#طوبى "جنة طوبى"
#جمان_فريد
#الجزء_الرابع_والتسعين"أوراق متساقطه"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#التسبيح
التسبيح يحمي القلب من أثر الكلام السئ و يورثك شعور رضا يستقر في القلب:
ـ🔖 " وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ* فَسَبِّحْ بِحَمْدِ رَبِّكَ وَكُن مِّنَ السَّاجِدِين " سورة الحجر.
ـ🔖 " فَاصْبِرْ عَلَىٰ مَا يَقُولُونَ وَسَبِّحْ بِحَمْدِ رَبِّكَ قَبْلَ طُلُوعِ الشَّمْسِ وَقَبْلَ الْغُرُوبِ " سورة ق.
ـ🔖 " فَاصْبِرْ عَلَىٰ مَا يَقُولُونَ وَسَبِّحْ بِحَمْدِ رَبِّكَ قَبْلَ طُلُوعِ الشَّمْسِ وَقَبْلَ غُرُوبِهَا ۖ " سورة طه. 🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 يا صبر وين نلقاك بالك تهون عليا احزاني
وياقلب الفقد خلاك مجروح تنزف اتعاني
ياعزم مابيت نلقاك يوم فقدهم واجد رزاني
وياعين كفي ابكاك الدمع يحرق عماني
وياعقل قاطع الواك غالي رحل ماعاد جاني🍃
________________________________________
●●●قبل 40دقيقه●●●
كان عبد الرؤوف في احد الاماكن اللي تؤوي النازحين يقوم بواجبه الانساني في نقل المساعدات..
حال الناس يشوف فيه بعيونه شبه كل يوم..حال يقهر..يوجع..يقتل في اللحظه الف مرة..
وفي عز همه...جاه اتصال..
ووين شاف المتصل..عقد حواجبه بخوف وقلبه تسارعت دقاته..
فتح الخط ورد..
/ايوه..
تبدلت ملامح وجهه الخايفه للألم..غمض عيونه بشده..
"عبروف.."
فتح عيونه وقال بنبره مخنوقه..
/نعم..
"تعالى ل****** بش تشوفه"..
نزل التليفون وهو محطم..موجوع...وخايف..
خايف..من نقل الخبر اللي عرفه...كيف ولمن بيقوله!!
حرك رجليه بقوة ومشي طلع من المكان اللي كان فيه..
وصل في سيارته..وين جي بيفتحها وقف...خدي نفس..
فتحها وركب...سكر الباب..وجه نظره القدام..تفكر اللي سمعه..عاود تفكره اكثر من مرة بش يستوعبه..
لكن ليس الخبر كالعيان..
شغل سيارته..وتحرك..
زاد سرعته...بش يوصل بسرعه..ويشوف بعينه..ويستوعب...
ويصدق...
مش عارف كيف وصل للمستشفى..
درس سيارته..ونزل منها ومشي خشلها بسرعه..
شاف افراد من المقاتلين..شاف اللي يبكي والمنهار..والمصدوم..
بانوا عليه الجرحي..بإصاباتهم المؤلمه..والمفجعه...
خطوط الدم عبوا ارضية المشفى..هو كان يتجنب يعفس عليهم رغم الحاله اللي كان فيها..
وصل في المكان اللي فيه رفيقهم القديم اللي خبره..
لما شافه..قدمله وضمه وقال..
/عظم الله اجرك.
عبد الرؤوف بعدم استيعاب..
/وينه..
تباعد عنه وقال..
/تعالى..
مشي..وهو لحقه برجليه الثاقلات..
لعند ماوصلوا في حجرة سمع منها عبارات الاسترجاع..
واصوات بكاء..
خشوا..واللي معاه قدم لطاوله عليها حد مغطي بشرشاف..
حول عنه الغطا...وبان وجه اقرب صديق لعبد الرؤوف وهو نايم النومه الأخيره..بملامح وجه مرتاحه..
هكي كان ديما وجه خميس السايح"اسكندر" مرتاح ومريح..
مر قدام عيون عبد الرؤوف شريط حياته معاه..
مواقفهم الحلوة والمرة..وقفاته معاه في الفرح والحزن..
ايامهم مع بعض في كل جبهة حاربوا فيها..وكل مهمه نفدوها مع بعض..واخر ماتفكر..
ضحكة اسكندر وهما يرموا فيه فوق ليلة دخلته...
قربله..وقلبه يذرف عليه في دموعه دم..وصل فيه..
طبس عليه..وطبع قبلة الوداع ع جبينه..
تباعد وغطا وجهه..وطلع بسرعه هارب بدموعه من المكان..
🍃طلع من المستشفى وهرب لركن خالي مايشوفه فيه حد..
قعمز ع رووس اصابعه وانهار بالبكي...
بكاه بحرقه...لدرجة حط قبضة يده في فمه..وعض عليها بقوة وهو يبكي بش مايطلعش صوته..
عبد الرؤوف في لحظتها كان منهار تماما وحاس بحيله انهد..كان يبي حد يحمل عنه شويه..ويشاركه ألمه..
هدى شويه ..ورفع تليفونه..حط ع رقمها هي واتصل بيها طول.
🍃🍃🍃🍃🍃
وهي كانت في الكوجينه تشوف في الغدي..
وتسمع في عمتها كيف تغني للصغار ..
ضحكت..بعدين غطت الكسكاس وجت بتطلع..
رن تليفونها..
طلعاته من جيب البيجامه..وشافت المتصل لقاته راجلها..
من بعد هديكا الرساله معاش بعت شي ولااتصل بيها..
حست بشوق مفاجئ ليه لما شافت رقمه...
تلقائيا...فتحت الخط وردت..
غرفه؛ايوه..
جاها صوته وهو يبكي..
انفجعت وهي تقول..
/رؤوف..!لو رؤوف..
صوتها المفجوع جاب طوبى واريج ليها يجروا..
خشوا للكوجينه وهما يشوفولها بنظرات فزع..
غرفه ودموعها ينزلوا قالت..
/رؤوف تكلم بالله عليك..
"اسكندر توفى"
رفعت عيونها في اريج وهي مصدومه..
اريج حستها بقوة..من الصبح من لما قرت رسالته وقلبها مغموم..بلعت ريقها وقالت لخالتها بصوت يرجف..
/شن في!!؟
فصل الخط بين غرفه وراجلها..نزلت التليفون وهي تشوف لأريج ودموعها ينزلوا..
طوبى وهي ترجف من الخوف..
/تكلمي ياغرفه!..
اريج بنبرة مخنوقه..
/اسكندر!! مات ولا!؟
غمضت غرفه عيونها وهزت راسها بإيجاب..
طوبى شافت لأريج بفجعه..
لقتها تشوف لغرفه كيف قعمزت ورا الكرسي بتعب..
🍃في لحظه..
جي بين عيونها يوم اللي خبروهم عمامها عن فقد بوها في الحرب..
حست روحها تبي تهرب من تكرار نفس الموقف..
نفس الالم..نفس الحزن...نفس الفاجعه..
لفت ومشت تجري بإتجاه الباب الرئيسي..وطوبى وراها وهي تنادي بخوف..
/اريج..!
فاتوا من قدام الصاله اللي فيها امها ومطيره..
شافوهم...
مطيره؛خيرهم!..
وفردوس ناضت بسرعه وطلعت وراهم..
🍃في الجنان طوبى شدت اريج اللي كانت تبي تطلع من الحوش بكل..
اريج وهي تفك فروحها منها كانت تقول بعصبيه وصوت يرجف..
/خليني..حولي..حولي..
فردوس بفجعه..
/شن في!!خيرها البنت!!؟ حي عليا ماتقولوهاش!!؟
طوبى وهي تبكي كانت تردد..
/إنا لله وإنا إليه راجعون..
رددتها تلاته مرات ورا بعض..ترددوا ع مسامع اريج اللي ماقدرتش تهرب من مواجهة قدرها..
وقفت مقاومه باستسلام..غمضت عيونها وصرخت بأعلى صوتها...صرخة فجعه وقهر...
🍂وصل صوت صرختها لمسامع اكثر انسان يحبها ع وجه الارض..
كان جاي من لداره وهو يمسح في شعره بالمنشف..
مجرد ماخش للدار..سمعها..
حس قلبه وجه وجع معنوي بس..حتى وجع وضعي..
قدم للروشن..فتحه وقعد يسمع..
من صوت واحد ولت اصوات عياط..
طاحت الفوطه من يده وهو يتنفس بسرعه من الخوف..
بعدين لف ومشي يجري..نزل من الدروج..
وقف عند اخر درجه لما شاف سميره فايته تجري وهي تقول بفزع..
/حي عليا حي عليا..ياربي لا ياربي مش هو..
مشالها يجري وهو يقول..
/خالتي وين ماشيه..
سميرة وقفت وهي ترعش وتفرفش..
/قتلكم والله قتلكم حاستها ياولدي كنت حاستها..
ومشت بسرعه طلعت.
وهو وراها....
طلعت من الحوش وشدت عبايتها وهي تجري لحوش الواعر اللي جوه الجيران يجروا حتى هما..
نضال قعد واقف في الباب وعيونه مع سميره..
🍃جماعه القهوة ومعاهم محمد..ربيع والزباين اللي عنده..
وغيرهم من اهل الشارع والناس اللي فيه كانت انظارهم متوجهه لحوش الواعر بخوف..
🍂🍂🍂🍂
خشت سميره بعد مافتحت طوبى الباب..
شافت اريج وامها ضامات بعض ويبكوا وينوحوا..
سميره بفجعه؛اريج!..
اريج وين سمعت صوت سميره وشافتها تباعدت عن امها وجتها تجري ضمتها وهي تقول بعياط..
/خدوه مني زي ماخدوا بابا....
سميره نزلوا دموعها ..ضمتها اريج ليها بقوة وقعدت تبكي..
زادت ضمتها بقوة اكثر وهي تتفكر فيه كيف وصاها عليها..
واريج تبكي بهستيريا قريب تنجن..
وفردوس تندب ع حظها وحظ بنتها وهي تقول..
/ديما وحني في الكسر..ظهورنا ديما مكسوره..
جتها عمتها ضمتها وهي تبكي معاها..
والجارات يشوفوا ويسمعوا وهما متأثرات ع الآخر ومتعاطفات مع اريج بزياده لأنها عروس جديده مالحقتش تتهنا براجلها...
🍃وطوبى..
خشت للصغار خدتهم كلهم وحطتهم في الدار وسكرت عليهم وهي معاهم بعد ماانفجعوا من العياط..
عطتهم في شن يلهوا..وقعمزت ع السرير وهي تبكي بروحها بألم وصمت...
🍃🍃🍃🍃🍃
وانتشر الخبر..
وسمعوا اهله كلهم برغم توقعهم للشي هدا بس وين جاهم خبره صابتهم الفجعه...
🍂🍂🍂🍂🍂
وانفتح حوشه للعزي..
ويااه..يامصعب اللي حست بيه اريج وهي خاشه لحوشها اللي قبل شهر خشتله عروسه..واليوم تخشله ارمله بش تقبل العزي في عريسها...!
🍃وماأبشع الغربه في الظروف هادي...
الغربه اللي خلت آلاء تعيش وجعها ع راجل اختها وحال اختها بروحها..بعيده عنها..لاتقدر تواسيها ولاتشاركها ألمها..
بكت بقهرة وألم شديدين في حضن راجلها وهي تقول..
"ياروحي عليك ياروجه ياروحي عليك ياوخيتي..نبي نروح عزيز دبرلي..نبي نكون حدا اختي بالله عليك"
وعزيز يرد عليها وهو متألم..
"حاضر ياروحي حاضر"..
🍃🍃🍃🍃🍃🍃
"استغفر الله لكن هادي نية ولدي"
خديجه وهي تكلم في امها هاتفيا..
/اللهم لاشماته في الموت..لكن هالعيله ع اللي داروه معانا مش حيمشوا القدام..وياما مازال جايهم..
"اسمعي تعاليلي العشيه هديكا مهناش وقعدت نحوس ع المفرخ بروحي "
خديجه؛مادام هديكا المرزيه مهناش نجيك عادي..ايه حقه قوليلي معاش كلمك عمر؟
"كلمني امس وقال بنجي قتله اقعد في مكانك"
خديجه؛اما خوتي هادم مش عارفه كيف يفكروا..حس تيم ناض يام خل نمشي نشوفه...نتلاقوا بعدين..
"باهي بالسلامه"..
خديجه؛بالسلامة...ونهت المكالمه ومشت للدار تشوف ولدها..
☘بالهم رايق..لاعليهم في حرب لاموت ولاحاسين باللي صاير لحد☘
🍂🍂🍂🍂
بس في من البعد خلاه لايحس ولايعرف بشي..
سدرة المنتهى اللي خدت منها بنت اختها كل شي حتى قلة حظها في الدنيا..
كانت مقعمزه في حجرتها في المركز..سرحانه بتفكيرها في اهلها..
كانت حاسه اليوم بضيق غريب...وخوف مالاش سبب..خاطرها تكلم اهلها بش تطمن..لكن مافي حد اليوم جاها لاخوتها ولاأمها وهالشي زاد شغلها...
🍃بعيد عنها في مكتب الدكتور المسؤول عن حالتها.
كان مختار مقعمز يتناقش هو والدكتور عن التطورات السريعه اللي صارتلها في فترة العلاج..
بعد حديث دام ساعه الاربع..طلع مختار وهو يدور عن الدكتورة جهينه لين تقابل هو وياه..
مختار بإبتسامه..
/دكتورة..
هي بإبتسامه قالت..
/اهلا استاذ مختار..
مختار:اهلا بيك..دكتورة نبي منك مساعده..ضم سبابته لإبهامه وهو يقول..صغيرونه..
جهينه بإبتسامه..
/قول ان شاء الله نقدر عليها..
مختار؛تقدري..نبي منك تقنعي ولد مايديرش شوره لما بناخد سدرة تقعد معاي اليومين هادم..
جهينه؛سبقاتك خالتي صفيه وكلمتني في الموضوع واني اقنعته بشرط..
ضيق عيونه وقال..
/اللي هو!؟
جهينه؛خالتي صفيه تمشي معاها..
ضحك وقال..
/ابدا ماعنديش مشكله..معناها خلاص نطلع بيها اليوم..
جهينه؛ان شاء الله غير ترضى تروحلنا بعدين..
ضحك وقال..
/لاأتمنى..وضحكوا الزوز بعدين قال..شكرا دكتورة..
جهينه بإبتسامه..
/العفو..
ومشي بطريقه لحجرة سدره..وجهينه مشت وهي تقول بتعجب..
/مش عارفه كيف يخافوا منه!
🍃وهو وصل لحجرة اخته..دق دقتين وفتح الباب..
مختار:سدور..هيا بنمشوا..
سدره شافتله بإستغراب..
سكر الباب..ومشي قعمز ع السرير مقابلها..
مختار:نبي نطلعك من هني اليومين هادم..نبي نوريك سويسرا والنمسا..البلاد اللي اني عايش فيها..ونعرفك ع العيله اللي عندي هني..
ماعلقتش بولاد الكلمه...لازالت مقاطعاته ورافضه الحديث معاه..
مختار:هزي براسك ياستي..
نزلت عيونها لإيديها وهي مضايقه..
مختار:خالتي صفيه بتمشي معانا..
رفعت عيونها وشافتله..
ابتسم وقال..
/العشيه نجي ناخدك تمام..
نزلت عيونها لإيديها وهزت راسها بالموافقه..
ناض وقال:هي سلامات توا...
ومشي طلع من الدار..وقبل ليسكر الباب شافلها بإبتسامه..
وسكره..
وهي رجعت سرحت بفكرها في الغوالي البعاد..
🍃🍃🍃🍃🍃
من المركز طلع مختار للعمارة اللي ساكن فيها يوسف..
🍂ركب للشقه..وصل فيها..وضرب الجرس..
لحظات وانفتح الباب..واللي فتحه يوسف..
شاف ملامح وجهه ماتتفسرش..
مختار:سلام..
يوسف:خش..ومشي..
هو استغرب فيه..خش بعده...سكر الباب ولحقه ..
وين وصل لوسط الشقه لقي صفيه مقعمزة تبكي
مختار بتساؤل..
/شن في!؟
صفيه ببكي..
/راجل اريج بنت فردوس توفى..
بدت ع وجهه ملامح الوجع وقال..
/هدا الآمر في******؟
يوسف؛ايه..
مختار بأسف..
/شي مؤسف هلبه الحق..توا بس سكروا شهر متزوجين..
صفيه ببكي..
/تقطع القلب ياروحي..خايفتها يصيرلها زي زمان لما راح بوها في الحرب..خشت في حالة نفسيه..
مختار بإستياء...
/ياريت فكروا في الشي هدا قبل ليعطوها لراجل حياته ع كف عفريت..
يوسف بضيق..
/كله نصيب
مختار:ع قولتلك كله نصيب..بس المهم توا كيف بيصير يعني بتمشي معانا اني وسدره ولا ماتقدريش؟
يوسف شاف لأمه وقال؛لابتمشي..
رفع مختار حاجبه ومط شواربه بملل..
صفيه مسحت دموعها وقالت..
/ايه بنمشي..
مختار:خلاص خليك واتيه العشيه..
هزت راسها بإيجاب وهي ترشف..
مختار:سلام..ومشي..
بعد سمعوا باب الشقه انفتح وتسكر ويوسف طول قال..
/عديم احساس البني آدم هدا..
صفيه بضيق:مش عارفه كيف بنشد روحي قدام اختك كان قالت عطيني نكلمهم..
يوسف سكت وهو مضايق ع الآخر..
صفيه تنهدت بحرقه وقالت.
/ياريتني حداك يافردوس يابنتي..
🍃🍃🍃🍃🍃
وفردوس من بعد البكي اللي بكاته..خشت في حالة اشبه بالصدمه...
قعدت ساكته ويدوب ترد ع اللي يعزيها..
عيونها ع بنتها اللي مرة تبكي..ومرة تسكت وتسرح..وقلبها قاعد يتقطع عليها..
🍃وسميره..كانت مستغربه في الصبر اللي نزل عليها تبكي بهدوء..لاناحت ولاعيطت..ولو تكلمت عليه تقعد تدعيله بالرحمه..عكس خواتها اللي كانوا حيموتوا ورا خوهم الصغير اللي راج وهو مازال العريس...
🍃🍃🍃🍃
بعد آذان العصر كانت الجنازه في المقبره اللي اندفنوا فيها بوه وامه...
حضروا الجنازة..علي الواعر وولده عبد المطلب وحفيده حسين..ومعاهم المحجوب..
ومحمد شنيبه وولاده المهدي ونضال ...
ومن اهل الشارع ..التارقي..وربيع..وسامي..ورجال عيت الصيد..
واهل اريج من بوها...جدها وعمامها وخوها معتز...
مع خوت اسكندر واقاربه وصحابه..ع راسهم عبد الرؤوف اللي كانت ضايقه بيه الدنيا لدرجة انه تمنى لو كان مكان صاحبه...
🍂🍂🍂
الجنازة كانت مهيبه..الحرب ماقدرتش تمنع هلبه ناس ساكنه في مناطق قريبه من الاشتباكات من حضورها...
🍃🍃🍃
وسكن اسكندر اخر مساكنه في الدنيا..وسيب الحياة بعد ماعاش سعيد في اخر ايامه مع حب عمره...
حتى لو ماسمعش منها كلمة حب..تكفيه المشاعر الحلوة اللي خلاته يحسهم معاها..
🍂راح اسكندر..
وخلا خاطر اريج مكسور من بعده...
راقده في دارهم ع السرير..ودموعها تنزل ع الوساده والذكريات الحلوة قاعده تمر بين عيونها..
وكلمة "بنيتي"قاعده تسمع فيها وكأنه حداها وهو يقول فيها..
غمضت عيونها وهي متمنيه ترقد وتفيق تلقى اللي صار كله مجرد كابوس..
🍃برا من الدار..
كان الحوش مليان بالناس..صغار وكبار..وكالعاده نص الموجودات دايرين العزي لمة نساوين ياكلوا ويشربوا ويهدرزوا..
وطوبى ع اعصابها..مش متحمله تقعد في وسطهم..
ناضت ومشت للدار اللي فيها الصغار راقدين وقعمزت حداهم..وبدت تبكي بصمت..
🍃وفي الكوجينه..
كانوا مطيره وهاديه واميمه وفايزة وغرفه مع اللي يعولوا...
غرفه وين طلعت تفرق في اللبن..شافت عمة عبد الرؤوف وبناويتها الزوز خاشات..
قلبها انغم اكثر ماهو مغموم..فرقت ع الناس بسرعه قبل ليقعمزوا وولت طول للكوجينه..
🍃خشت حطت السفره ع الرخامه وهي تقول..
/استغفر الله.
اميمه:خيرك!؟
غرفه بإزدراء:عمة رؤوف وعقاربها الزوز جو..
اميمه بضيق:مش وقته بكل راهو..
غرفه بضيق:عارفه..لكن مش بيدي..
تنهدت اميمه ومشت طلعت بالتمر من حداها..
وهي جبدت كرسي وقعمزت..
🍃وراجلها بملامح متجهمه في خيمة العزي يستقبل في المعزين مع اهل اسكندر..
وعيون التارقي تراقب فيه..
المهدي:صار تقدم كبير في جميع المحاور..
التارقي: نقولوا ان شاء الله تحز..
ربيع:مااعتقدش..الحكايه قاعده في بدايتها..
سكتوا التلاته وهما يشوفوا في الناس اللي خاشه تعزي كان واضح عليهم اصحاب مراكز مهمه في البلاد..
المهدي قعد يسمي اللي يعرفهم منهم وهما يسمعوله..
عبد القيوم:الله يرحمه ويغفرله كان راجل محترم واخلاقه عاليه يفرض ع اللي يعرفه احترامه..
سامي:بين عيوني كيف كان في عرسه فرحان ويضحك طول الوقت..
المهدي وجه نظره لخوه نضال اللي كان مقعمز بعيد عليهم..
شافه مربع ايديه ويبان سرحان وملامح الأسف والحزن باديات ع وجهه...
🍃نضال وقتها كان يفكر في الموت...يفكر في اللحظه اللي يخلي فيها الانسان الدنيا شن يقعد وراه!!؟
جي بين عيونه شكل حياته اللي كان عايشها..تعبا قلبه بالخوف..خاف لو فارق الدنيا وهو ع هالحال..
تنفس بخوف..وجي في باله كلام لإبن القيم قعد عالق في راسه من كثر ماأثر فيه..
《الخوف يُبعدك عن معصيته، والرجاء يخرجك إلى طاعته، والحب يسوقك إليه سوقاً..》
تبدد خوفه في هديكا اللحظه وهو يمرر في نظره قدامه..
ع الخيمه والناس اللي تعزي..وقال في نفسه..
"الله يرحمه..حسيت ربي حطه في طريقي بش يعاقبني بيه وفي نفس الوقت يغير نظرتي في الحياة كلها"
تنهد وفكره رجع رفعه لمكان تاني..لعند خالته سميره..كان خاطره يشوفها ويهدرز عليها ويخفف عنها..بس تحقيق الشي هدا صعب حاليا....
🍂🍂🍂🍂🍂🍂🍂
طلع من المركز وهي في جنبه ع الكرسي المتحرك الكهربائي وصفيه معاها..
وصلوا في سيارته...
هو اشرلها ع الباب اللي جنبه..
بدت ع وجهها ملامح الضيق..فم انها ماتبيش تركب جنبه..
مختار:ماهو مش الشوفير متاعك تمام
فتح الباب..وجاها..رفعها بين ايديه وركبها السياره..
عدللها جلستها كويس وهي تشوفله بضيق وعصبيه..
وخر عنها وسكر الباب..وفتح الخلفي لصفيه ركبت صفيه..وهو سكر الباب..بعدين ضم الكرسي وحطه في صندوق السياره..
واخيرا مشي ركب..شاف لسدرة لقاها قاعده معصبه..
ابتسم..طلع تليفونه من جاكيته وكتب رساله بعدين بعتها..رد التليفون لجيبه..
شغل السيارة وتحرك..
والصمت قعد سيد الموقف..لين وصلوا في محل ورد..
درس قدامه ونزل بدون مايتكلم..
تنهدت سدره وقالت..
/كان..تتصلي بطوبى..ولاعمتي نبي نكلمهم..
صفيه بتوتر مخفي قالت..
/راجي لين نوصلوا بش تكلميهم براحتك..
سكتت سدره لأن مختار جي..
خش السيارة وباقه ورد مشكله في يده قال..
/بعدين تعرفوا علاش جبتها..حطها ع التابلو وقال..شفتوا المكان اللي حني فيه...شفت احلى واريح من هكي قبل!
صفيه:الله يبارك تقول جنه..
هو ابتسم..تحرك بالسيارة..شافلها..
لقاها تتفرج ع الطبيعه وملامح وجهها وقتها كانت هاديه..
ابتسم وشغل المنظومه..وبدت فيروز تغني وهو معاها...
//البنت الشلبيه ... عيونا لوزيه
بحبك من قلبى يا قلبى
انتى عينيا
بحبك من قلبى يا قلبى
انتى عينيا
🍀حركت نظرها ليه وقعدت تشوفله كيف يغني..
صوته زاد عذوبه عن قبل..طريقته في الغني قاعده هي هي...
فجأه شافلها وهو يغني...
حد القناطر ... محبوبى ناطر
كسر الخواطر يا ولفى
ما هان عليا
كسر الخواطر يا ولفى
ما هان عليا
غيرت نظرها عنه وقعدت تشوف للطريق..
وهو ابتسم وقعد يدندن مع الموسيقى..
شوية ورجع يغني وهي ردت نظرها ليه...
بتطل ... بتلوح
و القلب ... مجروح
و أيام عالبال
بتعن و تروح
أيام عالبال
بتعن و تروح
🌼وصفيه تسمع فيه ودموعها ينزلوا بعد خطرت عليها سلفتها اللي كانت تعشق صوت فيروز..
🍃🍃🍃🍃🍃
وبعد ماقطعوا مسافه ماحستش بيها سدره وهي هايمه في بديع صنع الله في الطبيعه..
وصلوا في مكان كله خضرة وجمال..
يتوسطه كوخ خشبي منظره حلو بالمرة..
درس السيارة وقال..
/شن رايكم!؟
صفيه وهي مبهورة.
/زي اللي نشوف فيهم في التلفزيون..
ضحك وشاف لسدره..لقاها تتأمل فالكوخ..
ابتسم وخدي الباقه ونزل..سكر الباب ومشي فتح الباب لصفيه..
نزلت وهي تتفرج ع المكان بانبهار..
مدلها المفتاح وقال..
/ياريت تفتحي باب الكوخ..
خداته وهي مرتبكه بعض الشي..
وهو مشي فتح الباب لسدره..وعطاها الباقه..
هي شافتلها شويه بعدين خدتها..
ابتسم..وقربلها رفعها في حضنه وقال لصفيه..
/بسرعه خالتي افتحي الباب بنموت..
تلقائيا سدره ضرباته ع صدره..
هو قال؛جديات سمنتي راهو..
قلبت وجهها عنه بعصبيه..
ضحك عليها ومشي بيها للكوخ..
فتحت صفيه الباب وهي مبتسمه ووخرت..
خش بسدرة اللي بدت ع وجهها ملامح الانبهار بشكل الكوخ من داخل..كان كله بالألوان الخريفيه..فيه دفي رهيب..دفي معنوي يحسه القلب..
حطها ع كنبه وقعمز جنبها وهو يتنفس بصعوبه تصنعا..
شافتله بحده بطرف عينها..
وهو شاف نظرتها قعد يضحك..
قعمزت صفيه ع كرسي بروحها وقالت..
/الله يبارك كل شي هني حلو..
ابتسم وهو يشوفلها..
سدرة ؛اهو وصلنا...عطيني نكلمهم..
شافت صفيه لمختار..
وهو ناض وقال...
/بعدين سدور بعدين..توا بندهور بيكم الدهيوره تنسيكم ليبيا ومايجي ومنها..
صفيه:ايه حتى اني خاطري ندهور في المكان..
مختار:تمام تعالي معاي نجيبوا الكرسي متاعها..
ومشي وصفيه طول ناضت ولحقاته وخلت سدرة وراها مستغربه وبالها مشغول..
🍃🍃🍃🍃🍃
مختار وهو يطلع في الكرسي المتحرك قال..
/مش حترقد لين تكلمهم كلمي يوسف يحاول مع حد فيهم يكلمها بدون مايبين شي..
صفيه هزت راسها بإيجاب وهي متوترة..طلعت تليفونها من شنطتها واتصلت بيوسف..
🍃🍃🍃🍃🍃
"حاسه روحي بنهبل ياطوبى نار والعه فيا نار"
طوبى ودموعها ينزلوا...
/هدي روحك حبيبتي..الله غالب الظروف حكمت تو تحصلي فرصه وتروحي..
"يارب يارب..حسبي الله ونعم الوكيل فيهم..الله لايربحهم كلهم..."
وقعدت تبكي بالعبره..
طوبى بألم..
/معليشي حبيبتي معليشي..قدر الله وماشاء فعل ولااعتراض ع حكم ربي..
الاء ببكي..
/ربي مايرضاش بهالحال ياطوبى..
سكتت طوبى وقلبها موجوع مش عارفه شن تقول ولابشن تواسي..في مواقف فيها الكلام ماينفع بشي..
فجأه..انقطع الاتصال بالنت..لما جاها اتصال ع الهاتف وكان من يوسف..
طول فتحت الخط وقالت..
/السلام عليكم..
"وعليكم السلام..عظم الله اجركم.."
طوبى:اجرنا واجرك..سدره عرفت!؟
"لا..ومانقدروش نخبروها بحاجه زي هادي الخبر مش ساهل بكل ياطوبى"
رشفت وقالت...
/عندك حق..
"المهم هي شاده تبي تكلكم واني نعرفها قلبها يحس بيكم بشكل غريب..
بدت ع وجه طوبى ملامح الالم ودموعها زي السيل..
"طوبى حاولي تقوي نفسك وتتماسكي..نبيك انتي تكلميها.."
طوبى بخوف؛علاش اني يايوسف من قالك نقدر نشد روحي قدامها..ولانعرف نكذب عليها اصلا..
"طوبى مافيش غيرك كان تكلمه سدره ترتاح"
تنهدت بضيق وقعدت ساكته..
"شويه تانيه وتتصل بيك امي.."
طوبى خدت نفس بعدين قالت..
/باهي سكر سكر خل نمشي نغسل وجهي..
هو قال..
/تمام..سلام..
طوبى:وعليك السلام..ونهت المكالمه..حطت تليفونها في شنطة بنتها..وناضت بتطلع للحمام...
🍃🍃🍃
وغسلت وجهها..وهيئت نفسها لإتصال اختها اللي لازم مايبان عليها شي فيه يكدرها ويشغلها عليهم..
🍂واتصلت صفيه فيديو..وردت طوبى وهي راسمه ابتسامه عريضه ع وجهها..
هدرزت ع اختها وبصرت عليها وضحكتها...ولما سألتها ع الباقي كذبت وقالت ماشيين يعزوا جارة ليهم خوها توفى..
وبدت تنهال عليها اسئله وترتها..
مني من ولاد الجارة اللي توفى..وشن سبب وفاته..ومتزوج ولالا..
وطوبى تألف وتكذب وتحاول ع قد ماتقدر تخفي توترها وارتباكها..وبعد شق الانفس نهت المكالمه مع سدره وصدرها ضايق..
فجأه..سمعت صوت عياط اريج..
طلعت تجري من الدار....لقت فردوس ومطيره ووحده من عمات اريج جايات يجروا..
خشوا عليها الدار..وهي خشت بعدهم..
شافوا اريج شاده حزامها وهي تعيط وتبكي..وتحتها بقعة دم..
امها انصدمت..
وطوبى قعدت ترجف مع بعضها..
مطيره بألم؛لاحول ولاقوة الا بالله..
وعمة اريج تبكي.
ع خشة اميمه ومعاها سميره وغرفه..
سميره وين شافت حالة اريج..حست خوها مات مرة تانيه..
اميمه ودموعها ينزلوا..
/شن تحسي اريج..
اريج ببكي ووجع وعياط..
/مواس تقطع فيا ياأميمه..ااه ياربي..ارحمني ارحمني ياربي تعبت..
طوبى وهي تبكي قالت..
/كلموا حد يرفعها!..
مطيره بنبره باكيه..
/حد من عمامها.
عمتها وهي تبكي:تو نكلم واحد منهم..
اميمه؛بسرعه بالله عليك...
طلعت العمة من حداهم بسرعه..
وهما قعدوا حوالين اريج يحاولوا يخففوا عنها الألم..
وامها واقفه تشوف لبنتها بنظرات مليانه حزن وكسره..
🍂عيون هاديه كانوا عليها وهي تشوفلها بحزن..غيرتهم عنها لسميره اللي طلعت من قدامها وهي تبكي وبعدين تلقوها خواتها اللي قعدوا يبكوا معاها..
ردت نظرها لأريج وهي تشوفلها بأسف وشفقه تقول في نفسها..
"صبارة وقويه يااريج هدا كله حتعديه وتولي خير من قبل ان شاء الله"
#اوراق_متساقطه
#طوبى
....يتبع...
