهز في راسه إيجابا..
عبد القيوم؛وقال..الواضح من الحلم ان امك كانت تحب بنت عمتك واجد..
محمد؛قصدك هدا هو تفسير كلامها عنها في الحلم..
حك عبد القيوم حاجبه وقال..
/امك توصي فيك عليها حتى هي..
محمد بإستغراب..كيف!؟
مسح عبد القيوم بيده ع شعره للخلف وهو يقول..
/هذى اللي قاله...
محمد التزم الصمت وهو يفكر في تفسير الحلم..حس انه في حاجه ناقصه..
وفعلا كانت فيه حاجه ناقصه شاف عبد القيوم انه من غير المناسب يقولها لمحمد حاليا..
🍃🍃🍃🍃🍃
"باهي الحمد لله ع سلامتهم هي ووليدها..تمام غدوة ان شاء الله نجي ونشوفها..باهي ابله شروق نتلاقوا غدوة بإذن الله تصبحي ع خير"
نهت المكالمه وهي تقول بإبتسامه..
/عرفتيها العروسه الجديده ماليهاش سنه متزوجه..
ضحكت اريج؛جابت خلاص توا لاعروسه لا عرايس..
ضحكت طوبى بعدين تنهدت بإبتسامه..جي ع بالها موقف السيارة اللي داره التارقي..
اريج؛وين سافرتي..
طوبى بشي من الخجل..
/في حركة دارها التارقي مافهمتهاش..
اريج بإنتباه:شن دار؟!
اكتسي وجه طوبى باللون الاحمر وهي تحكي وقلبها يدق بقوة..
/راجل المراة هادي ماعنداش السيارة لما طلع بيها قال وقفولي تاكسي وهي مسكينه صايرة فيها حاله مازال بتراجي لين يوقفوا تاكسي!طلعت مفتاح سيارتي وعطيته لأخته وقلتلهم ياخدوها شويه جي هو وقال مش لازم وعطي مفتاح سيارته للراجل..اني الحركه مش عارفه كيف شفتها..حسيته زي اللي ديما يبي يبان بطل..
واريج حست ان طوبى تبي تسمع تفسير تاني عكس تفسيرها
ولأنها تبي مصلحتها فسرت اللي صار بطريقه تانيه..
/لالا مش هكي..هو عارف انك كان عطيتي سيارتك بتضطري تروحي في تاكسي اكيد شافها مش لايقه..
شافت في عيونها نظرة احباط عكس الاسلوب اللي تكلمت بيه وهي تقول..
/صح عندك الحق تفسير مقنع..ربي يغفرلي سوء الظن..
طلقت شعرها وحطت راسها ع المخدة وفرداته عليه وهي تقول..
/غدوة امتى تروحي؟!
اريج:2..
غمضت طوبى عيونها وبدت تقرا في الاذكار ومن داخلها كانت تأنب في نفسها اللي مازال تتوهم وتبي تعلقها في أمل كذاب..
واريج تشوفلها بحزن..
تعرف الحب كيف يخلي صاحبه زي الغريق اللي يتعلق بقشه يبي اللي يتمناه قلبه يصير وخلاص..يخلي فيه ينسى الامر الواقعويتبع الاوهام..
🍃واللي داروا غلاه اوهام هايم بيها وهو يكتب في اشعاره عليها..نزل ابياته وكله أمل ان عيونها الحايرة اللي اسرت قلبه لعقد من الزمن تقراهم...
"ياغاليتي....
بحبك صفاحي خاطري مليانه
ومالي سطور القلب خانه خانه
........... .مالي انظاري............
ومالك القلب ونحلف بربي الباري
ياللي مثيلك مااهناااك عذاري
عاطيك قلبي يا غلاي حصانه
علي راحتك تلعب بكل أوتاري..
وطوعت لك قلبي بجميع أركانه
يا كبيدتي رانك ملكت أفكاري
وفي خاطري واخد غلاك مكانه
وصفك كما واحه فوسط صحاري
ومافيك ياريدي شوي شيانه
دخلت لحياتي وصار استقراري
ياللي أوصافك كي القمر فتانه
محال ينقص في غلاك اصراري
ياللي كما الورده عليك قنانه
ولا يدور خاطي في غلاك مداري..
ولا خاطري ينقص عليك حنانه"
🍃وام العيون الحايرة راحت في النوم وخلاتك تسهر ليلها تفكر في كل موقف بان فيه الحب شفته منها..ونار الشوق معاش بتخلي عندك صبر...
🍃🍃🍃🍃🍃
وتمشي تاني يوم ام العيون الحايرة مع الياسمينه للمدرسه..
خدوا في طريقهم هدايا بسيطه للمولود الجديد..
خشوا ع امه بيهم ودخلوا في قلبها الفرحه..قعمزوا هدرزوا شويه بعدين ناضت طوبى وهي تقول..
/خل نركب نشوف الصغار شويه ونجي..
سدرة؛بالشويه عليك..
طوبى؛باهي..
ومشت طلعت من الحجرة وقعدت تمشي في الممر متوجهة للدروج اللي في اخره بش تركب للدور التاني..
واذ بها تشوف عبد القيوم نازل من الدروج..
تكهربت وارتبكت ع الاخر وبدي التوتر يلعب بإعدادتها..
قعدت تلوم في نفسها وتسأل فيها..
"خيرك شن جاك يابنت..! يانهاري كان مايوقفني!؟ والله مانقدر نلتم ع بعضي قدامه بعض اللي صار امس!؟ حي عليك والله بيوقفك واضح يمشي بالشويه"
وقعدت تسرع في مشيتها بطريقه واضحه تبين انها هاربه...
وين قربت توصل فيه دعت في نفسها..
"يارب لايسلم لايصبح يارب"
وفاتت من جنبه زي الريح..هو تعجب والتفت وقعد يشوفلها كيف نزلت تجري من الدروج..
قعد لحظات واقف في مكانه مش فاهم هي علاش تبان هاربه منه..!؟
قدم كم خطوه لين وصل في السياج متاع الدروج نزل عيونه وشاف تحت لقاها واقفه وحاطه يدها صدرها وكأنها تاخد في نفس!؟
استغرب وتسائل..
"متحشمه! اكيد متحشمه من اللي صار امس"
هي فجأه رفعت عيونها شافاته..
ارتبك..وهي انفجعت وكملت نزول وهي تجري هالمرة وخلاته يضحك بإستغراب وقلبه كالعاده مجنون بدقاته....
لف وكمل طريقه وهو مبتسم وبين وبينه نفسه كان في حديث يدور..
"خلاص ياعبد القيوم اللي فيها باين وواضح زي الشمس معاش عندك عليش تراجي قوللها اللي في قلبك كله المهم هي تعرف المهم تضمنها هي والباقي مقدور عليه"
🍃🍃🍃🍃🍃
"يامطر صبي صبي
صبى على حوش العربي
والعربى ماعنده شى
غير ازويتينه وجدى
يامطر يا بشباشة ...... صبى على حوش الباشا
والباشا ما عنده شئ ...... غير خبيزة بالشّشى
يامطر .. ياخالتي ......... صبى على قطايتى
قطايتى مدهونة ......... بزيت الزيتونة
يامطر يابيه .............. صبى على الطاقية
طاقيتى محطوطة .......... فيها قرين وحوتة
يا مطر صبي صبي..........صبي علي حوش القبي
والقبي ماعنده شيء.......غير اقطيطيسه تعوي
المطر تصب ........ وعشانا بالرب"
🌼وسط مستراح كبير وسط المبنى لمت شروق الصغار وقعدت تغني معاهم في هالاغنيه والمطر تصب برا وهما يسمعوا فيها..
طوبى وسدرة كانوا منسجمين معاهم..واميمه اللي انضمت ليهم مؤخرا حتى هي عجبها الجو..
شويه جت ابله تانيه لطوبى وقالت..
/اللي وصيتي عليه امس جابوه تعالي شوفيه بش تتأكدي منه..
طوبى:هيا جايه..ومشت من حداهم..
سدرة حطت يدها ع ذراع اميمه وقالت.
/ماتخليهاش بروحها..
اميمه فهمت ع سدرة ومشت لحقت طوبى..
☘سرعت خطواتها ووصلت فيها وهي تقول..
/شن هما الحاجات اللي وصيتي عليهم؟
طوبى:المعروف شوية ماعين وفراشات كبار وبطاطين ومستلزمات تانيه البنيه اللي تخدم مع اليونسيف وصت عليهم..
اميمه؛اها..
وصلوا مع الابله للمكان اللي فيه الحاجات..
شافوا عبد القيوم راكب ع السلوم ويصلح في حاجه ليها علاقه بالكهرباء..
طوبى خافت عليه هلبه غيرت نظرها عنه وخلت عقلها عنده ومشت مع اميمه والابله للموظف اللي جاب الحاجات...
🍃كمل عبد القيوم شغل ونزل من ع السلوم وهو يقول لواحد من الواقفين معاه..
/مشت الامور..
"يعطيك الصحه"
هز راسه وقال..
/تسلم..والتفت ومشي للكرسي بش ياخد بالطوه وشاله ويلبسهم ويجوا عيونه عليهم..
شاف الموظف كيف يكلم في طوبى وهو مبتسم..وهي عيونها في الارض وملامح وجهها جاده تماما..
عقد حواجبه بغيره وبدت ع وجهه ملامح الامتعاض جبد بالطوه ومشالهم طول وماانتبهش ع شاله اللي طاح من الكرسي ع الأرض...
وصل فيهم ووقف جنب الموظف وقال..
/السلام عليكم..
اميمه شافت لطوبى لقتها قاعده حالها وهي ترد في السلام بصوت يدوب طالع..
عبد القيوم:هادم اللي وصيتوا عليهم امس!؟
الابله:ايه استاذ.الموظف:خلاص استاذة طوبى هدا ماتبوا ،
رفع عبد القيوم حاجبه وهو يشوفله بطرف عينه..
طوبى:ايه هو هدا...
قاللها:اهم شن تتفكروا اللي وصلكم وكان يسد الجميع ولالا..
هي قالت:ايه متفكرين كويس..
ابتسمت اميمه قالتله:ذاكرتها قويه تتفكر كل شي بأدق التفاصيل..
ابتسمت بجديه وقال:امم..
وعبدالقيوم تلقائيا لما سمع شن قالو هز راسه وقال بشي بتهكم..
/صح صح..تتفكر في ادق التفاصيل..
هما قعدوا يشبحوله بإستغراب..
وهو بدون مايشوفلهم قال..
/ع العموم في بينا اتصال ان شاء الله في حال صار نقص نكلمكم..تعال معاي..
وخدي الموظف ومشي معاه وهو يكلم فيه..
وهي معاه بعيونها وحاجبها مرفوع قالت..
/شن قصده؟
اميمه بضحكه استغراب ردت عليها وقالت..
/مافهمتش...
الأبله بإبتسامه:خل نمشي نشوف حد يرفعهم للمخزن..
طوبى هزت راسها بصمت وهي معصبه..
مشت الأبله..
وطوبى قالت؛امس واليوم يدير في تصرفات مستفزة مش فاهمه شن قصده بيها..
كيف جت بترد عليها اميمه جاها اتصال..
طلعت تليفونها من جيب البالطو وشافت المتصل قالت..
/اسامه..شويه بس..
ومشت تباعدت عن طوبى بش ترد عليه..
تنهدت طوبى وقالت..
/استغفر الله واتوب اليه..شافت للسلوم بعدين غيرت نظرها للكرسي..لاحظت الشال طايح ع الارض..
قعد تشوفله للحظات..بعدين مشتله..نزلت عليه وخداته شافت اثار الغبرة عليه قعدت تنفض فيها بيدها المغطيه بقفاز اسود...
🍃وهو في هاللحظه جي مولي لما تفكره بش ياخده ويشوفه بين ايديها..
هالموقف شبيه بموقف النظارات اللي صار يوم امس لكن ردة الفعل مفروض ماتكونش متشابهه..
هادي اسمها فرصه ولازم يقنصها على طول...
قدملها..وهي حست بحد جاي..شافت القدام..
رجفت مع بعضها من الفجعه وقلبها يرف رفان..
نزلت عيونها طول وهي محرجه ع الاخر..حطت الشال ع الكرسي ولفت بتمشي..
"طوبى استني ارجوك"
قشعريره سرت في جسمها وصوت نبضات قلبها حساته مسموع في المكان كله..
" ارجوك ماتمشيش في شي مهم نبي نحكي فيه معاك "
غمضت وهي وتحاول تتمالك نفسها بعدين فتحتهم وكيف جايه بتلتفت..
يخشوا الابله ومعاها شباب بش يرفعوا الحاجات..
طوبى لما شافتهم حست انها حتنحط في موقف بايخ طول مشت..
ونظرات عبد القيوم المستاءة معاها لين اختفت من قدام عيونه...
🍃🍃🍃🍃🍃
روحت طوبى هداكا اليوم مع اختها وعقلها مش معاها..
تفكر وتسأل في نفسها شن كان يبي منها في شن بيحكي معاها..شن هو الشي المهم هدا!؟
مابتش تجاوب نفسها اجوبة في نظرها غبيه..لكن أنبت نفسها وجلدتها شتما ع التصرف الغير متزن اللي طلع من وحده زيها....
غمضت عيونها بإستياء وفتحتهم وبدت تستغفر همسا..
وسدرة جنبها تسوق وهي حاسه بيها ومتأكده إن في موقف تاني صار معاها لخبط حالها...
**********
سدرة بضيق..
/كان نلقى معاش تشوفه بكل..
اريج بحزن..
/المشكله جارنا مقابلنا وين بتهرب منه!؟
سدرة بحسرة..
/هالبنت غصة في قلبي والله..خنقتها العبره ودموعها نزلوا..
اريج بحزن؛مانبيهاش تشوفنا صاخفين عليها طوبى تكره الحاجه هادي ياخالتي وبعدين مفروض معاش نحسسوها انها مسكينه وماعندهاش حظ والدوة هادي..مانبيش ثقتها بنفسها تنعدم مرة وحدة..
مسحت سدرة دموعها وهي محتفظه بصمتها..
سمعوا باب الحمام انفتح وتسكر ..شوية وخشت عليهم دار المعيشه وهي لابسه توته شتويه واسعه ولافه شعرها بالفوطه واثار البكي واضحات في عيونها...
...قالتلهم جملة فاجئتهم....
"معاش بنمشي للمدرسه خلاص"
اريج؛علاش!؟
طوبى بضيق:الاختلاط مايجيش بخير بكل خايفه يفسد عليا قلبي..نزلت عيونها خجلا ومشت طلعت من حداهم..
تنهدت اريج وقالت..
/هكي احسن..
هزت سدرة راسها وقالت؛مع الوقت تو تنسى..
🍃وهي خشت للدار وسكرتها عليها..
رفعت عيونها للأعلى وقالت..
/ياربي ابرأ من حولي وقوتي وألجأ لحولك وقوتك..
نزلت عيونها ومسحت دموعها بعدين مشت وقفت قدام الزيانه وحولت المنشف...
🍀🍀🍀🍀🍀
ويعدي من هداكا اليوم تلاثه ايام..
وطوبى منعزله بنفسها مع حفظ القرآن والذكر واكيد اهتمامها ببنتها سبب بهجتها وتمسكها بالحياة واللي حواليها مخليينها ع راحتها..
🍃وراحة هادي ماعرفتش لعبد القيوم طريق لاعاد ليل ليل ولا نهاره نهار..تحوم حواليه فكرة انها ماهيش من قسمه ونصيبه وهو رافض يسلملها..لو سلم لهالفكرة معناها سلم في روحه..ولهدا بدي فعليا يفكر يخطبها رسمي من جدها...
🍃والمهدي اليوم وصله احلى خبر يسمعه في حياته كلها...
يوم الإربعاء...
2يناير...سنة 2020..
"قالت موافقه توكل ع الله"
ابتسم المهدي من قلبه وهو يمسح ع لحيته وصدره يعلا ويهبط من سرعة االنفس..
سميرة بضحكه؛ربي يتمم ع خير ويهنيكم يارب..
حط ايديه الزوز في نصه وقال بإبتسامة احراج..
/آمين..خالتي سميرة اطلبي وتمني..
ضحكت وقالت..
/شن نبي غير نشوفكم متهنيين..
المهدي:تمام اني نجيبلك بمعرفتي..
سميرة بضحكه..
/ياوالله عليك مهدي وخلاص..
ع خشة نضال والجالي للحوش..
شافوا المهدي واصف ع سميرة حدا المدخل استغربوا..
الجالي:شن في!؟
نضال قدملهم والجالي وراه...
سميره؛اهو جي نضوله..الفال ليك ياغالي المهديبيتزوج..
شافوله خوته بدهشه والجالي قاله..
/من بتخطب!؟
سميرة:سدرة الواعر..
انصدم نضال بقوة..اما الجالي مشي لخوه ضمه وكله استبشار وفرح..
/مبارك مبارك واخيرا..وخر عنه وقال..والله هدا وين ارتاح بالي خفت نقعد رافع ذنبك في رقبتك..ودار روحه بيبكي وهو يغطي في عيونه بيده.
سميرة تقاوم في ملامح الاشمئزاز ع وجهها..
اما نضال فكان فعالم تاني مازال مش مستوعب..
طبطب المهدي ع كتف الجالي وقال..
/خلاص اللي فات مات معاش نبوا كلام فيه..
نضال:امي مازال ماتعرفش!؟
الجالي:ايه حقه!
المهدي:اكيد بنعطيها علم رضت مارضتش مش حتغير شي من الاول حاط في بالي نبعت عماتي ومعاهم نسرين يخطبوها..
نضال؛تو تزعل وانت تعرف زعلها..
الجالي:سيورها ترضى..
سميرة شافتله من فوق لتحت
والمهدي قال..
/شويه تانيه ونخش عليها نفتح الموضوع وع قولة الجالي سيورها ترضى..
🍃ومش بس مغليه اللي ماتعرف شي..حتى مختار لليوم مايندري شي..مشغول بأعماله وسط البلاد..وفاتن مشغوله ببوها اللي كان يمر بوعكه صحية...
#كانون_الثاني
#طوبى.
...يتبع...
