#طوبى "جنة طوبى"
#جمان_فريد
#الجزء_119"أنا وياك"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#القرآن
ماذا لو أقبلنا على القرآن بحضور قلب ؟!
" فإنّ قراءة القرآن بالتدبّر تُعطي العبد قُوةً في قلبه، وحياة، وسعة، وانشراحًا، وبهجةً، وسُرورًا؛ فيصير في شأن والنّاس في شأنٍ آخَر ".
- مدارج السالكين لـ ابن القيم 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 كيف أُخْفي الذي قد بات يَسْكُنني
والْعيْنُ مُبْدِيَةٌ والْقَلْبُ مُعْتَرِفُ🍃
__________________________________________
"ليلة حفلة صفاء كنت في الحمام نساوي في مكياجي بعد ماطلعت منه بنولي للقاعه سمعت دوة انذكر فيها اسمك الدوة هادي كانت بين خالتي سالمين وصفيه بنت عمة عبد القيوم كانت صفيه تحكي لسالمين وتقوللها ان البنت اللي يبيها عبد القيوم وجي ع خاطرها لطرابلس انتي"
☘واستمرت اميمه تحكي في اللي تعرفه وسط اندهاش غرفة وأريج وآلاء..
اما طوبى..فكانت في حالة بين الصدمه وعدم الاستيعاب..
حاطه يدها ع قلبها اللي حساته يرجف..للحظة تخيلاته بيوقف من قوة وسرعة النبض..!
تسمع ومازال مش عارفه روحها لو هي وسط حلم..اوحديث نفس ولا حقيقة واقعه..
من كل الكلام اللي سمعاته جمله وحده غرقت عيونها بالدموع..
"لا وطلع الليله اللي وصل فيها للشارع هي نفسها ليلة حفلة عرسنا اني وطوبى"
غيرت نظرها للفراغ وهي تفكر وتحس في الجمله اللي معاش سمعت شي بعدها..
وهني عقلها طلع ملفات من الذاكرة وفتحهم وعرضهم عليها..
اولهم الليله اللي حكالها فيها عن حبه لطرابلس وبنغازي وماباش يقوللها السبب..
ورده عليها لما سألاته امتى جي لطرابلس..
"مصرة توجعيلي قلبي"
لما تفكرت النبرة اللي قال بيها هالجمله وجعها قلبها..
واستمر عقلها يفكر فيها..
بكلامه...نظراته..حركاته..اهتمامه بيها..احتوائه ليها..خوفه عليها..هدا كله كان سبب حبه الكبير المحبوس في قلبه..حب كان صعب عليها تشوفه ولاتفهمه..
بس من بين الحاجات اللي فكرها بيهم عقلها مكالمة امس مع صفيه..
سؤال صفيه!!..
تو بس فهمت القصد منه..لكن اللي ماقدرتش تفهمه ردة فعله وقتها..علاش قاعد مدرق عليها وماصارحهاش!!
"طوبى"
استاقظت من سرحانها لما سمعت وحست بيد غرفه اللي انحطت ع رجلها وهي تنادي فيها..
شافتلها ومازال ملامح الصدمه مرسومات ع وجهها.
غرفه والدموع في عيونها وهي مبتسمه بفرح قالت..
/سمعتي شن قالت اميمه!
رمشت عيونها بسرعه بعدين ردتهم لأميمه وهي تقول بتساؤل..
"باهي علاش لتوا ماصارحنيش!؟"
لااميمه ولاأي وحده من الموجودات معاها قدروا يجاوبوها..
نزلت من عينها دمعه مسحتها وهي تقول..
/سدرة اكثر من مرة تقولي فترة وتعدي..اول مرة تكلمت معاي في الموضوع..قالت..خدت نفس وكملت تقول بنبرة مرتجفه..قالت هو يبي يساعدني في العلاج وبس مستحيل سدرة تكذب عليا في حاجه زي هادي اكيد هو قاللها هكي!..
غرفه بتعجب..
/شن تقولي ياطوبى!تو مش انتي يومها حكتيلي حاجات تبين انه يبيك ويبي يكمل معاك!؟
بلعت ريقها وقالت..
/ايه اني وقتها فهمتها هكي قبل لنعرف هدا كله..
اريج بضيق وحزن..
/شن تبي تقولي بالزبط!
حطت ايديها ع رجليها وشدت ع فستانها بقوة وهي تقول..
/نبي نقول انه مايبيش يستعجل لأنه خايف مايقدرش يكمل بعدين..
شافوا لبعض بنظرات بضيق ماعرفوش شن يقولولها استنتاجها منطقي..مافيش تفسير لإخفائه لحقيقة قصته معاهاغير هدا..
مررت نظرها عليهم وهي تراجي في وحده منهم تقول حاجه تفرح وتريح قلبها..
🍃للأسف الانسان الصافي والطيب لما يتعرض لخيبات أمل قويه بدون مايقصد يقعد ديما خايف من أي شي حلو يصير معاه مش لسوء ظنه بالله بل بسبب ماخلفاته هالخيبات القويه من آثار ع نفسية هالإنسان..🍃
غمضت عيونها ومسحت بإيديها ع وجهها وهي تاخد في نفس..
انفاسها كانت مرتجفه هما يسمعوا فيها وقلوبهم توجعهم بالذات اميمه اللي ندمت اشد الندم لأنها حكتلها وتمنت لو خلت هالمهمه لصاحب الشأن بيها قال اللي عنده وكملوا حياتهم مع بعض او قعد داسه في قلبه وكل حد مشي ع حاله بأقل الأضرار..
دق باب الدار..
كلهم وجهوا انظارهم ليه..
"بنات"
مسحت طوبى دموعها كويس وقالت..
/خشي سديرة..
فتحت الباب وقالت..
/اجتماع مجلس الأمن..
ضحكت طوبى تصنعا وهما ضحكوا معاها نفس الضحكه..
أميمه بضحكه تخفي ارتباكها..
/كنا نقصقصوا فيها..
سدرة:عارفتكم عارفه..اطلعوا اشربوا معانا الشاهي اطلعوا..
ركزت بالنظر ع طوبى بعدين مشت..
طوبى استجمعت نفسها وقالت..
/هيا نوضوا نطلعوا هيا..
اميمه بضيق..
/اسفه طوبى..
يدوب ابتسمت وقالت..
/خلاص انسي وكأني ماسمعت شي..هيا خل نطلعوا ونسمعوا هداريز هاديه وفردوس استاحشت هدرزتهم..
🍃وطلعوا مع بعض من الدار وولا وحده قعد معاها عقلها.
حتى لو انسجموا شويه في الهدرزة يرجعوا يفكروا في نفس الموضوع..ماعدا طوبى اللي قعدت في عالم تاني دايرة روحها تسمع في الهدرزة ومنسجمه وهي ماتسمع منها في ولا كلمه..
☘☘☘
اما برا..
فكان عبد القيوم مع حسين يلعبوا مع الصغار في جهة الحيوانات الأليفه..ومرة مرة يهدرزوا..
لاحظ حسين اهتمام عبد القيوم الخاص بجنة وانسجامها معاه وزاد ارتاح لزواج عبد القيوم وطوبى اكثر واكثر..
وبعيد عنهم بمسافه بسيطه كان عبد المطلب يدور في الاراضي المزروعه بالفواكه والخضره وفي عقله يحسب قداش تجيب لو انباعت في السوق..!
🍃الطبع غلاب🍃
🍃🍃🍃🍃🍃
"وهادي قصتها كلها والله مانقصت ولازدت عليها حاجه يانفيسة"
الجمله هادي ختمت بيها سميرة سردها لقصة عمر وتجاربه الفاشله مع الزواج..
كانت تحكي لبنت حماة اختها اللي حتى هي عانت من تجربة زواج فاشله..
تنهدت وردت ع سميرة تقول..
/نبي نقعمز معاه ونسمع منه هو ويسمع مني..
سميرة:تبي مقابله شرعيه!
نفيسه:لانبيه يجيني للمصرف في مكان قريب عليه نقعمزوا فيه ونحكوا براحتنا..
سميرة:باهي تو نقوله ونرد عليك وربي يقدم اللي فيه الخير..
ابتسمت نفيسه مجامله وقالت..
/إن شاء الله..
***********
عمر وهو مضيق عيونه قال..
/اه..تخدم غادي هي!؟
سميرة؛ايه..امتى يناسبك تمشيلها!؟
عمر:السبت ان شاء الله الأحد عندي رحله مش مروح لبعد اسبوع..
سميرة؛باهي تو نتصل بيها توا ونقوللها ونرد عليك..
هز راسه بإيجاب ومشي ركب الدروج وسميرة توجهت لجناحها..
🍃وهي ماشيه فاتت من قدام دار نسرين اللي كانت تكلم في صاحبتها فايزة هاتفيا..
نسرين:باهي عطيهم فرصه اسمعي منهم..
"لالا يانسرين مانبيش مانبيهمش يانسرين مانبي منهم حد"
نسرين:شراده اهدي وخودي نفس حبيبتي..
سمعت صوتها وهي تاخد في شهيق وزفيز..
كملت نسرين كلامها وهي تقول..
/هادي صلة رحم حرام تقطعيها من عندك كان في من يبي يوصلها يافايزة ربك يحاسبك راهو..
"عارفه عارفه..لكن قلبي مطبق سيرتهم تخنق فيا"
نسرين:فاهمه عليك وحاسه بيك لكن حاولي ديري اللي عليك وحتى لو رديتي علاقتك بيهم ماتتعمقيش فيها لين تتأكدي من صدق نيتهم..
تنهدت فايزة وقعدت ساكته..
نسرين؛اسمعي مني وديري اللي قتلك عليه..
"تو نشوف..تو نشوف"
🍃هو نفسه الخوف من خيبة الامل اللي ممكن تفتح جروح ماصدقوا صحابها انها التئمت..🍃
🍁🍁🍁
عدت باقي ساعات هديكا اللمه ع طوبى وهي مضايقه ومخنوقه وعقلها مش معاها..
لاحظت سدرة ان نور وجهها اللي شافاته عليها اليومين اللي فاتوا انطفي وفسرت هالشي ع ان طوبى رجعت تحس بأعراض السحر ولأن في نظرها حاجه زي هادي طبيعيه مابتش تسأل طوبى عنها..
🍃🍃
داروا عشاهم وتعشوا..ومن ضمن هالعشي كان طاجين الدجاج اللي ماكلتش منه طوبى نهائي يدوب نقشت تنقيش من الحاجات اللي داروهم فردوس وهاديه وكانت طول قعدتهم ع العشي تجامل وتحاول تبين انها عاديه..
واستمرت ع هالوضع لعند ماجي وقت مرواحهم لكن قبل المرواح بشويه خدت اريج طوبى ع جنب وقالتلها..
☘اريج:مرات يكون متحشم ولامش عارف كيف يجيبهالك راهو القصه تصطدم هلبه قصدي مرات تبيلها مقدمات ومرات يبي يحس انك تبيه زي ماهو يبيك..
طوبى كانت تبي تسمع اي كلام يطمن قلبها لهذا اقتنعت بسرعه بكلام اريج..
شدت اريج ع ذراعها وقالت..
/حاولي تسهليلها عليه..
عقدت حواجبها وهي تفكر..
باستها اريج من خدودها وقالت..
/تصبحي ع خير...
ومشت تجري وهي تسمع في منبه سيارة حسين بعد ماادرقت عن عيونها خشت طوبى للحوش وهي تفكر في كلام اريج ومااستاقظش من تفكيرها الا ع صوته وهو يقول..
"حتى حسين خش ع نظام الطبان"
شافتله وقالت..
/قصدك ماعطاكش علم!
بضحكه قال..
/دايرها مداهمه..
يدوب ابتسمت..
هو بإبتسامه قال..
/المهم انتي فرحاتك جيتهم..
بإبتسامة مجامله قالت..
/اكيد..تنهدت وكملت تقول..خاطري نسهر برا الليله الجو لطيف وقنين..
وهو مبتسم قال..
/كان خاطرك حاضر نسهروا برا..
دق قلبها بقوة وهي تقول..
/ع جذع الشجرة..
هز راسه وقال بإبتسامه..
/ع جذع الشجره..غير البسي حاجه تقيك صقع شويه
هزت راسها وقالت..
/حاضر..ولفت ومشت للدار..
تبعها بعيونه وهو ملاحظ انها مش ع بعضها وطلبها منه انهم يسهروا عن جذع الشجره خلاه يستنتج انها تبي تحكي معاه بوضوح عن وضعهم..ابتسم بتنهيده ومشي قعمز ع الصالون وهو يراجي فيها...
🍃🍃🍃🍃
فهالوقت..
وصلوا سيارة حسين وبوه لمزرعة غرفه..
بعد مادرسوا السيارات داخل نزلوا البنات وخشوا داخل..
وفردوس رافعه في حضنها جنه اللي اصرت تروح معاهم من شوقها ليهم ولصغار غرفه..
🍃في الدار اللي فيها البنات..
اميمه بضيق..
/ياريتني ماتكلمت ياريتني..
غرفه؛انتي علاش ماحكتيش بعدين ليها فوق العام مطلقه من الجالي!
اميمه بإنزعاج..
/مش قالوا يبي السوريه وماليه يبوا يخطبوهاله!
اريج؛عندها الحق شن تبيها تقول وقتها وكان حق طلع يبي السوريه!
سكتت غرفه وهي مضايقه..
آلاء وهي تحط في ولدها ع الفراش قالت..
/تعرفوا اني في شن نفكر!..
التفتتلهم وهي تقول..في ماليه..واضح مايبوهاش يعني كان عرفوا شن بتكون ردة فعلهم..
أريج بحزن..
/مش عارفه علاش حظها هكي!
غرفه ودموع في عيونها..
/هدا اللي قاهرني ع قد ماهي كويسه وقلبها طيب حظها في الدنيا شويه..شويه لين خلاص..شوفي حتى بنتها اللي نقولوا بالك ربي بيعوضها بيها ولت مش قادرة تعيش معاها..
نزلوا دموع اريج..
اميمه بألم..
/اكثر حاجه واجعتلي قلبي..شفتها كيف تحضن فيها وتبوس وحني مروحين وجعتني الدمعه اللي شفتها حاصله في عيونها..
حطت اريج ايديها ع وجهها وقعدت تبكي..
وهما حواليها يذرفوا في الدموع بصمت...
🍃🍃🍃🍃🍃
تحت سمي مليانه نجوم...
ليلة صافيه..جوها لطيف...وفي ريحة حلوة معبيه الأرجاء..
ع جذع شجرة طويل..
كانوا مقعمزين..بينهم مسافه..لابعيده..ولاقريبه..
عيونهم فوق..يتأملوا في النجوم..يعدوا فيها...
والصمت سيد الموقف...
هي كانت حاسه روحها تبي تتكلم اليوم..تبي تتكلم بس وهو يسمع...
وهو هاليوم كان حاس بإنعدام الرغبه في الكلام..
كان يبي يحس بوجودها معاه وجنبه بس..هي اصلا قليلة الكلام..متعود ع صمتها...وحب فيها كل تفصيل حلو ومش حلو...
نزلت عيونها ووجهتهم ليه...وتفكرت كلام اريج اللي قاعد يتكرر في عقلها..نصيحه صعب عليها ديرها..بس كانت تبي تاخد بيها الليله بالذات بعد اللي عرفاته من حقيقة صدمتها ولخبطت تفكيرها اكثر ماهو ملخبط...
فجأه..شبح جيهتها..
بسرعه غيرت عيونها القدام وهي متوترة..
هو ضيق عيونه وقعد مركز فيها..واضح تتنفس بسرعه..وعيونها كانوا متوسعات..
ابتسم ابتسامه خفيفه..ورجع شاف للنجوم..
هي مررت نظرها قدامها..بعدين رجعت شافتله..
لقاته يشوف للنجوم..شكله الهادي كان جذاب..مخليها تبي تشوفله بس بدون ماتتكلم...
نزلت عيونها لإيديه..لقاته ضمهم لبعض..وقعد يضرب بأصابع يده اليسار ع ظهر يده اليمين..
هو هني شبحلها..لقاها تشوف لإيديه..
ابتسم ورفعهم بشويه وقعد يساوي في لحيته بيهم..وهي تبع في حركتهم بس..شويه رفعت عيونها فيه لقاته يشوفلها..
ماقدرتش تغير عيونها..حست روحها جمدت بكل..
كبرت ابتسامته شويه بعدين نزل ايديه وحطهم ع الجذع يمينه ويساره وهو يشوفلها بنظرات تحكي هلبه كلام..
للأسف مش واصلها معناه..
تنهدت بعدين رمشت عيونها وشافت القدام...
هو ضحك ضحكه خفيفة هاديه..بعدين غير نظره القدام...
وبعد لحظات زادت طولت حالة الصمت اللي هما فيها قررت اخيرا تخرج عن صمتها وتنفد النصيحه...
🍁طوبى:بكري جنونه قالتلي تبي الملاهي..
بضحكه قال:قالتها ليا حتى نا..
ابتسمت وهي تحاول تخفي توترها لما قالت..
/تصدق حتى اني خاطري فيها هلبه..
قاللها؛خلاص بكرا ان شاء الله ناخدوها ونعدوا للملاهي..
سكتت شويه بعدين قالت..
/تفكرت حاجه قديمه صارت معاي زمان في الملاهي كرهتني فيهم قعدت سنين مانمشيلهمش..
ضيق عيونه وهو يشوفلها وقال..
/شن صار معاك!؟
وهي تشوف القدام قالت..
/نتفكر وقتها كان عمري بالك عشرة ولا11سنة..شبكت اصابع ايديها ع بعض وهي حاطتهم ع رجليها وكملت تقول..رفعنا حسين اني واميمه للملاهي..ضحكت وقالت..ماخليت في شن لعبت بعدين هما الزوز قعدوا يلعبوا..بلعت ريقها وكملت تقول..وهما يلعبوا اني كنت نتفرج عليهم..شويه سمعت صوت بكي بنت صغيره كانت في عمر جنونه توا وجعتني هلبه..مشتيلها وسمعتها تقول بابا وماما وهي تبكي زبطتها رايحه..ضمت ايديها ع بعض وهي تقول..مشيت معاها وقعدت ندور ع ماليها..
🍁هو كان يشوفلها وهي تحكي بإبتسامة حلوة..وقلبه يرف رفان وبين عيونه هداكا اليوم بكل تفاصيله..لكن ملامح ابتسامته تبدلت للإستغراب وهو يسمع في تكملتها للقصه..
طوبى:وبعد مادورت معاها لقيناهم هما خدوا بنتهم واني وليت وين ماكنت ووقتها حسين واميمه قلبوا الدنيا وهما يدوروا عليا..ولما لقوني..ضحكت بأرتباك وقالت..حسين بدون سابق انذار عطاني كف معاش خلاني نحس بخدي حتى حنكي معاش حسيت بيه..
توا بس تفكر الموقف هدا حكاله عليه حسين قبل بس ردة فعله توا لما سمعه مرة تانيه منها كانت مختلفه تماما..
بدت ع وجهه ملامح الغضب وهو يقول..
/شن الهمجيه هذي!؟
شافتله وقالت بإبتسامه..
/كرهته وقتها كرهته كره ماينوصفش وقعدت فتره طويله واخده منه موقف..
غير نظره عنها وهو معصب ومضايق في نفس الوقت وهي تشوفله..كانت تراجي يقول شي..قصدا قصت اهم جزئيه في القصه بش تحفزه اكثر يتكلم لو فعلا يبي يحكي والحشم مانعه زي ماقالت اريج..
لكن عبد القيوم ماتكلمش..غيرته من حسين مخلياته برغم مرور زمن ع الموقف اللي حكاته طوبى وبرغم انه سامع بيه قبل في حالة غضب منه...
غيرت نظرها عنه للسمي وهي مضايقه ع الآخر..شبه اتأكدت من استنتاجها وهالشي دخل ع قلبها الحزن خلاها تبي تبكي لكن تماسكت ووقفت وهي تقول..
/الجو يقولك ارقد بس..نعسني النوم..
شافلها للحظات بعدين ابتسم وناض وهو يقول..
/ع راحتك..
مشت طول وهو مشي معاها..كان يشوفلها ويفكر وهي ماكانتش تبي تشوفله كل اللي تبيه انها توصل في دارها وبس..
🍁كملوا طريقهم بصمت لين وصلوا للحوش..
خشوله وهي طول توجهت لدارها قبل لتوصل في الباب سمعاته يقول..
" تنسيد سالخير إيمانين"
التفتت وردت عليه وهي مبتسمه بالغصب..
/وانت من اهله...
فتحت الباب وخشت وسكرت الباب..
وهو مشي خش الصاله قعمز ع الكنبه ورجع يفكر في الحديث اللي دار بينه وبينها..تنهد بعدين قال..
/ناسياتك بالمرة ياعبد القيوم...ابتسم وقال..لكن مش مشكله تو نفكرها..تونفكرها بطريقه تخليها ماتنساش العمر كله..
رفع هاتفه وشاف الساعه بعدين قال..
/مازال وقت نومه..
ناض من مكانه ومشي فتح باب الحوش وطلع..
🍃وهي فالدار كانت تبدل في حوايجها وهي تذرف في الدموع..
اللي عرفاته ع قد ماصدمها وفاجئها لكن للأسف مافرحهاش بل زاد ع مابيها..
وهي في الحالة استغل الشيطان الفرصه وبدي يوسوسلها بالأفكار السودا اللي تزيد حزن قلبها لكن هي فيسع دحراته خدت هاتفها ومشت قعمزت ع سريرها وحطت ع تطبيق القرآن وحطت ع سورة النجم وبدت تقرا فيها..
وماإن كملت قرايتها الا ونفسيتها كانت مرتاحه وع طول خشت ع سور البقرة..تمددت ع جنبها الأيمن وبدت تقرا فيها ومارقدتش إلا بعد ماكملتها..
🍃وتمر الساعات وهي غارقه في النوم..
والنوم رفعها مرة تانيه لعالم المنام..
هالمرة شافت مايشبه الكابوس مرعب بمعنى الكلمه في اخره شافت وجه مخيف مبتسم بشر وهو يشوفلها..
فاقت من نومها مفزوعه..حطت يدها ع مكان قلبها كان يدق بقوة من الخوف..
ناضت بالشويه وقعمزت وهي تتعوذ من الشيطان وتكرر في تاج الذكر..
حالة قلبها خلت جسمها كله يفشل..حست انها حيغمى عليها في اي لحظه..
زاد خوفها..وهالخوف خلاها تنوض من مكانها وتمشي للباب بتعب فتحاته وطلعت..
توجهت للصاله لقاته غارق بالنوم ع الكنبه..
ماكانتش تبي تفيقه وتقلق نومه لكن خوفها كان مسيطر عليها مش عاطيها مجال دير شي تاني غير انها تفيقه..
وقفت عليه وهي تقول..
/عبد القيوم..عبد القيوم..
حطت يدها ع كتفه ونادت بإسمه مرة تانيه..
هو فاق..عقد حواجبه بعدين وجه نظره ليها..شاف حالتها ناض مفزوع وهو يقول..
/كنك!؟
طوبى وهي تبكي..
/خايفه..حاسه روحي بنموت..
وقف وخداها لقلبه وقعد يمسح ع شعرها وهو يقول..
/تعوذي من الشيطان واقري سورة الفلق..
قعمز بيها وبدي يقرا وهي تقرا معاه سكت وخلاها تكمل بروحها وكل ماتسكت يقول عاودي وهي قعدت تعاود فيها لعند ماهدت نفسها وتبدد خوفها ورجعت رقدت مرة تانيه...
رقدها ع الكنبه كويس..بعدين مشي جاب بطانيه خفيفه وغطاها وهو جاب فراشه وقعد مقعمز عليه جنبها يتأمل فيها بحزن..والنوم رجع يصارع فيه وهو يقاوم من خوفه عليها لعند ماطلع الفجر..وآذن المؤذن وقلبها فيقها للصلاة..
اول مافتحت عيونها وشافاته قدامها ابتسمت تلقائيا..
هو بضحكه قال..
/ارهيقم هولان..
ردت عليه وهي مش واعيه هلبه..
/ارهيقي هولان..
تنهد بعدين ضحك وناض وقف وهو يقول..
/هي صحصحي الفجر آذن بنصلوا مع بعضنا اليوم..
ومشي طول بإتجاه الحمام..قعدت معاها بعيونها لين خشله..
ومجرد ماخش وعت تماما وتفكرت كل شي كانت ناسياته..
اختفت ابتسامتها وضاق صدرها ع الآخر..
ناضت قعمزت وهي مضايقه ومخنوقه..
تأففت..بعدين استغفرت..مسحت بإيديها ع وجهها وقالت..
/يارب..
🍃🍃
وصلوا مع بعض الفجر وبعد الصلاة هو ناض ومشي طول لفراشه تمدد عليه ورقد كانت تشوفله بضيق شديد عارفته سهر عقاب الليل عليها..
ناضت والدموع في عيونها ومشت لدارها خشتلها وسكرت عليها..
وبعد ماولت حبيسة جدران دارها وافكارها..
كانت تتفكر في كل اللي سمعاته من اميمه لحظات ماتستوعبش ولاتصدق..ولحظات تفرح..ولحظات تحزن وقلبها يتوجع..
وهي تفكر..رجعتها ذاكرتها للخلف وفكرتها بقصته مع عبير خطر عليها كلام صفيه وقتها اللي قالت فيه ان تلخبط بينها وبين البنت اللي يبيها..
ولأن ذاكرتها قويه فكرتها بالفترة اللي انكسرت فيها عبير وقعدت هي تروح بيها للحوش..
توسعوا عيونها ع الآخر بدهشه وهي تقول..
/شكله كان يجي للكليه!
حاولت تعصر مخها لعل وعسى تذكر لو شافاته في الكليه وممكن لأن المواقف اللي جمعتها بيه وقتها كانت عابره ماتخزنتش في ذاكرتها..
تنهدت..وفكت شعرها..رفعت رجليها بعد ماثنت ركابها ع السرير ضمتهم ومازال تفكر وتتسائل..
"علاش مايبيش يصارحها"
حاولت ع ماتقدر تلقى اجابه تانيه غير اللي قاعده في عقلها لكن مع الاسف مالقتش مايقنعها..
غمضت عيونها ونزلت منهم دموع وبدت تردد..
"سبحان الله وبحمده سبحان الله وبحمده سبحان الله وبحمده"
رددتها مرارا وتكرارا...وكل شويه تحس بالرضا والراحه يملوا في قلبها..
فتحت عيونها..ناضت من السرير..ومشت خدت ملايتها لبستها وتوجهت للقبله..وبدت تصلي في الإستخارة..
فوضت فيها الأمر لله وخلتها عليه وشن مايقدرلها حتكون راضيه بيه..
بعد ماكملت الصلاة..حولت الملايه علقتها..ووقت ع المراية رفعت شعرها وداراته كعكه ومشت طلعت من الدار وتوجهت للكوجينه..
خشتلها وجهزت الفطور والقهوة..بعدين مشت طلعت للصاله..
وصلت فيه..قعمزت ع رووس اصابعها وبدت تفيق فيه وهي تنادي بإسمه..
فاق طول وشافلها بفجعه..
ابتسمت بضيق وقالت..
/مافي شي مافي شي..نوضتك بش تفطر..
ارتخوا ملامح وجهها وقال بصوت ناعس..
/مازال نبي نرقد شويه...غمض عيونه ورجع رقد مرة تانيه...
وقفت ع حيلها وهي مضايقه..وكما هو معروف عن طوبى لازم تحمل نفسها ذنب وتقعد تحاسب فيها عليه هذا غيؤ شعورها انها قاعده عبأ عليه وهالشي يزيد يقينها بسبب عدم مصارحته ليها...
مشت للكوجينه ودموعها في عيونها غطت الفطور والقهوة وولت للدار...
🍃🍃🍃🍃🍃
الساعه 11:15صباحا..
كان المهدي واقف قدام حوشه في المزرعة يجري في اتصال بعبد القيوم..
بعد مانادى الخط تلاثه مرات رد عليه عبد القيوم..
"ايوه"
المهدي:كنت راقد!
"ايه ايه..كيف الحال"
المهدي:الحمد لله..كيف حالكم انتم اليوم..
"الحمد لله"
المهدي: كلمتك بش نعزمكم ع الغدي عزمت باقي العيله وتوا ع جية..
"تو نشوف طوبى ونرد عليك"
المهدي:ع راحتكم غير بنقولك احني بعد الغدي مروحين..
"تمام تمام"
المهدي:ok..اوينا..
"بالسلامه"
نهي المهدي المكالمه وهو يشوف لباب الحوازة اللي قاعد يفتح فيه العامل ويخشوا منه سيارات عبد المطلب وحسين..التفت للحوش وقال..سدرة العيله جو اطلعي..
ومشي للرجاله وهي شويه وطلعت تستقبل نساوين عليتها..
🍃🍃🍃🍃
مقعمزة ع سريرها قدامها مصحف الحفظ الميسر والمذكرة تكتب في الآيات اللي قاعده تحفظ فيهم..
دق باب الدار..شافتله..
"طوبى"
بدت ع وجهها ملامح الضيق لكن ردت عليه عادي..
/نعم!
"توا كلمني المهدي قال عازمنا ع الغدي عنده وحتى باقي العيلة جايين"
نزلت من السرير وهي تفكر..وصلت في الباب وفتحاته..
عبد القيوم:تبي تعدي!؟
طوبى:انت تبي!؟
ضحك وقال..
/ع راحتك انتي..
يدوب ابتسمت وهي تقول..
/باهي نمشوا..
قاللها:خلاص وتي روحك معاش قعد وقت ع صلاة الجمعه..
ومشي بإتجاه الحمام..
وهي تنهدت بضيق بعدين خشت وسكرت الباب..
🍃🍃🍃🍃🍃
جاية لحوش امها اليوم تتغدا عندها..
كانت واقفه معاها في الكوجينه تساعد فيها فتجهيز الغدي وفي نفس الوقت تسمعلها..
☘فايزة بضيق..
/ماتجيش منهم اللي تفرح يابنتي..
صفاء:اسمعيهم انتي مش حتخسري شي عجباتك دوتهم واستريحتيلهم كان بيها ماعجباتكش فوتيهم..
تنهدت بعدين قالت..
/باهي شن رايك ناديهم يجوا هني ولانتلاقوا برا؟
صفاء وهي تفكر قالت..
/نقولك اتفقي معاهم تتلاقوا في وحدة من الجرادين واني نخلي اشرف يرفعك..
سكتت فايزة للحظات وهي تفكر بعدين هزت راسها وقالت..
/خلاص كلمي راجلك وشوفيه امتى يفضى وقوليلي..
صفاء:حاضر...
🍃🍃🍃🍃
قبل صلاة الجمعه بربع ساعه كانوا عبد القيوم وطوبى في مزرعة المهدي..
اول مانزلت طوبى مشت طول خشت للحوش اما عبد القيوم بعد ماسلم ع الرجاله ركب مع المهدي في سيارته وطلعوا مز المزرعه ووراهم سيارة حسين رافع مع بوه ومعتز وتوجهوا طول لأقرب جامع في المنطقه..
🍃طوبى بعد ماسلمت ع الكل شدت بنتها وقعدت تلعب معاها وتهدرز عليها فهموا البنات وقتها انها ماتبي تتكلم في شي اساسا كان واضح من عيونها الحزن اللي تحاول تخفيه بالضحكه والإبتسامه..
☘مافارقتش بنتها نهائي حتى ع الغدي قعمزتها في رجلها وقعدت توكل فيها وهدا كله كانت تراقب فيه سدرة بصمت..
ويجي وقت مرواحهم بعد ماسلمت طوبى عليهم كلهم جت لبنتها ضمتها بقوة..
جنة قالت..
/تمشى ماما!
طوبى وهي تتكلم عند وذنها..
/ايه توا بنمشي لكن قريب نروحلك ونقعدوا مع بعض ديما..
ماسمع حد كلامها هدا غير هاديه اللي كانت واقفه قريبه ع جنة واستغربت فيه..
باست طوبى خدود بنتها وتباعدت عنها وهي تقول..
/خليك عاقله وحلوة باهي..
هزت جنة راسها وقالت بنبرة طفوليه لذيذة وهي تمد في الالف..
"باهي"
ضحكوا طوبى تضحك معاهم من بين دموعها بعدين مررت نظرهم عليهم وقالت..
/بالسلامه..
ردوا عليها السلام وهي مشت بسرعه طلعت من الحوش وخلت البنات في حالة ضيق ع حالها لكن سدرة اللي كانت تراقب في حركاتها وسكناتها مابطلتش تفكير..
🍁🍁🍁🍁
ويعدي باقي اليوم ع طوبى وعبد القيوم زي باقي أيامهم مع بعض..
انسجام وهدرزة..وحتى خدت درس خط جديد هديكا الليله.
وضعها يبان عادي جدا بس عبد القيوم حس ان فيها شي متغير ولما حاول يفسره قال اكيد بسبب فراقها عن بنتها..
🍃🍃🍃🍃
تاني يوم..
السبت..
الثاني والعشرين من شهر صفر..
10اكتوبر...سنة 2020..
الساعه 12:00 قبل الظهر
كان عمر مقعمز في مكان اشبه بالحديقه العامه يستنى في نفيسه..
كل مايشوف وحده جايه يحسابها هي اللي تبان عليه شكلها غير مقبول عنده يدعي ربي من وسط قلبه ماتكونش هي لعند ماشاف وحده صاحبة وزن ثقيل ماشيه يشوف فيها جايه ناحيته قعد مفنص عيونه بصدمه وهو يقول..
/شن هدا ياسميرة الله يسامحك!
وصلت فيه البنت وقالت..
/السلام عليكم..
هو بصدمه رد..
/وعليكم السلام..
قالتله:انت عمر شنيبه!؟
كان يبي يقول لا لكن هز راسه بإيجاب..
ابتسمت وقالتله..
/راجي شويه..
ومشت قعمزت في مقعد قريب عليه طلعت هاتفها دارت بيه شي بعدين شافت للطريق وهي مبتسمه وعمر يشوفلها بريبه واستغراب..
رفعت يدها واشرت بيها التفت شاف لمن اشرت ويفتح عيونه ع وسعهم بإنبهار..
شاف وحده برغم انها كانت لابسه لبس محتشم وغير ملفت ومش حاطه في وجهها ذرة مكياج لكن جمالها الناعم كان طاغي مخليه مش قادر يحول عيونه عنها..
وصلت فيه وقالت..
/السلام عليكم..
عقد حواجبه وابتسم ونزل عيونه وهو يقول..
/وعليكم السلام..
هي قالت..
/اني نفيسه قريبة ابلة سميرة السايح..
هز راسه ووسع شويه وقاللها..
/تفضلي قعمزي..
هي قالت..
/شكرا..
وقعمزت جنبه بمسافه..
قعدوا ساكتين..شافلها..لقاها تشوف للطريق وباين عليها الخجل..وملامحها جدا جميله وناعمة شكلها لطيف للغايه حمحم وقال..
/كيف الحال..
شافتله بخجل وقالت..
/الحمد لله..شن حالك انت..
عمر بإبتسامه..
/الحمد لله..
هي قالت..
/اسفه ع اللي بنقوله توا ياريت تخش في الموضوع طول مانقدرش نعطل عن الخدمه..
ضحك وقال..
/مش مشكله..بس يعني انتي اللي طلبتي تشوفيني!
رفعت حاجبها وقالت..
/مافهمتش قصدك..
ضحك تاني وقال..
/لاشكلك فهمتيني غلط..مسح ع لحيته وقال..اللي نقصده انك طلبتي تشوفيني بش نتفاهموا قبل ليصير اي شي رسمي ولا!؟
رخت حاجبها وقالت..
/صح..لكن غرضي من طلبي هدا اني نسمعك منك انت..انت مطلق مرتين نبي نعرف منك انت علاش؟
ابتسم بعدين قال..
/غباء مني ابتسمت لما سمعت اجابته..
عمر:الاولى ماعرفتش نحافظ عليها والتانيه كانت ضحية انانيتي..
نفيسة:واني!؟
شافلها وقال..
/نبي نلقى معاك الاستقرار نبي ندير عيلة وصغار..
هي قالت..
/حتى اني هدا اللي نبيه ونبي فوق هكي الاحترام والتقدير ومانبي حد يدخل في حياتنا نهائي ومانبيش نعيش لافوق اهلك ولاجنبهم نواصلهم ماعنديش مشكله بس علاقتي بيهم لازم يكون فيها حدود لايدخلوا فيا ولاندخل فيهم..غيرت نظرها للطريق وقالت..المرار اللي شفته في تجربتي الاولى مانبيش نشوفه مرة تانيه..ردت نظرها ليه وقالت..لو شايف شروطي هادي ماتناسبكش نقولك كل شي وقسمة ونصيب ومالكش نصيب معاي..
عمر بإبتسامه..
/موافق عليها كلها ونأيدك عليها حتى اني مانبيش نكرر نفس الغلط..
نزلت عيونها وقالت..
/مش حنسيب خدمتي..
عمر:لامعليشي الحكايه هادي صعبه شويه بالذات مع وحده زيك انتي مانقدرش نقبلها ولانتحمل..
ابتسمت بخجل وهو ضحك ع ابتسامتها وقال..
/نرضى تخدمي في اي مكان تاني غير الخدمه في المصرف..شوفي التدريس..
قامت عيونها وشافتله وهي تقول..
/المهم نخدم..
عمر بإبتسامه:خلاص متفاهمين..
قالتله:لااستنى مازال في شي بنسألك عنه..
عقد حواجبه وهو مبتسم وقال..
/تفضلي اسألي..
نفيسه:مازال في قلبك شي لطليقتك الأولى!
بإبتسامه قال..
/لا المراة توا ع ذمة راجل تاني مجرد تفكيري فيها حرام اطمني ولت معاش تعنيلي شي اكثر من انها بنت جيرانا..
نزلت عيونها وقعدت ساكته..
هو قال؛هاه شنو توا متفاهمين..
قامت عيونها فيه وقالت..
/عطيني يومين نفكر ونرد ع ابله سميرة..
ناضت من مكانها وهي تقول..
/نستأذن..
ومشت وصاحبتها ناضت لحقتها وهو معاهم بعيونه وهو يضحك..
☘"طلع طرف وشخصيه"
نفيسه:لكن شايف رويحته خل نشحطه شويه..
صاحبتها بضحكه قالت..
/عاد هو لما شافك طاح فيك من اول نظرة..
ابتسمت وقالت..
/مش مهم المهم ربي يعوضني بيه ونعيش مرتاحه معاه..
قالتلها صاحبتها..
/قولي يارب وخليك ع الاستخاره..
نفيسه:ان شاء الله..
🍃🍃🍃🍃🍃
واقف تتكلم بالهاتف وهي تتفرج ع زهور الأقحوان..
طوبى:والله حتى اني نبي نشوفكم لكن الظروف توا مش مواتيتني..
"حاولي بيبو بالله عليك هي اللمة يوم الخميس الجاي بالك من هني لهداكا الوقت تترادع معاك"
ضحكت طوبى وقالت..
/إن شاء الله..
"ان شاء الله..خلاص مانعطلش عليك سلامات"
طوبى:سلام..
نهت المكالمه وهي تتمعن بنظرها في زهرة اقحوان عجبتها..
قدمت قطفتها بعدين مشت بيها للحوش وهي تفكر..
لما قربت توصل للحوش سمعت صوت عبد القيوم يتكلم بشي من الإنفعال..
خافت وقعدت واقفه في مكانها تسمع فيه..
🍃عبد القيوم وهو في الحوش يتكلم بالهاتف كان واقف قريب ع الباب اللي كان مفتوح..
/والله نادم اشد الندم..........ياريتني سمعت كلامك......مش عارف وقتها كنت نحسابها ساهله ونقدر عليها.......من غير تفكير عارف عارف ماحسبتهاش صح......ايوه مزبوط الكلمه اللي عطيتها مش قادر نرد فيها......وحلة ع قولتكم ووحلت روحي فيها.............نحاول نكمل اللي بديته كان لقيت روحي معاش نقدر بنقول مانقدرش وخلاص لايكلف الله نفسا الا وسعها........ان شاء الله ان شاء الله.....نتلاقوا ياغالي...السلام عليكم...
نهي المكالمه وشاف الباب بعدين طلع منه وقعد يدور ع طوبى لعند مالقاها واقفه ع نخلة ولاهية بهاتفها..
ابتسم ومشالها وصل فيها وهو يقول..
/عجبك الجو هنا!؟
ابتسمت وهي شاده دموعها بقوة وقالت..
/الخريف يهبل حتى ريحة الهوا متاعه حلوة..
عبد القيوم؛وتمرض..تعالي خشي جوا واشقي بغدانا راني متسهف ع الرشدة متاعك من امس وانا نحلم بيها..
ضحكت وقالت..
/باهي..
مشي وهي معاه..مظهرها من برا يبان ثابت لكن من داخل كانت منهارة وموجوعه لأبعد حد..
لما وصلوا في باب الحوش جاه اتصال شاف لهاتفه وقال..
/شويه وجاي..
تباعد عنها وهي بعد ماكانت تشوفله بنظرات كلها ألم خشت للحوش ودموعها ينزلوا..
مسحتهم ومشت خشت للكوجينه..
حولت شاربتها حطتها ع الكرسي..ورفعت كمامها ومشت لسلة الخضرة بس تاخد البصل وبدت تردد همسا في الصلاة الإبراهيميه...
🍃🍃🍃🍃🍃
الساعه 3:00بعد الظهر..
في دار المعيشه..
كانوا سميرة ونسرين وعمر مقعمزين مع بعض يشربوا في الشاهي الاخضر وحداهم الصغار اللي راقد واللي يتفرج ع التلفزيون.
عمر؛تريحتلها وحسيت في قبول..
ابتسمت نسرين..
سميرة وهي مبتسمه قالت..
/باهي ع شني تفاهمتوا..
ع خشة نضال وهو يقول..
/السلام عليكم..
ردوا عليهم السلام وهو قعمز بعدين عمر جاوب ع سؤال سميرة يقول..
/قالت عطيني يومين نفكر فيهم ونرد عليكم..
نسرين؛اللي فيها الخيرة يجيبها ربي..
كلهم بأصوات متقطعه قالوا..
/آمين..
غير نضال نظره لمعاذ اللي كان منسجم مع التلفزيوم قاله بصوت عالي..
/بطشه..
معاذ بإنزعاج..
/اص بنتفرج..
ضحكوا عليه ونضال زحفله وهو يقول..
/تكشخ عليا سفتول يامعفن..تي حي عليك حي..
ووصل فيها وقعد يضرب فيه مازحا ومعاذ يضحك من قلبه..
وعيون سميرة ع نضال وهي مبتسمه بود..
🍃🍃🍃🍃
الساعة 2:30بعد منتصف الليل..
طلعت من الدار وهي حاطه يدهاع صدرها تاخد في النفس بشي من الصعوبه وقلبها يدق بقوة من الخوف
قعدت تمشي وهي تردد بهمس..
"لاإله إلا الله..لاإله إلا الله"
شافت جهة الصاله..جو عيونه عليه وهو راقد ع الصالون غيرت نظرها عنه لباب الحوش توجهتله وهي مازال تردد في عبارة التوحيد..
فتحاته وفتحت باب الحديد اللي بعده ومشت طلعت وهدا كله وعبد القيوم ماحسش بيها..
🍃قعدت تمشي وهي تاخد في النفس وتردد..
"لاإله إلا الله"
من ضيقة والخنقه اللي هي فيها مااهتمتش لظلمة لأن الخوف كان مسيطر عليها بظلام ومن غيره هي كانت تبي تاخد نفس وبس كانت تبي لقلبها يهدا ويرجع لطبيعه
ماطاحتش من فمها كلمة التوحيد ماقدرتش تقول غيرها وهي تمشي وتمشي..
وبعد مامشت مسافه لابأس بيها وقفت عند وحدة من النخلات قعمزت تحتها وبدت تقول بإستنجاد..
/يارب ماليش غيرك يارب..يارب بيك اعتمصت يارب بيك اعتصمت يارب بيك استعنت ياربي ماقاعدلي حد غيرك..ياربي مايقدر ينجدني حد غيرك..ياحي ياقيوم ياقيوم ياقيوم كون معاي ع عدوي وعدوك يارب..كون معاي ع عدوي وعدوك..
🍃وهي تدعي نفسها يزيد يضيق اكثر تحس بشي في اعلى راس بطنها زي الحجر قاعد فيه حطت يدها عليه وغمضت عيونها وبدت تقرا بصوت مرتجف في سورة الفاتحه..
تقرا وتعاود فيها تقرا وتعاود فيها..وبعدها قرت الفلق كررتها اكثر من مرة..واخر شي بدت تقرا في النجم..
كل ماتقرا في سورة تشتد عليها الأعراض بس في قوة في داخلها كانت تساعد فيها ع المقاومه..
قاومت بقوة ايمانها بثقة الكبيرة في الله بإنكسارها ليه بقوة استعانتها بيه..تبرت من قوة ذاتها ومن قوة الخلق واستعانت بربها وقوته اللي مالهاش مثيل وكان حق ع الله نصر المؤمنين..
تلت اخر ايه من سورة النجم وخرت ساجده وبعد هالسجده خفت الاعراض لين اختفت تماما..
رفعت راسها من السجده وهي تاخد في شهيق وتزفر حست برواياها تصفوا وصدرها انشرح ع الآخر وملتها راحة عجيبه..
ضحكت ودموعها بدوا ينزلوا..
واتكت بظهرها وراسها ع ساق نخله وبدت تردد..
سبحان الله الحمد لله لاإله إلا الله الله أكبر لاحول ولاقوة الا بالله..
وهي تردد فيهم ماحستش بروحها لما خداها النوم وغفت..
🌼مروا بضع دقائق..
فتحت عيونها وهي تسمع في آذان الفجر الكاذب..
مررت نظرها حواليها بعدين شافت لروحها شن لابسه..بيجامه وقاعده من غير حجاب وحافيه..
ناضت طول وقعدت تمشي بسرعه بإتجاه الحوش واكبر خوفها ان عبد القيوم يستاقظ بيها..
وصلت في الحوش وخشت وسكرت الباب بهدوء..
مشت بإتجاه الصالون دارت عليها طله لقاته مازال غارق في النوم..ابتسمت بحزن بعدين توجهت للحمام..
☘☘☘☘☘
صلت القيام ركعتين وختمتهم بالوتر وقعدت في مصلاها..
تستغفر وتصلي في الصلاة الابراهيميه وهي تفكر في اللي صار معاها..ماحستش بمعنى الفرحة الحقيقي الا بعد ما استشعرت من اللي صار معاها قوة معية الله وقربها منه طوبى توا بدت تحس ان الله سبحانه وتعالى اقربلها من كل حد في الدنيا ومش اي حد يحس هالإحساس مش اي حد يحس بقرب الله ليه وكأنه يشوف فيه..هالآحساس يحمي قلب صاحبه من التعلق بالدنيا ومن اي حد فيها مهما كان يحبه..
ناضت من مصلاها ومشت بإتجاه الزيانه..فتحت الدرج متاعها وطلعت منه المذكرة اللي مخصصتها لكتابة يومياتها..
سكرت الدرج ومشت للسرير قعمزت عليه..
فتحتها فاحت عليها ريحة عطر عبد القيوم..ابتسمت بحزن والدموع عبوا عيونها..قرت بيت الشعر تنهدت..بعدين خدت قلم الحبر وقلبت الصفحة وبدت تكتب..
(اكيد وحده من احلى النعم ان ربي يرزقك بإنسان يحبك بنية صافيه وبكل صدق وهادي اكثر حاجه تمنيتها في حياتي..بس مع الوقت تعلمت ان الحب ضعيف هلبه قدام الظروف القاسيه مهما بلغت درجة قوته..واهم شي تعلمته ان الحب اللي مستحيل يتبدل ولاتغيره الظروف بل بالعكس تزيد تقويه هو حب الله وسبحانه وتعالى الحب اللي يقعد للأبد واللي بيه العبد يوصل لأعلى الدرجات دنيا وآخره الحب الوحيد الباقي للعبد..
ممكن القرار اللي خديته توا حيوجعني هلبه بس مع الوقت الوجع حيخف وحنكمل حياتي واني مرتاحه)
"طوبى"
فز قلبها..شافت للباب وقالت..
/نعم!
"كنك واعيه توا !؟"
حطت المذكرة ومشت للباب فتحاته وقالت بضحكه..
/مافيا شي غير نضت نصلي في القيام بس..
ابتسم وقال..
/كويس..
آذن الفجر الزوز قالوا مع بعض..
"صدق الحق"
شافتله وهي تقول..
/برا للجامع..
شافلها شويه بعدين قال بإبتسامه..
/حاضر..
ومشي من قدامها للحمام ابتسمت بحزن وعيونها مليانات دموع بعدين سكرت الباب..
🌼🌼🌼🌼
ومع طلة الصبح دارت طوبى احلا فطور واحلا قهوة وهو اللي شم القهوة من فم الباب قلبها رفرف بمشاعره..
خش..ومشي للكوجينه واول ماشافها صبح عليها كعادته ب..
"ارهيقم هولان"
وهي ردت..
"ارهيقي"
وياريتها كانت تعرف باللي يصير لقلبه لما تقولهاله..!
🌼🌼
شربوا القهوة وفطروا وهما يتجاذبوا في اطراف الحديث وبعد الفطور طوبى قالت..
/عبد القيوم بنطلب منك طلب..
بإبتسامه قال..
/اطلبي..
قالتله:بماإن الحكايه طلعت للعيله معاش ولى في مشكله فالمشية لطرابلس..
عقد حواجبه وقال..
/تبي تعدي لطرابلس!؟
طوبى؛ايه..بس لو انت عندك مشكله نمشوا لشقتك وغادي يجوني بنت اختي ولااختي يرفعوني للحوش..
وهو عاقد حواجبه وع وجهه باديه ملامح العصبيه..
/لاماعنديش مشكله وانتي تعرفي انا نشيلك غادي نحطك قدام الباب ومانحس في حد..
ابتسمت وقالت..
/باهي..بس في حاجه تانيه..نبيك نخليني نبات يومين تلاته..
حس بقبضة في قلبه وحس بنفس الغمه اللي يحس بيها وين تجيبله سيرة البعد حتى وان كان مؤقت..
طوبى؛استاحشتك ماليا ولمتهم الحوش نبي نقعد مع بنتي ايام بلياليهم نبي نلحق نشبع من بنت اختي وولدها قبل لتولي تسافر..
بضيق مرر نظره قدامه وهو يفكر بعدين ع مضض قال..
/كانت انتي تبي هك مانقدرش نمنعك...
ابتسمت بفرح يخفي حزن كبير في داخلها..
/بارك الله فيك ويرحم والديك..
شافلها بإستغراب..
ضحكت وقالت..
/المهم نبيك اليوم ترفعني..
هو بدي يحس بأن في شي مش مريح في كلامها بس مع هذا ماقدرش يمنعها عن شي خاطرها فيه فالنهايه كلهم يومين تلاته واخرتها مروحه معاها واهو بالمرة يحصل فرصه يقضي اشغاله المهمه..
شافلها شويه بعدين هز راسه وقال..
/حاضر..
🍃🍃🍃
ومع الساعه 11:00 صباحا..
كانت طوبى جاهزة طلعت وهي شاده شنطه متوسطه الحجم في يدها فيها حاجتها المهمه..
وهو لما شاف هالشنطه زاد اطبق صدره..
اما هي طلعت من الحوش موجوعه وقلبها مليان حزن وكالعاده اخفت هدا كله ورا ملامح العاديه وابتسامتها المصطنعه...
🍃🍃🍃
طول الطريق كانت تهدرز عادي زي قبل لكن هو يبادل فيها الكلام بالغصب للحظه حست روحها ولت ثرثارة لكن ماحستش بحالته اللي كان باين عليه مش راضي ابدا بقعادها بعيده عنه..
🍃ويوصلوا لطرابلس..ولأول مرة يكره عبد القيوم الخشة لطرابلس..
حتى شارع القهوة كرهه اللي مجبور يخلي فيه قلبه بعيد عنه لثلاته ايام بساعاتهم ولياليهم..
🍃درس قدام الباب بعدين قال..
/خلي هاتفك عندك نتصل تردي تمام..
ابتسمت وقالت..
/ماتخممش فيا بديت نعرف نتصرف بروحي..
بإستغراب قال..
/شن قصدك!؟
ضحكت وقالت..
/قصدي ماتقعدش شاغل عقلك بيا شوف حالك اللي عطلته قريب شهر..
سكت شويه وهو يشوفلها بنظرات بين العصبيه وعدم الرضا بعدين قال..
/نتصل بيك تردي عليا تمام!؟
بضحكه قالت..
/تمام..
فتحت الباب ونزلت دقت دقة وحده ع الباب انفتح طول وهي خشت واول ماتسكر الباب هو طول تحرك..
ومافيش عيون شافت السيارة غير عيون محمود اللي قال في نفسه اكيد تشابه سيارات لاأكثر..
☘شبابيك السيارة مظلمه ماشافش عبد القيوم لأنه كان مسكرهم☘
🍀🍀🍀🍀
ويعدوا ثلاثه ايام ع طوبى في حوشها وسط اهله..
ع قد ماكانت فرحانه بوجودها مع بنتها وبيناتهم ع قد ماكانت حاسة بالوحشه وان فيها شي ناقص وهو مش معاها وقعدت تواسي في نفسها وهي تقول..
"معليشي لازم تتعودي"
🍁اما هو ماكانش قادر يعيش زي عادي الناس كان مخنوق ومضايق لأبعد حد ماعنده رغبه في شي صح شاف اشغاله ومشي حتى للمعهد دار طلة عليه لكن ماقدرش يخفف ولو شويه من المشاعر السلبيه اللي كان يحس بيها..
وياااه ع الارياف قاعده تزيد كل دقيقه وين يتصل بيها هي ماطولش معاه وتتحجج بالزحمه وهو كان يلقى ماتسكرش بكل..وصلاته لمرحلة ندم فيها ع مسايرته ليها..
هدا كله ماوصلش لطوبى منه شي..خوفها من اللي بيصير مستقبلا وتفكيرها الدائم فيه مخليها ماتهتمش للعواطف نهائيا..
🍃🍃🍃🍃
وجي اخر يوم ليها في حوشها او زي ماكان عبد القيوم فاهم..
🍃"نبي نطلق"
غرفه بضيق:والله توقعتك..
طوبى بحزن ودموعها في عيونها..
/خلاص ساد بارك الله فيه دار معاي واجبه والزايد مافي شي يجبره يكمل عمره مع مراة مش حيجيه من وراها كان الشقا..
سدرة وهي تسمع فيها قالت..
/لالا..في شي صار خلاك تاخدي هالقرار ماكنتيش هكي قبل..
غرفه وهي تتسائل..
/حق اللي قالاته سدرة!؟
نزلوا دموعها ومسحتهم وبدت تحكيلهم ع المكالمه اللي سمعتها..
سدرة قعدت ساكته مابتش تعلق.
غرفه بصدمه:معقوله!
طوبى بنبرة مرتعشه وهي تحاول تمنع نفسها من البكاء..
/زي ماتوقعت لتوا ماباش يصارحني لأنه مش قادر يكمل..
سدرة بإستغراب..
/يصارحك بشني!؟
شافولها الزوز بصمت للحظات بعدين غرفه بدت تحكيلها..
سدرة ابتسمت بأسف وقعدت ساكته..
طوبى بإستغراب..
/كأنك ماتفاجئتيش!
سدرة:لاتفاجئت وهلبه..بس اللي مافاجئنيش الكلام اللي سمعتيه منه..تنهدت وقالت..يعني خلاص هدا قرارك النهائي!؟
غرفه:غير اصبري ياسدرة..طوبى مازال في قدامك علاج نسيتي الحجيمه من يعرف يديرها زيه!؟
طوبى:العلاج نقدر عليه بروحي والحمد لله والحجيمه في هلبه نساوين يعرفوا الحجامه هادي يجوني للحوش ويديروهالي..
غرفه بعدم تقبل..
/مش عارفه..خايفه تكوني استعجلتي ياطوبى!
طوبى بضيق وحزن..
/بالعكس خديتها من قصيرها..
سدرة؛معناها وين بيجي غدوة بتدوي معاه في موضوع الطلاق..
طوبى:لا..نبيكم انتي والمهدي تحكوا معاه فيه..
غرفه؛لاغلط هكي مفروض انتي تدوي معاه فيه..
طوبى بألم:ياغرفه اساس كل شي من البدايه كان بين سدرة والمهدي وخالي وبين عبد القيوم..خالي مازال مطول برا مافيش غير سدرة والمهدي هما بدوه هما ينهوه.. ضمت سدرة شفايفها لداخل بأسف وهزت راسها بالموافقه..
🍃🍃🍃🍃🍃
الساعه 11:00ليلا..
في دار نوم سدرة والمهدي..
هي واقفه ع الدولاب دس في حوايجه وتتكلم وهو مقعمز ع السرير ويسمع فيها..
🍃سدرة بضيق..
/مشيتوا مشيتوا وجيتوا لكلامي مش قتلك يامهدي اني مش قتلك..
المهدي بأسف..
/مش عارف حسيتها يبيها بصدق حالته يوم جانا مختار المزرعه وشافهم اكدتلي ان مستعد يبيع الدنيا ع خاطرها ..
سكرت سدرة الدولاب وقالت..
/دوة فاضيه مافي حد يبيع دنيته ع خاطر حد...
المهدي رفع حواجبه تعجبا..
مشت قعمزت ع السرير وهي تقول..
/الواقع ديما يثبت العكس ديما هدا علاش كنت الوحيده فيكم اللي كنت متأكده انه مش حيكمل معاها..
تمددت ع السرير ورقدت ع جنبها الايمن وهي عاطياته بالظهر وقالت..
/تصبح ع خير..
المهدي وهو يشوفلها بإبتسامة اسف..
/قدامك كل خير..
☘عاذرها ومش قادر يلومه لأنه السبب اللي خلا تفكير سدرة يولي هكي☘
🍃🍃🍃
وعدت هديكا الليله..
ع قلب متلهف امتى يطلع الصبح..وقلب تاني خايف من طلوعه..
🍃من بعد ماصلت الفجر معاش رقدت..
القلق ياكل في قلبها والضيق قاعد ملازمها حتى بعد فاقت بنتها وباقي العيله وعبت المكان دوشتهم ماقدرتش تخفف عنها ولو شويه..
🍃🍃
طلعت اريج للمدرسه مع الساعه تسعه..
وآلاء طلعت مع امها في سيارة خالتها غرفه متوجهين لحوش صفيه اللي عزمتهم ع الغدي..العزومه كانت للكل لكن ماقدروش يلبوها غير فردوس وآلاء..
وهي ماقعد حد في الحوش غير طوبى وغرفه والصغار..
وماان جت الساعه 11مزبوطه خشت سدرة مع راجلها للحوش دخلاته للمربوعه الخارجيه بعدين خشت داخل..
🍃"كلمك توا"
طوبى ودموعها في عيونها..
/قال خش للشارع..
غرفه بضيق:لازم تطلعي معاهم ياطوبى..
سدرة:راي من رايها لازم تكوني موجوده معاه..
طوبى بألم:صعبه هلبه مانقدرهاش..غلبتها دمعتها هربت بيها عنهم للدار خشتلها وسكرت عليها..
تأففت غرفة بضيق وقالت..
/استغفر الله..
اما سدرة اللي كانت حزينه جدا ع حال طوبى طلعت للمربوعه الخارجيه...
اول ماوصلت في بابها دق باب الحوش..
خشت طول وهي تقول للمهدي..
/اهو جي افتحله..
تنهد المهدي وناض ومشي طلع من المربوعه وسدرة قعمزت وقعدت تمسح بيدها اليسار ع فخدها من التوتر..
🍃🍃
دخل المهدي عبد القيوم للمربوعه الخارجيه..
لما خش تفاجئ واستغرب وجود سدرة ورجع قلبه انقبض مرة تانيه..
بعد ماقعمز قال..
/كيف الحال..
ردوا عليه باصوات متقطعه..
/الحمد لله..
ساد الصمت للحظات..
المهدي وسدرة شافوا لبعض وهو يشوفلهم..
هز المهدي راسه وهو يشوف لمرته هي تنهدت وشافت لعبد القيوم وقالت..
/خوي عبد القيوم..
عقد حواجبه وهو يشوف للأرض..
سدرة:بصراحه الجمايل اللي درتها معانا لتوا مانقدروش نوفوها مهما نديروا..درت معانا اللي ماداراش معانا اللي من دمنا..وكنت ديما عند حسن ظن بوي الله يرحمه بيك..اللي نبي نقوله بارك الله فيك اللي درته مع طوبى بالذات حيقعد جميل في رقبتنا لأخر العمر الحمد لله بفضلك من بعد فضل الله ولى حالها باهي لهني انت درت اللي عليك وزياده..
رفع عيونه وشاف للمهدي..
المهدي عقد حواجبه بضيق..
سدرة كملت تقول..
"طوبى تبي الطلاق"
الجمله كانت وكأنها سكين خش لقلبه ضيق عيونه وشاف لسدرة بعدم استيعاب بعدين غير نظره للمهدي وقال..
/نعم!!!
المهدي:هدا طلب طوبى هي هكي تبي..
قعد يشوف للمهدي بصمت وسدرة تشوفله وهي تترقب في رده..
ناض من مكانه وقال للمهدي بنبرة حزم بان فيها الغضب..
/نا طالع للسيارة خمس دقايق وتلحقني مرتي بالله العظيم ماني طالع من الشارع من غيرها..
ومشي طول بدون مايزيد كلمه طلع من المربوعه..
المهدي شاف لسدرة وقال..
/شن رايك!
شافتله وهي مش عارفه شن ترد بس من داخلها كانت فرحانه ع الآخر..
*******
سدرة بنرفزة..
/نوضي اطلعي ماتشيطليش ريقي..
غرفه بضحكه؛ياسرك نكد يامراة شن عندك ديري بوجوهنا اطلعي روحي مع حبيبك ياداره الكبد..
ضحكت سدرة..
طوبى وهي متوترة وحاسه قلبها بيطلع من مكانه قالت..
/باهي باهي..ان شاء الله خير..
سدرة يإبتسامه..
/خير بإذن الله خير..
🍃🍃🍃
قدام الحوش في سيارة عبد القيوم اللي كان في قمة الغضب وهو يقول..
/مانبي نحكي في شي توا ارجوك..
المهدي:تمام تمام زي ماتبي..
ع طلعة طوبى بشنطتها شافها فتح الباب ونزل ومشالها خدي الشنطه بدون مايشوفلها حطها في الكرسي الخلفي بعد ماسكره..فتحلها الباب اللي جنبه ركبت وهي تشوفله بتوتر وهو مايبيش يشوفلها..
مشي بيركب وهو يقول..
/السلام عليكم..
المهدي وهو مبتسم..
/وعليكم السلام..
ركب عبد القيوم وشغل سيارته وتحرك طول..
ومحمود قياد الاحوال شافه لكن ماشافش طوبى وهي راكبه السيارة..رد نظره للمهدي وهو مستغرب والمهدي بعد مامشت السيارة ولى خش لحوش طوبى وسكر الباب..
🍃🍃🍃🍃
في الطريق..
كان عبد القيوم يسوق بصمت وملامح الغضب باديه ع وجهه..
بانت عليهم الشمس..نزل الواقي اللي قدامها بش يتقي عليها الشمس بعدين خدي نظاراته ولبسهم..
طوبى وهي تشوفله قالت بإرتباك..
/عبد القيوم..
هو قال:مانبي نسمع شي ولانحكي في شي توا نهائي..
سكتت وهي مضايقه..وهو شغل الراديو ع قناة للقرآن وعلا الصوت..
تنهدت واتكت ع الكرسي وقعدت تسمع..
وبعد مرور نص ساعه كانت طوبى رايحة في النوم..
شافها..نزل الكرسي شويه بش ترتاح في نومتها بعدين ركز في الطريق..
🍃وقعدت طوبى راقدة لين وصلوا للمزرعة..
فاقت لما سمعت صوت البوابه..شافتلها بعدين شافتله لقاته قاعد ع حاله..
تنهدت بضيق وقعد ملتزمة الصمت لعند مادرست السيارة..
قاللها..
/انزلي..بعدين فتح الباب ونزل..
هي فتحت الباب ونزلت وسكراته شافاته جاي ناحيته..فات من وراها فتح الباب الخلفي ونزل شنطتها بعد ماسكر الباب قال..امشي قدامي..
نفدت امره ومشت بإتجاه الحوش وهو وراها..
وصل في الباب فتحه وتباعد..خلاها تخش وخش وراها..
وصلها بشنطتها لباب دارها ومشي طول لداره خشلها وسكر وراه الباب..
تنهدت بحزن بعدين خدت شنطتها وفتحت باب دارها وخشت...
🍁🍁🍁🍁
وقعد عبد القيوم واخد منها موقف النهار كله حتى للغدي طلع تغدا معاها لكن وهو ملتزم الصمت...
واستمر هالحال لقبل المغرب بساعه..
🌼🌼🌼
طلعت من الحوش وهي شاده في يدها سفرة قهوة منثور عليها الفل..
ومشت بإتجاه المظله وين ماكان مقعمز مع اللاب توب متاعه..
وين وصلت غادي لقاته واقف بعيد شويه عن المظله وهو يتكلم بالهاتف..
حطت سفرة القهوة ع الطاوله وقعدت واقفة تراجي فيه يكمل مكالمته..
بعد مانهاها التفت..شافها..
عقد حواجبه وقدملها وهو يقول..
/من قالك نبي قهوة!؟
طوبى:تعودنا نشربوها توا.
رفع حاجبه وقال..
/وانتي كنتي تبي تقطعي هالعادة!
غير نظرها عنها شويه بعدين ردتهولها وقالت بهدوء..
/تعطيني فرصة نشرحلك!؟
حط هاتفه ع الطاوله وشافلها وهو يقول..
/مانبي نسمع منك شي انتي اللي لازم تسمعي توا وبس..
تسارعت دقات قلبها وهي تشوفله بترقب..
قاللها بتساؤل متعجبا..
/معقوله لعند توا مافهمتي! معقوله بعد هذى كله مازلتي ماحسيتي بيا!!معقوله الدنيا كلها تشوف اللي في قلبي ليك من عيوني وانتي ماتشوفي شي!!؟ يكون في علمك..عمر اللي في قلبي ليك لاعام ولاعامين..12سنه راهم 12سنه ربي بس يعلم العذاب اللي عشته فيهن..حط يده ع صدره وقال..اللي نحس بيه هنا شي مش قادره نوصفه..نا مستعد ع شانك نتحمل كل شي حتى الموت..مستعد نواجه اي حد ومايهمني شي غيرك انتي..انتي تعرفي شن انتي عندي نا..اغلى ماتمنيت انتي اكثر حاجه طلبتها من ربي..انتي عندي
روحي وعمري وقلبي من غيرك مش قادر نعيش..تنهد بحرقه وقال..تعرفي..مش قادر نطلع ولو شويه من اللي في قلبي ليك..حاس روحي عاجز تعرفي ليش! لإني خايف بعد اللي سمعتيه تكوني مازلتي مافهمتي!
🌼تشوفله وتسمع فيه كيف يتكلم وهي مصدومه ع فرحانه ع مندهشه..قلبها يرجف..وانفاسها تسارعت...توا بس استوعبت اللي سمعاته من اميمه توا بس صدقاته وحست بيه...معاش عرفت شن ترد ولاكيف تتصرف من ارتباكها وصدمتها لقت روحها لافه وماشيه عنه ومخلياته..
هو بصدمه قال..
/طوبى!
وقفت في مكانها والتفتت شافتله بدت ع وجهها ملامح البكاء..وفي لحظه رمت كل شي وراها مخاوفها وهواجسها والماضي المؤلم بكل تفاصيله والآثار اللي خلاهم ومشتله تجري..
تبدلت ملامح وجهه من الصدمه لضحكه فرح مرسومه ع وجهه لما قربت توصل فتح ايديه..وهي زي الطفله الصغيره نطت وتعلقت فيه وقعدت تبكي..
وهو ضمها وقال..
/نحبك..نحبك..نحبك..نموت فيك..ارهيقم هووولان.
سكتت عن البكي فجأه وخرت شويه وهي تشوفله بإستغراب..
وهو يضحك..
ضحكت بعصبيه من بين دموعها وضرباته ع كتفه وهي تقول..
/يامحتال خزي عليك...ورجعت ضماته وولت تبكي مرة تانيه..
هو بضحكه قال..
/ بطلي بكا..
استمرت في البكي ومابتش تسكت..
هو قال..
/طوبى خلاص!..
زادت في البكي..
وماحستش بروحها الا والدنيا تلف بيها ضحكت من بين دموعها وهي تقول..
/خلاص..
عبد القيوم..
/قولي نحبك..
ضحكت وقالت..
/ارهيقي هولانه هولانه..
هو قال..
/ناعليا من هولانه هولانه..
قعدت تضحك وهو يضحك معاها واصوات ضحكاتهم عبت المكان خلاته كله بهجه وفرح..وحب في حب...
🌼 انت و بس
غلاك بحياتي يا عزيز نفس
عايش عليك و بيك انت و بس
عايش حياتي بيك
نفرح و نزهى بس وين انجيك
لا نريد غيرك لا غلا خاطيك
للقلب حبك يا حبيب ونس
عايش عليك حياتي
انت اللي فات و اللي آتي
انت حبيبي في جميع أوقاتي
ف القلب حبك يا غلا انغرس
انت وبس
غلاك بحياتي يا عزيز نفس
عايش عليك وبيك انت وبس.🌼
#انا_وياك
#طوبى
...يتبع....
